][§¤°~^™ مـتـنـفـس جـآآمـعـيـآآت ™^~°¤§][

[بسمة وردية]

شهد

يوووه وش ذا التعقيد !!

طيب كيف تدري انكم طبقتوا هالنظام؟؟ تعرف اسماء كل البنات ؟
اجلسي جنب الي تبين ومحد داااري ههههه

لان صراااحه احيانا بعض المحاضرات طفش طفششش بقوه
خاصه اذا كانت شبكه لازم سواليف شوي ... ترويح عن النفس فقط لاغير ..




.

[شهد فهد]

المشاركة الأصلية كتبت بواسطة بسمة وردية شهد يوووه وش ذا التعقيد !! طيب كيف تدري انكم طبقتوا هالنظام؟؟ تعرف اسماء كل البنات ؟ اجلسي جنب الي تبين ومحد داااري ههههه لان صراااحه احيانا بعض المحاضرات طفش طفششش بقوه خاصه اذا كانت شبكه لازم سواليف شوي ... ترويح عن النفس فقط لاغير .. .

 

 

يابسومه والله هذه الرئيسه جديده وتبي تفرض نفسها وتبرز شخصيتها

وحنا اللي طايحين فيها هذا النظام يطبق بس في الشبكات وعلى كل شبكه مشرفه والمشرفه نفسها هي اللي تنظم الوضع وامكنة الطالبات والله اليوم حسيت انو كأنه احنا في اول ابتدائي هههههههههه اشكالنا تضحك ماحد راضي والكل متضجر وأولهم انا

يالله بكره ان شاء الله راح نحتج عند الرئيسه نفسها
والله يعينا على اقناعها

ادعيلي خيتو بسمه ورديه فديتك

[الشمائل]

^

شهودة

ايوه هالنظام صار يسوويه لنا دكتورنا وقت الامتحانات علشان يسهل عليه التصحيح


ما دريت ان العدوى انتقلت لكم :P



بسوووم


انا مع عرووب والبنات ..
ما في احسن من صديقات الجامعة

انا وااايد تحسفت وللحين اتحسف لاني متمسكة ببنات المدرسة

كل النفوس تغيرت ، وحتى انتي لازم تغيرين نفسج وتاخذين لج صديقات جداد

انسي زميلات المدرسة لانهم نسوج إلا من رحم ربي


بقولج على موقف صار لي من ايام


انا بطبيعة الحال ، اركب في الباص الصغير كل يوم الصبح ، لان الباصات الكبار فيها زحمة بنات وازعاج على صباحية الله خير


المهم ،، الكورس الماضي قررت اركب الباص الكبير كـ نوع من التغيير ، واشوف صديقات الثانوية

مثل ما تدرون ان باصات الجامعة عليها ارقام في الظهر

الباص 28 والباص 31 وهكذا


الباص رقم 31 هو الباص اللي يجتمعون فيه ربيعاتي ، ومكانهم معروف .. آخر الباص

مسووين شلة هناك



المهم ركبت الباص وسرت اسلم واقعد وياهم واسولف


اول اسبوع كان اوكي وكله سوالف وضحك


الاسبوع اللي وراه ما قاموا يحجزون لي مثل ما يسوون في العادة


اللاسبوع الثالث كان إذا قعدت يقولون لا تقعدين المكان محجوز لفلانة


حتى لو ما لقيت مكان فما يكلفون نفسهم يقولون تعالي بنسوي لج مكان

والغريب انهم يحجزون لاختي !!!

عادي لو خليتهم ونزلت من الباص والله ما يسوون سالفة


ما ادري شو السبب اللي خلت نفوسهم تتغير


وتميت على هالحال وياهم ،،

يلين ما تأكدت انهم فعلا ما يبوني ..

لما يوم من الايام ركبت الباص متأخرة ، وكان بيتحرك وما كان في مكان وما كان في وقت علشان انزل واركب باص ثاني


كانت ربيعتي حاجزة كرسي حق وحدة ،، وانا قاعدة ادور كرسي ومب لاقية مكان !

لما تحرك الباص ،، قالت لي هاتي الكتاب ويلسي ، خلاص تحرك الباص شكلها البنت ما بتيي


قعدت على الكرسي وتحرك الباص ،، وتحركنا على بركة الله ،

لما وصلنا الجسر الاول ، وقف الباص علشان البنت اللي حاجة لها ربيعتي لحقت عالباص بالسيارة

قبل ما تركب البنت .. اسمع ربيعتي تقول للبنات : قوموا سووا مكان ، يللا وسعوا ، تصرفوا !!

وتتضارب ويا ربيعاتنا >>> مب يعني ضرابة .. يسموونها حنة وزنة :q


فاستغربت من هالتصرف !!!


من يومها ما ركبت الباص الكبير ، ورجعت اركب الباص الصغير



.
.


من ايام ..

تأخرت في الجامعة للساعة 3 ، قاعدة سوالف وضحك مع بنات الجامعة ،،
قررنا نتأخر لان اليوم الثاني اجازة وعندنا اسبوع كامل اجازة >> يعني ما ورانا شيء هههههههههه


لما جاء باص الساعة 3 ركبته

شفت ربيعاتي اللي يدرسون في التقنية ،، هم نفسهم اللي ما كانوا يسوون لي مكان


فشفتهم من بعيد وابتسمت ، لاني شهر تقريبا ما شفتهم

وساعتها كان الباص زحمة لدرجة ان في بنات ما ركبوا لان بالمرررة ما في مكان




قامت وحدة من البنات ، فجيت اقعد انا في المكان الفاضي بس البنت اللي كانت قاعدة نادت فلانة من بعيد

وقالت لها اتيي تقعد عدالها ..


فانا استحيت اقعد ..

ربيعتي اللي في آخر الكرسي تنادي علي وتقول اقعدي ما عليج ،،

وانا مستحية ،، >> عندي عيب

هي تقول اقعدي وانا اقول لا استحي >>

لما جييت بنزل ، غيرت رايي وقلت للبنات اللي ورا اني بقعد وياهم وراا


قالوا ما بنسووي لج مكان !!!

قلت لهم : بتسوون غصبا عنكم

قالوا ما بنسووي انزلي

قلت مب نازلة وبتسوون لي مكان

>>> فششششششلة جدام بنات الباص

وكانوا جديات في كلامهم ،، وانا شوي وبصيييييح

ما توقعت انهم بقابلوني بعد شهر بالنفس الشينة هذي :(

فغصبا عني وعنهم زاحمتهم فوق عناد ،،، مع اني حسيت بالمذلة :"(

لما قعدت بين ربيعتي وربيعة اختي

دزيت ربيعة اختي بقوة بظهري ، كأني اتحداها على الللي قالته <_<


فلما شفت ان ما في مجال ،شفت ان القعدة على الارض ارحم ، وبعد ما عجبهم !!

ما رضوا يحركون ارجلهم شوي علشان اقعد

حاولت اراضيهم باني اتكلم مني ومناك واغير جو شوي

لاني ما قدرت اتحمل ،، لو سكتت بصيح ، انا ما اتحمل هالمواقف

حاولت ابتسم واتكلم بابتسامة وجذي يعني

واسالهم عن دراستهم وسولفنا

بعدين فتحت اللاب وشاركتهم بالاناشيد اللي عندي لانهم يطولون على اذاعة الاغاني اللي في التلفون <_<



المهم اني قدرت احتويهم ولو قليلا


بس صدق عيب ، من غير اللي صار في الباص من مواقف محرجة


الله يهدي الجميع



وبس .. هذا موقف من مواقف من كانت صديقتج في الثانوية في يوم من الايام


خسارة عشرة والله <_<

[بسمة وردية]

شهوووده

اهااا فهمت الله يعييييييييينكم يارب

اصلا حتى المشرفات بيطفشون كل يوم تعالي يافلانه روحي يافلانه
ان شاء الله توافق الوكيله =)



شمووووووله

يقهروووووووووون صديقاتك ><
بس يمكن عشان بالباص وفي الرجعه كل وحدة صاكها راسها ومو رايقه لذلك تشوفين نفسياتهم خايسه
والله مدري .....

بس الموقف يقهرررر

ياخوفي الايام تقلب صديقاتي علي >>هم ثنتين اصلا الي معي بنفس التخصص ومبسوووووووطة منهم
وداااااايم أشوفهم بس مااعد نجلس سوى زي ايام الثانوي ><

بس أحس صداقه الثانوي صداقه حلوة ومافيها مصالح وأعرفهم زيييييين لدرجة ان اهلي يسمحون لي أزور صديقاتي في بيوتهم من كثر ماهم واثقين فيهم
حتى امي تعرف امهاتهم وابوي كذلك

بس الجامعه غيييييييييييير !!
ما أعرف عنهم شي ابد ابد ... حتى اذكر مرة انحرجت من صديقتي نادتني في بيتها وامي عيت اروح ...
وانا اصلا ماجاء على بالي ولا 1% اني اروح

غير صداقه المصلحه ههههههههههههههه
سلااام بحراره وسواليف ...لين تنتهي المصلحه ...وبعدها اذا شفتها حتى السلام ماتسلم
وش دعوه ياشيخه يوم خلصت مصلحتك ولاكأنك تعرفيني !!



تذكرت سالفه
الفصل الي راح كان اول فصل لي بالجامعه وكنت توني مستجدة ما اعرف شي وعلى نياتي
وجالسه في اول كرسي في القاعه ههههههههههه وفي اول مادة اخذناها جت لي بنت وقالت عطيني رقم جوالك؟
قلت ليه ؟
قالت انا عندي في هالقاعه بس ذا الماده ولو بغيت شي بكلمك
واعطيتها الرقم

قالت طيب عطيني رقم تلفون البيت ؟ وانا مدري وش خلاني اعطيها الرقم
دلاخة من جد >>>>منقهرررررة من نفسي

واختنا في الله ابلشتني كل يوم ترسل وتكلم
جيبي كتابك وعطيني التخطيط وهاتي .. المشكله هالمادة لها كتابين كبار :/ أتمصع وانا شايلتها

ويوم شافتني حبيبه معها .... صارت ما تكتب شي مع الاستاذ واذا خلصت المحاضرة تاخذ كتبي
قلت لها : معليش معك كتبك وقلم ولك يد تكتبين مو حاله كذا كتبي عندك دايما !!!
واشوى صرت ذهينه وراحت الدلاخة الي فيني ومعد عطيتها وجه

والله شي...
اتعب وانتبه مع الاستاذ والاحقه في الكتابه وعمتي تاخذها باردة مبردة
>>>>>>يووه لين الحين منقهرررررررة من طيبتي مع هالاشكال !!!!!!!!!





.

[الشمائل]

^

لا ما عليه .. صديقاتي ما تفرق عندهم الصبح او الظهر ..
النفسية كلها وحدة

اللي ما يبونها عاملوها معاملة استغفر الله منها

قممممممة الاحراج

مع انهم يعرفون اني بصيح لو تعاملوا وياي جذي ،،

بس من تكلمين انتي ؟؟ جدار ؟؟



خلينا منهم
ونرجع لسالفتج



اكرررررررررررره هالحركات >_<

بس صديقاتي اللي تعرفت عليهم اول سنة هم اللي للحين مصادقتنهم ، ولا ابا اتعرف على غيرهم

ما شاء الله قلوبنا على بعض ، حتى فتحنا جمعيتنا الخاصة ضمن الانشطة الطلابية في الجامعة

وشاركنا في اول سنة لنا في الاتحاد الطالبات


وايامنا كلها عسسسسسسسسسل


اما صديقات المصلحة فاتحاشاهم ،
اصلا ما احب اتعرف على بنات ما اعرفهم بطبيعة حالي

ما ابا احط نفسي في نفس موقفج

لكن لابد نمر فيه :q

في كورس من الكورسات

انا وفروش خذنا مادة E2 انقليزي محادثة 2

المهم كنا نقعد ورا دايما ، فكانت عدالي وحدة ما اقدر اقول اها طمة في الانجليزي ^^

بس حركاتها تقهر وانا على نياتي اساعدها في كتابة المعاني اللي ما تعرفها اعطيها كتابي علشان تشوف الاجوبة

>>> على اساس اني اعيد المادة ،، يعني الكتاب محلولة اجوبته قبل اوريدي


المهم الدكتور في ذاك الكلاس طلب منا نكتب فقرة صغيرة عن كتاب قريناه

فكل وحدة هايمة على وجهها تحاول تكتب ، اما انا ما قدرت اكتب لان حضرتها كل مرة تقاطعني

وتقول لي كيف نكتب الكلمة الفلانية وركبي لي الجملة الفلانية

فكنت احاول ألمح لها اني ما كتبت لنفسي فاسكتي علشان اركز

بس ما في فايدة <_<

في الاخير انتهى الوقت وما كتبت شيء

والعجيب ان فقرة البنت ولا اروع ،، يعني جابتها صح !!



وهي نفسها اللي في وقت الامتحان تقول حق فروش غششيني !!!

اشكره عيني عينك


قالت لها فروش أنا إذا فهمت زين مني


>>>اشكررها ، وقفتها عند حدها >>> شر

[بسمة وردية]

ههههههههههههههههههههههههههههه

صااادقه فروش الوحدة يالله تحل لنفسها
البنات الي زي كذا ما ينفع معهم الا التطنيش

ما شاء الله قلوبنا على بعض ، حتى فتحنا جمعيتنا الخاصة ضمن الانشطة الطلابية في الجامعة

 

 

الله يديم المحبة عليكم ولا يغيرها





.

[حروف بلا نقط]

بس أحس صداقه الثانوي صداقه حلوة ومافيها مصالح

 

 

بسوم جبتيها على الجرح
وه بس ياحبي للثانوي لو أعيش طول عمري أدرس ثانوي كان وناااااااااااسة
أنا تخصصي لغة عربية
جامعة الامام محمد بن سعود
عاد أنا تركت الجامعة لأهلها وبطلت دراسة

[حيث النقاء]

ربي يوفقكم وينجحكم وييسر لكم أموركم

ووويين توني أنا ع الجامعة والكلية خخ ..انتظروني لين ماأوصل لكم هع

بنات تدرون
صار الحين دخول الجامعات والكليات شبة بالحلم
بعد ماتقرر القياس والتحصيلي صار صعب قبولك عندهم :(

استانسوا وفلوها ترى غيركم يتمنى يدخل جامعة او كلية

الله يسعدكم

[عروب ksa]

^

لآ بالعكس لا تقوليـن كذا ~*!

كله مكتوب ومقدر ، الواحد يعمل
الأسباب وربي بـيسرهـا من عنـده ،،

والله عنـدنا بنات مآ أدري شلون دخلوا
الكليه ، صحيح الدرجات مهمه لكن
كلها توفيق من الله ~

إذا أنتِ بالثانوي شدي حيلك
ولآ يهمك أي كلام يحبطك ~

[شهد فهد]

بسوم اي والله صدقتي المشرفات بروحها عله

اليووم رئيسة القسم جات وهزئت قاعتنا وصار مالنا وجه نكلمها

اووووووووووووووف الله يعدي هذا النظام على خير

والمشكله مو مطبق الا على قاعتنا والله قهر

-------------------------------------------------------------

شمايل اي شكلو كذا عادتونا

موقفك مع صديقاتك يقهر والله ماتستاهلي اللي يصير معك منهم

هذوله ابد مايطلق عليهم معنى الصداقه

___________________________________---------------

حروف بلا نقط صدقتي ياريت اعيش كل ايامي في الثانويه

والله اني احمل لها ذكريات حلوه كثيره

_____________________________________

حيث النقاء

اجتهدي وراح يتحقق حلمك صحيح كلام عروب في بعض البنات درسو معي ايام الثانويه هم والجدار واحد وشفتهم داخلين معي بالجامعه

بصراحه انصدمت الله يوفقك ياحيث النقاء وان شاء الله نشوفك معنا في هذا القسم