روايتي الاولى ( عهد على ذكرى الالم والمهانه لآخذ بثار دموعنا ياخفوقي)

**أسِيفْ** · منذ /14-11-2011, 06:39 PM

فروسة ()
الله يخفف عنكم
إنا لله وإنا إليه راجعون ~

،

الجزء خطيييير جدًا
وأهم شيء لما رد عليها بصوت هادئ
أبو الثقة

بإنتظار التكملة =)

**B S O M A** · منذ /18-11-2011, 06:19 PM

إنّا لله وإنا إليه راجعون ="(
الله يرحمه و يغفر لله و يصّبر أهله على فراقه ،
الله يخفف عنكم !
-

بالنسبه للبآرت ~
جد حمآسسسسسسسي ،
قريته أول ما نزل بس كان عندي واجبات و قررت مآ أرد ذاك اليوم
ونسيت بعدها للأسف ><" !
مو مشكله . . المهم . .
جد جد عجبنييييييي !
حسيت الآحداث كل بارت تتعقد و تتشابك و تتخبص و تزيييد حمآسس
بس حآسه ناصر تغييييير = \ !
مو مثل المرآت الآولى إلي طلع فيهآ ، كآن طيب و حبوب = P
و جود . . عنيييييييييده !!!!!!!
جد مدري أش تبغى يصير !
فهد ، أحح !
مسرعْ عرف صوتهآ !

كمممممممممممممممممممملييييييي : ewqqq:

**B S O M A** · منذ /19-11-2011, 03:44 PM

وينككككِ ؟
أنتظظظركِ ~

**화이트 엔젤** · منذ /19-11-2011, 04:41 PM

مشكورين حبايبي على الردود

فستان وسوسو جزاكم الله خير والله لايحرمني منكم

الحين انزل البارت

على فكره كنت كاتبه البارت من امس

وانتهيت منه على الساعه 12 الليل

بس من سوء حظي طفى الكمبيوتر علي ولما شغلته

حدث تلقائي ومسح اللي ماحفضته

بصراحه انقهرت كنت عالنهايه ومن القهر ماقدرت

اعيده امس بس كتبت نصه اليوم الصباح

والباقي بعد مارجعت من الكليه

**화이트 엔젤** · منذ /19-11-2011, 04:46 PM

(الجزء الواحد والثلاثون )

اللي بقى لـي مـع الأيـام / وفّيتـه
........... والضيق لـو ينهمـر .. تشربْـه وديانـي
ماهي كبيـره علـي والحـزن غنيتـه
........... وْلاهـي غريبـه إذا وقتـي تحـدانـي
الخوف يا من نبشت القلب وادميته
........... لاعشت زهرة شبابك وانت وحدانـي!!
كم جرح خذْته من الأحباب.. ضمّيتـه
........... وجروح قلبـي زكـاة لْحُـبّّ خِلاّنـي
مطعون ؟ عاااادي ،، جفا الأقراب ؟ داويته
........... تعبان ؟ مبطي ،، ردى هالحظ ؟ خاوانـي
صدمه ؟ بسيطه ،، هَوان الحال ؟ مرّيتـه
........... مقرود ؟ أدري ،، وإذا حرمان ؟ عدّانـي
.. الجرح ارحم , اذا يرجع من اغليته . . !!
........... مجروح ‘‘ فدوه ولكن / صعب وحداني

منسدح على سريره وسرحان فيها وش قاعده تسوي
الحين ووين راحت صحى من سرحانه على صوت الجوال
ياربي للحين مصره رد : الو
جود بتلعثم : آآهذا .. هذا جوال محمد
: لا
جود : اممم خلاص مع السلامه
موب على كيفك مع السلامه بشوف لوين تبين توصلين : جود
جود بربكه : هاه ؟
: انتي جود صح
جود وصوتها يالله يطلع من الصدمه : احم احم اخوي شكلك غلطان
: انتي اللي اتصلتي مو انا
جود : ايه وانا بعد غلطانه
: احم يعني لي متى بتستمرين كذا
جود مو فاهمه شي : ...................
: معقوله ماعرفتي صوتي الى هالدرجه ناسيه صوت فهد
جود ياربي هالنبره اعرفها مستحييييل لايكون ؟؟؟
: سوري بس حبيت اشوف اذا انتي جاده بتهديدك بس الظاهر ان كل
اللي قلتيه كله عناد بس
جود : ناصر ؟؟؟
ناصر : ايوه
جود : يعني اللي كنت اكلمه من وقت كان انت
ناصر : ايه انا للاسف
جود بصراخ : هيييييه انت وش تحسب نفسك تسوي كذا
ناصر : اول شي انا اسمي ناصر مو هييه ثاني شي ترى انا مليت
منك وعلى فكره راح ارجع للسعوديه واسلم ليان لفهد وراح اخبر
جهاد عنك وبكذا اكون سويت اللي علي وقبل ما اسكر احب اقولك
لاتروحين لشقتك لان فارس عرفه مكانها وهو يراقبها الحين
واذا بتفكرين تسافرين انا بلغت السفاره عنك وانتي ممنوعه من السفر
وفارس بلغ الشرطه والحين انتي مطلوبه عشان كذا انتبهي اعتبريها
اخر نصيحه مني لك الحين انا استأذن
جود بصدمه : هييييييه انت وش قاعد تقول
ناصر : لو سمحتي قلتلك اسمي ناصر وبعدين كل اللي قلته سمعتيه
مايحتاج اعيده
جود وهي تبكي : حرام عليك عشاني ماوافقت عليك تبلغ عني
الى هالدرجه مستهين بحياتي معتبرني لعبه بين يديك
ناصر بهدوء : لو كنت معتبرك لعبه كان ماحاولت اقنعك باي
وسيله انا كل اللي ابيه اني اجمعك بليان وتعيشون مع بعض
وبراحه تامه لاني اعتبر ليان بنتي على فكره ليان مشتاقه لك
كثير وكل شوي تسأل عنك وتبي تزورك بس انا اصرف
اتمنى تفكرين فيها
جود : لا ماقصرت بصراحه قلبك طيب لدرجة انك تروح وتبلغ
عن وحده متغربه عشان تحقق اهدافك
ناصر : جود الظاهر انك ماتسمعين الا اللي تبينه شوفي انا خبرتك
بكل شي وانتي عاد قرري اذا تبين مساعدتنا اختاري واحد منا
واذا تبين فهد وجهاد سلمي نفسك
جود : عمري ماراح اسامحك
ناصر : اذا فهمتي راح تسامحيني انا عندي الحين احمد
اكلمك بعدين واتمنى تقررين بسرعه لان مامعك وقت
سكر الجوال وانسدح على السرير
احمد : وش فيك
ناصر : كذبت عليها واتهمت فارس
احمد : وشلون
ناصر : قلت اني بلغت السفاره وهي ممنوعه من السفر وان فارس
بلغ عنها الشرطه وهي مطلوبه الحين
احمد : طيب ليش
ناصر : ماكان عندي الا هالحل قدام عنادها
احمد : وعشان كذا تجبرها تتزوج منك ناصر وش سالفتك احسك متغير
ناصر : ماتغيرت ولا شي كله عشان ليان ابيها تعيش براحه
احمد : بس اضنك عارف ان فهد بياخذها وبكذا انت مو تجمعهم انت
تفرق بينهم
ناصر : من هالناحيه لاتحاتي اعرف اتصرف
احمد : ناصر وش فيك من يسمعك يقول هذا عدوه مو صديقه
اصحى ترى هذا صديق عمرك وابو بنتك الحقيقي
ناصر : ادري وانا ماقلت شي بالعكس اساعده على انه يتخطى ذنبه
قام احمد : اتمنى ياناصر انك تفكر قبل ماتسوي شي تندم عليه
الحين نام انا بروح انام
طلع وسكر الباب وخلى ناصر باحلامه وهواجيسه
وهو يدور في دائره مفرغه كل ماقرب
يوصل للنهايه حصل نفسه
رجع لنقطة البدايه واللي هي جود

في جهه ثانيه
رمت جوالها بقهر وقعدت تبكي
هند : جود وش فيك
نورا : ليان فيها شي
جود بقهر : الحقيرين الله ياخذهم الحمير
هند : منهم وش السالفه
جود تبكي : ...........
نورا : جود خوفتينا وش السالفه
جود وهي تبكي : الحقير فارس والزفت الثاني ناصر بلغو عني
هند ونورا : ايييييييييييييييييش
جود : الله لايسامحهم وربي ماسامحهم الحقيرين
هند : نورا مو معقوله اكيد فيه شي غلط
نورا : ايه اكيد هدي حبيبتي ماراح يصير الا كل شي زين
جود بعصبيه : هو الحقير اللي متصل علي يخبرني لا وايش يقول
اختاري بيني وبين فارس نساعدك ولا سلمي نفسك
هند : طيب وش بتسوين
جود : باسلم نفسي
نورا وهند : ايش مجنونه انتي
جود : عناد فيهم راح اسلم نفسي
هند بعصبيه : جوووود انهبلتي ترى طولتيها هذا مو عناد هذا جنون
وغباء عشان تقهرينهم تدمرين حياتك
نورا : جود حبيبتي مو هذا الحل انتي مو ياهل عشان تفكرين تقهرينهم
بهالتصرف
جود : اجل وش اسوي استسلم لهم
هند : ياجود ياعمري اخذي السالفه من جهه ايجابيه واستغليهم
يعني مثلا ناصر استغليه مثل مايستغلك وخليه يحميك من جهاد
وعيشي مع بنتك وارتاحي من الهم وش بتخسرين انتي
جود : ماراح اخسر شي بس مابي اعيش مع هالانسان بكلم فهد
وبقوله عالسالفه
نورا بعصبيه : جود يعني متى بتفهمين ان مالك مكان عند فهد
هذا هو ماقال على الله يفتك منك وراح وتزوج وجاب عيال وبنتك
راميها ولافكر حتى يخبرها انه ابوها وبعدين تتوقعين لو كلمتيه
بيرحب فيك بالعكس بيحس انك انسانه مو زينه بيتوقع انك
عشتي حياتك عرض بطول ولما شبعتي اتصلتي به
وجهاد لاتنسين اللي سواه فيك هذا وانتي عايشه تحت عيونه ومن
بيتكم لبيت عمه ماصدقك بالعكس شك فيك فتتوقعين وش بتكون ردة
فعله لما يعرف انك عشتي بدوله اجنبيه تتوقعين بيقول حافضت على
سمعتها ياجود ياعمري مادمتي ضامنه واحد بصفك ولو بنسبة
50% ليش ماتستغلين الفرصه وتضمنين حياتك وحياة بنتك
جود وهي منزله راسها : بس انا خايفه
هند : خايفه من ايش
جود : خايفه انه ماخذني لعبه بايديه وراح يرميني اذا احتجت له مثل
مارماني فهد من قبله
هند : لا ياعمري وحنا وين رحنا وبعدين واحد ربى بنتك كل هالسنين
تتوقعين يسوي فيك كذا مستحيل اسمعيني جود حنا مستحيل نرضى انا
ندمر حياتك فتتوقعين ان حنا قاعدين نقنعك عالفاضي لا ياعمري هذي
فرصه ولازم تستغلينها وحنا مانبيك تضيعينها لان أي شي يأذيك يأذينا
واضن مو جاهله بمعزتك عندنا
جود : بس
قاطعتها نورا : لا بس ولا غيره هنود اتصلي على ناصر وقولي انها
موافقه
جود : مستحيييييل من جدكم
هند برجاء : جودي تكفين هالمره بس طيعيني تكفين هالمره بس
خليني اساعدك ولو بشي بسيط مو قادره اشوفك تدمرين نفسك
وانا ماسوي شي الله يخليك ياجود ثقي فيني هالمره بس
جود : ..........................
خذت هند الجوال واتصلت على ناصر وجود منزله راسها وتمسح
دموعها اللي مو راضيه توقف

في السعوديه
نزلت من غرفتها وهي طفشانه من قلب
فتحت التلفزيون بالصاله وجلست عنده
كانت تناظره وهي مو يمه كل تفكيرها مع عيالها اشتاقت
لهم لازم تقول لاخوانها او ابوها يجيبونهم لها
صحت من سرحانها على صوت عيال اخوها خالد
(ليث 7 سنوات وليالي 5 سنوات )
قامت وباستهم : وين بابا
ليث : ماما وبابا عند جدي بالمجلس الخارجي
ساره بابتسامه : اها خلاص حبايبي روحو العبوا
رجعت وجلست عند التلفزيون وهي تفكر وشلون تقول لاخوانها
يجيبون عيالها وهم مايكلمونها
ربع ساعه وسمعت صوت خالد وزوجته منى
كان يسولفون ويوم شافوها سكتوا
ساره بربكه : هلا والله كيفك ياخوي وكيفك يامنى
منى : الحمد لله تمام
ساره بانحراج لما شافت خالد سفهها : خالد ممكن طلب
ناظرها ينتظر تتكلم بدون مايقول شي
ساره : خالد تكفى ابيك تجيب عيالي ابي اشوفهم اشتقت لهم
خالد بقسوه : اذا تبينهم روحي لهم وفكينا ترى احسن بعد
ساره : بس ...
سفهها وراح لغرفته بالدور الثاني
لحقته زوجته وهي منحرجه من تصرفه
وتركو ساره وراهم غارقه بدموعها اشتاقت لعيالها
وفهد مايرد على جواله وهي تبي تطمن عليهم ولا احد في صفها
ابد

دخلت وحصلته منسدح على السرير وقاعد يناظر جواله
منى : خالد ما كأنك قسيت على ساره
خالد : تستاهل
منى : بس مهما صار حرام يكفيها اللي فيها تجي وتزيد عليها
وبعدين اعتبره معروف اكيد الحين اشتاقت لعيالها والله حرام
خالد : هه تبيني اكلم الزفت فهد ولا عشان منوا قول بس خليهم
يولون
منى : طيب اذا موعشانها عشان عيالها والله حرام مالهم ذنب
خالد وهو يعطيها ضهره : .....................
منى : خاااااااااااالد
خالد : ........................
طلعت وهي غاسله يدها منه هذا هو اذا ماعجبه الموضوع سفهه ولا
كأن عنده احد

في لندن
استغرب من الاتصال ياليل لاتكون داقه تبي تهزأ بعد
رد وهو مجهز نفسه لموشحه من التهزيء بس استغرب
لما سمع صوت وحده ثانيه
هند : ناصر
ناصر : ايه من معي
هند : انا هند صديقة جود
ناصر بخوف واضح : ليش وش فيها ؟؟
هند بابتسامه : ابد بس حبيت أقولك مبروك جود موافقه
ناصر مو فاهم : الله يبارك فيك بس موافقه على ايش
هند وهي ماسكه ضحكتها : موافقه عليك
ناصر : موافقه علي ؟؟؟
هند : ايه مو انت طلبت يدها جود موافقه
ناصر وهو يسيطر على نفسه : احم احم صدق
هند : ايه صدق
ناصر : طيب عطيني اياها
هند : ليش وش تبي بها
ناصر : ابي اقولها كلام عطيني اياها
هند : اوك
ثواني وردت جود بصوت بارد : نعم
ناصر بابتسامه : الله ينعم عليك
جود : بغيت شي ؟؟
ناصر : لا بس حبيت اسأل انتي من جدك ولا تستهبلين
جود باستغراب : هااه ؟؟

...................... النهايه ...................

**B S O M A** · منذ /19-11-2011, 05:16 PM


فستان وسوسو جزاكم الله خير والله لايحرمني منكم

و لآمنككككِ

!!

-

إجرآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآم

إبدآآآآع وربيييي إبدآآآآآع

هالبآرت يجننننننننننننننننن ، أخخخ أخيراً بررردتي قلبيّ

!
جد أحس إني بططير = P
> أخاف البآرت الجآي أنصصدم

،
بس جججد وربي فرررررحت من قلب

لبى هالنآصصر ، وربي أنه يعجبني . . مآلت على فههد وعلى أشكاله = \ !
> الآخت تحمست مره

!
و نورا وهند

ودي أدخلهم بالطآبعه وأطلع نسسخّ كثيره منهم !!
قليل نلآقي أصدقآء يدورون مصللحة أصدقآئهم

!
الله يخليهم لـ جود = P
و جو و د ، أول مررره أحسهآ مطييعه

يلا إن شآء الله تستمر كذآ

،
و شسمه يعيشون حياه هنيئه

و سآره . . أحسسسن تستآهههل إلي يصير لهآ

!
هالآنسآنه نذذله

، > مآترحم

-

كممممممممممممممممممممممممممممممملي ، حمآآآآس أقوى شششيء

**أنين طفلة** · منذ /19-11-2011, 10:02 PM

روعة البارت
ننتضرك على احر من الجمر

* rafal · منذ /20-11-2011, 06:22 PM

على فكره كنت كاتبه البارت من امس

وانتهيت منه على الساعه 12 الليل

بس من سوء حظي طفى الكمبيوتر علي ولما شغلته

حدث تلقائي ومسح اللي ماحفضته

بصراحه انقهرت كنت عالنهايه ومن القهر ماقدرت

اعيده امس بس كتبت نصه اليوم الصباح

والباقي بعد مارجعت من الكليه

الله يعينك

اعتذر مَ رديت ع البارت اللي قبل بس كنت مشغولة

بالنسبه للبارت هذا

حلووووووووووو وحمااااااااااااس مرررررررررا

ناصر"" !!! مَ قدرت افهمه ...بس يعجببببني

جود"" اخيرآآآ ...قهرتني فِ البارتات اللي قبل بس كويس تأدبت الحين

نورا وهند"" لبببى قلووووووبهم بسسسس

ساره"" احححححححسسن ...تستاهل اللي يجييهاا

>> عصبت

فههد + ليان

+ جوود"" لازلت اتمنى يجتمعووون

مطعون ؟ عاااادي ،، جفا الأقراب ؟ داويته
........... تعبان ؟ مبطي ،، ردى هالحظ ؟ خاوانـي
صدمه ؟ بسيطه ،، هَوان الحال ؟ مرّيتـه
........... مقرود ؟ أدري ،، وإذا حرمان ؟ عدّانـي
.. الجرح ارحم , اذا يرجع من اغليته . . !!
........... مجروح ‘‘ فدوه ولكن / صعب وحداني

آليييييييييييييييييييييم المقطع هذا


ثواني وردت جود بصوت بارد : نعم ناصر بابتسامه : الله ينعم عليك جود : بغيت شي ؟؟ ناصر : لا بس حبيت اسأل انتي من جدك ولا تستهبلين جود باستغراب : هااه ؟؟

لااااا !! ليه ككذا ؟!!

اتوقع الحين ناصر بيفهم ان جود تستهبل عليه وتخخرب السالفه

آآخ باقي شي مَ علقت عليه

؟

يلاا فارسه ننتظرك احناااا

×××

**B S O M A** · منذ /26-11-2011, 06:57 PM

فروسسسه ، ، كمليْ تكفييييين !

**أسِيفْ** · منذ /26-11-2011, 07:51 PM

ما أبي أتحمسسس
عشان ما أنصدم
بجد بجد يعني خطير ناصصصر
وكمان جود .. أصلًا أحسهم لابقين لبعض
يا حليله ناصر حسيته مو قادر يمسك نفسه من الوناسة

بإنتظار التكملة

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

روايتي الاولى ( عهد على ذكرى الالم والمهانه لآخذ بثار دموعنا ياخفوقي)

الـقـصـص و الـروايـات