... البارت الحادي عشر ...
صياح و ضحك و وناسه و طرطشة مياه بكل مكان .. تذكرو أيام الطفوله .. و كل واحد فيهم يقلد الثاني وسط ضحكات من اللي حواليهم ..
ريان : ههههههههه .. و اللي يرحم أبووك .. تكفى عيد الحركه ..
راكان : هههههااااااي .. و الله انك نكته يا روميوو .. بس و الله خطيييير ..
رامي معصّب لأن السالفه اللي فتحها فراس ما عجبته و ذكرته بالماضي : عجبتك الحركه يعني يا سي راكااان انت والاخ حسنيييين؟؟
فراس : بس و الله حللللووووه ...
رامي يزقره بنظره : انت حسابك معي بعدين ..
فراس : وراه ؟؟
رامي : يالكذاب .. الحين انا يوم كنت صغير و اروح المسجد .. كنت اسوي هالحركات البايخه ؟؟
نادر : ههههههههه ... ايه و الله .. حتى عمرك اظن ( و يناظر لبدر بالمسبح)
6 سنين او 7 ... ما اذكر ..
عبد الله : لا لا .. كان 6 سنين و نص ... للحين اتذكر المصري اللي اشتكى عليك لابوك ..
نواف : ههههههههه .. وش قال المسكين ؟؟
عبد الله : ما ادري .. بس سلطان كان مع عمي محمد لما اشتكى له الرجال ..
سلطان وهو بالمسبح : قال .. احم احم " يا استاز محمد ( يتكلم مصري ) .. انا ما كملتش اسبوع بحارتكم .. بس و حياتك عندي .. ان عمررري .. بحياتي كلها .. ما شفتش ولد مؤزي و شيطاني .. ابل ما اشوف ابنك رامي ..
الكل : ههههههههههههههههههههههههههههههههههههههههههههه
لجونه و ريماس و نوفه كانو معهم قاعدين ..
نوفه : و عمو محمد .. وش قال ؟؟
سلطان : اظن عصّب .. لان الرجال قال عن رامي انه شيطاني و مؤذي ..
ريماس : طيب يحق له .. لان هذي هي الحقيقه اللي مستحيل احد ينكرها ..
رامي عطاها نظره جامده : انتي انطمي لا اصكك بكف الحين ..
بدر : اووف .. بسرعه عصّبت .. وش ذنبها ريماس ؟؟
نواف : ههههههههه .. يا شيخ اتركنا من ريماس ورامي .. كمل سلطان ..
لجونه : وش رد عليه المصري ؟؟
سلطان : يا استاز محمد .. افهمني ... دنا بأولّك ان ابنك بيضرب كل اللي في المسجد وهم بيصلو .. لا ... و ما بيعد الا وهو مسطر كل اللي فالمسجد كفوف على وشهم ولا على افاااهم .. و كمان بيضرب اولادي وهم في التحفيظ ... الله يخليك أؤلُه ان دا عيب و ما يصحش يعمل كدا .. الله ...
راكان : روميوو .. وش كنت تسوي لعياله ؟؟
رامي و يلعب بشعره : ولا شي ..
بدر : عليناااا .. اعترف اعترف ولا تخاف ..
رامي : موب انا اللي اخاف .. بس صدق ولا شي ..
فراس : كذاب ... تكفى يالله قول ..
رامي : و لا شي .. بس كنت اعطي كل واحد فيهم كف قبل ما يدخل المسجد و اول ما يخرج .. و هم بالتحفيظ كنت ادخل و معي قران عشان محد يشك فيني .. و اسحب الطاقيه .. اللي يحطونها على روسهم .. و اجر شعرهم .. و احيانا اكب عليهم مويه .. بسس ..
راكان : انت احد قايل لك من قبل ان جوانتانامو فيها وظائف شاغره ؟؟
رامي : ترا هذا كله غير اللي اسويه بابوهم نفسه ..
فراس : ليه .. سارقين حلالك و انت ما تدري ؟؟
رامي : لا .. بس كذا ما احبهم ..
عبد الله : محد ما يحب احد الا لسبب .. وشو ؟؟
رامي بتنهيده : آآه .. بقولكم ..لانكم بتحرقون رزي اذا ما قلت .. قبل ما يسكنون بالبيت اللي هم فيه .. كان فيه جيران قطريين .. كنت مره احبهم .. كانو طيبين مررره .. و كان فيهم ولدين توأم مثلي .. يعني بسني .. و كل يوم .. يا انا ازورهم ببيتهم .. يا هم يزوروني ببيتنا .. يعني 24 على 24 مقابلين بعض و كبرنا مع بعض .. و أسماءهم عدنان و غسان .. بس نقلو من بيتهم و راحو لحاره ثانيه شوي بعيده عنا .. و مرت السنين و احنا نزور بعض بكل اسبوع .. و من السنه اللي فاتت .. و انا ما احب اسمع عنهم أي شي ..
ريماس : ليه تقاطعهم .. حرام ذول اصحابك ؟؟
رامي يناظر الارض بنظره حزينه مرره .. تحمل معنى الالم و الهم و الحزن و كل شي محزن ..
فراس كمّل بنبره حزينه وهو يتذكر: ........... واحد فيهم مات .. عدنان ..
نادر : و موب أي واحد ... أقــ ..
رامي قطعه وهو لا زال يناظر الارض : انك تفقد اعز ما تملك .. تفقد شخص كان بنظره يفهمك بدون ما تتكلم .. بدون حروف يقرأك .. من صوت فتحك للباب يعرف انت مبسوط ولا حزين ولا متضايق و لا احد قاط عليك كلمه زعلتك .. أي شي بنفسي .. ( و رفع راسه و عيونه كلها دموع وهو يناظرهم كلهم ) .. على طول يفهمه .. تصدقون .. لما تجلسون معه .. قولو كلمه .. كلمه وحده بس .. يقطعكم على طول .. لانه كان من نبرة صوتي يعرف انا بمشكله ولا مهموم و محتاج افضفض لأحد .. على طول .. القاه بوجهي ..
نوفه لانها ما تفهم : طيب شلون مات عدنان ؟؟
كلهم يناظرونها بنظره خوّفتها .. يلومونها لانها قاعده تعيد المواجع على رامي ..
رامي بتنهيده طويله : آآآآآآآآآآآآآآآآآآآآآآآآآآآآآآآآآآآآآآآآآآآآآه .. آآه .. كان اتعس يوم بحياتي .. كنت طاير من الفرح لاني نجحت و بصير اولى ثانوي .. ووقتها كان عمري 15 سنه .. و اول ما وصلت البيت لقيت سراب ماسكه سماعة التلفون بيدها و تناديني ...
سراب : راااامي .... رااااااااااااااااااااااممممميييييييييي
انا : نعععععم
سراب : عدنان عالتلفون يبيك ...
على طول طيران عالتلفون و اخذت السماعه بسرعه ..
انا : الووو ..
عدنان : هلا بالطيب الغالي .. عزيز وشوفتك منوه ..
انا : هلااااا و الله و غلا .. اخبارك ؟؟
عدنان : تمام .. و انت ؟؟
انا : كنت موب زين .. بس الحين بتشقق من الفرحه .. اخيرا افتكينا ..
عدنان : ههههههههه بالعدال بالعدال الله يهداك .. المهم .. ترا بجيك اليوم ..
انا : و تستأذن .. تعال محد قاضب ايدك ..
عدنان : اوكي .. بس غسان ما راح يجي معي ..
رامي : ليه ؟؟
عدنان : ما ادري عنه .. بجيك الساعه 7 و هو بيروح مع عيسى عندهم جم شغله بيخلصونها و يمرون علي بالليل نرجع البيت ..
رامي : اهااا .. طيب انطرك لا تتأخر ..
عدنان : اوكي بااااي
و سكرت السماعه و انا كلي لهفه لشوفته .. صار لي 2 اسبوعين ما شفته .. اللي هي مدة الاختبارات .. و الساعه 7وعليها المغرب .. و انا رايح جاي بالصاله .. لانه تأخر وهو قال انه بيجي 7 تماما .. و فجأه اسمع صوت ..صوت قوي .. كأنه صوت ........ ارتطام سياره ..
ابوي : لا حول ولا قوة الا بالله .. يا رب استر .. وش صاير ؟؟
انا كان قلبي ناغزني .. لأن الحادث كان قدام بيتنا .. و الصوت مره قوي .. و جاء سالم يركض من غرفته رايح على جهة الباب ..
انا : سالم .. وين رايح ؟؟
سالم : رامي و اللي يعافيك اتركني ..
ابوي : سالم .. عسى ما شر .. وش فيه ؟؟
بس سالم ما رد .. كان يناظرني و يناظر ابوي .. فهمت منه انه موب قايل الا اذا رحت ..
انا : تكلللم .. وش فيه ؟؟
رد علي بصوت متوتر : سسـ ... سسسيــ .. سي..سس ..
انا : وش فيه ؟؟
رد علي : سـ .. سيارة .... .................. هذا صوت سيارة عيسى ..
انا و منيب مصدق : ................ نعم ؟؟
رد علي بصعوبه : و انا قاعد بالغرفه .. سمعت الصوت و ناظرت من النافذه .. و لقيت السياره .. مسوّين حادث ..
انا : انت شتقول .. مستحيل .. مستحيييييل ..... و طلعت مثل المجنون .. و جاو معي سالم و ابوي .. و شفته .. شفت صديقي ..شفت راسه خارج من نافذة السياره .. وهو ......... وهو مبتسم .. يااااه .. ابتسامه حلوه .. تساعدنا عليهم انا و اهل الحاره .. و خرجناهم كلهم .. و نادينا جارنا الدكتور يفحصهم على سريع عبال ما تجي سيارة الاسعاف اللي طلبناها .. و فحصهم الدكتور اللي اكد سلامة عيسى و غسان الا من بعض رضوض و شوية كسور و لما جا عند عدنان .. و بدا يفحصه .. انتهى بسرعه و غطاه بالجاكيت حقه .. انا انصدمت منه .. و قلت ..
انا : ليه يا دكتور ؟؟ عدنان وش فيه ؟؟ ليه غطيت وجهه ؟؟ خلّ يتنفس حرام عليك ..
و مسكني من كتوفي و هو يناظرني : معليش يا رامي .. بس الولد .. عطاك عمره ..
انا : ............... لا اكيد تمزح ؟؟ مو معقول .. ابدا مو معقول ..
لااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااا
لا يا عدنان .. وينك يا اخوي .. و ينك يا روحي .. وييييييينننننككككككك
و من بعدها ما ادري عن نفسي ...
بدر وهو طالع من المسبح : أغمي عليك وقتها ... من الصدمه ..
رامي قام على طول .. و كل الانظار عليه .. كلهم يناظرونه بحزن و أسى .. الكل ما كان يتوقع ان رامي .. بسمتهم .. ضحكتهم .. اللي يضحكهم بكل كلمه يقولها .. اللي من يشوفونه .. خلاص كل همومهم ... صارت بعيييييده .. يااااااااااه يا رااامي .. كل ذا كان فقلبك ... و لا أحد يدري .. محد كان يدري انك تخفي ورا ابتسامتك .. كل هالحزن و الالم ...
********************
واقفه مصدومه من اللي قدامها .. ما تدري وش تسوي .. تنحاش ولا تتخبا ولا تصرخ و تصحي النايمين ولا إيه .. بس اتخبت ورا السوفا بسرعه .. اما اللي كان واقف قدامها .. خرج على طول ..
صحت سديم من نومها .. و خرجت للصاله و شافت ...
سديم : ريم .. وش تسوين ورا السوفا ؟؟
ريم بدت ترفع راسها : راح ؟؟
سديم : منهو اللي راح ؟؟
ريم عرفت ان مافي احد و جلست عالسوفا : ويه ... اشواا ...
نوره جات : هلا سديم .. متى صحيتي ؟؟
سديم : توني صاحيه ... ( و التفتت على ريم ) .. ريمو .. وش فيك ؟؟
ريم : ما ادري .. بس و انا منسدحه عالسوفا و اشوف الفلم .. دخل علي واحد طويل .. قال هاي سروو .. و تخبيت ورا السوفا ..
نوره وهي تقعد : كيف شكله ؟؟ يمكن اعرفه ..
سديم : صح .. اوصفيه لنا ..
ريم : انا ما دققت فيه كثير .. بس كان طويل .. و موب متين ولا نحيف .. وسط يعني .. عظم ..
سديم تلتفت على نوره : مين اللي وسط بين الشباب ؟؟
نوره : فراس و سالم و سلطان ..
ريم :لا ما اظن انه سلطان اخووووي واعرررفه .. لان هذا الرجال شعره شوي طويل .. يمكن يوصل لأذنه ..
نوره : يعني حصرنا الشبهه بين فراس و سالم و نادر وعبد الله و رامي لان هم اللي شعورهم طويله شوي ..
سديم : الله يهداك يا نوره .. مجرمين هم .. وش حصرنا الشبهه .. اما انتي متأثره كثير باجاثا كريستي اللي تقرينها ..
ريم : و بعدين موب عبد الله اللي كان واقف .. عبد الله اطول من كذا بشوي .. وهو اخوووي كمااان يالخبووول
سديم : ياااربييي ..اموووت و اعرف منهو .. طيب ما انتبهتي للون بشرة وجهه عالاقل ؟؟
ريم : ما ادري .. يمكن ... امممممم ..
نوره : اسمر ولا ابيض ؟؟
ريم : انا ما انتبهت بس .. أظن ابيض ...
نوره : بسسسسس .. عرفت المجرم .. أأقصد الرجال ..
سديم : بَلْ .. بهالسرعه ما شاء الله .. و منو يا حضرة الضابط ؟؟
نوره : من غيره .... اخوك سالم ..
سديم + ريم : سااااااااااااااااااااالم !!!!
ريم : وش دراك ؟؟
نوره : يا ماما .. اوزنيها بالعقل ... نادر و فراس وجيههم صح بيضاء بس موب مثل بياض سالم .. سالم ما شاء الله عليه .. مو كانه سعودي .. شوي فيه ملامح الغرب ..
ريم : و كيف عرفتي بهالسرعه ؟؟
نوره : هذي طريقة هركيول بوارو فكشف المجرمين ..
سديم : و من ذا هركيول بوارو ؟؟
نوره : بطل روايات اجاثا كريستي ..
ريم : ما شاء الله تبارك الله ..
سديم : ياااحلاااااا .. ( و تلتفت على ريم ) ما قال لك شي ؟؟
ريم : الا .... مو قلت لكم انه قال .. هاي سروو ...
نوره : سروو...وحنااا مهبل داام انه قال سرووو اكيد اخوها وحنا نخمن ياعيني عالذكاء اللي فينا ؟؟
سديم : اكيد بيقول سروو .. لان ريم و سراب يشبهون بعض كثيير .. ولا كانهم بنات خالات .. كانهم اخوات .. و انا اذا شافوني صاحبات سراب بالجامعه .. يقولون : وي انت اخت سراب ؟؟ كنا نظن ان سراب ما عندها اخت غير ريم ... ( لان سراب و سديم ما يشبهون بعض ) ..
ريم : ههههههههه .. حتى الاستاذات .. دايما يسألونا .. انتو توأم ؟؟ و لما نقول لا ما يصدقونا الا بعد ما يشوفون اسماءنا و يتاكدون منها ..
نوره : يعني اكيد سالم ظن فالبدايه انك سراب ..
***********************
ماشي بسرعه تجاه المسبح .. و صورة البنت اللي شافها للحين قدامه .. ياااه .. وش ذا الجمال .. سبحان الله .. معقوله فيه بنت من عوايلنا بذا الجمال ؟؟ من جد .. هذا القمر و انعكس ظله .. بس اموت و اعرف منهي ؟؟ ..... و من دون ما يشوف .. صدم بواحد كان ماشي بسرعه مثله .. اوووف.. هذا رامي ؟؟
: رامي .. وش فيك ؟؟
رامي : تكفى سالم اتركني .... و جا بيروح بس ...
سالم مسك ايده : لا .. منيب مخليك تروح و انت بهالحاله .. وش فيك يا رامي ؟؟ عسى ما شر ... يا اخوي حد صاير له شي ..... تكلمممممم؟؟
رامي فك ايده منه بقوه وهو يصرخ : اقول لك اتركني .. يووه .... و راح وهو تارك سالم فحيرته .. بس على طول راح المسبح يشوف الشباب ...
عبد الله : هلا و الله بابو محمد ... حياك .. بتسبح ؟؟
سالم : وش فيه رامي ؟؟ خارج من هنا يبكي ..
بدر : لا بسسس ... ( وبنبرة حزن ) بس تذكر عدنان ..
سالم بتنهيده : الله يرحمه .. منو اللي ذكّره بعدنان ؟؟
سكوووووووووووووووووووووووووووت ..
نواف : ولا أحد .. بس و احنا نسولف عن ايام الطفوله ... تذكر عدنان و طلبنا منه يحكي لنا كيف مات عدنان ...
سالم وهو يقعد عالكرسي اللي قدام المسبح : الله يهداكم .. ليه تذكرونه ؟ احنا بالقوه خليناه ينسى لما سافرنا سوريا ..
فراس : آسف سالم .. انا اللي فتحت موضوع عدنان و ذكرّت رامي به ..
سالم : حصل خير ان شاء الله .. ( و قام ) انا بروح اشوف التلفزيون ..
عبد الله : بروح معك ... و جا بيروح الا ...
هيهات انسى هواك ساكن في وجداني ؟
يعزف على أوتار قلبي هيّض أشجاني
حتى المشاعر حكت لك .. انت شي ثاني
انت المحب اللي لا ما يصح تبديييييلُه
ناظر عبد الله جواله .. ( دااااااانة عمررري يتصل بك )
عبد الله وهو مبتسم : سوري سالم .. انت روح و انا شوي الحقك ..
سالم بابتسامه : على راحتك .. بس مو تصدق نفسك و تطوّل ..
عبد الله وهو رايح : ههههههههه من عيوووني ....
راكان : لحظه سالم انا بروح معك ...... و راحو
********************
أنا لا مسطول ولا بطّوح أنا جاي أجامل .. و مروّح
و أشوف اللي باااااعني و سااابني و خاااااني
و خلى ألبي بيتمطوح
آآه يمه آآآه .. و آآآه يابه دي عيله واطيه ونصاااابه
و الليله جينا نهنيكوووو هاتو الفلوس اللي عليكووو
ترقص و تغني .. و اللي معها بس يصفقون و يصفرون بصوت شوي واطي .. بحجة ان الاهل نايمين ..
ريم : ايووواااااا ... اددددددعععععسسسسسس ...
سديم : ادييييييييييييييييلووووهههههه ...
ريم : نواااري غني ياهوووو .. صوتك روعه بالمصري ..
نوره وهي ترقص : نوووو .. اذا خلّص اغني لكم ...
و كملت رقص الين ما انتهت الاغنيه .. و قعدت تكمل الشاي حقها ...
سراب صحيت من صوت التلفزيون العالي : انتم يا تنامون يا ما تخلون غيركم ينام ؟؟
ريم : صباح الخـ ... أأقصد مساء الخير ...
سراب و هي تجلس : مساء النور .... شتسوون ؟؟؟
نوره : ندق لنا واحد معسّل ... وش شايفه بالله ؟؟
ريم : هههههههه .. حلللللللللللللوووووووووووههههههههههه ...
سراب وتوها تنتبه للتلفزيون : ياه .. العيال هربت ... خساره ما شفت الاغنيه ..
سديم : خيرها بغيرها .. ليه ما نمتي ؟؟
سراب : ليه ؟؟ هو انتو تخلون احد ينام مرتاح و بدون ازعاج ؟؟
*******************
: ياااااا عمري انتي وحشتيييييييييييييينننننننننننييييييييييييييي ...
: و انت اكثثثثثثرررررر يا قلبي .... انت متاكد انك بخير.. ولا تكذب علي مثل كل مره ؟؟
: و انا اقدر اكذب عليك يا حياتي ؟؟
: ايه .. تسويّها و انت عبد الله ..
عبد الله : احم احم ... مشكوره يا دندووونتي
: عبوودي .. بلييز كم مره قلت لك ما احب احد يقول لي دندوونتي ؟؟
عبد الله : اظن .. و الله اعلم ... اكثر من 15 مره .. صح ؟؟
: عبااادييييي ...
عبد الله : عيووونه .. خلاص ما يصير خاطرك الا طيب عمتي دانه ..
دانه : لا تكبرني .. من متى صرت عمتك ؟؟
عبد الله : اقول دانه ..
دانه : قلبها .. آآآآمر يا بعد طوايف دانه و اهلها ..
عبد الله : هاه وش قلتي ؟؟
دانه : في ايش ؟؟
عبد الله : فاللي كلمتك عنه امس ...
دانه : اهااااا .. و الله ما ادري .. براحتك .. بس ..
عبد الله : بس ايش ؟؟
دانه : مو كان امريكا بعيده مره ... احس ماليزيا اقرب ..
عبد الله : يا عمري .. انا حاجز عالرحلتين كلها .. بس لازم اثبت الحجز .. و الزواج ما بقى له الا اسبوعين و احنا ما رسينا على بر ..
دانه : و الله ما ادري ... طيب سلطان حجز على وين ؟؟
عبد الله : ماليزيا .. يقول انها احلى مكان بالعالم .. ليه ديما ما قالت لك ؟؟
دانه : الا قالت لي .. بس قلت يمكن غير .. اقول عبودي ..
عبد الله : عيونه ..
دانه : تسلم .. وش رايك نروح مع سلطان و ديما ماليزيا ؟؟
عبد الله : عادي على راحتك ..
دانه : على راحتك انت .. ودك نروح وياهم ؟؟
عبد الله : nooooo problem .. وش رايك انتي ؟؟
دانه : ما عندي مانع ..
عبد الله : اوكي .. شويه كذا اتصل عالخطوط و أأكد الحجز ..
دانه : حبيبي .. تكفى لا تحجز عالخطوط الاجنبيه .. ما ارتاح معهم ..
عبد الله : صار .. بحجز عالخطوط السعوديه .. بعد آمري ..
دانه تبتسم : ما يآمر عليك عدو ..
عبد الله : كيف اهلك ؟؟ إن شاء الله طيبين ؟؟
دانه : الحمد لله كلهم بخير ..
عبد الله : و كيف استعداداتك ليوم العرس .. منيب مصدق ان بعد اسبوعين بنصير ببيت واحد .. يااااااااااااااااااه ..
دانه بخجل : لا صدق ... عبودي ..
عبد الله : قلبه وروحه و حياته ... آآآمري ..
دانه : انا بسكر الحين .. فيه احد يناديني ..
عبد الله : اوووكيييييي هووووني ...
دانه : باي
عبد الله : بااااااايااااات
و سكرت ... و قعدت تناظر الجوال الى ...
دخلت عليها وهي تبكي : اهئ اهئ اهئ ... تاااااااانه ... ( دااااااااانه )
دانه التفتت على اختها : يا بعد روووح دانه .... اهئئئئئئئئئئئئ .. وش ذا ؟؟ مين كب العصير عليك ؟
: اهئ اهئ ... واا... وااااا.....
دانه فهمت : وائل ؟؟
: اييييواااا .. اهئ اهئ اهئئئئئئئئئئئئ ...
دانه : ليه ؟؟ وش سويتي له ؟؟
: ما سويت لو سي .. ( ما سويت له شي )
دانه : ريما حبيبتي .. شطوره انتي .. ما راح اهاوشك .. بس ايش سويتي لوائل ؟؟
ريما و صوتها كله بكاء : اكوولك ما سويت لو سي .. كان يدول على كوولته و سافني اتفلز توم و زيلي و سك التفزيون .. ( اقول لك ما سويت له شي .. كان يدور على كورته و شافني اتفرج توم وجيري و صك التلفزيون )
دانه : طيب ؟؟
ريما وتستجمع انفاسها : و بعدينا .. كال لي : ليييمووووههه .. وين الكوله حكتي .. كولت له ما ادلي .. و على تول ساف العصيل و كبه علياااا .. اهئ اهئ اهئئئئئئئ ( و بعدين .. قال لي : ريمووووه .. وين الكوره حقتي .. قلت له ما ادري .. و على طول شاف العصير و كبه علي )
دانه وهي تحضنها وتغمرها بطيبتها المعتاده : خلاص حبيبيتي لا تزعلين .. الحين اروح له اكلمه ..
ريما بقهر : هااوسييييه ... ( هاوشييييه )
دانه بتسكتها : طيب بهاوشه ..
ريما : و ادلوووبيييييه ... ( و اضربيييه )
دانه وفيها الضحكه : طيب .. بضربه ..
ريما : و زلي سعله زي ما هو زل سعلي و كتّعه .. ( و جري شعري زي ما هو جر جر شعري و قطعه ) ..
دانه : لا لأ ... الا جر الشعر .. مو قلنا عيب ..
ريما : سح ... زل السعل عيب .. سح تانه ؟؟ ( صح .. جر الشعر عيب .. صح دانه ؟ )
دانه : صح حبيبتي ( و تبوسها على جبينها ) .. طيب يالله اغيّر لك ملابسك
..
ريما : ياللا ... ( يالله ) ..
( لحظه ... بنعرفكم عالعايله .. بس نبذه مختصره عن كل واحد ..
عبد المجيد ( ابو فيصل ) : رجال طيّب و حبوب .. و الكل يحبه .. اغنى واحد .. يمتلك شركات و مؤسسات كثيره ..
ساره ( ام فيصل ) : ماتت لما ولدت بنتها ريما.. يعني ماتت قبل 3 سنين ..
عاليه ( ام مؤيد ) : زوجة الاب ... متزوجها قبل 17 سنه بالسر .. و بعد وفاة ام فيصل اعلن زواجه .. عيبها الوحيد انها تحب كل شي لها و لعيالها ... بس طيبه ... ما تحب من اولاد زوجها الا ديما ...
فيصل : متزوج صار له 5 سنين ... و عنده بنت اسمها ...... بعدين بتعرفون ..
دانه : هذي تعرفونها ... بس بقولكم عنها ... بنت طيبه مررره.. و تموت في شي اسمه اطفال ..حنونه و الكل يحبها .. عمرها 22 سنه .. بعمر نوره ..
ديما : حبوبه و طيووبه مرره ... بس تفرق عن دانه انها ما تحب الاطفال كثير .. و تعصّب منهم بسرعه .. عمرها 20 سنه ..
تركي : عمره 18 سنه .. في آخر مراحل الثانويه .. و بنفس المدرسه مع راكان و رامي .. مستواه الدراسي نزل شوي بعد وفاة امه لانه اكثر واحد تأثر بوفاتها .. بس رجع مستواه مثل ما كان ..
ثامر : عمره 16 سنه مع راكان و رامي بنفس الفصل ...
ريما : الاموره الطيووبه ... عمرها 3 سنين ..
كل اللي فوق .. اولاد ام فيصل الزوجه الاولى ... اما عن ام مؤيد ..
درر : عمرها 17 سنه .. المثل يقول من شابه اباه فما ظلم ... بس عند درر و امها بنقول .. من شابهت امها فما ظلم .. لانه ينطبق عليها .. بس تختلف عن امها في 3 أشياء : انها متكبره و امها لا .. و انها تكره ديما بعكس امها .. و عدوانيه تكره الكل بعكس امها ..
وائل : عمره 11 سنه .. عصبي مره و يكره اخته من ابوه اللي هي ريما ..
ليان : بنوته عكس درر تماما .. تموت في وحده اسمها دانه .. عمرها 7 سنين وتوها باولى ابتدائي ..
خلّصنا الحين من العايله ... يالله نرجع لهم ) ..
و راحت دانه مع ريما يدورون على وائل ... وهم فالصاله ....
: مرااااااااحب يا احلى اخوات بالدنيا ..
دانه تلتفت لها وهي مبتسمه : اهلييين باحلى ديما .. كيفك اليوم ؟؟
ديما : تمام الحمد لله ( و تنتبه لريما ) .. اهئئئئئئئئئئئ .. ريما وش ذا ؟؟
ريما للحين تبكي : اهئ اهئ اهئ .. وائل كب العصيل عليا .. ( وائل كب العصير علي ) ..
ديما : واائل ؟؟؟ ليه ؟؟
ريما : عسان الكوله حكته ... ( عشان الكوره حقته ) ..
ديما : اخذتيها ؟؟
ريما : لا ما احدتها .. بس هو ... ( لا ما اخذتها .. بس هو ... )
دانه قطعتها : هو هاوشها لما شافها تتفرج على توم و جيري و ماتدري عن الكوره ..
ديما معصبه : كمااااااان ... طيييييب انا اراويه الكلب ..
دانه : ديما .. لا تقولين كلب .. هذا مهما كان بيضل اخونا ..
ديما وهي رايحه لجهة غرفة وائل : اخونا طل ... بلا فشكله ..
وشوي الا تشوف وحده قدامها : الله الله الله .. الشيخه علامها معصبه ؟؟
ديما : هلا ود ( زوجة فيصل .. اسمها ود ) .. اخبارك ؟؟
ود : تمام .. ما قلتي لي علامك معصبه ؟؟
ديما بصوت عالي : الكلب وائل .. ما لقى غير ريما يكب العصير عليها ..
: اخوي مو كلب ..
كلهم التفتو ناحية الصوت ...
: ديمووووه ووجع ... لا عاد تقولين كلب على اخوي انتي فاهمه ؟؟ و الا اجي افهمك زي البزارين ؟؟
ديما : عشتووو .. حتى عمتي درر قامت ترادد .. اقول اسكتي اسكتي لا اعطيك كف على وجهك اطيّرك للهند ..
درر بخوف مصطنع : يا ماما .. ياااااه خوفتيني ... ( و تناظرها من فوق لتحت ) .. مالت عليك ..
دانه : درر حبيبتي روحي دارك ..
درر : حبتك القراده قولي آمين .. انا مو حبيبتك ..
ود : درر .. روحي غرفتك .. ولا عاد تطولين لسانك على اخواتك اللي اكبر منك .. عيب عليك ..
درر تناظرها بنص عين : عاشت ام الحكم و المواعظ .. اقول .. هيييييييييي انتي بدال ما تتفلسفين علي و تسوين نفسك مدري ايه .. تشطري و احملي .. خمس سنين و انتي مصبّره فيصل على بنت ..
ود هنا سكتت .. و ناظرت الارض ..
ديما راحت لدرر و تمسكها من شعرها : يا حيوااانه .. انطمي لا الحيــ ...
بس درر قاطعتها ببرودها المعتاد : بسألك سؤال .. تجاوبيني ؟؟
ديما : ما بيني و بينك كلام .. اذلفي ... و تركتها و راحت لجهة غرفتها
بس وقفها صوت درر ....
درر بنبرة تحدي : امووت و اعرف سلطان ايش عاجبه فيكي ؟؟
ديما التفتت لها : نعم نعم ؟؟ عيدي لو سمحتي ؟؟ ما نظفت اذني اليوم يمكن ما سمعت زين ..
درر بصوت عالي و ايدها على خصرها : اقوول سلطان وش عاجبه فيك ؟؟لو انه اخذ الهنوف احلى منك .. ثاني مره نظفي اذوونك زين عشان تسمعين ..
منذ /03-08-2007, 07:30 AM
