رواية ( أصدقاء للأبد لو يطول الأمد ) روووعة

**سكرية وردية** · منذ /14-05-2009, 05:01 PM

سامي فرحان عشان ربى بدأت تتحسن.

وفي انتظار الباقي

**PRINCESSE MONONOKE** · منذ /14-05-2009, 09:50 PM

يلا احنا في الانتظار
شوقتينا
سي يا

**مس جوري** · منذ /15-05-2009, 02:50 PM

يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا يلا

**المسلمةالمسالمة** · منذ /15-05-2009, 03:28 PM

الجزء الثالث عشر 13

سامي : بندر انا اليوم فرحااااان حدي
بندر : هااه بشر وش صار
سامي : ربى
بندر : ايه وش صار فيها
سامي : تحسنت حالتها ... قبل شهر صحت من الغيبوبة واليوم صحتها مثل الفل وانا الحين بالمطار وان شاء الله نجي عندكم
بندر : ما شاء الله الف الف الف مبروك والحمدلله على السلامة
سامي : الله يسلمك
بندر : هساها تمشي وتتكلم
سامي : ايه الحمدلله بصحة وعافية
بندر : لك الحمد والشكر يارب ... الحين متحسنه لها شهر وما قلت لي
سامي : وش اسوي فرحان ... وبعدين موعلطول صحت مره وحده صحت بيوم وبعد اسبوع تكلمت وعلى شوي شوي دربناها على المشي و كل هذا خلال شهر
والحين هي تاكل علاج .... وتجيها حالات احيانا يصدع راسها وتحس بدوخه وغيروا علاجها ..
بندر : الله يديم عليها الصحة والعافيه
سامي : آآمين ...
بندر : يا الله توصلون بالسلامة
سامي : ان شاء الله ... بس لا تعلم لين
بندر : ان شاء الله .... مع السلامة
سامي : مع السلامة
%%%%%%%%%%%%%%%%%
ابو سامي : مين
بندر : سامي
ابو سامي :سامي !!! وش اخباره
بندر : يقول انه في المطار .. وبيجي ان شاء الله
ابو سامي : مع ربى
بندر : ايه يقول ان صحتها تحسنت ولله الحمد
ابو حسام : الله يبشرك بالخير ويجزاك خير
بندر : آآآآمين
ابو سامي : اجل اعلم الحريم
بندر : لا لا خلها مفاجئه
ابو بندر : لا ما يصلح لازم يدرون الحريم بس البنات لا
بندر : خلاص اعلم امي واقولها لا تعلم البنات
ابو حسام : زين
وقالهم ...
%%%%%%%%%%%%%%%%%%
لين دخلت عند الحريم : وش فيكم سكتوا لم جيت وش عندكم
ام حسام : ولا شي تذكرنا مواقفكم لم كنتوا صغار
لين : بس
%%%%%%%%%%%%%%%%%%
الساعة 2 باليل
لين : اعوذ بالله وش فيهم ما يبغون يتعشون
جوري / يسوون رجيم
لين : واذا قلنا لهم جوعانين قالوا لنا كولوا أي شي .. اف
رحاب : صح وش فيهم اليوم احس انهم غريبين !!
جمانه : علمي علمك ... والله يستر
رحاب : لين انتي وش فيك ما تسمعين الكلام
لين : وشو
رحاب : جيبي جود ابي اشوفها كم مرة قلت لك
لين : ان شاء الله
وراحت تجيب بنتها
جوري : رحاب وين ريما
رحاب : معزومه
جمانه : وش عندها الحين من ذرية
رحاب : ولد وبنتين
جمانه : ايه صح وش لونهم
رحاب : بخير
رجعت لين ومعها جود
لين :امسكي جود
رحاب : يااااقلبي ... تجنن ما شاء الله ..امووووه << باستها
جوري : قامت
لين : لا نايمه
جوري : ايه الحين تقوم وتسهرك يالليل
لين : عادي تعودت
جمانه : الله يعينك
لين : ليش ما تجلسون عند الحريم خلاص تراكم عجزتوا
جمانه : لااا تكفين ... سواليفهم بايخة
جوري : طييييييييييييب اعلم
جمانة : عادي قولي
رن جوال جوري
جوري : اسكتوا هذا الخبل
رحاب : مين الخبل
لين : زوجها ما تسميه الا الخبل حتى بجوالها مخزنه رقمه باسم الخبل
جوري : الوو هلا بالخبل
سلمان : هلا >>> مسكين يقول هلا وهي تسبه وتقول خبل
جوري : وش تبي اختصر
لين : اعوذ بالله علطول وش تبي ..قولي وش لونك وش اخبارك سولفي شوي
جوري : انتي مالك شغل زوجي ولا زوجك
لين : الله يعينه
جوري : هييه انت عندك شي ولا اسكر بوجهك
سلمان : الرجال يبون شاي
جوري : انزين ........ وسكرت بوجهه
جمانه : وين القبله وين القبله .
لين استغربت : هذي
راحت جمانه ووجهت وجهها للقبلة ورفعت ايدينها : ياااارب تعين سلمان على جوري يااااااااااارب
لين ورحاب : آآآآآآآآآآمين ههههههههههههه
جوري : ويعيني انا بعد ...... وبعدين وش سويت انا يحمد ربه اني رديت عليه بعد
لين : وش يبي ؟
جوري : يبي شاي ... بروح اقول للخدامه تسوي لهم .
وراحت ..... وبسرعه رجعت
رحاب : بنات ما جعتوا
جوري : الا والله بطني ازعجني
لين : تبغون اسوي لكم شي
جمانه : مثل وشو
لين : انتم وش تبغون
رحاب : عصير
لين : طيب وش تاكلون معه
جوري : مكسرات
لين : من عيوني
جمانه : الله يسلمك
وراحت لين للمطبخ
%%%%%%%%%%%%%%%%
عند الحريم
ام سامي رن جوالها
بندر : هلا خالتي وش لونك
ام سامي: الحمدلله
بندر : خالتي تعالي بالحوش
ام سامي : ليش
بندر : ربى وسامي جو ... بس لا احد يدري
ام سامي : ان شاء الله
%%%%%%%%%%%%%
طلعت ام سامي وشافت ولدها
ام سامي : هلا والله بسامي وش لونك
سامي باس راس امه : السلام عليكم
ام سامي : وعليكم السلام .. الحمد لله على السلامة .... ودمعت عيونها
سامي : الله يسلمك
ام سامي ضمت ربى : هلا والله الحمد لله على سلامتك
ربى : الله يسلمك
ام سامي : طيحتي قلوبنا
ربى : ههههه باسم الله عليكم
بندر جاء : هلا والله بولد عمي
سامي ضم بندر : اهلييييييين وش لونك
بندر : الحمد لله .... اشتقت لك
سامي : وانا اكثر
بندر : تعال ادخل
سامي : يا الله
ودخل عن الرجال وسلموا عليه سلام حار كله شوق ومحبه
%%%%%%%%%%%%%%%%%%
ام سامي : يا الله ربى ادخلتي حياك الله
ربى : الله يحييك
ام سامي : الحين لين بتنجن اذا شافتك
ربى : هههههه ياحبي لها
ودخلوا عند الحريم اللي كانوا جالسين بالمجلس
ربى : السلام عليكم
الكل التفت عليها واولهم رحاب اللي كانت جايه تاخذ لها منديل
رحاب ركضت وبقوه ضمت ربى وهي تبكي : اهلييييييين اشتقت لك
ربى : هلا والله اشتاقت لك العافية يا بعد عمري
رحاب فرحاااانه : متى جيتي ومتى تحسنتي
ام سامي : رحاب خلي الاسئلة بعدين ...
ربى ضحكت على شكل اختها المتحمسة والفرحانه وسلمت على امها وام بندر .... وكلهم بكوا
راحت رحاب للبنات
شافوها وهي مبتسمه من بين دموعها وخافوا عليها
جوري : وش فيك بسم الله عليك
جمانه : رحاااب فيك شي
رحاب : ربى ربى
جوري وجمانه مع بعض وبخوف : وش فيها
رحاب : جت جت جت
جوري وجمانه قاموا بسرعة وراحوا عند الحريم وراحت معهم رحاب
وسلموا عليها ..
لين اخيرا خلصت من العصير وصفت الاكواب على الصينية وحطت المكسرات وشالت الصينية وراحت للغرفة اللي كانوا جالسين فيها البنات وما لقتهم
لين تكلم نفسها : " وين اختفوا ... سوي لنا عصير وراحوا وخلوني
حطت صينية العصير وراحت تدورهم بالدور الاول ولا لقتهم
وراحت للحوش ولا لقتهم ... طفشت وقالت خليني اجلس عند الحريم ابرك لي
دخلت لين المجلس وشافت ظهر وحده لابسه عبايه
التفتت عليها ربى .....

وش تتوقعون يصير للين اذا شافت اعز الناس
عندها وصديقتها وحبيبتها ؟؟!!!
كل هذا واكثر واحداث كثيرة رح تمر
علينا في الجزء الرابع عشر 14 من رواية :
)))أصدقاء للأبد لو يطول الأمد للكاتبة المسلمة المسالمة (((

:sm.49:

ردووووووووووووووووووووودكم يا الحبايب

**سكرية وردية** · منذ /15-05-2009, 03:43 PM

الف شكر على البارت ولي عودة بعد القراءة

**سكرية وردية** · منذ /15-05-2009, 03:52 PM

وش تتوقعون يصير للين اذا شافت اعز الناس عندها وصديقتها وحبيبتها ؟؟ أكيد رح تضمها وتبكي

**مس جوري** · منذ /15-05-2009, 04:34 PM

حــــــــــــــــــرام عليـــــــك البارت قصيـــــــــر
يا اللهـ مو مشكلة بس لا تبيطين بالبارت الجاي

***maria*** · منذ /17-05-2009, 01:50 PM

يلا ننتظرك بلا تأخير

***maria*** · منذ /17-05-2009, 04:09 PM

اقول كم بقى من القصه؟؟

**مس جوري** · منذ /17-05-2009, 04:16 PM

حتى انا واللهـ زهقت وانا انتظر

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

رواية ( أصدقاء للأبد لو يطول الأمد ) روووعة

الـقـصـص و الـروايـات