رواية ( أصدقاء للأبد لو يطول الأمد ) روووعة

**ڜوربـۃ عسڷ♥** · منذ /09-05-2009, 07:56 PM

ان شاء الله
يلا ياالمسلمه انا مرة متحمسه للاحدات
ان شاااء الله ماكووونن ازعجتك

**المسلمةالمسالمة** · منذ /09-05-2009, 09:58 PM

الجزء العاشر 10

بعد فتره طويييييييييله
اخيرا طلع الدكتور من الغرفه
سامي : هااااه يادكتور بشر ... قول انها بصحة وعافيه ارجوك قول .. وبكى
الدكتور : والله حالتها صعبه مره
ابو حسام : طيب وش فيها؟
الدكتور : غيبوبه
سامي حط ايده على راسه : غيبوبة !!!؟
ابو حسام : لا حول ولا قوة الا بالله
بندر : انا لله وانا اليه راجعون
الدكتور : ان شاء الله تتعافى
بندر : متى ؟
الدكتور: ما ادري بس احتمال بعد سنه او اكثر واحتمال كبير جدا انها تستمر بغيبوبه ....
سامي بصوت حزين : ابي اشوفها
الدكتور : معليش ما اقدر .. قلت لك حالتها صعبة جدا... حتى لو دخلت مارح تحس فيك ... عن اذنكم ...............
وراح الدكتور ...
سامي جالس على الكرسي ومغطي وجهه بشماغه ابو حسام لف وجهه على الجدار وما قدر يتحمل . اما بندر يحاول انه يكون ثقيل قد ما يقدر علشان يهديهم
واخيرا تكلم بعد فتره والعبرة خانقته : اذكروا الله ياجماعة
ابو حسام بصعوبه : لاااا اله الا الله
سامي وهو يبكي : ونعم بالله
بندر : يا الله نرجع البيت
سامي : انا مستحيييييييييل ارجع البيت وما فيه قمر ونور و بهجه وشعاع البيت ...... ما فيه ربى ترحب فيني وتاخذ شماغي وتسولف وتضحك معي ... ما فيه احد امزح معه واقووووول له كـــــل اللي بخاطري وو ..........
وما قدر يكمل وغطى وجهه بشماغه مره ثانيه وجلس يبكي بشده .
بندر وابو حسام دمعت عيونهم وصاروا يضحكون معه بدل ما يهدونه ..
ابو حسام ومسح دموعه : قدر الله وما شاء فعل ... استغفر ربك وارضا بقضاء الله وتعال معي بالبيت
بندر : خلاااااص عاد يكفي يا سامي .. كذا تتعب نفسك وتتعبنا معك
سامي : ايييه لو انك شايفها وهي طايحة بعيد عن السياره وحولها الدم كااان تنجن ويغمى عليك بعد.
بندر : سامي ارجوك خلاص يا ابن الحلال لا تضيق صدورنا اكثر من كذا . يا الله امش معي للبيت
سامي : بجلس هنا مرافق ومستحيل اخليها
بندر : بس ..
سامي : والله ثم والله ثم والله اني ما اخليها لحالها ورح اسوي المستحيل علشان تتعافى وترجع مثل اول ..........وبكى
ابو حسام : خلاص بندر رح قل للدكتور
بندر : طيب
وراح لعند الدكتر وقال له ... والدكتور وافق
وجلس سامي عند ربى كمرافق ... وجلس يتذكر ايام زواجه منها .. واستهبالها وضحكها وزاااد بكائه اكثر واكثر .
وبندر وابو حسام رجعوا لبيوتهم والدمعه ما فارقتهم
بندر رجع للبيت معصب وضايق صدره
لين : هلا بندر ليش تاخرت .. وين سامي وين ربى
بندر : سافروا
لين : ايييييش ؟؟!!! طيب هي ما قالت لي انها بتسافر
بندر : ................... ( سكت ما يدري وش يقول )
لين وبدت عيونها تدمع على خفيف : بندر
بندر بتعب : وش تبين؟
لين : ليش ربى ما ترد على جوالها ؟
بندر بعصبيه : وانا وش دراني عنها يمكن حاطه على الصامت
لين : بندر انا احس ان صاير شي ومخبي علي
بندر عصب اكثر : يووووووووووه يا لين انا تعبان وراسي يوجعني مالي خلق لك
لين انصدمت لان اول مره بندر يعصب عليها ويهاوشها .. دمعت عيونها وصارت تبكي ..
%%%%%%%%%%%%%%%%%%%%%%%%%
بعد يومين
طبعا بندر كل ما رجع من الدوام يمر على سامي في المستشفى ويجلس يهديه وبعدين يرجع للبيت
وابو حسام وام حسام نفس الشي ورحاب احيانا تروح واحيانا تجلس في البيت
ام سامي وابو سامي عرفوا عن طريق ام حسام وصاروا يزورون ربى وسامي يوميا .
اما لين ... في حيره ونكد وهم .. ما علموها لانهم خايفين من ردة فعلها .
%%%%%%%%%%%%%%%%%%%%
في يوم من الايام
بندر : هلا سامي ... وش لونك اليوم .
سامي : بخير ... بس نفسيتي تعبانه
بندر رأف على حال سامي : ايه طيب وش اخبار ربى؟
سامي : آآآآآآآآآه ياربى الله يقومك بالسلامه والله مشتاق لسوالفك وزعلك وضحكتك الخجوله ... والله يا بندر مدري وش اقولك على حالتها ما تتكلم ولا تفتح عيونها مثل الميته ..... ودمعت عيونه للمره الالف
بندر ضاق صدره مرره لكن مسك نفسه : ادع ربك .
سامي مسح دموعه : الله يتقبل ... ايه صح الدكتور يبيك يقول لي اذا جاء بندر قول له يمرني
بندر : ليش
سامي : ما ادري
بندر : خلاص انا بروح عن اذنك
وراح لعند الدكتور..
الدكتور : اهلين تفضل
بندر : شكرا ... بشر يا دكتور
الدكتور : بندر ... حالة ربى حاله مستمره مدى الحياة
بندر انصم من كلام الدكتور وبصعوبه : لا حول ولا قوة الا بالله
الدكتور : ونعم بالله
بندر : طيب يا دكتور ما فيه حل ؟
الدكتور : هنا مافيه بس يمكن اذا سافرتوا فيها للجارج وتلقت العلاج تتحسن
بندر : تتوقع كذا
الدكتور : اتوقع ... باذن الله تتعافى
بندر : طيب مشكور ..
وطلع من عند الدكتور وهو يفكر وش رح يقول لسامي ...
سامي : بندر بندر
بندر بحزن : نعم
سامي : وش قال لك الدكتور؟
بندر : سامي انا بتكلم معك على انك رجال عاقل وقوي لا تصير مثل الحريم وتصيح
سامي خااف : الله يستر وش السالفه
بندر : توعدني انك تاخذ الامر بجديه وتصير رجل
سامي : ايه ان شاء الله بس قل بسرعة
بندر : ربى .. يمكن تستمر على الغيبوبه الى الممات ومافيه الا حل واحد اذا سافرت فيها برى للعلاج
سامي : وانا مستعد بسافر فيها للخارج ان شاء الله ولو يصير اللي يصير اهم شي صحة اغلى الناس عندي
ام حسام : السلام عليكم سامي
سامي : وعليكم السلام هلا خالتي
ام حسام : وش لون ربى ؟
سامي : الحمد لله على كل حال
ابو حسام : السلام عليكم هلا وش لونك وش لون صحتك
سامي : الحمدلله على كل حال قضاء وقدر
ابو حسام : الحمدلله ..... وش اخبار ربى
سامي : الحمد لله بس
ابو حسام : بس ايش ؟
سامي : يقول الدكتور انها بتستمر بالغيبوبه مدى الحياة الا اذا سافرتوا فيها للخارج وتلقت العلاج المناسب
ابو حسام : انا لله وانا اليه راجعون
ام حسام : ابو حسام اذا رحت انا بروح معك
ابو حسام: ما اقدر اروح عملي ما يسمح لي المدير مانع عني الاجازات
سامي : لا تخافون انا بسافر فيها
ام حسام : بروح معك
ابو حسام : لا.. ما تروحين انتي تجلسين عندي هنا
سامي : لا تخافين خالتي اوعدك اني اهتم فيها
ام حسام وابوحسام : الله يجزاك خير ويوفقك
بندر : عن اذنكم انا بروح للبيت تاخرت على لين
سامي : الى الان لين ماتدري عن ربى ؟؟؟
بندر: لا والله خايف من ردة فعلها
سامي : حافظ عليها لايصير لها شي ولا تهاوشها تراها حساسه
بندر : ان شاء الله لا توصي حريص
ورجع البيت
لين جالسة بالصاله تبكي
بندر : سلامات ليش الحلوة زعلانه وش فيك
لين : احس انك مخبي عني شي
بندر: انا
لين : ليش ربى ما ترد على الجوال
بندر : يقول سامي ان جوالها ضايع ويبي يشتري لها جوال جديد ان شاء الله
لين : وسامي ما يرد علي ليش ؟
بندر : خلاص اذا كلمته اقول لها يتصل عليك ... وش تبين بعد
لين : طيب هم وش لون سافروا ولا جو للبيت واخذوا ملابس وشناطهم
بندر : انتي الحين اذكري الله وامسحي دموعك
لين : لا انا متاكدة ان ربى فيها شي او سامي فيه شي
بندر يأس منها وعصب : يووووووه يالين الصراحة دوختي راسي ... انتي ليش ما تصدقيني
لين : لاني اعرف ربى زين .. ما تحب تتاخر علي لازم كل يوم تتصل علي
بندر عصب مره : بكيفك انا كذاب وغبي وما افهم خلااااااص وانتي صااادقه ... اف
وراح نام بغرفته من دون ما يتغدى
%%%%%%%%%%%%%%%%%%%%%%%%%%
بعد اسبوعين
لين كالعادة اتصلت على جوال ربى وما صدقت بندر يوم قالها ان جوالها ضايع واتصلت حوالي 10 مرات وللاسف ........... ما احد يرد عليها
لين تحطمت ..
كيف بيوم وليله تفقد صديقتها وبدون سبب
صديقتها واعز الناس عندها ... كانت تشكي لها بعد الله سبحانه
كانت صديقتها من صغرها ... عاشت معها طفولتها
وصااارت لهم مواقف كثيره ..... بيوم وليله ينقطع خبرها
لا تشوفها ولا تسمع صوتها على الاقل ....
رمت لين نفسها على سريرها ورمت الجوال وهي منقهره وصارت تفكر بينها وبين نفسها "
كيف قدرت ربى تنساني وتنسى عشرة العمر اللي بيني وبينها
ما اعتقد انها نستني اكيييييييد فيها شي اكييد فيها شي ..
قلبي يوجعني واحس ان فيها شي ...
قامت بسرعة من سريرها وراحت لعند بندر
اللي كان جالس باالصاله ويناظر التلفزيون بكل هدوء وحزن .
لين بصوت واطي : بندر
بندر : خير
لين : زعلااان ؟
بندر : ايه
لين : آآآسفه والله ماكان قصدي ازعلك
بندر : صايرة أسئلتك كثيرة .. ولا تسولفين معي ولا تضحكين ولا تستقبليني مثل اول .. كل هذا علشان ربى ما ردت
لين : بندر .. تخيل لو تفقد صديق عمرك .. عااش معك طول السنين . وكنت تشكي له وتوسع صدرك معاه وتدردش معه .. وش تسوي في نفسك ..
بندر ... انا من يوم ما كنت بالإبتدائي كانت ربى صديقتي . كانت طيبه مره وحبوبه
وفجأه كذا اختفت وما ادري وين راحت لا تكلمني ولا تشوفني ولا تسأل عني . تخيل معي يابندر تخيل ............. وصارت تبكي بصوت عالي
تأثر بندر مره ودمعت عيونه وخنقته العبره ولا قدر يستحمل انكسار لين قدامه
بندر اخذ نفس طوييل واخيرا تكلم : لين .. ربى بخير . .. لا تضيقين صدري خلاص يكفي . .... وسكت لانه ما قدر يكمل وخنقته العبره وما يدري وش يقول
لها ... يقول لها ان صديقتك وحبيبتك في غيبوبه ... صعبه عليه
%%%%%%%%%%%%%%%%%%%%%%%%%%%
سامي قرر انه ياخذ ربى ويسافر فيها للخارج وبالتحديد المانيا علشان تتلقى العلاج
وقبل ما يسافر راح لعند اهله يودعهم وبعدين راح لعند ابو حسام وودعهم ..
وســــــــــافر مع ربى ..... وكله امل ان ربى رح تتعافى وترجع مثل اول

%%%%%%%%%%%%%%%%%%%%%%%%
بعد اسبوعين
لين : بندر ممكن اسأل ؟
بندر : رجعنا
لين : بس لا تهاوشني
بندر : اوكي .... تفضلي
لين : امممم ربى ساكنه عند مين بالشرقيه ؟
بندر ارتبك : هاه ما ادري
لين : طيب قول لي وش فيها وريحني
بندر : لين .. اتصلي على سامي واساليه
لين : طيب تتوقع يرد علي هالمره
بندر : ان شاء الله
لين : طيب
وراحت تتصل عليه
سامي : هلا والله بلين وش لونك
لين : الحمدلله ... انت وش لونك
سامي : لا انا بخير جعلك بخير ... وش اخبار بندر
لين : الحمد لله . سامي
سامي : هلا
لين : بسألك سوال وتجاوبني بصراحة وما احللك لو تكذب علي
سامي بخوف : تفضلي
لين : ربى ... وش فيها
سامي : ربى !

تتوقعون ربى اذا تلقت العلاج بالخارج تتعافى !!!!؟
وتتوقعون سامي يجاوب على سؤال لين بكل صراحة ولا لا !!!؟؟
كل هذا واكثر في الجزء الحادي عشر 11 من رواية
)))أصدقاء للأبد لو يطول الأمد للكاتبة المسلمة المسالمة (((

**مس جوري** · منذ /10-05-2009, 06:32 PM

شكرا يا الغلااا
نستنى البارت الجاي ع نااااااار
خالص تحياتي (مس جوري )...

**المسلمةالمسالمة** · منذ /10-05-2009, 11:46 PM

الجزء الحادي عشر 11

لين : ربى ... وش فيها
سامي : ربى !
لين : ايه
سامي : ربى فيها كسور ووهي الحين في المستشفي بالمانيا
( هي صحيح فيها كسور وما حب يكمل لها ويقول وفيها غيبوبه علشان ما تخاف )
لين : بالمانيا !!! بس بندر يقول انكم بالشرقيه
سامي : حنا ما سافرنا المانيا الا قبل اسبوعين
لين : طيب وش اخبارها
سامي : الحمد لله
لين : ابي اكلمها
سامي ارتبك : معليش ما اقدر
لين : ليش ما تقدر
سامي : نايمه
لين : اها .. طيب وش السبب الكسور؟
سامي : حادث
لين : حادث !!!؟
سامي : ايه ...... وقال لها السالفه
لين : الحمدلله على سلامتكم
سامي : الله يسلمك
لين : طيب مع السلامة سلم لي على ربى كثير السلام
سامي سكت شوي ورد بصعوبة ودموعت عيونه : ان شاء الله
لين سكرت السماعه وراحت لعند بندر ..
لين : يندر ابي اروح المانيا
بندر : وش لون تروحين المانيا وعندي دوام
لين : خذ اجازه
بندر : معليش لين عاد بهذي ما اقدر
لين : الله يعافيك
بندر : لا تحاولين
لين : ليش طيب ليش تبي تحرمني من شوفة صديقتي
بندر : اخاف تنصدمين اذا شفتيها
لين : ليش انصدم ... فيها كسور بس
بندر استغرب : كســوووور !!!!!
لين : ايه وش فيك ؟!!!
بندر : لا لا ولا شي
لين : هاه وش قلت
بندر : خلاص علشانك انا اكلم المدير بكرا
لين : مشكوور الله يخليك ويجزاك خير
بندر : آآمين .
%%%%%%%%%%%%%%%%%
ومن بكرا بندر قال للمدير عن الاجازه وقال له السبب وبعد عناء وافق ..
رجع بندر للبيت
لين : هلا والله وش لونك
بندر : الحمدلله ... عندي لك خبر يهبل
لين بحماااس : وشو ؟
بندر : قلت للمدير على الاجازه ووافق
لين متشققه من الوناسه : من جـــــــــد !؟
بندر : ايه
لين : الله وناسه اخيرا بشوف ربى
بندر ضاق صدره لان ربى ما رح تحس فيها ودمعت عيونه شوي وعلطول مسحها علشان لين ما تحس ويضيق صدرها
بندر : يا الله انا بروح احجز طياره
لين : طيب تغدى بعدين رح
بندر: يا الله اجل بسرعه
%%%%%%%%%%%%%%%%
بعد الغداء راح بندر وحجز الطيارة
وجاء موعد السفر
بندر : لييين ... لين بسرعه
لين وتنزل من الدرج : بالله انا جاهزه ..... قلت لسامي
بندر : ايه قلت له
لين : لا يكون قال لربى .. ابيها مفاجئه
بندر ضاق صدره ةجلس يناظر لين ويفكر وما رد عليها : .............
لين : بندر .... بندر
بندر دمعت عيونه واخذ نفس طويل وبينه وبين نفسه " مسكينه يا لين وش رح تكون رده فعلك اذا شفتي ربى وهي في ((( غيبوبة ))
لين : بندر ..
بندر اخيرا رد عليها : نعم
لين : وش فيك .... ليش غيونك دمعت فيك شي تعبان ؟
بندر : لا لا بس عيوني فيها حساسية
لين : اشوى .... يا الله تاخرنا
بندر : يا الله
%%%%%%%%%%%%%%%%%%
راحوا للمطار وركبوا الطياره ..
وبعد ما وصلوا راحوا علطول للمستشفى اللي كانت فيه ربى
ولين طاااايره من الوناسه لانها بتشوف ربى ...
وهم يمشون قابلوا سامي
لين : سااامي . هلا والله شخبارك
سامي : اهلين ... الحمدلله انتي كيفك
لين : بخير جعلك بخير .... ليش صرت نحيف
سامي : رشاقه
لين : هههههههه
سامي : زش لون امي وابوي وجوري وكلهم
لين : طيبين يسلمون عليك
سامي : الله يسلمهم
بندر : احم احم نحن هنا
سامي التفت عليه وعلطول ضمه : هلا والله ومرحبا ..
بندر : اهلين ... لك فقدة ياولد العم
سامي : الله يجزاك خير
لين : وين ربى
سامي : دقيقه ...... بندر ابيك شوي
بندر : هاه
سامي : لين تدري ان ربى بغيبوبة ؟
بندر بضيق : لا ما قلت لها والله خايف من ردة فعلها
لين : وش فيكم
سامي : لا ما فينا شي .... تفضلوا هذي غرفة ربى
ودخلوا عند ربى
لين : ربى ... ربى سلامات يابعد عمري وحشتيني ... ربى ربى
سامي ليش ربى ما ترد ؟
سامي :مخدره
لين : متى تنجبر كسورها
سامي : ان شاء الله بعد 3 اشهر او اكثر على حسب
لين : متى تصحى
سامي : امممممم ما ادري ادعيلها بالشفاء
لين : سامي ... الله يعافيك ادري انك مخبي شي عني قل لي وش فيها ارجووك
سامي يناظر بندر : اقول لها
بندر : بكيفك ....... وطلع علشان ما يبي يشوف رده فعل لين وانصدامها
لين : سامي .... ارجوك قل لي ..
سامي : ربى فيها
لين : ايه كمل
سامي نزل عيونه المدمعه وبصوت واطي وحزين : غيبوبة
لين انصدمت وتغير لون وجهها وبصوت عالي : انت وش قاعد تقول
سامي اخذ نفس طوييل : مثل ما سمعتي وادعيلها
لين صارت تبكي بصوت عالي : لااااااا مستحييييييييييييل
بندر سمع صوتها وهو برى الغرفه وتـأثر مره
بعد ساعة كامله ...
لين مازالت تبكي بصوت عالي وبندر وسامي جالسين قبالها وساكتين
بندر اخذ كرتون المناديل الثاني لانها خلصت الاول وراح جلس جنبها
بندر بصعوبه : لين خلاص قدر الله وما شاء فعل ... هي الان ما ماتت ادعيلها بالشفاء ..
لين تكلمت اخيرا وهي تبكي وبين كل كلمة وكلمة شهقه : ما اقدر اشوف اعز انسانه عندي بهذا الحال .... صديقتي اللي عشت معها من يوم كنت بالابتدائي
وزاد بكاائها
بندر يناظر سامي ويأشر له علشان يجي ويسكتها
سامي جاء عندها : لين ....... هدي بالك خلاص ... انا جبتها هنا عشان تتعالج وان شاء الله تطيب
لين : ان شاء الله
بندر : ي الله عاد امسحي دموعك
لين مسحت دموعها الغزيره ...
سامي : لين تفائلي بالخير ... انا فرحت لم سمعت انك بتجين هنا علشان تساعديني مو تزيديني هم ... لو البكاء يقومها بالسلامة كان بكيت كل شوي
بس وش فائدة البكاء الحين ... لازم ندعي لها بالشفاء ..
لان الدعاء يغير القدر ... فهمتي
لين هدت شوي وهزت راسها ...
بندر : يا الله عاد وسعي صدرك
سامي : وابتسمي من زماان عن ابتسامتك الحلوه يا الله يال اختي
لين ابتسمت ما بين دموعها ..
سامي : ايه هذي لين اللي اعرفها
%%%%%%%%%%%%%%%%%%%
لين وبندر جلسوا بالمانيا اسبوعين ولين كانت كل ما جاء وقت الزيارة
تروح وتجلس عند ربى وتشغل جوالها على سوره البقرة ...
وكل يوم تدعيلها .... ليل ونهار

%%%%%%%%%%%%%%%%%%%
جاء اليوم اللي بيرجعون فيه للرياض
لين ارسلت لسامي مقطع سوره البقرة وقالت له كل يوم شغلها
وعطته بعض التعليمات اللي افادته كثير
وسافروا ......
%%%%%%%%%%%%%%%%%%
بعد شهر ....
لين وبندر جلسوا يسولفون بغرفتهم
بندر : لين
لين : هلا
بندر : عندي سؤال محيرني مده واشك فيه
لين بخوف : وشو
بندر : تذكرين لم نروح للبر بمخيمكم
لين : ايييييييه يا قدمك
بندر : شفتي البنات الي تعطل عليهم الدباب ... ما قال لك سامي السالفه
لين : الا قال لي .... وش فيهم
بندر : منهم البنات ؟؟
لين : ليش تسأل ؟
بندر : بس اشك انك انتي وربى صح
لين : هههههههههههههههههههههههه
بندر : انتم ؟؟؟؟
لين : ايه .... وانا اللي ساكته
بندر : احلفي!!
لين : والله
بندر : طيب ليش ساكته
لين : اخاف تكشفوني بصوتي
بندر : اممممممممم
لين : ههههههههههههههههه ... صدق اني مهبوله يوم كنت صغيره
بندر : اما انتي وربى ما فيه اكثر من مواقفكم
لين وتذكرت ربى : آآآآآآآآآآه يا ربى يا حبيلها ... الله يشفيها ويقومها بالسلامه
بندر : آآآمين
%%%%%%%%%%%%%%%%%%%%
بعد سنه ...
وش الاحداث اللي تغير خلال السنه
تتوقعون ربى تحسنت ولا الى الان في غيبوبة
مين اللي تزوج من العائله ؟؟؟ ومين ومين ؟؟
احداث كثيره رح تحصل في الجزء الثاني عشر 12 من روايه
)))أصدقاء للأبد لو يطول الأمد للكاتبة المسلمة المسالمة (((

**مس جوري** · منذ /11-05-2009, 06:25 PM

خالص تحيايت لكي اختي المسلمة المسالمة
مس جوري .....

**PRINCESSE MONONOKE** · منذ /13-05-2009, 01:29 PM

يلا كملي القصة
شوقتينا ع الاخر
في انتظارك

**سكرية وردية** · منذ /13-05-2009, 10:20 PM

وش الاحداث اللي تغير خلال السنه؟ كل شي بيتغير

تتوقعون ربى تحسنت ولا الى الان في غيبوبة؟ لا اتحسنت
مين اللي تزوج من العائله ؟؟؟ ومين ومين ؟؟ ما عرفت

**المسلمةالمسالمة** · منذ /13-05-2009, 11:58 PM

الجزء الثاني عشر 12

بعد سنه ..
لين حملت وهي الان بالشهر التاسع
رحاب وجوري وجمانه تزوجوا ..
والباقي على ما هم عليه
لين : بندر
بندر : هلا
لين : بطني يوجعني ابي اروح المستشفى
بندر : يووووه والله ان حملك هذا غثاء
لين : ليش ؟
بندر : كل يوم تروحين المستشفى ؟؟
لين : كل يوم اروح المستشفى اطمئن على صحتي ولا صحتي ما تهمك
بندر : الا بالعكس تهمني ...
لين : بندر بندر
بندر : وش فيك
لين : خلااااص ما اقدر اتحمل ودني المستشفى .. احس بالم الولاده
بندر طمر من مكانه : من جد ؟؟ يا الله يالله بسرعه على المستشفى
وراحوا المستشفى ...
وولدت وجابت بنت تجنن
بندر : الحمدلله على السلامة
لين : الله يسلمك
بندر : مبروك
لين : الله يبارك فيك
بندر : وش تسمينها
لين : وش رايك باسم جود
بندر : جود .... حلو ... خلاص اروح اوقع على اسم جود ؟
لين : ايه
%%%%%%%%%%%%%%%%
طلعت لين من المستشفى وراحت لعند اهلها
وكل شوي يجون ضيوف يشوفون لين ..
جوري : افففف
لين : وش فيك
جوري : لا عاد تحملين ثانيه فاهمه واذا تبين تحملين .. اذا ولدتي لا تجين عندنا
لين : ليش
جوري : اعوذ بالله ... جوري تعالي جوري روحي جوري جيبي جوري عطيني
ذبحتوني .. ما فيه الا انا .... صايره قهوجيه للضيوف اللي يجونك وصرت خدامه عند حضرتك ... نحفت 4 كيلو
لين : هههههههههههههههههه يا حليلك اذا عصبتي ..
جوري : احر ما عندي ابرد ما عندك ...
ام سامي تنادي من بعيد : جوري جوري جوري
جوري : هذي الوالده بدأت
لين : هههههههههههههههه روحي شوفي وش تبي بس
%%%%%%%%%%%%%%%%%%
بعد اسبوعين
لين اتصلت على سامي
لين : الوو هلا سامي
سامي : هلا والله وش لونكم وش اخباركم
لين : الحمدلله كلنا بخير
سامي : وش اخبار جود
لين : الحمد لله طيبه
سامي : عساها تشبهلي
لين : لا .... فيها كثير من بندر
سامي : وع ع ..... اكيد وعه مثل ابوها
لين : حرام عليك بندر وع ؟
سامي : ههههههههههه لا امزح معك ... وش اخباره ؟
لين / الحمد لله ... لا ما شاء الله اليوم شكلك مبسوط وش لون ربى
سامي : آآآآه الى الان حالتها مستقرة
لين : ما صحت من الغيبوبة ؟؟
سامي : للاسف لا
لين : ان شاء لله تصحى
سامي : ان شاء الله ... يا الله يالين الدكتور يبيني
لين : ايه روح ان شاء الله يبشرك بشيء عن ربى
سامي : يارب .... يا الله مع السلامة
لين : مع السلامة
%%%%%%%%%%%%%%%%%%%%%%
بعد 3 شهور
يوم الاربعاء
ام سامي اتصلت على لين : الووو هلا ام جود
لين : هلا .... يمه لا تناديني ام جود كبرتيني احس اني عجوز
ام سامي : جود مو بنتك ؟
لين : الا بنتي
ام سامي : خلاص اجل اسكتي ما ني مناديتك الا ام جود وبس عجزتي ولا صغرتي بكيفك
لين : هههههه خلاص سميني مثل ماتبين بس لا تعصبين
ام سامي : المهم اسمعيني .... بكرا تجون عندنا خلاص
لين : وش المناسبه ؟
ام سامي : بس من زمان ما شفنا بعض وتجمعنا .. فقلت لابوك نجمعهم بكرا ووافق
لين : ايه ما شاء الله زين .... خلاص باقول لبندر
ام سامي : مو بندر .. ابو جود
لين : ههههههه ايه صح ابو جود
ام سامي : وش لونها جود
لين : الحمدلله ... بس ما تصحصح وتصيح الا بالليل الله يهديها
ام سامي : ايه مثلك يوم كنتي صغيرة
لين : ايه الله يعيني عليها اذا صارت مثلي ..
ام سامي : والله انك هبلتي فيني هباااال ما تشوفين الشيب طلع علطول
لين : ههههههههههههه
ام سامي : يا الله اشوفك بكرا ان شاء الله
لين : مع السلامة
ام سامي : مع السلامة
%%%%%%%%%%%%%%%%%%
يوم الخميس
اجتمعوا عائلة ابو حسام وعائلة ابو بندر ولين والبنات وازواجهم ..... الخ
في بيت ابو سامي
لين : هلا جمانه وش لونك وش لون الزواج معك
جمانه : الحمدلله
لين : وش اسم زوجك نسيت
جمانه : عبدالرحمن
لين : ايه صح .... ان شاء الله مبسوطه معاه
جمانه : الحمدلله
جوري : احس انك عقلتي لم تزوجتي
جمانة : اجل وش تبيني اصير انهبل زيادة مثلك
جوري : اصلا من يحصل له وحدة مهبوله مثلي
لين : يا ثقل دمك
جوري : اعوذ بالله حاقدة
لين : وش اخبارك يا رحاب
رحاب: الحمدلله
لين : وش لون الزواج معك
رحاب : الحمدلله
جوري : يا اختي غيري الكلمتين (( الحمدلله )) كأنك تاكلين
رحاب : احمد ربي ... ما تبين احد يحمد ربه
جوري : الا احمدي ربك بس بقلبك
لين : الحمدلله الناس يكبرون ويعقلون وانتي كلما كبرتي زاد غبائك وهبالك وثقل دمك
جوري : غايره ؟
لين : وع وش اغار منه
جمانه : لين وين جود
لين : نايمه ..
جوري : ياحبي لها مدري على مين طالعة تجنن
لين : طالعه علي طبعا
جوري : وع لا مو عليك ..
لين / وانا وش فيني .... الصراحه تمللين الواحد منك
رحاب : هذي جوري من يوم ما عرفتها
جمانه : احس انك تندمتي انك تعرفتي عليها
رحاب : لا وش دعوى بالعكس ...
جوري : احم احم ... مسكينه طاح وجهها خخخخخ
لين : استغفر الله بزر ... اروح اشوف جود ابرك لي
جوري : فكه .....
رحاب : جيبي جودي نشوفها
جمانه : يا حبي لها تجنن
%%%%%%%%%%%%%%%%%5
عند الرجال ..
بندر : الووو
سامي : هلا والله وش لونك
بندر : الحمدلله
سامي : بندر انا اليوم فرحااااان حدي
بندر : هااه بشر وش صار
%%%%%%%%%%%%%%%%%%
وشو الشي اللي جعل سامي فرحاان !!!؟
كل هذا واكثر في الجزء الثالث عشر 13 من رواية:
)))أصدقاء للأبد لو يطول الأمد للكاتبة المسلمة المسالمة (((

ردوووووووووودكم

**ڜوربـۃ عسڷ♥** · منذ /14-05-2009, 11:08 AM

احنا في انتظار المزيد

**مس جوري** · منذ /14-05-2009, 03:39 PM

انا اتوقع ان ربى قامت من الغيبوبة
مشكووورة ع البارت
مس جوري ...

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

رواية ( أصدقاء للأبد لو يطول الأمد ) روووعة

الـقـصـص و الـروايـات