|| إفتـكـاسـاتْ..يوميـاتُ كـاتـلينْ المدرسـيةْ ||♥

[سُندسْ]

أوّل حـاجة احب أشرح معني كلمـة "إفتكـاسة" متقلقوش يا جمـاعة ملهاش دعـوة بالسياسـة إفتكـاسة يعني لما تعمل فكرة في الخبـاثـة ويمكن انا مش فاهمة إيه معناها اساسًا السلام عليكُنّ ورحـمة الله وبركـاتـة~ صباح المشاكـل.. ....................مساء الإفتـكاسـات حـبيت إنّي أفتـح مسـاحة خـاصـة بيّا عـشان تعيشوا معايا أجواء المدرسة الثانويّة الأزهريّة المصريّة بالنسبة لسنوات دراستي السابقـة كانت حافلـة بالمشاكل و اللعب و المآسي كمان والله أعلم السنة دي هتكون عاملة إزاي خُصوصًا إن مُديرة مدرستنا إتغيّرت وجت مُديرة صعبة بمعني الكلمة ربنا يعينّا لإن مرواحنا ع مكتب المديرة ده كان فُسحة بالنسبة لينا طبعًا انا هبدأ المدرسة يُوم الأحد الجـاي بإذن الله وقبل ما نبدأ لازم تكونوا علي بيّنة من شويّة حاجات مُهمّة., 1-تعريف بيّا وبجروب صديقاتي الكريمات 2-نظـام الأزهر في الدراسة خليكُـم معـايـا

المصدر: منتديات بنات دوت كوم

---

|| YtjJ;JhsJhjX>>d,ldJhjE ;JhjJgdkX hgl]vsJdmX ||♥

الموضوع الأصلي : || إفتـكـاسـاتْ..يوميـاتُ كـاتـلينْ المدرسـيةْ ||♥ || القسم : مـدرسـة بـنـات دوت كـوم || المصدر : منتديات بنات دوت كوم || كاتبة الموضوع : سُندسْ

[سُندسْ]

سُـؤال يطرح نفسـه : مـن هي كـاتـلينْ؟ ببسـاطـة كـاتـلين هـي بنت عـاديّة جدًا.. زيّك وزيّ غيرك إسمهـا سُندس وعندها 15 سـنة رايـحة اولي ثانوي بإذن الله ^^ بتدرس في الأزهـر الشريف :) بتحـب المـشـاكل وتطفيش المدرسينْ مُشـاغبـة بس أحيانًا بينزل عليها هُدوء وعقلانيّة من حيثُ لا ندري أمـا بالنسبـة للجُروب المُوقّر وأكيد إنتوا مستغربين ليه انا بقُول جُروب مش "شـلة" زيُكُم القصّة بدأت لما شلّتنا عملت مشاغبات كتيرة في المدرسة وكُنّا مشهورين لدرجة الكُلّ كان يعرفنا من كتر مشاكلنا ومشاغباتنا.. ولمّا حبينا نتغير ونكون أحسن قررنا نغيّر كلـمة "شلّة" إلـي "جُروب" نظرًا لإن كلـمة شلّة كانت تحمّل في طيات معانيها المشاغبة والمشاكـل وقلّة الأدب احيانًا ومن يومهـا بقينا جُروب وإسم الجُروب بتاعنـا "We Move The World " يـعني "نحنُ نُحرّكُ العـالم" نبدأ بتعريف بنـات الجُروب :) Saso ،سـارة توأمـي مـرحـة ولمضـة آخر حاجه بتحب المشاكل جددددددددددددًا أكتر منّي حتي تخيّلوا بس إتفقنا السنة دي نكُون اكثر هُدوءًا وعقلانيّة وربنا يسهل Lola , ألاء Fafa ,فـاطمة Tata ,فـاطمة Fofo , فـاطـمة Dendon , دينـا "الشهيرة ببُرج إيفيل " Gogo ,جهـاد Sandy , سُندس "واحده غيري " Emy , مَريَم Soso , إسراء Shemo ,شـيمـاء Smsm ,يـاسمـينْ Nody , نـدي هُمّ دول بنـات الجُروب المُوقّر هتشوفوهم كتييير وغيرهم كمان وخليكُـم مـعايـا

[سُندسْ]

نظـام التـعليم في الأزهـر الشريف ^^: طبعًا الأزهـر الشريف مش موجود غير في مـصر ولـيه نظام مُعيّن أولاً إحنا من أوّل الإعدادية بناخد مواد شرعيّة وعندنا سنوات مُعيّنة يُطلق عليها إسم "شـهادة" إللي هيّ "سادس إبتدائي,ثالث إعدادي,ثالث ثانوي" والسنوات دي بتبقي كابوس بمعني الكلمة لإن الطلبة بيمتحنوا فيها الترمين مع بعض فبيكون صعب جدًا مع كميّة المواد اللي بناخدها وهكذا بالنسبة للثانويّة عندنا علمي او أدبي من أوّل سنة في الأزهـر وعندنا سنة ثاني ثانوي مش شهادة ومجموعها مش بيتضاف علي مجموع ثالث ثانوي يعني الحاجة المصيريّة الوحيدة في ثانوي هي ثالث أنا بإذن الله داخله علـمي وهـاخد المواد الآتية: فقة كيمياء أدب نُصوص ومُطالعة هندسة جبر حساب مُثلثات قُرآن كريم الحديث وعُلومه أحياء نحو صرف توحيد التفسير وعلومه فيزياء بلاغه لُفة اجنبيّة اولي مستوي رفيع لغة اجنبيّة ثانية مستوي عادي وحاسوب وإنشاء وتربية فنيّة بُكرة بإذن الله أصورلكُم لبس المدرسة +شنطتي وحذائي وحاجاتي *حنونة شُكرًا ع المتابعـة والتقييم يا أمورة :)

[سُندسْ]

زحمـة شـكاوي البروفيسورة حنونة شُكررررررًا كبيييييييييرة جدًا ولا تفي

[سُندسْ]

ورجـعت بالصُور إحنا طبعًا بنلبس عباية أو تونيك كُحلي مش مريول زيّكُم وده عشان إحنا أزهر وانا إشتريت عباية كُحلي وهفصّل تونيك جينز بس لما نبدأ الدراسة وده عشان نتفقد الأحوال ونجس النبض بمعني آخر عشان ممكن يقولوا الجينز مُخالف وكده فمنها نكون في السليم وكمان نحاول نقنعهم نيجي بجينز ولو مقتنعوش نعمل ثورة ونروح كُلّنا بجينز وهذا ما أتفقنا عليه العباية والشئ اللبني ده مِعصم البنطلون الحـجاب والبندانة الشنطـة الحذاء هي دي أشيائي الحالية طبعًا مفيش دفاتر او أقلام وكده لسه الحاجات دي بنجيبها بعد ما ندخل المدرسة ونشوف طلبات المدرسين والمُدرسات * آسسسفة ع التصوير البشع والصُور الأبشع كاميرا موبايل بعيد عنكم

[سُندسْ]

زارا هههههههههه أجيب لولا تقنعك إنّوا إحنا جروب مش شلة ؟ متابعتك ليّا تبسطني اوي اوي شوربة إنتي أروع يا جميلة :) منورة وشُكرًا ع التقييمات

[سُندسْ]

مسـائكُم سبت وصباحكُم أحد بُكرة إن شاء الله هنبدأ كابوس المدرسة الثانويّة الأزهريّة المصريّة علمي أما عن سبب إنّي مش عايزة أروح المدرسة فبصراحه بصراحه الأسباب كتيره ><" تخيّلوا إحساس واحده رايحه ثانوي الكُلّ بيخوّف منّه دي أوّل سنه فعلاً اكون مش عايزة المدرسة حتي صحباتي مش عايزة اشوفهم واشوفهم ليه؟ بكلمهم كُلّ يوم ع الفيس وبسمع اصواتهم في التيليفونات فمش لازم اشوفهم عيشوا معايا الموقف.. واحده..رايحه اولي ثانوي علمي ازهري يعني مواد ما يعلم بيها إلا ربّنا ومرحلة جديدة..مشاكل جديدة.. ناس جديدة..مُدرسات جديدات.. كُلّ حاجه مُختلفة.. انا ليّا حوالي 9 سنين في المدرسة دي.. عارفة كُلّ طُرقها وخباياها وكُلّ الأماكن فيها.. لكن حاسه إنّي رايحه المدرسة دي لأول مرّة في حياتي.. حاسه بغُربه..! خُصوصًا إن إحتماليّة تفرّق الجروب بتاعنا كبيييييير اوي.. وعن نفسي..مش هنقدر نكمّل واحنا بعيد عن بعض..! يمكن أحساسيسي متخبطه أحاسيس يمكن أغلبكم حسّ بيها وهو في سني كُلّ ما احاول اتفائل وأقول لنفسي هتبقي مرحلة وسنة حلوة بس إحنا نجتهد ونذاكر.. بفتكر إن الأزهر مُزعج في تصحيحه للورق.. ومهما عملنا مش بنقدر نجيب النسب اللي نفسنا فيها *معلومه النسب الطبيعيّة للمتفوقين في الأزهر بتكون في الثمانينات وحلمنا نكون فوق التسعين وربنا يسهل.. يمكن مش قادرة أوصف إحساسي قبل دخول الثانويّة بيوم .. بس هو أكيد شُعور متلخبط.. شويّة حماس علي كميّة هائلة من الخُوف.. علي كميّة لا بأس بها من "مش عايزة اروح المدرسة" والغريب إنّي مش لوحدي اللي حاسه بكده.. كُل صحباتي بيمرّوا بنفس المشاعر دي.. إدعولنا ..ربنا معانا بُكرة بإذن الله هتبدأ حكايتي مع المدرسة.. هحاول أنقلّكم اللي هيحصل في أيامي بالتفاصيل المملة .. عشان تعيشوا معايا الأجواء أكتر .. ولو قدرت أصوّر هصوّر بس دعواتكُم..وربنا يوفقنا جميعًا آي كان إن شاء الله تُكون إفتكاسات لطيفة --> ربنا يخليكِ ..هتكون أجمل بوجودكم شُكرًا ع التقييم قرآني إنتي أروع تشررفني متابعتك الجروب آه حماسي ومشكلجي كمان ياه فعلاً؟ كُنت فكراكِ أكبر منّي طيب كويس كويس منوررررررة يا أمورة فُستاني وانا إتبسطت إنّك دخلتي مدونتي إن شاء الله تكُون حلوة بطتك البريّة مش هتخيّب أملك إن شاء الله شُكرًا للجميع

[سُندسْ]

مسائكُم أدب وأحياء ونحو وأخيرًا جاء اليوم الغير مُنتظر يومي الأول في ثانوية أزهريّة مصريّة لسه راجعه من المدرسة ومصددعه بشكل ><" المهم خليكُم معايا صحيت الفجر الساعه 4 صليت وفضلت صاحية من التوتر طبعًا مش عارفه ارجع انام المهم قررت اعمل بطاطس واحمرّها عشان السندويتشات وفعلاً قعدت برواقه بعد الفجر ع الساعه 5 وقعدت اقشر البطاطس وبعدين حمرّتها وخلصت ع الساعه 6 ونُص تقريبًا دخلت المنتدي والفيس شويّة وبعدين قُمت البس ملابس المدرسة وفعلاً لبست وخلصت ع الساعه 7 وثلث والمفروض انزل استني الباص ع الساعه 8 إلا ثلث فضلت قاعده مستنيّة لغاية ما جه الوقت ونزلت فضلت واقفه في الشارع مستنيّة الباص..خمس دقايق..عشر دقايق..رُبع ساعه!! والباص ليه مجاش !!!!! المهم الساعه بقت 8 وخمسه وانا لسه واقفه في الشارع والجو مولع كإنّها نار الله الموقدة يدوب رفعت موبايلي اتصل بالمشرفه لقيت الباص جاي طبعًا كنت علي اعصابي اصلاً المهم طلعت واول ما طلعت رنيت علي لولا عشان اعرّفها إنّي ركبت الباص ففتحت عليّا الفالحه وقالتلي إنّه باصها لسه مجاش !!! شركه معندهاش مواعيد صحيح ><" المهم قفلت معاها ع اساس ترن عليّا لما تركب الباص الساعه كانت 8 وثلث وهي لسّه مرنتش !! المهم بعدها بدقيقتين رنّت والحمدلله وانا في الباص دماغي صدّعت ألبنات اللي كانوا جمبي كانوا إبتدائي وقاعدين يحكوا عن الكرتون والأنمي ويضرخوا ويضحكوا!! والكرتون اهببببل بشكل ><" جاتني حاله بصراحه المُهم وصلت المدرسة بسلام أخيرًا طبعًا متأخره كانت الساعه 9 إلا عشرة !! طبعًا مش عارفه فين فصلي طلعت دور الثانوي والإعدادي وقعدت أدوذر ع الفصل البائس لغاية ما لمحت بُرج إيفيل "ديندون" وقلت بسسسسس هو ده الفصل وفعلاً دخلت ولقيت الجروب كُلّه موجود بس كنت متأخره فمسلمتش ع حد وكانت عندنا ميس النحو "سُعاد "!!!!! مش بحبها ابببببدًا ولا حد بيحبها ><" المهم لقيت ساسو "سـارة" سلمت عليها بسرعه وقعدت جمبها ولمّا خلصت حصة النحو البائسة طلعت بقه أسلّم ع صحباتي ونحضن بعض رغم إنّهم موحشونيش اوي يعني بس يلا مش مشكلة المُهممممم بعديها جت حصّة أدب وكانت ميس جديده بس طلعت عسوووله خالص وشرحها تحححححفه بعدين كانت حصّة الأحياء والميس =@ =@ بدون مبالغه هيكل عظمي =@ يعني نموذج رائع للأحياء أحسنوا إختيار الميس وبعدين كانت حصّة فاضية طبعًا الضحك والثرثرة ع اصولها وبعدين لقيت المديرة "ميسرة" اللي هي في الحقيقة "معسرة" وقالت للبنات اللي جايين بعبايات جينز "ممنوع"!! يا فرحتنا !! طبعًا البنات سمعوا الكلام من هنا وطلعوه من الناحية التانيه ومفرقتش معاهم أمّا بنات بايعين الدُنيا بجد بس الفكرة إن لولا مكانتش موجوده !! كانت في الفصل التاني !! وسارة كمان المفروض تكون في الفصل التاني بس هي قعدت معانا "بلطجه" المُهم جت الفُسحه ورُحنا عشان ننقل لولا معانا رُحنا..وصُدمنا !! البنت مش عايزة تيجي معانا !! سُندس:ليه يبنتي ؟!! الاء:يبنتي هنا المكان احسن..تعالوا إنتوا هنا سارة:إنتي بتستهبلي !! كلنا نيجي هنا عشانك؟! الاء:إنتي اصلاً المفروض تكوني هنا! دينا:يبنتي صعب اوي .. كلنا نيجي هنا !! الاسهل تيجي إنتي عندنا! الاء:لا يا جماعه مش هاجي! جهاد:لييييييه؟! وطبعًا الاء بقه وما تفعل إفتكستلنا فكرة وقعدت تشرح ليه هي مش عايزة تيجي فصلنا الاء: إسمعوا كويس..إنتوا فصلكم 34 بنت !! يعني لو جيت هنكون 35 بنت!..وإحنا هنا 13 بنت بس..لو جيتوا هنا هنكون 22 بنت..وهناك هيبقي في حدود 25 بنت.. وده أحسن..لإن أكيد أكيد هُم هيخلّوا بنات من فصلكم يروحوا فصلنا غصبًا عنهم..وممكن يكون توزيع عشوائي ونتفرّق!! فعلي إيه؟ تعالوا إنتوا هنا الأول أحسن! المُهم ما إقتنعناش ورُحنا نحاول ننقل ساره رسميًّا لفصلنا وأوّل ما دخلنا.. ساره:مس..كُنت عايزة انقل فصل تاني غير الفصـ.. وملحقتش تكمّل راحت الميس: لا! ساره: آ..ها؟ الميس:لا..مفيش نقل!! إنتي في فصلك وخلاص مفيش نقل.. المُهم مشينا بكرامتنا احسن واوّل ما طلعنا قلتلها :نفضي ..خليكِ معانا -->ونِعم الصديقة وهيّ:أكيد طبعًا إنتي هتقوليلي -->متفاعلة مع الموقف المُهم رُحنا لقينا ألاء قاعده تقنع في البنات بفكرتها والبنات بدأو يفكروا في الموضوع المُهم دخلنا في النقاش وكُلّ واحده قاعده تفتكس واللي قاعده تحلل الموقف واللي قاعده تقارن بين الإيجابيات والسلبيات بين الفصلين المُهم في الآخر توصلّنا إن فكرة ألاء الأقرب للعقول والنُفوس وفي غمضة عين !! لقيت نُص الفصل "جروبنا" بيلم العفش والشُنط وبياخد بعضه ومهاجر ع الفصل التاني المُهم فعلاً هاجرنا الفصل التاني من نفسنا بدون سابق إنذار أو إستئذان أصل إحنا "We Move The World" بقه المُهم قضينا بقيت اليوم في الفصل التاني جروب متكامل وإنتهي يومي علي كده مكنش ظريف أوي بس أحسن من غيره وربنا يستر بُكره الوضع هيبقي عامل إزاي إن شاء الله تكونوا إتبسطوا معايا

[سُندسْ]

السسلام عليكُم ورحمة الله وبركاته يَ مساء الدراسة والمدارس والكتب والواجبات وكُلّ اللي قلبكُم يحبّه ده يُومي الثالث في المدرسة النهارة رُحت المدرسة متأخرة وصلت في آخر الحصّة الأولي !! وده عشان الباص الكاوتش بتاعه نام في السكّة فوقفنا نستني باص تاني وطبعًا علي ما صاحب الشركه إتلحلح وقام ودّور ع باص تاني وجه كانت الساعة تقريبًا 9 إلا رُبع انا بصراحة كُنت نعسانة ومش في مُود ظريف خالص فإقترحت ع المشرفة نرجع البُيوت وفعلاً كانت هترجّعنا بس غيّرت ع آخر لحظة ورحنا المدرسة كُنت بس خايفة أروح الاقي مس دنانير في إنتظاري بأعذب التهزيئات ع الصُبح بس الحمدُلله مكانتش موجوده ..وطلعت الفصل كانت عندنا حصّة أدب والميس العسولة خالص دخلتني عادي المهم اخدنا حصّة الأدب وكانت لطيفة بصراحة بعدها كانت حصّة فاضيّة فكملنا فيها أدب بعدين أخدنا حصتين إنجليزي وبصراحه كانوا حصتين حكآآآآآية جُروب البنات اللي عليهم التحضير كانوا عاملين شُغل جامد جدًا عملوا مُقدمة مسرحيّة بنت مُتهمة في جريمة قتل وواحده بتحاول تجبرها تعترف إنّها قتلت الشخص كُلّه بالانجليزي طبعًا مُلخص المسرحيّة -مسكتك..انا عارفه إنّك اللي قتلتيه..إعترفي -لا..انا مقتلتش حد! -لا قتلتيه..إنتي اصلاً كُنتي بتكرهيه..وعشان كده قتلتيه.. -صدقيني..مقتلتوش..انا مش قاتله!! -بتكذبي؟..مين هيكون قتله يعني؟إنتي من زمان وإنتي بتكرهيه انا عارفه.. -اوه..طيب خلاص خلاص انا قلتله ايوه قتلته! -لييييه؟ -انا..اصل انا..هو كان شهي اوي ويفتح النفس..وانا كُنت جعانه!! -كُنتي جعانه؟ ده كان ارنبي!! قتلتي الأرنب عشان كُنتي جعانه! -آه..كُنت جعانه! -بقه كده!..أرنبي..طييييب هقول لماما! المسرحيّة طبعًا بالانجليزي بس كانت تحححفه وتفطس ضحك طلعت قتلت أرنب في الآخر عشان كانت جعانه وبعدين كمّلنا الحصّة عادي والحصّة اللي بعدها كمان أخدناها إنجليزي وعلي جروبي التحضير بُكرة ><" في الجُروب : انا ساسو ديندون فوفو ساندي ربنا يوفقنا بعدها كانت حصّة ما يعلم بيها إلالالالالالا ربّنا كانت حصّة البلاغة ><" والميس وما أدراكم ما الميس لا تُسمن ولا تُغني من جُوع بمعني تاني مش بتشرح! إمبارح دخلت لنا عشان تشرح لنا بلاغة قعدت تقرأ من الكتاب وتقول"يلا يا بنات عشان نقرأ الدرس مع بعض "!!!!!! والنهاردة دخلت قعدت تقرأ كمان ويا ريتها بتقرأ وإحنا سامعين مثلاً !! لا بالعكس دي بتقرأ ومش بتسمّع غير نفسها يعني وضع بائس تمامًا وبعدين قوّمت بنت إسمها مريم وقالت لها"كملي إنتي يا مريم قراءة..انا بقالي 3 حصص قاعدة أقرأ خلاص تعبت!" انا عيوني بقت وااااااااااسعة بشكل!! لدرجة صحباتي قعدوا يضحكوا عليّا !! وهمست لسارة "يا عيني!!! 3 حصص بتقرأ وتعبت! أمال لو بتشرح كانت عملت إييه!!!!!!!" وبعدها كانت الفسحة *فُسحتنا بعد الحصّة الخامسة..عذاب فإجتمعت بعض البنات لبحث موضوع الميس التي تقرأ ولا تشرح دي كُنّا انا وسلمي والاء وسارة وجهاد أعتقد وقررنا نروح نشتكي انا وسارة إضطرينا ننزل نشوف أخت سارة الصغيرة ونشوف موضوع إستلام الكُتب فراحت الاء وسلمي وبنت كمان مش عارفه هي مين بس معرفش حصل معاهم إيه بعد كده بصراحة نسيت أسئلهم المُهممممم بعد الفُسحة..طلعت انا وسارة عشان ناخد وصولات إستلام الكُتب وننزل نستلم وكانت عندنا ميس الإنشاء إللي هي نفسها ميس النحو في الفصل التاني إللي هربنا منها ورحنا الفصل اللي إحنا فيه حاليًا فقلنا قشطة ننزل بحجة إستلام الكُتب ومنحضرش الحصّة وإنضمت لينا شيمو ونزلنا إحنا التلاته ووقفنا في الطابور الطوووووييييييييييل وقاعدين نضحك وننكت وننكد كمان وإلا مرّة واحده البنات بيصرخوا وبعدين عرفنا إن الميس اللي بتسلّم الكُتب قفلت الغُرفة وقالت مفيش تسلمين النهاردة خلاص!! والبنات يا عيني واقفين من قبل الفسحة!! فلقيت بنت في ثالث ثانوي إسمها بسمة بتقول "انا طالعه ع المديرة أشتكي..مين هييجي معايا؟!" فبنات قالوا بصوت واحد "أنااااااااا" وكُلّهم إنطلقوا ع المُديرة انا وسارة وشيمو قلنا بلاها يلا ع الفصل المهم طلعنا الفصل وكانت مس الإنشاء لسّه مجتش !! قُلنا كُلّنا "يا فرحة ما تمت " إحنا دخلنا الفصل من هنا..ولقينا الميس جايّة من هنا المهم قعدنا في الحصّة وكان الموضوع عن الحُريّة بس إتكلمنا في حاجات تانية المهم عدّت الحصّة بسلام وبعدها حصّة فقه كُنا نايمين فيها وبعدين طلعنا المرواح رُحنا إشترينا وركبنا الباصات ورجعنا بيوتنا ده كان يومي إن شاء الله تكونوا إستمتعتوا معايا *اللؤلؤة الفضيّة..شُكرًا للتقييم

[سُندسْ]

السلامُ عليييييكُم ورحمة الله وبركاته يا أموراات ياااااااه وحشتوني اوي ووحشتني يومياتي علي كُلٍّ هحُطلكُم مُلخص سريعْ لأيامي الأخير دي واللي حصل فيها وكده من حوالي أُسبوع المُدرسين قالولنا هنعملكُم إمتحانات بقه عشان أعمال السنه والمآسي دي وانا وصحبتي عايزين ناخد أعمال السنه كامله وكده فالفكرة مش بس إمتحانات لأ كمان نشاطات ولِوح وحاجات كده المُهم لقينا إننا عندنا اعمال السنه ع المواد الثقافية بس يعني "إنجليزي،رياضيات،فيزياء،كيمياء،أحياء" ولقينا إن مستر الرياضيات ومستر الفيزياء مش بتفرق معاهم فقلنا قشطه اوي الفكره هتتلخص في مستر الإنجليزي وميس الكيمياء وميس الأحياء ميس الأحياء مطلبتش حاجه لغاية دلوقتي يبقي إنحصر التفكير ف الكيمياء والإنجليزي ! المُهم فكرنا ف فكره عشان نخلص من الإنجليزي وناخد أعمال السنه بتاعته فقررنا نعمل "رول بلاي" إحنا كان عندنا يونيت ف الإنجليزي بتتكلم عن الإنترفيو وكده فررنا نعمل رول بلاي علي شكل إنترفيوا بس بطريقه مُختلفه إزاااي بقه؟؟ الفكره : إن انا هكون مديرة شركة جواسيس وفي جاسوس "اللي هي صحبتي" جايه تتقدم لشركتي وطبعًا بما إننا جواسيس فمش هيكون في بيننا أي إحترام وكده وهنتكبر علي بعض وإحنا بنتكلم +في شريحة عليها أسرار دولية خطييره جدًا ممكن توقع البلد لو حد لقاها والمفروض إن الجاسوس ده بيدور عليها النصّ عشان لو حد عجبته الفكره وحبّ ينفذها : الجاسوس يدخل الفصل "آل يعني الشركه" وهو قرفان كده ومستصغر المكان ويقول: مين صاحب المكان ده؟! ومدير الشركه يكون قاعد قدامه كده وفي مكتب قدامه وكرسيين فالمدير يبصله من تحت النضاره كده وميردش عليه الجاسوس:أووه..ده لازم يكون إنت! المدير كمان ميردش الجاسوس:واو..إستقبال دافئ! وييجي يقعد ع الكُرسي قدام المدير ويكون ع الكرسي في ورقه فأوّل ما الجاسوس يقرب وييجي يقعد المدير يقول:إديني الورقه ! الجاسوس يبصلها كده ويقول بإستغراب:دي؟ ويمسكها وييجي يبص فيها يروح المدير ناتشها من إيده ويقوله بطريقه حاده:شُفت إيه؟! فالجاسوس يبصله بإستخفاف كده ويقوله: إيه ؟ 1996610 "أو أي رقم تحبوه" فالمدير يبصله كده بإعجاب شويه ويقوله:إنت شكلك كويس..أقعد فيقعد الجاسوس ويدور بين المدير والجاسوس الحوار الآتي: المدير:قبل أي حاجه انا لازم اعملك إختبار عملي الجاسوس:ماشي المدير:حلو اوي..واحد من أعدائي سرق أوراق خطيره جدًا عنّي وعايزك ترجعهالي الجاسوس بإستخفاف:جاستن بلاك؟ المدير بذهول: إيه ده؟ آه آه بالظبط ! يطلع الجاسوس ورق من جيبه كده ويرميه ع المكتب قدام المدير ويقول:هو ده اللي إنت عايزه !! المدير يستغرب جدًا ويبدأ يقلب ف الورق قدامه وهو مش مصدق ويقول:إيه ده؟ بس..يعني..إزاي؟! الجاسوس:انا جاسوس!إنت مستني إيه من جاسوس زيي؟ فالمدير بإنذهال يقول:إتجسست عليّا؟ وااااو عظيم جدًا الجاسوس بغرور:منا عارف! المدير:قشطه اوي..انا محتاج جاسوس يكون جمبي وقريب منّي وشكلك كده تنفع ..بس انت عارف العادات والتقاليد بتحتم عليّا اعرف عنك كل حاجه الأول الجاسوس:آه وانا كمان! المدير:نعم؟ الجاسوس:إيه؟ إنّي أكون قريب منك ده يحتم عليّا اعرف عنك معلومات بردوا! المدير بشوية تفكير:ممم..ماشي إتفقنا الجاسوس:حلو المدير:طيب قُولي بقه إسمك وعمرك ومُؤهلاتك؟ الجاسوس:إسمي جوردن عمري 25 سنه واخد دُكتوراه في الجاسوسيّة وبدون أي مبالغه انا شاركت ف الحرب اللي حصلت بين شركتيّ التجسس W ، H وبدون أي فخر انا كُنت السبب الرئيسي ف دمار الشركتين و.. يقاطعه المدير ويقول:أوووووووووووه..بس بس كده حلو اوي اوي ده انت شكلك جامد فعلاً طيب قولّي من إمتي بتشتغل الشغلانه دي؟ الجاسوس:من صُغري ! المدير:إنت عندك مواهب عظيمه فعلاً..طيب بس ليه إخترت شركتي انا بالتحديد؟ الجاسوس:والله انا لقيت إن كل اللي بيطلعوا من شركتك بيبقوا ناس عديمي الرحمة والإنسانية عشان كده جيت المدير:وااو إنت بتثير إعجابي فعلاً..طيب انا خلصت كده عندك أي أسئله؟ الجاسوس:آه..انا لاحظت حاجه غريبه فعلاً..إنت بتحط حراس كتير اوي علي بيتك بطريقه مُلفته رغم إنك مدير شركة جواسيس والمفروض تداري نفسك ومتلفتش الأنظار مش حاسس إن ده شئ غريب شوية؟! المدير بتردد شويّة: آمم..لا..يعني إنت عارف..العائله! الجاسوس يضحك جامد ويقول:آآه صح العائله..إحنا هنصحك علي بعض؟ كلنا عارفين إنك مش بتهتم بحد غير بنفسك وفلوسك! المدير بسرعه :مين قال كده؟ انا حياتي مُتوقفه ع إبني الصغير!!! وبعدين يقف المدير ثواني ويرتبك ويقول: آ..آه متحطش ف بالك..قصدي.."ويقف" متهيألي إنك خلصت أسئلتك..خلاص انا عينتك "ويمدله إيده" يقوم الجاسوس ويخطبط دفاتره ع المكتب ويقوله:انا متعين فعلاً!! المدير بإندهاش:نعم؟ الجاسوس:انا بشتغل لحساب عدوك..جاستن بلاك! المدير وهو مش مصدق يقول: تبًا ! الجاسوس:أوه اجل ..انا عرفت إن الشريحه عندك إنت وحبيت آجي واعرف مكانها منّك شخصيًا المدير:بس إنت معرفتش مكانها!! الجاسوس:فعلاً؟..طيب إنسي بقه إن عندك إبن صغير.. ويمشي فيخبط المدير ع المكتب ويقول:أوه لا..حياتي إنتهت ! وبس كده تكُون إنتهت متنسوش تقولولي رأيكُم فيها المهم إن الرول بلاي ده عملنها بالإنجليزي وعجبت البنات كلهم والمستر وموجه كمان وقالوا هيجيبولنا هدايا وفلوس ومخدناش حاجه لغاية دلوقتي خير وكده خلصنا من الإنجليزي واخدنا اعمال السنه بتاعته جينا بعد كده ع الكيمياء ظبطنا كشاكيلنا وكل حاجه وإلا الميس عايزه مُجسم معرفش نواة وإلكترونات وحاجات كده ميتهيأليش هنعمل حاجه وإلا طلعتلنا الكارثه الكُبري الرسم عليه اعمال سنه !!!!!! وانا أفشل مخاليق الأرض ف الرسم فقررت الميس تخلينا نعمل كرت آل عشان عيد الأم وإلي الآن معملناش حاجه رضي الله عنّا رغم إننا جهزنا الأدوات بس لسه مبدأناش والطامه الكُبري إيه بقه؟ هتبدأ الإمتحانات الثقافيه من بُكره عشان أعمال السنه بكره عندي كيمياء وهندسه والإثنين عندي فيزياء وجبر وحساب مثلثات والثلاثاء رسم وأحياء حاجه زي الفُلّ دعواتكُم بقه وإن شاء الله أقولكم الإمتحانات كانت عامله إزاي وكده :) وأيام دراسيّة سعيده علينا وعليكُم يا حلوين