حاولت أكتب .. حاولت أعبر عن الي فخاطري ولكن للأسف خذلوني قلبي وقلمي !
اثنينهم ماطاعوا .. وفضلوا التزام الصمت ..!! ولكن أنا فخاطري رسمه وأبيها تظهر عشان
أرتاح ..!!
ماعرف شو بلاني من يومين غاديه انسانه غير غير ..!!
الحمدلله مب حزينه أبد ولا مضايقه ..!! لا لا بالعكس ولله الحمد ..!
ولكن أحسني غريبه حتى ع روحي ..!! أحس مشتاقه موت بس
ما عرف لمنو ولا عشان شو ..!! أحس اني كبرت وايد وايد وجنه عمري
50 سنه ..!! جني رقيت قمة وأطالع العالم من فوق وأنا قاعده أتذكر تجاربي فالحياة ..!
وأقول فخاطري بتنهيد يوووووووووووووووووه شكثرها ...!
أحس إني وصلت لقناعات وايد كبيره ع عمري ..! أحس إني أنظر للأمور بشكل عمري ما تعودته
ومب شين هو ! لا ولكن انا مستغربتنه ..!! وليش مستغربه ؟ بروحي ماعرف !
يسلت أضحك ع عمري .!.! ليش أنا جيه ؟؟!! ليش ماعيش كل مرحلة بعمري فوقتها ..!!
ليش دوم أستبق الاحداث ..!!
ماعرف شو أقول وشو اكتب ولكن لا قلبي ولا روحي ولا شكلي ما خذين حقهم من مرحلة
الشباب ..!
يا الله شكثر احس إني وااااااااااااايد كبرت وايد ..!! واحس خلاص ما أبغي حد فهالدنيا
ولا حد يعني لي شي ..!
بس أبي أعيش بسلام ووئام مع نفسي .. تعبت من الجروح والتنهيد !!
يوم عن يوم تثبت لي الأيام انه قلبي ماله مكان فهالدنيا ..!!
مالي ذنب اذا الله خلقني جيه ...!! فخلاص لازم ما أسلمه لحد أبد ..!!
باستثناء هلي ..!!!
وأفتحه بشكل لا باس به مب مشكله ولكن أشرِع بيبانه ..! لا وألف لا ..!
وما قول هالكلام من ضيج او حزن ..!! لا لا أبد ..! بالعكس قلبي كله رضا وأنس وراحه !
ولكن خلاص قلبي انصفع من الناس وايد الين ما ستوى أشف من الزجاج ..!!
وهذا الي حارق قلبي ..! ع كثر ما ينجرح ع كثر ما يصير انقى واصفى ..!!
مع انه المفروض يستوي العكس ..!! ولكن انا بروحي مب فاهمه ع روحي ..!!
وبديت أخرف ..........‘ فخلاص كافي لهني !
وآسفه يا عقلي ما حسبت لك حساب أبد وخليت قلبي ياخذ راحته فالكلام برغم إني
أعرف انه ما بيعيبك الي قلته ..!! ولكن لكل ذي حق حقه .... فالسموحه منك ..!