مَدْخَلْ ..~
هِمَمُ الْعَازِمِينَ فِي رَمَضَانْ
قَدْ ...
تَصْعَدُ بِهِمْ لِأَعْلَى الْجِنَانْ
تحية الله عليكن ورحمته تعالى وبركاته
حييتم أحبتي في يوميَ الرمضاني
السبت
6-9-1432هـ
6-8-2011مـ
أتمنى لكن متابعة شيقة ^^"
2:55 ص
رن المنبه وصحيت بسرعة ،،
تذكرت إني حاطة رسالة تذكير ليومي الرمضاني ^^"
رحت وكنسلتها
بعدها دخلت الحمام –الله يكرمكم-
فرشت أسناني 
وتوضيت
وأول ما طلعت ودخلت غرفتي شفت تلفوني يرن
صاحبتي وأختي ـأنين تصحيني للقيام ^^"
قمت وأكدتلها إني صاحية وبديت أصلي
بعد الصلاة تميت أقرأ لين ما نادوني للسحور
أخواني من الليل يطالبون يبوا السحور رز ودجاج
أما أنا ما أقدر أتسحر رز أحسه يثقلني ويخليني طول اليوم كسولة !
خذتلي كورن فلكس + حليب >> صحية !
وبعدها خذت 7 تمرات، ورحت أدور على شرابي المفضل لبن بس للأسف لقيته مخلص L
وطبعا لا يخلوا سحوري من كوب إلى كوبين ماء !
وبقولكم سر !
خبيت فكباتي هالحلاوة لأني اححبها كثير والكل يحبها في البيت!
و أخذتلي حبة منها 
بعد كذا فرشت أسناني وجلست أقرأ ورد الأذكار وأنا أنتظر آذان الفجر
أذن وصليت
وبعدها جلست للشرورق أقرأ قرآن وأحفظ وردي اليومي
بعد ما قريت وحفظت شفت انه الشروق خلص
قمت صليت لي ركعتين وسيييدة فوق السرير !
نمت وحطيت المنبه على الساعة 9:30
رن المنبه قمت وكان المفروض أروح المسجد عندنا فعاليات من الساعة 10 للساعة 12 بس تكاسلت وسكرت المنبه ونمتلي ساعة زيادة L !
صحيت على حدود 10:15 مسكت تلفوني وشفت انه في رسالة
وأول ما فتحتها لقيت أحلى خبر كنت أنتظره من زمااان!
وأخيرا بنرجع لمجلسنا وللمة الأحباب
بعدها دخلت أفرش أسنان وخذتلي شاور سريع ^^"
ولم خلصت رتبت سريري 
بعدين جات عاملتنا تقولي:
قرآني لو تريدي تسوي أصابع زينب تعالي ألحين ^^"
قلتلها ماشي ألحين جاية
ورحت على طول المطبخ وجلست ألفه معاها ^^"
أنا عن نفسي سميته مثلثات زينب لأن سويناه ع شكل مثلثات 
بعد كذا فتحت اللاب نزلت فيه الصور اللي صورتها ليومي وبدأت أعدل فيها وأجهزها ما فيني أسويهم كلهم مرة وحدة وأضغط على نفسي >_< !
كل ما أصور أنزل وأخليه جاهز !
المهم وأنا أشتغل أذن الظهر
قمت ورحت أتوضى وبعدها صليت وجلست ساعة على سجادتي أكمل ورد التلاوة ^^"
بعدها رسلت لي ـأنين إنها تنتظرني على المسن
صار لنا فترة ما تكلمنا 
دخلت وجلسنا نتكلم ونتفق على شيء خاص لكم >> مفاجأة 
!
وأنا كملت تعديل الصور وتصغيرها وووو...إلخ!
وأنا جالسة أعدل الصور إجت أمي تقولي شو تسوين وليش اليوم كله تصورين ؟! << نسيت أخبرها عن اليوم الرمضاني !
حكيتلها الموضوع و وريتها بعض يوميات العضوات
واهني دخلت بسوم وجلسنا نرمس اشوي ^^"
بسوم = ابتسمت أنا 
ودخلوا كمين وحدة من صاحباتي ورمستهم كمان !
وهني جا ولد خالتي عشان يجلس مع أخوي ويفطر معنا
بعدين أذن العصر قمنا نصلي وبعد الصلاة رجعنا كملنا التخطيط وبعدها طلعنا
رجعت أكمل ورد الحفظ اليومي
بعد كذا إجت خالتي وعيالها الصغنونين !
هم جيرانا ومتعودين ناخذهم العصر نلعب وياهم 
حدهم كيوت ماشاءالله ربي يحفظهم
بغيت أصورهم وهم يلعبون ويا أخواني بس لمن دخلت أجيب الكام وطلعت شفتهم راحوا !
تأخرت >_<
المهم بعد كذا دخلت المطبخ وصورت لكم البيتزا واهوا في الفرن !
وبعدين دخلت غرفتي سكرت الباب وفتحت المكيف (أهم شيء)!
قلت أستغل آخر نصف ساعة في اليوم
تميت أقرأ وأكمل ورد التلاوة وبعدها قريت ورد الأذكار
وأذن
" اللهم لك صمت وعلى رزقك أفطرت، ذهب الظمأ وابتلت العروق وثبت الأجر إن شاءالله "
فطورنا خفيف 
!
بعدها رحت أصلي المغرب وبعد الصلاة انتظرنا أخواني وولد خالتي يرجعوا من المسجد ورحنا نتعشى ^^"
وهذا عدس وكان فيه خبز بس ما صورته !
وأنا أصور العشى أخواني و ولد خالتي معصبين ليش طول الوقت أصور و وين ما رحت الكام وياي !!
وأمي تشوف عليهم وتضحك !!
وهم يقولوا أيوا قرآني وأمي بس تعرفوا واحنا ما تخبرونا << هع مذلة!
وبعدين قلتلهم بكرة يوم بخلص الشغل بخبركم !!
بعد العشى جلست أقلم أظافري لأني كل يوم أأجل وأقول بكرة وبكرة و وأخيرا قررت !
وبدأ تيمور على الجزيرة للأطفال !
وجلسوا أخواني يشوفوا ومايتين ضحك !
هبلهم وشغلهم !
بعدين قمت أتجهز عشان نروح المسجد لصلاة التروايح
بس قبل لا أطلع من البيت اتصلت خالتي بأمي وقالتها تعالوا عندنا نصلي جماعة نريد قرآني تصليبنا !!!!
قلت لأمي لا أنا أبي أروح المسجد 
بس أمي قالت دام طلبوكِ خلاص خلا عندهم
المهم تجهزت ورحنا
صلينا الفريضة والسنة كل وحدة وحدها وبعدها بديت أأم عليهم التراويح والوتر ^^"
والحمد لله " نسأل الله القبول "
بعد كذا جلسنا معهم للساعة 10:30 تقريبا
عاد أنا نعسانة وأطالب أمي نرجع البيت !
بعد ما رجعنا البيت جلست أجهز هدايا صاحباتي اللي ما شفتهم من يوم ما رجعت من السفر عشان أعطيهم إياها !
وبعدها على طول توضيت وغيرت ملابسي وكل شيء وعلى طول فوق السرير
بس الله يسامح أختي الصغيرة تمينا نلعب للساعة 11:35 وتأخرنا ننام >_<
المهم آخر شيء عصبت 
وقلتلها خلاص أبي أنام بكرة عندي يوم طويل ولازم أصحى بكير !
وبكذا يكون يومي انتهى ^^"
وصل اللهم على سيدنا محمد وعلى آله وصحبه أجمعين
أتمنى إنكم تكونوا استمتعتم معاي واستفدتوا
آرائكن + انتقاداتكن + تقييماتكن
=
تهمنييي
مَخْرَجْ ..~
كُنْ ذَا هِمَّة تَصِلْ إِلَى الْقِمَّة
" هَنِيئًا لَكَ يَاذَا الْهِمَّة "
" ohf lk gl dpsk qdhtj; dh sd] hgai,v " ( d,ldQ hgvlqhkd 6-9 ^^" )
الموضوع الأصلي :
" خاب من لم يحسن ضيافتك يا سيد الشهور " ( يوميَ الرمضاني 6-9 ^^" )
||
القسم :
رمضان بنات كوم " للأعوام الماضية "
||
المصدر :
منتديات بنات دوت كوم
||
كاتبة الموضوع :
قرآني نبض به أحيآ