|
جزء يديد وأخير لهالشهر .. كل عام وانتوا بخيـــر
في سكـــون الغرفة المظلمة .. كنت منسدحة على السريــر بهدوء ..تعبانة .. لكن ماقدر أرقد بسبب ..دانـــــــة !كله تتحرك في السرير ! وكله ترافس فيني ! وألحين أنا على حافة السرير .. واهي مستولية على ثلاثة أرباع السرير !حتى اللحاف ما هدته لي ! بردانة واهي لافة اللحاف عليها .. صج إنها .. صج إنها ..لا مسكينة .. ماتدري ..أنا أهم شي عندي النوم .. واللي يخربه أقطعه وأنتفه ولا أهده بحاله .. ولو يصير زلزال ماقوم !لكن غريبة ما سويت شي في دانة .. لكن حاولت أتحمل لين الفير عالأقل وعقبها أقوم .. وارقد بأي مكان ثاني ..تكورت على نفسي لأني بردانة .. على الحافة .. وبأقل حركة من دانة راح أطيح على الأرض ..سكرت عيوني للحظة .. ولمحت نور خفيف يتسلل بين رموشي ..فتحت عيوني ..لكن مافي شي .. غير الظلمة ..تنهدت وسكرت عيوني .. ولا فجأة هوا قوي بطل الدريشة !!وما أحس إلا برفسة دانة في ظهري ! .. طرااااخ! وأطيح عالأرض ..!!ابسرعة قمت من الأرض وشفت دانة قامت واهي متخرعة ..دانة : وه وه وه ! اشصاار !؟ اشصار ؟!أنا : ...ما صار شي ..! بس الدريشة تبطلت ..ومشيت لين الدريشة وأنا أفكر .. غريبة انفتحت الدريشة هالشكل مع إنها كانت مقفلة ..وأول مرة أجوف هوا يبطل دريشة بهالقوا .. حتى لو كانت عاصفة ..؟!وصلت عند الدريشة وأجوف الهوا خفيف ..! طليت بره .. كان المكان يخرع في الظلمة والشيّر تتحرك اشوي اشوي ..ابسرعة سكرت الدريشة وركضت للسرير وتغطيت باللحاف في مكاني .. وقلت لدانة واهي ليحين اتطالعني بعيون نعسانة : خلاص ارقدي ..ما كان شي ..تنهدت دانة وقطت نفسها عالمخدة ونامت بسهولة ..!آخ يا دانة لو أقدر أرقد نفسج .. بدون ما أفكر بسالفة فهد قبل ما أنام كل ليلة ...
----------------------------------------------------------------
مسرع ما قمت الساعة 3 ونص .. وهالمرة .. اللحاف مرة ثانية دانة ماخذته ..!المرة الجاية .. هاي إذا كان في مرة جاية أصلا .. بخليها ترقد في غرفة ثانية .. ومالي خص إذا خافت ..! مستحيل ترقد في غرفتي !قمت من السرير وكانت الأرضية باردة .. صرت أركض على رؤوس أصابعي وطلعت من الغرفة ..مشيت في الممر .. وكأني ما كنت أفكر رحت صوب غرفة فهد ..كان قلبي يدق ابسرعة لأني كنت ماشية بالظلمة وخفت أضيع ..وأخيرا لما شفت باب غرفة فهد ارتحت .. لكن لما وقفت جدام بابه .. استغربت ..!أنا شسوي اهني ..!؟ شاللي يابني في هالوقت ؟! صج إني موب صاحية ...!لفيت عشان أرجع ..لكن كل اللي كنت أجوفه جدامي .. الظلمة ........ما تشجعت إني أمشي مرة ثانية .. ألحين شسوي ؟! انا عالقة بالنص ..!يمكن تميت عشر دقايق وأنا واقفة وليحين أفكر شسوي ..حتى إني صرت أتخيل أصوات ..!اخترت إني أدش غرفة فهد .. بقوله يوصلني لغرفتي ..مع إنه شي غريب إني أدش غرفته بنص الليل واقوله وصلني غرفتي ..!فتحت الباب ودشيت ..لكن لما التفت صوب سرير فهد .. ما حصلته ..!كان اللحاف معفس كأنه كان راقد لكنه قام .. رحت ألف في غرفته اشوي وأدور عنه ... لكني ما حصلته .. ولا سمعت أي حس ..تنهدت وقعدت عالكرسي .. سكرت عيوني اشوي .. وعقب فتحتها وشفت باب الغرفة ينفتح اشوي اشوي !!تجمدت في مكاني وكنت أنطر حد يدش .. لكن ما كان في حد .. وأنا ليحين عيوني عالباب ..لمحت نور خفيف يمر جنب الباب ..قمت من مكاني وأنا ما أحس بريولي .. مشيت لين الباب وطلعت من الغرفة وشفت هالنور الخفيف يطير في الممر ..لحقته وأنا ماعرف هاي شنو .. وصلت عند باب غرفتي وهالشي الصغير دش غرفتي ..دشيت الغرفة ولفيت ويهي أدور عن اللي شفته .. ومشيت اشوي جدام .. وشفت شي مو موجود على الكومدينو اللي جنب سريري ..الجنية ! مافي غير النجمة موجودة .. لكن وين راحت الجنية ..ليكون دانة قطتها من الطاولة واهي اتحارب في السرير .!؟نزلت عالأرض وحاولت أحصلها لكن ما لقيتها .. وأنا عالأرض أحس بحركة في شعري ..!كأن حد يلعب في خصل شعري ..! سكنت في مكاني عشان يمكن إني أتخيل .. لكن ليحين في حركة !خفت أطالع ورا وأجوف شي يخرع ..! .. بس تشجعت وقمت من الأرض واشوي اشوي ألف ورا ..شفت النور الصغير يطير جدامي .. كأنها فراشة اصغيرة منورة ..وكانت اتقرب مني أكثر وأكثر .. لين ما وقفت جدام ويهي بالضبط ..كانت بنت وحجمها قد شغاب الجنية ..لابسة فستان أسود قصير لين فوق ركبها .. ولها أجنحة شفافة ويطلع منها لماع واهي تتحرك ..أنا : انتي .. انتي .. الــ .. الجنية ؟الجنية : ........أنا : ..........!وبصوت رقيق ودلوع ..الجنية : ... همممم .. ؟واحنا ليحين انطالع في عيون بعض .. وأنا .. ابتسمت ...واهي ردت وابتسمت .. وطارت جنب اذني ..الجنية واهي تهمس : ممم .. ليلى .. انتي اتعرفين إني بحقق أمنية وحدة .. وبعدها راح أتحول لجماد مرة ثانية .. وللأبد ..أنا : .. اها ..الجنية : اختاري الأمنية .. بحذر .. وفكري فيها .. قبل لا تقولين لي ..أنا : .. اها ..الجنية : تبين تتمنين ألحين .. ؟أنا : .... امممم .. مادري ..ماعرف شنو أبي .. عطيني وقت أفكر فيها ..الجنية : .. همممم .. لما تتمنين .. لازم اتكون الأمنية من قلبج .. وبعطيج وقت لين ما تطلع شمس اليوم !أنا : بس هاي اشوية ..!الجنية : ........ماردت علي .. وحسيت شي معلق بأذني .. لمسته ولا كان شغاب الجنية .. تحولت لجماد ..أوووه ! مافي وقت .. إلا كم ساعة .. شنو هالأمنية اللي بختارها ..!؟
----------------------------------------------------------------
كنت قاعدة على السرير .. وأفكر بشنو ممكن أتمنى ..السلام العالمي ..!خخخخ .. ماظن إنه بيتحقق بأمنية ..!حل لمشكلتي مع فهد وفارس والبقية ..؟!اممممممم .. أظن إني أقدر أحل المشكلة بدون أمنية ..ابي أتمنى شي لي أنا .. خليني أفكر بأنانية اشوي ..!أصير امبراطورة على دولة ..؟! لالا أصير امبراطورة على العالم كله ..!!ههههه .. شنو راح أحصل غير عوار الراس وأنا أحكم العالم ..!تميت أفكر وأفكر وأفكر .. لين ما نعست وكانت عيوني تتسكر .. خفت أنام واتروح علي الأمنية ..!انسدحت بالسرير وأنا أطالع دانة .. بنت تستعمل السحر .. واتطير على المكنسة .. هممممم ..ايش لو قدرت أسوي كل شي .. إن يكون عندي قوة خارقة .. أقدر أطير وأسوي سحر بدون لا أستعمل أي شي ..بس أمر مني .. ويصير اللي أبيه ..! شي حلو ..!قلت بصوت مسموع قبل لا عيوني تتسكر بروحها من ثقلها : أتمنى لو كنت ساحــرة وأقدر أسوي كل شي ...وأنا بنص وعيي .. قبل لا أغرق في النوم .. سمعت همس الجنية في أذوني .." و راح تتحقق أمنيتج ..! "
--------------------------------------------------------------------------------
بنــــــــــــــــــات !!أنا باخذ إجازة من القصة لمدة شهر (دراسة) + أسبوعين (امتحانات)
لا تقولون إجازة طويلة ! ترى اهي امتحانات الثانوية .. صعبة ترى .. وأنا أبي أييب نسبة .. وإذا قعدت أفكر اشبسوي بالقصة راح أنسى الدراسة .. عشان جي قررت إني لما أخلص الامتحانات بكمل القصة ..طبعا بدش المنتدى وراح أشارك وكل شي .. بس القصة يبيلها تفكير فراح تاخذ وقتي عشان جي ..أتمنى تتفهمون ..ولا تنسووووون تدعوووولي !!!
أحبــــــــــــــــــــــــــكم ...
^
^
^
^
^
هي "كاتبة القصة " قالت جذي .. لأن عندها امتحانات على تاريخ 1\2وانا بعد .. ادعولنا ..
التعديل الأخير تم بواسطة فراشه بنوته ; 30-12-2006 الساعة 01:08 PM
|