وليس للحزن نهاية

[نزفــالمشاعرـــ]

البارت الخامس:

وطبعا بعد هالصدمه ماقدرت ريم تكمل حياتها بشكل طبيعي اول شي قررت تنعزل عن العالم اكثر واكثر واول شي سوته هي انها تركت دراستها وحولت منازل وحتى احمد بعدت عنه وقطعت اخبارها عنه..
ملت الوحده حياة ريم لين ضاقت بها الدنيا ومالقت جدامها غير انها ترد للنت..
لكن ماتبا شي يذكرها فشما اللي اصلا هي مانستها..بس ماتبا اي شي كانت مشاركتنها فيه..
غيرت ايميلها ودورت منتدى ثاني وبدت تتعرف عالاعضاء وتنشغل فالمنتدى وتنسى شوية همومها..بس اول ماتقعد بروحها ترد حق آلامهاا..
وفي هالفترة من عقب شما تقربت من اختها مريم وايد..هاذي اختها اللي دوم جدام عينها لكنها بعيدة عن قلبها..
قررت ريم تتقرب من اختها وتفتحلها قلبها وتكون هي الوحيدة القريبة منها..
واكيد اختها رحبت في هالشي وايد..
كان كل يوم يمر بينهم علاقتهم تقوى اكثر..وحتى عيال اختها تعلقو فيها وايد وهي بعد تعلقت فيهم..وصارت كل يوم تروح بيت اختها وتيلس وياها وتطلع وياها وويا عيالها..ويوم ترد البيت تيلس على المنتدى وتسولف وتكتبلهم خواطر واشعار لكن الكل يشوف الحزن واليأس بأحرفها وكتاباتها والكل كان حاب يتقرب من هالانسانه الحبوبة لكن فنفس الوقت حزينه كانو حابين يعرفون سبب حزنها بس طبعا هي ماتقول لين يا يوم وفتحو فالمنتدى قسم ليوميات الاعضاء وكان لكل عضو صفحة خاصه فيه يكتب يومياته او يوم مستحيل ينساه..
كانت ريم تحس ان الاعضاء اهلها واخوانها وكانت حابه انهم يعرفون سبب حزنها وكتبت موضوع بعنوان (يوم من حياتي) وكتبت فيه عن حياتها قبل وعقب وعن شما وبعد وفاة يدتها واخر شي وفاة شما..الكل تأثر فكلامها لانهم كانو يحسونها صدق تعاني كانو يحسون انها وحيدة فحبو يتقربون منها اكثر ويطلعونها من هالحالة اللي اهي فيها لكن ريم ماكانت حابه تتواصل ويا اي حد منهم او انها ترمس ويا حد عن حياتها الا عضوة وحده اسمها اليازية ارتاحت حقها وايد وتقربت منها وهي الوحيدة اللي كانت تشكيلها همومها وكانت تشوفها البديل عن شما لكن اكيد مهما عرفت ناس وارتاحت حق ناس محد بياخذ مكانة شما فقلبها وفحياتها..
وبجذي بدت تتناسى ريم شوية وبدت تشغل حياتها بس اكيد شعورها بالوحدة واليأس موجود فقلبها وهي تحاول تخفيه..
اليازيه عندها دراستها واهلها وربيعاتها وحياتها وريم مجرد جزء من النت..
اما اختها مريم فهي بعد عندها شغلها وعيالها وريلها وحياتها الخاصة..
وفي هالفتره كان يحاول احمد انه يوصل حق ريم لكنه ماكان يعرف كيف هي تركت المدرسة وغيرت رقمها وايميلها وقاطعت ربيعاتها اللي كان ممكن يوصل حق اخبارها منهن..
وكان فخاطره يرد الامارات وهو بنفسه يدورها لكن كان صعب شوية..
ويوم يأس مالقى غير انه يرمس اخته ويخبرها بكل شي ويخليها هي تدورها وبما انه ريم بنت ييرانهم يعني تعرفها..
خبر اخته وطلب منها تدورها او تقوله اي شي عنها لكن للأسف اخته كانت في هالفترة تدرس فدبي وماتروم تسير العين وانقطع الامل عنده..
لكنه مايأس وقرر هالمرة يخبر امه اللي اكيد عندها اخبار عنهم..
واتصل فأمه..
احمد:الو السلام عليكم
اخوه:عليكم السلام والرحمه..هلاا والله حموود شحالك وعلومك؟؟
احمد:انا الحمدلله بخير(ويا فباله انه يسأل اخوه لكنه ماكان يبا اخوه يدري) ومن دون مايتخبر عن اخوه قاله..وين امي عطني اياها
اخوه:بلااك انت زين اتخبر عني شفيك حق شو تبا امي؟
احمد:خلصني بسرعه اباها ضروري يلاا
اخوه:انزين اتريا بفكر ازقرلك اياها ولا
احمد: (بعصبية)دخيييييييييلك خلصني بسرعه
اخوه:زين زين اعصابك بس اتريا شويه
احمد:بسرررررعه
وبعد شوية...
اخوه:امي محد
احمد:افففف شو هالحالة زين باي وسكر التلفون

ويلس يفكر شو مستوي ليش ريم سوت كل ها..معقولة سمعت شي عني وعسب جي ما تباني بس هي ما تصدق اي كلام ينقال عني ولو هي سامعه شي بتسألني..ياااربي كيف اعرف انا احينه..
وطرت على باله شما..وقال مافي غيرها هي اللي ممكن القى عندها تفسير للي يستوي..
ومن دون تردد سار وفتح ايميله وطرشلها رسالة..
الرسالة:
السلام عليكم والرحمه
شحالج شموووو؟؟
ليش يالقاطعه ماتتخبرين عني ولا انا مب حسبت اخوج
المهم شموو بغيت اسألج عن ريم ليش غيرت رقمها وايميلها؟؟
شو فيها جي جلبت عليه مرة وحده؟؟
دخيلج شمو لاتجذبين عليه وقوليلي الصدق ولاتتأخرين عليه فالرد

ومر يوم ويومين واسبوع وماياه خبر من شما..
وهني زادت الحيرة فيه شما ماتقطع النت يوم واحد ليش لين احينه ماياه رد منها؟!!
معقولة ريم فيها شي وهي مشغولة وياها؟!!
ولا ريم طلبت منها انها ماترد عليه؟!!
لكن مستحيل شما ماترد عليه وحتى لو ريم قالتلها
وقال ما عندي غير امي..
وسار اتصل فامه..
احمد:الو السلام عليكم
امه:عليكم السلام والرحمه..هلا ولدي احمد شحالك؟
احمد:الحمدلله بخير امي وانتي شخبارج؟
امه:انا بخير..بس انت شفيك؟
احمد:شو فيني بعد؟
امه:امس رمستنا مب من عادتك ترمسنا يومين ورا بعض
احمد:اممممممممم
امه:احمد قولي شو عندك
احمد:زين انتي مو عندج احينه
امه:محد بروحي
احمد:زين امي بسألج ودخيلج تجاوبيني وتريحين قلبي
امه:قول اسمعك
احمد:امي ريم مستوي وياها شي؟؟ اهلها فيهم شي؟؟
امه:ريم؟؟
احمد:هيه ريم

[نزفــالمشاعرـــ]

امه:ليش انت ما ترمسها؟
احمد:لو ارمسها جان ماسألتج
امه:زين وليش ماترمسها؟
احمد:مادري والله هي غيرت رقمها وايميلها وقالولي انها تركت المدرسة ومب عارف كيف اوصللها
امه:اها..انت من متى اخر مرة رمستها؟
احمد:من عقب ما توفت يدتها بفترة..وحتى شما طرشتلها رسالة وماردت عليه
امه:شما!!..ليش انت ماتدري عن شما؟؟
احمد:ليش شو فيها شما؟
امه:شما ياولدي اتوفت من شهر تقريبا الله يرحمها
احمد:شو تقولين؟؟
امه:الله يرحمها
احمد:كيف جي مستحيل
امه:مافي شي مستحيل عند ربك..كان عندها سرطان فالدم
احمد:......................................
امه:احمد ووينك
احمد:ها امي
امه:بلاك؟
احمد:ماشي
امه:احمد انت تصيح؟؟
احمد:ماكنت اتوقع انه ايي هاليوم الله يعين ريم
امه:احمد انت في شي بينك وبين شما؟
احمد:امي شما كانت اختي واعز..محد يعرف هالانسانه ومايحبها ويتعلق فيها
امه:صدقت والله مع اني ماعرفها وايد بس والله اني زعلت عليها من خاطري واحس اني فقدت قطعه مني فيها شي غريب هالبنيه بس يلا ها قدرها
احمد:والنعم فالله..انزين امي انتي ما سرتي العزا ماشفتي ريم؟
امه:هيه اكيد سرت العزا بس والله ماشفتها ويوم سألت عنها قالولي مايت وسرت عندهم البيت بعد العزا كمن مرة بس ماشفتها ويوم اقولهم ابا اسلم عليها تقولي امها محد او مشغولة مع انه عمري ماسرت عندهم ومايت يلست عندي.
احمد:انزين امي دخيلج انا ابا اطمن عليها الله يخليج شوفيلي اياها وقوليلها اني ابا ارمسها
امه:كيف بشوفها يا احمد انا ووين بقولها
احمد:امي دخيلج والله اني تعبان
امه:خلاص بحاول ان شاء الله..بس انت لاتحاتي وديربالك على نفسك
احمد:ان شاء الله امي..وترا ريم امانه عندج لين ارد بالسلامه اباج تحطينها فعيونج
امه:بدون لاتقول ياولدي اللي تعزه انت انا اعزه واحطه فعيوني..فما بالك واهي ريم والله معزتها من معزت خواتك
احمد:تسلمين الغالية والله لايحرمني منج ويخليج لي وتفرحين فيني انا وياها
امه:آآمين يارب بس انت شد حيلك وخلص دراسة
احمد:ان شاء الله..ولاتنسين اطمنيني
امه:ان شاء الله..يلا الله يحفظك
احمد:فداعة الله

ومن بعد هالمكالمه بدا الحزن يملى حياة احمد .. ويله شما اللي اتوفت وكانت صدمة حقه وويله حبيبته اللي متعلقه فشما وايد ومايدري شو حالها...

واستمرت حياة ريم على ماهي عليه..

اما ام احمد فكانت مب عارفه كيف توصل حق ريم وبعد ماتروم اطنش لانه ولدها مايهون عليها يتعذب وهو فالغربة..
ومالقت حل غير انها ترمس اختها مريم..
ويلست ادور رقمها بس للأسف مالقته وتمت ادور طريقة تييب فيها رقم مريم واخر شي اتصلت فأم ناصر(ام ريم)..

ام احمد:السلام عليكم
ام ناصر:عليج السلام ورحمة الله وبركاته
ام احمد:اشحالج ام ناصر؟
ام ناصر:الحمدلله بخير ومن صوبج؟
ام احمد:يسرج الحال والله..وينج مانشوفج؟
ام ناصر:والله في هالدنيا تدرين بعد اشغال الدنيا ماتخلص
ام احمد:هيه والله العمر يخلص والشغل مايخلص
ام ناصر:شخبار عيالج؟
ام احمد:الحمدلله والله..شخبار ريم؟
ام ناصر:بخير هاذي عايشة
ام احمد:وشو مسوية من عقب شما؟
ام ناصر:والله مادري شو اقولج مب بهالسهولة بتنسى
ام احمد:الله يكون فعونها
ام ناصر:الله يرحمها ويرحم اموات المسلمين
ام احمد:آآمين يارب..انزين ام ناصر بغيت منج رقم مريم
ام ناصر:منو مريم؟
ام احمد:مريم بنتكم
ام ناصر:هيه..عسا ماشر؟
ام احمد:ماشر والله..بس بنتي عندها فالمدرسة وبغيت اسالها عن شي
ام ناصر:اها..انزين لحظة بس بعطيج الرقم
ام احمد:ان شاء الله
ام ناصر:زين ام عبدالله سجلي عندج 050…………
ام احمد:مشكورة
ام ناصر:حياج
ام احمد:انزين خلنا نشوفج
ام ناصر:ان شاء الله..سلمي على العيال
ام احمد:الله يسلمج يارب
ام ناصر:فمان الله
ام احمد:مع السلامة

ويلست تفكر ام احمد شو بتقول حق مريم اخر شي قالت بتصل وعقبها يصير خير
واتصلت فمريم..

مريم استغربت من الرقم وكانت مابترد بس اخر شي ردت..
مريم:الو
ام احمد:هلا..مريم؟
مريم:هيه انا مريم منو وياي؟
ام احمد:انا ام عبدالله ييران اهلج
مريم:منو ام عبدالله قوم ........
ام احمد:هيه..شحالج بنتي؟
مريم:الحمدلله بخير..شخبارج انتي ؟
ام احمد:انا والله مادري شو اقولج
مريم:عسا ماشر
ام احمد:ماشر ان شاء الله..بس انا اباج فسالفه
مريم:امري..
ام احمد:مايامر عليج عدو..مابقولج هني اباج تمرين صوبنا
مريم:يعني اييكم البيت؟
ام احمد:ياليت والله
مريم:امم ان شاء الله
ام احمد:واباج ماتخبرين اهلج اني رمستج
مريم:ليش؟
ام احمد:يوم بتين بتعرفين..بس لاتتأخرين عليه
مريم:ان شاء الله يا خاله
ام احمد:مشكورة فديتج بتعبج وياي
مريم:لا عادي تعبج راحه..باجر بمرج
ام احمد:وانا بترياج
مريم:على خير ان شاء الله
ام احمد:يلا عيل بخليج واشوفج باجر
مريم:اوكيه..مع السلامه
ام احمد:الله يحفظج

ويلست مريم محتارة ياترا شو تبا مني هاذي؟؟
وليش ماتباني اخبر اهلي؟؟
واخر شي قالت يلا باجر بيي وبعرف كل شي..


ياترا شو بتكون ردة فعل مريم يوم تعرف عن اختها؟؟
وياترا ريم بترد حق احمد ولا خلاص ماتباه؟؟
وبيبقى السؤال..هل بترجع الضحكه لريم ولا الايام كاتبه عليها الحزن وبس؟؟

الاجابة فالبارت السادس...

[layla.u.f.m]

يسلموووووووووووووووووووو
يعطيش العافيه ربي
بصرااحه البااارت مررررره قصير
الاحداث كل من جها وتطور اكثر واكثر
جميل التغير الي صار حق (ريمو)
عجبني تصرف (احمد))سوا الي في باله حاول يوصل حق(ريم)


توقعي انه (ريم) ما بترجع ل احمد(لانه هو من تبع الذكريات الي يذكرها (بشما)*)
واتوقع ردة فعل مريم بتكوون شوي صعبه اذا (ريم )ما خبرتها عن ذا الموووضع
وتوقعي على احمد راح يصير شوووي تعكير في حيااااته
لانه احتماال ريم ترفض ترجع له

هذي توقعااااتي
اتمنى تعجلي علينا بالباااارت الساااادس
يسلمو

[نزفــالمشاعرـــ]

تابعي القراءة وتحققي من توقعاتك..

وتسلمي على المتابعة..

[نزفــالمشاعرـــ]

البارت السادس:

وثاني يوم:

دق الباب فبيت ام احمد وكانت مريم...
رحبت فيها ودخلت ويلسو...
ام احمد:هلا والله مريم شحالج يالقاطعه؟
مريم:الحمدلله بخير خالتي وانتي علومج؟
ام احمد:انا بخير..وشخبار عيالج؟
مريم:الحمدلله..وين هند ما اشوفها
ام احمد:هند احينه فدبي
مريم:اهاا..سلمي عليها وااايد
ام احمد:الله يسلمج يارب..وانتي ليش ماتين عندنا ؟
مريم:اشغال الدنيا والله تدرين البيت والشغل والعيال
ام احمد:يالله ماعليه ها حال الدنيا
مريم:انزين امري خالتي شو بغيتي
ام احمد:بلاج مستعيله توج ما يلستي
مريم:والله خليت اليهال عند اهلي بروحهم واخاف يزعجونهم
ام احمد:وليش مايبتيهم وياج؟
مريم:لو يبتهم مابنعرف نرمس خلهم هناك احسن
ام احمد:الله يحفظهم يارب
مريم:آمين
ام احمد:انزين دام انج مستعيلة بقولج الموضوع
مريم:امري
ام احمد:مايامر عليج عدو..بس اباج تتفهمين الموضوع وتساعديني
مريم:ان شاء الله بحاول
ام احمد:السالفة تخص اختج ريم
مريم:ريم شفيها؟
ام احمد:الله يسلمج ولدي احمد يحب ريم من خمس سنوات وهي تحبه ويرمسون بعض ومن يوم اتوفت شما هي قطعته..وانا اباه يرمسها عسب يطلعها من حالتها ويهون عليها شوي وانتي ادرى شو شما تعني حق ريم..واحمد يباها فالحلال لكن صعب احينه لانه يدرس وهاذي اخر سنة حقه ويوم بيخلص وبيرد ان شاء الله بخطبله ريم..وصدقيني ريم معزتها من معزت بناتي واللي ماارضاه حق بناتي ماارضاه حق ريم وانا حاولت امنعهم يرمسون بعض يوم دريت لكن كان حبهم اقوى مني وتدرين الحب شي نادر في هالزمن فقلت خلهم يحبون بعض جدام عيني احسن مايحبون بعض من وراي..ووالله يامريم لو حد من عيالي كان يحب وحده ويباني اخطبله اياها مستحيل اوافق بس ريم وحده من بناتي عسب جي انا موافقه عليها وعمري مابلقى وحده احسن منها وبكون اسعد انسانه لو كانت من نصيب ولدي..وانا اباج احينه تحاولين تقنعين ريم انها ترد حق احمد
مريم:معقولة ريم تحب احمد من خمس سنوات ومحد يدري عنها..وليش ماكانت تخبرني
ام احمد:يمكن تخاف انج تخبرين اهلج
مريم:تبين الصدق انا علاقتي ويا ريم قبل كانت مجرد علاقة سطحية مب اكثر..انا طلعت من البيت وكان عمرها 12سنة وكنت اشوفها طفلة وما اتقرب منها ابد
ام احمد:ماعليه اللي فات مات خلنا فاليوم
مريم:هيه..تدرين انا احين احسد ريم
ام احمد:ليش؟
مريم:يحظها خذت قلب احمد
ام احمد:هههههه فديتج
مريم:والله احمد مافي منه الله يوفقهم
ام احمد:آمين
ورن تلفون مريم..
مريم:الو
عبدالله:مريوووم وينج تعالي شلي عيالج
مريم:ليش شفيهم
عبدالله:يننوبي
مريم:زين مب انت خالهم عاد اتحملهم شويه
عبدالله:لا مايخصني انا
مريم:اتحملهم شرات ماتحملتك امهم قبل
عبدالله:محد قالج تتحمليني
مريم:زين ماعليه شوية وبيي
عبدالله:سمعي ترا لو تأخرتي بطلعهم الشارع وبقولهم سيرو وين ماتبون
مريم:لالالا دخيلك احينه بيي
عبدالله:زين بنشوف باي
مريم:مع السلامه

ام احمد:عسا ماشر؟
مريم:ها عبدالله يقولي تعالي شلي عيالج عني
ام احمد:زين سيري ييبيهم
مريم:لا انا بسير عندهم
ام احمد:افا يعني بتروحين
مريم:هيه خلني اسير وارمس ريم
ام احمد:اذا جي اوكي مرخوصه
مريم:وان شاء الله بتواصل وياج وبقولج شو اللي استوا
ام احمد:ان شاء الله
مريم:يلا فمان الله
ام احمد:الله يحفظج

وسارت مريم بيت اهلها ويلست وياهم شوية وعقب سارت عند ريم..

مريم:ممكن ادخل
ريم:تعالي
مريم:ريم انتي تصيحين؟
ريم:لا ماصيح
مريم طالعتها وسارت حضنتها ..كانت تبا تحسسها بالأمان وتقربها منها..
وعقب قالتلها..ريم شرايج نطلع نتمشى؟
ريم:لامالي خاطر
مريم:عشاني يلا
ريم:اوكيه
مريم:يلا اتلبسي وانا اترياج تحت بس لاتتأخرين عليه
ريم:اوكيه..دقايق

ونزلت مريم تحت ويلست ويا اهلها تتريا ريم وعقب طلعو وسارو حديقة

يلسو يلعبون اليهال شوية وعقب خلوهم بروحهم يلعبون وسارو يتمشون..

مريم:ريم ليش كل هالحزن فعيونج؟؟
ريم:كل اللي استوا وياي وماتبيني اكون حزينة
مريم:شو اللي استوا وياج..حمدي ربج في ناس مصايبهم اكبر منج ومع ذلك يضحكون وعايشين حياتهم
ريم:مريم الوحده بتجتلني
مريم:اي وحده ياريم هاذي..انتي اللي معيشة روحج في هالوحده انتي اللي قطعتي كل الناس
ريم:بس فراق شما صعب..والله صعب
مريم:شما كانت مجرد صديقة واخت عندج لكن انا فقدت حبيبي ومع ذلك انا كملت حياتي..ريم الحياة مابتتوقف عند شما
ريم:حبيبج؟؟
مريم:هيه حبيبي
ريم:ليش انتي كنتي تحبين؟
مريم:كنت ومازلت وبتم احبه طول عمري
ريم:منو هو ريلج؟
مريم:لا طبعا
ريم:عيل منو
مريم:واحد يلست احبه سنتين
ريم:زين وليش ماخذتيه؟؟
مريم:مافي نصيب
ريم:مريم
مريم:لبيه
ريم:تدرين انتي مع انج اختي بس عمري ماحسيت انج اختي او يلست اسولف وياج مادري عن حياتج شي
مريم:وحتى انتي انا مادري عن قلبج شي
ريم:قلبي..قلبي مات
مريم:لاتقولين جي القلب اللي يحب مايموت
ريم:زين خبريني عنج انتي
مريم:بخبرج بس بشرط

[نزفــالمشاعرـــ]

ريم:شوو
مريم:تفتحين لي قلبج
ريم:اوكيه
مريم:من وين تبين ابدا
ريم:من يوم كنتي صغيرة
مريم:تدرين انا ماتذكر اني عشت طفولتي
ريم:ليش؟
مريم:وعيت على الدنيا من دون امي وكنت عند امج..امج حرام ما قصرت ويانا لكن بعد بتم حرمت ابونا مب امنا.. ويوم يابتكم انا كنت شالة مسؤوليتكم حتى ماكنت افكر فنفسي
ريم:مريم انتي وين امج؟؟
مريم:امي من يوم وعينا ماندري عنها شي كل اللي نعرفه انها عرست وسافرت ويا ريلها
ريم:وكل هالسنوات ماسألت عنكم ماشفتوها؟؟
مريم:ما اظن اصلا انها تتذكر انه عندها عيال
ريم:................
مريم:ليش ساكته؟
ريم:تقولين لي ليش كل هالحزن..انا امي عندي واحس اني غريبة عنها
مريم:مادري شو اقولج لانه الصراحه انا عشت وياكم وكنت اشوف كيف امج بس الله يهديها
ريم:زين وشو سالفت حبيبج؟؟
مريم:يوم كنت صف ثالث اعدادي كان في واحد ولد ييرانا يعيبني وعقب رمسته وحبيته ويوم روحت صف ثاني ثانوي امج درت اني ارمسه ماخبرت ابوي لكنها كانت تمنعني من كل شي وهو يوم درا يا وخطبني وبنفس الوقت خطبني ولد عمي فطبعا ابويه غصبني اخذ ولد عمي
ريم:انتي سعيده وياه؟؟
مريم:الحمدلله على كل شي
ريم:زين وحبيبج وين؟
مريم:مادريبه والله انا قطعت علاقتي فيه من يوم عرست واهو بعد سافر واهله انتقلو وانقطعت اخبارهم عنا
ريم:تتمنين انه يرد وتشوفينه؟
مريم:مادري ياريم..المهم خلج مني خبريني عنج
ريم:انا شو اخبرج؟؟
مريم:خبريني عن اللي تحبينه
ريم:انا منو قال اني احب
مريم:يلا قولي اسمعج
ريم:اممممممممممم انا احب احمد وهو يحبني بس خلاص كل شي انتهى وانا قطعت علاقتي فيه
مريم:ليش ياريم؟
ريم:مادري ليش بس انا كلي احزان وماباه يعيش فاحزان خله يعيش حياته من دوني احسن
مريم:بس انتي جي تعذبينه
ريم:اصلا هو ماسأل عني واكيد نساني
مريم:منو قالج انه ماسأل
ريم:انا اقول
مريم:وكيف بيسأل عنج وانتي تركتي المدرسة وغيرتي ايميلج ورقمج؟
ريم:لو يحبني صدق بيسوي المستحيل عشان يوصلي
مريم:ريم احمد يحبج ومانساج وخبر امه ترمسني عشان انا ارمسج
ريم:...............
مريم:ريم في هالزمن مافي حب ولو لقينا الحب لازم نتمسك فيه لاخر لحظه فعمرنا والله بتتندمين عقب اعطي عمرج فرصة تكملين هالحب وان شاء الله توصلين لبر الامان وياه
ريم:بس..
مريم:بس شو..ريم فكري عدل ها مب حل اللي تسوينه انتي جي تعذبين عمرج وتعذبينه وياج
ريم:مريم انا
مريم:لاتقولين شي..فكري فحياتج عدل..واللي تشوفينه سويه..بس لازم يكون من خاطرج عشان ماتندمين
ريم:اوكيه
مريم:انا تأخرت واحينه بيرد خالد ريلي ولازم اروح
ريم:اوكيه يلا روحنا
مريم:لاتنسين تفكرين عدل واتمنى باجر تتصلين فيني وتخبريني شو استوا بينج وبينه
ريم:.............
مريم:تعالي بشل العيال
ريم:اوكيه

وكل واحد روح بيته..وريم يلست تفكر تتصل فيه وترجع الوصال بينهم ولا خلاص تنهي كل شي..

واخر شي قررت انها تتصل..


وياترا شو بيستوي بينهم؟؟
وشو ردة فعل احمد؟؟
وبيبقى السؤال..
هل بترجعالضحكه لريم ولا الايام كاتبه عليها الحزن وبس؟؟

الاجابة فالبارت السابع..

[نزفــالمشاعرـــ]

البارت السابع:

اتصلت ريم على احمد..
احمد:الوو
ريم:.........
احمد:الوووو
ريم:هلا
احمد: (احمد تم ساكت للحظات ويفكر هاذي ريم؟؟) منو.....وياي؟؟
ريم: (ريم ماكانت عارفه شو تقول)..وبدت تصيح
احمد:ريم ليش تصيحين؟؟
ريم:.............
احمد:ريم ليش تسوين فيني جي حرام عليج والله
ريم: (وبعدين حطتله اغنيه)

على ايامك حياتي غير روحي بعز وقلبي بخير

عايشة فالهنا عمري ياعمري وقلبي في سماك يطير

ومن غيرك اعيش احزان ما مرت على انسان

ضيعتك من ايديني ياريت اللي جرا ما كان

همومي مين يبددها حياتي مين يسعدها

نحس بقيمة الاشياء احنا لما نفقدها

احمد:(رد عليها فأغنيه)

مابقالي قلبي يتحمل جفاك

كل ما ابعدت يتوله عليك

اعطني وصلك مثل مالله عطاك

من جميع الخلق وحدك بشتريك

ياشبيه للثريا في علاك

طال صبري يرحم الله والديك.....

ريم:احمد
احمد:هلا
ريم:انا آسفة
احمد:انا مااتريا منج اعتذار انا كل اللي اباه منج لاتقطعيني وبس
ريم:ان شاء الله مابقطعك طول عمري
احمد:انزين شحالج انتي؟
ريم: (وهي تصيح) انا مب بخير
احمد:ريمو دموعج غالية عندي دخيلج لاتقطعين قلبي
ريم:احمد شما سارت وتركتني بروحي
احمد:وانا وين سرت؟
ريم:انت بعيد عني
احمد:منو قال اني بعيد انا موجود فقلبج
ريم:احمد ممكن طلب؟
احمد:اكيد ممكن
ريم:لاتخليني بروحي
احمد:منو قال اني بخليج..انا لو شو ماتسوين فيني والله ما اخليج
ريم:وعد؟
احمد:اكيد..ان شاء الله بخلص هالسنة وبيي عندج وباخذج وبتمين وياي لين اخر يوم في عمري
ريم:ان شاء الله يارب
احمد:انزين ريمو ليش سويتي جي انتي؟؟انا غلطت وياج في شي؟؟
ريم:لا..بس انا حياتي كلها حزن وماباك تعيش الحياة اللي انا عايشتنها
احمد:ريمو كل شي من عندج انا اباه..وليش ان شاء الله حياتج حزن؟
ريم:تسألني بعد ليش
احمد:هيه ليش..مافي شي يستاهل والله
ريم:انت ادرى فمعزت شما عندي
احمد:ريمو شما مرتاحه هناك اكثر والله..شو الفايده انها تعيش واهي متعذبه..عند ربها احسن..وبعدين اصلا انتي ماتحبين شما
ريم:انا ماحب شما؟؟
احمد:هيه..لانه لو تحبينها مابتزعلينها وهي لو كانت موجوده وشافتج جي كانت بتزعل منج صح؟؟
ريم:بس..
احمد:بدون بس..خلاص انسي وعيشي حياتج
ريم:كيف انسى والله صعب
احمد:ادري انه صعب..لكن الاصعب انج اتمين جذي
ريم:انا مابا اتم جذي بس غصبن عني
احمد:مافي شي غضب لو تبين انتي بتتغيرين
ريم:كيف انسى شما..ياناس هاذي حياتي
احمد:محد يروم ينسى شما..وانا ماقولج انسي شما بالعكس عيشي على ذكراها..لكن انسي الحزن اللي انتي تعيشنه
ريم:كيف انساه وانا اعيش وحيدة في هالدنيا منو بينسيني اياه؟؟
احمد:وانا وين؟؟
ريم:انت مب عندي ومنشغل فدراستك وحياتك
احمد:افاااا ياريمو جي انا طلعت اخر شي
ريم:لا مب قصدي جي بس ...مادري
احمد:زين انتي ليش تركتي المدرسة؟؟
ريم:مابا ادرس..مابا اشوف حد
احمد:ماتبين تدرسين بس هاذي اخر سنة حقج..وماتبين تشوفين حد شفتي يعني انتي تبين تكونين وحيدة
ريم:....................
احمد:ريم انا موجود لج انتي ولو تبين انا بخلي دراستي وبييج
ريم:لا..انا بترياك لين تخلص
احمد:زين وانتي بعد اباج تخلصين الا هي سنة
ريم:ان شاء الله
احمد:وشدي حيلج نبا نسبة حلوة..اوكي؟؟
ريم:اوكي
احمد:وشلي الهم من قلبج وخلينا نرد شرات قبل وخليني اشاركج همومج..لو انا ماشاركتج منو بيشاركج؟؟
ريم:اوكي خلاص
احمد:وعد؟؟
ريم:وعد
احمد:انزين انا احينه بخليج اول شي عشان ترقدين لانه الوقت متأخر وثاني شي لاني بسير عندي شغل
ريم:اوكيه..دير بالك على عمرك
احمد:وانتي بعد..وطمنيني عنج دوم..ولاتقطعيني
ريم:ان شاء الله..الله يحفظك
احمد:ويحفظج يارب..مع السلامه
ريم:مع السلامه

وبعد ماسكرت طرشتله مسج..

تغيب الصورة بس عمر المشاعر ماتغيب

كم عزيز مانشوفه وهو من الخاطر قريب

[نزفــالمشاعرـــ]

ورد عليها بمسج..

وحق الذي خلاني بيوم أغليك..

ماغاب زولك عن عيوني ثواني..

لولا الغلا ماكنت للحين وياك..

ولولا المحبة ماعرفنا نعاني..

دامك تعيش بداخلي كيف بنساك؟

هذا سؤالي وحط نفسك مكاني..

ولاول مرة من فترة طويلة ريم ترقد براحه..
وثاني يوم نشت الظهر وسارت عند اختها وخبرتها باللي استوا بينهم..
واختها اتصلت فام احمد وخبرتها..

وقضت ريم اليوم عند اختها ومن عقب على المنتدى وفليل دشت المسن تتريا احمد..

وصارت الساعه 12واحمد مادش..

وهي تفكر قطع افكارها صوت التلفون ويوم سارت تشوف لقت تذكير.. شما كانت محطتنه حقها ومكتوب فيه لاتنسين البطاقه...

وبعدها وصلها مسج من احمد...

كل عام و إنت بألف خير
يا أعز إنسان في قلبي الصغير
اليوم يوم ميلادكالسعيد
نفسي و منى عيني أشيلك و أطير

(كل عام وانتي بخير ياحياتي)

واستغربت من هالمسج..

وهي سايرة اطلع البطاقه سمعت صوت رسالة وصلتها فالايميل وتحرتها من احمد فسارت تشوفها ولقتها من المنتدى يهنونها بعيد ميلادها..

وطالعت التاريخ وطلع انه اليوم عيد ميلادها..
وتذكرت شما اللي كانت كل سنة هي اول وحده تباركلها فعيد ميلادها وتشاركها الفرحة.. وحتى اليوم هي اول وحده ذكرتها..لكن للأسف مابتشاركها هالليلة..

وسارت طالعت البطايق ولقت بطاقة مكتوب عليها تاريخ عيد ميلادها طلعتها وفتحتها..

بحتفل في عيد ميلادك ... وللأسف بحييه من دونك
المهم أبقى ع ميعادك ... وأحفظالتاريخ وآصونك
الله يهنيك بعيادك ... وفي غيابي تمرح عيونك
الله يحقق لكمرادك ... وين ما تمشي على كونك
طايب في قربة بلادك ... وكل من حولك يهنونك
لا تذكر ريح فــوادك ... لا تعذب قلبك شجونك
جيت أهني بس قصادك ... لاأتفاجأ بي على هونك
المهم أحفظك في بعادك ... وأثبت لدنياك ما خونك
خذ هديةعيد ميلادك ... من حب كان مجنونك

ريم..كل عام وانتي بخير..والعمر كله ياارب..

اتمنى انج تكونين سعيدة في هاليوم..

حبيت اهنيج حتى في غيابي..

ويلست تصيح ريم وتتذكر شما وعقب رقدت..
ومانشت ثاني يوم الا العصر وسارت ويا بنت خالتها المول..

ويوم ردو البيت لقت الليتات مسكرة وكل الصالة شموع
واول مادشت غنولها HAPPY BAIRTHDAY
واستغربت لانه اول مرة اهلها يسوولها جي..
كل مرة شما اللي تسويلها بارتي ومحد يشاركها غير شما واحمد..
لكن مالقت وقت عشان توقف وتفكر لانه الكل عندها ويباركولها والكل يبا يشاركها هاليوم..
واخر شي اتضح انه شما هي اللي موصيه اخوها منصور يسوي جي حق ريم..

وبعد ماروحو كلهم سارت حجرتها ورمست احمد شوية..
وبعد ماخلصت يلست تتذكر شما وتصيح..
بعدين حطت اغاني ويلست تسمع ومن بين هالاغاني يت اغنية على الجرح وزادت النار فقلب ريم وزادت دموعها.

يعني بطفي الشمعة وحدي في عيد ميلادي السنة

يعني مابلمح عيونك وتبقى ليلة محزنة

آه لو تدري بشعوري غيبتك تنهي حضوري

وغرفتي تنسى وجودي رغم انها امزينة

وهاذي ليلة فالسنة

عذري لو كنت اتغلى ولا ناوي تعتذر

جيتك تسوى حياتي ياللي مابعدك عمر

انا مازعلت عينك لو نسيت اسال حنينك

بس ابيك الليلة يمبي لو الاماني ممكنه

وهاذي ليلة فالسنة

كل اصحابي بقربي شفتهم الاانت لا

دمعتي تسأل عيوني وين اللي قلبه سلا

ماابي كل الهدايا فرحتي وانت معايا

صرت ادور عن وجودك كل وردة ملونه

وهاذي ليلة فالسنة

وبعدها رقدت ريم...


ياترا شو الاحداث اللي بتستجد في حياة ريم؟؟
ويبقى السؤال..هل بترجعالضحكه لريم ولا الايام كاتبه عليها الحزن وبس؟؟

الاجابة فالبارت الثامن..

[layla.u.f.m]

يسلموووووووووو يالغلاء بصرااحه البااااااارت رهيييييييييييييييييي
يعطيش العافيه
انتضر البارت

[نزفــالمشاعرـــ]

البارت الثامن:

ومرت الايام وانمزج الفرح مع الحزن فحياة ريم..وتحسنت نفسيتها وايد..
وردت علاقتها ويا احمد شرات قبل واقوى..
وبدت امتحانات نص السنة وانشغلت ريم فالامتحانات وكان كل همها انها تحقق حلمها وترضي شما واحمد..
وبعد ماخلصت امتحانات سارت بوظبي ويلست اسبوع وغيرت جو شوية..
ويوم ردت العين اختها كانت فالمستشفى لانها تعبانة شوية وبتربي..
وبعد يومين اختها ربت ويابات ريم..
كانت اختها تبا تسمي بنتها ريماس..لكن ريماس ماطاعت وسمتها ريم..
وريماني الصغيرونه كانت وايد تشبه ريم خالتها فالشكل لدرجة انه ريم تعلقت وايد فيها وكانت هي الامل في حياتها وبدت السعاده ترد حق قلب ريم..
وحتى احمد قام يغار من ريماني لانها شغلت ريم عنه..

وبعد مرور اسبوعين من الاجازة...

كانت ريم ماترقد قبل الساعه 9الصبح لانه اخوانها كانو يتمون سهرانين وياها وهي ماتروم ترقد منهم تترياهم يرقدون عقب ترقد..

وفيوم من الايام كان يوم اربعاء وكانت ريم سهرانه ويااحمد على النت وعقب رمسته شوية فالتلفون وهو قالها انه يبا يرقد وسكر عنها...

وهي سارت رقدت..

ويوم نشت شلت تلفونها اطالع الساعه ولقت مسج..

قلت:للقلب خفف من شوقك واشتياقك..

قال:"وغلاته" ما اقدر اتبع وصاتك..

شفت اشكثر هالقلب يالزين يغليك..

شفت اشكثر يهوى "سموك وذاتك"..

هالقلب دايم لاحكى يفتخر فيك..

واذا فكر مايفكر الا "بغلاتك"..

واستغربت من الرقم لانها ماتعرفه فقالت يمكن بالغلط وطنشت..
وقامت والساعه كانت 8 فليل..

سارت الصالة ولقت ريماني ويلست تلعبها شويه وعقب قالتها مريم خلنا نطلع نتمشى عند البيت وريم قالتلها اوكي ..

وسارت حجرتها تلبس عباتها وعقب شلت تلفونها ويوم طالعته لقت مسج وفتحته..

مهما الوقت يشغلني..

مهما الدنيا تبعدني..

يظل فكري مع الغالي..

لانه بجد واحشني..

وكان من نفس الرقم..
فطنشت وقالت ها حد يستهبل..
وسارت تحت وطلعو يتمشون..
واول مابدو يتمشون وصلها مسج..

((((((تو ما نور الشارع..))))))

فاستغربت وسالتها مريم..

مريم:من منو المسج؟
ريم:مادري والله
مريم:كيف ماتدرين
ريم:صدق مادري..يوم نشيت لقيت مسج من رقم ماعرفه وتوني يوم كنت بتلبس لقيت بعد مسج واحينه
مريم:زين شو يخص الشارع؟؟
ريم:شدراني..انسي
مريم:زين..شخبار احمد
ريم:احمد..ااااااااااااخ فديته والله
مريم:سلاامتج من الآآخ بس شوي شوي لاتذوبين
ريم:بعدني بذوب الا قولي ذبت وخلصت
مريم:زين عاد لاتعقين عمرج عالريال
ريم:كييييييييييييفي مايخصج انتي...صح ريماني
مريم:سيري سيري عن بنتي لاتعدينها بمرضج هذا
ريم:بنتج من متى ان شاء الله هاذي بنتي انا فديت روحها
مريم:افا بس هي تتفدينها وانا لولاي ماكانت يت
ريم:فديت قلبج انا والله..انتي الخير والبركه والله
مريم:هيه قصي عليه
ريم:افااا انا اقص عليج منو يروملج انتي اصلا
مريم:احم احم
ريم:ههههههه بس لاتصدقين عمرج عاد
مريم:ههههه كيفي والله
ووصل مسج حق ريم..

((((((فديت هالضحكه انا والله))))))