يتبع ..........
.
.
.
(بعد 7 سنوات)
الاربعاء الساعه 2 الظهر
صرخت بعصبيه : جواااااااد خلاص راسي بينفجر
جواد : ماما مالي دخل هذي لعبتي والله ماياخذها
جود : جواد ياحبيبي هذا اخوك الصغير عطه اللعبه
واشتريلك غيرها
جواد : ماما مابي هذي لعبتي ليش كله ياخذ العابي
والعابه مايبيها
جود : خلاص ياحبيبي والله اشتريلك غيرها بس عطه هذي
في هالوقت دخل ناصر
راح جواد يركض له : بااااابا
ناصر وهو يضمه : هلا هلا بالبطل
جواد بزعل : بابا شوف فهيد يبي ياخذ لعبتي
ناصر : افا ليش ولعبته
جواد : مايبيها دلوع
ضحك ناصر وراح لجود : وش فيه جوادي من مزعله
جود بضيقه : وده يزعل
ناصر : طيب ليش انتي بعد زعلانه
جود : ناصر واللي يرحم والديك والله واصله فيني خله يعطيه
اللعبه وبشتريله غيرها بس يفكوني من الصراخ
ناصر بهدوء : جود ماتلاحظين انك خربتي ولدك بالدلع
جود : ناصر تكفى لاتبدا تراه صغير وطبيعي اني اهتم به
ناصر : اوك طيب لاتنسين جواد من اهتمامك
جود : خلنا منهم الحين ترى حنا اليوم معزومين عند جهاد
بمزرعته
ناصر : ايه كلمني
جود : خلاص أجل بروح اسوي القهوه واسوي حلا عشان
يمديني البس جواد وفهد
ناصر : طيب خلي الشغاله تساعدك
جود : لا تعرفني ماحبها تطبخ او تسوي الاكل
ناصر بابتسامه : اجل خلي حرصك يساعدك
جود : انا ماعلي بخلص شغلي بسرعه بس انت ساعدني
واربط هالشياطين لايجوني في المطبخ بيجننوني
ناصر : اوك خلاص روحي انا باجلس عندهم
راحت جود للمطبخ اما هو جلس على الارض وجلس فهد بحضنه
وجواد بجمبه وشغل على افلام كرتون عشان يهدون
جواد عمره 5 سنوات وفهد عمره 2 سنتين
يعشق هالاثنين لحد الجنون يحس بالفرحه اذا شافهم
يلعبون حوله صحيح انه يغار احيانا من ولده فهد
اذا شاف جود تهتم فيه بزياده يحس احيانا انها تحبه بزياده
عشان الشخص اللي مسمى عليه
للحين يذكر اللحضه اللي قرر فيها يجيب منافسه للبيت
للحين يذكر اللحضه اللي صارع فيها بين غيرته من فهد
وحبه لليان
.......... قبل سنتين ........
في المستشفى كانت للحين جود منومه
امس جابت ولدها الثاني
كان جالس عندها اندق الباب ودخلت ليان
فز بفرحه : هلا والله بليونه
ليان : السلام عليكم
باست راس ناصر وراحت وباست امها
ليان : كيفك يمه
جود بابتسامه : بخير حياتي كيفك انتي
ليان : انا تمام مبروك ويتربى بعزكم ان شاءالله
جود وهي تضمها : الله يبارك فيك حبيبتي
ليان : طيب وش بتسمونه
ناصر : للحين ماسميناه ليش عندك اسم حلو
ليان بفرحه : ايه عندي احلى اسم وعمركم ماراح تلقون
احلى منه
جود : والله اجل وش هو خلينا نسمي اخوك
ليان : متأكدين انكم تبون تخلون اسمه لي
ناصر : ليش ماتبين تسمينه
ليان : بصراحه اتمنى اني اسميه بنفسي بس اخاف ترفضون
جود : يابعد عمري اعتبري اسمه لك خلاص انتي سميه وحنا
موافقين من الحين
التفتت ليان لناصر : متأكدين
ابتسم ناصر : ايه قولي بس هاه موب تسمينه اسم شين واتورط
ليان : لاتخافون هالاسم هو احلى اسم عندي
ناصر : طيب وشهو
ليان : ابي اخوي يكون اسمه فهد
تغير وجه ناصر وجود انصدمت ولا واحد منهم رد عليها
ليان : هاه لايكون الاسم ماعجبكم
جود : لاحبيبتي بالعكس حلو
ليان : يعني موافقين
جود : اكيد موافقين ياعمري قلنالك من قبل انك انتي اللي
بتسمينه
التفتت ليان على ناصر : وانت ياعمي شكلك مو راضي
قام ناصر وطلع ووجهه متغير بقوه
لحقته ليان : عمي وين رايح انت اللي عطيتني موافقتك
ناصر : ليان روحي عند امك انا عندي شغله
ليان وهي تمسك يده : لا قولي الحين بتسميه فهد صح
ناصر : ..................
ليان : يعني ماراح تسميه
ناصر : ................
ليان : اوك على راحتك ولدك وانت احق فيه
مسكها ناصر وهو متضايق : ليان اختاري أي اسم ثاني
ليان : عادي ترى مو لازم تاخذ رايي انت حر في ولدك
ناصر : لا ليونه ابيك انتي اللي تسمينه يالله
ليان : انا مافي عيني الا اسم واحد وهو فهد اذا بتعطيني
اسم ولدك فهذا هو اسمه اذا لا فهذا قرارك وانت حر
ناصر وهو متضايق : خلاص كم ليان عندي تدرين عمري
مارفضت لك طلب ماوقفت على هذا
ليان بابتسامه : مشكور بلغ امي سلامي انا رايحه السواق ينتظرني
.................................................
سماه فهد وصار يغار منه وكأنه فهد صديقه ماكأنه ولده
اذا كان مع ولده فهد بروحهم يلعب معه ويستانس اذا شافه
مستانس بس اذا كانت جود موجوده وشاف اهتمامها
فيه بدا يغار منه لدرجة انه بعض الاحيان يحاول يحرض جود
عليه ويوقف في صف جواد عليه
صحى من سرحانه على جود لما دخلت عليهم
خذت جود عيالها وراحت تلبسهم لانهم بيمشون لمزرعة جهاد
راح هو بعد يبدل ملابسه وعلى الساعه 3 العصر مشوا للمزرعه
مزرعة جهاد في القصيم بيقعدون فيها اليوم والخميس والجمعه
وصلو هناك الساعه 3 ونص تقريبا
ماكان هناك الا جهاد وعياله وامه جلسوا مع بعض وكل شوي
جايه عايله خالد وعياله وفيصل وعياله وعمانها
وبنات عمانها وعيالهم واحمد وزوجته
وام احمد والعنود وسلطان
كلهم اجتمعوا بالاستراحه
الرجال جلسوا برا والبنات راحوا يتمشون
والحريم جلسوا داخل بالفيلا
ماكان ناقصها الا بنتها ليان
بس ماتتوقع ان فهد بيجي وناصر موجود
ناظرت ساره كانت جالسه تسولف وتضحك ولاكأن عندها هموم
معقوله من جدها ماتحب فهد معقوله من اول مشكله تخلت
عنه وعن عيالها
قطع سرحانها في بنتها كلام ساره : وانتي ياجود وش اخبارك
جود : الحمدلله من احسن لاحسن
ساره باستهزاء : ايه واضح من سرحانك في حبيب القلب
جود تبي تقهرها : ايه الله لايحرمني منه
ساره بقهر : الا وش اخبار بنتك وش اسمها .. ايه ليان
جود : والله ياعمري ليان مايقصر معها ابوها ومتى مابغتني
بيتي مفتوح لها عاد ناصر الود وده لو تعيش معنا بس
عاد تعرفين ابوها اولى فيها
ساره : لاحرام خليهاعند ابوها تعرفين هو مايقدر عالمسؤوليه
وعنده طارق ورغد خليها تنتبه لهم
جود : عاد ياحبيبتي هي موب مكلوفه فيهم واذا بتجلس
فهو عشان ابوها
ساره : عالعموم وش لنا بهم حنا جايين نستانس مو جايين ننغث
خلينا بس منهم
حست جود انها شوي وبتنفجر من القهر قامت وطلعت برا الفيلا
شافت سيارة فهد تدخل المزرعه وقفت بصدمه
معقوله فهد بيجي وهو عارف ان ناصر هنا دخلت بسرعه
للمجلس وفتحت الشباك وقعدت تناظرهم
نزلوا نوف وطارق وليان من المرتبه الخلفيه
راح طارق يركض وفتح الباب الامامي وجا السواق معاه
نزلو الكرسي المتحرك وساعدو فهد لين جلس عليه ركب
السواق السياره وراح اما ليان دنقت على فهد وتكلمت معاه
شوي ثم ضمته وباسته واشرتله باي دف طارق الكرسي متوجه
لمجالس الرجال وليان واقفه تراقبهم لين دخلو ثم مسكت يدين
نوف وتوجهت للفيلا كل هذا وجود واقفه تراقبهم ودموعها تنزل
وهي تكتم شهقاتها
مسحت دموعها ودخلت بسرعه للمطبخ قبل ماتجي ليان وتشوفها
غسلت وجهها وشربت كاس مويه وطلعت تستقبل بنتها
راحت للصاله تقابلت مع ليان عند المدخل
ليان بابتسامه وهي تبوس راس جود : اهلين كيفك يمه
جود وهي تبوسها : الحمدلله تمام انتي كيفك حبيبتي
ليان : انا تمام
جود : وين رايحه
ليان : بروح مع البنات
جود : لاحقه عالبنات تعالي ابي اسولف معك شوي
ليان : اوك
راحو وجلسو بالغرفه المخصصه لجود بالفيلا
جود : ها ليونه قوليلي انتي كيفك وكيف ابوك واخوانك
ليان : والله الحمدلله كلنا تمام
جود : طيب اخوانك يتعبونك
ليان : لا فديتهم عاقلين
جود : طيب للحين ماتبين سلطان
ليان : يوه يمه تكفين سكري السالفه مابي اتكلم بهالموضوع
جود : طيب عطيني سبب مقنع الولد هذي ثالث مره يخطبك فيها
ليش رافضه توافقين عليه
ليان : يمه بليز مابيه خلاص السالفه غصب
جود : طيب ليش العناد فيه سبب مقنع انك ترفضينه
ليان بنرفزه : كذا أي شخص مرتبط بالماضي مابي اتذكره
بالمختصر ابي انسى الماضي
جود باستغراب : تنسينه ليش وش فيه الماضي
ليان : يمه تكفين هالسالفه بس بتسبب مشكله بينا عشان كذا
خليها منا
جود بعصبيه : لا ابي افهم ليش تبين تنسين الماضي
ليان بقهر : كذا مابي أي احد له صله بناصر
جود مصدومه : ناصر ؟؟؟
ليان :........
جود : ليه وش سوى لك ناصر قوليلي هذا اللي يستحقه منك
رباك وكبرك صرف عليك دم قلبه وفي النهايه هذا ردك عليه
ليان بقهر : هه رباني لاتخافين حصل مكافأه على احسانه فيني
هذا انتي وافقتي عليه وخذيتيه لانك ماتبين تردين واحد احسن في
بنتك .....
سكتها كف قوي من امها
جود بصراخ : صحيح انه مو انا اللي ربيتك بس ماتوقع
ان تربية ناصر لك كذا
مسكت ليان خدها ودموعها تتسابق : ايوه كويس انك عارفه
ان مو انتي اللي ربيتيني يعني وش تنتظرين من وحده ماتربت
عند امها
جود وهي ترجف : بس ولا كلمه
ليان وهي تبكي بانهيار : ليش اسكت ليش ماتكلم ولا انا حرام
اقول اللي بخاطري قوليلي وش سوالي هالناصر كل اللي
سواه انه ذبح ابوي وطعنه بظهره خدعني وابعدني عن ابوي
جود وهي ترجف : هالناصر ضمك لما رماك ابوك هالناصر
دفاك لما نساك ابوك هالناصر اكلك بيديه لما رفضك ابوك
تبيني ازيد ولا يكفيك هذا
ضمت ليان نفسها وهي منهاره : طيب انتي وين كنتي
لما رماني ابوي انتي وين كنتي لما كنت اجوع
محد درى عني وين كنتي لما كنت ابرد الليل وماعندي من يدفيني
_بصراخ_ وين كنتي لما كنت اصارع الموت لوحدي وين كنتي
لما كنت وحيده محد يواسيني وين كنتي لما كنت اشوف كل الاطفال
مع امهاتهم وانا وحيده وينك لما اتفوق بالمدرسه وينك لما
يكون عندنا حفل امهات وينك جاوبيني
ابوي كان عالاقل معي لو من بعيد لبعيد بس انتي وين كنتي
جلست جود عالارض وهي تبكي : مو بيدي والله ماكان بيدي
ماكنت اعرف وينك دورت عليك بس مالقيتك وش تبيني اسوي
ليان بقهر وهي تضرب عالارض : ماكان بيدك بعد لما دمرتي ابوي
جود بصراخ : بااااس انا وش دخلني
ليان وهي تبكي بقهر : تدرين ليش ابوي مقعد تدرين ليش ابوي
كذا يائس تدرين ليش ابوي متحطم اكيد ماتدرين مو انتي تزوجتي
وخلاص عايشه بسعاده ومرتاحه
جود بتعب وهي تمسح دموعها : ليان ابوك كان مكتوب يصيرله
هالحادث حنا وش دخلنا
ليان بصراخ : طيب ليش خنتوه كلكم ليش يمه قوليلي وشلون خلاك
قلبك تخونينه مع اقرب واحد له ليش ما اخترتي الا اقرب واحد له
قلو الرجال الا صديق عمره ليش يمه سويتي كذا
بكت جود بقهر : ماكان قدامي أي حل الا هذا كنت ابي احصل عليك
باي وسيله
ليان : ليتك مافكرتي فيني ليتك ماقابلتيني بس ماتتسببين
في معاناة ابوي
جود : ليان
ليان بصراخ : ليتك يايمه ماعرفتيني ليتني عشت بدار ايتام ولا عشت
مع هالناصر ليتني مت ولاشفت ابوي بهالحاله آآآه يمه قلبي يحترق
قلبي يمه ذابحني يمه الا ابوي مابيه يموت تكفين يمه ارجعيله سوي
أي شي بس ابوي مابيه يموت يمه ابوي يحبك ابوي ولد عمك
تكفين يمه لاتحرميني من ابوي
جود بانهيار : ليان حبيبتيي ابوك بخير ومافيه شي ليش تقولين كذا
ليان بصراخ وهي تضغط على راسها : لا والله مو بخير ابوي يمه
مو بخير ابوي يموت بالبطيء ابوي تعبااااااان يايمه والله تعبان
جود وهي تضمها : ليان لاتقولين كذا ان شاءالله انه بخير
دفتها ليان : وشلون بخير وهو كل اسبوع يصارع الموت
وشلون بخير والمرض يجري بدمه وشلون بخير وفيه الخبيث
قوليلي يمه وشلون
شهقت جود بصدمه
ليان وهي تضحك وتبكي بنفس الوقت : ايه يمه اكتشفت قبل يومين
ان فيه الخبيث اكتشفت انه كل اسبوع ياخذ الكيماوي اكتشفته
بس هو مايدري اني عارفه عشان كذا كتمت كل شي وسويت اني
طبيعيه مابيه يفقد المقاومه اذا درى اني عارفه قاومت عبرتي
وانا اشوفه يضمني ويضم اخواني وهو يحس انه بيودعنا في
أي لحضه جمدت مشاعري وانا اعامله مثل قبل قسيت عليه
عشان مايحس بالضعف ايه يمه ابوي مريض بس مقدر اقوله شي
مقدر اوضح له شي
جود منهاره ضغطت على اذنيها ماتبي تسمع اكثر
ليان : عرفتي ليش اكره هالناصر ومااطيقه ولا اطيق أي شي
يتعلق فيه ولا في ماضيي
قامت وراحت للحمام غسلت وجهها وطلعت برا
راحت وجلست عالمراجيح طلعت جوالها واتصلت على ابوها
ثواني ورد فهد : هلا
ليان : ياهلا بالغلا كيفك يالغالي
فهد بضحكه : مامدانا افترقنا عن بعض
ليان بعبره : وش اسوي مقدر على فراقك
تغير صوت فهد : ليان وش فيك
ليان وهي تشهق : وربي احبك يابوي مابيك تخليني الله يخليك
فهد بصدمه : ليان انتي وينك
ليان : اوعدني ماتخليني
فهد : ليان
ليان : اوعدني يبه
فهد : اذا ربي كاتب ان حنا نفترق ماباليد حيله
حست على نفسها : احم طيب احلف اني الوحيده بحياتك
فهد باستغراب : ايش
ليان : هههههههه واي فديتك يالغالي مشت عليك التمثيليه
بالله ما استاهل الاوسكار على تمثيلي
فهد بحزن : فديتك الله لايحرمني منك
ليان بتنهيده : ولا منك يالغالي
فهد : افا وشله هالتنهيده
ليان بتصريفه : يبه فديتك انا قررت
فهد : قررتي ايش
ليان بصوت هادي : انا موافقه على خالد ولد خالي جهاد
فهد : والله الله يوفقك ياحبيبتي
ليان : بس بشرط ابي اعيش معك بنفس البيت
فهد : من جدك انتي
ليان : هذا شرطي قبل فيه ولا غيري مليون وحده اول شي
انا مقدر على فراقك فديتك ثاني شي اخواني مستحيل اخليهم
وهم صغار بقعد معهم لين يتزوجون
فهد بحزن : الله لايحرمهم منك
ليان : ولا منك يالله يالغالي اخليك تبلغ خالي الموافقه
فهد : خلاص حبيبتي انتبهي على نفسك وعلى اختك
ليان : لاتشيل هم فديتك
سكرت من ابوها ودموعها مو راضيه توقف للحين
تذكر ذاك اليوم اللي مسكتها امها وعلمتها بكل شي
عمرها ماراح تنسى ذاك اليوم اللي حطموا فيها برائتها
وحملوها هموم كبر الجبال
بعد مارجعوا من بريطانيا باسبوع
كانت جالسه تلعب بغرفتها دخلت عليها امها جلست بجمبها
جود : ليان حبيبتي انتي الحين كبيره صح
ليان : ايه صح بس ليش
جود : يعني لازم تعرفين بابا صح
ليان : بابا
جود : ايوه بس مو بابا ناصر لا بابا فهد
ليان : مين بابا فهد
جود : شوفي حبيبتي هذا مو بابا ابوك الحقيقي اسمه فهد
ليان : ماما
جود وهي تبكي : ليان بابا تعبان تعبان كثير وفي المستشفى
ليان : بس انا ابوي اسمه ناصر مو فهد
جود : لا هذا صديق بابا ابوك تعبان في المستشفى
كانت مو فاهمه او مو راضيه تصدق ناضرت امها بفهاوه
موراضيه تستوعب كلامها
بذاك اليوم كانت منفصله عن عالمها وكل اللي في بالها كلام امها اللي
مافهمت منه شي غير هالكلمات
خذتها امها بذاك اليوم هي وناصر وودوها للمستشفى وهناك شافت
شخص كان جالس على كرسي متحرك ومنزل راسه كان جسمه مكسر
ووجهه مغطى بشاش دخلوها ورفضوا يدخلون ماكانت فاهمه
وش السالفه دخلت لما شافها الشايب اللي كان جالس مع هاللي
يقولون انه ابوها نبه ابوها لها لما شافها ابوها اشرلها بايده
قربت منه سحبها لحضنه وضمها وقعد يبكي وهو يقول كلام
مو مفهوم اللهم كلمه وحده وهي (سامحيني) وكان يرددها
صار كل يوم يودونها ناصر وامها له حبته بس ماكانت فاهمه
ليش هذا ابوها طيب وناصر وش يكون لما طلع فهد من المستشفى
علمتها امها بكل شي كيف انها كانت زوجته السابقه وان ليان
بنته وانه تطلقت منه وهربت لانه كان يبي يرجعها وعشان كذا
خبا ليان عنها وخلاها عند ناصر صديقه اللي رباها
خذوها له وعاشت عنده ومن يوم دخلت بيته وهي تحس انها
جزء منه صارت تحس انها جزء من معاناة هالشخص
اللي كل من حوله خانه وابعد عنه
مثل ماكتشفت ان عمتها واللي هي زوجة ابوها بعد امها جاته
بالمستشفى ورمت عيالها عليه وقالت انا مو ناقصه اعيش
مع واحد مقعد ومشوه ابغى الطلاق
واكتشفت ان الحادث صارله لما عرف ان جود رجعت وتزوجت ناصر
طلع من البيت معصب وصار له الحادث بنفس اليوم اللي
رجعوا فيه
عشان كذا صارت تكره ناصر وكل شي يتعلق فيه ولولا امها كان
قاطعتهم من زمان صحيح انها زعلانه على امها بس
مهما كان هذي امها
حست بضيقه تخنقها تخيلت شكل ابوها وهو جالس بنفس المجلس
مع ناصر ابد ماتقدر تتخيل كيف ان ابوها يتألم بصمت
ارجعت تتصل فيه
فهد : هلا حبيبتي
ليان : يبه حبيبي بلغت خالي
فهد : ايه بلغته مبروك يبه
ليان : الله يبارك فيك يالغالي
فهد : ها عروستنا أي اوامر ثانيه
ليان : فديت عيونك بتحقق لي طلبي لو طلبت
فهد : اكيد كم ليان عندي
ليان : ابي ارجع للبيت مو مرتاحه هنا
فهد : افا وانا ابوك من اللي مزعلك
ليان : ابد يالغلا بس كذا ما اعجبني الجو الا اذا كانه عاجبك
فهد : لا مادامه ماعجبك اكيد ماعجبني
ليان : الله لايحرمني منك خلاص اجل بروح اقول لنوفه
فهد : خلاص حبيبتي انا انتظرك بالسياره
ليان : اوك
سكرت الجوال صحيح ان الجو عاجبها بس مستحيل
تخلي ابوها يجلس مع ناصر بنفس الجو مستحيل تخليه يشوف
عيال ناصر فيه اللي كافيه
دخلت الفيلا
راحت وحصلت نوف جالسه مع ساره
ليان : نوفه حياتي يالله
نوف : نروح للبيت
ليان : ايوه
ساره : وش هالتعقيد تونا لاتعقدون البنت اووف
راحت ليان وميلت على ساره بهمس : هدي اعصابك
ترى انتي توضحين انك معقده ريلاكس ياقلبي عشان ماتبين
النفسيه اوك
سحبت نوف : نوفه حياتي بنروح نتمشى يالله ياقلبي
طلعوا عند الباب سمعت ليان صوت امها
جود : ليان استني
التفتت ليان : هلا يمه
كانت جود مغيره مكياجها ومكثفه مخفي العيوب تحت عيونها
بس مع هذا واضح انها كانت تبكي : ليونه وين حبيبتي
ليان : بنروح نتمشى
جود : طيب ليش ماخذه اغراضك
ليان : بنطلع انا وابوي واخواني جو المزرعه ماعجبنا عشان
كذا بنروح
نزلت جود راسها
راحت ليان وباست راس امها ولبست عبايتها وطلعت
وخلت امها وراها بحسرتها
ركبوا السياره ورجعوا للرياض
والجسمي يوصف احساس فهد بذاك الوقت
شي غريب , شي غريب
شي غريب , سي غريب
لما تظن انك حبيب وانك من الفرحة قريب
لكن يجيك سهم ويصيب سهم ويصيب قلبك وتحيا به غريب
لما تظن انك حبيب وانك من الفرحة قريب
لكن يجيك سهم ويصيب سهم ويصيب قلبك وتحيا به غريب
الدنيا كلها برد وعواصف
من قلبه خالي ومن قلبه ناشف
هاذي الحياة حظ ونصيب حظ ونصيب
مرة تصيب ومرة تخيب
في كل مكان وفكل زمان
بين الهدوء تلقى الرياح
بعض الصدور فيها الحنان
وبعض الصدور فيها الجراح
في كل مكان وفكل زمان
بين الهدوء تلقى الرياح
بعض الصدور فيها الحنان
وبعض الصدور فيها الجراح
مهما شتكيت ولا بكيت
ما يستوي ليل صباح
مهما شتكيت ولا بكيت
ما يستوي ليل صباح
شي غريب شي غريب
ان كان هواك ضيع خطاه ولا نشف فيك الشعور
حول هموم قلبك شموع وارجع وطير ويا الطيور
ان كان هواك ضيع خطاه ولا نشف فيك الشعور
حول هموم قلبك شموع وارجع وطير ويا الطيور
طبع الحياه حزن وفرح وطبع الورود شوك وزهور
طبع الحياه حزن وفرح وطبع الورود شوك وزهور
شي غريب شي غريب
شي غريب شي غريب
.......................................
طبعا الكبار في عايلة الخالد اتفقوا على ان سر ليان
ماينكشف ابد وتعيش على انها بنت فهد من طليقته جود
بالنسبه لابطالنا الباقين مانسيتهم
العنود مخطوبه لولد عمها سعد
سلطان للحين على امل ان ليان توافق
اسامه طلق زوجته لانه ماقدر يثق فيها وارسلها لامريكا
خطب نورا بس رفضته
هند تزوجت صديق اخوها دكتور
اسامه توظف في مستشفى كبير بس للحين ما تزوج
محمد صار ملتزم وهو الحين امام لمسجد هو اللي بناه
من فلوسه وقف لامه
النهــــــــــــــــــــــــــــــــــــــايه
تمت الروايه بتاريخ (8-1-1433) ( 2:43 ص )
في الختام احب اشكر كل اللي ساعدوني وكانوا معي خطوه بخطوه
لا تقيسوا محبتكم بحجم حروفي ..
فما يحمله قلبي يعجز عن نثره قلمي ..
وما يسكبه مداد حبري ..
قليل من كثير في دمي يجري ..
فعلا اشكركم من كل قلبي بصراحه كنتم معاي متابعين
على الرغم من اني اخلفت كثير بموعد تنزيل البارتات
حصلت كثير اخطاء عندي اكيد اتمنى تسامحوني عليها
هذي اول تجربه لي في عالم الروايات واتمنى اني ما اخفقت
فيها غير طبعا (مواعيد عرقوب ) على قولة اختي
بس بصراحه وربي انه عمري ما اخلفت عن الموعد متعمده
والله مااخلفت الموعد الا وعندي ضرف اجبرني
اتمنى ماتنسوني من تقييمكم وتقولون لي بكل صراحه
وش رايكم بالروايه لان رايكم يهمني
ابيكم تقولون كل شي بخاطركم بكل امانه
وفي النهايه
على ضفاف آحلامي
ودعتُ أيامي
فغدوت خائفة من ان ياخذني بحرها الى ما اجهله
وانا لا اعرف السباحة فيه
كانت قدماي تغوص في اليابسة
رافضة ان تغادرها
او
خائفة من الرحيل للمجهول
ولكن كلما هاج موج البحر
وجدت نفسي بين مد و جزر يبعدني عنها
وعيناي عالقة على آثار أقدامي الباقيه على رمالها
وعلىرسالة الذكريات التي تركتها لكم
هنا على هذه الارض كان للفرح وللحزن مكان في عالمي
ورغم تنافرهم الا انهم قد تجاذبوا و تصاحبوا
حتى بتُ آحن للبقاء في آحضانارض كانوا يسكنوها معي
هُنا رسمت الآف اللوحات
او حتى لا أزخرف الحروف وانسبها لي
سأكون أكثر صدقا واقول إنها هي منرسمتني
كانت تظللصورتي حينا فلا احد يجيد قراءة ما ورائها
وحينا آخر تجعلني شفافه لأكون قريبة لمن ابحر بين الواني
لــ نرسم الآمل لبعضنا ...
يا عالمي الصغير
يا صندوق آحلامي المخبئه
يا لوحة سمحت لي بالكتابة على سطورها
يا اروآحا قد سكنتني واعطتني من دفئها وصدقها الكثير
يا من أنصتوا الى خيالاتي وخربشاتي البسيطة
تشتاق كلماتي للحديث عنكم و لكم ..
ولكن ...
انا اعلم أني اسكن في زاويا ذاكرتكم
ان لم يكن في قلوبكم لذا
سأسقي أيامي القادمة بعبيرحروف لكم حملتُها معي للمجهول
لأتنفسها
كلما ساقني الحنين لأبطال قصة
لم تنتهي ولن تنتهي
وأن طال الغياب
للامانه الخاتمه موب لي بس اعجبتني وحسيت انه فعلا
تعبر عن حالي الحين
عاد لاتنسون التقييم
وادعولي بكره علي اختبارين الله يعيني
اشكركــــــــــــــــــــــــــــــــــم على المتابعه
في امان الله