قصه .. (" عبد الرحمن واسماء ")
الحلقـــ (2) ــة
ضيوف الحلـقة
أحمد (صديق عبد الرحمن)
------------------------------------
بعد انتهاء الطعام قاما ليصليا صلاة العصر ودعو ربهما أن يهديهما إلى الصواب والخير حيثما كان ,,
وبعد انتهاء الصلاة سمعا صراخ والدة عبد الرحمن
محمووووود ، محموووود ...... ياعبد الرحمن الحقنى ، الحق أبوك يا ابنى
فهرع عبد الرحمن إلى الباب ونزل فوراً لوالدته !!
وذهبت أسماء ترتدى ملابسها وتدعو " اللهم إنا لآ نسألك رد القضاء ولكنا نسألك اللطف فيه ، اللهم ياحى ياقيوم أجرنا فى مصيبتنا "
نزل عبد الرحمن مسرعا ووجد والدته والدموع تملا وجهها وتشير بيديها الى الاريكة التى هى امام التلفاز ، فهدأها عبد الرحمن واخذ بيدها الى الداخل ثم ذهب ليرى ما الذى حدث لوالده فوجده ملقى على الارض دون حراك
فاسرع واتصل بالاسعاف وجاءت مسرعة ونقلته الى المستشفى
لحق عبد الرحمن وزوجته ووالدته بسيارة الاسعاف ، وما ان وصلوا حتى طمأنهم الطبيب انه بصحه جيده ولكنه يحتاج الى الراحه ، فاستأذنه عبد الرحمن ان يدخلو الى غرفته ليطمئنو عليه ، ووافق الطبيب
دخل عبد الرحمن تتلوه امه وزوجته ، وجلسو ينتظرونه حتى يفيق
وما ان فاق حتى ابتسم عبد الرحمن وقال
ايه ياسبع ، بئة كدة تقلقنا عليك وتخلينا ندوخ وراك كدهون يعنى
يلا قوم بطل دلع ، دا انت ادها وادود
اسماء
حمد الله على سلامتك ياعمو ، ان شا الله اللى يكرهوك يارب ، ربنا يقومك بالسلامة ويرجعك لينا تانى وتنور بيتك
فنظر الحاج محمود الى زوجته وزوجة ابنه ولم ينطق بكلمه
فقاطعت ام عد الرحمن هذا السكوت
حمد الله على سلامتك يا ابو عبد الرحمن ، والنبى يا اخويا بلاش شغلك دا اللى هيجيب اجلك قريب ، والله انا مش عايزة فلوس ولا عايزة حاجة من الدنيا دى غيرك ، صدقنى انت لو رحت منى انا هروح فيها
عبد الرحمن
لا لا لا يا حاج ، مقدرش انا ع الدلع دا كله ، حد يبقى متجوز قمر بالشكل دا ويروح يجرى ورا شغله .. وغمز لوالدته
ام عبد الرحمن
بس يا ولد احترم نفسك ، ما انت مش عارف اللى بينى وبين ابوك اد ايه ، وازاى كنا مع بعض وبنبنى الشقه طوبة طوبة لحد ما دلوقتى ماشاء الله انت شايف اللى احنا فيه ، ابوك يا ابنى يمكن بعيد عنكو اه بس لو تعرف بس اللى جواه , صدقنى هتتغير اكتر
ظل الحاج محمود ينظر اليهم ولا يتكلم
فقال عبد الرحمن
طيب ، أسيبكو بئة تقولوا الكلمتين اللى واقفين فى زوركو دى وانا اللى كابت على نفسكو ، قومى يا اسماء تعالى بره نستأذن الدكتور ناخد بابا معانا دلوقتى ونمشى
فتبسمت اسماء
ماشى حاضر ، بعد اذنك يا عمو .. بعد اذنك يا ماما
------------------------------------
وخرج عبد الرحمن واسماء من غرفه الحاج محمود وذهبا الى الطبيب
عبد الرحمن
والدى ماله يا دكتور ؟
عمالين بنتكلم حواليه كلنا وهو يبص لكل واحد فينا شوية ومش بيتكلم ولا بيرد ولا اى حاجة ، حتى انا سبت والدتى معاه ف الاوضة يمكن يتكلم معاها او كدة „ هو فى حاجة وانا مش عارفها ؟ طمنى يا دكتور الله يخليك
تنهد الدكتور ونظر الى عبد الرحمن واسماء وابتسم ثم قال
شوف يا استاذ عبد الرحمن ، والدك الحمد لله بصحه كويسة „ بس شكله واخد صدمه كبيرة جدا ومكانش متوقعها وهيا اللى ادت انه يفقد وعيه ، هو هيبقى كويس ان شاء الله متقلقش عليه „ بس اهم حاجة حاولوا بقدر الامكان تبعدوه عن اى مصدر قلق وازعاج ويرتاح راحة تاامة لحد ما يستعيد وعيه ويبقى كويس ان شاء الله
واعطى له الدكتور روشتة العلاج وطمأنه ، فابتسم عبد الرحمن واخذها وطلب منه ان يعود معهم الى المنزل ووافق الطبيب ثم ذهب ليقوم بعمل تصريح الخروج
سألت اسماء عبد الرحمن
عبد الرحمن ، باباك هيرتاح ازاى ؟ دى حياته كلها الموبايل واللاب بتاعه ، دا حتى ايام الخطوبة كان دايما بيتكلم ف الموبايل واحنا قاعدين „ ازاى هنبعده عن شغله
تنهد عبد الرحمن وقال بكل اسى
صدقينى يا اسماء انا مش عارف ، وانا بفكر زيي زيك ، دا ابويا وانا عارفه كويس ، لو بعدنا عنه الموبايل او اللاب ممكن يجراله حاجة „
ثم سكت قليلا وكأن شيئا قد خطر بباله
فنظرت اليه اسماء بدهشة
انت بطلت كلام ليه ، ما تنطق يا ابنى خلينا نروح نطمن عليه و...
فقاطعها عبد الرحمن وهو يبتسم
انا خلاص عرفت هعمل ايه ، يلا بس نروح نطلعه من المستشفى وبعدين هفهمك
اسماء
لا فهمنى الاول وبعدين نروحله
عبد الرحمن
يلا يا اسماء مفيش وقت ، احنا العصر ويادوب نلحق نعمل حاجة !!!
فتعجبت اسماء من تصرفه ..
اللى تشوفه يا عبد الرحمن ، يلا نروح نطلعه
ذهب عبد الرحمن واسماء يبتسمان فسألتهما ام عبد الرحمن
ها يا ابنى ، الدكتور قال ايه ؟
فذهب عبد الرحمن ليجلس الى جانب والده على سريره وقبـّل رأسه وقال
الدكتور قال انه زى البمب وصحته حديد ، اوعى تستحمى يا حاج للحديد يصدى „ هههههههه يلا هنروح البيت دلوقتى يا ماما متقلقيش ، والدكتور قال انه لازم يرتاح
فاطمئنت الوالده لسماع هذا الكلام من عبد الرحمن ، ثم جاء الطييب بتصريح الخروج ودعا للحاج محمود بالشفاء العاجل وودعهم ثم ركبو سيارتهم وذهبوا الى المنزل
------------------------------------
فى السيارة
عبد الرحمن
بقولك ايه يا ماما ، هو انتى مشغولة اليومين دول فى حاجة او كدة ؟
فردت والدته بتعجب ..
لا يا ابنى مش ورايا حاجة ، ما انت عارف ان ابوك هو اللى بيعمل كل حاجة ، هيكون ورايا ايه بس ياعبد الرحمن „ قول من الاخر انت عاوز ايه انا عارفاك لما بتبقى عايز تعمل كارثه بتسأل أسئلة غريبة !!
ضحك عبد الرحمن وقال
لا لا هى مش كارثه اوى يعنى ياماما ، (ونظر الى والده وهمس له) وانت ياحاج عندك حاجة ؟ ، طبعا لو عندك يبقى هتركنها على جمب اليومين دول عشان ترتاح ، (ثم نظر فى المرآه الى زوجته) وانتى يا اسماء طبعا مش وراكى حاجة غيرى يعنى „
طيب يا جماعه من مكانى هنا فى هذه السياره ، احب اقولكو ان احنا هنسافر الساحل الشمالى النهاردا ، فياريت كل واحد يجهز حاجته عشان ننطلق المغرب ..
الانطلاق من هنا من دمياط الى الساحل الشمالى ان شاء الله ، سنسير على بركة الله !!
متفقيين ؟
نظرت الوالده واسماء الى بعضهما ثم قالتا فى نفس الوقت
هنسافر الساحل النهاردا !!! ليه ؟
نظر اليهما عبد الرحمن باستغراب ولم يجبهما وتركهما فى حيرتهما ، وايضا لا يزال الحاج محمود صامتا لا يتكلم
وصلو الى المنزل فتوقف عبد الرحمن بالسيارة واشار اليهم جميعا بالنزول ..
يلا انزلو كلكو ، انا هلف شوية بالعربية عندى كام مشوار لازم اعملهم قبل ما نسافر „ ماما ، اسماء ؛ خلى بالكو من بابا لحد ما اجى وياريت تجيبو الحاجات المهمه بس ، احنا مش هنبات اكتر من 5 ايام !!
نزلت والدة عبد الرحمن واسماء واخذا بيد الحاج محمود يسندانه حتى دخلو الى منزلهم ولازلتا فى حيرة من أمرهما من الذى يفعله عبد الرحمن !!
------------------------------------
وانطلق عبد الرحمن بسيارته نحو منزل صديقه احمد ، واتصل به
احمد
عبووووووود ، عاش من سمع صوتك يا ابنى „ بئة كدة يعنى تتجوز وبعدها تنسى اصحابك برده ، لا بجد زعلان زعلان
عبد الرحمن
هههههههه ايه يا ابو حميد صلى ع النبى ، انت محسسنى انى متجوز بقالى سنين ومرفعتش سماعه التليفون ولا اتصلت ولا عبرت „ واحشنى يا واد والله ، معلش اعذرنى انت عارف كويس ظروف البيت
احمد
وانت كمان والله ياعبد الرحمن / عارف اللى انت فيه ; ربنا ييسر ليك امورك ويتحل الموضوع دا قريب ان شاء الله
عبد الرحمن
ان شاء الله هيتحل ، بفكر فى سفرية كدة
احمد
ياااه ياابنى فاكر ايام الجامعه والخروجات والسفر اللى سافرناه والفسح وعصر الحرية „ انما دلوقتى احنا بقينا ف عصر قمع الحريات من الزوجات !!
عبد الرحمن
ههههههههههههه مش للدرجة دى يا ابوحميد ، اى نعم شلنا مسؤلية ومبقيناش زى الاول بس الحمد لله ، عايشين بناكل وبنشرب وبنعمل اللى احنا عايزينه
احمد
ماشى يا عم العاقل انت „ المهم صحيح انت عاوز ايه ؟ „ قر واعترف
عبد الرحمن
مش بالزبط يا احمد يعنى ، وبعدين انت تعرف عنى ان انا بتاع مصالح يعنى ؟ الله يسامحك ياعم ، يلا مش زعلان منك
احمد
انا اقدر برده ياعبده ، دا انت حبيبى والله „ بهزر معاك ياعم ، واحشنى الهزار والرخامه عليك
عبد الرحمن
هههههه رخم براحتك وهزر ياعم ، المهم بقولك .....
احمد
ايييييوة خلينا ف المهم ، مش قلتلك بتاع مصالح , انطق يلا
عبد الرحمن
ههههههههههههههه „ ماشى ، فاكر الشقه اللى كنا بنروح نقضى فيها الاجازة بتاعة الصيف اللى ف الساحل الشمالى ؟.
احمد باستغراب
اه طبعا فاكرها يا ابنى ، ودى ايام تتنسى ؟ انت ناوى تعزّل وتطفش على هناك ولا ايه ؟
عبد الرحمن
هههههههه طول عمرك سكر ودمك شربات يا احمد والله „ اكيد لا طبعا !!! والدى تعبان شوية ومرهق من شغله وعايز اخده يغير جو ، وبالمرة نتفسح شوية
احمد
لا الف سلامة ع الحاج محمود ، سلملى عليه كتير ياعبد الرحمن ولا اقولك ، بلاش لحسن يطلع يجرى ورايا / انت عارف كان دايما بيشك فيا واحنا ف الجامعه وكان عايز يبعدنى عنك
عبد الرحمن
هههههههههههههه انت لسة فاكر ؛ متقلقش هوصل سلامك ليه وهو مش هيقول حاجة ان شاء الله
احمد
ماشى بما انك واثق كدة يبقى خلاص ؛ طيب وانت عايز تروح امتى ؟
عبد الرحمن
الصراحة يعنى يا أحمد .... عايزه دلوقتى عشان نسافر المغرب !! ، أنا مستنيك أهو تحت البيت
احمد بتعجب شديييد
نعمممم ! يعنى ايه دلوقتى ؟ قول انك بتهزر ياعبد الرحمن !!
عبد الرحمن
وبهزّر ليه يا ابنى ؟ ,, أنا بتكلم بجد والله / عايز مفتاح الشقه دلوقتى ، بطـّل هزار بئة يلا وهات المفتاح وانزل يلا ..
أحمد
عبد الرحمن انا ف القاهرة دلوقتى ، أنا مش فى دمياط .... !!