نويره الغاليه
الف الحمدلله على السلامه
وانتي كذلك يالغاليه المنقطه
انا بعد مريت بلحظات مثل هذي بس بصوره غير مباشره
يعني مو انا إلي واجهت الموت بل العكس ولدي اهوا إلي واجهه
كنا في الشاليه وكان ولدي _ عمره 3ونص _ يلعب بالتراب وانا كنت بجانبه مع بنتي نسوي قلاع ترابيه
وفجأه اسمع صوت ولدي مختنق ويصرخ لأنه شارب ماي من البحر _ باختصار كان غرقان _
طبعا انا من الخرعه رجولي ما شالتني ولا قدرت اوصل له اكتفيت بأني اصرخ عليه واناديه
الحمدلله اهو استعاد توازنه وقدر يوقف على ريوله ويرجع للشاطئ بس طبعا انا الدم إلي فيني نشف كله
وبعد ما تطمنت على سلامته عاتبته وقلتله اني نبهتك لاتتحرك من جنبي ولاتروح الماي لأنك ما تعرف تسبح
لكن جاوب علي جواب فشلني حده ، قالي :
انتي دايما تقولين ان إلي ياكل سمك يصير قوي ويسبح بالبحر مثل السمك
وانا دايما آكل سمك >>>>>> فمعناته اني اعرف اسبح !!!!!
صراحه بعد رده ضحكت حيل وعرفت ان براءه الأطفال ماكو مثلها
مسكين اعتقد انه على طول راح يسبح من غير تدريب ولا شي
كل ما عليه انه ياكل سمك وخلاص ، من غير تعقيدات
بهذا الموضوع حبيت اشاركم ويمكن انا ما واجهت الموت بس
لوكان صاير لولدي شي يمكن اموت بعده ، الله لايقول
وسلامتكم
Ms.MaMa