[M A H O O Y]

كلنَا نطمحْ للأفضل ، كلنَا نبغى نوصَل لـ هدفْ مُعينْ ، كلنَا نبغى نتميز عن الباقيِن ! ومَا راح نحقق كلْ هذا . . إلا إذا كانْ عندنا إرادة للـ " تغيير " ! ، مشهدْ - تخيلِي معِي - : جالسَة تشتغلِين على النتْ بكلْ إنهماك . . فجأة نادتكْ أمك ! - فلاااانة ، تعالِي رتبي الصالة ! سكرتِي الجهاز وأنتِي تسبين شغالتكم [خدامتكم] إلي انحاشتْ مع سواق الجيران أمسْ ! لمَّا رحتِي الصَالة هالكْ المنظر ! زبايلْ مكبكبة - غبَار - بقايَا أكلْ - أثاث محوسْ . . . إلخْ ويلَا بسمِ الله ، بعدْ ساعة الصَالة زي الفُل توسِع الصدر رحتِي لغرفتك نمتي ، بعد ساعتين قمتِي من إزعاجْ أخوانكْ . . طلعتِي للصَالة تطلبين منهم يهدون ، وانصدمتِي لما شفتِي المشهد !!!! الصَالة رجعتْ وصخة أضعافْ أولْ في أقل من ساعتين !!!! كلْ ترتيبك وتنظيفك وجهدك رااااح . . بالله وش موقفكْ وقتها ؟ يمكنْ تسألين نفسكْ ليش أخوانِي سووا كذا ؟ الجَوابْ إنهم للأسف متعودين و متأكدين إن في أحد من وراهم بيشيلْ ! فَ خلاصْ صارْ الموضوع جدًا عادِي ب النسبَة لهم !!!! وأنتِ تاكلينها إلى ما تجي شغالَة جديدة تاكلها عوضًا عنك ، أغلبيَّة الطُلابْ يعشقون وقتْ الفُسحة . . بـ عكسْ عاملات المدرسَة تمامًا ! وأنا جالسَة مع صديقاتِي في السَاحة . . تمر بنتْ مع صديقتها ، بينهم وبين الزبالة متر ونص ! وربي بكلْ بجاحة العالم وحدة منهم رمت قرطاس الشوكليت ع الأرض حتّى ما استحت يعنِي تخبيها !!!! قدام كل الناس وفي وسط السَاحة ! أنَا ما أعرف البنت ، ما أعرف اسمها ولا أعرف عنها شيء ، بس من هـ الموقفْ الي شفته منها طااااحت من عينِي لأسفل سافلين !!!! لها الدرجة يعنِي انعدم الحيَاء ؟ ، جمعتْ لكم عدة ظواهر منتشرة في المدارس للأسف الشديد ! النادرين النادرين الي مدارسهم كويسة أرجوكم لا تنزلون عشان ما تنصدمون . . طاولات الطُلاب البنتْ طفشانَة ، وراس مالها قلمها ! وهات يا شخابيط وخواطر وحفريَات . . الي يشوف الطاولة يحسبها ملك إنسَان مريض نفسيًا ! ومن كثر الكتابات الإدارة تفقد الأمل إنها تمسحها أيام الاختبَارات ويغطون الطاولات ب ورق حرام والله العظيم ، ونقولْ ليش نكره المدرسة ؟ لأننا ما احترمنَا مرافقها !!!! وش لون بتنفتح نفسِي وأصير مبسوطة وقدامي قذاره ؟ تبغينْ تشخبطين أكثر ما كثر ربي الأوراق الحمد لله والشكر . . فيك طاقات لا تسوين عمليات جراحيَّة ع الطاولات إلا روحي صقعي راسك بالجدران عشان تفرغين الحرش الي براسك ! جدران المدارس حدثْ ولا حرج ! صحْ إنها أقل من الطاولات بس لها حقها بعدْ . . من إنعدام الحيَاء ذاك اليُوم ألقى آثار (روج) على الجدار وتطوروا ما صارت بوسات وشخبطات ، صارت مستنقع علوك ! الظاهر فيها التهاب مفاصل ومو قادرة تقوم وتحس إنه عيب ترمي العلك في الأرض ! فأقرب شيء الجدار !!!! وتعالي شوفِي كل الأشكال والألوان ، متحف ! ، كلنَا مُسلمين ، وكلنا رددنا هذا الحديث واحنا صغار في المدرسة : قال الرسول صلى الله عليه وسلمْ : "إماطَة الأذى عنْ الطريقِ صدقَة" ! طيب ليش ما نطبق الحديث ؟ ولا نقومْ ونتعب ونتعلم وكل الجهد الي نبذله في المدرسة على الفاضي !!! معظم الدول العربية والإسلاميَّة للأسف [مزبلة] ، ويسألون ليش التلوث وليش الأمراض ؟ وإذا سافروا لبلدان غربيَّة أولْ شيء يخطر على بالهم "ياي وش هالبلد النظِيفة الي تفتح النفس" يعنِي ناس غير مسلمينْ ولا عندهم أحاديث ولا شرع وأنظف مننا ، والله الواحد يحس بالعار ، طلابْ اليابَان والحفاظْ على نظافة المدرسَة ! كلْ يوم عندهم حصة نهايَة الدوام ! صغار - كبار - بنات - أولاد ما يفرق . . كلهم يساعدون بعض ويتعاونونْ ، والنتيجة الفصل مخلص في أقل من 10 دقايق ! أطفال في صفْ أولى ابتدائِي بكلْ حماسَة ينظفُون الفصلْ ! الكلْ يشارك ما فيه أحدْ منهم جالسْ يتفرجْ على البقيَّة ! نقولْ ليش ينظفون طيب ؟ من الإيجابيَات إنهم إذا عرفُوا إنهم راح ينظفون في الأخير ما راح يرمون شيء ع الأرض ! والنتيجة ؟ ناسْ نظيفة في المدرسة وخارجْ المدرسة . . ومتكبرين ما فيه ، كلهم متواضعين ، كلهم متعاونين ! والتنظيف من أساليب التربيَة الصحيحة . . وبرأيي إنه مُتعة ، لأنِي أشاركه مع أصدقائِي ، وفي نفس الوقتْ الحركة بركة ، ولا عاجبتكم الجلسة في الحصص 7 ساعاتْ ؟ معلومة : بعضْ رحلات الطلاب اليابانيين تكونْ لـ جداول الميَاه والشوارع والحدايق ليش ؟ للتنظيف ! طبعًا ما قصر الأستاذ [أحمد الشقيري] وتكلم عنهم في برنامجه (خواطر5) بما فيه الكفايَة ، وسمعنَا خبر حلو في (خواطر6) إن النظام هذا بدوا يطبقونه في أكثر من 50 مدرسة في مدينة جدَّة بأمر من وزير التعليم ، طالب في مدرسَة ابتدائيّة يقوم بتعقيم يديه حفاظًا على النظافة ! وعقبَال بقيَّة المناطق إن شاء الله ، طيب تسألونْ الحين . . وش الفايدَة من الحملة وإيش دورنَا ؟ أقلْ أقلْ شيء حافظي على نظافة مدرستك ، حاولي بقدر الإماكن المكان الي تكونين فيه يصير نظيف () ابدي بنفسك أول ، بعدين ابدي في الي حولك . . وعّي صديقاتِك وزميلَاتك وانقدِي عليهم إذا شفتِيهم يرمونْ أو يشخبطون . . إلخ مو لازم تهزئين وتهاوشينْ ب الطيبْ كلْ الأمور تمشي () أفكار للمحَافظة على نظافَة الفصُول ، مرة لفت نظري واحد من الفصُول ، البنَات كانوا (متقاطين) وشارين هذيك الزبايل الصغيرة مرة - وأنتو بكرامة - حاطين عند كل درجين وحدة ! ومو متكلفين فيعا عادي جايبينها من أبو ريالين والمحلات الرخيصة ! وبكذا بوسط الحصّة معاك أي شيء بريتي قلم معاك منديل خلاص الزبالة موجودة =) ما فيه أسلوب الدعس في الأدراج والتهريب بين الكراسي -_-" وبين كل فترة والثانيَة يفضونها في وحدة من الحاويات الكبيرة في المدرسة ، أو ممكن كيس بلاستيك ينربط على الدرج من الجنبْ ! والأفكار لا تعد ولا تحصى () بخاخات الريحة ، سواءًا اليدوية أو الأوتوماتيكية ! رخيصَة سعرها حول الـ 15 ريال في السوق وفيه أرخص بعد () خلوهَا دائمًا تكون موجودة ، لها دور كبييير في تعطير الجو وتحسين النفسيَّة لأن من جد الروائح الكريهة تضعف التركيز 100% ! خصوصًا أيّام الصيف لا تعليق !!!! من تجربتِي الشخصيَّة ! الأسيتون (مزيل طلاء الأظافر) دواء فعال لكل بلاء . . جيبُوا علبة مناديل وعلبة أسيتون ، وفي 5 دقايق كل وحدة تاخذ كتلة مناديل وتغطسها بالأسيتون $_$ واشتغلوا فرك بالطاولة والأدراج من جوا مهمة جدًا ، دقيقتين وهي تمام ولا راح تعانون بعد من أطراف الأكمام المبقعة حبر $_$ وما أتوقع وحدة نظفت طاولتها ودعكتها بترجع توصخها من جديد =) طبعًا الحفريَات والعمليات الي تجرى على الطاولات للأسف لم يكتشف لها حل حتى الآن >< ممكن تقترحين فكرة ع الإدارة أو المساعدة ، يقيمون مسابقة في المدرسة لأنظف فصل لمدة ترم أو الي هو ! ووحدة تصير مسؤولة تدور على الفصول فجأة وتشوف كيف الوضع =) ويتم إذاعه نقاط الفصول كل يوم سبت ؛) آخر الترم يتم تكريم الفصل الفائز ويكافؤونه الإدارة باللي يناسبهم ! البَنات البطلاتْ هم الي راح ينظفونْ الفصل نهايَة الدوام . . أنتِي ابدي وحاولي تجذبين زميلاتك معاكْ بدال الجلسة بدون فايدة وأنتم تنتظرون سياراتكم =/ إذا شفتِي فيه تفاعل كلمي الإدارة يخلون لكم 10 دقايق مثلًا نهايَة الدوام وبإذن الله راح يوافقون () لحد يقول صعبْ ! العاملة وحدة وتنظيف 20 فصل في اليوم =( أنتم أكثر من 10 . . وتنظفون فصل واحد في اليوم ! حاجة ما راح تاخذ منكم ولا شيء () لا تقولون احنا ما رحنا للمدرسة عشان نشتغل وننظف !!! الشغل مو عيب ولا حرام ! بالعكس . . وأنا قلت بعض فوائد العمل هذا فوق =) وإذا احتسبتوا الأجر بإذن الله راح يثيبكم ربي على كل جهد بذلتوه ، صممت كم توقيع ورمزيَّة بسيطَات جدًا جدًا ، فقطْ لـ دعم الحملة () وأشكر من أعماق قلبي كل من ساعد على نشرها + ، أخيرًا . . أعتذر على أسلوبي الفظ ! وأتمنى من الله تعالى أن تعم فائدة الحملة على الجميعْ () مو نقرا في الانترنت ونشوف في التلفزيون ولا حيَاة لمن تنادي . . نبغى ناس تتحرك ، نبغى نتطور ! أرجوكمْ ، التعبْ هذا كله نبغاه ينتج ثماره () جزاكمْ ربي الجنَّة ، وشكرًا لكم حقوق النشر غير محفوظة ()

المصدر: منتديات بنات دوت كوم

---

- hpkQh r]~ih FplXgm gJ 'ghfX hgl]hvsXD !

الموضوع الأصلي : - احنَا قدّها [حمْلة لـ طلابْ المدارسْ] ! || القسم : مـدرسـة بـنـات دوت كـوم || المصدر : منتديات بنات دوت كوم || كاتبة الموضوع : M A H O O Y