أحيان كتيرة بتكون الدراسة مملة وبتزهق
والأفظع إنها تتراكم
من فترة لتانية بحاول أقرا مواضيع محفزة للدراسة
وطرق بتشجعني .. مرة قرأت موضوع " الدراسة وناسة "
في مكان ما .. كان فيه طرق كتيييير عن تجديد الجو الممل في الدراسة
يعني أنا ممكن أستخدم الورق الملون وأقلام الهايلايت
مع الصور والستكرز ممكن ألزقها على كتابي .. بيخلي شكلو حلو
وبعدين ممكن أتذكر كتير من الصفحة لإنها ملونة وفيها رسومات كتير ..
هيك مابزهق وأنا أتفرج على الصفحة .. وبتدخل المعلومات غصب
هاي الطريقة ممكن نستخدمها في حالة المعلومات الصعبة ..
مع شوية تركيز وتلوين بتسهل
أجواء الدراسة عندي رايقة وهادية
خصوصي لو كان عندي إمتحان .. استحالة آكل أو أشرب
وباب الغرفة مسكر ومابطلع لو شو ماصار غير لما أخلص المادة
وبفضل دائماً أصحى بالليل أكمل دراسة
بس مليت من هالطريقة .. صرت ما أراكم أبداً الحمد لله ..
والله بجد كتير مهم إنك تدرسي أول بأول
وبطلت أحس بوقت الدراسة .. كتير سهلة صارت وممتعة
يمكن لإني حالياً بدرس شي بيهمني كتير .. وبحبو كتير ..
أنا مو بالمدرسة .. بس بروح على مدرسة لتعليم للغات
عم بتعلم لغة بين الانجليزي والألماني .. كتير حلو بس برضو
حسيت إني نسيت الإنجليزي .. لإنو اللغة الجديدة كتير بتشبهها بالحروف
لكن بالنطق والمعاني اختلاف كلي .. بدي أحاول أدرس كذا لغة بنفس الوقت
إن شاالله أقدر .. وأنا واثقة إني بقدر مع شوية إصرار واجتهاد
صورت صورة لما كنت أدرس .. بس الصورة مش أوكي لإنها من جوال ..
وكمان أنا ما بعرف أصوّر .. في بالي آخد دورة تصوير فوتوغرافي بالمستقبل .. 