[MiSs Mahawi]

بسم الله الرحمن الرحيم
السلام عليكم ورحمة الله وبركاته
:
موضوعي عبارة عن مصارحة, مصارحة بشخصيتك
هالسالفة حصلت لي في هالسنة يعني خبركم بنت بفصل جديد ماأعرف من البنات غير عدد
ينعد ع الأصابع عاد سلمت على إلي أعرفهم, والبقية قلت ماأبي ألحين أسلم, ولا شي تقول
هذي ساطية, ولا من وين تعرفني, ولا تحسبني معجبة, ولا ماتعطيني وجه خير شر ..
قلت خلاص مو لازم, وجلست أطالع بالبنات, وأقول في نفسي ذيك شكلها مصلحجية,
وذيك شايفة نفسها على وش ياحسرة, وذيك يقولون عنها أنانية ماتعطي شي إلى بطلوع الروح,
ولا البنت إلي كانت جالسة بجني كنت أقول في نفسي هذي وش تبي تطالع فيني من يوم جلست
..., وكذاا لين جت آبلة الحصة الأولى هي بعد ماسلمت من لساني قلت هذي عاد بتقعدلي
ع النسمة, لأني يوم دخلت كنت حاطة رجل على رجل, وقالتلي عدلي جلستك عاد عدلتها
قلت مو من البداية أنشب بحلق الآبلة, عاد جلست الآبلة عندنا انتظار قامت تسأل عن أسماءنا
بعد كذا سكتت, وقاموا البنات يتكلمون, ويسولفون, وأنا ماأبي أرتز عند بنات فصلي الأول
يقولون ميتة علينا خخخ فجلست ساكتة لين البنت إلي جنبي قالتلي مهاا قلت سمي ؟ -عرفت
اسمي لما الآبلة سألتنا- استانست البنت على (سمي), وقامت تبتسم كنها ودها تضحك ..
قلت بنفسي البنت شايفتني نكتة, ولا وشو ؟ وتوني بدير وجهي, وأطنشها إلا قالت حلوه
لهجتكم .. عاد كنت معصبة بس هديت يوم قالت كذا قلتلها إنت أحلى وسكت شوي بعدين
قلتلها شسمك ؟ (تو الناس) قالتلي: ساارة قلت عاشت الأسامي عاد, وحنا بالسواليف قالت
شفتي البنت إلي هناك قلت إيي قالت كنت حاجزه مكانك لها هي جت متأخره, وإنت جلست
قبلها, ومابغيت أقومك, وأجلسها, فزعلت .. > شفتوا كيف ياحياتي مابغت تقومني وتجلس
صاحبتها, وصاحبتها زعلت.> عشان كذا كان تطالع فيني استحت تقولي ..
عاد قلت: آسفة ماكنت أدري إنك حاجزته لها, وإنها بتزعل, تبيني أناديها تجلس, قالت:
وإنتِ ؟ قلت: لا عاادي قالت لا مايحتاج هي بعد كننا بزران نحجز لبعض (من سبق لبق)
قمت أضحك, وجلسنا نسولف طلعت طيبة مووت. > حرام ظلمتهاا
وبإختصار سالفة المصلحجية طلعت البنت أووم الكرم سبحان الله, ولا الأنانية طلعت مسكينة
على نياتها القط ياكل عشاها حالها بحال نفسها, ولا المتكبرة مافيها ذرة تكبر بالعكس كل
البنات يحبونها, واجتماعية ماشاء الله عليها ..
أناا انخدعت بالمظاهر شفت بنت تطالع فيني قلت شكلها معجبة, ولا وحدة بحالها قلت أنانية
ووحدة حلوة قلت متكبرة, ووحدة شفتها قلت مصلحجية, وطاري الأبلة طلعت آروع آبلة تدرسني الله لا يخلينا منها ..
أكيد مثل ماأنا يعني بنظرتي هذي شفت البنات كذا, وحكمت عليهم بشي آكيد أحد شافني
بصفة من هالصفات وشي من هالقبيل ..
لكن أنا ع الأقل تعرفت على شخصياتهم الحقيقية عرفتهم على حقيقتهم الحلوة .. في البعض
ماايرضون أصلاً يتعرفون على وحدة سمعت إنهاا أنانية .. طيب يمكن إشاعة يمكن وحدة تكرهها
قالت كذا عنها يمكن .. إلخ
ولا تحكمي ع الشكل ولا المظاهر .. ممكن تضيعين وحدة كان ممكن تصير صديقة وفية لك
لمجرد إنك حكمتي عليها قبل لا تتعرفين عليهاا ..
طبعاً بنات كان ودي أحكيكم وش صار معي إلين خلص اليوم الدراسي بس خفت تطفشون, و
أبعد عن الفكره إلي أبي أوصلها لكم ..
آخيراً: أبي من كل وحدة تقولي كيف نظرة الناس لها أكيد وحدة قد قالت لك أول
ماشفتك فكرتك ... أو إنت قلتيلها أو ماتعرفت علي وش كنت تقولين عني ؟ شي
من هالقبيل .. وتقولين لنا إنت وش في الأصل يعني مبين عليك متكبرة, وإنت
عادية ..
أو إنك شفتِ وحده فكرتيهاا .... وطلعت ....
آدري تعبتكم بكثرة الهرج لكن لزوم الشرح خخخ..
تحيتي ~

المصدر: منتديات بنات دوت كوم

---

atj ,p]m psfjih lj;fvm >> 'guj hgH;ev j,hqu

الموضوع الأصلي : شفت وحدة حسبتها متكبرة .. طلعت الأكثر تواضع || القسم : "الأرشيف" مغلق || المصدر : منتديات بنات دوت كوم || كاتبة الموضوع : MiSs Mahawi