البارت الرابع
وبعد ماخلصت ريم من الاغنية دشت المسن ولقت حمدان ويلست تسولف وياه عن شما...
اما شما فبعد ماسكرت من ريم سارت اتوضت وصلت ركعتين وودعت اخوانها وقالت حق امها انها تبا ترقد عندها..خذتها امها ورقدتها فحضنها لين يت الساعه تقريبا12 يت امها بتوعيها عسب يتجهزون ويطلعون دبي عشان يسافرون..
يلست امها توعيها لكنها ماوعت...كانت جسد بلا روح...روحها هجرت هالجسد وطلعت منه بأمان وهو بين احضان الام...
يمه يابسمات الفجر يمه ياغصن الروح
انتي قناديل العمر وانتي دوا المجروح
يمه يابسمات الفجر يمه ياغصن الروح
صدرج الواسع دهر احنا تربينا
من غير حبج فالزمن حق من يايمه نروح
حق من يايمه نروح .. حق من يايمه نروح
يمه يابسمات الفجر يمه ياغصن الروح
للأسف..فارقت الدنيا ومالحقت تسافر وتتعالج..عمرها وانتهى..
وصل الخبر لام ريم ومن حرقت قلبها عليها وعلى اختها تمت تصارخ..ووصلت صرخاتها لين ريم اللي كانت تتريا اتصال شما...
قالت حق حمدان برب وهي نازلة الصالة سمعت امها تقول الله يرحمج يا شما ماتهنيتي فعمرج..
ريم يلست فمكانها والدموع فعينها مابين حلم وحقيقة..لكن لا ياريم هاذي الحقيقة المرة شما خلاص رحلت عن هالدنيا..
يا مال فرقى يوم نساني
الصاحب اللي مابقا غير طرياه
راح وتركني في حياتي اعاني
مع هاجس الذكرى عيوني تمنى
وردت على حجرتها وسارت غيرت نك نيمها وكتبت خلااص يعني شما راحت..
وقالت حق حمدان
ريم:خلاص
حمدان:شو خلاص..شما سافرت؟
ريم:هيه سافرت,لكنها مابترد للابد
حمدان:ليش..شما شفيها ريمو
ريم:حمدان شما ماتت
وسكرت الايميل بدون ماتتريا رد وسارت فتحت دفتر مذكراتها وبدت تسترجع ذكرياتها مع شما وتقرا الاشياء اللي كاتبتنها شما حقها والدموع تسيل من عيونها وتحرق جفونها...
وبعد ساعه نزلت الصالة ولقت امها يالسه تقرا قرآن وقومتها وقالتلها انها تبا تسير تشوف شما..وزادت الهموم فامها وقالتلها خلاص ياريم..لكنها اصرت تشوفها وبغت تطلع بروحها وتروح عندها..اخر شي امها قالتلها بنسير وقت الغسل وبتشوفينها..وباستسلام ردت حجرتها وردت لذكرياتها وياها..وعقب طاحت عينها على تلفونها وقالت ابا اتصل فشما يمكن ترد عليه
واتصلت مرة..ومرتين..و3..و10..ومع كل رنه تزيد دموعها وهي تقول فنفسها ياليتني اكون فحلم..ولو كان واقع ليتني مت وياها.. ويلست شويه تفكر عقب ردت شلت تلفونها وتمت تقرا المسجات اللي من شما وراحت فتحت رسالة نصية وكتبت:
والله مايسوى اعيش الدنيا دونك لاولا تسوى حياتي بهالوجود
دامك انت اللي رحلت وكيف ابصبر عالبعاد وكيف بنثر هالورود
ماوعدت انك تقاسمني المحبة وتبقى لي حبي ولدروبي دليل
بس حسافة الموت كان اقرب وارحم حسبي الله ونعم الوكيل
وطرشتها حق شما...ومن عقبها رقدت ومانشت لين العصر..
وللأسف فاتها الغسل وماشافت شما..وزادت الهموم فيها وتمت تلوم عمرها لانها ماسارت عندها وودعتها شما رحلت وهي الوحيدة اللي ماشفتها..
وبعد العصر سارو الكل بيت اهل شما عشان العزا لكن ريم ماطاعت تسير ويلست بروحها بين دموعها وذكرياتها والجرح ينزف فقلبها والكل مستغرب من ردة فعلها كيف ريم ماتأثرت وايد معقولة هاذي هي ريم اللي كانت ماتفارق شما جي ردة فعلها ومايدرون عن اللي فخاطرها من كثر حرقت قلبها صار عندها برود..