[نبض قلبي]

فمان الله يا أغلى ماسكن قلبي فمان الله"
" فمان الله من شخص أظنك صعب تنسينه

فمان الله يا أول حب عاشه خالد بدنياه"
" عرفك زين وأنت يابعد عمره تعرفينه

أجل يومه طفل من غيرك اللي ضمه ورباه"
" أجل من تعّبك ليما كبر وأنت تربينه

أجل من قال : خل نفسك عزيزه والهوان أجفاه"
" توصينه على العز وعلى الفزعه توصينه

أجل من دلّله واغلى غروره حيل يوم أغلاه"
" تهنينه إلى من صاب واليا اخطا تعذرينه

أجل ياكويت من غيرك خذا بيده ومن خلاه"
" يكافح لين يلمس أبعد النجمات بيدينه

أجل من شجعه يومه قصد غيرك وقال الله"
" حفظتي كل شعره من كثر مانت تحبينه

يا أم الخير مامثلك مثيل ولا أظن اشباه"
" عزيزه دار عز ومن نوى عزك تعزينه

فقير الجاه لامن صار وسطك صار عنده جاه"
" وفقير المال لامن قاربك والله ال تغنينه

انا ياكويت من حشمه ترابك ما احب آطاه"
" أحسه طاهر والطاهر إلى من دسته تهينه

أنا توي دريت إن المفارق كايده بلواه"
" وعرفت ان المفارق ينعذر لادمّعت عينه