ياليتني ميت ولا عيني تشوف
خلي يزفونه على شخص ثاني
طعنت غدر جتني كما طعنت سيوف
يوم الحبيب أختار غيري ونساني
من صدمتي كني مقيد ومكتوف
وأنا أشوف الغير يأخذ مكاني
وصارت على شفاتي سؤالات وحروف
ليه الخيانه ليه قتل الأماني
كنت أحسبه خلي وفي حالي يروف
وأثره حكم باإعدام حبي وحناني
كنت أحسبه ماله بهالعالم وصوف
كنت أحسبه وافي ولاهو أناني
وأثري أنخدعت وراحت سنيني حسوف
وضاعت حياتي وإنتهت في ثواني
صار الحزن والهم والجرح والخوف
صارو رفاقي يوم خلي رماني
وماتنفع الحسره ولاصفق الكفوف
ياموت ريحني تراني أعاني
وياليتني محروم من نعمة الشوف
ولا أشوف الغير يأخذ مكاني