[العبير]

محمد: السلام عليكم
ام عمر: عليكم السلام... يا مرحبا بك... اقرب اقرب
محمد ( وهو يبوس راس عمته): اشحالج عمتيه ..ربج بخير
ام عمر: بخير الله يسلمك و يعافيك.. اشحالهم هلك
محمد: بخير .. يسلمون عليج...
ام عمر: سلم سلم عليهم
محمد: سلام ٍِ يبلغ
ظهرت ام عمر من الصاله هي وفيصل... وتم محمد قاعد يتريا حمده...
و يت حمده.. كانت صدق كاشخه و متعدله... لابسة كندورة رصاصيه مخوره.. ما كانت حاطه مكياج بس جمالها الطبيعي احلى بوايد
حمده: هلا والله
محمد: هلا و غلا
حمده: الحمدلله على السلامه
محمد: الله يسلمج
حمده: شو السفر وياكم.. ان شاء الله استانست
محمد: الحمدلله... بس ناقصني وجودج
حمده : .... ( استحت عاد)
محمد : اتحريتج زعلانه
حمده: ليش ازعل منك
محمد: لني ماييتكم اول ما وصلت
حمده: لا فديتك ..عادي
محمد: شو شو ؟؟
حمده: بلاك
محمد: عيدي اللي قلتيه
حمده: عادي
محمد: قبل عادي
حمده: ماقلت شي
محمد: سمعيني عاد
حمده ( وهي موخيه): ف... فديتك
محمد: ااااااااااااااااااااااه محلاها وهي تظهر منج
حمده: اذا بتم جيه بروح عنك
محمد: تتحريني بخليج.. غايب عنج اسبوعين و ماتبيني اشوفج
حمده: بس رمستك الصراحه
محمد: بلاها
حمده: انت وايد تحرجني
محمد: كيفي حرمتي و اتغزل فيها حرام هو؟
حمده: لا هب حرام
محمد: وبعدين شهر ما بشوفج ولا بناظر هالعيون.. ماتبيني اظهر اللي في خاطري
حمده: دريت بسفرنا
محمد: دريت و ليتني مادريت
حمده: ليش عاد؟
محمد: جنه حد نزع روحي مني
حمده: بسم الله عليك
محمد: تخافين عليه؟
حمده: اكيد
محمد: والله يا حمده مادري كيف اروم بعيش من دونج هالشهر
حمده: تراني برمسك في التلفون
محمد: بس غير يوم احس بوجودج في البلاد.. حتى لو كنتي في مكان و انا في مكان.. كل ماشتاقلج اييج هني.. بس عاد اذا سافرتي كيف القاج
حمده: حس شويه بللي حسيته يوم انك سافرت
محمد: هيه والله.. كيف قدرتي تصبرين دوني؟
حمده: تعرف شو اللي صبرني بغيابك؟
محمد: شو؟
حمده: كلمة احبج اللي دوم تكتبها لي في المسج قبل ماترقد
محمد ( وهو يبتسم): متى يا حياتي يجمعنا بيت واحد.. و عاد هييج الساعه محد يروم ياخذج مني
حمده: مممممممممممممممم عقب سنة
محمد: شو سنة .. تبيني اموت
حمده: عيل متى؟
محمد: اول ما توصلون بنحدد
حمده: ودراستي؟
محمد: شو خانة الدراسه بعد
حمده: ابغي اكمل
محمد: بس
حمده: محمد دخيلك لا تحرمني من هالشي.. ابغي اكمل دراستي الا هي سنه
محمد: ااااااااااه.... وبصبر
ظهر عقبها محمد... ورد العين مع ربيعه عيسى و ابوه.. وطول الدرب يحاول يقنع ابوه انه يسافر.. بس ابوه هب طايع عسب الشغل....
خليفة ماقدر يرمس عمه عن عذابه... عمه كان منشغل بسوالفه مع ابو محمد و عقب ماروحوا سيده دخل عمه الحجره ورقد..تم خليفه حاط في خاطره... حاول كمن مره يرمس عمه بس ماسنحت له الفرصه..ورجع بيتهم
خليفة: السلام عليكم
علياء ( وهي منشغله اطالع التلفزيون): عليكم السلام
خليفة: وينها امايه
علياء: في حجرتها راقده
خليفة: والهنوف
علياء: توها دخلت المطبخ تيب العصير
( وصلت الهنوف)
الهنوف: هلا خليفة... شو العزيمه؟؟؟
خليفة: ماشي حالها...
الهنوف: والكل تيمع اليوم
خليفة: هيه
الهنوف: ياحيكم... و نسيبهم ياكم بعد
خليفة: هذا اول واحد وصل الميلس عندهم
الهنوف: ههههههههه حليله... تستاهله حمده.. الله يتمم عليهم بالخير
خليفة: لو تشوفين ويهه يوم عرف انهم بيسافرون.. شوي و بينتحر
علياء: ههههههههههههه.... اونه...
خليفة: هيه والله... وعاد عمر من الله يباها.. تم يستفزه بكلامه
الهنوف: عمر دومه جيه
علياء: وليش نسيبهم مايسافر وياهم
خليفة: ابوه ماطاع عسب الشغل.. ولا الود وده يخاويهم
علياء: يعني قوم عمي بيسافرون هالسنه؟
خليفة: هيه.. يوم الاثنين
علياء: يا حظهم... احيدنا كل سنه نسافر وياهم.. هالصيف بموت من الملل دون بنات عمي و خاصة عذوب
الهنوف حست انه طلاقها هو السبب... حتى لو العلاقه بينهم و بين قوم عمهم تحسنت بس بعد بيتم شي منكسر في علاقتهم
خليفة: ترى عمي يقول انه حجزلنا وياهم
علياء ( وهي مستانسه): والله
خليفة: هيه
الهنوف: وانت ناوي تسافر وياهم
خليفة: والله مادري... عمي ما عطاني فرصه ارمس
الهنوف: اذا بغيت تسافر خذ علايه وياك...و انا بتم هني و يا اميه و عيالي
خليفة: بس عمي ملزم كلنا نسافر
الهنوف: انت تدري اني مابغي اسافر و... و عمر وياهم
خليفة: عمر ما بيسافر وياهم
الهنوف: خليفة ارجوك... مابغي اسبب أي مشكله بينهم...
خليفة: انتي مالج خص... امبونه عمر ما يحب يسافر وياهم..
الهنوف: مادري
علياء: يالله عاد... قولي هيه و خلينا نستانس.. لين متى بتمين تحاتين عمر
الهنوف: ماحاتيه...انا احاول اجنبه
خليفة: اذا ماطعتي تسافرين ترى محد بيسافر...ماروم اخليج روحج هني مع اميه
علياء: انتي فكري اول شي.. و بعدين منها يستانسون عيالج.. حليلهم من متى ماظهروا
الهنوف: بفكر..