<DIV id=post_message_3653537 align=center>
في نفس الليله وفي بيت بومحمد .. ام محمد وبومحمد سوالف وضحك ..
ام محمد: بومحمد يالغالي ..
بومحمد: عونه .. يابعد كلي ..
ام محمد: ماتحس ان خالد تأخر على العرس ..
بومحمد: خالد يا ام محمد هيمان
ام محمد: كيف بعد هيمان؟
بومحمد: يعني ولدج يحب ...
ام محمد: الله واكبر .. ومنو ياللي يحبها ؟
بومحمد: اموت واعرف منو هاذي ؟ ؟ خالد محد فاهمه الا انا ..
ام محمد: من شابه اباه فما ظلم .. ما راح بعيد طالع عليك .. كيف مابتعرفه عدل
بومحمد: بس لو اعرف منو هاذي؟
ام محمد تضحك عليه: ههههههه وانا اقول فارس ولد اخوك على منو ظاهر فضولي
بومحمد يمسك ايدها ويبوسها: هههههههه الله لا يحرمني هالصوت والشوف يالغاليه
ام محمد: ويحفظك لنا الغالي ..
" بحلم بيك ان بحلم بيك .. وبأشواقي مستنيك .. وان ما سألتش فيا يبقى كفايه عليه .. "
.: ........... حشى سندرتونا .. بندوا هالازعاج نبي انام
جابر: هدي هدي علوه .. اشعليه معصب ؟
علي: طفروا بنا .. شو هالناس ما تنام .. حشى غثونا ..
جابر: ماعليك منهم .. اصبر شوي وباسكتهم لك سنه كامله
علي باستغراب: شو ناوي تسوي ؟
جابر يضحك: بافجر نفسي بينهم خخخخخخخ
علي: يالعبيط هههههههههه
جابر: اعرف لي ضابط في الشرطه .. باخليه يسنعهم لك
علي: صج والله .. تسوي خير
جابر: ولو كم علوه عندنا هههههه
علي: زين عيل انتظر الهدوء
جابر: فالك طيب علووووه
علي هاي اخر سنه له او بالاحرى اخر كورس له وبيرجع بين اهله واحبابه وعلي يكره الازعاج يبي ينام شوي ويريح عشان يسعد للدراسه بس مو قادر من الازعاج .. قرر يفضفض لاخوه خالد ..
علي: السلام عليكم . ..
خالد: عليكم السلام .. هلا والله
علي: اهلين ... شو الاخبار؟
خالد: الحمدلله طيبيين انت شو مسوي ؟
علي: تمام التمام ..
خالد: خلاص بدى العد التنازلي ...
علي: اي والله .. ماتصدق شلون فرحان اخيرا برجع لكم و وسطكم ..
خالد: الكل يعد لك يا علوه وخاصه امي لو تشوفها وحليلها فاقدتك ..
علي: فديت قلبها الغاليه شواخبارها واخبار ابوي ؟
خالد: الحمدلله كلنا بخير بس انت اللي ناقصنا
علي وخانقته العبره: قريب انشالله .. قريب
خالد حاس بحزن اخوه: علوه شخبار الجو عندكم ؟
علي: والله ازعاج .. اسمع اسمع .. سكت علي وخالد سمع الحشره اللي عند اخوه
خالد يضحك: وانت هاي حالتك ..
علي: شاسوي بعد .. تعرفني ماحب الازعاج ... زين عيل ماطول عليك بروح ارتاح شوي عشان اقووم ادرس بعدين ..
خالد: خلاص عيل موفق فديتك .. سلم لي على جبور الدب ..
علي: ههههههه يبلغ انشالله .. وسلم على الاهل .. انشالله بعد الامتحان باتصل فيهم
خالد اوكي ... الله يحفظك
علي: مع السلامه
"مهما بعدنا انت ساكن وريدي ... انت حبيبي وانت بالروح روحي"
آه لو تدرين حبج في قلبي من سنين ... شفتج وقلبي نبهني لج مشيتج .. ابتسامتج .. دلعج .. آه يا ربي على الدلع كل شي حلو فيها .. احبج يا حبيبي ياربي متى بتكونين ام عيالي يلا ابي اصير بابا وانتي ماما هههههههه يا بعد عمري تسلم لي هالضحكه .... اصحى يا نايم .. شو هالتفكير اعوذ بالله من الشيطان الرجيم ...
قام يوسف العاشق من مكانه ونزل عند خواته .. معروف عن يوسف انه انسان هادي ويحب خواته وايد ..
بتكلم الحين عن عائلة يوسف واللي تتكون من ..
الجوهره اكبرهم 26 سنه .. مدرسة لغه عربيه
يوسف 24 سنه .. يشتغل ويدرس في نفس الوقت " مكافح "
هنادي 20 سنه .. اصغرهم تدرس بالجامعه
من بعد وفاة امهم وابوهم وهم في سن المراهقه اهتمت الجوهره بيوسف وهنادي واهتمت فيهم وقامت بدور الام والاب عشان تملي الفراغ اللي بحياتهم قد ماتقدر .. لما توفى ابوهم كانت الجوهره ثانويه عامه كان المرحوم مريض بالسرطان .. وامها ماستحملت فراق ابوهم وتوفت بعده بسنه .. من بعد وفاة والدينهم محد من اهلهم سأل عنهم والكل اكل حقهم .. وابوهم على حياته كان يملك دكان صغير واعمامهم تهاوشوا على هالدكان وخذوه منهم وعاشوا الاخوان الثلاثه على راتب التقاعد حق ابوهم .. الجوهره كافحت عشان اخوانها وسعادتهم تخلت عن طموحها وتخصصت لغه عربيه وتخرجت بسرعه لان ما هان عليها ان اخوانها يحسون بان غيرهم احسن منهم او ان احد يعايرهم بالفقر ..
اما العاشق يوسف .. خلص اثانويه والله وفقه واشتغل وقدر يوفق بين الشغل والدراسه .. اما هنادي فالجوهره ويوسف وفروا لها كل اللي تبيه باللي يقدرون عليه عشان تحقق طموحها وهم يشوفون طموحاتهم فيها ....
يوسف: السلام عليكم ..
هنادي: عليكم السلام .. شخبارك يوسف ؟
يوسف يتنهد: آآآآه .. الحمدلله .. انتي شلون امورج ؟
هنادي: سمالله عليك ... شفيك تعبان ؟
يوسف: لا بس افكر في الدراسه
هنادي: وش فيها ؟
يوسف: ما بقى لي الا سنه وبخلص .. واحسها هم .. طويله سنه اففففف
هنادي: بعد شتسوي يلا شد حيل انت قدها يا بوخليفه ..
يوسف: تحسفت اني خذت الجامعه على راحتي .. ليتني خلصتها بسرعه
هنادي: لا تتحسف ايش وراك ؟ لا مره ولاعيال تشيل همهم ..
يوسف " لو تدرين ان المره هي كل همي": الله كريم
تدخل عليهم الجوهره: السلام عليكم
هنادي + يوسف: وعليكم السلام..
الجوهره بتعب: جوعاااانه
يوسف يضحك: هههههههه شدعوه عايشه في مجاعه ..
الجوهره: تعبت اليوم وايد .. البنات طلعوا عيوني ..
هنادي: زين قومي بدلي وصلي على ماتجهز الخدامه الغدا
الجوهره: بطيررررررررر
هنادي + يوسف: ههههههههههههههههههههه
غسلت ويها وتمت اطالع انعكاس صورتها في المرايه وقطرات الماي تنساب ببطئ على ويها .. اختلطت دموعها مع قطرات الماي .. وانفجرت تبكي بحرقه .. آآه يمه .. يبه والله وحشتوني حياتي ضاعت من ايديني بدونكم الدنيا ماتسوى .. تعبت وانا اخفي دموعي عن يوسف وهنادي مابيهم يحسون بضعفي .. ياربي سامحني ماعترض على حكمك يارب تساعدني ..
بعد ماعاتبت نفسها نزلت تتغدا مع يوسف وهنادي .. واخوانها عمرهم ماحسوا بضعف الجوهره وهي دومها تضحك ومفرفشه جدامهم بس قلبها بحر من الاحزان والهموم ...
............:: السلام عليكم
الجوهره: هلا وغلا ... عليكم السلام
.: .......... فديت هالصوت
الجوهره منحرجه: : ................
...........: وبعد فديت اللي يستحون
الجوهره: وحشتني الغالي
...........: ياربي فديت الغزل .. فديت قلبج ياحياتي ..
الجوهره منحرجه: شخبارك؟
...........: الحمدلله الحين اكتملت فرحتي
الجوهره: فديت قلبك .. مادري شلون كنت بعيش من دونك يا ابراهيم محد مصبرني الا انت ..
ابراهيم وماخذ نفس عميق من فرحته بكلامها: آه ياعمري يالجوهره .. والله انج جوهره
الجوهره: زين ياعيوني قولي شلون كان يومك ؟
ابراهيم: يا قلبي انتي .. اليوم كان عندنا اجتماع ملل حده . والله كنت على وشك اغمض عيوني .. بس ربج ستر
الجوهره ميته من الضحك: ههههههههه عليك سوالف ..
ابراهيم: فديت هالضحكه يعلها دووم ..
الجوهره: الله يحفظك لي يا ابراهيم
ابراهيم: جوهرتي ممكن سؤال فديت قلبج؟
الجوهره: عيون الجوره .. اسأل يا بعد كلي ..
ابراهيم بتردد: حياتي جوهرتي .. لين متى بنتم على هالحال ؟ حياتي ابغي اكون قريب منج .. ابيج حلالي انتي تعرفين احساسي بالذنب لاني اكلمج بالتلفون
الجوهره ودموعها على خدها: يا ابراهيم انت تدري بظروفي.. يعني ....
يقطع كلامها ابراهيم: جوهرتي .. ارجوج ماعدت اتحمل اكثر .. ابيج والله ابيج ..
الجوهره تبكي بصوت عالي: والله يا ابراهيم اني بعد ابيك ... وتسكت وصياحها ضايق ابراهيم ... وتكمل الجوهره: مالومك صابر علي من 8 سنين قبل لايتوفى ابوي كنت تبي تكلمه .. والله خذ امانته .. صبرت وقلت بتكلم امي والله خذ امانته .. ياربي ارحمني .. وتمت الجوهره تصح وتصيح .. وابراهيم تضايق ولام نفسه .. مايحب يزعل حب حياته جوهرته
ابراهيم: حياتي ... انا اسف ماكنت اقصد ..
الجوهره: لين متى بتم تلوم نفسك يا ابراهيم .. لا تتاسف انا اللي اسفه
ابراهيم وصوته متغير: يا بعد كلي انتي .. حبيبتي انا تحت امرج .. انا كلي لج ...
الجوهره: ابراهيم حياتي
ابراهيم: يالبيه هالصوت .. آمريني
الجوهره: ادري اني انانيه .. وما افكر الا في نفسي اسفه .. انا كنت افكر في ....
قاطعها ابراهيم: حياتي انتي مو انانيه .انتي عمري وحياتي وروحي .. وكلام ابراهيم فرح الجوهره ونساها دموعها
الجوهره: الله لايحرمني منك يالغالي
ابراهيم: فديت قلبج.. حياتي الحين ابغي اريح شوي وقعديني لصلاة العصر
الجوهر: انشالله من عيوني يا حياتي ..
في ميلس الشباب في بيت بوفارس .. والشباب مجتمعين وسوالف وضحك ولعب و وناسه .. دخل عليهم احمد بن راشد ...
احمد: السلام عليكم
الشباب: عليكم السلااااااااام
احمد: كيف حالكم يالربع .. ؟
فارس: هلا والله باحمد .. بوراشد .. اخبارنا اخبار الخير .. وانت شو مسوي ؟
احمد مبتسم: الحمدلله ننشد عنكم ...
عبدالعزيز: شو اخبارك بوراشد؟
احمد: يسرك الحال يالغالي .. خالد .. وينك ماتبين .. ؟
خالد: موجودين .. بس الدنيا شاغلتنا ..
احمد: وش هالدنيا اللي شاغلتك ؟
خالد بارتباك: ممممممم تدري مشاغل ومشاريع ..
احمد: هههههه اللي يسمعك يقول راعي حلال .. كلها الا كم محل
خالد بابتسامه مصطنعه: هههه على قولتك
فارس: تقهوى يابوراشد ... انت مو غريب
احمد مد ايده: ماتقصر .. في عرسك يا فارس
فارس: تسلم الغالي
احمد خذ فارس على جنب وكلمه ... وكان جنبهم خالد بس مشغول بجواله
احمد: فارس بغيتك في سالفه ..
فارس: آمرني يا بوراشد ..
احمد: ما يامرعيلك عدو .. بس بغيت اعرس .. وماراح القى احسن منكم يا فارس ..
فارس منحرج اول مره ينحط في مثل هالموقف: والله يا احمد هاي الساعه المباركه .. بس لازم اشاور الاهل ..
في نفس الوقت خالد سمع الكلام اللي دار بين احمد وفارس وانغص غصه وتم يكح ...
خالد: كح كح كح كح
فارس التفت على خالد: سمالله عليك بو وليد .. هاتوا الماي ... شرب خالد الماي وطلع عنهم من غير ما يتكلم ..
فارس: خالد .. خالد
محمد شاف خالد وهو طالع واستغرب منه ناداه ومارد عليه
محمد: هلا فارس ... شو فيه خالد ؟
فارس: مادري والله .. غص وشرب ماي وطلع ..
محمد باستغراب: غريبه ... وشاف احمد بن راشد وسلم عليه
محمد: هلا والله باحمد شحالك؟
احمد: الله يسلمك في هالدنيا وانت شحالك يا بونايف؟
محمد: الحمدلله
احمد: الا بونايف كم عمرك اليوم؟
محمد: اليوم الله يسلمك كملت 18 سنه ... والله العمر يركض ولانحس به ..
احمد ميت من الضحك: ههههههههه الله يقطع سوالفك حمودي...
محمد: شو حمودي ؟! ياهل انا ؟
احمد: توك 18 سنه .. خل اعيشك الحلم اللي للحين ماقمت منه
فارس: هههاااااي .. حلوه يا بوراشد كثر منها ...
محمد: احلفوا انتوا بس ...
فارس + احمد: ههههههه والله ههههههه
عبدالعزيز بعبط: حدكم عن ولد عمي حمودي هههههههههه
محمد: لا والله .. بوالزوز ... ليكون انت اللي " سكت دهراً ونطق كفراً " يا حالتك
وتموا الشباب يسولفون .. ويضحكون لين وقت متأخر من الليل ...
اما خالد المجروح من سمع كلام احمد وحاس نفسه مخنوق .. ماعرف وين يروح تم يحوط بسيارته كل الشوارع ... يمشي من غير ما يحس بنفسه .. وعى ولقى نفسه والظلمه من حوله .. وقف السياره وغمض عيونه فتره ولما فتحها الا يشوف ضلال شخص واقف عند دريشة السياره استغرب وفتح دريشة السياره
خالد: السلام عليكم ..
.......: ....................
خالد استغرب: منو معاي .. الاخ مضيع ... وفجأه اختفى الشخص ... خالد حس بخوف ... ماكانت ملامح الشخص واضحه .. كان نفس الضلال ... وخالد ماقدر يميز لو كان الشخص الواقف بنت او ولد ؟؟ رفع الدريشه وحرك عشان يرجع البيت .. وهو يمشي شاف نار كبيره من بعيد قرب منها وشاف ناس ترقص وتصفق وتغني حول النار فتح الدريشه وفجأه اختفوا الا النار تمت .. وشاف نفس الضلال اللي كان عند الدريشه يتقرب منه لين بانت ملامحه واضحه انبهر خالد باللي شافه بنت جميله بيضه وشعرها اسود ليلي عمره ما شاف بهالجمال .. شعرها الليلي الاسود نازل على ويهها ويها ابيض مثل بياض الثلج صافي .. عيونها بارزه ورموشها محليتها .. خشمها دقيق وشفايفها ورديه مرسومه ومليانه .. قربت البنت وخالد يتاملها مدت ايدها من الدريشه .. استغرب خالد وسألها
خالد: من انتي ؟ !؟؟
البنت: .................
خالد: انتي من الانس ولا الجن .. ؟؟؟
البنت ضحكت ضحكه خفيفه يادوب تنسمع: ههههههه
خالد: ليش تضحكين؟
البنت بصوت ناعم وخفيف: تعال معاي
خالد: وين؟!
البنت: تعال وبتعرف
خالد: انتي من؟! توهتيني ... !!
البنت: خالد .. تعال معاي ..
خالد باستغراب: شلون عرفتي اسمي ؟؟ !! تكلمي .. انتي من ؟؟
البنت: ارجوك تعال يا خالد ..
خالد بينه وبين نفسه عرف انها جنيه: اعوذ بالله من الشيطان الرجيم ...
قامت تصرخ بصوت عالي هز الارض من قوته .. ومسكت ايد خالد بقوه وقالت له : اقولك تعال معاي .. خالد خاف وحاول انه يبطل ايده منها وماقدر .. كانت بقوة ريال وتعوذ من الشيطان مره ثانيه وهي صرخت بصوت اعلى وفجأه قام خالد من النوم .. لقى نفسه نايم في السياره وفي نفس المكان اللي لقى فيه البنت والنار ... استغرب خالد هل كان يحلم او لا .. شاف ايده ولقى جروح والدم ينزل منه بكثافه " شو سوت بإيدي هاذي " مسح الدم من ايده وحس ببروده في ويهه بس شغل السياره وحس بشعور مختلط شي من الخوف وشي من الحيره .. وطلع من المنطقه النائيه اللي ما يعرف كيف وصلها .. وهو يمشي في الشارع المظلم على نهاية المنطقه شاف نفس البنت واقفه على الرصيف واطالعه وعيونها مليانه دموع وحزينه .. وسمع صوتها في راسه يقول له " تعال خالد .. تعال .. " مر من صوبها وعيونه في عيونها ... كمل دربه لين وصل البيت .. كانت الساعه 3 ونص وقريب بيأذن الفجر نزل من السياره وراح غرفته وخذ له شور دافي بس حس بحرقه في ايده من الجروح وبحرقه خفيفه في ويهه بس ماهتم ... ماقدر يستحمل الالم اللي بإيده وراح غرفة ريم عشان تداوي جروح ايده..
ياترى من البنت اللي طلعت لخالد ؟؟
واحمد صديقهم من بيتزوج ؟؟؟
كل هذا راح تعرفونه في الجزء الجديد انتظروني