[الغزااالة]

لاحبيبتي مااتغلى عليكم بس اشوي كان عندي ظروف والحين انكمل لكم :char0248 سمعوا معاي باقي التطورات ........

الجزء السابع عشر


-------------------------

اليوم: الخميس...

المكان: في المستشفى..

الوقت: التاسعه مساءا..

--------------------------

(سهيل)....



وقفت اتريا وصول راشد وعبدالله صوبنا وانا قلبي مب متحمل اللي عرفته توني....

عالاقل قبل ما اسال كان عندي امل... بس الحين خلاص...مالي حق افكر فيها او احبها... تصنعت ابتسامه لراشد وعبدالله وسلمنا عليهم...

سهيل: الحمد لله عالسلامه ياعبدالله...ماتستاهل والله..

عبدالله: الله يسلمك ياربي.. هااا بشروني عن فطيم.؟

شيخه: من نص ساعه مدخلينها داخل...بعدهم شوي.

قال عبدالله بملامح قلق...

عبدالله: تعبانه.؟؟

ابتسمت شيخه تحاول تخفف عليه...وانا اراقب وقلبي يحترق...

شيخه: شويه..لا تخاف عليها ان شاء الله بتقوم بالسلامه... بخبر امايه انكم وصلتوا...

تحركت شيخه وانا مازلت اراقبها...فجاه طاحت عيني بعينها...مادري شو اللي شافته فملامح ويهي..!!..

لكن الي شافته خلى ويهها يحمر وتتوتر...

دخلت شيخه الغرفه اما انا فما قدرت اقعد اكثر... استسمحت منهم وانسحبت وقلت لهم اني بييهم عقب اطمن... او بتصل...

طلعت من المستشفى وسحبت الهوا لصدري...عل وعسى اهدى شوي...رفعت ايدي ليبهتي وفركتها بتوتر...

الوقت ماكان مناسب...

اناغبي....ماكان مناسب ابدا...

ركبت سيارتي وحركتها..وبدون حاسية مني توجهت للسينما... وحضرت حيالله فلم ولا اندمجت فيه بعد ولا فهمت شي منه...بس كنت مسكر تيلفوني ..ماريد اشوف حد احين ولا اريد اكلم حد...ابا اتم بروحي...

يمكن شيخه ماكانت تعني السكوت...!!..

يمكن احرجتها وماحصلت فرصه تتكلم بسبب وصول راشد ونسيبه..!!

يمكن ويمكن....

بس كيف بتاكد...مستحيل اسالها مره ثانيه مالي ويه الا جان هي رمستني بالسالفه بروحها...

ومااعتقد ان أي بنت لها الجرأة تتكلم بموضوع مثل هذا...!!..

عقدت حياتي...لا تحط امل ياسهيل...لا تبني امل من اول ويديد...

طلعت من الفلم وكانت الساعه حوالي الـ11 ونص تقريبا...

فتحت تيلفوني واتصلت براشد....وارتحت شوي يوم اطمنت على فاطمه اللي يابت ولد ثاني وماسمووه لين الحين...وهي بخير وماعليها شر...

رجعت البيت وصادف وصولي مع وصول سيف مع جمال اللي مادري وين كانوا مرتغدين...

سلمت على جمال وترييته يسير بيتهم... ودخلنا انا وسيف البيت...

سهيل: وين كنت.؟

سيف: كنا في دبي وتونا واصلين...

سهيل: شو تسوون في دبي.؟؟

التفت لي سيف بنظره استفهام..

سيف: ليش تسالني.؟؟...انا ريال مب ياهل تسالوني وين كنت وشو سويت...!!

سكت واطالعت سيف ببرود ... كان مجرد سؤال مب تحقيق..ليش ياخذ هالموقف الدفاعي ..!!!... حطيت ايدي على صدره ابعده عن طريجي وقلت له ببرود..

سهيل: وريحة الزقاره بعدها فيك...

بعدته عن طريجي ودخلت البيت وحسيته يمشي من وراي وهو ساكت...ركبت فوق ولاحظت ليت حجرة مهرة مازال مبطل...دقيت الباب ودخلت وحصلتها يالسه عالكمبيوتر اليديد...

سهيل: شو تسوين.؟

مهرة: العب..

تقربت منها وشفتها تلعب ورقه...!!...

سهيل: بنت خالتج ربت اليوم...

رفعت نظرها لي متفاجاه...

مهرة: والله..؟؟؟...فاطمه؟...شو يااابت؟

سهيل: يابت ولد...وماسمووه لين الحين...

مهرة: وهي شو حالها بخير..

سهيل: هي بخير...المهم بسج من اللعب ورقدي..

مهرة: اوكي...

خليتها وطلعت من حجرتها ودخلت حجرتي....تسبحت بماي بارد وطولت هالمره بالسبوح لاني كنت اسرح واااايد...افكر بشيخه.... وملامح الخجل الاخيره اللي طلعت على ويهها...!!!...



--------------------------

اليوم: الجمعه....

المكان: بيت سلطان..

الوقت: الواحدة ظهرا..

--------------------------

(يوسف)...



دخلت البيت معاي ناصر ومحمد وابويه...راجعين من صلاة الجمعه....وشفنا امي طالعه من حجرتها ...

اول ماشافتني بركب حجرتي قالت لي..

ام محمد: ابويه يوسف...ازقر لي منى بالله عليك...منزربه فوق من اصبحت مادري شو تسوي...

يوسف: ان شاء الله..

ركبت فوق ومريت على حجرة منى اللي كان بابها مفتوح..وسمعتها تتكركر...دخلت الحجره ووايقت عليها وعلامه استفهام على ويهي...

حصلتها يالسه عالكمبيوتر واطقطق...

يوسف: شو تسوين.؟؟...

منى: اكلم ربعي...

يوسف: نزلي امي تباج...

منى: الحين..؟

حسيت بدافع مفاجئ وبفكره خبيثه يخليني اطلعها من الحجره احين..

يوسف: هي الحين الحين تباج سيريلها...

منى: اوكي..

طقطت منى شوي وانا سويت عمري بروح حجرتي ويوم شفتها تركظ وتنزل الطابق التحتي..ركظت انا للكمبيوتر مالها...

ورفعت المحادثات اشوف منو تكلم... فعلا كلهن بنات...وحده منهن اكتشفت انها كنه... ماكان عندي وقت اقرا شو كاتبات لكني سحبت قلم من مكتب منى ونقلت ايميلها على ورقه وخشيتها فمخباي...رجعت كل شي مكانه وطلعت من الحجره ودخلت حجرتي... حطيت الورقه في المكتب لين ما اشوف كيف بتصرف معاها عقب...

بصراحه مادري ليش خذته...بس حسيت اني بحتاجه...

شغلت كمبيوتري والشامل...

ويوم شيكت ايميلي تلقيت مفاجاه ....

كانت رساله من وضحه فيها ثلاث سطور....ثلاث سطور..لكنها زلزلت كل خلية فيني..

كانت تقولي بانه مشاكل صارت بين عمامها عسب الخطبه وموعد العرس ..واحتمال الخطبه تنفج... كانت تطلب مني اتدعى بانها تتحرر من هالالتزام عشان نرجع لبعض...!!!!...



نرجع لبعض.؟... الحين عاد...!!..



قلبي كان يدق بالقو وبفرح.... لكن عقلي رافض الفكره... وصارت بينهم حرب شرسه...

فاز فيها العقل...

انا عودت نفسي على خساره وضحه...كيف ارجع مره ثانيه..؟؟... اذا رجعنا مره ثانيه لبعض هالقصة بتكرر مرتين وثلاث وانا ما اتحمل اكثر صدمات...

لا... رغم اني اتمنى من كل قلبي نرجع لورا اسبوعين بس.... لكن ناصر معاه حق ...البدايه غلط...والحب هذا بكبره غلط...

اسمحيلي ياوضحه.... لكن ان شاء الله ماتنفج خطبتج... اذا كان هذا نصيبج... لانه نصيبج مب معاي...



تميت مسنتر عالشاشه اطالع فيها بدون ما اطالعها فعلا....افكر بحياة وضحه المضطربه والمتوتره الحين...

وتذكرت كيف انها تحب تعيش بروتين غير عن الناس...ماتحب شي يتغير عليها...اذا كانت مبسوطه من وضع تحبه يستمر على طول...بدون ملل...!!..اكيد انها مب مرتاحه حاليا...وعايشه بترقب وقلق...

حسيت بحد يدخل حجرتي ..رفعت نظري وكانت منى...

منى: يوسف تعال تغدى...

يوسف: اوكي...

طلعت منى من حجرتي وراحت لحجرتها اما انا فخليت الكمبيوتر شغال عشان ارجع له بعد الغدا..ونزلت تحت...

-----------------------

اليوم: الجمعه...

المكان: سيارة ناصر...

الوقت: الخامسة عصرا...

-----------------------

(ناصر)....



كلت حبة باندوول وشربت ماي...عل وعسى يخف الصداع اللي سببه الحلم اللي حلمته...او بالاحرى الكابوس...

شليت شنطتي ونزلت تحت اسلم على امايه واروح بوظبي...



وانا في الخط...هزيت راسي والذكرى تهاجمني من اول ويديد....ماكفى الحلم..!!..

كان حلمي عباره عن استرجاع للموقف... لكن الاصوات كانت اعلى... والحركات كانت اعنف... وصوتها وهي تقولي "الله يخليك..ابوس ايدك"... يتكرر صداه في عقلي بقوو...

مسكت السكان بقو لين مابيضن صبوعي.... يوم عن يووم يزيد تفكيري وهوسي بهالبنت... احس اني لازم اشوفها... لازم اكلمها... بس هالشي مستحيل...

لكني اعرف فقراره نفسي باني مابقدر اتخطى هالازمه الا اذا شرحت لها كل شي واستسمحت منها....بس كيف.؟؟..



مستحيل... مستحيل...المفروض مافكر في هالشي اصلا.... لانه مافي ولا طريقه.. اقدر فيها اكلمها بدون حضور اهلها بدون ما افضح نفسي... وافضحها هي وياي ...

بعدين مافي مجال تسامحني...واذا كانت ماخبرت حد من قبل بتخبر الحين بعد ازدياد جرأتي...

ياربي شو اسوي...ابا انسى...ساعدني..

ابا شي يشغل حياتي...

شي يشغل بالي.... يشغل اوقاتي... عرس لا تفكرون...مب معرس الا يوم تعرس نوره النحسه...يارب ارزقها بريال يفكني منها وخلها تعرس سرعه...

رجعت افكاري للمره الالف للبنت....

على طاري الزواج... خوفي ان البنت تعقدت من اللي سويته فيها وبترفض أي شخص اييها...اخافها تتحسب الرياييل واحد وتحلف ماتعرس...!!..

آآآآآخ ياربي انا شو سوييييت...!!!..

وصلت بوظبي بعد المغرب بشوي ... فتحت الدرايش في شقتي عشان تتهوى شوي... وبدلت ثيابي ولبست لبس الرياضه واتصلت بعبدالعزيز على طول...

وصادف ان الريال بعده مارجع من خورفكان هو واهله...بالتالي ركضت بروحي اليوم... ومازال ويه البنت عالق فبالي... لا ...انا مابقدر اتحمل اكثر...لازم اشوفها لازم...

لازم اشوف لي حل ...

بعد ساعه الا عشر دقايق رجعت لسيارتي ووقفت مكاني وانا اشوف حد واقف عدالها..يوم تقربت ميزته...

حميد..!!!..

ابتسمت وتقربت منه...

ناصر: مرحباااااااااا الساع....مفاجاه بصراحه...

ابتسم لي حميد وسلمت عليه...

حميد: شفت سيارتك واقفه ...اتصلت بك مغلق...قلت بترياك عدالها بسلم عليك...شحالك؟

ناصر: والله الحمد لله ...ماشي الحال...سيارتك وين؟

حميد: وقفتها هناك...ليش؟

ناصر: بنتعشى رباعه...الحقني الشقه...

حميد: ماعندي مانع...

ركبت سيارتي وخطفت عالمطعم اللبناني وطلبت مشاوي ومحاشي وكوكتيل وخذتهم وياي الشقه...

دخلنا انا وحميد اللي كان متعود على شقتي ويعتبرها بيته الثاني على قولته...

عطيته كيسه العشا..وقلت له..

ناصر: اندوك رتب العشا وانا بتسبح خمس دقايق بس..

حميد: بشكار ابوك انا...

ناصر: هههههههههههه محشوم... يالله عالمطبخ اشوف..

ظحك حميد وراح المطبخ وانا دخلت الحمام وتسبحت عالسريع...لبست ثيابي وطلعت لحميد اللي كان يالس في الصالة والعشا جدامه عالارض...

يلست عداله وانا ابتسم..

ناصر: هااااااه...شو لعلووووم...؟ واخبارهم الربع...

حميد: مثل ماتحيدهم...والله العلوم عندك...

ناصر: ماعندي انا علوم... عندي جغرافيا جان تبا...

حميد: هههههههه..لا صدق...صدق اللي سمعناه من عبدالله؟..

ناصر: حسب اللي قالكم اياه عبدالله...

حميد: يقول انك بتودر الشله خلاص....

ناصر: لا...غلط... السالفه ومافيها ياخوي اني قررت التزم خلاص واتوب... وقلت لعبدالله اذا ما ابتعدتوا عن هالشغلات البطاله وياي بضطر اني انا ابتعد عنكم عشان ابتعد عن هالملذات وما ارجع لذاك الدرب... والا بالله عليك حد يبغي يخسر ربعه.؟؟...

سكت عني حميد....بعدها قال لي ببطء..

حميد: اهنيك بصراحه... وتبا الصدق انا من زمان احس بتانيب الضمير من هالشغلات اللي نسويها...كنت افكر اني ابتعد بس ماكانت عندي شجاعه كافيه...كنت ابا حد يشجعني...

فرحت...

من خاطري فرحت... توبتي انا شجعت شخص ثاني عالهداية بعد..!!.. اجرها كبير عن رب العالمين...

ناصر: والله حميد..؟؟... فرحتني...صدقني بتحس براحه مابعدها راحه...

حميد: انا متاكد من هالشي...كنت اتريا الفرصه بس.. بس عندي سؤال اجاوبني بصراحه؟

ناصر: اكيد..

حميد: لكل توبه مفاجأة سبب....شو اللي خلاك اتوب فجاه.؟..وشو هاي الظربه على راسك.؟؟..

سكت..وتوترت..ماعرفت اقوله او لا...بس انا اثق في حميد ..وفي نفس الوقت احس نفسي ابا اتكلم مع حد بخصوصها...هاي البنت اللي شاغله بالي ليل نهار...كانها تنتقم مني عاللي سويته فيها....

ناصر: لازم.؟

حميد: اذا كنت تثق فيني كفايه...احب اعرف...

ناصر: توعدني ماتخبر حد..

حميد: وعد شرف...

ناصر: هممم... حميد...انا...غلطت..تحرشت في بنت...!

كان على ويه حميد الجمود ومب متاثر باللي قلته...يترياني اكمل ...ويو ماكملت سالني وهو يرفع كتوفه..

حميد: شو يعني؟ مب اول مره...!!



فهمني غلط..!!!..



ناصر: لا حميد مب مغازل... تحرشت فيها..والبنت هذي..بنت عرب.. معارف ابويه...واخوها العود ربيع اخويه محمد... تحرشت فيها يعني مسكتها وقربتها مني وكشفت غشوتها...وزين اني انتبهت لنفسي والا الله اعلم شو بيصير...!!!..



بطل حميد عيونه يطالعني برعب...

حميد: لا...لا ناصر شو سويت الله ياخذ بليسك...شو ياك عليها ..ليش جي سويت..؟؟

هزيت راسي متوتر انا بعد..

ناصر: كنت مظارب ويا ابويه وطلعت من البيت معصب وفي الطريج شربت خمر...وتخيل انته الباقي..

حميد: حسبي الله على بليسك...واهلها وين عنك؟؟

ناصر: كانت بروحها في البيت وقربت بي في الميلس وجدمت لي الفواله.... آآآخ ياحميد.... لو تشوفها.. كانت ايدها مكسوره... وبنية جسمها ضعيفة وصغيره...شكلها جي في المدرسه...ماعندها ابدا خبره..والا كيف ادخلني وهي اروحها في البيت..!!!..وانا شوف شو سويت فيها...



سكت عني حميد وهو يهز راسه باسف ويحاول يتخيل الموقف...



ناصر: ترجتني البنت اني اخليها وماسويبها شي...وصوتها الحمد لله وصل لعقلي في الوقت المناسب وفجيتها... ويوم طلعت من بيتهم سرت البر بدون ماحس.. وكسرت غرشه الخمر عالشارع...ويوم كنت برجع للطريج انجلبت بي السياره وصار لي اللي تشوفه في راسي...



رفع حميد نظره لي متفاجئ من هالخبر اليديد...

حميد: انجلبت بك السياره بعد..؟

ناصر: ماياني شي انا بخير..

حميد: الحمد لله عالسلامه ..

ناصر: الله يسلمك...شفت كيف ياحميد...الله مايضرب بعصا... وعقب كل هذا ماتباني اتوب..!!!

رجع حميد يهز راسه باسف...

حميد: والله اني مب قادر اتخيل اللي سويته...وماصار شي عقبها؟

هزيت راسي بالنفي...

ناصر: انا ساكت وهي الظاهر ساكته... واللي معور قلبي ياحميد اني بعدها بيومين جي اضطريت اروح بيتهم انا ويوسف اخويه مره ثانيه وتغدينا هناك..وتعرفت على خوانها وابوها... ناس حشام والله وشوف انا شو سويت... وامس بالذات مصلي ويا ابوها الظهر... والاسبوع اللي طاف تلاقيت ويا اخوها وولد خالتها في العين مول...يعني شوف وين ماسير احصلهم جدامي يعني مافي مجال انسى او حتى اني اتناسى...



حميد: وشو بتسوي احين..؟؟

سكت عنه شوي وعقب قلت باندفاع...

ناصر: ابا اشوفها...

حميد: شوووووووووووووه..؟؟؟..تخبلت انته...

ناصر: هي تخبلت... حميد مب قادر اشلها عن بالي ليل نهار صورتها تلاحقني...احس اني لازم اشوفها..

حميد: شو تبابها تشوفها شو بتقولها..؟؟

ناصر: مادري..

حميد: ناصر..شو انته تحبها والا شي..؟؟

تفاجات من كلمته....شو ياب هذا في هذا...

ناصر: احبها..؟؟؟...متى بواحي احبها ان شاء الله...؟؟..مايخصه الحب في هذا كله...

حميد: عيل شو تبابها تشوفها .؟؟؟

ناصر: قتلك مادري... اصلا مافي مجال اشوفها ولا افكر اني اروح بيتهم مره ثانيه ابدا... هي مجرد رغبه...

حميد: فرضا شفتها وكانت بروحها...شو بتسوي...

فكرت شوي..

ناصر: بشرح لها وضعي وبستسمح منها ولو اني اعرف انها مابتسامحني...

حميد: ناصر..بقولك شي...دامك غلطت عالبنت... ليش ماتصلح غلطك وتخطبها..؟؟

ناصر: تتحسبني مافكرت بهالشي؟..فكرت...بس اهلي مابيطيعون دام بنت عمي مازالت تترياني...وبعدين البنت مابترضى فيني... مش بعد اللي سويته فيها...خلها على الله انته بس...

حميد: الله يعينك...بصراحه مشكله...

ناصر: يعين الجميع...تعال نتعشى عن يبرد العشا...

قمنا انا وحميد وتعشينا وقعدنا نسولف لين 11 في الليل وبعدها استاذن مني وراح...ورحت انا انام...واحلم كوابيس من اول ويديد....

------------------------------

اليوم: الجمعه..

المكان: غرفة شيخه...

الوقت: الثانية عشره مساءا..

------------------------------

(شيخه)...


انسدحت على شبريتي والابتسامه مرسومه على ويهي... اشياء وايد صارت من امس لليوم...

واهمها كلام سهيل.... مادري شو اللي قلبه فوق حدر جي وخلاه يقولي هالكلام وبهالطريقه هذي..!!!..

مب مصدقه انه يبا يخطبني....

مب لاني مب متخيله نفسي كزوجه لسهيل لا بالعكس تخيلت وكذا مره بعد...بس الطريقه اللي قال فيها كلامه حيرتني لانه مب من هالنوع... وماتوقعت انه يبا يعرس ابدا عشان جي شليت من بالي فكره اني اكون لسهيل ويكون لي....

احلام المراهقة اللي كنت احلم بها خلاص اختفت ... كله شليته من بالي بسبب امتناعه هو عن مجرد التفكير بالزواج... ولاني مابغيت انصدم..ماقمت افكر بالعرس انا بعد...

يوم قال كلامه ذاك...انصدمت وبلعت لساني... ماعرفت شو ارد عليه... اصلا ماقدرت افكر لاني انتبهت لراشد وعبدالله...

لكن معقوله يسالني هالسؤال....واضح جدا اني ما اعتبره اخوي... رغم المغايظ والسوالف بس بعد..كيف ماحس..!!!..تفكيري بسهيل مب اخوي ابدا ابدا....

تنهدت وانا افكر فيه يوم زار فاطمه اليوم...كيف طنشني وماالتفت صوبي ابد... اكيد اعتبر سكوتي رفض...بس كيف يتوقع مني افكر برد وانا اشوف اخوي ياي صوبي..؟؟؟؟... اكيد بنجلط وببلع لساني....!!.

اوهووو ياهي سالفه عويصه...برااايه اكيد بيرمس في الموضوع مره ثانيه...او بحاول اوصل له اللي صار بشكل او ثاني...مسكين سهيل..اكيد انصدم...

انجلبت على يمبي وانا اتذكر شي ثاني مضحك...لكني كنت كاتمه ظحكتي لاني ماريد اضحك على ذاك الخسف وعلى حركاته...

الخسف اللي اتكلم عنه كان عمر...اخو عبدالله...اللي يوم سمع خبر ولادة فاطمه يا على جناح السرعه هو واخته ليلى...وصادف اني كنت موجوده..طبعا تميت متغشيه ومتلعوزه ويالسه اخر الغرفه...

وحظرته سلاماته ماتخلص وسوالفه بلا قياس مع حرمه اخوووه... وشفته كذا مره صد صوبي ويتصاصر هو وفطيم علي...بغيت ساعتها انش واروغه من الغرفه...

الحمد لله ان حس على دمه وطلع برا مع قوم راشد...

تذكرت سؤال ليلى الضاحك يوم تقولي لين وين احين شعرج..؟؟

بغيت اروغها ورا اخوها هذي بعد شو يعني يايه تطنز..؟؟.. بس الحمد لله اني افحمتها يوم قتلها شعري لين وين اما هي اكتشفت انها قصت شعرها لين الارداف...يعني شعري انا اطول ياسلاااااااام...

رجعت افكاري بشكل لا ارادي لسهيل.... احاول احلل مشاعري صوبه مب عارفه...

بس انا متاكده انها مب اخويه...

ورقدت وانا مازلت افكر فيه....

-----------------------------------

اليوم: السبت...

المكان: بيت خلفان

الوقت: السابعه والنصف صباحا..

----------------------------------

(مهرة)...



يلست في غرفة الطعام وانا لابسه عباتي وجاهزة.... عمتي المحبة اعلنت انها مافيها توصلني اليوم..وسهيل روح من قبل وشل سيف معاه..وابوي مازال راقد..ماتم عندي غير حمد...

مهرة: يالله عااااد حمد بتاخر والله...

حمد: صبري خلينا نكمل ريوقنا...

مهرة: انته كل يوم ماتتريق شمعنى اليوم...انزين تريق بس بسرعه بليييييييز...

لبسني حمد وتم يتريق وانا اتحرقص مكاني...لين اخيرا خلص وقام يتغسل...ركبت السياره معاه وتوجهنا للجامعه...

نزلت ودخلت الجامعه وانا اضم الدفتر الصغير ..ماكان عندي وقت لين ماتبدا محاضرتي الاولى... طلعت جدولي وقريت اسم المبنى... وتذكرت مكان المبنى هذا يوم رحت استكشف ذاك اليوم...

لكني يوم وصلت له افتر راسي من الصفوف المتشابهه..لكني في النهاية عرفت كلاسي وين ودخلت بتوتر...

ويلست على كرسي فاظي...وبعد دقيقه قعدت عدالي بنت ما اعرفها... وبعد دقيقه ثانيه دخل ريال...او بالاحرى دكتور لابس بدله وله شنب..اووففف...يالله هذا كلاس من اربع كلاسات...ان شاء الله بقية الكلاسات حريم يدرسني..

بدا الدكتور يعرف عن نفسه وعن قوانينه وكيف طريقه تدريسه ووزع علينا اوراق... وقبل مايخلص وقت المحاضره بشوي طلعنا...ميت اغراضي واوراقي وطلعت من الكلاس...

ماعرفت وين ارووح.. فكرت اروح اتريق...

ومشيت بطريجي لين ماوصلت الكافتيريا... كان شوي زحمه وشلل البنات نفسهن في كل صوب...فجاه سمعت حد زقرني..يوم تلفت حصلت عليا وحمده يالسات على زاويه وياشرن لي....

فرحت..سرت صوبهن واناشاقه الحلج..

مهرة: اهليييييييييين انتوا هنيي..

حمده: هي نعم..قربي..شحاااااااااالج؟

مهرة: بخييير شحالكم انتوا..

يلست وياهن وقعدنا نسووولف..

عليا: احين الساعه عشر بنظهر رباعه من هني..عندنا محاضره عربي اظن كلنا مع بعض...

مهرة: هي كلنا رباعه في محاضرة العربي...

حمده: احسن شي عشان ما ارقد...

عليا: هههههههههه يمكن يطلع الاستاذ يظحك ودمه خفيف..

مهرة: ان شاء الله تطلع حرمه..

حمده: لااااااااااااااا دخيلج ماريد حريم..

مهرة: ليش عاد..؟؟

عليا: لاعت جبوودنا من الحريم في المدارس خلونا نغير...

مهرة: بصراحه انا اتمناهن كلهن حريم...

عليا: هههههه مهرة مب مستعدة للتغيير...

مهرة: برتاح اكثر معاهن ...

حمده: بس يقوولون الاساتذه الرياييل يشرحون احسن ومتفهمين اكثر...

عليا: قومن نتريق قومن ماشي وقت...

قمنا نشتري ريوق ورجعنا نتريق... وبعد ماتريقنا وسولفنا سرنا محاضرة العربي اللي كانت فمبنى قريب وبااااااااااااااارد وهالشي عيبني وايد فيه...

لكن اللي شفته في الكلاس ماريح نفسي...البنات الموجودات اغلبهن بناطلين ومب متحجبات...!!!..وشكلهن جي اطباعهن مب مثل اطباعنا...

نحن طنشنا الموضوع وقعدنا مع بعض تقريبا اخر شي...

وصدمتي الثانيه كانت ان الدكتور طلع ريال ومصري.. تم عندي كلاسين وان شاء الله يطلعن حريم... !!!

------------------------------

اليوم: السبت..

المكان: غرفة المستشفى...

الوقت: الخامسة والنصف مساءا..

------------------------------

(راشد)....



انصدمت يوم فتحت باب الحجره وحصلت عيون مهرة مجابلتني...اللي على طول نزلتها عني للارض كاني باكلها...!!!...

كانت يالسه عدال شيخه وحاطه فهد ولد فاطمه على ريولها...

راشد: السلام عليكم...

ردوا كلهم علي السلام..

سلمت على عمة مهرة امنه وسالتها عن حالها وطنشت مهرة ولاحتى صديت صوبها...

سرت صوب فاطمه وقعدت اسولف وياها شوي...اللي صاصرتني اول ماوصلت صوبها..

فاطمه: مافيك معنى..شحقه ماتسلم على بنت خالتك.؟

راشد: لاني مابا...

فاطمه: شو مسوتبك..؟..

راشد:هالبنت كله تتحسبني باكلها احسن لي ما احتك فيها نهائيا..

بطلت فاطمه عينها مستغربه من كلامي...

فاطمه: شو هالرمسات هاي راشد انته اكبر من جذي..

راشد: ولاني اكبر من جذي مابحط عقلي بعقل ياهل..مافي داعي اسلم عليها...المهم انتي شحالج اليوم.؟

فاطمه: الحمد لله بخير..

راشد: بتطلعين باجر؟

فاطمه: ان شاء الله باجر الصبح بنطلع...

راشد: ماقررتوا تسموونه الولد.؟

ابتسمت فاطمه بحنان ...

فاطمه: بتشاور بعدني ويا عبدالله...عمر محتشر يبانا نسميه عليه...

راشد: ان سميتيه عليه لاانا اخوج ولاتعرفيني...

فاطمه: هههههههههههههههههه ليش؟

راشد: بس.. عنبو كله بتسمين عيالج من صوبهم سمي حد علينا نحن بعد...

فاطمه: ههههههههه بنتفاهم بعدين...

راشد: خلاص انا بخليكم احين بسير...تامرينا بشي؟

فاطمه: سلامت راسك..الله يحفظك...

راشد: الله يسلمج..فمان الله..

صديت عنها وياي بطلع من الغرفه لكن سمعت حد يزاعج باسمي...التفت حصلته فهوود رافع ايده صوبي ويناقز في ثبان مهرة...

فهد: خالي راشد ...خالي راشد...

وقفت عند الباب اطالعه..

راشد: شو تبا..؟

فهد: بسير وياك ..

راشد: مافيني عليك...

فهد: والله والله والله...

راشد: شوف الهرم بعد يعرف يحلف...!!!!..

شيخه: ههههههههههاي تعال شله انزين...

راشد: وهو مايروم يمشي..؟؟

شيخه: مسكييين منفدعه ريله اليوم الصبح مايروم ياجب عليها....

حست بوزي انا.. وتقربت من فهد او بالاحرى من مهرة... ومديت ايدي وخذته...وهو مستااااااااااانس..يوم رفعت عيني طاحت بعين مهرة...

وانصدمت صدمة حياتي يوم ابتسمت لي...

تميت اطالعها مستغرب ...مادري ابتسمت لي انا والا كانت تبتسم لفهوود اللي راسه عدال راسي ..!!!..

تميت واقف جي اطالع ومستغرب حتى مارديت لها الابتسامه...

شييخه: بلاك راشد واقف جي...

راشد: ابا اتاكد من اللي شفته حلم والا علم..؟!!..

كنت ارمس وعيني على مهرة وهي منزله عيونها تحت...

شيخه: وشو شفت...

راشد: طويلة العمر الشيخه مهرة بنت خلفان تدري...!..

ابتسمت مهرة وعينها مازالت عالارض...

شو اقولكم....

بغيت اعطيها طرااااق لانها بابتسامه وحده قدرت تذوب كل الثلج اللي كان فصدري بسبب عمايلها...!!!...

ابتسمت انا بعد وصديت عنها عن اضعف واكنسل الطلعه وادقها سوالف وياهم... التفت لفاطمه وقلت..

راشد: بشل فهد ويايه وبرده عقب...

فاطمه: انتبه عليه..

راشد: ولا يهمج... فمان الله...

طلعت من الغرفة ...لكن كان من المستحيل عقلي يطلع منها...!!...

-------------------------------

اليوم: السبت...

المكان: غرفة يوسف..

الوقت: السادسه مساءا..

---------------------------------

(يوسف)...



كنت فاتح الماسنجر وحاط الورقه اللي فيها ايميل كنه جدامي...

وافكر...

اظيف والا ما اظيف..!!...

خاطري اكلمها من دون ماتدري انه انا.... بس اخافها ماتكلم حد ماتعرفه..وهذا شي زين بس خاطري يكون استثناء في حالتي هاي بس..!!!...

شو اسوي شو الحل..؟؟

رن التيلفون..وطلع لي رقم غريب...

يوسف: آآلوووه..؟!..

منى: مرحبااا يووووسف...

عقدت حياتي..واطالعت الساعه في ايدي...

يوسف: وين انتي..؟؟

منى: في الجامعه..

يوسف: منى..لين الحين.؟؟...الساعه ست..!!.

منى: ادري..

يوسف: وانتي من ثمان سايره الجامعه حشى شو تسوين هالكثر..؟؟؟

منى: دوامي يخلص اربع وقعدت اتريا كنووه دوامها يخلص خمس..ويلسنا ساعه واحين نبا ني...!!!

يوسف: تبون توون..؟؟؟ انتي وكنوه؟رباعه والا كل وحده اروحها..؟؟

منى: رباعه...

يوسف: وانا دريولكم..؟؟.

منى: ههههههههاي محشوم بس ماحصلنا حد اييبنا...امايه شاله الدريول .. ويدوووه نفس الشي.. ومايد ساير دبي... واحين دقينالك نشوف بتيبنا والا لا..



سكت.. كنت مبدل ثيابي ومتعايز اطلع من البيت...

يوسف: خلاص اوكي...بييكن احين..

منى: مشكوور فديت روحك...يالله باي..

يوسف: باي..



سكرت الكمبيوتر وبدلت ثيابي ....وتعطرت...وتكشخت..وانا مادري عشان شو كل هذا..لكني مابغيت اوقف وافكر... شليت نظاراتي الشمسيه وبقية اغراضي وطلعت..



يوم وصلت الجامعه ووقفت في المواقف...ماطولت وانا واقف اتريا الا ومنى وكنه طالعات متغشيات... توترت واعتدلت في قعدتي.. والتفت للسيت الوراني اشوفه مرتب او لا..؟؟

ماكان مرتب...بس ماكان عندي وقت ارتبه بعد...

ركبت منى عدالي وكنه وراها...وسلمن ورديت عليهن السلام..

تحركت بالسياره وطلعت من الجامعه وفجاه انتبهت لنفسي باني ماسلمت على كنه ولا هي سلمت...

صديت صوبها شوي ورجعت اطالع الشارع وانا ابتسم..

يوسف: شووو بنت العم منتطبه علينا..؟!!...

كنه: هي..

يوسف: صبري بدورلج درام بوقف عداله..

منى: هههههههههههههههههههههههه...

كنه: بعد تصب الزيت عالنار..ماعليه جان ما سحبت صوره لك من الكاميرا ونشرتها في الانترنيت..

يوسف: هههههههههههههههههه... شحقه زعلانه انزين.؟

كنه: ليش تفشلني وتنازعني...!!..

يوسف: وانتي شحقه تصوريني...

كنه: كيفي..

يوسف: وانا بعد كيفي...

كنه: اوكي بمسح الشريط..

يوسف: هههههههه كيفج بس انا ماروم امسح هزبتي لج...

منى: اييييه شو بلاك على بنت عمي...؟!

يوسف: مب بنت عمي انا بعد..!!.. لا ادشين في النص..

كنه: لا والله كيفها ادش في النص..!!

يوسف: عيل انتي جبانه...

شهقت كنه وحسيت انها شوي وبتنقز علي بتكفخني...

منى: حووووووووه تايم اوت..شو هذا يوسف بلاك..؟

يوسف: مافيني شي اسولف عادي..

منى: حشى اول مره اشوفك تسولف جي...اقول..ابا حلاوة اخطف عالدكااااااااااااااان..

يوسف: لاااااااااااء... ماشي حلاوه....

كنه: لا تتبيخل على اختك...!!

يوسف: جب انتي لا ادورين في النص بين خوان...

منى: برااايها ادور في النص..

يوسف: ييييييييييييييه متعاونات علي اليوم....بوقف هني وبنزلكن ترا..والا جب..

سكتن منى وكنه كانهن صدقن تهديدي..بس من قال كنه تسكت..؟؟؟

كنه: بتخبرك هذي شووو بالضبط سيااره والا مكتب والا كبت للثياب..!!!..والا شو بالضبط..؟!

يوسف: حمدي ربج اني بوصلج...لا تطنزين...

كنه: والله صدق ماتروم توقفها وتقول للخدامه تنظفها...؟

يوسف: ماحب حد يحط ايده على سيارتي...

كنه: عيل نظفها ارووحك ليش جي...

يوسف: كنووه لمي ثمج...

كنه: ههههههههههههههاي ماروم... اعع موصخ سيارتك لو دريت انها جي ماركبتها...

يوسف: مسودة الويه..قسم بالله انا اعرف دواج وين بتشوفين..

كنه: هههههههههه بشوووف...كوني شاهده منى اخوج يهددني...

منى: وانا اشهد...

يوسف: سمندييييغا انتي... هي تاذن وانتي تصلين سيده...

تمن منى وكنه يتظاحكن....وطول الدرب ونحن على هالحال...

بصراحه السوالف وياها ولو انها احيانا تقهرني كانت لها طعم ثاني...وطول ما انا في السياره لين ماوصلناها وردينا بيتنا وهي بعدها فبالي ولا فكرت فشي ثاني غيرها...
_________________

نهاية الجزء السابع عشر
تحياتي