|
يلا عاااااااااااااااااااااااااااد وين التكمله اختي حلفت لج القصه روووووعه لا تتغلي علينايعطيكي العافيه وشدي الهمة
دموع الفراق |
لاحبيبتي مااتغلى عليكم بس اشوي كان عندي ظروف والحين انكمل لكم :char0248 سمعوا معاي باقي التطورات ........
الجزء السابع عشر ------------------------- اليوم: الخميس... المكان: في المستشفى.. الوقت: التاسعه مساءا.. -------------------------- (سهيل).... وقفت اتريا وصول راشد وعبدالله صوبنا وانا قلبي مب متحمل اللي عرفته توني.... عالاقل قبل ما اسال كان عندي امل... بس الحين خلاص...مالي حق افكر فيها او احبها... تصنعت ابتسامه لراشد وعبدالله وسلمنا عليهم... سهيل: الحمد لله عالسلامه ياعبدالله...ماتستاهل والله.. عبدالله: الله يسلمك ياربي.. هااا بشروني عن فطيم.؟ شيخه: من نص ساعه مدخلينها داخل...بعدهم شوي. قال عبدالله بملامح قلق... عبدالله: تعبانه.؟؟ ابتسمت شيخه تحاول تخفف عليه...وانا اراقب وقلبي يحترق... شيخه: شويه..لا تخاف عليها ان شاء الله بتقوم بالسلامه... بخبر امايه انكم وصلتوا... تحركت شيخه وانا مازلت اراقبها...فجاه طاحت عيني بعينها...مادري شو اللي شافته فملامح ويهي..!!.. لكن الي شافته خلى ويهها يحمر وتتوتر... دخلت شيخه الغرفه اما انا فما قدرت اقعد اكثر... استسمحت منهم وانسحبت وقلت لهم اني بييهم عقب اطمن... او بتصل... طلعت من المستشفى وسحبت الهوا لصدري...عل وعسى اهدى شوي...رفعت ايدي ليبهتي وفركتها بتوتر... الوقت ماكان مناسب... اناغبي....ماكان مناسب ابدا... ركبت سيارتي وحركتها..وبدون حاسية مني توجهت للسينما... وحضرت حيالله فلم ولا اندمجت فيه بعد ولا فهمت شي منه...بس كنت مسكر تيلفوني ..ماريد اشوف حد احين ولا اريد اكلم حد...ابا اتم بروحي... يمكن شيخه ماكانت تعني السكوت...!!.. يمكن احرجتها وماحصلت فرصه تتكلم بسبب وصول راشد ونسيبه..!! يمكن ويمكن.... بس كيف بتاكد...مستحيل اسالها مره ثانيه مالي ويه الا جان هي رمستني بالسالفه بروحها... ومااعتقد ان أي بنت لها الجرأة تتكلم بموضوع مثل هذا...!!.. عقدت حياتي...لا تحط امل ياسهيل...لا تبني امل من اول ويديد... طلعت من الفلم وكانت الساعه حوالي الـ11 ونص تقريبا... فتحت تيلفوني واتصلت براشد....وارتحت شوي يوم اطمنت على فاطمه اللي يابت ولد ثاني وماسمووه لين الحين...وهي بخير وماعليها شر... رجعت البيت وصادف وصولي مع وصول سيف مع جمال اللي مادري وين كانوا مرتغدين... سلمت على جمال وترييته يسير بيتهم... ودخلنا انا وسيف البيت... سهيل: وين كنت.؟ سيف: كنا في دبي وتونا واصلين... سهيل: شو تسوون في دبي.؟؟ التفت لي سيف بنظره استفهام.. سيف: ليش تسالني.؟؟...انا ريال مب ياهل تسالوني وين كنت وشو سويت...!! سكت واطالعت سيف ببرود ... كان مجرد سؤال مب تحقيق..ليش ياخذ هالموقف الدفاعي ..!!!... حطيت ايدي على صدره ابعده عن طريجي وقلت له ببرود.. سهيل: وريحة الزقاره بعدها فيك... بعدته عن طريجي ودخلت البيت وحسيته يمشي من وراي وهو ساكت...ركبت فوق ولاحظت ليت حجرة مهرة مازال مبطل...دقيت الباب ودخلت وحصلتها يالسه عالكمبيوتر اليديد... سهيل: شو تسوين.؟ مهرة: العب.. تقربت منها وشفتها تلعب ورقه...!!... سهيل: بنت خالتج ربت اليوم... رفعت نظرها لي متفاجاه... مهرة: والله..؟؟؟...فاطمه؟...شو يااابت؟ سهيل: يابت ولد...وماسمووه لين الحين... مهرة: وهي شو حالها بخير.. سهيل: هي بخير...المهم بسج من اللعب ورقدي.. مهرة: اوكي... خليتها وطلعت من حجرتها ودخلت حجرتي....تسبحت بماي بارد وطولت هالمره بالسبوح لاني كنت اسرح واااايد...افكر بشيخه.... وملامح الخجل الاخيره اللي طلعت على ويهها...!!!... -------------------------- اليوم: الجمعه.... المكان: بيت سلطان.. الوقت: الواحدة ظهرا.. -------------------------- (يوسف)... دخلت البيت معاي ناصر ومحمد وابويه...راجعين من صلاة الجمعه....وشفنا امي طالعه من حجرتها ... اول ماشافتني بركب حجرتي قالت لي.. ام محمد: ابويه يوسف...ازقر لي منى بالله عليك...منزربه فوق من اصبحت مادري شو تسوي... يوسف: ان شاء الله.. ركبت فوق ومريت على حجرة منى اللي كان بابها مفتوح..وسمعتها تتكركر...دخلت الحجره ووايقت عليها وعلامه استفهام على ويهي... حصلتها يالسه عالكمبيوتر واطقطق... يوسف: شو تسوين.؟؟... منى: اكلم ربعي... يوسف: نزلي امي تباج... منى: الحين..؟ حسيت بدافع مفاجئ وبفكره خبيثه يخليني اطلعها من الحجره احين.. يوسف: هي الحين الحين تباج سيريلها... منى: اوكي.. طقطت منى شوي وانا سويت عمري بروح حجرتي ويوم شفتها تركظ وتنزل الطابق التحتي..ركظت انا للكمبيوتر مالها... ورفعت المحادثات اشوف منو تكلم... فعلا كلهن بنات...وحده منهن اكتشفت انها كنه... ماكان عندي وقت اقرا شو كاتبات لكني سحبت قلم من مكتب منى ونقلت ايميلها على ورقه وخشيتها فمخباي...رجعت كل شي مكانه وطلعت من الحجره ودخلت حجرتي... حطيت الورقه في المكتب لين ما اشوف كيف بتصرف معاها عقب... بصراحه مادري ليش خذته...بس حسيت اني بحتاجه... شغلت كمبيوتري والشامل... ويوم شيكت ايميلي تلقيت مفاجاه .... كانت رساله من وضحه فيها ثلاث سطور....ثلاث سطور..لكنها زلزلت كل خلية فيني.. كانت تقولي بانه مشاكل صارت بين عمامها عسب الخطبه وموعد العرس ..واحتمال الخطبه تنفج... كانت تطلب مني اتدعى بانها تتحرر من هالالتزام عشان نرجع لبعض...!!!!... نرجع لبعض.؟... الحين عاد...!!.. قلبي كان يدق بالقو وبفرح.... لكن عقلي رافض الفكره... وصارت بينهم حرب شرسه... فاز فيها العقل... انا عودت نفسي على خساره وضحه...كيف ارجع مره ثانيه..؟؟... اذا رجعنا مره ثانيه لبعض هالقصة بتكرر مرتين وثلاث وانا ما اتحمل اكثر صدمات... لا... رغم اني اتمنى من كل قلبي نرجع لورا اسبوعين بس.... لكن ناصر معاه حق ...البدايه غلط...والحب هذا بكبره غلط... اسمحيلي ياوضحه.... لكن ان شاء الله ماتنفج خطبتج... اذا كان هذا نصيبج... لانه نصيبج مب معاي... تميت مسنتر عالشاشه اطالع فيها بدون ما اطالعها فعلا....افكر بحياة وضحه المضطربه والمتوتره الحين... وتذكرت كيف انها تحب تعيش بروتين غير عن الناس...ماتحب شي يتغير عليها...اذا كانت مبسوطه من وضع تحبه يستمر على طول...بدون ملل...!!..اكيد انها مب مرتاحه حاليا...وعايشه بترقب وقلق... حسيت بحد يدخل حجرتي ..رفعت نظري وكانت منى... منى: يوسف تعال تغدى... يوسف: اوكي... طلعت منى من حجرتي وراحت لحجرتها اما انا فخليت الكمبيوتر شغال عشان ارجع له بعد الغدا..ونزلت تحت... ----------------------- اليوم: الجمعه... المكان: سيارة ناصر... الوقت: الخامسة عصرا... ----------------------- (ناصر).... كلت حبة باندوول وشربت ماي...عل وعسى يخف الصداع اللي سببه الحلم اللي حلمته...او بالاحرى الكابوس... شليت شنطتي ونزلت تحت اسلم على امايه واروح بوظبي... وانا في الخط...هزيت راسي والذكرى تهاجمني من اول ويديد....ماكفى الحلم..!!.. كان حلمي عباره عن استرجاع للموقف... لكن الاصوات كانت اعلى... والحركات كانت اعنف... وصوتها وهي تقولي "الله يخليك..ابوس ايدك"... يتكرر صداه في عقلي بقوو... مسكت السكان بقو لين مابيضن صبوعي.... يوم عن يووم يزيد تفكيري وهوسي بهالبنت... احس اني لازم اشوفها... لازم اكلمها... بس هالشي مستحيل... لكني اعرف فقراره نفسي باني مابقدر اتخطى هالازمه الا اذا شرحت لها كل شي واستسمحت منها....بس كيف.؟؟.. مستحيل... مستحيل...المفروض مافكر في هالشي اصلا.... لانه مافي ولا طريقه.. اقدر فيها اكلمها بدون حضور اهلها بدون ما افضح نفسي... وافضحها هي وياي ... بعدين مافي مجال تسامحني...واذا كانت ماخبرت حد من قبل بتخبر الحين بعد ازدياد جرأتي... ياربي شو اسوي...ابا انسى...ساعدني.. ابا شي يشغل حياتي... شي يشغل بالي.... يشغل اوقاتي... عرس لا تفكرون...مب معرس الا يوم تعرس نوره النحسه...يارب ارزقها بريال يفكني منها وخلها تعرس سرعه... رجعت افكاري للمره الالف للبنت.... على طاري الزواج... خوفي ان البنت تعقدت من اللي سويته فيها وبترفض أي شخص اييها...اخافها تتحسب الرياييل واحد وتحلف ماتعرس...!!.. آآآآآخ ياربي انا شو سوييييت...!!!.. وصلت بوظبي بعد المغرب بشوي ... فتحت الدرايش في شقتي عشان تتهوى شوي... وبدلت ثيابي ولبست لبس الرياضه واتصلت بعبدالعزيز على طول... وصادف ان الريال بعده مارجع من خورفكان هو واهله...بالتالي ركضت بروحي اليوم... ومازال ويه البنت عالق فبالي... لا ...انا مابقدر اتحمل اكثر...لازم اشوفها لازم... لازم اشوف لي حل ... بعد ساعه الا عشر دقايق رجعت لسيارتي ووقفت مكاني وانا اشوف حد واقف عدالها..يوم تقربت ميزته... حميد..!!!.. ابتسمت وتقربت منه... ناصر: مرحباااااااااا الساع....مفاجاه بصراحه... ابتسم لي حميد وسلمت عليه... حميد: شفت سيارتك واقفه ...اتصلت بك مغلق...قلت بترياك عدالها بسلم عليك...شحالك؟ ناصر: والله الحمد لله ...ماشي الحال...سيارتك وين؟ حميد: وقفتها هناك...ليش؟ ناصر: بنتعشى رباعه...الحقني الشقه... حميد: ماعندي مانع... ركبت سيارتي وخطفت عالمطعم اللبناني وطلبت مشاوي ومحاشي وكوكتيل وخذتهم وياي الشقه... دخلنا انا وحميد اللي كان متعود على شقتي ويعتبرها بيته الثاني على قولته... عطيته كيسه العشا..وقلت له.. ناصر: اندوك رتب العشا وانا بتسبح خمس دقايق بس.. حميد: بشكار ابوك انا... ناصر: هههههههههههه محشوم... يالله عالمطبخ اشوف.. ظحك حميد وراح المطبخ وانا دخلت الحمام وتسبحت عالسريع...لبست ثيابي وطلعت لحميد اللي كان يالس في الصالة والعشا جدامه عالارض... يلست عداله وانا ابتسم.. ناصر: هااااااه...شو لعلووووم...؟ واخبارهم الربع... حميد: مثل ماتحيدهم...والله العلوم عندك... ناصر: ماعندي انا علوم... عندي جغرافيا جان تبا... حميد: هههههههه..لا صدق...صدق اللي سمعناه من عبدالله؟.. ناصر: حسب اللي قالكم اياه عبدالله... حميد: يقول انك بتودر الشله خلاص.... ناصر: لا...غلط... السالفه ومافيها ياخوي اني قررت التزم خلاص واتوب... وقلت لعبدالله اذا ما ابتعدتوا عن هالشغلات البطاله وياي بضطر اني انا ابتعد عنكم عشان ابتعد عن هالملذات وما ارجع لذاك الدرب... والا بالله عليك حد يبغي يخسر ربعه.؟؟... سكت عني حميد....بعدها قال لي ببطء.. حميد: اهنيك بصراحه... وتبا الصدق انا من زمان احس بتانيب الضمير من هالشغلات اللي نسويها...كنت افكر اني ابتعد بس ماكانت عندي شجاعه كافيه...كنت ابا حد يشجعني... فرحت... من خاطري فرحت... توبتي انا شجعت شخص ثاني عالهداية بعد..!!.. اجرها كبير عن رب العالمين... ناصر: والله حميد..؟؟... فرحتني...صدقني بتحس براحه مابعدها راحه... حميد: انا متاكد من هالشي...كنت اتريا الفرصه بس.. بس عندي سؤال اجاوبني بصراحه؟ ناصر: اكيد.. حميد: لكل توبه مفاجأة سبب....شو اللي خلاك اتوب فجاه.؟..وشو هاي الظربه على راسك.؟؟.. سكت..وتوترت..ماعرفت اقوله او لا...بس انا اثق في حميد ..وفي نفس الوقت احس نفسي ابا اتكلم مع حد بخصوصها...هاي البنت اللي شاغله بالي ليل نهار...كانها تنتقم مني عاللي سويته فيها.... ناصر: لازم.؟ حميد: اذا كنت تثق فيني كفايه...احب اعرف... ناصر: توعدني ماتخبر حد.. حميد: وعد شرف... ناصر: هممم... حميد...انا...غلطت..تحرشت في بنت...! كان على ويه حميد الجمود ومب متاثر باللي قلته...يترياني اكمل ...ويو ماكملت سالني وهو يرفع كتوفه.. حميد: شو يعني؟ مب اول مره...!! فهمني غلط..!!!.. ناصر: لا حميد مب مغازل... تحرشت فيها..والبنت هذي..بنت عرب.. معارف ابويه...واخوها العود ربيع اخويه محمد... تحرشت فيها يعني مسكتها وقربتها مني وكشفت غشوتها...وزين اني انتبهت لنفسي والا الله اعلم شو بيصير...!!!.. بطل حميد عيونه يطالعني برعب... حميد: لا...لا ناصر شو سويت الله ياخذ بليسك...شو ياك عليها ..ليش جي سويت..؟؟ هزيت راسي متوتر انا بعد.. ناصر: كنت مظارب ويا ابويه وطلعت من البيت معصب وفي الطريج شربت خمر...وتخيل انته الباقي.. حميد: حسبي الله على بليسك...واهلها وين عنك؟؟ ناصر: كانت بروحها في البيت وقربت بي في الميلس وجدمت لي الفواله.... آآآخ ياحميد.... لو تشوفها.. كانت ايدها مكسوره... وبنية جسمها ضعيفة وصغيره...شكلها جي في المدرسه...ماعندها ابدا خبره..والا كيف ادخلني وهي اروحها في البيت..!!!..وانا شوف شو سويت فيها... سكت عني حميد وهو يهز راسه باسف ويحاول يتخيل الموقف... ناصر: ترجتني البنت اني اخليها وماسويبها شي...وصوتها الحمد لله وصل لعقلي في الوقت المناسب وفجيتها... ويوم طلعت من بيتهم سرت البر بدون ماحس.. وكسرت غرشه الخمر عالشارع...ويوم كنت برجع للطريج انجلبت بي السياره وصار لي اللي تشوفه في راسي... رفع حميد نظره لي متفاجئ من هالخبر اليديد... حميد: انجلبت بك السياره بعد..؟ ناصر: ماياني شي انا بخير.. حميد: الحمد لله عالسلامه .. ناصر: الله يسلمك...شفت كيف ياحميد...الله مايضرب بعصا... وعقب كل هذا ماتباني اتوب..!!! رجع حميد يهز راسه باسف... حميد: والله اني مب قادر اتخيل اللي سويته...وماصار شي عقبها؟ هزيت راسي بالنفي... ناصر: انا ساكت وهي الظاهر ساكته... واللي معور قلبي ياحميد اني بعدها بيومين جي اضطريت اروح بيتهم انا ويوسف اخويه مره ثانيه وتغدينا هناك..وتعرفت على خوانها وابوها... ناس حشام والله وشوف انا شو سويت... وامس بالذات مصلي ويا ابوها الظهر... والاسبوع اللي طاف تلاقيت ويا اخوها وولد خالتها في العين مول...يعني شوف وين ماسير احصلهم جدامي يعني مافي مجال انسى او حتى اني اتناسى... حميد: وشو بتسوي احين..؟؟ سكت عنه شوي وعقب قلت باندفاع... ناصر: ابا اشوفها... حميد: شوووووووووووووه..؟؟؟..تخبلت انته... ناصر: هي تخبلت... حميد مب قادر اشلها عن بالي ليل نهار صورتها تلاحقني...احس اني لازم اشوفها.. حميد: شو تبابها تشوفها شو بتقولها..؟؟ ناصر: مادري.. حميد: ناصر..شو انته تحبها والا شي..؟؟ تفاجات من كلمته....شو ياب هذا في هذا... ناصر: احبها..؟؟؟...متى بواحي احبها ان شاء الله...؟؟..مايخصه الحب في هذا كله... حميد: عيل شو تبابها تشوفها .؟؟؟ ناصر: قتلك مادري... اصلا مافي مجال اشوفها ولا افكر اني اروح بيتهم مره ثانيه ابدا... هي مجرد رغبه... حميد: فرضا شفتها وكانت بروحها...شو بتسوي... فكرت شوي.. ناصر: بشرح لها وضعي وبستسمح منها ولو اني اعرف انها مابتسامحني... حميد: ناصر..بقولك شي...دامك غلطت عالبنت... ليش ماتصلح غلطك وتخطبها..؟؟ ناصر: تتحسبني مافكرت بهالشي؟..فكرت...بس اهلي مابيطيعون دام بنت عمي مازالت تترياني...وبعدين البنت مابترضى فيني... مش بعد اللي سويته فيها...خلها على الله انته بس... حميد: الله يعينك...بصراحه مشكله... ناصر: يعين الجميع...تعال نتعشى عن يبرد العشا... قمنا انا وحميد وتعشينا وقعدنا نسولف لين 11 في الليل وبعدها استاذن مني وراح...ورحت انا انام...واحلم كوابيس من اول ويديد.... ------------------------------ اليوم: الجمعه.. المكان: غرفة شيخه... الوقت: الثانية عشره مساءا.. ------------------------------ (شيخه)... انسدحت على شبريتي والابتسامه مرسومه على ويهي... اشياء وايد صارت من امس لليوم... واهمها كلام سهيل.... مادري شو اللي قلبه فوق حدر جي وخلاه يقولي هالكلام وبهالطريقه هذي..!!!.. مب مصدقه انه يبا يخطبني.... مب لاني مب متخيله نفسي كزوجه لسهيل لا بالعكس تخيلت وكذا مره بعد...بس الطريقه اللي قال فيها كلامه حيرتني لانه مب من هالنوع... وماتوقعت انه يبا يعرس ابدا عشان جي شليت من بالي فكره اني اكون لسهيل ويكون لي.... احلام المراهقة اللي كنت احلم بها خلاص اختفت ... كله شليته من بالي بسبب امتناعه هو عن مجرد التفكير بالزواج... ولاني مابغيت انصدم..ماقمت افكر بالعرس انا بعد... يوم قال كلامه ذاك...انصدمت وبلعت لساني... ماعرفت شو ارد عليه... اصلا ماقدرت افكر لاني انتبهت لراشد وعبدالله... لكن معقوله يسالني هالسؤال....واضح جدا اني ما اعتبره اخوي... رغم المغايظ والسوالف بس بعد..كيف ماحس..!!!..تفكيري بسهيل مب اخوي ابدا ابدا.... تنهدت وانا افكر فيه يوم زار فاطمه اليوم...كيف طنشني وماالتفت صوبي ابد... اكيد اعتبر سكوتي رفض...بس كيف يتوقع مني افكر برد وانا اشوف اخوي ياي صوبي..؟؟؟؟... اكيد بنجلط وببلع لساني....!!. اوهووو ياهي سالفه عويصه...برااايه اكيد بيرمس في الموضوع مره ثانيه...او بحاول اوصل له اللي صار بشكل او ثاني...مسكين سهيل..اكيد انصدم... انجلبت على يمبي وانا اتذكر شي ثاني مضحك...لكني كنت كاتمه ظحكتي لاني ماريد اضحك على ذاك الخسف وعلى حركاته... الخسف اللي اتكلم عنه كان عمر...اخو عبدالله...اللي يوم سمع خبر ولادة فاطمه يا على جناح السرعه هو واخته ليلى...وصادف اني كنت موجوده..طبعا تميت متغشيه ومتلعوزه ويالسه اخر الغرفه... وحظرته سلاماته ماتخلص وسوالفه بلا قياس مع حرمه اخوووه... وشفته كذا مره صد صوبي ويتصاصر هو وفطيم علي...بغيت ساعتها انش واروغه من الغرفه... الحمد لله ان حس على دمه وطلع برا مع قوم راشد... تذكرت سؤال ليلى الضاحك يوم تقولي لين وين احين شعرج..؟؟ بغيت اروغها ورا اخوها هذي بعد شو يعني يايه تطنز..؟؟.. بس الحمد لله اني افحمتها يوم قتلها شعري لين وين اما هي اكتشفت انها قصت شعرها لين الارداف...يعني شعري انا اطول ياسلاااااااام... رجعت افكاري بشكل لا ارادي لسهيل.... احاول احلل مشاعري صوبه مب عارفه... بس انا متاكده انها مب اخويه... ورقدت وانا مازلت افكر فيه.... ----------------------------------- اليوم: السبت... المكان: بيت خلفان الوقت: السابعه والنصف صباحا.. ---------------------------------- (مهرة)... يلست في غرفة الطعام وانا لابسه عباتي وجاهزة.... عمتي المحبة اعلنت انها مافيها توصلني اليوم..وسهيل روح من قبل وشل سيف معاه..وابوي مازال راقد..ماتم عندي غير حمد... مهرة: يالله عااااد حمد بتاخر والله... حمد: صبري خلينا نكمل ريوقنا... مهرة: انته كل يوم ماتتريق شمعنى اليوم...انزين تريق بس بسرعه بليييييييز... لبسني حمد وتم يتريق وانا اتحرقص مكاني...لين اخيرا خلص وقام يتغسل...ركبت السياره معاه وتوجهنا للجامعه... نزلت ودخلت الجامعه وانا اضم الدفتر الصغير ..ماكان عندي وقت لين ماتبدا محاضرتي الاولى... طلعت جدولي وقريت اسم المبنى... وتذكرت مكان المبنى هذا يوم رحت استكشف ذاك اليوم... لكني يوم وصلت له افتر راسي من الصفوف المتشابهه..لكني في النهاية عرفت كلاسي وين ودخلت بتوتر... ويلست على كرسي فاظي...وبعد دقيقه قعدت عدالي بنت ما اعرفها... وبعد دقيقه ثانيه دخل ريال...او بالاحرى دكتور لابس بدله وله شنب..اووففف...يالله هذا كلاس من اربع كلاسات...ان شاء الله بقية الكلاسات حريم يدرسني.. بدا الدكتور يعرف عن نفسه وعن قوانينه وكيف طريقه تدريسه ووزع علينا اوراق... وقبل مايخلص وقت المحاضره بشوي طلعنا...ميت اغراضي واوراقي وطلعت من الكلاس... ماعرفت وين ارووح.. فكرت اروح اتريق... ومشيت بطريجي لين ماوصلت الكافتيريا... كان شوي زحمه وشلل البنات نفسهن في كل صوب...فجاه سمعت حد زقرني..يوم تلفت حصلت عليا وحمده يالسات على زاويه وياشرن لي.... فرحت..سرت صوبهن واناشاقه الحلج.. مهرة: اهليييييييييين انتوا هنيي.. حمده: هي نعم..قربي..شحاااااااااالج؟ مهرة: بخييير شحالكم انتوا.. يلست وياهن وقعدنا نسووولف.. عليا: احين الساعه عشر بنظهر رباعه من هني..عندنا محاضره عربي اظن كلنا مع بعض... مهرة: هي كلنا رباعه في محاضرة العربي... حمده: احسن شي عشان ما ارقد... عليا: هههههههههه يمكن يطلع الاستاذ يظحك ودمه خفيف.. مهرة: ان شاء الله تطلع حرمه.. حمده: لااااااااااااااا دخيلج ماريد حريم.. مهرة: ليش عاد..؟؟ عليا: لاعت جبوودنا من الحريم في المدارس خلونا نغير... مهرة: بصراحه انا اتمناهن كلهن حريم... عليا: هههههه مهرة مب مستعدة للتغيير... مهرة: برتاح اكثر معاهن ... حمده: بس يقوولون الاساتذه الرياييل يشرحون احسن ومتفهمين اكثر... عليا: قومن نتريق قومن ماشي وقت... قمنا نشتري ريوق ورجعنا نتريق... وبعد ماتريقنا وسولفنا سرنا محاضرة العربي اللي كانت فمبنى قريب وبااااااااااااااارد وهالشي عيبني وايد فيه... لكن اللي شفته في الكلاس ماريح نفسي...البنات الموجودات اغلبهن بناطلين ومب متحجبات...!!!..وشكلهن جي اطباعهن مب مثل اطباعنا... نحن طنشنا الموضوع وقعدنا مع بعض تقريبا اخر شي... وصدمتي الثانيه كانت ان الدكتور طلع ريال ومصري.. تم عندي كلاسين وان شاء الله يطلعن حريم... !!! ------------------------------ اليوم: السبت.. المكان: غرفة المستشفى... الوقت: الخامسة والنصف مساءا.. ------------------------------ (راشد).... انصدمت يوم فتحت باب الحجره وحصلت عيون مهرة مجابلتني...اللي على طول نزلتها عني للارض كاني باكلها...!!!... كانت يالسه عدال شيخه وحاطه فهد ولد فاطمه على ريولها... راشد: السلام عليكم... ردوا كلهم علي السلام.. سلمت على عمة مهرة امنه وسالتها عن حالها وطنشت مهرة ولاحتى صديت صوبها... سرت صوب فاطمه وقعدت اسولف وياها شوي...اللي صاصرتني اول ماوصلت صوبها.. فاطمه: مافيك معنى..شحقه ماتسلم على بنت خالتك.؟ راشد: لاني مابا... فاطمه: شو مسوتبك..؟.. راشد:هالبنت كله تتحسبني باكلها احسن لي ما احتك فيها نهائيا.. بطلت فاطمه عينها مستغربه من كلامي... فاطمه: شو هالرمسات هاي راشد انته اكبر من جذي.. راشد: ولاني اكبر من جذي مابحط عقلي بعقل ياهل..مافي داعي اسلم عليها...المهم انتي شحالج اليوم.؟ فاطمه: الحمد لله بخير.. راشد: بتطلعين باجر؟ فاطمه: ان شاء الله باجر الصبح بنطلع... راشد: ماقررتوا تسموونه الولد.؟ ابتسمت فاطمه بحنان ... فاطمه: بتشاور بعدني ويا عبدالله...عمر محتشر يبانا نسميه عليه... راشد: ان سميتيه عليه لاانا اخوج ولاتعرفيني... فاطمه: هههههههههههههههههه ليش؟ راشد: بس.. عنبو كله بتسمين عيالج من صوبهم سمي حد علينا نحن بعد... فاطمه: ههههههههه بنتفاهم بعدين... راشد: خلاص انا بخليكم احين بسير...تامرينا بشي؟ فاطمه: سلامت راسك..الله يحفظك... راشد: الله يسلمج..فمان الله.. صديت عنها وياي بطلع من الغرفه لكن سمعت حد يزاعج باسمي...التفت حصلته فهوود رافع ايده صوبي ويناقز في ثبان مهرة... فهد: خالي راشد ...خالي راشد... وقفت عند الباب اطالعه.. راشد: شو تبا..؟ فهد: بسير وياك .. راشد: مافيني عليك... فهد: والله والله والله... راشد: شوف الهرم بعد يعرف يحلف...!!!!.. شيخه: ههههههههههاي تعال شله انزين... راشد: وهو مايروم يمشي..؟؟ شيخه: مسكييين منفدعه ريله اليوم الصبح مايروم ياجب عليها.... حست بوزي انا.. وتقربت من فهد او بالاحرى من مهرة... ومديت ايدي وخذته...وهو مستااااااااااانس..يوم رفعت عيني طاحت بعين مهرة... وانصدمت صدمة حياتي يوم ابتسمت لي... تميت اطالعها مستغرب ...مادري ابتسمت لي انا والا كانت تبتسم لفهوود اللي راسه عدال راسي ..!!!.. تميت واقف جي اطالع ومستغرب حتى مارديت لها الابتسامه... شييخه: بلاك راشد واقف جي... راشد: ابا اتاكد من اللي شفته حلم والا علم..؟!!.. كنت ارمس وعيني على مهرة وهي منزله عيونها تحت... شيخه: وشو شفت... راشد: طويلة العمر الشيخه مهرة بنت خلفان تدري...!.. ابتسمت مهرة وعينها مازالت عالارض... شو اقولكم.... بغيت اعطيها طرااااق لانها بابتسامه وحده قدرت تذوب كل الثلج اللي كان فصدري بسبب عمايلها...!!!... ابتسمت انا بعد وصديت عنها عن اضعف واكنسل الطلعه وادقها سوالف وياهم... التفت لفاطمه وقلت.. راشد: بشل فهد ويايه وبرده عقب... فاطمه: انتبه عليه.. راشد: ولا يهمج... فمان الله... طلعت من الغرفة ...لكن كان من المستحيل عقلي يطلع منها...!!... ------------------------------- اليوم: السبت... المكان: غرفة يوسف.. الوقت: السادسه مساءا.. --------------------------------- (يوسف)... كنت فاتح الماسنجر وحاط الورقه اللي فيها ايميل كنه جدامي... وافكر... اظيف والا ما اظيف..!!... خاطري اكلمها من دون ماتدري انه انا.... بس اخافها ماتكلم حد ماتعرفه..وهذا شي زين بس خاطري يكون استثناء في حالتي هاي بس..!!!... شو اسوي شو الحل..؟؟ رن التيلفون..وطلع لي رقم غريب... يوسف: آآلوووه..؟!.. منى: مرحبااا يووووسف... عقدت حياتي..واطالعت الساعه في ايدي... يوسف: وين انتي..؟؟ منى: في الجامعه.. يوسف: منى..لين الحين.؟؟...الساعه ست..!!. منى: ادري.. يوسف: وانتي من ثمان سايره الجامعه حشى شو تسوين هالكثر..؟؟؟ منى: دوامي يخلص اربع وقعدت اتريا كنووه دوامها يخلص خمس..ويلسنا ساعه واحين نبا ني...!!! يوسف: تبون توون..؟؟؟ انتي وكنوه؟رباعه والا كل وحده اروحها..؟؟ منى: رباعه... يوسف: وانا دريولكم..؟؟. منى: ههههههههاي محشوم بس ماحصلنا حد اييبنا...امايه شاله الدريول .. ويدوووه نفس الشي.. ومايد ساير دبي... واحين دقينالك نشوف بتيبنا والا لا.. سكت.. كنت مبدل ثيابي ومتعايز اطلع من البيت... يوسف: خلاص اوكي...بييكن احين.. منى: مشكوور فديت روحك...يالله باي.. يوسف: باي.. سكرت الكمبيوتر وبدلت ثيابي ....وتعطرت...وتكشخت..وانا مادري عشان شو كل هذا..لكني مابغيت اوقف وافكر... شليت نظاراتي الشمسيه وبقية اغراضي وطلعت.. يوم وصلت الجامعه ووقفت في المواقف...ماطولت وانا واقف اتريا الا ومنى وكنه طالعات متغشيات... توترت واعتدلت في قعدتي.. والتفت للسيت الوراني اشوفه مرتب او لا..؟؟ ماكان مرتب...بس ماكان عندي وقت ارتبه بعد... ركبت منى عدالي وكنه وراها...وسلمن ورديت عليهن السلام.. تحركت بالسياره وطلعت من الجامعه وفجاه انتبهت لنفسي باني ماسلمت على كنه ولا هي سلمت... صديت صوبها شوي ورجعت اطالع الشارع وانا ابتسم.. يوسف: شووو بنت العم منتطبه علينا..؟!!... كنه: هي.. يوسف: صبري بدورلج درام بوقف عداله.. منى: هههههههههههههههههههههههه... كنه: بعد تصب الزيت عالنار..ماعليه جان ما سحبت صوره لك من الكاميرا ونشرتها في الانترنيت.. يوسف: هههههههههههههههههه... شحقه زعلانه انزين.؟ كنه: ليش تفشلني وتنازعني...!!.. يوسف: وانتي شحقه تصوريني... كنه: كيفي.. يوسف: وانا بعد كيفي... كنه: اوكي بمسح الشريط.. يوسف: هههههههه كيفج بس انا ماروم امسح هزبتي لج... منى: اييييه شو بلاك على بنت عمي...؟! يوسف: مب بنت عمي انا بعد..!!.. لا ادشين في النص.. كنه: لا والله كيفها ادش في النص..!! يوسف: عيل انتي جبانه... شهقت كنه وحسيت انها شوي وبتنقز علي بتكفخني... منى: حووووووووه تايم اوت..شو هذا يوسف بلاك..؟ يوسف: مافيني شي اسولف عادي.. منى: حشى اول مره اشوفك تسولف جي...اقول..ابا حلاوة اخطف عالدكااااااااااااااان.. يوسف: لاااااااااااء... ماشي حلاوه.... كنه: لا تتبيخل على اختك...!! يوسف: جب انتي لا ادورين في النص بين خوان... منى: برااايها ادور في النص.. يوسف: ييييييييييييييه متعاونات علي اليوم....بوقف هني وبنزلكن ترا..والا جب.. سكتن منى وكنه كانهن صدقن تهديدي..بس من قال كنه تسكت..؟؟؟ كنه: بتخبرك هذي شووو بالضبط سيااره والا مكتب والا كبت للثياب..!!!..والا شو بالضبط..؟! يوسف: حمدي ربج اني بوصلج...لا تطنزين... كنه: والله صدق ماتروم توقفها وتقول للخدامه تنظفها...؟ يوسف: ماحب حد يحط ايده على سيارتي... كنه: عيل نظفها ارووحك ليش جي... يوسف: كنووه لمي ثمج... كنه: ههههههههههههههاي ماروم... اعع موصخ سيارتك لو دريت انها جي ماركبتها... يوسف: مسودة الويه..قسم بالله انا اعرف دواج وين بتشوفين.. كنه: هههههههههه بشوووف...كوني شاهده منى اخوج يهددني... منى: وانا اشهد... يوسف: سمندييييغا انتي... هي تاذن وانتي تصلين سيده... تمن منى وكنه يتظاحكن....وطول الدرب ونحن على هالحال... بصراحه السوالف وياها ولو انها احيانا تقهرني كانت لها طعم ثاني...وطول ما انا في السياره لين ماوصلناها وردينا بيتنا وهي بعدها فبالي ولا فكرت فشي ثاني غيرها... _________________ نهاية الجزء السابع عشر تحياتي |
ههههههههههههههههههه والله يعجبني يوسف
شكراًع الجزء الروووووووووووووووعه وننتظر التكمله لا تتأخرين تسلمين يالغلا......دموع الفراق |
ان شاء الله عزيزتي حياج الله ونطرينا بالجديد ........
تحياتي |
يلا حبوبتي
نزلي البارت الثاني بسررررررعه نبي نخلص القصه قبل المدارس لان اذا بدت المدارس ما بنرتاح بالقراءه تحيااااااااااااااااااتي |
ان شاء الله حبيبتي والحين نكمل الجزء اللي بعده :char0248 سمعوا معاي ..........
الجزء الثامن عشر.. ---------------------- اليوم: السبت.. المكان: سيارة ناصر.. الوقت: الحادية عشره والنصف مساءا.. ---------------------- (ناصر)... طالعت ساعتي في ايدي... وهزيت راسي.. بوصل متاخر للعين... لكن المهم اني اكون الصبح هناك... حطيت شنطتي في السياره وتحركت... محد يدري في البيت اني بيي... جذي احسن..بسلم من التحقيق...لكن لابد من راحة بالي لاني ماقدر اعيش جذي..ماقدر.. بتخبل ان تميت افكر فيها بهالطريقه...لازم اسوي شي ... ولهالسبب خذت اجازه ليوم واحد...مادري عاد شو بسوي يوم بوصل هناك...!!..لكن بفكر بشي... لازم اشوفها... مثل مايقولون.... المجرم دايما يدفعه دافع غريب بانه يرجع لموقع الجريمه...!!... انا بروح..وبشوف شو يطلع معاي...!!.. ابتسمت يوم تذكرت كلمه حميد امس... "احبها؟!"... كيف اقدر احبها بالله..؟ مادري كيف طلع بهالاستنتاج..!! انا اسمها ماعرفه... ماعرف كم عمرها... ماعرف اذا مخطوبه والا لا... ياربي ليش مجتمعنا صعب جذي..!!.. عند الاجانب عادي الواحد يوم يبا يرمس وحده يسير لها ويكلمها بدون مقدمات... نحن عندنا يحطون مية الف حاجز وحاجز بينك وبين البنت اللي تبغي ترمسها..!!... سكت...انا شو قاعد اقول .؟؟.. هذي حشمه للبنت مب تعصب...!!.. قمت اخوور كله بسبب اني ابا اشوفها..!!.. حالتي صعبه.. لازم مافكر بالموضوع هذا لين مااوصل العين بالسلامه... مديت ايدي وحطيت شريط ديني عطاني اياه عبدالعزيز من فتره...وزدت من سرعتي عشان اوصل العين باسرع وقت...خط بوظبي ممل... يوم وصلت..وقفت سيارتي وخذت شنطتي ونزلت بهدوء... كان البيت هادي ومظلم..الساعه وحده وربع تقريبا... ييت بفتح باب البيت وانصدمت ..حصلته مقفول... تذكرت اذا انا عندي مفتاح للبيت او لا....وفعلا دورته في سلسلة مفاتيحي ...ولا حصلته... ياهي بلشه..!! مسكت تيلفوني واتصلت بيوسف... ان شاء الله بس مايكون راقد...!! يوسف: آآلوووه... ناصر: هلا يوووسف... يوسف:........ناصر.؟؟...باجر باجر اتصل صدق متفيج.. ناصر: هههههه اصبر ويا هالويه.... انزل بطل لي الباب انا تحت.. يوسف:...شوو؟ ناصر: مثل ماسمعت يالله بسرعه...باي وسكرت فويهه...والا ناوي يقعدني برا جني شحات وايد..؟!!.. وبعد دقيقه انفتح الباب...ويوسف بوزار وفانيله ومرصص عيونه...شكله كان راقد... يوسف: خيير.؟ شو صاير شفيك ..؟؟ دخلت البيت وسكرت الباب وراي وخليت يوسف يقفله.. ناصر: مافيني شي...مشكور روح كمل رقادك.. يوسف: روعتني ايييه ..بلاك.؟؟؟ ناصر: عندي شغل باجر الصبح في العين عشان جي ترخصت ويييت...مافيها شي.. ركبت الدري ويوسف يركب معاي.. يوسف: شو شغله..؟ ناصر: قايلك انا تحقيق الحريم هذا ودره... ابتسم يوسف وفرك عيونه..وعقب قال.. يوسف: تصبح على خير..بكمل رقادي.. ابتسمت انا بعد وانا اراقبه يمشي لحجرته.. ناصر: وانته من اهله... دخلت حجرتي وسكرت الباب وراي...فريت شنطتي عالارض وبدلت ثيابي ... ضبطت منبه الموبايل على صلاة الفجر... ورقدت...من بعد ظرابه مع افكاري وهواجسي..! ------------------------ اليوم: الاحد المكان: غرفة مهرة.. الوقت: السابعه صباحا.. ------------------------ (مهرة)... واخييرا حصلتك..!!!... مسكت النقاب ورفعته جدام ويهي عشان اتاكد من انه خالي من العيوب وينلبس...!!.. قررت البس نقابي يوم اكتشفت امس وبخيبة امل فظيعه ان كل اساتذتي رياييل... وكلهم شباب تقريبا..تحت الاربعين..ماعدا استاذ الانجليزي الايرلندي...كان شويبه مسكين... اما استاذ الكمبيوتر فصراحه شي فظيع... من اولها قام يتلصق في البنات...او انا اللي كنت احس جي.؟؟.. لانه محد اعترض غيري ...!!. وبصراحه بصراحه يعني...كان راعي حركات... فقررت اني اتنقب واغطي ويهي اللي يحترق من حد يطالع فيني من هالاساتذه...والله يعيني لين باقي الكورس.. وغير الاساتذه.. بنات كلاس الانجليزي كانن تحف...كل وحده شكل...ومزعجاااااااااااااات.... وانا وحيده وبروحي..وماحصلت بنت سنعه اقعد عدالها كلهن مايشجعن...!!.. الظاهر ان الحياة الجامعية ماتناسبني...لكني بصبر لين اتعود والله يعيني... حطيت نقابي في الشنطه وشليت دفتري الاصفر المتوسط الحجم ..اللي كنت اشخبط فييه من دخلت الجامعه... وشنطتي..وطلعت من الغرفه ونزلت تحت... سهيل وسيف كانوا على وشك انهم يطلعوون ..اطالعني سهيل بنظره بارده.. سهيل: نوصلج.؟ مهرة: توها سبع..وبعدني ماتريقت... سهيل: برايج عيل... طلعوا سهيل وسيف من البيت وانا دخلت غرفة الطعام عند ابويه وعمتي وحمد اخوي... مهرة: السلام عليكم.. ردوا علي السلام بينما انا وايهت ابويه وحبيته على راسه.. استانست يوم شفته يعدل المخده اللي عداله دليل انه يباني اقعد عداله...وماجذبت خبر..يلست ... حمد: اصبلج جاهي.؟؟.. بطلت عيوني مستغربه..شو السالفه...؟؟؟.. سهيل يعرض علي يوصلني...وابويه يسويلي مكان عداله..وحمد يصب لي جاهي..!!..ناقص بس عمتي توصلني اليوم وبيستوي يوم حظي... مهرة: هي نص الكوب لو ماعليك امر... صب لي حمد جاهي وعطاني اياه ونش... حمد: يالله بتوكل انا بعد...تامرونا بشي.. الكل: سلامتك.. حمد: الله يسلمكم..فمان الله... طلع حمد من غرفة الطعام..وانا يلست اتريق...وابويه يقرا الجريده.. مهرة: ابوويه..ابا فلوس خلصن فلوسي... حط ابويه الجريدة عالارض وخش ايده فمخباه يطلع بوكه..وعطاني فلوس...وعقبها قلت اكمل دلع..شو وراي... مهرة: منو بيوصلني الجامعه...عمووه..؟!!.. اطالعتني عمتي وسكتت...وردت تتريق.. مهرة: بتوصليني.؟؟.. آمنه: منو غيري يعني بيوصلج... سكت وانا احس اني ثقيله عليها كالعاده...الله يعينها عمتي علي...احس انها تترياني بس اعرس....وانا من عقب اللي صارلي كيف بقدر اعرس.؟؟ مابقدر ..ولا اريد ولا افكر فيه اصلا.. الساعه سبع ونص..طلعنا انا وعمتي وركبنا السياره...ساعتها طلعت نقابي ولبسته وعمتي اطالعني بفضول.. آمنه: من متى اتنقبين مهروووه..؟ مهرة: من اليووم....كل اللي يدرسوني رياييل ماداني اجابل بويهي.. سكتت عني عمتي...وحسيت انها استحسنت تصرفي هذا... بينما عمتي تحرك السياره طلعت الغشوه وحطيتها على راسي فوق النقاب عشان اطلع بشكل مرتب.. ---------------------------- اليوم: الاحد.. المكان: سيارة ناصر.. الوقت: السابعه والنصف صباحا.. ----------------------------- (ناصر)... حركت سيارتي وتبعت سيارة الاودي وقلبي تقريبا اشوف دقاته القوية من ورا الكندوره... اساسا انا مارمت ارقد عدل...ومن بعد صلاة الفجر برزت لمخي فكره مادري من وين يتني....لكني مارمت ارد ارقد بسبب حماسي... ومن يت الساعه ست ونص..وانا واقف في هالمكان اترياها تطلع من البيت....!! اكيد لازم تروح مكان.... مدرسه..كلية...أي مكان...وماخاب ظني... عرفت انها هي المنقبه اللي طالعه من البيت من هيئة جسمها وطولها...مستحيل اخربط فيها... وتذكرت بخجل اني تاملتها كفاية يوم شفتها اول مره..!!! واحين بشوف وين بتسير....وقلبي مب قادر اهدي دقاته باي طريقه...حتى انفاسي تسارعت وانا مادري هل اللي اسويه صح او غلط...!!!.. تميت اتبع السياره لين ماصار الطريج اللي يروحون له مالوف....!!..وماصدقت... الجامعه..؟!!!!!!.... ياربي كيف كنت احسبها في ثالث اعدادي او اول ثانوي او ثاني....لكن جامعه..!!.. مايندرى أي سنه جامعية بعد..!!.. دخلت سيارة الاودي اللي كانت تسوقها حرمه للجامعه من الباب الامامي..وحمدت ربي انه مب من الباب الخلفي لاني مابقدر ادخل من البوابه الخلفية لانه ماعندي تصريح...!! استغربت من الحرمه..!! البنت قالت امها متوفيه ....عيل منو هذي.؟؟؟... وقفت الاودي جدام البوابه ووقفت انا عدال الرصيف ونزلت الدريشه عشان اشوف عدل... شفت البنت تنزل من السياره وادور حواليها وتوقف صوب الحرمه اللي تسوق تكلمها شوي..وهي تهز راسها كل شوي بالايجاب... ريجي نشف...ماصدق اني قاعد اشوفها...ماصدق... تميت اراقب بعين مثل الصقر...تحركت سياره الاودي وراحت.. والبنت لفت ومشت شوي صوب البوابه...لكنها شوي ووقفت... وببطء شديد..رجعت تلف وتطالع صوبي..!!.. وقف قلبي...ماقدرت اتنفس...ولا حسيت باي حركه فجسمي... كاني جثة هامدة... عرفتني.. البنت عرفتني...مانست شكلي...!!!!. شفت الدفتر الاصفر الصغير يطيح من ايد البنت عالارض...وماتحركت عشان تشله...وقفت اطالعني كانها تشوف الشيطان جدامها...!!.. مادريت بعمري الا وانا طالع من السياره وواقف في الشارع وبيني وبينها حوالي عشر خطوات... تراجعت البنت بخوف ولفت بسرعه واندفعت داخل الجامعه...وتسكر الباب بيني وبينها... ماعرفت كيف افسر شعوري ساعتها... رفعت ايدي وفركت ويهي وعيوني..عشان اصحصح شوي... رجعت افتح عيوني عشان اتاكد من اللي شفته... البنت مب موجوده...محد....معقووله كان يتراوالي..؟؟؟... لفت نظري الدفتر الاصفر اللي مازال عالارض...!!..لا....مايتراوالي...كانت هني...وشافتني...وخافت مني وشردت.. تقدمت بخطوات بطيئه للدفتر وخذته من الارض...التفت وحصلت الحارس يطالعني بعين تساؤل... بيسويلي مشكله هذا اذا تميت واقف هني... تراجعت لسيارتي وخذت الدفتر معاي... ركبت السياره وطرت بها بعيد عن الجامعه.... وانا لين الحين مب مصدق اللي صار معاي...ولا اظن اني بصدق فيوم.... لكن هالدفتر بيتم عندي يثبت لي صحّة هالموقف....بانه فعلا صار ... -------------------------------- اليوم: الاحد.. المكان: بيت سلطان.. الوقت: الثامنه الا عشر دقائق.. -------------------------------- (يوسف)... شليت شنطة اللاب توب وطلعت من حجرتي بسرعه... بتاخر عالمحاظره... وخالد بيلعن خيري..مع انه موصني ايي قبل الكلاس بربع ساعه..!!.. وانا نازل الدري حصلت ناصر يركبه بسرعه..وفي ايده شي اصفر.. يوسف: صباح الخير.. رفع ناصر راسه بسرعه كانه مب حاس فيني من قبل... ناصر: صباح النور.. يوسف: وين كنت من الصبح..وشو هذا فايديك..؟؟ وكان دفتر.. رفعه ناصر وظربني على جتفي بالدفتر.. ناصر: ودّر هالمحاسب ودره... شكلي بعرس بس عشان افتك من حسابك لي... ظحكت على ملامحه ونزلت بسرعه لانه ماعندي وقت..بينما ناصر كمل طريجه لحجرته وسكر الباب وراه.. والله انه غريب هالانسان...اموره متخربطه من فتره...امس ياي نص الليل...واليوم طالع من الفجر والحين راد..!! طنشته وركبت سيارتي وتحركت بسرعه صوب الجامعه... يوم دخلت محاضرتي كنت متاخر خمس دقايق..لكن الدكتور اللي اول مره اشوفه فحياتي بدا المحاضره..ولا افتكر بانه اول يوم دوام بالنسبه لمحاضرات الاحد..!!!.. سلمت ودخلت وحطيت لابتوبي عالطاوله بينما خالد يالس عدالي...كنت مب شايفنه من يومين ..قمت ووايهته.. جان احصل لي هزبه من الدكتور من اولها... سكتنا...وبعد شوي سالني خالد بصوت واطي.. خالد: شحقه متاخر.؟ يوسف: راقد متاخر..وناش متاخر.. وجب عن يهزبني هذا ماريد اخلي انطباع مب زين من اولها.. ظحك خالد بصوت واطي.. خالد: والله وكورس التخرج يعلم الادب في المحاضرات...!!.. يوسف: هي عيل شو.. سكتنا لين بقية المحاضرة...ويوم خلص الدكتور وطلع وطلعوا الطلاب.. تمينا انا وخالد يالسين نلعب بالكمبيوترات... فجاه قالي خالد.. خالد: اقول يوسف.. واحد من مصر طرشلي مواقع يهود يبانا نسكرهن...اطرشهن لك؟ يوسف: وانته مارمتلهن.؟ خالد: ماتفيجت اصلا...بطرشهن لك عالايميل وشوفهن..تدري انه في شلة هاكرز ثانيه طلعت في الجامعه غيرنا.؟؟..ويعرفون كل مواقعنا اللي ندخلها...وامس بالذات سكروا موقع سعيد وحطوا عليه تواقيعهم... يوسف: موقع سعيد مب زود حماية عليه...وبعدين منو هذيلا مبتدئين؟ خالد: ماعرفهم...بس شكلهم جي يبون يتحدووونا... حست بوزي.. يوسف: بس نحن مانضر حد بالعكس هاكرز مفيدين... خالد: هذيلا عكسنا..يبون يسون لعمارهم شهره...ويخوفون العالم... يوسف: اوهووووووووو نحن على كورس تخرج وهذيلا طالعين لنا الحين..!! منو بيتفيج لهم...!! هز خالد راسه وسكت... من شكلنا هالقروووب المختصين بالهاك وهندسة الكمبيوترات والبرامج والانظمه ونحن محد يجرأ يتصدى لنا.. حتى الجامعه نفسها وبمواقعها تستفيد منا احيانا... ونحن قصدنا من هذا كله شريف... يعني هاك حسن مب هاك سيئ... وسمعتنا طيبة في الجامعه ووايدين يلجؤون لنا عشان نساعدهم....!!..والحين طلعت هالمشكله على كورس التخرج... شكلهم هالمجموعه يبون ياخذون مكانا لكن طريجهم غلط... هذيلا يخربون مايصلحون...!! طنشت الموضوع وفتحت ايميلي اشيكه... حصلت رساله ثانيه من وضحه...بطلت عيوني على وسعهن...شو السالفه..؟؟!!.. سكرت الايميل بسرعه لاني ماقدرت اشيكه بوجود خالد عدالي... وسكرت الكمبيوتر بعدها وحطيته في الشنطه... يوسف: يالله خالد نسير المحاضرة الثانيه.. اطالع خالد ساعته مستغرب.. خالد: بعده ربع ساعه.... يوسف: بنقعد في الكلااااس... يالله خلص... خالد: اوكي لحظة شوي... خلص خالد شغله عالكومبيوتر وسكره ... عقبها طلعنا من الكلاس وتوجهنا لكلاسنا الثاني... --------------------------------------- اليوم: الاحد.. المكان: في قاعه من قاعات الجامعه.. الوقت: التاسعه والنصف صباحا.. -------------------------------------- (مهرة)... مشيت دموعي للمره الالف بالكلينكس...لكني هالمره باصرار باني مابصيح خلاص... لكن كل ما اتذكر الخوف اللي صابني يوم شفته دموعي تنزل...ماصدق انه تبعني لين الجامعه..!!. هذا شو يبا مني...ليش يلاحقني...ليش مايخليني انسى..!!!... حاولت اوقف من الكرسي...ريولي ماتشلني من كثر الارتجاف... زين بس ما اغمى علي في الشارع... الله يستر شو كان بيصير..!!.. قويت نفسي وقمت..لبست نقابي وعدلت الغشوه فوقها...وبخطوات بطيئه فتحت باب القاعه اللي كانت فاظيه يوم دخلت لها الصبح وطنشت محاضرة الرياضيات. لاني بكل تاكيد ماكنت بقدر اني احضرها... بعد ماطلعت من القاعه وقفت عند الثلاجه وخذت لي غرشه ماي...راسي داير..واشك اني بطيح اليوم...المساله مساله وقت..!!!... رحت للمكتبه واشتريت لي دفتر ثاني بدل الدفتر اللي طاح عني في الشارع... طلعت من المكتبه وانا معقده حياتي...مايندرا الريال شل الدفتر او لا...ماذكر شو كاتبه في الدفتر...مشخبطه فيه وااايد...الله يستر بس... تذكرت بانه عندي محاضره عربي بعد شوي... غمضت عيني وماكان لي خاطر احضر...كيف بجابل عليا وحمده..!! كيف بسولف وياهن طبيعي..!!..اكيد بيحسن علي.. توجهت بدون حاسية للكابينات... طلعت بطاقتي ..واتصلت بشيخه... ارتحت يوم ردت علي الخدامه... الخدامه: هالوو..؟! مهرة: الوو...وين شيخه.؟ الخدامه: ويت اسكند.. سكت وانا اتريا شيخه تي عالخط...وبعد دقايق... شيخه: آلووووه..؟ مهرة: شيخه..انا مهرة.. من ارتباكي نسيت حتى اني اسلم بادب عالبنت..!!..شيخه كانت ملجأي الوحيد الي افكر الجأ له الحين.. لانها الوحيده الي تعرف بسالفه الحادث اللي صارلي... شيخه: مهرة.!!..هلا والله..من وين تتصلين من الجامعه.؟ مهرة: هي.. شيخه: شو بلاج مهرة صوتج مب طبيعي... مهرة: شيخه...ياويلي ياشيخه ياويلي... شيخه:...........ليش مهرة شفيج.؟ شوصار..؟ مهرة: شيخه...ذاك الريال لحقني لين الجامعه...شفته اليوم لحقني... شيخه: شوووووووووه..؟؟؟ منوو.؟..ماغيره اللي في العين مول.؟ مهرة: هي شيخه هوووو انا متاكده شيخه: خيبه تخيبه شووو صاااار ؟ شو سوا.؟ مهرة: مادري..ماسوا شي..لحقني لين الجامعه شفته جدام الباب...وكان نازل وبايي صوبي بس انتبهت وشردت عنه... شيخه: خيبه..!! هذا شوو ؟ حيواااااااان.؟؟.. جدام الناس جي فووظى السالفه عنده..؟؟ مهرة: شيخه شو اسوي والله اني ماروم احضر محاظراتي ولا اروم اطلع من الجامعه بعد اتروع اخافه بعده براااا... شيخة: .........مهرة.. استهدي بالله...روحي الحمام وغسلي ويهج وتنشطي..وحظري محاضراتج وانسي هالسالفه هذي..ادري صعب بس ان شاء الله بنتكلم يوم بترجعين من الجامعه... مهرة: في التيلفون في البيت ماقدر اتكلم..الا جان اشوفج ... شيخه: بشوووف بخلي راشد اييبني ان شاء الله بس انتي يوم تردين البيت اتصلي بي... وخلي حد من خوانج اييبج من الجامعه اذا شاف ريال مستحيل يتقرب صوبج... سكت..ماكان ودي اسكر عنها... بس معاها حق...الكلام بالتيلفون ماينفع... مهرة: ...اوكي شيخه...بتصلبج يوم برد...بس والله اني زايغه.. شيخه: لا تخافين انتي في الجامعه احين ومستحيل يوصلج ...هدي بالج .. مهرة: ان شاء الله..بحاول...خلاص شيخه بخليج عيل.. شيخه: اوكي غناتي...الله يحفظج.. سكرت عن شيخه وانا احس بشوية راحه... ورجعت ادعي على هالريال بانه مايتوفق ابد ابد.... مب ساد اللي سواه فيني وخلاني اتعقد ياي يكمل علي بعده..!!!...حسبي الله ونعم الوكيل.. ----------------------------- اليوم: الاحد المكان: غرفة ناصر.. الوقت: التاسعه والنصف صباحا.. ------------------------------- (ناصر).... طلعت من الحمام وانا انشف شعري عالسريع وعيني على الشبرية وين ماكان محطوط الدفتر الصغير الاصفر...! من يبته وانا اتجاهل وجوده...خايف من اللي بقراه من معلومات داخل الدفتر...مع انه في احتمال يكون الدفتر فاظي تماما ويكون خوفي عالفاظي..!! تنهدت بتعب وقررت اني انهي هالمساله... قفلت باب الحجره وانسدحت عالشبرية عدال الدفتر ومسكته ... وجلبته بين ايدي...وفتحته... اول شي شفته في اول صفحه هو " بسم الله الرحمن الرحيم"... غمضت عيني وانااحس بشعور غريب...باني ماسك شي شخصي للبنت اللي بغيت اهدم حياتها بسبب استهتاري..!!!.. شعوري غريب ولا ينوصف...!!..بس حسيت بالحزن الفظيع... رجعت افتح عيني وانا اكمل قرايه... مهرة خلفان الـ ..... الرقم الجامعي: ********* ومن بعده مكتوب جدول المواد والاوقات..والاماكن ان ما اسئت الفهم... كل هذا ماهمني... مهرة..!!..هذا اسمها..!..مهرة... يااا الله... صارت شخص صدقي الحين وله اسم... مهرة... قعدت اردد اسمها في الدقائق اللي تـــلـــت... مادري ليش...بس كل ماانطقه ياثر تاثير عجيب على نفسي...!!.. تمالكت نفسي ودققت بالمواد الموجوده... ان ما خانتني الذاكره...هذي مساقات المستجدين..اللي توهم داخلين الجامعه... معناته البنت اول سنه لها في الجامعه.... تقديريا عمرها...همممممم....19 سنه... ست سنوات بيني وبينها.... يالله يالووومي فيج يا..يامهرة... جلبت الصفحات ..فيه منها رسومات لورود وعصافير.. وفيه رسومات مثل الرسوم المتحركه... البنت بريئة... جلبت الدفتر وتصفحت اخر صفحاته... كانت اغلبها شعر...مب قصايد كامله...لكن مقتطفات... وفي صفحات كانت كاتبه شويه معلومات وارقام شكله من واحد من المحاضرات.. خلال لحظات صار هالدفتر اغلى ممتلكاتي...بحافظ عليه باحسن صووره... سكرت وقربته من ويهي اشمه... كانت فيه ريحه عطر خفيييييييييف... اكيد عطرها.. رجعته عالشبرية وانسدحت عداله افكر...لين ماغلبني الرقاد ورقدت....! ---------------------------- اليوم: الاحد... المكان: ميلس بيت خلفان.. الوقت: السابعه والنصف مساءا.. ------------------------------ (سهيل).... وقفت وانا اسمع صوت سيارة...اكيد هذا راشد ..قايل لي انه بايي... طلعت من الميلس ووقفت في الحوش مصدوم.... شويخ..!!!..شو يايبنها؟... ياني راشد وتوايهت وياه..اما شيخه التفتت لي من بعيد...مااجرأت اني اطالع فويهها وايد ولا اني اسلم عليها بعد ماتذكرت رفضها لي..!!!... صعبة على اي ريال... لكن صوتها وصلني من بعيد... شيخه: شحالك سهيل..!!.. تحنحنت عشان اصفي صوتي اللي حسيت به اختفى فجاه... سهيل: بخير الحمد لله...شحالج انتي شيخه.؟ شيخه: الحمد لله... طلعت في هاللحظة مهرة من البيت وهي ترحب بشيخه..وسلمت عليها ..بينما نحن انا وراشد وقفنا لاني كنت متاكد بان مهرة بتسلم على راشد..يعني هذا من الادب وشي طبيعي انها تسلم عليه صح؟.. لكن تخيلوا ...مهرة سحبت شيخه داخل البيت وسوتلنا ان وراشد اكبر طااااااااااااف... حسيت بالدخان يطلع من خلايا جسم راشد من الغيظ...التفت لي وقال.. راشد: شوف اختك.؟..اقص ايدي من هني اذا كانت صاحية...!! دخل الميلس وهو متنرفز ويلس عالكرسي...دخلت انا وراه وانا اضحك... سهيل: يااااهل طبها عنك... راشد: لا مب ياهل حشى...صدق صدق سهيل انتوا قايلين لها شي عني.؟؟ عقدت انا حياتي.. سهيل: شو بنقولها يعني..؟ وليش..؟ حرك راشد ايده بعصبية... راشد: مااطيقني ماطيق لاتشوفني ولا تكلمني ولا حتى تسلم.. الود ودها ماعندها ولد خاله.. سهيل: لا حرام عليك ...تستحي يمكن منك...مب متعوده هي عليك او انها تخالط رياييل حتى لو كانوا يقربون لها... اليوم تخبرني عموووه انها تنقبت في الجامعه بس عشان اساتذتها كلهم رياييل..!!.. راشد: عووذ بالله جي مابناكلها... سهيل: تستحي اقولك..مهرة مب اجتماعية زود يمكن تنقصها اللباقه في التصرفات ..عشان جي تبين لك انها دفشه شوي.. سكت راشد شوي وهو يصرف النظر عن هالموضوع...وبعدها قالي .. راشد: ذاك اليوم يوم سرت دبي عشان عبدالله ..قالي عمر انه شاف سيف فواحد من الفنادق....ووياه شله... عقدت انا حياتي من هالخبر...واستنكرته في نفس الوقت... سهيل: وعمر شو كان يسوي في الفندق...؟!!.. راشد: يقول كان عنده اجتماع عمل هناك... سهيل: والمعنى؟ راشد: المعنى انك انتبه لهالولد شوي...اشوفه شعره بينه وبين الضياع... تنهدت انا بظيج...كله انا كله انا....من وين تينا هالمصايب..!! سهيل: من وين بييبها انا والا من وين...!!.. اروحي اللي فيني كافيني... راشد: ليش شوفيك زود بعد..؟؟ تذكرت شيخه مره ثانيه اللي يالسه داخل البيت.....ببرود...وبراحه بال...اكيد مب مفتكره باللي سوته فيني...والاثر اللي خلاه رفضها لي في نفسي... سهيل: هممممم مافيني شي...المهم يالله قم جان تبانا نلحق عالشباب.. راشد: يالله.. قمنا انا وراشد ركبنا سيارته وطلعنا من البيت... ---------------------------- اليوم: الاحد.. المكان: غرفة مهرة.. الوقت: الثامنه مساءا.. ---------------------------- (شيخه).... راقبت باسف وغيظ ملامح مهرة وهي تشرح لي الموقف اللي مرت فيه اليوم كامل... حياتها غريبه بنت خالتي هذي.... شيخه: حسبي الله عليه شو يبابج شحقه يلحقج...ماكفاااه اللي سواه...مايخاف هذا..؟!.. هزت مهرة راسها بحسره... مهرة: انا مابسير الجامعه باجر... شيخه: لا اتخبلين... مهرة: والله مابسير...اتروع..والله اتروع... شيخه: لا تخلينه ياثر على حياتج يامهرة...تلقينه هو عايش حياته ولا مفتكر ولا متاثر مثلج... وانتي مستعده تخربين كل شي على عمرج بسبب هالشي... مهرة: شو اتحسبينه سهل عليه اللي صار... شيخه: ياعمري ادري انه مب سهل....بالعكس انتي قوية لانج متحمله تشلين كل هالشي بروحج..لو انا مكانج بنهار وكل العايله بتدريبي ...بس بعدني اباج تكونين اقوى من جذي وتطردينه من بالج..ركزي في دراستج واستمتعي بحياتج وحمدي ربج بانه ماصار ظرر صدقي فيج... مهرة: انتي شو تقولين..؟!!... كد حد لمسج او تقريبا حظنج غصبن عنج من دون اخوج او ابوج؟.. كد حد قالج حبيبتي وكشف عن ويهج وشعرج..؟؟؟...وتبيني ما اتاثر.؟! سكت عنها...معاها حق... هالحركه مب سهلة على اي بنت يهمها شرفها وسمعتها..لكن مع ذلك ماباها تسمح لهالشي بانه ياثر عليها... شيخه: اوكي لا اداومين باجر بس اللي بعده لازم اداومين... صدت مهرة بويهها لجانب ثاني كانها رافضه هالشي...لكنها بالرغم من هذا قالت.. مهرة: يصير خير لين ورا باجر... حسيتها متظايقه وايد من وضعها ومن اللي صابها...فحبيت اغير الموضوع.. شيخه: تعالي صدق..مبرووووك عالكمبيوووتر... ابتسمت مهرة.. مهرة: الله يبارك فيج...كل ما اشوفه اتذكر استاذ الكمبيوتر اللي يتلصق في البنات واعافه... شيخه: مهرة...كم مره بقولج الرياييل مب واحد...لا تتعقدين من الكل بسبب شخص خبيث.. مهرة: ماعفت الرياييل انا... شيخه: لا والله..؟..عيل شحقه ماسلمتي على راشد..؟ فجاه شهقت مهرة.. مهرة: ...نسيت والله....تراني قمت اشوفه وايد عشان جي احس ماله داعي السلام...وييه يالفشله.. شيخه: ههههههه ماعليه..بس بصراحه استغربت يوم ابتسمتيله امس.. حتى هو استغرب شفتي ويهه كيف صار.؟ احمر ويه مهرة وقالت.. مهرة: اسميج انتي....انا ابتسمت مب له..انا كنت اضحك عليه..شكله يضحك وهو شال فهوود.. شيخه: ههههههههه حراااام عليج وهو يتحسبج تبتسمين له هوو... مهرة: وشحقه اتبسم له بالله...مني والدرب...!!! شيخه: الابتسامه صدقه...يوم اقولج انتي متعقده صرتي لا تقوليلي لا... سكتت مهره وهي مبرطمه شوي واطالع الارض... شيخه: اييه...شوفيج..!!!.. قالت لي بصوت هادي.. مهرة: شيخه..!!..ظنج ليش لحقني..!!!... استغربت من سؤالها.. شيخه: هممم مادري... مهرة: تبين الصدق..(والتفتت لي اطالع فعيوني كانها تذكرت شوي توها بس)... ماكانت على ويهه نفس النظره اللي شفتها من قبل...هذي النظرة مختلفه.. شيخه: كيف يعني.؟ مهرة: هذيج النظرة خبيثه..خوفتني..نظرة لعاااابه واستهتارية...هذي غير.. شيخه: كيف غير اشرحيلي... قالت مهرة وهي تحرك ايدها تحاول تشرح شي صعب عليها شرحه....!! مهرة: كانه...كانه جي...يعني مادري كيف....كانه يترجاني بنظرته..!!!.. سكت عنها وعلى ويهي علامه استفهام...احاول اتخيل نظرة الترجي هذي...صعب اركبها عالصوره اللي تخيلتها له وهو يتحرش فمهرة...!!!.. شو القصد من ورا هالنظره ياترى...!!!. ----------------------------------------- نهاية الجزء الثامن عشر تحياتي |
والله هالمرة تأخرتي وايد علينا وايد وايد وكا المدرسه قربت بليز حطي اجزاااء طووويله ...فديتج على الجزء الروعه واتمنى ما تطولين علينا هالمرة
دموع الفراق |
ايه والله معاكي حق دموع الفراق ..
اختي لا تتاخري بليز الحين اول اسبوع مدارس ترى مافي شغل وايد يلا حبيبتي لا تخلينا ننتظر وايد... مشكورة على الجزء رووووووعة :) |
ان شاء الله من عيوني باجر بانزل جزء واللي بعده بعد جزء لعيونكم بس ......... تامرون امر خواتي انتو .......
نطروني ...... تحياتي |
:char0248 سمعوا معاي الجزء اللي بعده لعيونكم نزلته ..............
الجزء التاسع عشر.. ----------------------------- اليوم: الاحد... المكان: بيت خلفان.. الوقت: التاسعه والنصف مساءا.. ------------------------------- (مهرة)... بست شيخه على خدها وكنت شوي وبلوي عليها ماريدها تروح عني...بس الوقت تاخر وزين منها انها يتني اساسا... مسكت ايدها وابتسمت لها فويهها.. مهرة: خلينا نشوووفج ..ومشكووره وايد انج يييتيني... ماتتصورين شكثر ساعدني هالشي..! ابتسمت شيخه.. شيخه: افا عليج مهروووه نحن في الخدمه...ههههههه بس ترا وحده بوحده انا هالمره ييتج ثاني مره لازم انتي تييني.. مهرة: من عيوني ان شاء الله مابقصر متى ماقدر.. شيخه: يالله حبيبتي مع السلامه... مهرة: سلمي على خالتي وفاطمه...الله يحفظج.. طلعت مع شيخه للحوش وشفت سهيل متساند على سيارة راشد وراشد واقف جدامه يسولفون رباعه بصوت واطي.. بدون قصد مني لاحظت تجاهل راشد لي اللي رفض حتى انه يلتفت صوبي..وكان معقد حياته...حسيت باللوم شوي... لايكون زعلان لاني ماسلمت عليه...؟؟!!!.. مهرة: راشد...!! التفت لي راشد مستغرب...وسهيل بعد......الشي اللي خلاني اتوتر..اخاف احصل هزبه والا نظرة معصبه من سهيل..بس كلهم كانوا مستغربين زقرتي ويبون يعرفون شو عندي...!!. مهرة: اسمحلي نسيت اسلم عليك المغرب...مب قصدي شي..بس الايام متشابهه عندي وتحسبت نفسي شفتك اليوم من قبل لاني شفتك امس.. سهيل وشيخه ابتسموا...بس راشد تم يطالعني كانه سرحان ...وتعقيد حواجبه اختفى... توترت..رفعت ايدي اعدل حجابي.. اللي ماكان يحتاج لتعديل بس بغيت اسوي شي وماقعد جامده جي... وراشد ماتحرك الا يوم ظربه سهيل على بطنه بخفه... ورجع عقد حياته مره ثانيه... راشد: لا عادي مهرة لا تهتمين...(والتفت لشيخه).. روحنا.؟؟.. شيخه: يالله... صد راشد صوبي وبعدها التفت لسهيل.. راشد: يالله تخلفنا العافية عليكم....فمان الله.. ابتعد سهيل عن السياره... سهيل: الله يحفظكم..فمان الكريم.. ابتعدت سياره راشد وطلعت من بيتنا...رجعت انا دخلت البيت وقعدت عدال عفرا اللي كانت يالسه مع عمتي... دخل سهيل وراي وقال... سهيل: وين سيف.؟؟ آمنه: اخوك بعده مارد من برا...مرتغد... التفت سهيل لي انا وقال.. سهيل: ماكنتي اترجمين له كلمات يوم الخميس حق امتحانه؟..شو سوا في الامتحان.؟؟ رفعت كتوفي بحيره... مهرة: مادري ماسالته...اصلا ماشفته يدرس وايد يوم الجمعه... نزل سهيل عيونه وهو يفكر شوي عقب رجع طلع من البيت... حسيت ان سهيل يبا سيف في سالفه مهمة...خفت..شو مسوي سيف بعد..!..شو بلاه هالولد يسود ويه كل يوم...!!!..اففف.. التفت لعفرا وانا اسمعها تقولي.. عفرا: هااا مهرة... علومها الجامعه...مريم اختي اتخبر عنج تقول وين تقعد ابا اشوفها... ابتسمت.. مهرة: الجامعه زينه... بس كنت اتمنى حريم يدرسني طلعوا كلهم رياييل... اما القعده فانا ماقعد فمكان معين...الظهر اتم برووحي محد عندي... عفرا: هي تبا تشووفج..قالت لي هاتيلي جدولها وانا بمر عليها وبشووفها.. مهرة: كيف بتعرفني..؟!.. عفرا: هههههههههههه هذي مريوووووم مايغلبها شي... ابتسمت... لكن ابتسامتي اختفت فجاه... تذكرت جدولي المكتوب في دفتري الاصفر اللي فقدته...واللي شله الريال على ما اظن...حسيت بقلبي يغووص حزن على حالي.... منو كان يتصور باني بطيح فمشكله مثل هذي...!!.. تمالكت نفسي وعدلت ملامح ويهي وابتسمت غصبن عني.. مهرة: بكتب لج جدولي باجر ان شاء الله.. عفرا: كتبيه اليوم عشان تتلاقن باجر بدل ماتقعدين بروحج الظهر.. قلت بسرعه وبتهور... مهرة: باجر مابسير الجامعه... فجاه التفتت لي عمتي مستغربه.. آمنه: ليش مابتسيرين.؟؟ ارتفعت انفاسي وانا ماعرف شو اقولها....فجاه تذكرت شي نسيته تماما....الحمد لله ربي يحبني يوم ذكرني بهالشي.. مهرة: عندي باجر مراجعه في المستشفى عشان ايدي... وتنهدت بارتياح يوم شفت التقبل على ملامح ويه عمتي وعفرا... انا فعلا عندي مراجعه باجر ونسيت السالفه تماما... وفرحت يوم حصلت لي عذر مقنع اني ماروح.... ---------------------------- اليوم: الاحد.. المكان: غرفة يوسف.. الوقت: الحادية عشره مساءا.. ----------------------------- (يوسف).. راقبت وقلبي يحترق وضحه وهي تطلع اوف لاين....حسيت فعلا انها النهاية... وانها اخر مره اشوفها او اسمع عنها.... تراجعت عالكرسي وتساندت...وعيني على المحادثه اللي مازالت مفتوحه جدامي..بينما العالم كلها يكلموني ويطرشولي مسجات وانا حتى مافتحت مسجاتهم ولا رديت عليها... كيف ارد عليهم وانا عندي وضحه..!! كيف اعطيهم اهتمامي في وقت كنت فيه اذبح حبنا واي امل لنا رباعه بايدي...وبنفسي...!!!... ماكنت اتصور فيوم باني انا اللي بنهي كل شي... انا الي كنت ميت عليها... ومازلت ميت فيها... انا اللي كانت عيوني تتحارق وشوي وبتنزل دموع من تيب وضحه مجرد فكرة الفراق بينا...!!..انا...!!.. مليت صدري بالهوا عشان اهدي نفسي المضطربه شوي...لكن هيهااات...!!.. عقلي في هاللحظة كان يتخيل وضحه المنهارة...شو بتسوي بعد ماطلعت اوف لاين.؟.. اكيد بتسكر الكمبيوتر وبتطيح على شبريتها وبتصيح لين ماتهلك عمرها...!!.. انا اعرفها... هذي وضحه..حياتي...اعرفها اكثر من نفسي...واكثر من نفسها...! مديت ايدي ومسكت الماوس ..ورجعت المحادثه من اول مادخلت وضحه...!!.. كنت قاسي وايد عليها...وكانت هي..متساهلة وايد معاي...مع اني اعرف في قرارة نفسي بانه وضحه اللي صار كان غصبن عليها...وبانها فعلا فرحت لفكره ان الخطبة ممكن تنفج وبانها بترجع لي...!!..لكن انا ماقدرت اتقبل فكره اني اعاني من كل هالظروف مره ثانيه اذا انخطبت من اول ويديد...او اذا رجعت الخطبه مره ثانيه بعد ماتنفج..!! هذيلا اهل...ولازم بيحلون مشاكلهم...مابيخلون العالم ترمس عليهم... قريت المحادثه ببطء...وانا اتفكر بكل كلمه طلعت منها... كيف كانت تترجاني اتفهم...كيف كانت تشرح لي بتوتر وبتفصيل كل اللي صار وياها بخصوص خطبتها.... كيف طلبت مني اصدقها..وهي عمرها ماطلبت هالشي مني لانها تعرف اني اصدقها فكل شي.. لكنها حست فيني باني مب الاولي..مب يوسف اللي حبته واخلصت له..!. انصدمت وضحه يوم قلت لها اللي عندي...وباني ابا انهي كل شي ... كل اللي بينا.... كيف سكتت...وكيف طولت لين ماردت علي...حوالي عشر دقايق اكلمها وماترد علي... وبعدها جاوبتني بـ "كيف يطاوعك قلبك؟"... تجمعن الدموع فعيني وانا اقرا جملتها مره ثانيه... كيف حسيت بانكسارها الحين..بينما من شوي يوم قالتها ماحسيت فيها وكنت معصب ورديت عليها بعصبية..!!.. فعلا كيف يطاوعني قلبي انهي كل احلامنا رباعه..!!.. كملت قرايتي للمحادثة.. وصلت للجزء اللي كانت تذكرني فيه بكل مواقفنا... ذكرتني بكل خططنا... كيف كنا نخطط لعرسنا بثقة... كيف كنت اخطط اني اتعرف على خوانها..واني ارابعهم بس عشانها هي..وكيف بخبر اهلي عنها...وكيف بخطبها....وين بنعرس..وشو بنسوي... ووين بنروح بعد العرس وكيف بنتعامل مع بعض... ذكرتني بعيالنا... كيف كنا نخطط كم بنيب من العيال....شو بنسميهم....!! واي مدارس بندخلهم... في هاللحظة الدموع المتجمعه فعيني نزلت فعلا.... كم الواحد بيتحمل..!!...كم.؟.. هذا حب ثلاث سنين يظيع فجاه جذي..؟!...كيف بقدر اتحمل وكم بكااااابر...! مهما يقولون بدايتي معاها غلط...مهما يقولون حب الانترنيت ماينفع .... مهما كانوا يفكرون باني كنت العب... مايهمني....! ولا يهمهاا... احاسيسنا كانت صادقه وفعلا كنا نحب بعض.... والا كيف كنا نحس ببعض...كيف يوم امرض هي ماتروم ترقد...وكيف اظيج انا بعد يوم احس بظيجتها...؟!.. وليش صاحت وضحه يوم انا حرمنت بمساق...هي صاحت بينما انا كنت اضحك بعدم اهتمام بوضعي...لكن هي اهتمت مني...!! كيف اني خططت بكل تهور باني اشوفها يوم خبرتني برحلتها لدبي مع التقنية..!!..وكيف طنشت كل محاظراتي ورحت دبي...بدون هي ماتدري بهالخطط... لكني ماتوفقت ولا شفتهم ...!!.. اشياء وايد تستحق الذكر بيني وبينها....لاني احبها..وهي تحبني....لكن النصيب مارحمنا...! وصار لازم ننتهي مثل مابدينا... خزنت المحادثه هذي لاني كنت احتاجها عندي...خزنتها في ايميلي..وسكرت بعدها الكمبيوتر... رحت الحمام وغسلت ويهي.. شي طبيعي اني مابقدر ارقد..مسكت سويجي وطلعت من الغرفه... يوم انا نازل تلاقيت مع ناصر يركب الدبي هو ومنى ... اطالعني ناصر... وعقد حياته... شووه..؟..ويهي يبين عليه مصابي.؟؟... ناصر: وين ساير؟؟. يوسف: بطلع.. ناصر: وين.؟ يوسف: احين انته اللي تحاااسبني شوف... التفت ناصر لمنى...وقالها.. ناصر: يالله..روحي حجرتج وانخمدي يالله... كان يهزبها بلا داعي وانا اروحي استغربت منه.. اطالعته منى وهي مبطله عينها.. منى: بسم الله انزييييييييييييييييين... وراحت منى حجرتها وناصر يظحك عليها.. نزلت انا الدري ونزل هو معاي... ناصر: يوسف شفيك.؟ التفت له اطالعه وانا عارف انه بيفهم علي... يوسف: صدري ظايج وابا اطلع اشم هوا... فعلا حسيت انه فهم.. نزل ناصر عيونه للارض ورجع رفعهن.. وسحب مني سويجي وقال.. ناصر: انا بعد صدري ظايج...بظهر وياك وانا اللي بسوق... نزل تحت ناصر قبلي وانا تبعته وانا احس بشوية ظيج...كنت ابا اطلع بروحي...مافيني اسولف ويا حد.. واذا كان ناوي يسولف بروووغه وماعليه منه... ------------------------------- اليوم: الاحد.. المكان: سيارة يوسف.. الوقت: الحادية عشره والنصف مساءا.. -------------------------------- (ناصر)... كنت اسوق السياره وانا ساكت....وبطرف عيني اشوف يوسف وهو مسند راسه على ورا ومغمض عينه...كان بلا سفره.. ولابس بجامه نوم رمادية...!!.. حسب علمي..يوسف اول مره يطلع من البيت بهالشكل...اكيد شي جايد صار...وانا متاكد بان هالشي له علاقه بحب الانترنيت هذا... بصراحه انا مب موافق علىهالشي...واحسن له ينسى... هوسة الكبير بالكمبيوتر والانترنيت خلاه يبني حياته كلها داخل جهاز...!!!...وهذا شي غلط... لازم يعيش الحياة اللي نحن عايشين فيها...مب خيال.. سكت..مقدر موقفه وماريد اني ازعجه.... لو كنا في مناطق الشمال...كنا بنروح البحر في هالظرف... لكن نحن اهل العين... المكان هذا المفضل عندنا... توجهت بسيارة يوسف لجبل حفيت... ومسكت شارع الصعوود ناوي اني اروح لابعد حد في اليبل... يوسف انتبه لارتفاع السياره..بطل عينه وتلفت ويوم ادرك وين انا رايح سكت وماقال شي.. كانه استحسن خياري هذا... وصلنا لقمة الجبل..كان في كم شخص..بس ينعدون عالاصابع...نزل يوسف وراح للحافه وتم واقف هناك.. يطالع تحت والتجهم على ويهه... خليته بروحه عشان يهدي نفسه ...ورحت للجهة الثانيه... اطالعت تحت انا بعد وحاولت اخمن...وين المنطقة اللي ساكنه فيها مهرة.... مهرة...قمت اقول اسمها بكل سهوله وكل شوي احصله داير علساني...حتى بدون مناسبه...!!!.. رجعت اتفحص المناطق واتبع الطرق... منطقتهم قريبه من جبل حفيت...قدرت اخمن مكانها رغم الارتفاع الكبير ... ومن ساعتها وانا مب قادر ازحزح عيني عن مجموعه الانوار في هذيج المنطقه..!!.. ياترى شو تسوي الحين..!!...رقدت.؟ والا تفكر فيني وباللي سويته فيها....وتتساءل ليش لحقتها .؟.. اكيد بتسال نفسها هالسؤال.... انا نفسي اسال هالسؤال ومب عارف الجواب...كل اللي اعرفه اني حسيت برغبة عارمه اني اشوفها مره ثانيه... ومن بعد ماشفتها وحصلت دفترها الاصفر الصغير....ارتحت نسبيا... ما افكر ارجع الدفتر...هالدفتر يخلي نفسي متوازنه شوي... اذا رجعته بيرجع لي الشوق باني اشوفها واخاف المره اليايه ماقدر اسيطر على نفسي واسبب لها مشاكل...!! يكفي اللي سويته بالبنت لين الحين... يكفي.. بخلي الدفتر عندي عشان يذكرني بها.. رغم اني متاكد من اني مابنساها لو طال بي العمر... لانها مش اي بنت عشان اقدر انساها بسهوله...! هذي مهرة... البنت اللي رجعتني لعقلي..ولديني...وطريج الصواب...وتحملت هي نتايج رجعتني لصوابي هذي...وعاشت بخوف دايم...بسببي انا...! تمنيت في هاللحظة فعلا انه يصيبها فقدان ذاكره وتنسى... عشان ما اتم متعقده ...وخايفه... التفت ليوسف حصلته يالس عالارض ويطالع العين من مكانه العالي...كانه يقارن مشاكله بمشاكل كل العالم اللي تحت نظره... سرت عنده ويلست عداله بصمت... وبعدها سالني بصوت هادي.. يوسف: ليش مارديت بوظبي...ماعليك دوام؟ ناصر: بلى..بروح بعد صلاة الفير ان شاء الله... يوسف: بتتعب جي.. ناصر: ماعليه..بوظبي ملل..ويوم برد من الدوام برقد.. سكت يوسف شوي وعينه مازالت اطالع العين من فوق... ناصر: تحس انك بعيد عن الدنيا صح..؟!!.. هز يوسف راسه بالايجاب ... يوسف: لو انك بعيد عنها بس مع ذلك المشاكل تلحقك... ناصر: هههههه شي طبيعي هذا.. بس بعد فتره تبدا تتساءل عن سبب المشكله فعلا وليش صارت مشكله...لانها تفقد اهميتها مع الوقت... كلامي كان مقصود...راقبت ملامح يوسف والتاثير اللي بيخليه كلامي عليه....شفته يغمض عيونه بالم..وبعد مافتحهن سكت فتره وعقبها قال.. يوسف: قوم خلنا نرد البيت...ورانا دوامات...وقعدتنا بلا فايده.. قام يوسف وركب السياره...وترك لي مقعد السايق...شكله ماله مزاج يسوق...وشكل المشكله اكبر من مجرد حب انترنيت وظاع... استغربت...بديت اشك فعلا بان يوسف من خاطره حب ذيج البنت....!!.. الله يعينه.. شو الله بلاك ياخوي وحبيت..!!.. ركبت السياره ورجعت للبيت...ورقدنا... --------------------------- اليوم: الاثنين.. المكان: بيت خلفان... الوقت: السابعه صباحا.. ----------------------------- (سهيل).... طلعت من حجرتي وانا اطالع ساعتي... يمكن اتاخر شوي عالدوام لين ماوصل سيف واتريق... مريت عدال حجرة مهرة واستغربت يوم ماشفتها مفتوحه مثل كل يوم....!! بالعاده يوم تنش ماتقر في الحجره ..كل شوي تطلع وترجع مره تكوي شيله مره تزاقر الخدامه..مره مادري شو تبغي..!!... يمكن ماوعت...!! دقيت الباب بس ماسمعت اي جواب...جربت افتحه حصلته مبطل..دخلت وحصلتهامازالت راقده... تنهدت...وتقربت صوبها... سهيل: مهروووه....مهرووووووووووووه قومي... تحركت مهرة في شبريتها بس ماقامت بعدها.. مديت ايدي ومسكت كتفها...وهزيتها شوي... سهيل: مهرره....مهرووه قومي...قوووووومي..!!!..هب رقاد عليج حشى...! بطلت مهرة ببطئ...وطالعت فيني لحظة..او اقل من ثانيه...فجاه فزت وقعدت في شبريتها وهي تصارخ.. مهرة: لااااااااا ...لااااااااا ...حرام عليك... - - - - انصعقت... وقفت مكاني وانا اطالع مهرة اللي ماقدر اوصف حالتها بانها "مرعووبه" لاني بقلل من الوصف...!!.. ماعرفت بشو افكر...ماعرفت شو اقول وكيف اتصرف...تميت بس اراقب...وكل التساؤلات وضحت على ويهي... بطلت مهرة عيونها اكثر ..ورصصتهن...وهي تتنفس بعنف... مهرة: سهيييييييييل..!!!..آآآه...(ورجعت انسدحت على شبريتها)..روعتني... تلحفت وغمضت عيونها....اما انا طلعن ينوني...مديت ايدي وسحبت اللحاف عنها بقوه.. سهيل: قووومي...قومي... مهروووه..منو هذا اللي حرام عليك..؟!!!.. تنهدت مهرة بتعب ويلست عالشبريه وهي ترجع تسحب اللحاف وتغطي نفسها... مهرة: محد... صارخت عليها بعصبية.. سهيل: رمسي...منو هذا..؟!!!.. اطالعتني بعصبية... مهرة: منووو بيكون يعني..!!..محد..كنت احلم...دهمانه...حرام الواحد يحلم..؟ عقدت حواجبي اكثر... لو اني ماعرف اختي زين مازين جان فعلا شكيت..لكن مهرة فعلا ماتطلع...وماتخالط ناس... ومب من النوع اللي يتكلم في التيلفون..ماشوفها ابدا يالسه تتكلم في التيلفون....عيل ليش الشك..؟!!... سهيل: تحلميين.؟؟ شو حلمتي..؟ قامت مهرة من الشبريه وهي تقول.. مهرة: اوهووووووووووو... راحت صوب الحمام...وقبل ماتدخل صرخت عليها مره ثانيه....اكره ماعندي حد يتجاهلني بهالطريقه ويطنشني... سهيل: تعاااااااااااااالي... وقفت مهرة مكانها والتفتت لي بتعب... سهيل: شو حلمتي.؟ مهرة:........حلمت ان حد يهاجمني...ويبا يضرني.. كوابيس...ماكد حلمت كوابيس..؟؟ اذا تبا خذهن من عندي لاني شبعت من الكوابيس وقمت اعتبرها احلام عادية... رجعت تلتفت ودخلت الحمام...اما انا غمضت عيني ورفعت ايدي افرك بها ويهي.... اصبحنا واصبح الملك لله....فعلا روعتني بكلمتها " حرام عليك"... تروعت من الخاطر... تنفست بارتياح وانا اعرف ملابسات الموضوع وباني تسرعت بالحكم عليها...مسكينه امحق قوومه قامتها اليوم.. يلست عالشبريه اترياها تطلع من الحمام... وبعد دقايق طلعت وهي ماسكه الفوطه وتمسح فيها ويهها وايدها وشعرها..وفرتها عالشبريه وتجاهلتني وهي تروح للتواليت وتسحي شعرها وتربطه... تلومت فيها... زعلت لاني شكيت فيها.. سهيل: تاخرتي بالنشه اليوم..تعبانه؟ مهرة:.........لا...مابسير الجامعه اليوم.. سهيل: ليش.؟ مهرة: عندي مراجعه في المستشفى... بتوديني.؟ سمعت نفسي اقول بدون تفكير.. سهيل: بترخص من الدوام وبوديج بعد ساعتين او ثلاث... استغربت من نفسي... كل هذا لووم.؟؟؟ ... بس انا ما انلام فعلا كلامها يشكك وبحكم اني اخوها ومسؤول لازم اني بهتم وبسال...!!.. بس شفت مهرة تبتسم... احسها تستانس يوم تسير ويا حد من خوانها غير عمتي.. قمت وطلعت من الحجره ونزلت تحت...حصلت سيف يترياني ويتحرقص ..اول ماشافني قال.. سيف: تاخرت اليوم...يالله يالله لا تتريق وصلني وتريق عقب في الدوام... سهيل: بسم الله... راقبته وهو يمشي بسرعه لسيارتي...اما انا دخلت اسلم على ابويه وعمتي...ورجعت طلعت ورا سيف... وصلته المدرسه ورحت دوامي... وبعد ثلاث ساعات ترخصت منهم ورجعت البيت... ماحصلت سيارة عمتي موجوده..يمكن طلعت... حتى سياره ابويه مب موجوده... دخلت البيت وركبت فوق ودقيت على مهرة الباب... مهرة: مفتوووووح.. دخلت وحصلتها تلعب عالكمبيوتر.. سهيل: يالله جان بتسيرين... مهرة: اووكي احين بتلبس وبنزل.. رديت اطلع ونزلت تحت ويلست اتريق..لاني كنت يووووعان... وبعد دقايق نزلت مهرة وهي لابسه وجاهزه... شليتها ورحت معاها للمستشفى عشان يشوفون ايدها.... ----------------------------- اليوم: الاثنين.. المكان: ميلس بيت سلطان.. الوقت: الثامنه مساءا.. -------------------------------- (يوسف).... الكل كان منتبه علي اني مب رايق ومب على طبيعتي...لكني ماكنت اقدر اقول ولا حرف لاي شخص.... ناصر اللي هو يدري بحالتي...ماقدرت اكلمه... وخالد من شافني في الجامعه وهو يسالني شوفيني...وماكفاااه هالشي..لحقني لين البيت ويالس يسوي وياي تحقيق من صلينا المغرب...!! التفت له وسالته عشان اغير السالفه... يوسف: تعال شو اخبارها خطيبتك..؟؟؟ الامن مستتب..!! اطالعني خالد مقهور... خالد: قسم بالله ولا ادري عنها شي....اللي اعرفه انه الواحد يوم يخطب وحده يبدون يخبرووونه عن هالخطيبه ..كيف شكلها وكيف اطباعها وشو حركاتها وشو سوالفها...لكن انا من يشوفوني دخلت عليهم مكان ويكونون يرمسون عنها...سكروووا السالفه سييييييييييده...ورمسوا عن شي غير... ويوم بيي اسالهم..شحالها فلانه شواخبارها...؟ يطالعوني بنص عين..اخ عليك..وعيب..وشو هالحركات..وشباب هاليومين مايخيلووون...!! يوسف: هههههههههههههههههههههههههههههههههههههه... بغيت اموت من الضحك...ولو انه مالي مزاج للضحك بس فعلا ضحكني شكل خالد وهو يتحرطم.... فعلا شي يقهر...بيتزوج وحده مايعرف عنها شي...وغريبه عنه تماما... خالد: والله صدق يوسف منقهر من خاطري عليهم... يقولون اون يوم بتملج بتعرف كل شي عنها... يوسف: ههههههههه الله يعينك...انزين املج .. خالد: ثرهم طايعين..؟؟ هاهاهااااي.. بعدك ماعرفتهم.... اون قبل العرس باسبوع..اسبوعين...بنلمج...وبعد احسهم مابيوافقون اني اشوفها...يالله يالله جان كلمتها في التيلفون بعد.. يوسف: ليش عاد التشدد هذا كله....خلاص بتصير حرمتك.. خالد: في من العوايل مايتقبلون فكرة ان بنتهم بيكلمها ريال غريب فجاه حتى لو كان ريلها...تلقاهم حتى بعد العرس يسالون بفضول شو يصير ويا بنتهم ... يوسف: صدقهم انزين...بنتهم يربونها طول عمرها ويعلمونها الاصول والحشمه ويعرفون كل شي عنها...اخر شي تي انته تاخذها بارد مبرّد... ظحك خالد ...وكملت انا كلامي... يوسف: لازم يعذبونك شوي تحمل.. خالد: جي حتى انا تعبانين علي اهلي وهي بتاخذني بارد مبرد... يوسف: وابوي عليك انا...انته بتم عند هلك هي اللي بتفارقهم... خالد: والله بيفتكون من المصرف..انا اللي بتيني الخساير.. يوسف: ههههههههههههههههه قلنا ادخل كلية الاداره بس مب معناته انك تفكر كله بالفلوس.. خالد: والله هذا هو حال الدنيا... ملامح ويه خالد وكلامه دوم يظحكني...ماقدر امسك نفسي وياه....مادري كيف هالانسان لو يقول نكته باااااااااااااااااااااااايخه بضحك عليها...لانه عنده طريقه غريبه في الكلام تخليك تضحك غصب طيب.. كملنا نص ساعه بالسوالف بعدها خالد روح عني بحجه ان عنده شوية اشغال في الصناعية... دخلت بيتنا بعد مارجع مزاجي للنكد.....وشكله التيلفون يترياني ادش البيت بس عشان يرن... وكانوا كلهم موجودين في الصالة... ابويه وامي...ميثا حرمه محمد...ومنى... اللي نقزت من سمعت التيلفون...وانا غياضا فيها مسكت السماعه ورفعتها وحطيتهاعلى اذني وهي اطالعني وحايسه بوزها...ووقفت عدالي تتريا.. يوسف: آآلوووه..؟! كنه: السلام عليكم.. كانت كنه....عرفتها من صوتها اللي حفظته في الفتره الاخيره...فكرت في جزء من الثانيه كيف بيفرحها اذا بينت لها اني عرفت صوتها..!!... بكسب اجر اذا فرحت انسان..صح.؟.. يوسف: وعليج السلام والرحمه هلا كنووه... جاوبتني بسكوت... وعيني انا كانت اطالع منى اللي كانت تراقب بعيون تلمع.... كنه:.......... اهلييين...همم شحالك؟ يوسف: بخير الحمد لله...شحالج انتي؟ كنه: بخير.. حسيت انها منحرجه... يوسف: تبين منى...؟ كنه: لا ابا بشكارتكم... نقعت من الظحك ولو انه ماكان لي مزاج مره ثانيه بس الظاهر العالم كلها متعاونه علي يظحكوني في اوقااات..!!... يوسف: ههههههههههه...لحظة شوي... وزاعجت باعلى حسي... يوسف: جووليييييتااااا..... جوووووووووليتااااااااااااااااا.... كانت منى تظحك وهي تظاربني عالسماعه وانا مب طايع اعطيها... لين مايت خدامتنا جوليتا وعطيتها السماعه... يوسف: some body want to talk with you… استغربت البشكاره ومنى ماتت من الظحك... خذت البشكاره السماعه ورمست شوي وانا اسمع امي تقول محتشره.. ام محمد: وااابووووي يا يوووسف بتعلم البشاكير يرمسن في التيلفون بعد...!!!! امي وايد كانت حاره عالبشاكير.... ييت ويلست عدالها وانا اشوف منى تاخذ السماعه من البشكاره ...وجوليتا تنسحب وتطلع وهي تظحك من هالمقلب... يوسف: اسوي سوالف على كنووووه بس... ظحكت ميثا على اختها... ميثا: شو قالت لك.؟ يوسف: تستهبل عليه اقولها تبين منى ؟ تقولي لا بشكارتكم... ظحكت امي وميثا...اما انا يلست اسولف ويا ابويه لين مايا محمد...وتعشينا رباعه... ------------------------------- اليوم: الثلاثاء.. المكان: بيت بو راشد... الوقت: الرابعه عصرا.. ------------------------------ ( شيخه)... رجعت السماعه مكانها وانا متظايجه...راشد تيلفونه مغلق... اوووف متى بايي...ولد فاطمه الصغير اللي سموووه (خليفه) على ابويه ..صياح وااايد ومايسكت... وقفت عند الدريشه اشوفه اذا وصل او لا.... بس محد كان في الحوش...رجعت لفاطمه وانا اتنهد... شيخه: مااياااا..وتيلفونه مغلق... هزت فاطمه خليفه الصغير بين ايدها تحاول تسكته... فاطمه: ياربيي الله يهديه قلت له انا مستعيله اباه بسرعه... دخيلج شويخ رتبي ثياب فهوودي في الشنطه الصغيره... نفذت الامر وقعدت ارتب اغراض فهد واحطهم في الشنطه الصغيره.... فاطمه كانت محتاجه بامبرز لخليفه... وماعندها بامبرز تغير له والولد متظايق....وطرشت راشد اييبلها من الجمعية بامبرز لانه الدكان كان مسكر الظهر....!!.. فاطمه كانت تتريا عبدالله بايي..حسب مافهمت انه بايي العصر يشلها ويرجعها دبي... لانه خلاص مايقدر يصبر بلاها...وهو عنده شغل مايقدر يخليه ويقعد هني...اما هي خلاص ربت وصار لازم ترجع بيتها... بصراحه انا كنت متظايقه لانها بتروح...كانت ماليه علي البيت وتسولف معاي...احين بجابل اليدران من اول ويديد ...اوففف... رجعت ارتب الاغراض ....وفجاه سمعت صوت هرن... قالت فاطمه بحماس وارتياح.. فاطمه: هذا راشد يباج تشلين البامبرز...طيييري.... هالولد اذاني بصياحه... قمت انا بعد بارتياح لاني بفتك من صياح خليفه المزعج... طلعت من الحوش وانا اتوقع اشوف راشد....لكني بدل ماشوف سياره راشد....شفت سياره مورسيدس كوبي حمرا... وطالع منها عمر.. اخو عبدالله وهو لابس نظاره شمسيه...!!!.. انصدمت..ماقدرت اتحرك تميت واقفه مكاني....والشيطان المكار انتبه لي وشافني...اول ماشافني ابتسم... عمر: اهلييييييييييييييييين... شهقت انا من زود الصدمه ورجعت بسرعه داخل البيت وانا اسمع ظحكته العاليه... كنت في قمة الغيظ....هذا كيف يدخل بيتنا جي....!!!!.. وكيف هالبقرة ماتقولي ان عمر اللي بايي..مب عبدالله..!! شيخه: فطوووووووووووووووووووووووووم....!!!.. دخلت حجرة فطوم مثل العاصفه... وهي اطالعني ومبطله عيونها...وقفت انا وحطيت ايدي على خصري بعصبية واضحه ورصصت عيوني... والظاهر ان فاطمه فهمت اللي صار...تبدلت ملامحها وقالت.. فاطمه: لا...لا تقولين... صارخت عليها.. شيخه: طلعي من بييييييييييييييييتنا انتي اخو ريلج هذا...... يلست فاطمه عالشبريه مب قادره تمسك نفسها من كثر الظحك....وانا اسبها واسبها ولو مب الادب (الي باقي منه شوي فيني).. جان قمت وظربتها بعد...!!!. اخر شي قالت بلهجة ممطوطه ورخوه... فاطمه: آآآآآآآآآآآآخ ياشويخ اسميج تحفه....مسكي مسكي خليفه بسير اشوف عمر... شيخه: رووووووووحي انتي وولدج مابمسكه شليه وياج... فاطمه: يالله عاد شويخ مسكيه شوي برد مابطول... حطت الولد بين ايدي وطلعت وهي تلبس شيلتها...وتظحك وتظحك.... صارخت عليها وهي تطلع.. شيخه: ياحمااااااااااااااااااااااااااااااااااره اكرهج... لكن لاحياة لمن تنادي....فاطمه فعلا مية من الظحك علي وعلى اخو ريلها السخيف...مب ريلها السخيف...اخو ريلها...اووووووووه...!!! قعدت اهز خليفه واهزه عشان يسكت واحاول اني الفت انتباهه..لكن هالولد بو ويه معفص مب مسولي سالفه وفاج النطح ويزاعج... افره من الدريشه..!!!.... بعد فتره رجعت فاطمه وهي تبتسم بخبث وشاله البامبرز في ايدها...وشلت ولدها عني... شيخه: يا راشد.؟ فاطمه: هي توه..خليته ويا عمر..ههههههههههههههههههههه... وردت تظحك يوم تذكرت عمر.... اما انا التفت عنها الصوب الثاني وانا اهدي اعصابي.... فاطمه: ههههههههههه يقولج... ههههههههههههههههههههه...يقولج عمر مبرووك لانه شعرج طول..ويسلم عليج ويستسمح منج للمره الالف...ويقول بعد بس خلاص سامحي... اطالعتها انا بنص عين وكلامها ابدا ماهز شعره فيني... شيخه: ذكريني اعطيج دراااااااااااااااام حقه يوم بتسيرين خله ينقع فيه هووو واخته ليلوووووووووه اللي ما اجذب خبر وكل شي تنقله لاخووووووها السخيف.. فاطمه: هههههههههههههههههههه...شو خصها ليلى.؟ شيخه: منوو غيرها يعني خبره انه شعري طول.؟؟...هي سائلتني ذاك اليوم يوم يت المستشفى وياه هالسبال.. فاطمه: بس عاد عيب تسبين الريال جي.. شيخه: ومب عيب عليه هو اللي يسويه مايحشم حد...عيل يوم يشوفني بدال ماينزل راسه ويحترم اهل البيت ..يقوم يشق الحلج ويقولي اهلييييييييييييين جني واحد من ربعه..!!!!!! فاطمه: حليله يستانس يوم يشوفج.... شيخه: سكتي لا تخليني ادعي عليه... فاطمه:..لا يابوج خلاص لاتدعين عليه...كملي ترتيب بليز... كملت ترتيب اغراض فهوود وانا ساكته... وبعد ساعه... سلمنا على فاطمه اللي شلها هالسبال ووداها دبي... ورديت انا اجابل عيووزي... ---------------------------------- نهاية الجزء التاسع عشر تحياتي |
شكرا عالاجزاء الروووعه ،،، بس عندي سؤال ،،، من وين ما تنقلين القصة ،،، القصة مكتملة ولا بعدها الكاتبة او الكاتب ما ادري المهم حط الاجزاء كاملة ولا ....؟؟ |
حياتي مشكوررررررررررررة من قلبي منتظرتك بكرة نشوفك على خير .... take care :)
|
عزيزتي شجون لاتحاتين القصة طويلة .....
ولها تكملة ان شاء الله راح تتكمل القصة من مكان النقل ........ وفيه اجزاء رائعة راح تنزل .... تسلمين عزيزتي بيرلا على التواصل ياقلبي ..... واليوم راح انزل الجزء ان شاء الله بالليل ..... تحياتي |
بالليل الحين شنو الفرق تكفين نبي التكملة بسرعه
دموع الفراق |
تابعوا معاي الجزء اللي بعده :char0248 وابي اشوف ردود حلوه b:7 الجزء العشرين.. ----------------------------- اليوم : الثلاثاء... المكان: في احد مطاعم ابوظبي.. الوقت: التاسعه مساءا.. ------------------------------ (ناصر).. كنت يالس مع عبدالعزيز وربيعه علي في احد المطاعم... عبدالعزيز كان عازمنا عالعشا... اغلب قعدتنا كانت سوالف جاده ..ثقافية ودينيه... صح اني افتقدت ربعي والضحك والسوالف وياهم والمصخره...!! بس اليوم احس كل دقيقة تمر علي استفيد شي يديد من هالشخصين هذيلا... كانوا قمة في الاحترام... علاقتهم ماتعطيهم ابدا انهم مدير وموظف.. صايرين اعز ربع...! صاح تيلفوني في هاللحظة ..مديت ايدي للطاوله وخذته..وعيون علي وعبدالعزيز تلاحقني بفضول..شفت اسم امايه عالشاشه..ابتسمت لهم متفشل.. ناصر: عيوزنا متصله.. ابتسموا ورجعوا يسولفون رباعه بصوت واطي..عشان يبينون لي انهم مابيتسمعوني فرمستي.. ناصر: مرحبااا امايه. ام محمد: هلا فدييتك...شحالك ابووويه..؟! ناصر: بخير الحمد لله شحالج انتي..وشحالهم في البيت.؟ ام محمد: كلهم بخير وسهاااله ماعليهم شر...انته شو علووومك..ماشي يعورك..؟ رفعت حواجبي مستغرب..!! ناصر: لا امايه ماعليه شر... ام محمد: الحمد لله ياولدي طمنتني.. ناصر: جي شو صاير.؟! ام محمد: والله اني حلمتك حلم وخايفه افسره.. ابتسمت انا.. ناصر: اطمني انا ماعليه شر .. ام محمد: ان شاء الله فديتك...صليت الغالي؟ ناصر: هي امايه... حسيت اني يااااهل...ان شاء الله بس علي وعبدالعزيز مايسمعون صوتها وكلامها... ام محمد: ياحيك..تعشيت.؟ ناصر: احينه بتعشى...شو فخاطرج امايه رمسي..؟! ام محمد: وشو عرفك ان فخاطري رمسه..؟!. ناصر: ادريبج لو بعدني ماعرفج.. ام محمد: والله ياولدي الحلم اللي حلمته..شفتك معرس بس مب مستانس.. ناصر: ههههههههههههههه الحمد لله طلع الحق..شفتي يعني تدرين اني اذا انغصبت مابستانس.. ام محمد: ياولدي يمكن الحلم يكون العكس خلني اخطب لك انته بس وعين من الدنيا خييير.. ناصر: امايه...اناعندي رياييل الحينه بعدين برمسج.. ام محمد: تجذب عليه..!! ناصر: واللــــــــه انه عازمني ريال عالعشا .. سكري ويوم برد العين برمسج... ام محمد: الله يهديك ياربي.. ناصر: امايه.!! هب تسيرين تسوين شي من دون علمي.. ام محمد: لا حشى مابسوي شي ادريبك بتكسر كلمتي وبتفشلني عند الناس اذاماعيبك شي.. ناصر: هههههه ماعاش من يكسر كلمتج بس بعد هذي حياتي لا اتحكمون فيها.. ام محمد: شو بقول..!!..الله يهديك ويهدي بالك..يالله ابويه تعشى زين..فمان الله.. ناصر: مع السلامه امايه.. سكرت عن امي وانا ابتسم..في نفس الوقت متخوف...تسويها امي وتخطبلي وتكسر كلمتي..لانها اذا طفح الكيل عندها وحطت في بالها فكره ماعليها من حد.. التفتوا لي علي وعبدالعزيز والابتسامه على ويوههم.. ناصر: الوالده محتشره.. عبدالعزيز: جي شو بلاها.؟ ناصر: ههههه...تبا تيوزني.. علي: صدقها...وانته شو وراك ماتعرس.. ناصر: يبوني اخذ بنت عمي واناماريدها..بس ادريبهم مابيطيعون يخطبون لي غيرها..!! عبدالعزيز: وشوفيها بنت عمك ماتباها.؟ ناصر: مافيها شي بس مالي نفس عليها..ماتناسبني.... علي: انزين خبرهم بهالشي وبيتفهمونك.. ناصر: كذا مره لمحت لهم.. وهم يدرون انها ماتناسبني ولا ابغيها...لكن يسمعوني نفس الرمسه.. علي: اي رمسه.. ناصر: عيال عمي يتامى...ومالهم غيرنا.. هز عبدالعزيز راسه بتفهم..لانه متحدر من عايله متعصبه شوي...لكن علي كان يباله شوي شرح.. علي: وشو يعني.؟؟ ناصر: يعني انا ملزوم بها..بنت عمي ويتيمه كيف اخلي الغريب ياخذها وانا موجود..؟؟ لو فحياة ابوها ماعليه كل شي نصيب بس وهي يتيمه..!!.بيضحكون علينا الناس. رفع علي حواجبه باستغراب.. علي: الناس بعدهم يفكرون جي.؟ الله يعينكم....انزين وشو الحل.؟ انته ماتقدر تتقبلها بنت عمك.؟ هزيت راسي باصرار... ناصر: مستحيل اخذها هذي.. علي: مب متدينه..؟ ناصر: ما ادري عن دينها...بس البنت خبيثه وراعيه مشاكل ماباها.. علي: واحين شو بتسوي مابتعرس.؟؟ ناصر: لين ماتعرس بنت عمي مابعرس... عبدالعزيز: واذا كانت ترد الرياييل اللي ايونها عشانك.؟ ناصر: مشكلتها.. علي: هذا مب كلام ياناصر... حرام مستقبل البنت يضيع وانته مب مبين لهم موقفك...كلمهم قولهم ماريدها... ناصر: ماقدر...مب حلوه فحقهم او فحقي بصراحه... ضحك علي... علي: عيل تصرف مثل ما انا تصرفت.. ضحك عبدالعزيز بعد.. عبدالعزيز: انته غيير وهذيلا غير ياعلي... علي: شو اللي غير يعني..؟؟ مب ريال وشوره في راسه.!! استغربت...عن شو يتكلمون..؟! ناصر: شو سويت..خبرني.؟! علي: الله يسلمك انا ظروفي في زواجي كانت مختلفه شوي ...انا متحدر من عايله الله منعم عليها يعني.. وقبل ما اعرس بسنتين جي في عرس اخويه..كنت في بداية التزامي..شفت عرس اخويه فيه يميع الخسر..مثل ماتقول يعني..اسراف.. من الخاطر اسراف.. والاسراف حرااام.. انزين قلنا عندكم نعمه وخير مب جي تعقون فلوسكم اتباعا للمظاهر والتفاخر...!!.. المهم انا ماعيبني الوضع.. كنت ايامها خاطب وحده من بنات العرب...قلت لامي انا ماريد هالشي يصير في عرسي..وابا يكون ضمن المعقول ومافيه اسراف..بس الشي الضروري..وكذا وكذا وكذا.... شدتني السالفه... ناصر: وبعدين.؟ علي: احتشرت عليه..واشتل البيت كله يوم درا انا شو ابغي اسوي فعرسي...وقالوا اني بفشلهم في العرب..وبحرق ويوههم... وفي النهاية طلبوا مني مااتدخل كانه مب عرسي انا...سكت فتره قلت يمكن يحترمون رغبتي..لكن اللي شفته في حفله الخطوبه كان فوق قدرتي عالاحتمال..تخيل اسرافهم زاااد كانهم يبون يقهروني انا بس...العايله اللي كنت خاطب عندها كانت بعد عندها خير فمثل ماتقول كانوا يتجاكرون بالمظاهر والفشخره... ناصر: وشوو سويت عقب.؟ علي: الله يسلمك ترييت اسبووع لين هدت الامور..وسرت عند العايله اللي انا خاطب عندها بروحي..وقلت لهم السموحه لكن ماشي نصيب بينا والحمد لله انها كانت خطبه بس.. وقتلهم شي انبنى على اسس غلط ..واسراف وغيره ..زواجي بيستمر على نفس الحال وحرمتي بتم اطالع باقي الحريم وتطلب اشياء خياليه بس عشان ترضي غرورها...وزعلوا علي وايد وصارت مشاكل..المهم ان بنتهم عندهم وانا مابدخل نفسي بهالشي...وفجيت الخطبه.. انصدمت من قوة هالانسان...كيف جي يسوي..؟!!... ناصر: قوية الصراحه علي...!! علي: قوية والا غيره اهم شي الواحد يرضي ربه يابوي...ويسوي شي يرضي ضميره.. ناصر: واهلك شو سووا عقب.؟ علي: الا قول شو ماسووا...امي الدعا دعت عليه...تخيل..وابويه راغني من البيت..واخواني قاطعوني.. شليت شنطتي ايامها وسافرت للشام...مع واحد من ربعي.. والمسجد اللي كنا نصلي فيه كان الامام فيه شاب شامي محترم عالآخر...تعرفنا عليه وعزمنا بيتهم كذا مره...وعرفت ظروف معيشتهم وكيف انه كلهم وكل اهله ملتزمين اشد الالتزام... وانا بنفسي شفت حريم بيتهم باي صوره يطلعن من البيت.. والله ماتشوف منهن غير الجوتي فطرف ريولهن..محتشمات عالآخر حتى ماتعرف اللي تشوفها هذي بنت والا حرمه عوده من كثر ماكل شي مغطى.. ناصر: انزيييين.؟!!..وعقب.. علي: عجبني اللي شفته بصراحه...قمت خطبت من عندهم بنية... وفي خلال اسبوع صارت حرمتي... ناصر: لحظة لحظة..لا تستعيل بالشرح ..اشرح لي شو سويت بالتفصيل.. ضحك علي وعبدالعزيز على حماسي تجاه القصة...بس فعلا ياناس شدني هالموضوع... علي: الله يسلمك هم اجراءاتهم بسيطه وماتحتاج التعقيدات اللي عندنا...كتب كتاب ومهر وشبكه...وحفله بسيطه عائليه مثل كانت انا اتمنى... وخبرني علي تفاصيل اعراس هالناس...وقارنا بين مهر العروس في بلادنا ومهر العروس عندهم...وعندنا مايكتفون بس بالمهر.. طبعا تبا فوقهن 100 الف او 150 الف عشان تجهز نفسها طبعا من غير المهر...اما يوم قالي المهر في الشام وكيف ترتيبات زواجه بصراحه انصدمت.... كمل علي كلامه بكل رضى... علي: والحمد لله ياناصر..والله ان هالحرمه فيها بركه ...وزواجي عمره مامر بعثرات...بس عثره وحده وهي يوم خبرت اهلي..اول شي مانعوا وعصبوا لكن تعال شوفهم الحين...والله يموتوون فيها اكثر من حريم خواني كلهن... ومن خذت هالحرمه وانا متوفق..الحمد لله.. لكن تخيل رضيت بشور اهلي وخذت ذيج البنت الله يستر عليها انا ماعرفها ولا اعرف شخصيتها بس متاكد انه من اول شهر تلقاني متظارب وياها عشرين مره... قال الرسول عليه الصلاة والسلام : اظفر بذات الدين تربت يداك... وهذي حرمه عارفه ربها...وتطلب رضاه..شو ابغي انا اكثر من جي.. تنهدت انا بعد ماانتهت القصة... ناصر: بصراحه ياعلي ماقدر اسوي شراتك.. علي: ههههههههه والله انا ماغصبتك.. ناصر: مب جي..بس...اهلي..بعدين عمري ماتخيلت نفسي اخذ شامية..!!!.. وايد من بنات الدار متدينات وملتزمات.. علي: ادري..بس شوف عرسك كيف بيستوي...!!..بيسوون اللي ماصار ولا استوى بس عشان الناس كلها ترمس فيه بعد مايخلص العرس ويقولون عرس فلان والله بيض الويه ماخلوا شي مايابوه...خصوووووصا انتوا اهل العين...تحبون وايد المبالغه في الاعراس...وبتركبك الديون من فوق لين تحت...وبتبدا حياتك الزوجيه كلك هموم متى بتادي هالدين ومتى بيمشي معاشك كامل مثل قبل العرس...ومتى ومتى...وفوق هذا بتتحمل دلع الحرمه وطلباتها وانته ساكت لانك في بدايه زواجك ماتباتعطي صورة مب زينه...وبتخسر اكثر واكثر....صح والا.؟ كلامه صحيح ياجماعه... ناصر: هي والله انك صادق.. علي: وعقب هالعرس عاد بتحصل راحه البال اللي انته تحلم فيها.؟؟ ناصر: والله هذا عند ربي مادري انا بهالشي.. علي: ادري.. بس بنات الدار رغم الثقافة الموفره لهن صارن جاهلات اكثر بامور الحياة الزوجيه مب مثل حريم اول...صارن على كل شي يبن يسون مشكله..ودلوعات عالآخر..!! ناصر: مب كلهن ياعلي لاتجمع... علي: ادري مب كلهن...عالعموم انا نصحتك...والله يوفقك بما يحبه ويرضاه... حسيت براحه يوم شفت الابتسامه على ويه علي..شكله ما عصب لاني ماتقبلت نصيحته هذي...مبدئيا..انارافض... لكني فعلا بديت اقارن...كملنا عشانا ونحن نتكلم بامور ثانيه مختلفه... -------------------------------- اليوم: الاربعاء.. المكان: في الجامعه... الوقت: التاسعه صباحا... --------------------------------- (مهرة)... دزيت باب الكافتيريا ودخلت وانا ماسكه كتبي اللي استلمتهن امس من مركز توزيع الكتب...مشيت شوي شوي وانا ادور بعيني عالبنات...كنت ادور حمده وعليا...هذا موعدنا نتلاقى هني..لكني اليوم مااشوفهن..فجاه نطت بويهي بنت..مالوف شكلها...شعرها لين كتوفها مفتوح..وفيه خصل ملونه اشقر على احمر...والباقي بني...!!..وتظحك.. البنت: هلاااااااا والله بالمزاييييين... ابتسمت انا بتردد.. مهرة: اهلين.. مسكتني البنت وباستني بقو على خدي..وبطريقه..شوي حسيتها لاصقه فيني عشان جي ابتعدت.. البنت: شحالهم هل العين...شخبارج؟ مهرة: بخير الحمد لله شحالج انتي.؟ كان واضح على ويهي اني ماعرف هالبنت...!!واحاول اتذكرها.. قالت لي البنت وهي تغمزلي.. البنت: شكلج الا ماتذكرتيني..!! ابتسمت.. مهرة: سمحيلي ..انا ذاكرتي شوي ضعيفه... البنت: هههه ماتنلامين حبيبتي..انا هند اللي قاعده وراج في كلاس الكمبيوتر... ابتسمت انا.. في كلاس الكمبيوتر يالله يالله انتبه لنفسي وللدكتور اللي يتحرك وايد في الصف..تباني انتبه لها بعد..؟ كملت البنت.. هند: ..بس امس كنتي متنقبه...لكني عرفتج من عيووونج... مهرة: هههه ..هي قررت اني اتنقب عن الاساتذه.. هند: حلو والله...منو ادورين؟ مهرة: والله ادور ربعي ماحصلتهن اليوم.. ورجعت ادور بعيني عل وعسى احصلهن وافتك من هذي اللي نشبت فيني.! لكن هيهات.. هند: ماحصلتيهن..عيل والله تين تقعدين معاي... بطلت عيوني متورطه.. مهرة: لالا الغاليه ماريد ازعجج وهن يتريني اكيد احين بحصلهن.. هند: انزين يلسي عندنا يالين ماتحصلينهن هب اتمين واقفه جي..تعالي تعالي.. مسكتني من ايدي وسحبتني وراها..وحمدت ربي انها مب ايدي المكسوره لانه البنت شوي دفشه... مشيت وراها وانا اشوف وين بتوديني..وانصدمت يوم شفتها وقفت عند طاوله طويله متروووسه بنات اشكال وانواع...ومن النوع الفرفوشي اللي وايد يتحرك ويزاعج.. ابتسمت لهند.. مهرة: الغاليه مافي داعي..استحي اقعد والله... هند: شحقه تستحين افا عليج..لانج ماتعرفينهن يعني؟ احين بنحل هالمشكله.. وصرخت عليهن في وقت كان ويهي يحترق من القفطه.. هند: سمعن ياشلة الانس.. هذي الشيخه مهرة من العين دار الزين...وبتقعد ويانا اليوم... قامن بنات الشلة كلهن يرحبن ويسلمن علي.. ومادريت بعمري الا وانا يالسه بين هند وبنت ثانيه وشكلي جذي طفيلية وكل العيون متسلطه علي.. وبدن معاي تحقيق.. لكني بعد لحظات توترت فعلا يوم اكتشفت ان وحده من البنات اليالسات هي نفسها البنت اللي كتبت لي رساله من قبل..ويالسه بعيد على راس الطاوله واكتفت بالمراقبه مع ابتسامه صغيره..!! قالت لي وحده من اللي يالسات جدامي.. البنت: ماكد رحتي السكن..؟؟ مهرة: لااااا..ولا افكر اسير.. تظاحكن البنات.. البنت: ليييش.؟ مانذبح نحن والله... مهرة: ههه ادري بس..مادري... ليش اسير هناك يعني.؟ البنت: للتغييير...ماتبين تعرفين كيف السكن من داخل.؟ انا يوم ييت هني ماتوقعته جي.. قالت بنت ثانيه.. البنت: تدرين مب كل السكنات نفس الشي... شي جديم وشي يديد...يعني شي حلو وشي شييين والحمد لله طحنا على سكن يديد.. مهرة: كلكن من بنات السكن..؟؟ نطت لي وحده من بعيد يالسه عدال البنت اللي كتب لي رساله من قبل... البنت: لااا..انا وشما وبخيته من العين.. اشرت لي البنت على البنات الثانيات ربعها...كملن البنات سوالف بينما انا رجعت ادور مره ثانيه على حمده وعليا... ياترى وين راحن اليوم وخلني..!!!.. بعد دقايق شفت جدامي ريوق ماطلبته..لكن الشله هذي تكفلت بانها تشتريلي ريوق..حتى ماشاورني شو ابغي..ياحليلهن..!! هند: ماشاورناج شو تبغين خفناج ترفضين الريوق..بس اذا تبغين شي ثاني ببدله لج الحين.. مهرة: لا والله عادي..مشكوووره هند تعبناكم وثقلنا عليكم.. هند: لا والله بالعكس فرحانين بج وليتج دوم تقعدين ويانا... قالت سلوى..البنت اللي كتبت لي الرساله.. سلوى: وليش ماتقعد ويانا.؟؟ الا جان مب قد المقام..!!! اطالعتها باستغراب..واضطريت الجأ للمجاملات.. مهرة: لا الشيخه كلكن والنعم.... اطالعتني سلوى بنظره ماكره..وقالت لهند.. سلوى: هند بادليني بالمكان.. قالت هند بغلاااااااسه.. هند: اووه اووه...شحقه ابادلج آنسه سلوى كرسيه غير كرسيج يعني.؟ سلوى: هي كرسيج فمكان استراتيجي سلفيني اياه شوي... هند: ههههه حاضرين انا ماقطع نصيب حد .. ظحكن البنات اما انا ظايقني قولها.. جي ريال هي يايه تخطبني عشان يقطعون نصييبي.؟ صدق البنات عليهن حركات..!! تبادلن سلوى وهند..ويلست سلوى ويلست عدالي.. وقربت الكرسي اكثر..وقالت لي.. سلوى: انزين الشيخه مهرة.. دامنا كلنا والنعم..شحقه اطنزتيبنا ذاك اليوم.؟؟ مهرة: كنت متظايقه وفجيت غيظي فيكن... سلوى: بس نحن كان قصدنا شريف كنا نبا نتعرف عليج بس..لا اكثر ولا اقل.. ابتسمت انا بتوتر..وفشله.. مهرة: السموحه منج...احين عرفتي انا منو..بردت دودتج.؟؟ سلوى: ههههههههههههههههه لا والله بعدها...جدامنا مشواار.. ابتسمت انا بعد ببلاهه...هالبنت واثقه وايد من نفسها..اي مشوار بالله.؟!.. المهم سكت عنها وهي تسولف وتسولف وكل شوي تسحب مني معلومات..لين مايت الساعه عشر وصار لازم اروح محاضره العربي... ويوم قلت لهن اني بروح لانه عندي محاضره احتشرن كانهن مايبن يفارقني.. كانهن ربعي من سنين ... استغربت كيف بسرعه هالبنات يتعلقن بالبنات الثانيات..!!.. وفكرت بانهن بالسرعه نفسها اللي يرابعن البنات.. نفس السرعه يفارقن بها البنات وبالسهوله نفسها..!! عرضت سلوى انها توصلني..حاولت اعترض وامانع لكن مافي مجال..البنت كانت مصررره.. مشيت انا وهي للمبنى وهي تخربط وتسولف علي..وعرفت جدولي كامل لكنها ماحفظت عشان جي طلبت رقم تيلفوني... وهني المصيبه...!! ماكنت ابا البنت تعرف رقم تيلفوني...ماكنت ابا تواصل دايم بيني وبينها...لكني انحرجت ..كيف اقولها ماريد اعطيج رقمي..؟!.. بالتالي عطيتها اياه من دون نفس...وسجلته البنت في موبايلها اللي طلعته من شنطتها الصغيره...!!.. وباستني على خدي قبل ماتخليني وتروح الكافتيريا...!! ورطه... دخلت عمري فورطه الله يستر كيف بطلع منها... دخلت المبنى ودخلت قاعة المحاضره..وشفت هناك عليا وحمده.. مهرة: انتن ويييييييييين.؟؟ حمده: انتي اللي ويييين يينا ودورناج ولا حصلناج... مهرة: عن الخريط انا كنت موجوده هناك يالسه... عليا: والله ماحصلناج... نحن تاخرنا شوي لانه مسكنا الدكتووور...ويوم يينا ندورج ماحصلناج ردينا طلعنا... حست بوزي انا متظايقه... مهرة: ماعليه حصل خير.. دخل الدكتور في هاللحظة وانصعقت لاني مالبست نقابي...كيف نسيته.؟!!!... جان اطلع من القاعه كاني وحده من البنات مغلطه بالقاعه...وحمده وعليا ناقعات من الظحك...لبست نقابي برا وعدلته زين ورجعت ادخل القاعه واقعد بهدوء..! ---------------------------- اليوم: الاربعاء.. المكان: غرفة يوسف.. الوقت: الثالثه ظهرا.. ---------------------------- (يوسف).... الملل والحزن والروتين اللي كنت احس فيه..والضغط...كل هالشي اجبرني اطلع الورقه اللي مكتوب عليها ايميل كنه من الدرج..!! حطيته جدامي وانا احاول اقرر شو اسوي... بغيت اسوي شي يديد فحياتي..اغير...اي شي المهم ينشغل بالي... اللي اعرفه ان منى يالسه حاليا عالنت...واكيد كنه يالسه بعد..وانا ماريد كنه تخبر منى اني ظفتها..شو اسوي..؟! فكرت اهكر على كمبيوترها والعوزها شوي واشوف شو التطورات في ملفها الخاص فيني واشوف شو ضافت عليه من صور واخبار..!! بس كيف؟ ادري بعمري مابروم له انا بنفسي حاط له حمايه وسديت كل الثغرات اللي اعرفها وحصلتها..!.. وبدون تفكير...دخلت الموقع وفتحت لي ايميل يديد باسم بنت... وبعد ماخلصته فتحت الماسنجر وضفت ايميل كنه وترييت النتيجه..!! بعد دقايق..دخلت كنه اون لاين...اما انا فتميت متوتر..مب عارف شو بقولهها ..منو انا وليش وكيف ضفتها..وشو ابا منها..؟!.. لكن كنه ماتريتني افكر بشي...على طول طرشت لي مسج تسلم. " ياك الموت ياتارك الصلاة ...منو انتي؟".. ابتسمت ..ماتودر خبالها حتى في المسن... طرشت لها وكتبت.. " انا معجبه".. كنه: " لووووووووووول لا اكيد مغلطه بالعنوان.." يوسف:" ليش مب انتي كنه.؟"... كنه:"................"... يوسف:"الوو.؟!". كنه:" منوو انتي؟ خلصي.." يوسف:" قلنالج انا وحده معجبه".. كنه:" يعلها تعجب بج جنيّه قولي امين... من وين يبتي ايميلي.؟" بغيت اموووووووووت من الضحك عليها.. يوسف:" طرشت لي اياه وحده وحلفتني ماقولج منو هي عشان ماتصير بينج وبينها مشاكل.." استغربت من السلاسة اللي كانت تطلع فيه الكلمات مني... وتخيلت موقف كنه الحين..اكيد قاعده تنسخ كلامي وترسله لمنى...!! ويتناقشن بموضوعي .. كنه: " ماريد اكلمج.. بحذفج.."... ظحكت مره ثانيه...قلت فخاطري بتسويها ..يطلع منها كل شي.. يوسف: " كنووووووه.." كنه:"جب لا تكلميني..".. يوسف:" لا تقوليلي انا جب... بقولج شي بس ماريدج تخبرين حد" كنه:"شو اللي بيلزمني ماخبر حد.؟" يوسف:" يوم بقولج بتعرفين ليش مابغيج تخبرين حد.." كنه:" خلصي..قولي.." يوسف:" انا يوسف..." كنه:"......................."... وطلعت اوف لاين....!!!.. مت قهر..شو طلعها..؟ احين بتربع تخبر منى.... لا بس لحظه كيف بتقولها؟..منى كانت عالمسن وهي سكرت المسن...ابتسمت ..ومادري اللي سويته صح او غلط... وتميت اتسائل شو تسوي الحين...لكنها بعد دقايق رجعت اون لاين وعلى طول حطت لي ويه مبرطم... يوسف:" ههههههههههههه ولكم باك." كنه:" ليش ظايفني.؟" يوسف:" مادري.. بس من زمان افكر بهالشي..." كنه:" من متى يعني..؟" يوسف:" اسبوع او اسبوعين..." كنه:" ......انزين ليش.؟" يوسف:" شوو ليش قلت لج مادري...اذا ماتبين بحذفج احين.." كنه:" لا.....آآه...كيفك.. بس هذا مب ايميلك..!!." يوسف:" توني مسونه عشانج..." كنه:" يوسف..بطلع احين..باي" استغربت من كلامها...ارسلت لها " صبري..!"... بس الرساله رجعت لي لانها طلعت اوف لاين للمره الثانيه..!! شفيها هذي..؟!..تخبلت.؟!...خيبه لايكون مايد دخل عليها عشان جي طلعت..؟؟ بديت اتندم اصلا اني ضفتها .. ماريد اسوي مشاكل لكنه... ولا اريد اضايقها او شي.. بصراحه اناكنت اناني بتفكيري... مافكرت بردة فعلها هي اذا بتوافق او لا اذا ضفتها... تميت اترياها ترد تدخل بس مادخلت... واخر شي زهقت وطلعت من النت وسكرت الكمبيوتر... طلعت من حجرتي ورحت حجرة منى...حصلتها بعدها يالسه عالنت..واطقطق.. يوسف: شو تسوين.؟! منى: اسووووووولف... تقربت منها ووقفت عدالها وتساندت عالمكتب.. تميت اطالع الشاشه وبغيت انجلط يوم شفت ايميل كنوه اللي يالسه تسولف مع منى وتظحك...!!! ماعرفت شو اسوي... يوسف: هذي كنه.؟ منى: هي..ليش.؟ يوسف: سلمي عليها..الحين سلمي.. اطالعتني منى باستغراب...ماكان قصدي اطرش سلام..بس بغيتها تدري اني اعرف انها مسوتلي بلوك... بس هيّن ياكنه..انا اراويج...عيل انا تسويلي بلوك.؟ ماعليه.. كتبت منى اللي قلته لها..ويوم تاكدت بان الكلام وصلها..مايلست اتريا ردة فعلها..طلعت من حجرة منى..وسرت المسيد اصلي العصر.. -------------------------------- اليوم: الخميس.. المكان: غرفة منى.. الوقت : السابعه مساءا.. --------------------------------- (منى)... خلصت مكياجي ولميت شعري ..باقي بس احط الوردة في راسي بشكل مناسب..بس المشكله اني مب رايمه اشوفها عدل.. دخل علي يوسف وهو لابس سفرة وعقال وكندوره..وشكله كاااشخ عالاخر.. منى: هاااااااه..؟؟ شكلك الا انته المعرس مب مايد.. يوسف: انا ليش حظي دوم جي..؟؟ شحقه نشبوووني فيج..؟ خلصي تاخرنا.. اطالعت يوسف ببلاهه.. منى: تونا سبع.... يوسف: بيت اهل العروس بعيد.. خلصي يالله منى... منى: انزين تعال ثبت لي هالورد مب عارفه احطهن سيده... عقد يوسف حياته... يوسف: شو رايج افصخ عقالي والسفره وتسلفيني فستان من عندج..؟!.. يلست عالكرسي واناميته من الظحك ...اتخيل شكل يوسف بفستان زار عليه وقصير..!!!... ابتسم هو بتسامح ويا وخذ الورد من ايدي.. يوسف: هاتي خلصيني...اقولها مستعيلين وهي يالسه تظحك..كيف تبين الورد.؟ منى: على طرف شوي ..بس مب عدال بعض..وحده فوق شوي والثانيه تحتها.. يوسف: اوهوووووووو سكتي سكتي... قعد يوسف يحاول يركب لي الورد..وعورني ومطط شعري ..بس لميت ثميه ولا رمست عن يكفخني... يوسف: بس خلاص... كم باقلج ترا بسير عنج.. منى: ماشي ماشي باقي بس بلبس عباتي وشيلتي وبتدخن... يوسف: عيوز عيوز... خمس دقايق ان مانزلتي وقفيلج تكسي وسيري به... خلاني يوسف وطلع من الحجره... اما انا استعيلت وخلصت بسرعه ونزلت... ركبت معاه السياره وتوجهنا لبيت بنت خالة كنه..اللي هي خطيبه مايد..واليوم بتصير حرمته.. يوم وصلنا بيت العروس اللي اول مره اشوفه...تميت زايغه لانه يوسف بينزلني وبيروح الميلس الكبير...اناوين ادق براسي.؟... منى : ايه يوسف لا تخليني... يوسف: محد قالج ماتسلفيني فستان والا بدخل وياج.. منى: ايه صدق اكلمك.. يوسف: ست الحسن والجمال تترياج اكيه عند الباب.. اشر بصبعه بخفه جدامه... يوم التفت حصلت كنه واقفه عند الباب تترياني وهي متكشخه...ومتغشيه...بس كيف عرفها يوسف.؟؟؟... ماشاء الله عنده بعد نظر... منى: الحمد لله... يالله برايك.. نزلت انا ونزل يوسف معاي..ولاحظت من طرف عيني انه رافع ايده يسلم على كنه من بعيد...لكن كنه ماردت له هالسلام شكلها تفكر من وين طالعه الشمس ..او متفاجاه بشوفته..او ماشافته وهذا احتمال بعيد جدا جدا.... سلمت على كنه ودخلنا البيت اللي كان زحمه.. قالت لي ان نحن مابنقعد عند الحريم فسرنا فوق عند العرووس.. الملجه كانت هادية نوعا ما.. يعني ماشي رقص وجي.. كانها عزيمه...او يمكن هالعرب مايرقصون بناتهم وينقدون...!. بس بشكل عام انا وكنه كانت لنا ربشتنا الخاصه... واستانسنا بالملجه.. -------------------------- اليوم: الخميس.. المكان: ميلس بيت العروس.. الوقت: العاشرة مساءا.. --------------------------- (ناصر)... غسلت ايدي من بعد ماتعشيت وانا طفران من كثر ماقالولي "عقبالك"... شكلهم جي كلهم يبوني ويتريوني اعرس ...رجعت مع مايد للميلس ويلسنا..وجدموا العصير.. ناصر: ملاحظ انته ان الكل يقولي انا عقبالك.. مايد: هههههههههههه... ناصر: ليش تضحك..؟.. مايد: ابا افهم بس شوتتريا... ناصر: اتريا تكون لي انا رغبة في الزواج والالتزام اول عقب يصير خير.. مايد: بس انا اشوف حياتك فاظيه الحين... ناصر: ممكن تكون فاظيه لكني مرتاح... اخبرك عادي اذا طلعت احين والله اني تعبان من الفجر ناش.. مايد: لا مب عادي...اقعد يوم انا بسير بتسير .. ناصر: جي انته مابتدخل على حرمتك.؟ مايد: هاهاهاي..لا تظحكني.. ناصر: مسكين حالك... مايد: كثر منها... شوف شوف يوسف كيف مستلمنه الشايب... ظحكت وانا اشوف يوسف يتناقش مع يد مايد من جهة الام.. يعني هذا يد العروس والمعرس.... والشايب شكله تعلق بيوسف وماسكنه بالسوالف..ويوسف من قبل يحب الشواب وايد.. من بعد ماراقبنا يوسف.. تميت اراقب مايد..والاحظ راحة البال اللي على ويهه من بعد الملجه وتم كل شي على خير...!...شكله مستانس.. ياترى.. اذا خطبت انا وملجت بستانس جي والا بتلعوز..؟! تذكرت كلام علي... فعلا اليوم انتبهت لمظاهر الاسراف... يعني اليوم نشينا عن العشا شبعانين والصياني شكلها مب مصكوكه...وانا متاكد انه فيه اكثر من صينية محد كل منهن... هذا كله وين بيسير.؟؟..ان شاء الله بس يتصدقون به عالفقراء بدل ماينجب...! بعد ساعه استسمحت منهم وطلعت من الميلس..وعالتوقيت...اتصلوا بي من تيلفون امي.. ناصر: هاااه.؟! منى: انا منى...ناصر وين انته.؟ ناصر: احين بروح شو تبين.؟ منى: تعال ودنا البيت.. ناصر: انتي ومنووه.؟ منى: انا ونوره... ناصر: اووفف..ليش بعد نوره؟ منى: نوره تعبانه من الصبح مريضه وتبا ترد البيت اما الباقيات بيتمن.. ناصر: مايد بيعصب ان درى.. منى: نوره خبرت امها انها بترد معاي... ناصر: هممممم..ماعليه انزين احين بدخل السياره بس احصلكن براا ما بيلس اترياكن.. منى: ماعليه.. باي.. ناصر: فمان الله.. سكرت التيلفون وركبت سيارتي ودخلت بها البيت...دقيقه وطلعن البنات.. منى ركبت عدالي..ونورة ركبت وراي...المفروض ماتركب وراي ..بس شو اسوي بها اقولها قومي.؟.. تحركت بسيارتي...وطلعت من البيت... نورة: شحالك ناصر.؟؟.. ناصر: بخير نوره شحالج انتي؟ نورة: الحمد لله..عقبااالك.. تنهدت بتعب...وبعدين يعني من هالتلميحات..؟!.. ناصر: انتي قبلنا ان شاء الله... ابتسمت بخبث وانا احس بقوة الظربه اللي وجهتها لنوره...خلها تحس على مها شوي ... مديت ايدي ومسكت السفره والعقال وفريتهن في السيت الوراني عدال نوره..بس مب على نوره..يعني بعيد... لانه ماكان لي مزاج اتم لابسنها اروحي تعبان... بدون قصد رفعت عيني للمنظرة الامامية... واستغربت يوم شفت نوره مب متغشيه...مب متحجبه اصلا...!!.. مسودة الويه..يبالها ظرب والله...انا ماباخذها عشان تكشف نفسها جي جدامي والا تبا تركبني اثم غصبن عني..؟!.. نزلت عيني ومارفعتها مره ثانيه ... وصلناها البيت وروحنا....فجاه قالت لي منى.. منى: انته موول مابتخطب نوره.؟ ناصر: لا... منى: بس هم يتوقعونك تخطبها.. ناصر: انا ماقلت لهم يتريوني...ولا قلت لهم باخذها... سكتت منى عني..وفجاه نقعت من الظحك... وظحكت انا معاها لاني عرفت على شو تضحك... منى: اسميك فشلتها...!! ناصر: ههههه خليها تستاهل...لاحظتي انتي كيف كاشفه شعرها.. منى: الله يهديها...مب صاحية هالبنت... ناصر: الله يهدي الجميع.. وصلنا البيت ونزلت عشان اخذ سفرتي والعقال... وتميت اطالعه مستغرب..كيف كانت مربعه ومرتبه والعقال فوقها مطواي.. انا فريتها اي كلام... مارتبتها...هذي نوره رتبتها ...ياربي ياهالبنت..!! شو اسوي بها.. خذت سفرتي ودخلت البيت... اول مادخلت حجرتي تسبحت ورقدت على طول من التعب ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ نهاية الجزء العشرين تحياتي |
يعطيج العافيه خيتو على الاجزاء الروعه ونبي الاجزاء اليايه تكون احلى واطووووول
دموع الفراق |
ان شاء الله عزيزتي دموع الفراق ...... تابعوني جريب بانزل الجزء اللي بعده .......
تحياتي |
السلام عليكم
اشحالكم خواتي مكشورة اختي الغزالة على الاجزاء الحلوة ونتريا الجزء اليديد |
:) مشكووورة اختي وايد:thank_you
|
ترى انا قريتها اول امس بالليل يوم جيت اكتبلك لقيت ماما فوق راسي تبيني اقوم انام :mad0256: عشان السكووووول :0023: ...
تكفييييييين عزيزتي متعينا بسرد اجزاء مطولة .. عشان هذي الاجزاء قصيرة مررررة ترانا نستنى بشوق ... و مشكورة يعطيكي العافية :) |
هلا حبيبتي الشامسية مشكوره على التواصل الرائع .....
سكون الغلا اسعدني تواجدك اتمنى تواصلينا على طول .... عزيزتي بيرلا الله يوفقج ياقلبي بالمدرسة وشدي حيلج ..... وان شاء الله انزل الجزء الياي جريب .... تحياتي |
وهذا الجزء اللي بعده :char0248 تابعوا معاي ........
الجزء الواحد والعشرون ----------------------------- اليوم: الجمعه... المكان: غرفة يوسف.. الوقت: الحادية عشره صباحا.. -------------------------------- (يوسف)... طلعت من الحمام والفوطه على راسي ..نشفته عالسريع وانا اسمع امايه ادق الباب... سرت وفتحته.. ووايهتها... يوسف: هلا امايه... ام محمد: توك ناش.؟ يوسف: قبل شويه...شو بلاج؟ ام محمد: يدتك متصله تبغيك تسيرلها.... سكت وبطلت عيوني مستغرب... وامي بعد شكلها مستغربه...عقب قالت لي.. ام محمد: شو مسوي؟ مسود ويهك؟؟.. يوسف: اناااااااااا..؟؟؟؟.. ام محمد: عيل شو تبابك يدتك؟...اول مره تطلبك مخصوص...!! يوسف: والله مادري يامايه... تباني اسيرلها الحين؟ ام محمد: هي الحين تلبس وسيرلها قبل الصلاة... يوسف: ماعليه.. طلعت امي ونزلت تحت..اما انا رجعت اسكر الباب ولبست كندوره بيظا...وسحيت شعري على ورا وهو بعده خرسان... وتسفرت بسفره حمرا... تعطرت وخذت اغراضي الشخصية وطلعت بسرعه من حجرتي... يوم نزلت تحت حصلت ناصر يالس مع محمد... سلمت عليهم... محمد: وين ساير؟؟ يوسف: يدووه طالبتني يابوك بسير اشوف شو تبا... رفعوا كلهم حواجبهم مستغربين... ناصر: غريبه...شو هالاستدعاء؟..شو مسوي؟؟ تنرفزت...وحركت ايدي بعصبية.. يوسف: شوو بلاكم تسئلوني شو مسوي شو مسوي...مب مسوي شي...!! ناصر: هههههههه انزين انزين لا تعصب...مب مسوي شي...يدوه طالبتنك متولهه عليك... يوسف: هي عيل شو اتحسب... طلعت من البيت وانا اسمعهم يظحكون...يوم كنت بركب سيارتي طلعت منى من المطبخ ويتني تركظ... منى: يسوووف وين ساير... يوسف: عند يدوووه... منى: اللـــــــــــــــــــــه.... بسير وياك... يوسف: بلمج كف على ويهج ....قري محلج يالله...من تسمعين بحد ساير عندهم قلتي بسير..ليتهم اييونج مثل ماتينهم... وقفت منى مبرطمه بينما انا ركبت السياره وطلعت من البيت.. يوم وصلت بيت يدووه ...حصلت سيارة مايد موجوده... دخلت الميلس اللي خلصوا تنظيفه والتجييك عليه..بس ماحصلت حد فيه... يوم طلعت من الميلس حصلت مايد واقف عند باب البيت وياشر لي اييه... وسرت.. سلمت عليه.. يوسف: شحاااااااالك مايد..شو اخبارك... مايد: الحمد لله بخير وسهاله شحالك انته...؟ يوسف: بخير وعافيه... مايد: حيالله من يانا... اقـــــــــرب.. يوسف: قرييب... بس تعال تعال...يدوه شفيها؟ اطالعني مايد وعلى ويهه علامه استفهام... مايد: شفيها؟ يوسف: طالبتني مخصوص ..شو تبغيني..؟ مايد: ههههههههههههههههههههه وشوفيك متروع منها؟ يوسف: والله لوكنت مكاني بتتروع..طالبتني على جناح السرعه... مايد: مادريبها...اكيه يالسه في الصاله تعال واسالها... مشى مايد جدامي ومشيت وراه وانا اتسائل.... دخلنا الصاله وكانت يدوه موجوده ومعاها ام مايد... وحمدت ربي انه محد من البنات موجود في الصالة.. يوسف: السلام عليكم ورحمة الله... الكل: وعليكم السلام والرحمه... ام سلطان: مرحبا مرحبا بالغالي... تقربت من يدوه وبستها على راسها.. يوسف: شحالج يدوووه؟ عساج طيبه؟ شو صحتج..؟ ام سلطان: بخير فديتك شحالك انته.؟ يوسف: الحمد لله يدوه....شحالج ام مايد؟ عساج بخير.. تبادلنا السوالف شوي مع العيايز ويلسنا انا ومايد..مايد عمدا يلسني عدال يدوووه...عشان اي كفخه تي فيني بشكل مباشر وبشكل اقوى...يدري بيدووه بسرعه تظرب... وترييت وترييت تقول يدوه السالفه اللي تباني فيها بس ماذكرت اي شي.. يوسف: يدوووه...روعتيني تراج...خير ليش طالبتني.؟ اطالعتني يدوه شوي... ام سلطان: متى طلبتك.؟؟ يوسف: وابوي؟..اليوم انتي متصله لامي ..قالت لي يدتك تباك الحين...شو فيج؟ ام سلطان: حشى عليه ماطلبتك... مايد: خرفت يدووه... وعلى طول يدوووه ظربت مايد بالمسباح اللي في ايدها... ام سلطان: محد غيرك خرف مسود الويه.. يوسف: يدووه..صدق صدق...ليش طالبتني..؟ ام سلطان: قلت لك ماطلبتك..امك سمعتني غلط.. يوسف: شو قلتيلها انتي..؟ ام سلطان: متصله اسلم عليهم.. قتلها وين عيالج ما ايوني ولا يسلمون علي..وسالت عنك بعد..قلت لها خلي يوسف اييني... يوسف: هااه...يعني طالبتني... ام سلطان: طلبت شوفتك انته وخوانك... وخصصتك انته لاني ادريبك فاظي ماعندك شغل... ارتحت بصراحه لاني خفت يوم سمعت انها تبغييني... ومن بعدها كملت سوالفي مع يدوه وام مايد بشكل عادي لين ما اذن الجمعه... قمنا انا ومايد وطلعنا من الصاله... مايد: ترياني انا بسير ابدل ثيابي وبتسفر وبتوضى وبييك... يوسف: بترياك برا عند الميلس.. وافترقنا كل حد بطريج... لين مارجع مايد وسرنا المسيد نصلي... ------------------------------------ اليوم: الجمعه.. المكان: مطبخ بيت ام سلطان.. الوقت: الواحده والنصف ظهرا.. ---------------------------------------- ( كنه)... من شفت سياره يوسف في حوش بيتنا وقلبي مب طايع يهدا.... غريبه يوسف شو يسوي هني؟ مب عادته ايينا...!! لكن ان شاء الله تستوي عاده عنده هالشي... عشان كل جمعه اشوفه... فتحت الفريزر وطلعت الثلج... وحطيت المكعبات في العصير ... صفيت الاكواب عالصينية وعدلت حجابي ..شليت الصينية ومشيت صوب الميلس وقلبي يدق دق...!! ادري انه سبال...!! وانه كان يبا يلعب علي عالماسنجر... وادري انه يطنشني وايد ومب مهتم بي... وفوق هذا ادري انه شاف ملفاتي الخاصه في الكمبيوتر... من يوم كنت في المزرعه وانا ادري بانه شافهن لانه تغير 180 درجه وكشف نفسه... ومن يومها وانا في مهمة اني اثبت له العكس... لازم اشككه في اللي قراه وعرفه.. لازم...!! دخلت الميلس وانا ادري انه مايد بيعصب لاني ماخليت البشكاره تيب العصير...! وعلى طول طاحت عيني فعين يوسف الناعسه...وعلى عكس ماتوقعت....الخبيث مانزل عينه وتم يطالعني بنظره معصبه شوي... ظحكت في داخلي...وانا اسلم.. شكله بعده معصب على سالفه البلوك... عيل بالله شو كان يتوقع ادق وياه سوالف؟؟ لا والله ماطرالي... كنه: السلام عليكم..... ردوا علي السلام...وشفت مايد يفز من مكانه ويشل عني صينية العصير... الشي اللي يعجبني بمايد انه حنون علينا لابعد حد.. من توفى ابويه الله يرحمه وهو عاد نفسه ابونا الثاني... صحيح حار علينا ومايرضى بالغلط...وحتى بوجوده في الخارج كان يحاسبنا على كل صغيره وكبيره... لكنه مايرضى فينا ابد...ومانهون عليه...من كبيرنا لصغيرنا. حتى مانهون عليه نشل اي شي ثجيل ومن يشوفنا على طول يشل عنا بس عشان مانتعب....وبصراحه مادري كيف يقدر يتحمل كل هالمسؤوليه وهو صغير.. كنه: شحالك ولد عمي.؟ ابتسم يوسف ابتسامه غريبه جنه يبا يغايظني.. يوسف: بخير بنت عمي شحالج انتي.؟ كنه: بخير وسهاله.. مايد: وين الغدا؟ كنه: بتيبه البشكاره احين... يوسف: هااا كنه...شحاله كومبيوترج الحين عساه طيب؟ ابتسمت انا نفس ابتسامته.. كنه: يسلم عليك كومبيوتري صاحي وبخير وسهاله... يوسف: عساه دووم بس تحملي من الهاكرز... في ناس اقوى مني..او يمكن انا تطور مهارتي واستوي اعرف اكثر... حسيت بمايد مستغرب من كلامنا البايخ...وحسيت يوسف يهددني...بانه هو نفسه بيحاول يخترق كومبيوتري..؟ ماخفت..لاني حولت كل الملفات الخاصه على سي دي... خارج الكمبيوتر... عشان ما اكرر نفس الغلطه.!. كنه: هههههههه عليك بالعافيه... بفتح كومبيوتري حديقه قرييب وبسوي فيه مطعم جان تبغون انته وربعك تتحوطون فيه... يوسف: بوصل لهم العزيمه ولا يهمج... مايد: ياويلك والله... وانتي كنوووه ...عن هالحركات لا اقطع عنج الانترنيت... كنه: لالا خلاص خلاص والله الا اسوولف... مايد: عنلاااااااتج وياها سوالف.. صدق دخلوا على كمبيوترج هاكرز؟ كنه: لالالا.. يوسف: هي هي هي... بغيت اكفخ يوسف بالكوب...شوووله يتدخل.؟ يبا يورطني مع مايد.. كنه: لالا بس انا شكيت بالموضوع وقلت اتاكد... يوسف: وانا تاكدت عنج... الباتش اللي حصلته فكمبيوترج ماينلقط من اي مكان هذا الهاكرز يستخدمونه... كنه: اوهوووووووو اسكت انته عاد... مايد: فيه كومبيوترج شي خاص...اسماء صور اي شي..؟!! اطالعت فويه مايد حسيته مستعد يعطيني طراق على ويهي في اي لحظة.... مايد كل شي عنده الا الفظيحه والغلط....بيمووووت لو يدري.. كنه: لا مافيه شي...صح يوسف.؟؟ .. اضطريت استنجد بيوسف لاني شفته اهدى مني... اطالعني يوسف بنظره ماكره وقال.. يوسف: هاااه.؟!.. كنه: كومبيوتري مافيه خصوصيات....صح؟ بطى لين ما جاوب...وكان يبتسم بطريقه تقهر... يوسف:..........هي...صح... مايد: يوسف...شو هالنظرات.. قول الصدق.. يوسف: هههههههههه اسولف وياكم الا...صدق اطمن مافيه شي الكمبيوتر... مايد: اووووف..الحمد لله. مالت عليكم وياها سوالف.. كنوووه..ذلفي استعيليها هذي بالغدا... طلعت من الميلس بدون اي كلمه...ماصدقت اطلع من الموقف هذا اللي بنفسي دخلت عمري فيه.... والا شو ابابه اتحرش فيه انا...!! بس لحظه..هو اللي سالني عن كمبيوتري انا مافتحت السالفه...بس مب انا اللي متعبله وشاله العصير للميلس.؟؟؟ صدق ماعندي سالفه... يوم طلعت من الميلس شفت البشكاره يايبه غداهم.. فماله داعي يعني استعيلها... مشيت صوب بيتنا ومريت على سياره يوسف...وشفت جامتها الاماميه خايسه غبار...!!!..هذا ماينظف سيارته؟.. دومها زباله وفوق هذا مايرضى عليها بعد..!!... من غيظي ذيج الساعه...مديت ايدي وكتبت بالمجلوب على الجامه.. " سباااال." ... احين يوم بيركب داخل السياره بيشوفها مجابلتنه هالكلمه...بس اذا من برا مابيعرف يقراها صح لاانها بالمجلوب...ودخلت البيت عنه وانا ابتسمت برضى عاللي سويته...! --------------------------------------- اليوم: الجمعة... المكان: غرفة ناصر.. الوقت: الثالثه ظهرا... ------------------------------------- (ناصر)... لميت ثيابي اللي ابغي اشلها معاي بوظبي..وفتحت الشنطه عشان احطهم فيها... وجابلني الدفتر الاصفر...!! حسيت بهدوء فنفسي يوم شفته....مادري ليش شليته معاي....يمكن لاني ماطقت فراق هالدفتر اللي تعودت اتصفحه في اليوم اكثر من مره...!! تنهدت وانا اقاوم الاغراء باني اتصفحه الحين... انا مامسكته من يوم الاربعاء... شوي شوي بيخف تعلقي بهالدفتر ومع الايام بنسى وجوده... حطيت ملابسي في الشنطه وسكرتها وانا ابتسم بسخريه...لاني اعرف اني اقص على عمري.... مابنسى هالدفتر طالما هو وياي...وتحت نظري...!! لانه صار شغلي الوحيد يوم اختلي بنفسي في الشقه...!!..ماعندي شغله غير اني اجلب فيه وافكر في مهرة....!!.. وتنهدت مره ثانيه يوم ذكرت مهرة...ياربي انا متى بفتك من هالحاله..!!! قمت من الشبرية وطلعت من حجرتي ونزلت تحت... في الصالة كان ابويه يالس.... وشكله ناوي يسير العزبه ... ناصر: بتسير العزبه.؟! اطالعني ابويه بنص عين... بو محمد: هي نعم شو فخاطرك..؟ وكمل شرب قهوته...يلست انا عداله..وقلت.. ناصر: مافي خاطري شي حشى... سولفت وياه شوي عن امور عادية...وفجاه سمعت نفسي اساله بدون تفكير.. ناصر: ابويه... ذاك الريال خلفان...اللي طرشتني بيته اعطيه اوراق قبل كم اسبوع... بو محمد: بو حمد...بلاه؟ ناصر: ماشي..كم عيال عنده.؟؟ بو محمد: عيال..!!...عنده ثلاثه...حمد وسهيل..وسيف صغير اظني بعده في المدرسه... ناصر: وبنات.؟؟ اطالعني ابوي بنص عين هالمره وهو معصب.. بو محمد: وابوي عليك شو تبا ببناته..؟ ناصر: لا مابا شي بس اتخبر... يشتغل هو والا تقاعد؟ بو محمد: لا متقاعد... ناصر: اهااا...قالولي حرمته متوفيه ..صدق..؟؟ عقد ابويه حياته مره ثانيه....بس هالمره كان يفكر... بو محمد: هي حرمته متوفيه...رحمة الله عليها .. حسيت بابويه يقول هالكلمه بتاثر شوي.. ناصر: ابويه انته من متى تعرفه.؟؟؟ بومحمد: من سنيييييييين ياناصر..من زمان يوم انتوا بعدكم صغار... ناصر: ماشاء الله...يعني تعرفها حرمته..؟ بومحمد: هي نعم ام حمد الله يرحمها كانت عن كل الحريم... ناصر: كيف ماتت ابويه؟؟ مادري ليش كل هالاسئله..بس فيني فضول يشدني بشكل ماقدر اوصفه...ابا اعرف كل شي عن هالبنت...الدفتر مب كفايه.....!! بومحمد: الحرمه توفت ياها مرض...سرطان الله يبعده عنا وعنكم...حوالي من خمس او ست سنين جي توفت الله يرحمها... ناصر: الله يرحمها....مسكينه ... عيل انته تقول متوفيه...انا شفت حرمه كبيره فبيتهم..!! منو هي؟ بو محمد: وين شفتها.؟ ماقدرت اقوله شفتها يوم لحقتهم بالسياره...بيذبحني ابوي..شكله مايرضى عليهم ابد... ناصر: في البيت يوم عازمينا.. بو محمد: هيي...ذيج بيكون اخت خلفان...ماعرست.. وسكت ابويه ..وفجاه عقبها ضحك... ناصر: ليش تضحك ابويه؟؟.. بومحمد: هذي انا بغيت احطها عديله على امك هههههههه بس ماطاعت طلعن ينونها... ناصر: ههههههههههههههههههههههه...يعني فكرت تحط عليها عديله من قبل.. بومحمد: والله اني بغيت اسوي خير بخلفان. كان شال همها هالاخت... ناصر: وليش ماعرست؟ بومحمد: نصيبها ياناصر...سبحان الله يمكن الله كاتبلها اتم فبيت اخوها عشان تربي عياله من بعد ام حمد الله يرحمها... سكت وانا افكر بالمعلومات اللي عرفتها.... ماقدرت اعرف مهرة كم اخت عندها...ابويه ماطاع يخبرني وبيعصب اذا سالت مره ثانيه... لكن عندها ثلاث اخوان وهذا شي اكيد..اعرف ثنينه منهم والثالث صغير اصغر منها اذا كان في المدرسه بعده...!!.. بس طلعت يتيمه ام فعلا.... مسكينه وانا زدتها زووود... سكت بعد ماغمرتني موجه ثانيه من الذنب الفظيع...كل ما اعرف شي يديد عن هالبنت اتلوم واكره نفسي اكثر واكثر.... دخل يوسف في هاللحظة وسلم على ابويه....ويلس معانا والابتسامه على ويهه... ناصر: هااااااااااه...شو تباك يدووه؟ يوسف: قلنالك متولهه علي...ويسلمون عليكم كلهم هناك... ناصر وبو محمد: الله يسلمك وياهم من الشر.. ناصر: وشحقه متولهه عليك انته بس..؟؟ ونحن وين سرنا؟ يوسف: والله انها سئلت عنكم كلكم...بس امي سمعتها غلط ومالقطت غير اسمي عشان جي قالت لي انا اسير..!!.. انته احين بتسير بوظبي؟!.. ناصر: بعد صلاة العصر ان شاء الله... يوسف: شحقه مستعيل عاد.؟ شو وراك هناك... ناصر: ورايه رياضه الله يسلمك.. وبعدين ماحب امسك خط في الليل امي اتم حاشرتني بالاتصالات...تخاف.. ابتسم يوسف وسكت... بينما ابويه نش من مكانه... بو محمد: انا بسير العزبه... ناصر: مافي خاطرك شي ابويه؟ بسير بوظبي انا مابنتلاقى عقب... بومحمد: سلامتك ..بتينا الاسبوع الياي والا عندك زام والا شي..؟ ناصر: والله مادري يابويه بتصل وبقولكم.. بومحمد: على خير...فمان الله... ناصر ويوسف: الله يحفظك.. طلع ابويه من هني ويت منى من الصوب الثاني ويلست عدال يوسف... منى: شو اخبارهم..؟ اطالعها يوسف بطرف عينه وقال... يوسف: سيري اطالعي جامة سيارتي عشان تعرفين شو حالهم... رفعت انا ومنى حواجبي مستغربين... ناصر: شوفيها جامة سيارتك..؟؟ يوسف: هي بتسير تشوفها...سيري شوفيها وتعالي.. قامت منى بدون مناقشه وطلعت برا البيت...وبعد دقايق..رجعت وهي ميته ظحك... ناصر: هااا شو حصلتيها.؟ منى: مكتوب عليها سبال...منو كاتب؟...لا تقولي كنوووه ماتسويها... يوسف: ليش يعني ماتسويها؟ الا تسويها ونص.... ناصر: جي شو مسوبها انته؟ يوسف: ماسويت شي... نقزت منى عند التيلفون.. منى: الحين بطلع كل العلوم منها بشوف شومسوي... ظحك يوسف وحسيت فعلا انه مسود ويهه ويا كنه...ارتحت مبدئيا من هالشي...خله يلتهي عن ذيج البنت احسن له.... واذا ارتاح لكنه وخذها..بيفكني من حشرة اهلي اني اخذ نوره...تعويض يعني...وبعدين كنه بصراحه تنحب وفنانه بس ناقصنها شوي عقل... كملت سوالف مع يوسف عن اشياء تافهه..لكن ماطولنا لانه اذن العصر وطلعنا نصلي... ---------------------------------- اليوم: الجمعة... المكان: صالة بيت خلفان.. الوقت: الثامنة والنصف مساءا... --------------------------------- (مهرة).... كنت يالسه مع عفرا في الصاله ونسولف...وعمتي وابويه وسيف وحمد يالسين جدام التلفزيون يسولفون هم بعد... ناقص بس سهيل..اللي يعد نفسه مب من اهل هالبيت... البيت بالنسبه له مثل الفندق..ايي يبدل ثيابه ياكل ويشرب ويرقد ويطلع.... عالاقل حمد يقعد معاانا شوي... مهرة: عفرا عطيتي اختج جدولي..؟؟؟...ماشفتها لين الحين... عفرا: لا والله ما اتصلتبهم يامهره... جان اتصلبها اليوم اخليها تلاقيج باجر.. مهرة: ياريت... يابوج نشبة فيني شلة الواحد مايروم يتفجج منهن...واناماعرف ولا وحده منهن... عفرا: ههههههههه كيف عيل نشبن فيج؟ مهرة: وحده منهن تاخذ معاي كومبيوتر...وعرفتني على الشله... اللي حوالي 12 بنت... وخلال ساعه صرت انا بالنسبه لهن وحده من الشلة ومايقدرن يستغنن عني...!!..والله يتصرفن بغرابه... عفرا: ههههههههههاي خبايل توهن داخلات الجامعه...شو تتريين منهن...!..بس ولا يهمج بخبر مريووم... في هاللحظة رن تيلفون الصالة اللي نادر مايرن.. كنت بنش لكني شفت سيف ناش يشله... سيف: آآلوووه... (وعقد حياته)... وعليكم السلام والرحمه....(التفت نظره صوبي بتساؤل معصب.)... بخير وسهاله الحمد لله.... منوووه..؟ هيي..لحظة شوي.. سد السماعه بايده وقالي.. سيف: شو هالاشكال المايعه اللي ترابعينها..؟؟؟ تعالي تيلفون.. وفر سماعه التيلفون عالكرسي ورد يلس عند قوم ابويه... اما انا فكنت مستغربه...قمت بدون كلام وشليت السماعه.. مهرة: آآلوووه...! سلوى: مرحبااااااااا... قالتها بدلع مايع على قولة سيف... مهرة: مرحبتيييين..هلا... سلوى: شحالج مهاااري..؟ مهرة: بخير وسهاله شحالج انتي..؟؟ سلوى: الحمد لله بخير...عرفتيني انا منووه؟ مهرة: لا والله السموحه منج ماعرفتج.. سلوى: هههههههه مسموحه اول مره بس ثاني مره ان ماعرفتيني ياويلج... انا سلوى.... تنهدت وانا اتذكر اني عطيتها رقمي...اووففف حق شو متصله هذي بعد.؟.. مهرة: اهلييييين سلوى...شحالج؟ سلوى: بخير عيووني شحالج انتي وشو اخبار ايدج؟ مهرة: والله على حالها بتصح ان شاء الله خلال اسابيع... عالاقل خففوا الربطه عنها يوم سرت المستشفى يوم الاثنين قبل كانت عوده شكبرها...!! سلوى: ياحيج والله...انتي كيف كسرتيها؟ مهرة: طحت عن الدري... سلوى: اوف اوف اوف.... عسى ماعورج شي ثاني؟ مهرة: ايدي انكسرت بس...رضوض عاديه وخازت وانا مافيني شي الحين.. سلوى: سلامات عيوني ماتشوفين شر..انتبهي ثاني مره وانتي تمشين... مهرة: الله يسلمج والشر ماييج ان شاء الله....سلوى من وين تتكلمين؟ سلوى: من موبايلي... مهرة: ادري من موبايلج بس وين انتي؟ في الاماره؟ سلوى: لا الغاليه انا في السكن احين قبل شوي واصلين العين.. مهرة: ياحيكم والله... سلوى: مشغووله مهرة؟ مهرة: لا والله يالسه في الصاله... سلوى: ماعليج واجبات؟ مهرة: كان واجب رياضيات وحليته.. سلوى: ياحيج..اقول..متى بداومين باجر؟ مهرة: 8 كالعاده.. سلوى: وعندج بريك من تسع لعشر صح؟ مهرة: هي ... وسلوى: والبريك الثاني؟ مهرة: من 12 لين 1... سلوى: من 1 لين 4 عندج محاضرات صح؟ مهرة: هي متواصل..وعقب اسير البيت.. سلوى: تتغدين معاي باجر؟؟؟ فكرت شوي.. باني جذي والا جذي اقعد بروحي في بريك الظهر..لانه حمده وعليا يكون عليهن كلاسات...!! مهرة: اوكي..ماعندي مانع...لاني اقعد بروحي اصلا.. سلوى: حلوو..بمر عليج كلاسج العربي بعد ماتخلصين وبنروح مع بعض..شورايج؟ مهرة: يعني القاج يوم اطلع من كلاسي؟ سلوى: هي. مهرة: حلوو خلاص تمام نتلاقى باجر عيل.. سلوى: بتسكرين؟؟ مهرة: هي وبخبرج باجر ليش اوكي؟ سلوى: هههه اوكي...تصبحين على خير.. مهرة: وانتي من اهله...مع السلامه.. سلوى: مع السلامه.. سكرت عنها وسرت يلست معاهم...لانه عفرا بعد مارحت عنها سارت ويلست عدال ريلها حمد... اما انا يلست عدال سيف وهو يطالعني بنظره فضوول ...ويوم ماعطيته ويه سالني بصوت واطي.. سيف: منوو هذي..؟ مهرة: بنت اعرفها في الجامعه... ليش تسال؟ سيف: ماحيد لج ربع يتصلن في البيت ...شيخه الفتره الاخيره تتصل..بس بنات مانعرفهن نادر..وبعدين هذي غير لهجتها شوي.. مهرة: مب من العين..هذي من بنات السكن.. سيف: اهاااا...لا والله وتسلم عادي عندها... مهرة: ههههههه شو قالت لك؟ سيف: قالت لي شحالكم؟...واسمج مادري كيف يابته بعد مدلع بشكل... مهرة: ههههههههههههههه... وشوفيها اذا سلمت يعني.. سيف: ماتستحي هذي ربيعتج..عنبوو تسلم على ريال ماتعرفه..؟ مهرة: يمكن انعجبت فصوتك ماتدري ان صوتك حلو عالتيلفون..؟ رفع سيف حواجبه واطالعني بخقه... سيف: مب بس عالتيلفون وهي مب اول وحده ولا اخر وحده تنعجب فيني... لا بس صدق مهرووه هذي ماتستحي.. لا ترابعينها.. مهرة: اولا هذي مب ربيعتي..هذي بنت تبا ترابعني وتورطت فيها نشبه... بعدين بصراحه بصراحه سيف..لين احين ماسوت البنت شي يضرني...يوم بتسوي ذيج الساعه بقولها ابتعدي عني... مد سيف ايده وهو يبتسم وظربني على ظهري بقو خلتني اكح... سيف: ياقوية انتي...ابتعدي عني اون...!! تميت انا اساعل من قوة الضربه..وحسيت صدري يعورني منها.....وحمد انتبه على حركه سيف ... حمد: ايييييييييه..شو ياك على اختك تضربها جي..؟؟ سيف: ماظربتها اسولف وياها بس هي رخوه ماتعرفها يعني.. حمد: بروحها ضئييله البنت تحيدها ماتتحمل..!! اظايقت لاني ماحب حد ينازع سيف... فمسكت الكحه وتظاهرت بانه مافيني شي.. مهرة: لا ماعورني شي...مافيني شي حمد... سكت حمد ورد يسولف مع ابويه...اما سيف فابتسم لي...لانه يعرف زين انه نقطة ضعفي...!! وفاة امي خلتني اتقرب منه اكثر لاني حسيت انه في نفس وضعي... وبما ان عمتي ماكانت تظهر لنا حنان ذاك الزود..اضطريت انا اظهر حناني لسيف...مع انه كان يحصل اهتمام اكثرعني من خواني وابوي...لانه ولد..وبيصير ريال مثلهم... اما انا بنت..ولازم اتم في البيت.. عند عمتي...وهي مب داريه اصلا عني..!! ------------------------------ اليوم: الجمعة.. المكان: سيارة راشد.. الوقت: التاسعه مساءا.. ------------------------------- (سهيل)... كنت اسولف ويا راشد في السياره لين ماتزهب البيتزا اللي طلبناها لنا وللبيت..ويوم يابوها حطيناها في السيت الوراني ومشينا... رديت اسوولف وانا مب منتبه لراشد وين ساير وهو يسولف ويايه بشكل عادي...لين ما وقف عند الصيدلية... سهيل: وين تبا؟ راشد: بيييك مابتاخر... نزل راشد ودخل الصيدلية..بينما انا ترييته في السياره مستغرب...عقب طنشت ...يمكن عنده غرض او شي ياخذه ...عادي.. لكن يوم رجع بكيسة صغيره فيها كم دوا.. سهيل: راشد شو هذا..؟؟ منو مريض عندكم.؟ راشد: شويخ... تنفست انا بحدة وحاولت اسيطر على ارتجاف ايدي....شويخ مريضه.؟؟؟ من متى؟..شويخ ماشاء الله عليها ماتمرض صحتها زينه...!!! حاولت اني اساله بهدوء... سهيل: شفيها راشد؟...شوفيها شويخ؟ اطالعني راشد بابتسامه ورد التفت عني وكمل سواقه... راشد يعرفني ويعرف زين اني متعلق بشويخ...وساكت عني مادري ليش...بس ساكت كانه راضي بالوضع...او يمكن هذي ثقة عميا...!!!.. راشد: عينها وارمه... سهيل: شووووووووه..؟؟؟ راشد: فيها ورمه فعينها غريبه... خفت بصراحه...العين جزء حساس جدا...وعيون شويخ حلوه...!! سهيل: كيف يعني غريبه..؟؟ راشد: مادري والله ياسهيل...امس طالعتلها هالورمه في الجفن العلوي..مثل الحبّه لكن داخل العين عرفت..!!..ومستويه عينها حمرا بسببها...وتدمع وايد..وتعورها تقول شوي.. تميت ساكت ماعرف شو اسوي اكفخ راشد على راسه والا ازنطه والا شو بالضبط..؟؟؟ سهيل: وديتوها المستشفى..؟؟.. راشد: ماطاعت... سهيل: ليش عاد.؟؟ راشد: تحيدها شويخ تخاف من الابر والدكاتره... !!..فمابالك اذاتعلق الموضوع بعينها..؟؟..والله مابيرومون يسووولها شي الا اذا بنجوها كامل... عصبت...صح اني ادري ان شويخ تخاف من الابر والاطباء...وماتثق فيهم... لكن هذا مايعني انها تتعبل بعينها بروحها وتهملها جي..!!!.. سكت لين ما نوصل بيت خالووه...الكلام مع راشد مايفيد لاني ادري انه حاول مع شيخه بس هذيج راسها يابس.. وصلنا البيت ودخلت انا من بعد ماراشد اكد لي بانه محد في البيت غير خالووه وبو راشد... دخلت وحبيت خالوه على راسها وسلمت على بو راشد... ويلست معاهم اسولف وراشد يلس معانا... ام راشد: ابويه راشد يبت الدوا لاختك.؟؟ مسك راشد الكيسه وعطاها امه.. راشد: هي نعم يبتلها قطوور ينظف العين .. _________________ مسكت خالوه الكيسه وتفحصت محتوياتها... .. ويوم شافت الخدامه يايبه العشا..قالت لها.. ام راشد: سيري زقري شيخه قوليلها ماما تباج الحين... راحت الخدامه تنفذ الامر هذا...بينما انا وراشد وبو راشد يلسنا نتعشا.. بعد دقايق نزلت شيخه لابسه كندوره نوم ساتره وشيله بيظا...يوم شافتني تراجعت وانخشت في صالة الحريم الصغيره.. ام راشد: تعااااااااااالي يابنتي محد غرييييب... شيخه: لا مابا ... ماشرهت على شويخ لاني اعرف انها تهتم بشكلها واايد...وحاز فخاطرها ان عينها وارمه وتستحي تظهر جدامي بشكلها هذا... ام راشد: ياربي من هالبنت... والله يا تطلعين ...شويخ مافيني اسيرلج لين هناك تعالي... طلعت شويخ راسها وهي حاطه ايدها على عينها... شيخه: اماااااياااااااااا...تعالي هني فديت روحج... ام راشد: وابوي عليج...شوفها ياخليفه رمس بنتك...!!.. بو راشد: تعالي بنتي محد غريب هذا الا ولد خالتج... شيخه: ادري بس شكلي يلوع بالجبد... تدخلت انا بالسالفه وقلت لشويخ.. سهيل: شيخه..!!..ماحيدج بزيه جذي...تعالي يالله عنبوو امج تزقرج..!! طلعت شيخه وهي مبرطمه ومغطيه عينها...يوم تقربت...كسرت خاطري..حسيت اني عفت العشا.. التفت لها وقلت.. سهيل: شويخ تعالي... طالعتني شويخ باستغراب.. شيخه: شوو.؟؟ سهيل: تعالي بشوف عينج... شيخه: مابا... سهيل: قتلج تعالي بشوف عينج... تقربت شيخه غصبن عنها ويلست عدال راشد..ولصقت فيه وهو يتعشى...راشد كان بيني وبينها يالس... راشد: شو بلاج لصقتي لفي من الصوب الثاني.. شيخه: ماريد... سهيل: انزين خوزي ايدج بشوفها... نزلت شيخه ايدها عن عينها بتردد..وشفت عينها كيف وارمه في الجفن الفوقي...بصراحه شي مايطمن... تنفست بصعوبه ...ماتهون علي شويخ اشوفها جي... سهيل: تعورج؟ شيخه: شويه... التفت لخالتي وقلت.. سهيل: خالووه جانكم عيزانين عنها هالبنت انا بوديها المستشفى... شيخه: لالالالالالالالالا مستشفى لا.. بو راشد: والله انه ترشيناها تسير ويوم مافاد نازعناها..وبعد ماشي فايده راسها يابس هالبنت.. سهيل: والله لو انا منك ياعمي مابسويها سالفه...هذي الا خبله... شيخه: ماريد انا ماريد اسير المستشفى... سهيل: جب انتي ... ماكنت مضطر اني ارفع صوتي عشان تسكت...نظرة وحده تكفي...شيخه تعرفني اذا عصبت عادي اكفخها وامشي شوري عليها ...ولاحظت من سنين بان شيخه تقدر تدلع على اهلها بس انا تسمع كلامي وتسكت... وفعلا سكتت... ام راشد: عندك اياها ياولدي... عطها من الحامي.. شيخه: امايه حرام عليكم...هذي عيني انا مب انتوا... راشد: هههههههههههه رمسة يهال.. شيخه: راشد قووووله...انا ماداني الدكاتره...وادريبهم بيطرون عيني وبيتعبثون فيها...ويمكن انعمي بعدين منو بيرد لي عيني... راشد: انا مالي خص مب قايله شي....خوزي عني خليني اتعشى.. اطالعت شيخه باستغراب.. سهيل: شحقه تفاولين علىعمرج انتي..؟؟...شو دراج انتي يمكن اذا خليتي عينج جذي تزيد حالتج ويستوي شي جايد...!! اطالعتني شيخه بنظرة كانها تترجاني... شيخه: سهيل ..تدري اني ماداني الدكاتره لا تغصبوني... سهيل: عشان بس انكسرت الابره في ايدج يوم صغيره..؟؟؟.. مايسوى عليج... سكتت شيخه وهي مبرطمه... اما انا لاول مره طنشت رغبتها..والتفت لخالتي.. سهيل: خالووه باجر تودوونها المستشفى...لا تتريوون يوم ثاني..واذا بغيتوا حد يوديكم ترا انا حاظر بس اتصلوبي وبييكم... ام راشد: ندريبك ماتقصر ياولدي.. واناامبوني بوديها اليوم بس هي راسها يابس ماطاعت.. سهيل: ماعليج منها... التفتت خالتي لشيخه وقالت.. ام راشد: سمعتي..؟؟ يالله تعالي بقطر فعينج... شيخه: هاتي انا بقطر.. ام راشد: لا والله...ادريبه قطورج انتي.. شيخه: امايه تبيني انسدح هني عشان تقطررين لي..؟؟ كانت شيخه تقصد انها تستحي جدامي... ام راشد: مب لازم تنسدحين..حطي راسج هني عالكرسي وبقطر لج انا.. تاففت شيخه ...وابتسمت انا..اكيد تحس ان الكل متعاون عليها بس لاني حرضتهم عليها الحين...!!.. قطرت خالتي في عين شيخه الوارمه ...وتمت شيخه تمش عينها وهي متظايقه..... وانااراقبها وقلبي يحن عليها...صحيح رفضتني...لكن مهما كان... هذي شيخه..!! _________________ نهاية الجزء الواحد والعشرون تحياتي |
ههيييييييييي مررررررة وناسة يعطيكي العافية حبيبتي بترياااااك لا تطولين علينا please
ترى هذي سلوى ما نزلتلي من زور وش تبي هذي ؟؟ و شويخ مسكينة يا حليلها هههه بخاطري اعرف وش بصير بينها و بين سهيل .. لا تطولي please please please :) |
ان شاء الله حبيبتي من عيوني جريب بانزل لكم الجزء اللي بعدة ......... بس نشوف ردود الخوات ........
تحياتي |
وهذاني رديت عليج كل عاده ..... يعطيج العافيه خيتو ... والله الجزء ذي روووووعه وانا من متابعات هذي القصه من البداية .. بلييييييييييييييييييز نبي جزئين النوبة هذي ...اذا ماعليج كلافه طبعاً .. دموع الفراق
|
ايه ايه نبي جزئين الله يعافيك حبيبتي انتي ...:air_kiss:
|
السلام عليكم
يلا يا اختي ما نروم نتريا وايد نحن في عصر السرعة وكل شيء نباه بسرعة |
ننتظرررررر
لا تتاخرين |
نتابع الحين الجزء اللي بعده b:7 تابعوا معاي :char0248 عشان فيه مفاجأة اذا تابعتوا معاي عدل ............. الجزء الثاني والعشرون.. ------------------------------ اليوم: السبت... المكان: المستشفى.. الوقت: الحادية عشره صباحا.. ------------------------------- (شيخة).. بديت اندم اني سمعت كلام سهيل.... منو يكون هو عشان يمشي كلامه علي دووم... !! والله حاله..!!..اهلي كلهم يلوووس وهو يالس وياهم يتامر علي ومحد منهم رمس وعارض...!!.. عدلت غشوتي وانا امشي في ممرات العيادات الخاصه...لين ماوصلنا عيادة العيون..اللي طرشتنا لها الدكتوره في القسم العام عشان يشوف عيني دكتور متخصص...!! لانها شافت اللي فعيني شي مايطمن..والله يستر... قالت امي.. ام راشد: وصلنا...يلسي عالكرسي بكلم هالحرمه.. يلست على كرسي الانتظار ...وامي راحت تكلم الممرضه بخصوص دخولنا على الدكتور المتخصص... ولحظي ... النحس...!!.. كانت العياده فاظيه تقريبا..واول ماطلعت المريضه من عند الدكتور دخلنا عليه... وبعد الفحص والتمحيص في عيني...يلس الدكتور على مكتبه وقال .. الدكتور: ياستّي عينك فيها كيس دهني صغير.. الورم اللي بتشوفيه هادا كيس دهني في الجفن العلوي لازم ينشال... بس مارح اقدر اشيل لك اياااه لانه اللحمية عندك ملتهبة من كثر اللمس او يمكن استخدمتي شي مؤخرا ما ناسب عينك.والالتهاب هادا هوّي المسؤول عن الدموع والحكه والاحمرار... بطلت حلجي انا وامي مستغربين من هالكلام....توقعت الالتهاب لكن كيس دهني؟؟؟؟؟..من وين ياني عوذ بالله... ام راشد: انزين دكتور والحل يعني بعينها هالبنت..؟؟؟ الدكتور: واللهي ياخالتي ما بقدر اعمل شيي ليرووح الالتهاب... انا بوصفلك قطور للالتهاب وبتراجعوني بعد اسبوع.. وان شاء الله يكون راح الالتهاب لذاك الوقت.. وبعدين بنشيلووا الكيس الدهني... كانت امي على وشك تقول له يكتب لها الوصفه عشان نطلع لكني سالته بسرعه.. شيخه: دكتوور...خبرني كيف بالضبط بتشلون الكيس الدهني..؟؟ ابتسم الدكتور ووقف عن الكتابه... دكتور: بتعرفي الاسبوع الجاي... شيخه: الحين ابا اعرف لو سمحت... دكتور: عملية بسيطه كتير... شيخة: اهااااا عمليه...كم تاخذ وقت..؟ دكتور: واللهي مابقدر ائيليك لانو حسب الحاله... بتاخودلا شي ساعي ونص ساعتين هيك شي... شيخه: ايواااااا ساعتين وهم يتعبثون بعيني سمعتي امايه..؟؟؟ انزين دكتور قوولي... كيف بتشل الكيس الدهني؟ دكتور: بدي ارفع لك الجفن ... شيخه: كيف بترفع جفني يعني؟ دكتور: ههههههه فيه اداة خاصه بتعمل هيك شي.. شيخه: وكيف بيطلع الكيس ابا اعرف.. دكتور: بنستخدم المشرط الصغير ..بنعمل لك جرح صغير وبنشفطوا بادوات خاصه انتي ماتخافي... شيخه: ههههه لا انا مب زايغه ...شحقه ازيغ كل هذا وما ازيغ يعني... دكتور: ههههههه مارح يوجعك شي مارح تحسي.... شيخه: كيف مابحس..؟ دكتور: لك اكيد بدنا نعطيكي بنج...يعني فيه عملييي من دون بنج..!! شيخه: بنج......بابره طبعا.. دكتور: ايه اكيد.... شيخه: ابره فعيني...!! دكتور: على الجفن المصاب.... قمت من مكاني وتغشيت.. شيخه: مع السلامه دكتور مشكور ماقصرت... طلعت من الغرفه وانا فعلا ندمانه اني سمعت كلام سهيل..... والا كل هذا يبون يسووونه فعيني..؟؟؟... برايه الكيس الدهني انا راضيه به بس مستحيل اسوي عملية مثل هذي مستحيييييييييييل.... بعد شوي طلعت امي وفي ايدها الوصفه... ام راشد: صدق ماتستحين على ويهج... مشيت معاها وانا معصبه... شيخه: برايني... بس يكون فعلمكم اني مب رادتله الاسبوع الياي ولا شي.... وقفت امي اطالعني بياس.... شيخه: امايه صدق سمعتيه ارووحج...عنبوو بيسويلي هذا كله وارضى بعد..؟؟.. حشى بيشرحني مابيطلع كيس دهني..!! ام راشد: عنبوووو الناس عيل يتعبثون بمصارينهم وقلوبهم حتى مخوخهم ولا قالوا شي...وانتي عين حاشرتنا عليها..؟؟؟ سيري لاااااه مب منج من اللي مودنج والله ومتعب عمره عشانج... مشت امي عني وهي معصبه...وانا تبعتها وانا متلوومه وزعلانه لاني زعلتها.... انا ماريدها تزعل...لكن صدق كيف بتحمل يسوون كل هذا فيني..؟!!.. هم يدرون اني متعقده من الابر ليش يبون يعذبوني زياده يعني..اوووووف كله من سهيل كله منه...!! بعد صرف الدوا...ركبت السياره وتميت ساكته لاني حسيت ان امي ماتتحمل مني أي كلمه الحين.. -------------------------------- اليوم: السبت.. المكان: الجامعه.. الوقت: الثانية عشره ظهرا... --------------------------------- (مهرة)... طلعنا من القاعه انا وحمده وعليا ونحن نظحك على الدكتور اللي كان يسولف عن "الزمالك"..فريق الكره في مصر...شكله مدمن كوره دكتورنا... يوم طلعت من القاعه تذكرت سلوى اللي المفروض الاقيها هني عشان نروح مع بعض... التفت للبنات وقلت لهن.. مهرة: اقولكن...روحن انتن انا متواعده ويا بنت... عليا: اوه اووه من اولها تواعد الحبيبه ..اي بنت.؟؟ مهرة: وحده اسمها سلوى... احرجتني واستحيت ارفض العزيمه يابوج...والا انا ويهي مب ويه مواعد... حمده: ههههههههه خلاص فديتج برايج عيل ونتلاقى باجر الساعه تسع.... نحن بنسير كلاسنا.. مهرة: الله يحفظكن... روحن حمده وعليا وتميت انا واقفه عدال القاعه...شفت سلوى تدخل المبنى وتوقف وهي ادورني بعينها...ومرت علي كذا مره بس ..شكلها ماعرفتني بالنقاب..!!... جان اسير واعقه وحطيته في الشنطه...عدلت شيلتي وسرت صوبها وانا ارسم ابتسامه بسطيه على ويهي.. مهرة: السلام عليج... يوم شفاتني سلوى اتفاجئت وضحكت... سلوى: هلا وعليج السلام... باستني وسلمت علي وقالت.. سلوى: وين كنتي فصفصت كل البنات..!! مهرة: هههههه كنت متنقبه ماعرفتيني بالنقاب... سلوى: اهاااااااا تتنقبين في المحاضرات؟؟..شي طيب... شو اخبارج مهره؟ مهرة: والله الحمد لله بخير شحالج انتي؟ سلوى: الحمد لله...تعالي نطلع عن المبنى... مهرة: وين بنسير؟؟..بتيلسيني ويا شلتكم اليوم؟ سلوى: ههههههههه لا ياعمري اليوم بنبتعد شوي عن الصدعه عشان نسولف على رواق... ارتحت من هالشي لاني طفرانه وماريد ارجع لذيج الشله من كثر مايصارخن ويحشرن الدنيا.. مهرة: تمااام....بس وين بتحصلين مكان في هالجامعه مافيه ازعاج؟ طلعنا من المبنى وتوجهنا للكافتيريا... سلوى: همممممم..شو رايج نشتري غدا ونروح المدرجات نتغدى هناك فواحد من الكلاسات....هناك هدووء ورواحنا ماشي ازعاج وبنسولف براحه... استغربت... هالبنت تعرف اشياء وايده...!! مهرة: وين هذي المدرجات بعد..؟ انا ماكد رحت هناك... مدت ايدها واشرت لي على مبنى قريب من الكافتيريا... سلوى: هذي المدرجات... مهرة: يعني فيها قاعات دراسية؟؟ سلوى: هي.. مهرة: مابيكون شي محاضرات فيهن؟ سلوى: لا اكيد تحصلين واحد او اثنين منهن فاظيات..ماعليج.. دخلنا الكافتيريا وعلى طول رحنا الحمامات عشان على قولة سلوى "ريفريش ميك اب"... مع اني ماكنت حاطه ذاك الزود لكن سلوى ماكانت مقصره...وفي الحمام سالتها بتردد.. مهرة: سلوى..ماشاء الله عليج احسبج تعرفين وايد اشياء عن الجامعه ...كانن عندج خوات في الجامعه قبلج؟ التفتت لي سلوى باستغراب.. سلوى: انتي تتحسبيني مستجده..؟؟؟؟؟ ويوم شافت الاجابه على ويهي نقعت من الظحك.... سلوى: ههههههههههههه...اوووه بلييييز مهرة انا شكلي شكل مستجده.؟؟...لا حبيبتي انا سنه ثانيه جامعه مب اولى... انصدمت من هالمعلوومه... مهرة: عيل..كنتي اداومين في اسبوع المستجدات...ليش.؟؟ سلوى: الله يسلمج اختي مستجده وكنت مداومه عشانها....شفتي شلتنا الكبيره؟ هذيلا نصهن ربعي ونصهن ربعها والا نحن ماكنا وايد جذي....!!.. مهرة: اهااااااااااااااا فهمت... طلعنا من الحمام ورحنا عند منصة البيع واشترينا غدا...وطلعنا بعدها من الكافتيريا ورحنا للمدرجات اللي تقصدهن سلوى...دخلنا وحده من القاعات الفاظيه ورحنا ااااااااخر شي..ويسلنا هناك نتغدا... وفعلا مثل ماقالت سلوى...هدوء والواحد يسولف براحه.... سلوى: ماقلتيلي مهرة.. اي كلية؟ مهرة: علوم انسانية..وانتي؟ سلوى: انا بعد علوم انسانيه.... شو تحبين تتخصصين؟ مهرة: اعلام ان شاء الله... عفست سلوى ويهها بخيبه امل.. سلوى: اووووه انا تخصصت علاقات عامه...شو تبين بالاعلام تعالي ويانا.. مهرة: هههههه ماريد...ابا ادرس تصوير... سلوى: تحبين التصوير؟ مهرة: وايد... سلوى: ياسلام يوم بتتخصصين بخليج تصوريني عيل... مهرة: ولا يهمج كل تجاربي عليج.. سلوى: ههههههههههههههههههه احسن.. ماقلتيلي مهرة..يوم اتصلت بج تيلفون رد علي واحد...اخوج؟ ابتسمت وانا اتذكر سيف وردة فعله.... مهرة: هي اخويه سيف... سلوى: اصغر او اكبر؟ مهرة: هههههه ثانوية عامه... سلوى: عندج خوات غير؟؟ خبريني عن عايلتج..؟ مهرة: همممممم...عندي ابويه...حمد اخوي معرس..وساكن معاناز..وعندي سهيل بعده عزابي..ويشتغل...وبعدها انا...وعقب سيف...وساكنه معانا عمتي اخت ابوي...عانس..ووو امي الله يرحمها.. ابتسمت لي باسف كانها تحاول تعزيني... سلوى: الله يرحمها... يعني انتي البنت الوحيده في البيت؟؟ اكيد مدلعينج عيل.. مهرة: ههههههههههههههه هي وايد مدلعيني... قلتها بسخرية بس سلوى صدقت السالفه... سلوى: ياحظج...انا عندي اخو واحد اكبر مني... واختي اصغر مني.. وخوات ثنتين كبار معرسات... قعدنا نسوولف سوالف تافهه كبدايه تعارف....ولين الحين ماشفت من هالبنت شي يضرني... عيل ليش حسيت بنفووور منها في البدايه؟؟؟ الله اعلم... هذا بيعلمني اني ما احكم على الناس من اول نظره.... البنت تسولف بشكل طبيعي ولين احين اشوفها مثل اي بنت عادية جدا.... تمينا نسولف ونسولف لين ما قربت استراحتي تخلص...وفجاه تذكرت اني ماصليت... قمت من مكاني وقلت لسلوى.. مهرة: يالله سلوى نسير الحمام.... سلوى: ليش؟ مهرة: بنسير نتوضى بنصلي الظهر.... قالت لي سلوى باستغراب... سلوى: نصلي الظهر؟.. مهرة: هي ...شو مابتصلين؟ سلوى: آآه...بلى بصلي في السكن بعد ما اوصلج كلاسج...ما احب اتوضى في حمامات الجامعه... مهرة: اهاااااا ..على راحتج انا بسير اتوضى وبييج.. سلوى: اووكي.. طلعت من القاعه ورحت الحمام اتوضى للصلاة...وانا ما اقتنعت كليا بعذرها...لكني يوم دخلت الحمام بديت اقتنع جزئيا....الحمام فعلا مايشجع الواحد يتمسح فيه.... لكن مثل مايقولون ...." اللي يبا الصلاة ماتفوته".... وانا مابفوت صلاتي عشان حمام... ------------------------------------ اليوم: السبت.. المكان: سيارة ناصر.. الوقت: الثالثه ظهرا... ------------------------------------- (ناصر)... سكرت التيلفون عن حميد اللي وعدني نتعشى رباعه في شقتي اليوم...يلست في سيارتي اتريا غداي اللي طلبته من المطعم... ويوم وصلت طلبيتي ..دفعت عنها وحركت سيارتي للشقة.... ويوم وصلت لباب شقتي شكيت باني غلطت بالطابق... لكن يوم شفت رقم شقتي الموجود عالباب تاكدت....لكن الدهشة مازالت موجوده... وسببها هو باقة ورد محطوطه عند عتبة بابي مع بطاقه صغيره...!!! شو هالشي..؟؟؟ غريبه منو بيهديني ورد..؟؟ تقربت وخذت الباقه..ولكن لاني محمل كيسه الغدا بعد ماقدرت افتح البطاقه... فدخلت الشقه وسكرت الباب وراي.... دخلت الصالة وحطيت الغدا عالطاوله ويلست عالكرسي والباقه فحظني... مديت ايدي للبطاقه وفتحتها... مكتوب فيها " call me…" ورقم موبايل...!!! استغربت...هذا حد يسوي فيني مقلب اكيييد..لايكون قوم عبدالله هذيلا مسوين جي؟؟؟... لكن مافي فايده من التساؤل..خلنا نتصل ونشوف... حطيت الباقه عالطاوله ومسكت البطاقه ودقيت الرقم الموجود فيها على تيلفوني...واتصلت.. .....: آلووووه...! صوت انثوي...عقدت حياتي مستغرب....ومب اي صوت بعد...اوووووفففففففف... ناصر: السلام عليج... سومه: هلا والله ومرحباااا حي هالصوووووووووووت... ناصر: انا شوو قايلج..؟؟؟...ما قايلج لا تتصلين..؟ سومه: انزين انا ما اتصلت....انته اللي متصل.. ناصر: لو دريت انج انتي ما اتصلت... سومه: يعني لو بنت غيري عادي بتتصلبها ؟ ناصر: لا انتي ولاغيرج انا قلت لج ودرت هالسوالف... سومه: يعني حركه معرووفه هذي انها بنت ..عيل ريال بيهديك ورد؟؟؟؟ معاها حق...اناغبي.... بس الفضوول شو اقول عنه..؟؟ ناصر: ماعليه...احين شو تبين انتي؟ لان صوتها شوي وبدت بالمناحه المعتاده.. سومه: ناااصر... فديت روحك...والله اني حاولت ابتعد عنك بس ماقدرت... ماقدرت.... ناصر: بتقدرين ان شاء الله.... سومه: ليش ماتفهم...انته مب اي واحد بالنسبه لي....انا احبك... قلت فخاطري حبتج القراده.... ناصر: وآخرتها ويا هالحب يعني...؟ سومه: تم معاي لا تفارقني ..تدري اني مابضرك بشي.. ناصر: لا انتي ولاغيرج يروم يضرني ...وبعدين ليش اتم وياج..تدرين انتي اني مستحيل اخذج... سومه: ... انزين انا ماطلبت منك تاخذني...بس الطريقه اللي فارقتني بها يت فجاه وانا ماكنت مستعده اتخلى عنك بهالطريقه... ناصر: وشوو تقترحين يعني؟ سومه: شوي شوي...بتعود على فراقك...مب مره وحده جي... تنهدت وحاولت محاولة يائسه... ناصر: سومه...ماسالتي ليش اسميج سومه.؟ سومه: تدلعني؟!!... ناصر: هههههه لا...اسميج سومه لاني ناسي اسمج... ماعرفه هو شو بالضبط ..سمية ..اسما..ساميه...مب متذكر... عرفتي احين انتي شو بالنسبه لي.؟!!!.. ادري كلامي يجرح بس كان لابد منه عشان تحل عني وتحس.... انا كافيني اللي فيني...ماقدر اتحمل صدعتها هذي بعد... طول سكوتها وحسيتها انجرحت ... بس بعدين تلكمت بهدوء... سومه:... اسما ياناصر...اسمي اسما.... تميت ساكت عنها مب عارف شو اقولها.... اسما:..ناصر...بسالك...في وحده فحياتك..؟؟؟ قلت لها بدون تفكير.. ناصر: هي...في وحده فحياتي.. اسما: هي السبب في تغيرك علي جذي...؟ ناصر: هي السبب في تغيير كل شي فيني اوكي..؟؟؟ اسما: لهالدرجه؟ ناصر: واكثر... اسما: ......... بتاخذها.؟!.. ابتسمت بسخرية....اسما مب عارفه عن شوو تتكلم...!! تتحسبني عايش قصة حب.. ناصر: ياريت اقدر اخذها....المهم اسما...شوفي..انا اسف... تماسكي انتي وانسيني... انا ماقدر اكلمج بصراحه... اسما: بس ناصر... قاطعتها .. ناصر: يابنت الحلال افهمي...انا خلاص التزمت...ابتعدت عن كل شي حرام...وانتي حرااااام عليه فهمتي.؟؟ اسما: حتى ذيج البنت حرام عليك شمعنى يعني..؟ ناصر: ومنو قالج اني اشوفها او اكلمها..؟!!!... المهم هالموضوع مايخصج انتي....كل اللي اطلبه منج تخليني فحالي....وبليز لا تتصلين بي مره ثانيه خلاص...انسي....مع السلامه... سكرت عنها واغلقت التيلفون مره وحده عن تتصل مره ثانيه....اطالعت الغدا بعيني وحسيت اني مالي نفس... رحت حجرتي ودخلت الحمام اتسبح.... وبعد السبوح انفتحت شهيتي شوي...ورجعت للصالة اتغدى.... وانا كل شوي التفت للباقه وافكر شو اسوي فيها..؟!!.. ---------------------------------- اليوم: الاحد... المكان: سيارة سهيل... الوقت: الرابعه والربع مساءا.. ----------------------------------- (سهيل)... كنت ساير اوصل راشد بيتهم يوم اتصلت مهرة بي من الجامعه....اشوفها ادمنت اني انا اللي اييبها من الجامعه هالبنت... سهيل: ليش ما اتصلتي بعمتج والاابويه؟؟ مهرة: اتصلت كلهم غالقين تيلفوناتهم يمكن رقووود... سهيل: وحمد..؟؟ سمعت مهرة تشهق باستغراب.. مهرة: فظيييحه ... عفرا راقده يمكن والا شي... سهيل: هي فظيحه لحمد لانه معرس ..حتى اني انا ماعرست عاااادي اطرشوني مشاوير الظهر هاااه..؟ مهرة: ههههههه احين العصر مب الظهر... سهيل: جلبي ويهج.. مهرة: منووو بيييبني حرام عليك... سهيل: بيييج احيين اووفف...باي.. مهرة: باي.. حطيت تيلفوني عالمسند وانا عافس ويهي.... راشد: شو بلاها..؟؟ سهيل: شو بعد بلاها؟ حالها مثل كل يووم...تباني اييبها من الجامعه... راشد: انزين وصلني البيت عقب رد لها... سهيل: تحلم... الجامعه الا هذييه قريبه ...تباني اسوي من المشوار مشوارين..؟!!.. راشد: اوهووووو يالمذله... سهيل: كيفك عاااد... وصلنا الجامعه ووقفنا نتريا مهرة ونحن نسووولف.. شفتها وهي طالعه متنقبه ...وكانت يايه بتركب جدام كالعاده..بطلت الدريشه وقلت لها.. سهيل: راشد راكب جدام ركبي ورا... وقفت شوي مهرة..مادري منصدمه مادري مستغربه...مادري لين تستوعب ....لكنها عقب مشت عادي وركبت وراي... مهرة: السلام عليكم... ردينا عليها السلام... سكتت شوي..وسكتنا نحن...كنت اترياها تسلم على راشد وان ماسلمت هالمره بعطيها طراق على ويهها...لانه فظييحه بصراحه..... ومب اول مره تسويها...وانا ما ارضى على راشد ينحرج مهما صار...!! لكنها في النهاية سلمت.. مهرة: شحالك راشد..؟ التفت راشد نص التفاته واطالعها بطرف عينه لكنه رجع يطالع الشارع جدامه...وقال ببرود.. راشد: بخير الحمد لله شحالج انتي مهرة؟ مهرة: بخير.. سكتنا لين ماوصلنا بيت خالوووه... وقبل ماينزل راشد سالته.. سهيل: راشد...وديتوا شويخ المستشفى.؟؟ راشد: هي ودتها امي امس.. سهيل: وشوو قالوا..؟؟ راشد: يابوك مارمنا نستفسر عن شي بسبب الحشره اللي سوتها شويخ... وامي زعلانه عليها ماطاعت ترمس بعد...حريم شو بتقول.. مهرة: شووه.؟ شوفيها شويخ ؟ ليش وديتوها المستشفى.؟؟؟ راشد: شويخ عينها وارمه... سهيل: ماتدرين انتي؟؟؟ مهرة: لا محد خبرني... سهيل دخل السياره داخل بسير اشوفها... سهيل: الحين مهروووه الظهر..؟؟ مهرة: الحين العصر...عادي عادي ادخل... دخيييلك... حركت السياره ودخلت بيت خالوووه... نزل راشد ونزلت مهرة... لكنها يت ووقفت عدال دريشتي.. مهرة: انزل.. سهيل: مافيني... مهرة: انزل والله ياتنزل عنبو تخليني ادخل اروحي البيت.؟؟ تاففت ونزلت مع مهرة ودخلنا البيت... خالووه كانت راقده...وبو راشد بعد كان راقد... يلسنا في الصالة لانه راشد راح يزقر شيخه من فوووق... ويوم نزلت شيخه اطالعتني انا بنظره ابسط شي اقدر اقوله عنها هو " سم"... سهيل: بسم الله الرحمن الرحيم.... حركت شويخ صبعها جدام ويهي بحركه معصبه.. شيخه: لا تكلمني انته سويت لي مشكله... (والتفتت لمهرة وابتسمت)...هلا والله وغلااا باللي متعني وياي يشوفني.. تصدقون... حسيت بالغيره.... الترحيب لمهرة والابتسامات والبوسات والاحضان وكل شي يخطر عالبال...اما انا اللي خايف على صحتها وبغيت اطمن عليها ..سويت لها مشكله..!!!..سبحان الله يالدنيا... راقبت ويه مهرة وهي اطالع عين شيخه بتفحص.. مهرة: شوفيها عينج شويخ.؟ ليش جي وارمه..؟ شيخه: ياختي قالي الدكتور كيس دهني اون...وسوالي فلم رعب وهو يشرح لي كيف بيشل هالكيس الدهني.. مهرة: كيس دهني في العين..؟؟ عوذ بالله من وين ياج..؟ شيخه: والله مادري...بس برايه الكيس الدهني هذا انا راضتبه...ولا بسوي هالعملية... سهيل: نعم..؟!!... رفعت حواجبي باستغراب في نفس الوقت اللي صدت فيه شيخه صوبي معصبه... شيخه: هي نعم... عيل سهيل يقولي بطر لج عينج وبشفط الكيس الدهني ..وبعطيج ابره بنج وفعينج بعد..؟؟؟؟ سهيل: لا حول ولا قوة الا بالله...ردينا ياشويخ على هالموال...راشد ارمس... راشد: اعتقد شويخ حرمه وتعرف مصلحتها اكثر عنا ...باختصار مافيني على صدعتها لو هي تبا صحتها وتباعينها ترجع طبيعي بتسوي العملية... شيخه: والله ماسويتها انزين...حشى يابويه حشى....ابره في العين هذي اول مره اشوفها انا... مهرة: شيخه...مب زين عليج...حرام تخلين عينج جذي... شيخه: ماقدر ماقدر مهرة بموووووت....انا يوم اشوف الابره اموت كيف بيطعزوني بها فعيني..؟ لالالالالا... سكت....اسلوب الاقناع ماينفع مع شويخ وماحد اكثر مني يعرف هالشي..... بالتالي سكت...لين افكر بحل... مستحيل اخليها جي... سهيل: خلاص على راحتج...عطاج دوا لها انزين..؟؟ اطالعتني شيخه باستغراب لاستسلامي السريع.... شيخه: عطاني عن الالتهاب... سهيل: ترومين تستخدمينه هذا اظني صح؟؟ شيخه:هي استخدمه... سهيل: بس خلاص عيل...مهرة يالله روحنا... شيخه: لا مااااااايلستووا...روح انته وخل مهرة عندي... اطالعتها بعناد وقلت.. سهيل: لا... شيخه: حرااااااااااااااااااااام... سهيل: ....لا.... وبعد السلامات..روحنا انا ومهرة البيت...وفي السياره... مهرة: من صدقكم بتخلونها جي..؟؟؟.. سهيل: لا من جذبنا... مهرة: سهيل اكلمك جد... سهيل: وانا بعد اكلمج جد.... بشوف حل ويا هالشويخ هذي...اهلها مب رايميها...ولاانا بروم اقنعها... لازم نحصل طريقه نوديها المستشفى بدون ماتدري انها سايره المستشفى...وهناك بنحطها في الامر الواقع ... مهرة: ههههههههههه مجرمين والله... سهيل: وانتي ويانا... مهرة: شو بعد تباني اتعاون وياكم؟ سهيل: مابتصدق شيخه الا اذا انتي ويانا.... مهرة: مافهمت.. سهيل: بخبرج قبل موعد العملية مالت شيخه.... سكتت مهرة وسكت انا...لين وصلنا البيت وكل حد راح فحاله.... -------------------------------- اليوم: الاحد.. المكان: بيت سلطان.. الوقت: الثامنه والنصف مساءا.. -------------------------------- (منى)... غصبن عني كنت لاصقه في الدريشه.... من شفت سياره خالد ودخوله الميلس هو واوراقه وانا لاصقه في الدريشه.. مادري ليش... مع اني ادري انه خاطب والمفروض ماا فكر فيه بس ...ماعرف...فضول.. وطولوا وهم في الميلس من صلاة المغرب وهم يالسين هناك...خالد ويوسف... وبعد نص ساعه ثانيه طلع خالد وركب سيارته وروح..من دون الاوراق... اما يوسف اللي طلع هو بعد من الميلس يا صوب البيت... ركظت وابتعدت عن الدريشه ويلست جدام التلفزيون... دخل يوسف البيت ويوم شافني يالسه يا ويلس معاي... يوسف: شو تسوين؟..اول مره اشوفج اطالعين الاخبار..؟!!!.. انتبهت اني بدون قصد حاطه عالاخبار....ويوسف يدري باني ما حب الاخبار خير شر... منى: احاول اقلد امايه.... مسكت الريموت وبدلت عن القناة .... يوسف: سمعي...عندج واجبات انتي او شي؟ منى: لا ماواحينا يعطونا واجبات.. يوسف: ياحظكم... انا ماخذ مساق لازم فيه نسوي كل اسبوع برزنتيشن...نحن سوينا التقرير وكل شي بس باقي الباور بوينت...بتسوينه لي؟ منى: افا عليك ماطلبت...بسويه لك... يوسف: مشكووره..مسكي ...هذي الاوراق مال التقرير.. اي شي ماتفهمينه خبريني... مسكت الاوراق بارتجاف...اعتقد انها الاوراق نفسها اللي كان خالد شالنها...وهذا خط خالد عليها....ياويلي..!!.. منى: اوووكي..متى تباه؟ يوسف: الثلاثاء... منى: مب مشكله... يوسف: عيل وين اهل البيت..؟؟ منى: هممم...ابويه بيتعشى عن ريال امي تقول... وامي تصلي العشا... محمد وحرمته وعياله فبيتهم...وانا هني.. يوسف: حلفي انج انتي هني..؟؟؟ قومي قومي قولي حق جوليتا تحط العشا وانا بتصل بمحمد... خليت الاوراق عالكرسي وطلعت عشان ازقر جوليتا ....ورجعت للصالة... ويوم رجعت حصلت يوسف ماسك سماعة تيلفون البيت والابتسامه على ويهه... يوسف: احين وقت عشا ماتستحين داقه احين....؟!!. اشرت له لاني شكيت بالموضوع.. منى: منو تكلم..؟؟؟ واشر لي هو الثاني عشان اسكت وكمل كلامه... يوسف: كيفي كيفي كيفي بيتنا ..وهذا تيلفوونا..وانتي طالبه اختي مابعطيج ترمسينها.... يلست عالكرسي وانا ابتسم.... يوسف اشوفه ادمن المغايظ مع كنه... يوسف:مابعطيج اياها لين ماتين بروحج وتمسحين كلمه سبال عن جامتي... سكت شوي وهو يسمع كلامها وعقب ورد ظحك... يوسف: ههههههه لا ماغسلتها انتي شو حارنج ..؟!!.. منى: اوهوووووو يوسف عيب عيب...عطني السماعه.... ماكان ناوي يفج السماعه لولا انه شاف محمد اخويه نازل من قسمه عشان العشا... حطيت السماعه على اذني وانااضحك... منى: هلاااااا... كنه: ياربي ثاني مره انا مابتصل الا بعد موعد مسبق...شو مستوله اخوج قام كل مايشوفني يستلمني..؟!! منى: هههههههههههههههههه متخبل هاليومين اظني اخر كورس مشوش عليه فيوزاته شوي... كنه: جنه الا جي...شحالج.؟ منى: بخير شحالج انتي...؟؟ كنه: دخلي دخلي النت براويج شي مهم.... منى: النت..؟؟ الحين بنتعشى...!! سمعت يوسف يزعج عليه.. يوسف: بناتنا مايستخدمن النت في الليل.... كنه: قوليله يسكت هذا.. ظحكت انا والتفت ليوسف.. منى: تقولك اسكت... بطل يوسف عيونه عقب رفع ايده ومسح على لحيته... يوسف: ماعليه ماعليه .... منى: خييييييييييييييبه يتحلف لج... كنه: لا بلييييز تروعت انا... منى: انصحج تتروعين... كنه: شو بيسوي يعني.؟ منى: والله مايندرا...ههههههههه... كنه: ماعليه منه...المهم تعشي واتصليبي اذا مابدشين النت اوكي.. منى: اوكي...باااي.. كنه: باااي... سكرت التيلفون وسالت محمد... منى: وين ميثا عيل.؟ محمد: ماتبا عشا ميثا... منى: عيل بزقر امايه وبنتعشى وياكم... سرت وزقرت امي ورجعنا للصالة وتعشينا رباعه... -------------------------------------- اليوم: الاحد... المكان: بيت خلفان.. الوقت: الحادية عشره مساءا.. ------------------------------------ (سيف)... طلعت من بيت جمال وانا شال اللعبة الحربية اللي يشغلونها في الكمبيوتر...دخلت بيتنا اللي كان هادي...وشفت سيايير خواني كلها موجوده بالتالي قفلت الباب وراي.... ركبت فوق ودقيت الباب على مهرووه... يوم فتحت لي الباب قلت لها.. سيف: مارقدتي..؟ مهرة: بعدني شوية...توك ياي من برا.. دخلت حجرتها ورحت ويلست عالكمبيوتر... سيف: هي توني ياي... شغلت الكمبيوتر اللي كنت اعرف له شوي لانه جمال كان يعلمني عليه وكنا نعلب هاللعبه في كمبيوتره في البيت... سحبت مهرة كرسي التواليت ويلست عليه عدالي...جدام الكمبيوتر.. مهرة: شو تسوي.؟؟ سيف: بدخل هاللعبه عندج....فناااانه يامهرووه.. مهرة: بتعلمني عليها..؟ سيف: اذا تبين... سكتت مهرة وسكت انا معاها وانا دخل اللعبه في الكمبيوتر واحملها...وبعدها سالتني.. مهرة: سيف..شو مسوي في الدراسه؟ سيف: الحمد لله.... مهرة: وامتحان الانجليزي ذاك اليوم؟ سيف: زين..لااباس فيه... كنت ادري ان مهرة تحبني بشكل كبير...وادري انها تخاف علي اكثر من نفسها....وادري بعد انها كانت تحاول تعوضني عن حنان الام من صغر السن...لكنها للاسف مانجحت بهالدور ... بسبب صغر سنها... يالله يالله كانت تتحمل مسؤوليه نفسها...كانت تحاول تعطيني اهتمام وغيره...لكنها مافهمت اني انا بحاجه لحنان واهتمام شخص كبير...مب شخص اكبر مني بسنه وتقريبا كبري بالسن وطايح بنفس المشكله والوضع نفسه..!!!... مسكينه... احيانا احس نفسي اكبر وافهم منها.... يمكن لاني شبيت بسرعه خلال مراهقتي ..طولت وعرضت كتوفي وطلعت لي لحية خفيفه... اما مهرة هي نفسها من كانت في الاعدادي... صغيره نسبيا..ناعمه وايد... تخاف عليها من نسمه الهوا.... مع ذلك اعاملها بخشونه عشان تقوى شوي...ماباها اتم رخوه جذي... كنت يالس اعلمها على اللعبه واسولف وياها عنها..... كانت هي ساكته.... واستغربت سكوتها...بالعاده مهرة تتحمس بسرعه لاي شي اسويه معاها....لكنها اليوم هادية... يوم التفت لها حصلتها اطالعني انا بدال مااطالع الشاشه.... سيف: شوفيج.؟.... مهرة: سيف.... انا اشبه امايه؟؟ سيف: شو دراني مهرة ماذكرها عدل... قامت مهرة وفتحت الدرج اللي عدال شبريتها وطلعت صوره ويتني بها... مهرة: شوووف....وقوللي...انا اشبه امايه.؟؟ حسيت بشي غريب ماقدر اوصفه من شفت صورة امي المرحومه..تبتسم للكاميرا...ابتسامه خلتني انا بعد ابتسم بدون ماحس...كاني اشوفها جدامي...!!!.. سيف: هي ..تشبهينها مهرة... مهرة: تقدر تتخيلني امك ...لخمس دقايق بس..؟؟ التفت لها مستعجب من هالطلب..!!!!... سيف: شووو؟ مهرة: يالله...تخيلني امي لخمس دقايق... مافهمت شو هالطلب الغريب...لكني قلت بجاريها... سيف: اووكي..!!.. مهرة: تخيلت..؟؟؟ سيف: هههههههه هي تخيلت... قالت لي مهرة بجدية... مهرة: انا امك... واطلب منك...دخيلك ياسيف...ودر الزقاره... اختفت الابتسامه عن ويهي...هذي شو دراها..؟؟؟ سيف: شو دراج انتي؟؟ مهرة: لا تكلم امك جي... سيف: كيف دريتي؟؟ مهرة: من فتره وانا اشمه فثيابك... سيف: حشى يابوج عايله جلاب بوليسية مب اوادم... مادريت الا بكفخه على جتفي... مهرة: ماتستحي على ويهك انته تقول عن اهلك جي...؟ سيف: اشوف صدقتي عمرج انتي... مهرة: احين شوو...ماظني امايه كانت بتوافق انك ادوخ زقاره سيف...شوف خوانك كبار ولا سووها قبلك لانها هي كانت حية يومها... ولو كانت حية مابتخليك ادوخ....بس خلاص يوم ماتت صار عادي تسوي اللي في راسك..؟؟ سكت ومب عارف شو اقولها.... مهرة: بتودرها انزين..؟!!!.. سيف: انزين مهرة خلاص سكتي...لا ترمسين عن امايه... سكتت مهرة.... هي تدري اني اتعذب وايد من يطروونها....انا الوحيد اللي ماذكرها زين ولا تمتعت برعايتها لي... وبعد هالحوار المعذب هذا رديت احاول انسى وكملت تعليم مهرة على اصول اللعبة الحربية عالكمبيوتر... ------------------------------------- _________________ نهاية الجزء الثاني والعشرون تحياتي لالالا فيه شي بعد نزلوا تحت ........ اشوي بعد نزلو اشوي خخخخخخخخ ............ الجزء الثالث والعشرون.. ----------------------------- اليوم: الاثنين... المكان: شقة ناصر... الوقت: الخامسة مساءا.. ---------------------------- (ناصر).. لبست ملابس رياضية لونها اسود...وعلى الاطراف خط ابيض رفيع... وبعد ماخذت اغراضي الشخصية لبست نظاراتي الشمسية وطلعت من الشقة.... اول ماطلعت وقفت مكاني مستغرب....!! لاول مره من سكنت في هالشقة اشوف علي بن سالم واقف عند باب شقة عبدالعزيز...ويدق الباب بقلق... ناصر: السلام عليك ... التفت علي صوبي متفاجئ ويوم شافني ابتسم مستانس... علي : وعليك السلام والرحمه ... توايهت معاااه وانا ابتسم... علي: مرحبا الساع... قال لي عبدالعزيز انك ياااره بس مادريت انكم الباب بالباب.. ناصر: هههههه لا نحن متجابلين والله يعينه علي....شحالك ياعلي؟ عساك طيب.. علي: بخير وسهاله شحالك انته وشو الدنيا وياك؟ ناصر: مانشكي باااس والله الامور طيبه....اقـــرب.. علي: لالالا قرييب بس ماريد اعطلك اشوفك متلبس ماشاء الله بتطلع... ناصر: ساير الا اسجل اسمي في الصالة هذي مال كمال الاجسام...مافي شي مستعجل...اقرب والله ياتدخل.. علي: ياريااااااال... ناصر: عالاقل كوب عصير.... قال علي باستسلام... علي: مابردك ياناصر... دخل علي شقتي وعلى طول الصالة.... حمدت ربي ان الصالة مرتبه....لكني حسيت بويهي يحترق يوم شفت علي يطالع الورود اللي وزعتها يوم السبت في كواب ماي وحطيتها في الصالة على كل طاولة....!! احين شو بيقول عني..؟؟..بيتحسبني رخو...افااا... عضيت على شفايفي وانا منحرج...بينما هو اطالعني وابتسم..ويلس على واحد من الكراسي.. علي: جنها شقتك اصغر من شقة عبدالعزيز صح..؟ يلست على كرسي ثاني قريب.... ناصر: هي عبدالعزيز ماشاء الله بعايله...انا بدون عايله ارووحي مااحتاج شقة وسيعه.. ابتسم علي قوال.. علي: ان شاء الله بتسوي عايله قريب....الا تعال...ماشفت عبدالعزيز..؟؟؟ عقدت حياتي... ناصر: شفته الصبح ونحن طالعين للدوام وعند صلاة الفجر....عقبها ماشفته... علي: قالولي داوم بس طلع من الدوام بدون مايترخص...ولا رجع بعدها...اتصلبه محد يشل تيلفونه...قلت بايي بطمن وسارلي خمس دقايق ادق الباب محد فتح لي....وانا بصراحه مستهم... ناصر: خليتني استهم وياك والله....يمكن ناسي تيلفونه بقعه وطلع مع اهله محد يدري... علي: اتمنى والله يكون مافيهم شي.... ويستويله عبدالعزيز انه ناسي تيلفونه... ناصر: هو مب زود مفتكر في التيلفون اصلا هههههههه ... علي: مايدانييه يقول يعورله اذنه واييبله الصداع... ناصر: انا بعد اتوذى منه بس احتايه... دقايق ياعلي عن اذنك.. علي: لا تيب شي يا ناصر لا تعبل على عمرك... ناصر: مالك خص انته... طلعت من الصالة وانا اسمع علي يضحك.... دخلت المطبخ وصبيت عصير في اكواب... وحمدت ربي اني امس شاري كيكة من السوبرماركت...شفتها واشتهيتها... قصيت قطعه وحطيتها في صحن صغير مع شوكه مع اني ادريبه مابياكلها كلها لكن ماعليه عالاقل جدمت شي... شليت الفواله البسيطه ورديت الصالة.... ناصر: تفضل... علي: شحقه يعني ماقصيت لعمرك كيك بس انا... ناصر: ههههههههه اقولك بسير اسجل في صالة كمال اجسام تقولي كل كيك.؟؟ مافي فايده عيل... علي: هههههههه عيل الكيك شو يسوي في ثلاجتك..؟ ناصر: اشتهيته بس.... علي: عليك طلعات ياناصر...والا شو سالفة هالورد هذا مسوي صالتك حديقه...!!! ناصر: ههههههههههههههههههههه...يمكن انا رقيق...!!! اطالعني علي بسخرية وقال... علي: ولا طاحتك الرقه..... ظحكت وانا مستانس بانه علي مافهمني غلط... عقب سكت وقلت له بجدية... ناصر: اذا الفت لك قصة باخذ اثم وبطلع جذاب..واذا قلت لك الصدق اخاف اطيح من عينك...شو الحل؟ ابتسم علي.. علي: خلاص لا تقول دامها خصوصيات... ناصر: لا مب سالفه خصوصيات...بس هذي آثار من حياتي قبل الالتزام...وهي حياة غير مشرفه نوعا ما... علي: اهااااااااا...كيف ماذبلن الورد من ذاك الحين.. ناصر: فهمت غلط...في شخص حاول يرد لحياتي يوم السبت ومعاه هالورد....قبلت الورد لكني ماقبلت رجعته هو لي... هز علي راسه بتفهم وشرب العصير... عقب قال... علي: دامك على طريج الحق بتحصل وايد مغريات تحاول تسحبك لطريجك الاولي....ليش ماتبعد نفسك عن المغريات وتفتك..؟!!.. ناصر: كيف ابعد نفسي..؟ علي:.. الشخص اللي تقصده هو بنت وكانت لك علاقه معاها صح..؟؟ نزلت عيوني منحرج.... ناصر: صح.. علي: ماتحس احيانا انك بحاجه لها او مب لها يمكن لانسانه ثانيه... او حتى مب شرط تكون بنت...ماتحس انك متوله على حياتك قبل الالتزام.؟؟ ناصر: تبا الصدق هي....اقصد مب اني اتوله عالبنات لا...بس احين احس بفراغ حياتي..ماعندي شي اسويه ماتشوفني الهي نفسي بالرياضه وغيره..!!..قبل كان دايما عندي شي اسويه...دايما ويا الربع عندنا خطط واماكن واشياء نسويها...واذا ماحصلت شي اسويه ارقد طول النهار... الحين ماروم ارقد عشان الصلاة...فهمت قصدي.؟؟ علي: فاهم عليك .... ناصر حط فبالك ان طريج الايمان صعب وايد.. اما الطريج الغلط تلقاه ماشي اسهل عنه.... ودامك عايش في فراغ ليش ماتحاول تملي هالفراغ هذا عشان ماتضعف وترجع لسابق عهدك... ناصر: احاول تراني.... علي: شو رايك تي معانا الشام...انا الحرمه والعيال عندي يبون يسيرون هناك اسبوعين ثلاثه...وانا باخذ اجازه وبسير بعد...وقلت حق عبدالعزيز ووافق...تعال انته ويانا... ناصر: الشااام..؟؟...لالا انته بتسير ويا اهلك وانا مافيني ازعجكم... علي: انته تتحسبني بقعد وياهم..؟؟ لا يابويه هذيلا اهلها غير مايدش الريال بيتهم الا جان معزوم على غدا او عشا... والحرمه تبا تقعد مع خواتها وخوانها... انا بخليها هناك وبسير اتحوط ويا عبدالعزيز... ناصر: والله..؟؟؟؟ ....حلوو عيل بفكر انا لين الاسبوع الياي وبشوف امكانيه اني اخذ اجازه وبرد عليك خبر.. علي: تمااااام.... ناصر: ومتى بتسافر.؟؟ علي: الاسبوع الياي...يوم الثلاثاء.... فكرت شوي وحاولت استرجع اذا فيه عندي اشغال للاسبوع الياي....وطلعت فاظي تماما... ناصر: وقت مناسب بالنسبه لي.. بس بعدني بفكر ولين السبت بيكون عندك خبر ان شاء الله.... وعلى هالحال بديت احط فكره السيره للشام من الخطط للاسبوع الياي....ليش لا... من زمان ماسافرت...ولا كد سرت الشام..خلنا نغير جو...!! ------------------------------- اليوم: الاثنين المكان: بيت خلفان... الوقت: الثامنه مساءا... ------------------------------- ( مهرة).... رديت السماعه مكانها عالتيلفون ومسكت راسي.... مهرة: اوووووووف يالله يا راسي..... نط لي سيف اللي عدال التلفزيوون... سيف: شحقه تكلمينها يوم تنزعجين منها... مهرة: البنت فنانه في الجامعه لكن عالتيلفون هذربان صراحه...وانا ماحب اتكلم في التيلفون... عفرا: لانج مب متعوده.... قالت عمتي... آمنه: ومب زين تتعود عالتيلفون....قوليلها اهلي مايحبوني اتكلم في التيلفون وايد واذا مافهمت عليج تراها بقره.... قمت عن الكرسي ورحت يلست عدال سيف جدام التلفزيون... مهرة: يوم بتتصل قولولها راقده ...محد...أي شي.... وتنهدت وانا اطالع الكتاب اللي حاطنه سيف في حظنه ومطنشنه.... مهرة: سواف شو عندك..؟؟... اطالعني سيف باستغراب شكله نااسي ان عنده كتاب...ويوم تذكر الكتاب اللي فحظنه شله وحطه فحظني.. سيف: كتاب جغرافيا...مشكوووره اختي الغاليه ادريبج مابتقصرين... ورد يطالع التلفزيون... مهرة: شووو عاد مابقصر فشووو.؟؟؟ سيف:.. رسميلي الخريطه لو سمحتي ... ابتسمت وفتحت الكتاب ورسمت الخريطه على شفيفه لسيف ....وفوق هذا لونتها وعدلتها له وهو يطالع التلفزيون ولا عليه....سكرت الكتاب وحطيته جدامه في نفس الوقت اللي دخل فيه سهيل وحمد اخوي وهم شاقين حلوجهم مستانسين.... قال حمد... حمد: اجتماع عائلي..!!..تمااااااام...وين ابوووويه..؟؟؟؟ آمنه: يتسبح ....شو عندكم..؟؟ يلس سهيل عدالي بينما يلس حمد عدال عفرا حرمته.... حمد: والله ماخبرتكم قبل ابووووويه افاا....قومي مهروه زقري ابوج قوليله ايي... ابتسمت وقمت وانا احس بالحماس....حمد متحمس وسهيل بعد..!!!..اكيد شي عندهم حلووو يخبرونا به... وبعد مازقرت ابويه واستعيلته رديت الصاله ويلست مكاني...سيف على يساري...وسهيل على يميني... مهرة: احيين بايي ابويه... خبر حلووو..؟؟؟ حمد: بالنسبه لي حلو وايد... التفت لسهيل وسالته.. مهرة: وانته تدري.؟؟؟؟.. سهيل: لا ماعرف... مهرة: عيل ليش داخلين تظحكون...؟؟ رفع لي سهيل حاجب واحد وقال.. سهيل: سوالف شباب شخصج...؟!.. سكت عنه والتفت وانا اشوف ابويه يدخل الصالة ويسلم....وبعدها يلس عدال حمد من الصوب الثاني بحيث كان بالوسط تقريبا.... بوحمد: زاقريني يقولون عندك خبر....بشّـــر...؟! كان ابويه يوجه كلامه لحمد مع ابتسامه على ويهه.... نادر مايبتسم ابويه...صح كان يبتسم يوم امي كانت عايشه بس عقبها.....!!... نادر...وفرحتني شوفته مبتسم...حتى لو كان يجاملنا... حمد: الله يسلمك يابويه في الدوام من فتره طلعت اشاعات عن امكانية ترقيتي لمسؤول ...ويوم سمعت نذرت اني اسوي عزيمه اذا صار هالشي صدق....ومن شوي متصليبي ويقولون باجر بترقى رسمي... سكتنا كلنا وكان على رؤوسنا الطير...بينما حمد ينقل نظرة من ويه لثاني... حمد: شو رايكم بهالخبر.... صرخت عفرا... عفرا: احــــــــلــــــــــف...!!!! كانت الابتسامه شاقة حلوجنا كلنا...اما عفرا كافأة حمد ببوسه طويله على خده انحرج منها واحمر ويهه...وانحرجنا نحن اكثر من مجرد شوفتها... سهيل صد صوبي وهو مبتسم ومنحرج انه شاف هالمنظر من حرمه اخوه......سيف نقع من الظحك بصوت عالي....عمتي ابتسمت لاول مره بتسامح مع عفرا وحمد... اما ابويه.... آآآه يابووويه....حسيت انه ماسك الدمعه غصب مع ابتسامه فخر متعلقه على شفاته...حسيت انه مستانس صدق.... بو حمد: مبرووووك ياحمد...تستاهل زود والله... ابتعدت عفرا باحراج عن ريلها يوم سمعت صوت عمها بينما حمد قال بفرح.. حمد: الله يبارك فيك يابويه.... توالت التباريك لحمد وهو يرد عليها فرحان....وبعدها... آمنه: ومتى العزيمه..؟؟ حمد: هالخميس... عموووه انتي وعفرا اباكم تبيضون ويهي... واي شي تبونه انا حاضر... آمنه: فالك طيب موول لا تحاتي....عاد غدا والا عشا.؟ حمد: غدا ان شاء الله.... مهرة: وليش طلعتني انا من الحسبه..؟؟ حمد: انتي ماتيوزين في المطبخ اخافج تخربين.. مهرة: هههههههههه حرام عليك ..صح ماعرف اطبخ بس اقدر اساعد... حمد: باللي تقدرين عليه ياختيه مانبا نتعب سمو الشيخه... مهرة: تطنز..؟! حمد: لا حشىى... مهرة: ماعليه جان ماحطيتلك طيطار في العصير... كانت على ويهي ملامح جاده رغم اني ماكنت جاده...بس ظحكت صدق يوم شفت الرعب على ويه حمد وهو يتخيل فشلته... التفت لعمووه وقال... حمد: عموووه امانه ماادخلوونها المطبخ هذي... قعدت اظحك ولا رديت... كنت مستمتعه لانه عايلتنا كلها مجتمعه الحين....نادر مانجتمع جذي... نادر مايفوت سهيل هالوقت عشان يسير بيت خالتي.....نادر مايفوت سيف هالوقت ويروح عند ربعه.... ونادر مايفوت حمد طلعه هو وربعه... كانوا يتكلمون حمد وابويه وسهيل عن شغل حمد اليديد وطبيعته...فجاه قال حمد بحماس.. حمد: فكر ابويه...هالترقية بتساعدنا انه نبني على ارضنا في منطقة الــ(.....) بيت اكبر من هذا يضمنا كلنا.... الكلمات اللي كنا بنقولها اختفت...وخذت معاها الابتسامه المرسومه على ويوهنا....!! بهتنا كلنا نطالع فويه حمد....من وين ياب فكره ترك البيت هذي..؟!!.... نقلت نظري على ويوههم كلهم...تعابيرهم كلها كانت تحمل كلمه " لا"... والرفض التام...اما ابوي كانت نظرته عتاب...!!.. بوحمد: تبانا نودر بيتنا ياحمد..؟!....ليش؟ شو ناقصنك...؟ حمد:... البيت ظيج ابويه...انا مابتم بلا عيال دوم..ان شاء الله اني بييب عيال وبحتاج عالاقل غرفه ثانيه...انا حاليا بس على حجره وصاله صغيره.... سهيل بعد بيعرس وبيحتاج قسم...وبعد كم سنه سيف... البيت مايضم يابويه... بوحمد: والحوش..؟؟ واحد منكم يسويله بيت صغير في الحوش مش شرط نطلع من البيت...!.. هز حمد راسه برفض.... حمد: الحوش ضويج يابويه ومايكفي لبيت صغير... بوحمد: انزين الميلس....مب لازم يكون عندنا ميلس... خذ الميلس وعدله جانك مستظيج... ابتسم حمد بتسامح.... ابويه الظاهر بيسوي أي شي المهم مايظهر من البيت... حمد: ابويه مانستغني عن الميلس وانته تعرف هالشي عدل.... نزل ابويه عيونه للارض وهو معقد حياته وقال بصرامه... بوحمد: اللي يبا يطلع من البيت انا مابمنعه.... هذا بيتي....البيت اللي عاشت فيه ام حمد طول حياتها وياي..... ماقدر اخلي بيت عاشت فيه ام حمد ....بعيش فيه وبموت فيه ان شاءالله.... وعقبها سووا انتوا اللي تبغونه.... بعد كلام ابوي شي كلام..؟!!!.... سكتنا كلنا ولا رمسنا....رفعت ايدي اغطي بها شفايفي اللي ترتجف وعيوني مليانه دموع...اطالعت حمد ...كان مستحي من نفسه ومنزل عيونه للارض...صديت على سيف...حصلته مغطي عيونه بايده وصاد الصوب الثاني...وواضح ان هو الثاني انملت عينه دموع .... تذكرت الخوف الفظيع اللي حسينا فيه انا وسيف وقت ماقالولنا ان امنا خلاص مابنشوفها مره ثانيه...!!!... صديت على سهيل اللي كان يعظ صبعه الابهام بارتباك وهو معقد حياته..... صحيح سهيل مايقعد في البيت وايد لانه كاره البيت من بعد امي....لكن بعد ماعتقد انه مستعد يتخلى عن الذكريات اللي فيه....!! شو هالام اللي من مجرد طاريها ننعفس فوق تحت...!!!..الله يرحمج يامي... حسيت اني لازم اقول شي يكسر الجو...احس انهم بيتظاربون وبيتزاعلون قريب... ابتسمت من بين دموعي وقلت غصب.. مهرة: الله يعطيك طولة العمر... محد بيطلع من البيت ابويه.... (التفت لحمد وابتسمت له )..حمد بيترياني لين ما اعرس وبياخذ حجرتي وبيضمها لقسمه...(والتفت لسيف ولويت على ايده اللي عدالي شوي شوي وقلت)...وسيف بيتخرج من الثانوية وبيحصل منحه وبيسافر يكمل دراسته...وعقب سهيل بياخذ حجرة سيف وبيعرس... كلامي ماكاان يضحك...لكن مجرد تخيلهم لسيف انه مسافر للخارج للدراسه ظحكتهم كلهم..... كانهم يبون يتمسكون بهالشي بس عشان يكسرون الجو ويرجعون طبيعي... ظحك سيف وهو يسوي حركه غير مباشره عشان يمسح دموعه... سيف: تحلمين انتي اسافر برا واكمل دراسه انا ماصدق افتك....!! ظحكت... مهرة: ههههههه بلى...بتسافر وبتتخرج ويوم بترد قوم ابويه بيسوولك صندقة في الحوش تسكن فيها.. من بعدها كاني فتحت لهم باب قاموا كلهم ينكتون على سيف....الشي اللي قهرني .... شحقه ماينكتون على سهيل مثلا..؟..ليش ماينكتون على عموووه..!!!....والا لانه سيف اصغر واحد مستلمينه..!!! قامت عمتي وقالت... آمنه: بسير اقولهم يحطون العشا... مهرة: خلج عموووه انا بسير اقولها... قمت من مكاني وخليتهم بسوالفهم... طلعت برا عشان اقول للخدامه تحط العشا للبيت...ويغمرني احساس باني بديت احب اهلي من اول ويديد بعد كل الغضب اللي كنت احس فيه صوبهم....!!.. ----------------------------- اليوم: الثلاثاء.. المكان: في الجامعه.. الوقت: الثالثه ظهرا... ---------------------------- ( يوسف).... صليت الظهر متاخر بسبب المحاضره اللي كانت عندي... واللي يصادف وقتها وقت الصلاة.... وبعد ماصليت سكرت على عمري هالقاعه ويلست احضر للبرزنتيشن اللي بسويه في المحاضره.... يلست اتدرب واتدرب كاني قاعد في المحاضره فعلا...اشخبط عاللووح وافتح البروجكتر وحالتي حاله... هذا اخر كورس ونبا نيب درجات طيبه.... صاح تيلفوني وقاطع افكاري.... خليت اوراقي عالمكتب المخصص للدكتور ورحت وخذت تيلفوني.... " خالد"... يوسف: مرحبا.... خالد: اهلييي يوسف..شحالك؟ يوسف: بخير وسهاله...شحالك انته..؟ خالد: الحمد لله....بطني يعورني تغديت وايد اليوم... يوسف: يوووووووه شو بتسوي في البرزنتيشن عيل...؟!!.. خالد: هههههههههههههاي لا ماعليك تدبر...هااااه بشر..؟ شو سويت؟ يوسف: والله يالسه اتدرب احينه وقاطعتني... خالد: سويت الشفافيات..؟!! يوسف: طالع..؟!!..ترانا قلنا بنسوي بور بوينت بدال الشفافيات...!! خالد: هي صح...سويييته عاد البور بوينت..؟؟ شهقت شهقة طويله ومصدومه... يوسف: نسيييييييييييييييييييته....نسيته في البيت...عند مـــ....عند اختي الله ياخذ العدووو.... خالد: شوووووووووووه.... يالثوووووووووور الساعه اربع المحاضره....!!!.. يوسف: انته وين؟ خالد: في البيت... يوسف: لا تطلع الا يوم اقولك....باي... خالد: باي.. سكرت عن خالد وانا منقهر اني نسيت العرض عند منّـــووووه....وهي البقره ماذكرتني...تذكرت..على حد علمي دوام منى اليوم قصير لين الظهر...وبتكون احين في البيت...!! مسكت تيلفوني واتصلت بالبيت.....مشغول... آآآآآآآآخ يالقهر اكيد عالنت يالسه السباله....سكرت واتصلت بتيلفون امي...مغلق...تيلفون ابويه...رد عليه لكنه مب في البيت كان في العزبه....ياربي شو هالنحاسه...!!!.. رقم ميثا ماعرفه....محمد اخويه احيده فدبي...!! شو الحل.؟؟ فجاه خطرت في بالي فكره...حطيت تيلفوني عالطاوله وطلعت اللاب توب وشغلته...شبكته عالنت ودخلت الماسنجر اللي فاتحنه لكنه.... طبيعي ماحصلتها ....مسويتلي بلوك...قمت طرشتلها رساله... " كنه...بليز بليز...فتحي البلوك عني...والله ماريد اغلسبج او شي المساله مساله نجاح او رسوووب...فتحي البلوك ابا اكلمج ضرووووووووووري....الساعه احين 3 وعشر...اذا كنتي مب اون لاين وقريتي الرساله متاخر...انسي الموضوع والرساله كانج ما استلمتيها...باي". لكن كنه قرتها فعلا....والدليل انها دخلت اون لاين بعد حوالي ثلاث دقايق... على طول ارسلتلها.. يوسف:" الحمـــــــــــدلله..." كنه:" خير يوسف شو مستوي روعتني." يوسف:" منى عندج اون لاين.؟!".. كنه:" هي منى اون لاين...شو تبغيها..؟؟ يوسف:" ابا اكلم منى ظروووري... اباها تفج خط التيلفون عشان اتصل بالبيت..لانه امي غالقة تيلفونها وابويه مب في البيت... كنه:" اعطيك ايميلها تكلمها هني؟" يوسف:" لا..بعدين بتسالني من وين يبته مافيني تدري اني ارمسج بعد عالنت..".. كنه:" والله الا ياحظك يوم بترمسني انزين....بعدين اعتقد انا مطقعتنك ببلوك ما اكلمك عالنت...." ماعرفت اظحك...انقهر...ماعرفت شو اسويبها..انا وين وهي وين.. يوسف:".. كنه...خلصيني شوفيلي حل .... ابا اكلم منى ظرووووري.." كنه:" شو تبغيها انزين نحن عندنا سالفه نرمس فيها.." يوسف:" مالت عليج... وعليها.... وعلى سوالفكن انزين....انا ناسي عرض الباوربوينت عندها وبعد شوي محاضرتي فهمتي...يعني انا سالفتي اهم عن سالفتكن".. كنه:" اوووف...بس بس ياخي....خلنا نفكر..." سكت عنها....انا محتاجنها احين عشان جي مابنرفزها...عادي اطقعني ببلوك وترجع لسوالفها مع منى وانا يفوت علي العرض ويعطوني صفر.... خلها الحين تقول اللي بتقوله ودواها عقب .... بعد شوي رجعت كنه تقول.. كنه:" اقوووول يا اخ.... اسمع بقول لمنى اني ابا اكلمها في التيلفون لاني بطلع من النت... بس مابتصلبها اتصل انته وكلمها عن اللي تبغيه..." يوسف:" اوووكي..".. كنه:" قول شكرا.." يوسف:" جلبي ويهج..." كنه:" عيل هذا ويهي ان خليت منى تطلع من النت قبل المغرب..".. يوسف:" هههههههههههه حشى بتذليني...خلاص شكرا يابوج.." كنه: " عفوا...خلاص باي".. وبلوك...!!!... شو هالانسانه من تخلص من السالفه على طول بلوك عوذ بالله تريييني انزين لين ماقول باي...!!! بس ماعليه ماعليه ياكنوووه... مسكت تيلفوني واتصلت بخالد... خالد: هااااااااه بشر... يوسف: بس حلييناها... اخطف بيتنا بتلاقيك البشكاره وبتعطيك الدسك والاوراق اللي معاه..هاتهن وياك المحاضره اوكي.. ولو تي قبل المحاضره بعد احسن عشان نجرب الفلوبي... خالد: مب مشكله...بطلع احين من البيت... في أي قاعه انته.؟؟ يوسف: انا في قاعه رقم (....)...مبنى (......)... لا تبطي.. خالد: اووكي باي.. يوسف: فمان الله... سكرت عن خالد واتصلت بالبيت....وارتحت يوم حصلته مب مشغوول... ردت علي منى... منى: بسم الله يالساحر...صدق انك واقف لكنه عالوحده...سكر سكر البنت بتتصلبي... يوسف: بسم الله منج انتي...شدراج اني انا..؟؟ منى: شفت رقمك في الكاشف يعني صعبه..!!.. يوسف: همم...المهم سمعي..خلصتي العرض؟ منى: هيي خلصته ترييتك تشله امس بس انته ماخطفت عليه وانا نسيته ... يوسف: اوكي سمعي...حطي الدسك والاوراق في كيس صغير وعطيه البشكاره...خالد بيمر يشلهن الحين.. منى: هااااه...؟!!!... يوسف: شوو هااااه انتي بعد... منى: هي هي خلاص خلاص...فهمت...شي ثاني؟ يوسف: لا بس...فمان الله... منى: مع السلامه... سكرت عن منى وانا تقريبا مطمن من سير الامور... رجعت لمكتب الدكتور وخذت اوراقي وعدت تدريبي من اول ويديد....! --------------------------------- اليوم: الثلاثاء... المكان: صالة بيت سلطان... الوقت: الثالثه والنص ظهرا... ----------------------------------- (منى).... Oh My God….!!! حوالي الخمس دقايق تميت يالسه في الصالة بعد ماسكرت عن يوسف احاول استوعب فكره ان خالد بايي احين وبيشل العرض اللي سويته...مادري حسيت باحراج... لكني استعيلت يوم تذكرت ان يوسف قال خالد بيمر الحين بياخذهن.... خلها كنه تولي بخبرها عقب بالسالفه....ركبت فوق بسرعه لحجرتي ودورت الدسك... الله يغربل هالبشكاره...الدسك كان معزول مع اوراقه وهي رتبت كل شي اليوم الصبح وحطت الدسكات مع بعض....المصيبه ان الفلوبي لونه اسود...ودسكات وايد لونهن اسود...اوفففف بتاخر..!! فتحت الكمبيوتر وقعدت افتح الفلوبي واحد ورا الثاني لين ماحصلت الضالة... خذت الفلوبي مع الاوراق وفتحت كبتي ادور كيس صغير...وعقب تنبيش وتخريب الكبت كامل حصلت كيس صغير لاباس فيه... شو هالغباء..!!..يعني لازم في كيس..؟؟؟ بيطيح نصه اذا عطيته اياهن بدون كيس..!!! صدق غبية... نزلت الدرج وانا اركظ...فتحت الباب مال البيت وطلعت... وقفت مكاني يوم انصدمت بنظرة خالد الموجه لي....تاخرت وااايد..وصل الريال وقاعد يتحرطم عالفلبينية اللي مب فاهمه لين الحين شو يبغي هذا...؟!!!... انصدمت يوم شفته يطالعني بدهشه.....كنت مب متغشيه...تراجعت على ورا لكن للاسف دعمت الباب اللي تسكر من بعدي....على طول وخلال جزء من الثانيه مسكت شيلتي وتغشيت.... ولفيت علشان افتح الباب وادخل... شو هالفظيييييييييحه.... كنت على وشك الدخول ....يوم سمعته يسلم علي...!!!!!!... خالد: السلام عليج.... وقفت مكاني مصدومه.....الا مصعووووووقه...مب عارفه شو اسوي او كيف ارد....لفيت مره ثانيه وقلت بصوت مرتجف.. منى: وعليكم السلام... رد السلام واجب لا اطالعوني جي...!!!. خالد: ختيه انا مطرشني يوسف اخذ اغراض...رمسيها بشكارتكم مب فاهمه علي شو اقول...!! مسكينه مب فاهمه عليك لانه محد امرها لين الحين تعطيك أي غرض...!!!.. رفعت ايدي واشرت للبشكاره اللي كانت واقفه عدال خالد عشان تيني....بس خالد رفع حواجبه على باله اقصده هو.. خالد: انا...؟؟ بدون حاسيه قلت... منى: لاااا...جوليتا...تعالي.... يمكن يتراوالي....لكني شفت خالد يبتسم ويصد الصوب الثاني...شكله يظحك علي... اما جوليتا تقربت مني ببلاهه....عطيتها الكيس..بينما خالد قال.. خالد: مشكوره اختي....فمان الله.. خذ الكيس من ايد البشكاره وركب سيارته بسرعه وراح... اما انا بعد ماعطيت جوليتا الكيس وسمعت خالد وهو يقول فمان الله...دخلت البيت وانا اتنافظ من فوق لتحت.... الله يسامحك يايوسف...!!... وبعد ماتمالكت اعصابي....مسكت سماعه التيلفون واتصلت بكنوووه اخبرها باللي صار...!! واستفسر ليش تاخرت باتصالها اللي قايله انها بتتصله بعد مانطلع من النت..؟!!!... ------------------------------- اليوم: الخميس... المكان: سيارة ناصر... الوقت: الواحده ظهرا... ------------------------------ (ناصر)... تميت يالس في سيارتي وانا امسك السكان بقوو لين ماابيضت صبووعي...!.. ماكنت ادري اني املك الجرأة والشجاعه اني ايي هالعزيمه... لكني وصلت لين الباب ومب قادر انزل من السياره الحين....!!.. الشجاعه مب اني اوصل لهني....الشجاعه الصدقية هي اني ادخل البيت هذا.... المصيبه اني وعدت محمد اني احضر عزيمه حمد.... وابويه ومحمد حتى يوسف موجودين داخل الحين...ناقص انا... بس هذيلا كلهم ماعندهم شي يزعج ظميرهم متعلق بهالبيت ....اما انا عندي شي ثقيل جدا ظميري مب قادر يتحمله....وهو متعلق بمهرة...اللي ساكنه في هالبيت...اللي تجبرني الظروف اني ارجع له مره ورا الثانيه... تنهدت عشان اريح اعصابي شوي....وبدون تفكير بطلت الباب ونزلت...قفلت السياره ومشيت للبيت... ماعرف ادق الباب والا ادخل دايركت.... بس الباب مفتوح الظاهر خصوصا لهالعزيمه....!!..والا بالعاده يسكرونه... دخلت البيت وانا اتنفس بصعوبه...على طول طاحت انظاري عالمطبخ...عندي احساس انها هناك....على بعد خطوات...ويفصلنا جدار...!!... آآخ لو اقدر اروح اعتذر...بس طبعا مستحيل.... سهيل: مرحبا الساااااااااع...اقــــــــرب.. فاجاني صوت سهيل بشكل لدرجه اني نقزت والتفت له بسرعه....تصنعت ابتسامه على حلجي وسرت صوبه... ناصر: السلام عليكم.... سهيل: وعليكم السلام والرحمه... توايهت مع سهيل ووقفنا فتره نتبادل التحيات والسلامات....ومن بعدها دخلني الميلس....اللي كان مزحوم شباب وشيّاب...منهم خواني وابويه.... وراشد ولد خال مادري خالة سهيل...هالانسان كل ماشوفه احس بتهديد مادري ليش..!!!!...عنبوو دايما فبيتهم..؟!!!... سلمت عالجميع ويلست معاهم.... واخيرا شفت الفرد الناقص في هالاسره....سيف... اللي مثل ماعرفت في الثانوية العامه....!!! بصراحه سيف ذكرني بمهرة شوي.... وفي نفس الوقت...سيف اوسم عن حمد وسهيل....وشكله جي..خريش.. ياترى علاقته بمهرة زينه ؟؟؟... اوووووف ليش ادخلها في كل شي وكل موضوع..!!!... هذي عزيمه رياييل...ومثل ماهي مب متواجده في الميلس...لازم تطلع خارج حدود تفكيري بعد.... وعلى هالحال حاولت اني استمتع بهالعزيمه قدر استطاعتي...رغم ان المهمة صعبه... صعبة وايد... ---------------------------------- اليوم: الخميس... المكان: مطبخ بيت خلفان... الوقت: الواحدة والنصف ظهرا.. --------------------------------- (مهرة)..... ماخلوني اسوي شي...كوونوا شاهدين ....انا بغيت اساعد بس هم ماخلوني اساعد....اون بخرب... اووكي اعترف اني فاشله في المطبخ بس مب لهالدرجه عاد...!!! حتى عصير ماخلووني اسوي... يلست على كرسي في المطبخ اراقبهم وهم يتحركون مثل النمل....عفرا وعمتي والبشكاره.... كانوا مسوين صنفين من الغدا.. وصينية مشوي كبيرة.هذا غير السلطات والسويت والعصاير.... اكيد حمد بيستانس على هالترتيب هذا....ماشاء الله عليها عمتي راعية مهمات صعبة.... لو عطاني انا المسؤوليه مابعرف اسويلهم شي....!! دخل سيف بعد دقايق وهو يبتسم ويشم الريحه اللي تفتح النفس... سيف: ياسلاااااااااااام يوعتوووني الصراحه... مهرة: تبانا نهرب لك شوي قبل الجماعه..؟!!.. تقرب مني وهو يظحك وقالي بصوت واطي.. سيف: من عقب سالفه الزقاره اكتشفت انكم جلاب بولسية..وبيشمون ريحة الاكل فيني وبنكشف...خليها لعقب... مهرة: وبخصوص رمستنا ذاك اليوم شو النتيجه..؟!!.. وغمزت له... وابتسم لي ابتسامه ثانيه... سيف: من ساعتها وانا نظيف...مادري عاد عقب شو بيصير ما اوعدج بشي... برطمت جان يظربني على راسي.. سيف: لا تبرطمين... المهم انا مطرشيني اتفحص العصير واتاكد انه سليم....!! مهرة: هههههههههههههههههههههههههههههه احلف..؟؟؟ سيف:...لا اجذب..بس بغيتج تظحكين....(والتفت لعمتي وقال) ... هاه عموووه كل شي جاهز..؟ آمنه: تقريبا ..بعد نص ساعه بنحط الغدا ....قول لابوك هالرمسه... سيف: اوووووكي.... طلع سيف من المطبخ وراح الميلس مره ثانيه.... بعد ساعه... نزلت من حجرتي وانا مبدله ثيابي من ريحة المطبخ....نزلت عشان اتغدى مع عمتي وعفرا... ويوم وصلت وقفت مكاني وانا اشوف الغدا اللي حاطينه... مهرة: ليش مجبوووووس..؟؟؟ انا ابا بريااااني... عفرا: شي في الجدر....اتحسبج تبين مجبوووس مادريت بج... مهرة: ماعليه بروح احط لي في صحن برايكن تغدن.... طلعت من البيت سايره صوب المطبخ وانا اتحرطم.... مادرن بي شو ابا من الغدا...!!..طبعا لانهن ما افتكرن يسالني شو مشتهية...!!.. اوففف.. دخلت المطبخ وانا اسمع ظحكات الشباب اللي بعدهم يالسين في الميلس...هذيلا ماشبعوا من اليلسه.؟؟؟.. متى بيسيرووون..؟!!!.. كانت الخدامه موجوده في المطبخ تغسل الصحون وتنظف.... اما انا طلعت لي صحن متوسط وصينية ...غرفت لي من الجدر غدا حااااار في الصحن وحطيته على صينية..كنت على وشك اني اطلع لكن مادريت الا وحد ساحب عني الصينية... التفت حصلت البشكاره اطالعني معصبه وتقول.. الخدامه: لااااا ماما مافي زين انتي ايد أوّر....!! مافهمت شي... مهرة: شو اللي مافي زين ...لا يكون ماتبيني اتغدى..؟!!... ظحكت الخدامه وقالت وهي تاشر على ايدي المكسوره.. الخدامه: انتي ايد تأباااان مافي زين شيل سينية ماما... شلت الصينية عني وراحت توديها البيت....وانا اطالعها باستغراب... ياحليلها هالخدامه...تخاف على ايدي...!!!.. ابتسمت وانا اتوجه للثلاجه افكر اصب لي كوب عصير...لكني تذكرت بانه العصير موجود داخل البيت عند قوم عموووه...بالتالي سكرت باب الثلاجه وطلعت من المطبخ.... لكني ماتخطيت عتبه باب المطبخ.... وقفت مصدوومه وانا اتلقى نظرات انسان كنت ادعي ربي ليل نهار اني ماشوفه ابدا ابدا....!!! لكنه يستمر بالظهووور لي بين فتره وفتره باصرار....وكل مره تحمل لي عيونه نظره مختلفه صعبة الفهم...!!!! ----------------------------- نهاية الجزء الثالث والعشرون الحين باقول تحياتي خخخخخخخ شرايكم بالمفاجأة ان شاء الله عجبتكم ......... مااقدر ارفض لكم طلب نزلت لكم الجزئين ........ b:7 تحياتي |
مشكورة اختي على احلا جزئين
وتسلمين يا ريت كل يوم تسويلنا هاي المفاجأة ههههههههه طماعه الاخت هههههههه |
يه افا وين الردود ماكو الا رد واحد وانا منزلة جزئييين !
|
السلام عليكم
شو ما يكفيج رد مني يعني خلاص انا زعلت لا اتمصخر بس الصراحة الاجزاء روعة بس بعد شو تبين اكثر يلا نتريا البقية |
يعطيـــــــــــــــــــــــــــــــج الف الف الف الف ومليوووون عافيه ع الاجزاء الورعه هذي .. والسمووحه تاخرنا في الرد عليج .. دموع الفراق
|
تسلمين عزيزتي الشامسية اكيد ردج فرحني انج متابعة بس ياقلبي بعد مانستغنى عن خواتنا الباقي ...........
دموع الفراق الله يعافيج حبيبتي .............. ونطروني بالجزء الياي جريب بانزله ........ تحياتي |
هييييييييييي يا حليلك مرررررة فرحت يوم شفت الجزئين ويوم جيت ابكتبلك احزري وش صاررررررررر؟؟
هههههه ماما فوق راسي :mad0256: انا دايم ادخل بالليل او اول مارجع من المدرسة فلما ماما تحصلني وش يصير :pleasantr انا زعلت عليك يعني ما سئلتي ويني :0023: بلييييييييييييييييز سويلنا مفاجئة ثانية في القريب العاجل .. ممكن ؟؟ ممكن ممكن ممكن؟؟؟ زهقتي؟؟ :dontgetit |
تسملين عزيزتي بيرلا انا كاتبة ذاك الرد وينكم عشان ماشفت الردود حقت البنات كلهم اللي متعودة كل مره اشوفهم من جذي انقهرت خخخخ بس ............. حبيبتي بيرلا فديتج مازهقت ولاشي خخخخخخخ يحليلج ولايهمج المره الجايه بانزل لكم جزئين بعد نطروني بالقريب العاجل عشان انا الاحد تفتح الجامعة حقي ويمكن تقل دخلاتي بسبب رمضان والجامعة فراح انزل لكم جزئين عشان كذا ........... ولاتزعلين انا سئلت عنكم كلكم فلا تقولين ماسئلت عليج وينج زين ...
تحياتي |
يلا اختي اتمنى ما اطولين علينا
حتى نحن ورانا مدارس يالله بس لاتحرمينا الاجزاء لانه بس بدت الجامعة نباج كل يوم تنزلين جزء اوكي |
والحين نكمل الجزء اللي بعده :char0248 تابعوا معاي زين ...........
الجزء الرابع والعشرين.. -------------------------- اليوم: الخميس.. المكان:..بيت خلفان... الوقت: الثالثه الا عشر دقائق.. ---------------------------- (ناصر).... بصراحه ماقدرت اني اقعد اكثر....شفت خواني مستانسين بالسوالف والضحك لكني ماقدرت...عشان جي استاذنت بان عندي اشغال اسويها...وشكرتهم على هالعزيمه وباركت لحمد للمره الثانيه لترقيته وبعد السلامات.. طلعت من الميلس وسكرت بابه وراي بدون انتباه.... اول ماطلعت شفت جدامي دريشه المطبخ..وشفت راس يتحرك داخل المطبخ...قلبي بغا يطلع من ظلووعي.... انا من يييت وانا حاس انها في المطبخ مادري ليش...!!... تميت واقف حوالي دقيقتين....وبغيت اشهق بارتباك يوم شفت شخص يطلع من المطبخ بسرعه وفي ايده صينية...وبعد التدقيق...اكتشفت انها الخدامه شاله غدا حد وسايرتبه البيت..!!... آخ يالقهر احين انتي اللي من الصبح انا يالس اراقبج .؟!!... تنفست عشان اهدي اعصابي....ويوم رفعت راسي مره ثانيه تجدد الامل في نفسي...شخص ثاني مازال في المطبخ..!!!!.. وبعد لحظات بس... طلعت هي... حسيت ان النور يطلع معاها....حسيت ان روحي طلعت وسبقتني لها... حسيت....حسيت باشياء وايده ماقدر اوصفها.... فرح...توتر...وخوف...وترقب...كل شي يخطر عالبال.... وقفت مهرة مكانها وهي تطالعني برعب....مادري شو شافت في ويهي....لكنها استندت عالباب بكتفها وتنفست بصعوبه وهي تركز النظر فيني...!! بدون حاسية مني ...تجدمت خطوه...ولساني يردد بصوت واطي ناصر: مهرة..... ماتحركت مهرة....ماعدا حركه بسيطه من راسها اللي هزته ببطء بالرفض والنهي... مادري ماتباني اتقرب منها...!!.. او اسمها مب مهرة..؟؟...او شو بالضبط ..!!.. فجاه سمعت انفتاح الباب وراي....خفت انا وتجمدت مكاني..اما مهرة شهقت بصوت عالي...وهي ترفع ايدها تغطي بها شفايفها....وعيونها متعلقه بالباب اللي انفتح وراي.... انا ماكنت متجرأ اصد....ماكنت قادر التفت..عيوني كانن متعلقات بمهرة غصبن عني ومب قادر اخوزهن ابد....اراقب اقل حركات وتعبيرات ويهها وخزنها في بالي.... في نفس الوقت اللي وصل فيه الشخص اللي طلع من الميلس عدالي....طاحت مهرة مغمى عليها...!!! جدام المطبخ تماما... بشكل قطع قلبي وآلمني... صرخت وانا مندفع لها... ناصر: مهــــــــــره...!!!... وقبل ما اتجدم اكثر مسكني الشخص اللي عدالي من ايدي بقووو...ورجعني لورا... يوسف: انته ينّــيــــت..؟!!.. التفت شفت يوسف ملامحه متوتره ومعقد حياته وهو يطالع مهرة باستغراب كامل.... ناصر: يوسف...!!.. قلت اسمه بترجي.... عشان يسمح اروح عندها....ساعتها انا ماكنت اعرف الصح من الغلط... يوسف: لا تتخبل ناصر...شفيها هذي..؟؟ ليش جي طاحت..!! منو هذي اصلا..!!.. سكت عنه كاني ماسمعته...وعيوني على مهرة بطيحتها المؤلمه عالارض بهالطريقه...!!... رجع يوسف قال... يوسف: بروح ازقر حد من هلها...!! ناصر يا تطلع يا تصد صوب ثاني مب زين عليك... تراجع يوسف واندفع للميلس ....وانا لا استحيت على ويهي ولا صديت صوب ثاني...كيف اقدر اصد وهذي مهرة طايحه جدامي جي..بدون ماقدر اشلها او اوعيها..!!!.. خلال ثواني.. طلع يوسف مره ثانيه ومعاه سيف...اللي اندفع لمهرة وركظ صوبها وشكلها خايف مووووت عليها... وقف يوسف عدالي لكنه كان عاطي سيف واخته ظهرة عشان مايشوفهم...وكان منتبه اني انا كنت اراقب بلهفه...مد ايده ومسكني من كتوفي وخلاني ادور على نفسي عشان انا بعد اعطيهم ظهري..لكني درت دوره كامله ورجعت اطالعهم....مب قادر ابعد نظري عنها مب قادر...ليش مايفهم هالغبي..؟!... شفت سيف وهو يقعد عدال مهرة...رفع راسها ومسك ويهها وهو يكلمها ويحاول يصحيها...ويوم ماقدر لها ضمها لصدره وشلها...وراح بها صوب البيت واختفى فيه...ومهرة معاه...!! ماكنت مصدق انها اختفت....تميت اطالع فتحه بابهم وانا اتوقع انها تطلع في أي لحظه....مع اني ادري انها مابتطلع بهالسرعه ولا سيف بيطلع بعد بهالسرعه...!!! رفعت يديني وغطيت ويهي بهن....حاولت اهدي اعصابي...لكن هيهات...اعصابي ماتهدا الحين.. تنفست ورفعت نظري لويه يوسف اللي كان يطالعني باستغراب ودهشه...و شـــك..!!! ناصر: شو قلت له.؟؟؟ يوسف: زقرته وقلت له اباك في رمسه وقبل مانطلع قلت له حصلنا بنيه طايحه جدام مطبخكم...بس ارتحت من اختياره ومن اللي قاله لسيف.... سيف صغير في السن نوعا ما وردة فعله بتي ابسط عن اخوانها الكبار اللي بيسوون لنا تحقيق ليش كنا واقفين في حوشهم..!!!.. تحرك يوسف وسحبني من ايدي وطلعني برا البيت ...وقفنا عدال سيارتي...انا يلست على الجهة الامامية منها بتعب..كاني توني مخلص من بناية بيت كبير..ويوسف جدامي... تحرك يوسف بتوتر وقال.. يوسف: ..آآه..ناصر... قاطعته بانفعال... ناصر: والله يا يوسف ماتسالني عن أي شي يخص هالبنت....حلفت عليك... عقد يوسف حياته معصب... يوسف: ليش عاد تحلف.؟!!!... ناصر: لاني ماريد حد يجبرني ارمس.... يوسف: افااا...انا خبرتك عن سالفتي عيل...مع اني ماكنت متخيل فيوم اني بقول لحد...!! ناصر: يوسف...لو قصة حب بقولك عنها...لكنها مب قصة حب ..خلاص.؟!!.. يوسف: عيل شو بالضبط بينك وبينها..؟!!.. قمت وانا اتافف... وتوجهت لباب السياره افتحه... ناصر: اووووه...انا حلفت يوسف خلاص لا تسالني...خلنا نتوكل... ركبت سيارتي وصدري ظايج من كل شي...حركتها وتوجهت للبيت .... وانا احس بالذنب يكبر ويكبر في نفسي....مب بس عقدت بالبنت وسويتلها رعب فحياتها... فوق هذا تسببت باغمائها اليوم وطيحتها بهالشكل....لو صارلها شي...أي شي....مابسامح نفسي ابد...!!! --------------------------------------- اليوم: الخميس... المكان: غرفة مهرة... الوقت: الثالثه والربع ظهرا.. ---------------------------------------- (مهرة).... فتحت عيوني وانا اسمع اصوات...واشم روائح قوية...وعندي صداع مصاحب..او مادري شو هذا بالضبط لكني احس بالم في راسي فمكان محدد...وفوق هذا ايدي المكسوره بعد تعورني... كانت الرؤية ضبابية والاصوات بعيده....لكن شوي شوي..حسيت اني رجعت للدنيا....عقدت حياتي وانااشوف ويه سيف اللي شكله ميت خووف...وعفرا القلق...وويه عمتي اللي كانت ماسكه كلينكس تصدر منه ريحه قوية لعطر...!!... سيف: الحمد لله....الحمد لله قامت....مهرة...تسمعيني..!! غمضت عيني كم مره ورجعت افتحها...احاول ابعد ثقل الراس هذا عني مب قادره...احس راسي ثقييل..!!.. رفعت ايدي وحطيتها على مكان الالم... مهرة: آآآآي... آمنه: شو يعورج مهرة..؟؟... تلفت...عمتي تكلمني....انا في حجرتي وعلى شبريتي...والكل متحاوط بي ويطالعني بقلق وخوف...مديت ايدي اليمين لسيف اللي اسندني وساعدني اني اقعد على شبريتي... مهرة: راسي يعورني....(وحطيت ايدي مره ثانيه عالالم)... آآخ..شو صار؟؟ سيف: حصلتج طايحه جدام المطبخ..؟؟ مهرة شفيج لا تروعيني دخيلج..؟!!. تذكرت...تذكرت ذاك الريال....ونطقه باسمي....ونظرته اللي كانه اخيرا حصل لحياته معنى متجسد فيني..!!.. تذكرت خوفي الفظيع...وانقطاع انفاسي...كنت اتحسب الشخص اللي طلع واحد من خواني ساعتها بنكشف لا محاله...ومن زود شد الاعصاب... يوم اكتشفت انه شخص غريب ثاني...اظلمت الدنيا فعيني ودار راسي... ابتسمت لسيف اطمنه... مهرة: انا بخير مافيني شي...بس اظني دار راسي من الحر يمكن...ويمكن فقر الدم رجع لي ..مادري...مافيني شي.. عفرا: خوفتينا عليج والله... سيف: الا خوفتنا..؟؟...انا تحسبتها ماتت...!!.. ظحكت على سخافه تفكير سيف...لكن محد ظحك معاه...الظاهر كلهم تحسبوني مت... آمنه: قومي تغسلي وتغدي ..طحتي من قل الاكل ماتاكلين... مهرة: ان شاء الله عمتي...آسفه عالازعاج هذا...بس انا بخير مافيني شي... تنهدت عفرا.. عفرا: الحمد لله... مهرة: بطلب منكم طلب....لا تخبرون حد اني طحت...بس دامني بخير مافي داعي حد يدري الله يخليكم... عمتي وعفرا ماعارضن طلبي ..وبعدها انسحبن...اما سيف ماوعدني بشي وتم يطالعني بفضول وقلق... يلس سيف عدالي على الشبريه وقال.. سيف: صدق صدق مهرة....شو ياج طحتي.؟؟ تصنعت البرود... مهرة: مثل ماقلت لك...فقر الدم هذا ماشي غيره...عاقني مره من قبل.. عقد سيف حياته وقال.. سيف: متى.؟؟... مهرة: ذاك اليوم يوم كنت اعالج حب الشباب....ورحت المستشفى وسحبوا مني دم ماعرف ليش...!! طلعت من غرفة الفحص وطحت...وابتلشت بي عمووه مسكينه... ابتسمت...لكن سيف قال بكآبة.. سيف: مت من الزيغه والله...تحسبتج لحقتي امايه...!!... اختفت ابتسامتي وانا متاثره بموقف سيف....ادري انه اذا صار هالشي ولحقت امي...سيف ابدا مابيتحمل هالخساره.... ومابيقدر يعيش حياته طبيعي... لانه يعتمد علي اكثر من ما هو يحس بهالشي... ابتسمت له بمواساه... مهرة: بعده عندي عمر هههههههه لا تخاف تعود على حركات الدلع هذي من اليوم ورايح... ابتسم سيف وسكت... مهرة: اقولك سيف..شوف شو في راسي هني..يعورني... دليته على مكان الالم وقعد هو يتفحص جانب راسي... سيف: وارم... اوديج المستشفى.؟؟ مهرة: ههههههه الله يرحم ايام التفليعات...محد كان يهتم ايامها...لا مشكور الغالي ماريد اروح المستشفى زهقت منها... سيف: متاكده.؟ مهرة: هي متاكده...بس صدق سيف لا تخبر حد عن اللي صار اوكي..مافي داعي.. سيف: على راحتج....المهم انزلي تغدي...ان ماتغديتي ياويلج...ومن اليوم ورايح بشرف على اكلج وبشوف منو اقوى...انا والا فقر الدم مالج هذا...!! ظحكت على سيف بينما هو طلع من الغرفه ونزل تحت...نزلت من شبريتي..وتدريجيا...الخوف يرجع لي شوي شوي.... توجهت للحمام وغسلت ويهي اكثر عن مره... الماي البارد يخفف شوي من حراره ويهي.... اللي صار اليوم مب شويه....وانا خايفه من الياي...هالريال مصر انه يطلع فحياتي... وهذي رابع مره اشوفه....خلال اسابيع...وفوق هذا...ناداني باسمي..!!!...من وين عرف اسمي..!!!.... هي صح....الدفتر الاصفر...اكيد شله ذاك اليوم...ومكتوب فيه اسمي ورقمي الجامعي...وجدولي على ماظن واشياء وايده... ياربي ياربي....شو هالورطه اللي طحت فيها.... بييني يوم وبنكشف على هالحال.... الله يستر بس من اللي ياي...!! طلعت من الحمام ونشفت ويهي.. ونزلت تحت عشان اتغدى لاني بالرغم من كل اللي صار..الا اني ميته يوووووع..! ------------------------------- اليوم: الجمعة.. المكان: بيت ام سلطان... الوقت: الثانية عشره ظهرا.. ------------------------------ (يوسف).... بعد توصيات امي وابويه...وزعل العيوووز علينا....اتفقنا انا وخواني وابويه انه نتغدى عندها كل جمعه....... منى كانت متشبصه فيني تبا تسير...كنت بشلها...بس امايه ماخلتها تروح هالمره مب انا... بالتالي خلفناها ورانا وهي مبرطمه وزعلانه..... محمد كان في مزاجه المعتاده...يسولف ويضحك....ابويه كان طماشه..من يلتقي بيدوووه يطيح بها مياحد ومغايظ... اما ناصر ماكان في مزاجه المعتاد.... تذكرت..من سالفه امس وهو حابس عمره في الحجره حتى ماتعشى ورقد من وقت...وماطلع للمسيد وقت الصلاة كله يقول بيصلي في حجرته...!!... بصراحه انا نفسي ماقدرت ارقد وانا افكر بموضووعه.... انا سمعته يزقر البنت باسمها... اندفع لها يوم طاحت وهو خايف وايد عليها... ورغم توصياتي الكثيره ساعتها...لكنه ماقدر يشل عينه عنها ابد... قالي مب قصة حب....عيل هالبنت شو تعنيله بالضبط غير هذا....شو بينه وبينها..؟؟؟... بصراحه كان ومازال اصعب لغز مر علي وماقدرت احله...!!... بالتالي تركته عني بعذر انه " خصوصيات ناصر".... وانا مابتدخل بخصوصياته...دامه مايبا يخبرني مابيخبرني.... لكن بيني وبينكم ...مازلت افكر في السالفه....حياة ناصر غريبه ومليانه اسرار.... توجهنا انا وخواني وابوي..ومايد..للمسيد لصلاة الجمعه... وبعد مارجعنا...ويلسنا مع يدوه وام مايد في الصالة... دخلن البنات علشان يسلمن على عمهن...وعلينا..عيال العم... كنه كانت اخر وحده داخله...لابسه كندوره خضرا حرير مفصصه وكاشخه الحبيبه..وشيله بيت لها نفس درجه اللون... كنت ارد السلام على بنات عمي الصغار والتفت لكنه كل شوي...وانصدمت بها اطالعني بمغايظ..من قمة راسي لين ريلي..وعقب صدت عني صوب ابويه وشقت حلجها باحلى ابتسامه.... سارت صوبه وسلمت عليه... انقهرت...شو هالنظرة الماصخه بعد..!!!...كونوا شاهدين هي اللي تحرشت فيني مب انا...!!.. بو محمد: مرحبااااا الساااااااااع بكنه.. هلا بشبيهة امي كنه الله يرحمها.... شحالج فديتج... كانت معلومه يديده بالنسبه لي... يدة ابويه اسمها كنه بعد؟؟..ماكنت ادري... لا وتشبه كنه..!!!... ياسلاااااااام... ... كان ترحيب ابويه بكنه مختلف عن باقي خواتها....شكله يحبها اكثر عن البقية للسبب المذكور سابقا وهي انها تشبه يدته...يلسها ابويه عداله ودق سوالف وياها...ولبس الباقييين..وكل شوي ينقع من الظحك على شي تقوله له بصوت واطي.... حسدت محمد اللي يالس عداله ابويه ويتسمع رمسة كنه ويضحك معاه... بقية البنات كانن يالسات عدال امهن بالترتيب...مايد كان ساكت ولا راغهن عشان يقعدن مع ابوويه اليوم ....ويشوفهن ويسال عن احوالهن .... في النهاية هو ولي امرهن... رفعت نظري جدامي.. كانت نوره صابه نظراتها على ناصر...ماعدا لحظات بسيطه اللي تلتفت فيها لبقية الموجودين.... تراجعت في الكرسي وتساندت..وتقربت في نفس الوقت لناصر اللي يالس على يساري...وقلت له بصوت واطي بينما هو كان صاب نظراته على ايده في حظنه... يوسف: اقول...متى بتحن عليها هالبنت الا تتريا نظرة من يت..!! قال لي ناصر بصوت واطي ومازالت نظرته منصبه لحظنه.. ناصر: مابحن... يوسف: حرام عليك... حسيت بناصر فعلا قاسي.... صح نحن كلنا مانرتاح لهالبنت لكن واضح عليها انها هيمانه فيه كليا...!!.. ومن قلت كلمتي فز ناصر من مكانه وقال للموجودين... ناصر: بسير سيارتي شوي وبرجع ..عن اذنكم... تابعت ناصر بنظري اللي انسحب من الصالة بهدوء وطلع برا البيت.... لااااااااااه هالانسان مول مب طبيعي من امس... وبعد دقايق انسحبن البنات...بعد ماعطتني كنه نظرة ثانيه تقهر بغيت انش واجوووووتها برا الصاله...وبعدين معاها هذي..؟!!..شو تبغي يعني؟ تحيدني ماروم ارمس ولا اسوي بوجود يدووه وامها وخصوصا بوجود ابويه... لكن دواج عقب يالهرمه...!!!.. مابتم ساكتلج دوم... -------------------------------- اليوم: الجمعه.. المكان: بيت ام سلطان... الوقت: الواحدة ظهرا... -------------------------------- (ناصر)... سكرت عن علي التيلفون بعد مابلغته بقراري.... مزاجي مايتحمل اني اقعد في العين اكثر...عشان جي بسافر معاهم وبغير جو...يمكن ارتاح شوي من الهم اللي فيني.... كفايه اني من امس وانا رقادي متقطع بسبب مهرة وطيحتها وخوفي عليها....اخاف صابها شي.... طيحتها عووفه.... تمنيت مية مره من امس لليوم اني كنت عدالها وقت ماطاحت عشان امسكها او عالاقل..اخفف من طيحتها... بس من اتخيل الشكل اللي بنكون عليه ادرك انه بيسبب المشاكل الكبيره لمهرة ولي...انا ماهتم بنفسي لكن ماريد المشاكل اكثر لمهرة...!!... كنت اتمنى اني يبت الدفتر معاي هالمره...بس خليته في الكبت ورفضت اني احطه في الشنطه عشان اعود نفسي اني ما اشوفه دايما...لكني احس اني بحاجته احين.... انا مريض...شو فيني.؟ مب صاحي والله.... كنت يالس على مقدمه سيارتي ..ماسك تيلفوني والعب به بدون انتباه..لانه بالي كان مشغول في شي ثاني... مادريت الا وحد واقف جدامي... رفعت راسي وانصدمت بعيون نوره... ناصر:......هلا نوره... نورة: ناصر..!!...شفيك يالس في الشمس..؟!!.. ماعرفت شو اقولها.... احين شو يايبنها هذي عندي ...!! ناصر: حسيت ببروده قلت اوقف هني شوي.. نورة: انته اصلا مب طبيعي ....شفيك.؟ ناصر: ماشي... سكتت نورة... وبعدها قالت بتردد.. نورة: آآآه..ناصر..!!.. من شوي قبل ماتطلع...حسيت يوسف يتكلم عني..صح؟ رفعت نظري وانا معقد حياتي.... هذي شو بالضبط؟ جنيه والا آدميه..!!... ناصر: هي...صح... نورة: شو كان يقولك..؟؟؟... ماجاوبتها...بالتالي اعتدلت في يلستي وقلت لها بتهور.. ناصر: نوره..اسالج سؤال..؟ نورة: اكيد.. ناصر: كم واحد تقدم لخطبتج ورديتيه..؟!!.. ابتسمت نوره وقالت بفخر... نورة: وايدين... ناصر: حرام عليج اللي تسوينه....بتظيعين مستقبلج.. نورة: كل حد له نصيب ياخذه... ناصر: منو تترييين يخطبج بالضبط..؟!!... اطالعتني نوره بنظره وبعدها نزلت عيونها للارض.....انا مب غبي...فاهم عليها...ودامني فتحت السالفه خلني اقولها وارتاح.... ناصر: نوره...سمحيلي بس..اذا كنتي تتريني انا...شلي هالفكره من بالج... انا مابخطبج... رفعت نورة نظرها لي متفاجاه....نظرة مصدومه.... ظربه في الكبرياء ماتوقعتها... ناصر: رجاءا لا ترفضين الرياييل بسببي... لا تقطعين نصيبج بايدج تسمعيني..!!.. والسموحه منج... خليتها بصدمتها ودخلت داخل البيت...ورجعت مكاني عدال يوسف... ----------------------------- اليوم: الجمعه... المكان: بيت خلفان.. الوقت: الخامسة مساءا.. ---------------------------- (سهيل)... دخلت البيت ادور شخص محدد... كنت ابا مهرة بموضوع مستعجل... يوم دخلت الصالة حصلتها تتكلم في التيلفون... اول ماشافتني اشرت لي عشان ايي... سهيل: شوو.؟؟ حد يباني عالتيلفون.؟ اشرت لي مره ثانيه بالنفي... وقعدت تسويلي حركات تحاولت فهمني...اخر شي فهمت انها تبا تسكر وتباني اسويلها عذر...جان اتحنحن واقولها بصوت عالي.. سهيل: مهرووووووووووه....سكري التيلفون وتعالي اباج.... ابتسمت مره وقالت .. مهرة: ان شاء الله... آآه اقوولج سلوى بخليج احينه اوكي اخويه يباني وشكله معصب.....اوكي....باجر ان شاء الله.....مع السلامه... سكرت مهرة وهي تتنهد بارتياح... مهرة: يزاك الله خير.... سهيل: انا فعلا اباج بموضوع... .. واستغليت فرصه ان الصالة فاظيه ويلست عدال مهرة عالكرسي... مهرة: خير سهيل...شفيك؟ سهيل: وليش متروعه..سمعي...اليوم عملية شويخ.. مهرة: بعدها عينها وارمه..؟!!.. سهيل: شفتها امس..خف الالتهاب لكن الورم بعده مايخوز هذا الا بعملية... مهرة: بس هي مب طايعه تسير المستشفى... سهيل: ادري..بس بنوديها غصب... راشد تكلم مع الدكتور اللي عالجها وقاله هاتها بعد المغرب لانه هو متواجد في المستشفى وبيسوي لها العملية...وقال انها بسيطه جدا يعني ماتستاهل هالتعقيد الي مسوتنه شويخ.. مهرة: شويخ خايفه من الابر والمشارط... سهيل: ادري...بس بيبنجون عينها مابتحس...بس لازم هذا ينشال.. مهرة: انزين وكيف بتشلوونها غصب وهي رافضه مابترومون لها... سهيل: سمعي... نحن بنسير بيتهم انا وراشد وبقولها اني بوديج السينما وبعزمها عالسيره ...وبنسير نحن الاربع...انا وانتي وشويخ وراشد...وبنقص عليها وبنوديها المستشفى... هناك مابتروم ترفض وتستقوي..مابتسوي فضيحه جدام الناس.. مهرة: حرام عليكم جي تسووووبها... سهيل: هي اللي يابته لنفسها... المهم انتي بعد المغرب خلج جاهزه وسوي نفسج متحمسه لسيره السينما انزين؟ مهرة: اووكي...والله يستر شو بيصير من تحت روسكم... ابتسمت... سهيل: بيصير كل خير ان شاء الله... وبعد المغرب... رحت انا لبيتهم واستقبلني راشد... واتفقنا شوي على خطتنا وقعدنا نظحك ونحن نتخيل شكل شويخ... راشد بيتكفل وبيرمس امه عشان تعطيه بطاقة شيخه الصحية الخاصه بالمستشفى..... دخلت البيت مسوي عمري ابا اسلم على خالووه....شيخه كانت يالسه جدام التلفزيووون بعينها الوارمه...يوم شافتني..اعتدلت في قعدتها وتحجبت... وبعد ماسلمت على خالتي... سهيل: شحالج شويخ..؟!!.. شيخه: بخير الحمد لله شحالك سهيل.. سهيل: بخير وسهاله...هاااه شوو عينج احين اهون؟؟ شيخه: الحمد لله افتكيت من الحكه والاحمرار.... شحالها مهره؟؟؟؟ يلست عالكرسي بينما راشد كان يكلم امه بصوت واطي على طرف... سهيل: يووووووووه تلقينها تنطنط الحين في البيت من الوناسه... ابتسمت شيخه وقالت بحماس.. شيخه: لييييييييش شو عندها مستانسه؟؟ سهيل: ههههه بوديها السينما بعد شوي.... بطلت شيخه عيونها متفاجئه.. شيخه: اووووووه من وين طالعه الشمس .....غرييييييييييييبه...!! سهيل: ماغريب الا الشيطان....كسرت خاطري ملانه قلت بوديها اطلعها.... شيخه: انا ماكد طحت السينما.... قالتها شيخه بحسره...يا راشد ويلس عدالي بعد ماراحت خالتي حجرتها ...على ما اعتقد علشان اطلع بطاقه شيخه الطبية.... راشد: تبينا نسير وياهم..؟؟ شيخه: اللـــــــــه يااااااااريييييييييييييييييييت راشد والله دخيييييييييلك... حسينا بحماس شيخه ..كنا مخططين نزيد حماسها اكثر عشان تبلع اي شي ينقال ويصير....كله في سبيل انها تروح السينما.... سهيل: بعد نص ساعه بيبدا الفلم واحين بسير اشل مهره انا...بس تعال وين توديها وهي جي...لالا ماتروم تشوف الفلم بعين وارمه... شيخه: لالالالالالالالا اشوف اشوف والله اشوف زييين....لا تسمع له راشد فديتك ودني ماكد سرت... مسكنا الظحكه ونحن نشوف شويخ متخبله تبا تسير.... راشد: هممممم لالا صدقه سهيل...مره ثانيه يوم بتصح عينج بوديج ... شيخه: لاااااااااااااء حرام عليك والله اشوف زين....دخيلك راشد دخييييييلك...ابا اسير ويا مهره انا فديتك... طول راشد وهو يفكر يبا يذل شيخه.... راشد:,,,,, عيل يالله بسرعه سيري تلبسي...دقيقه وحده بعطيج ...اذا مانزلتي بنروح عنج... قامت شيخه وهي ميته من الوناسه لدرجه اني بديت احس بالذنب قبل مايصير اي شي.... شيخه: ثواااااااااااااني.... ركبت شيخه فوق عشان تلبس عباتها....اما نحن نقعنا من الظحك... سهيل: حراااااااام والله حراااااااام... راشد: شفت ويهها..؟؟ باقي بس نظحك عليها يوم بتكتشف انها في المستشفى.... سهيل: ههههههههههههههههههههه الفلم اللي بتشووفه فلم رعب....وبيصير جدام عينها وهي تشوفهم يطعزونها بابره...ياخي والله صدقها مهرة نحن مجرمين.... راشد: هههههههههههههه تستاهل...محد قالها تتبزى... وبعد دقيقه نزلت شيخه وطلعنا لسيارتي بعد ماخذنا البطاقه من عند خالتي وهي اطالع بنتها بحسره....كاسره خاطرها عاللي بيصيرلها من تحت روسنا... وبصراحه بديت احس بنفس الاحساس... --------------------------------------- اليوم: الجمعة.. المكان: سيارة سهيل... الوقت: السابعه مساءا... -------------------------------------- (شيخه)... كنت ميته من وناستي...اول مره اروح السينما....مايهم الفلم اللي بنشوووفه المهم ارووح...ياسلاااااااام ومهرة بتروح بعد....!!!...وناسه... توجهنا لبيت خالتي المرحوومه..واول مانزلنا راحوا راشد وسهيل المسيد عشان يصلون المغرب..اما انا استقبلتني مهرة عند الباب... وبعد مايلسنا في الصالة... شيخه: وين اهلج؟ مهرة: عموووه اظني تتسبح في حجرتها....ابويه بعده مايا...سيف طالع...وحمد اظني راح يسلم على نسايبه وبالمره اييب عفرا اللي من الصبح عند اهلها... شيخه: ياااحيهم...تعالي تعالي...شقايل اقنعتي سهيل يوديج السينما؟؟ غريبه بصراحه... ظحكت مهرة وقالت.. مهرة: بعد ربج...تطلع عليه هفاااات يرحمني... شيخه: زييين والله كنت اتحسبه مووول مهمل اهله... انا وراشد دوم نعاتبه على هالشي... مهرة: حرام عليج...سهيل مب انه مهملنا لكن معرووف عذره ليش مايقعد في البيت... شيخه: ليش؟!.. مهرة: مايتحمل البيت بدون امي... حسيت بزعل...ماكنت ادري ان هذا هو سبب غياب سهيل عن بيته بكثره....لهالدرجه كان متعلق بخالتي؟!.. شيخه: بس مر على وفاتها حوالي خمس سنين.... او اكثر يمكن...!!.. قالت مهرة بحزن.. مهرة: صدقيني...كل اللي في البيت يحسون انها ماتت قبل اسبوع بس...ولا حد منا تعود على غيابها...!! شيخه: الله يعينكم ويصبركم... بعد دقايق بسيطه رجعوا الشباب وركبنا معاهم في سيارة سهيل... سيارة سهيل كانت مغمجه...والدنيا ليل...بالتالي ماكنت اشوف المناطق بالضبط وماكنت ادري نحن وين متوجهين بالتحديد....هم يدلون اكثر مني.... بالتالي سكت وانشغلت بالسوالف مع مهرة اللي كل شوي تطلع لي بسالفه ... بعد عشر دقايق في السياره... وقف سهيل في باركن..وشفته يلتفت لراشد اللي يالس جدامي ويطالعه بنظره غريبه...عقب فتح راشد الباب وقال... راشد: يالله شويخ انزلي... تغشيت ..وتغشت مهرة...ونزلنا كلنا من السياره.... كنت امشي مع راشد وهو ماسك ايدي ...شكله خايف اني اطيح اواتخرطف وافشله...ابتسمت ورفعت راسي له كنت بقوله هالتعليق لكن التعليق ماطلع من حلجي.....لساني اصلا ماتحرك....وفوق هذا الابتسامه اختفت..!! نحن وين يايين..!!!... التفت لسهيل ووقفت مكاني... شيخه: منو مريض..؟!!..ليش يايين المستشفى.؟!..مهرة انتي مريضه.؟!! سكتوا كلهم عني....سكوتهم مريب.... اليوم شوو؟؟...الجمعه..!!..مر اسبوع على سيرتي الاخيره للمستشفى....!!... شميت ريحه خيانه....هزيت راسي وانا اتراجع على ورا...كنت ناويه ارد السياره.... شيخه: لالالا لا تحاولووون...انا حلفت ماسوييها.... لكن قبضه راشد على ايدي زادت....وسحبني مره ثانيه صوبه بقو... راشد: بتضطرين تصومين ثلاث ايام شو نسويبج...!! رديت اتراجع وانا رافضه الوضع اللي انا فيه كليا.... شيخه: ليش تقصوون علي حرام عليكم....ماريد اسويها ماريد انا اخاف... مهرة: فديت رووحج ياشيخه دخيلج سوي العملية...العملية بسيطه وايد ولا بتحسين بشي... شيخه: لااااااا لااااااا... مب بسيطه ماريد اسويها...امي تدري انكم يايبيني هني...؟؟!! راشد: هي تدري...امشي جدامي اشوف... ثبت ريلي عالارض مثل اليهال.... كنت في حاله مايعلم بها غير ربي لدرجه اني ما انتبهت ان الناس قاموا يتلفتون لنا باستغراب وفضول... شيخه: بخبر ابوويه عليكم.....راشد دخيلك وغلاة الغالي عندك فجني ماريد اسوي هالعملية .... راشد: انا ماعترف بحلفه بغير الله وحلفت عليج ياليووم انج بتسوين العملية هذي...لا تفظحيينا.. بدت الدموع تتجمع فعيني... والخوف يتزايد فيني... ليش يجبرووني هذي عيني انا وانا المسؤوله عن نفسي هم شولهم خص..؟!!... سهيل: شيخه... نحن يايبينج هني وسوينا هالخطه كلها لانه خايفين عليج....انتي زايغه من البنج ...بنشووف له حل مع الدكتووور يوم ندخل يمكن فيه طريقه ثانيه... لو بتكرهينا وبتقاطعينا طول عمرج بس المهم تسوين هالعملية وتشلين هالكيس الدهني من عينج... لا تتصرفين مثل اليهال احيدج حرمه عاقل... لا تحلموون..!!... ما أثر فيني كلامه ولا حرك فيني شعره....ببساطه لاني خايفه مووووت من اللي بيصير في العمليات... وهذي عيني...لو اي منطقه من جسمي عادي بس عيني..!!!!... شيخه: لاااااااااا ماريد... لكن غصبن عني ارادتي ظعفت...سحبني راشد سحاب وانا امشي معاه بصعوبه احاول اقاوم لكن بدون فايده...ترجيتهم كلهم لكن ماسمعوا لي... كرهتهم كلهم..!! دخلوني عالدكتور المتخصص ويلسوني جدامه على كرسي والبقية متحاوطيبي يخافوني اشرد... راشد: عقي غشوتج خلي الدكتور يشوفج... غصبن عني...عقيتها وتحجبت...وبانت الدموع في عيني ...شافها الدكتور وقال باستغراب.. الدكتور: ليساااااتووون عينيكي عم بيدمعووا..؟!!..مافادك الدوا اللي عطيتك ايااااه..؟!!.. راشد: هذي مب دموع الالتهاب يادكتور...هذي دموع الصياح البنت ميته من الخوف من هالعملية... اطالعهم الدكتور باستغراب... الدكتور: عفوا مين حضراتكون..؟!!.. سهيل: خوانها...!. عورتني هالكلمه بشكل....رفعت نظري لسهيل اللي كان يطالعني بنظرة غريبه ماقدرت افسرها... هذا بعده يتحسبني اعتبره اخويه..!!!... يالثور.. لو اعتبره اخويه جان طحتبه الحين ولعنت خيره وكفخته... لكن هيّن ياسهيل...!!.. الدكتور: آآآآه تشرفنا... وليه ستنا خايفي..؟!!.. راشد: زايغه من الابره اللي بتعطيها اياها.. الدكتور: اني ابري..؟؟؟..ابريت البنج..؟!!.. راشد: هي... انقهرت ...كانوا يرمسون عني كاني مب موجوده....لكن على اي حال ماكنت اقدر اتكلم وانا بهالحال... عبراتي تخنقني وتمنعني من الكلام... سمعت الدكتور يضحك... الدكتور: لك مووو لازم ياست الحسن مابنعطيكي ابري....!!.. رفعت نظري للدكتور مستغربه...وفجاه العقده انفجت.... شيخه: انته قلت لازم ماشي عمليه من دون بنج... الدكتور: اييه بس فيه انواع تانيي من البنج...بنقطر لك في عينك قطور اذا كنتي خايفي من الابري.... سهيل: ايوااااااااا هذا اللي نحن نباه...لانه البنت متعقده من الآبار ...سحبناها للمستشفى سحاب والا هي حالفه ماتسويها... ظحك الدكتور...وبغيت ارفع ريلي واجووووته ....انا في حاله وهو يالس يظحك..!!. ياب الدكتور العده وقعد يفحص عيني عن قرب.. وبعد ماخذ بطاقتي من راشد ودون معلومات على ملفي الصحي... قال.. الدكتور: انتي جاهزه للعمليي... تفضلي معي... وين اتفضل...!!..لصقت في الكرسي وماقدرت انش... مسكتني مهرة وقومتني ...وانا احس انهم يسحبوني للاعدام... دخلت غرفة العمليات بروحي... مسكتني سيستر هناك وجهزتني ولبستني لبس خاص بالعملية... ويلست على طاوله العمليات مب لاني استسلمت..بس لاني ماكنت قادره اوقف اكثر من جذي..!!! ----------------------------------- نهاية الجزء الرابع والعشرين وهاذي الجزء اللي بعده بعد عشان خاطركم عزيزاتي .......... بس عاد ابي اشوف ردود تفرح ....... الجزء الخامس والعشرون ــــــــــــــــــــــــــــــــــــــــــــــــــ ـــــــــــــ اليوم: الجمعة.. المكان: المستشفى... الوقت: التاسعه والنصف مساءا.. ------------------------------ (سهيل).... صارلي نص ساعه وانا امشي في الممر ساير راد...احس ان عملية شيخه طولت وايد...عنبو الا كيس دهني وبيطلعونه ليش كل هالتاخير.؟!!...الا جان هي لعوزتهم..!!..يصير والله...! حطيت ايدي فمخابية بقلق....ياربي متى بيخلصوون...!!.. في البدايه كنت اتصنع الهدوء لكن احين ماقدر...هذي شيخه والله يعلم شو يسووون فيها داخل...!! راشد: يابوويه قرّ... فريت لي راسي فر....ايلس الله يرضى عليك... سهيل: ماتشوف الساعه كم..؟؟؟ تاخروا وايد... مهرة: العين منطقة حساسه ولازم يتخذون الدقه....والدقه تخليك بطيئ شوي.. سكت..ورفضت الكرسي اللي يابوه لي عشان اقعد ورديت امشي.. وبعد دقايق...طلع الدكتور من الغرفه....وعيوني كانت تاكله اكل ... متلهف اني اسمع اي شي عن شيخه...لكني تجاهلته يوم شفت شيخه طالعه وراه مع سيستر عدالها...كانت متغشيه... وقف الدكتور ووقفت شيخه في الوسط.... تقدم راشد منهم ومهرة بعد... راشد: هااااه..شيخه سلامات.. رفعت شيخه صبعها السبابه في ويوهنا انا وراشد كانها تحذرنا وقالت بهدوء.. شيخه: ....اكـــــــرهــــكـــــم كلكم...!!! الدكتور: هههههههههههههههه لك خلووها شوي البنت زعلاني عليكون... تفضلوا معي لحتى اوصفلها دوا... وما تخافوا بالنسبه للعمليي كل شي صار تمام... راشد: يعني قصدك شيخه مالعنت خيركم..؟ الدكتور: شووو؟!!.. ابتسمت يوم الدكتور مافهم على راشد.. سهيل: قصده يعني شيخه ما قاومت.. الدكتور: اي لكااااااااااااااان.... كانت خايفي كتير وعشان هيك تأخرنا شوي.. تفضلوا معي.. مشى الدكتور...مشيت انا وراه راشد اطالع شيخه بفضول... لكن شيخه تجاهلته ومسكت ايد مهرة ومشت معاها بدل ماتمشي مع اخوها... وفي المكتب... الدكتور كان مشغول يكتب لشيخه الوصفه... وراشد يتحرش بشيخه.. وانا ومهرة ساكتين ونراقب.. راشد: شو سووبج؟ عقي الغشوه بشوف.. شيخه:........................ راشد: ارمسج انا...عقيها بشوف عينج... ومد ايده راشد عشان يعق غشوه شيخه لكنها كافأته بظربه محترمه على ايده... شيخه: مابا...خز عني بعيد... ظحكنا انا ومهرة على ويه راشد اللي كانت له ملامح غريبه... كانه زعلان لانه اخته زعلانه عليه.... ماعنده غير هالاخت في البيت ويهتم فيها وايد.. الظاهر كل العصبية والظيجه بطيح على راسه هو..الله يعينه.. خلص الدكتور وعطى الوصفه لراشد... وشرح لشيخه كيفية استخدامه...وهو عباره عن مرهم تحطه شيخه على عينها قبل النوم.... ووصاها بعد تغير القطن والشاش اذا خاس او اخترب... ومن هالامور الروتينية... شكرنا الدكتور على وقته وطلعنا كلنا من المستشفى وركبنا السياره... وفي الطريج للبيت...الكل ...حتى انا..حاولنا نقنع شيخه بانها تخلينا نشوف عينها ..لكنها رفضت رفض قاطع... كانت معصبه حدها حتى ماطاعت تشرح لنا شو سووا في العملية بالضبط... سهيل: شوو تبينا نقولج يعني آسفين؟؟... شوفي بصراحه انا مب اسف لاني تعاونت وياهم عشان تسوين العملية هذي.. لكني اسف اني قصيت عليج...بس ماشي طريقه ثانيه عشان نيبج هني وتسوينها..!! شيخه: جب انته محد كلمك....!! كتمت ظحكتي وسكت.... كنت متوقع هالعصبية كلها بعد العملية.... وماظني ترضى الا بعد فتره...!!.. برايها اهم شي صحتها.. وبعدين انا شو ابا من رضاها وزعلها.... اللي يهمني انها تكون بخير ومستانسه...لاني في النهاية "اخوها".. ومستحيل تكون من نصيبي دام هذا شعورها صوبي...!! ---------------------------------- اليوم: الجمعه.. المكان: صالة بيت سلطان... الوقت: العاشره مساءا.. ---------------------------------- (ناصر)... كنت يالس مع امي وابويه ومحمد اخوي في الصالة بعد ماتعشينا وخلصنا... تاخرت اليوم بالسيره لبوظبي بس لاني ابا اخبرهم اني بسافر...لكن لين الحين مب عارف كيف ابدا بالموضوع... دخل يوسف اللي كان مع ربعه يهوم.... ويوم شافني استغرب...وبعد ماسلم..قال لي.. يوسف: انته بعدك هني؟ تحرييتك روحت بوظبي.. ناصر: بسير بعد شوي.. يلس يوسف عدالي...وقالت امي.. ام محمد: ياولدي وين تمسك خط نص الليل ودرب بوظبي زيااااااااغ... ارقد عندنا وباجر من الغبشه انشر بوظبي... ناصر: لا امي مافيني بتعب جي..ماعليج انا صرت حافظ درب بوظبي لو بسوق وانا مغمض بعد بوصل سالم ههههههه... محمد: عاد هذي صبّه عوووده.... (صبّه يعني كذبه)... ناصر: اسكت عاد انته... تدريبها امك بتم تحاتي... محمد: مادري ليش ماتحاتيني انا يوم اسير مكان... يوسف: هي..ولا انا بعد تحاتيني... بو محمد: بدينا عاد شغل الغياره... يوسف: لا والله صدق ليش التفرقه يعني... امااايه انا اصغر اولادج المفروض تبزيني... ام محمد: يووووووووووه اكثر عن جي..؟!.. يوسف: والله انج تبزين ناصر اكثر عني.... تتصليبه في اليوم عشر مرات وانا مره وحده.. ظحكت انا على هالموال اللي دوووووووم يرمسون فيه ولا يوصلوون لنتيجه... ناصر: وابوي عليك انته ريال وتبا بزا بعد..!!!.. يوسف: مالي خص... ام محمد: يابويه انتوا جدامي وتحت نظري...اخوك مسكين ساكن هناك اروحه محد يونسه ولا شي لازم اني بستهم عليه....لو معرس ومستقر بيتغير الوضع... ناصر: امايه...دخييل والديج لا تكملين... بومحمد: اسكتوا والا سيروا الصالة الثانيه اذيتونا... ابويه كان محرج يبا يسمع الاخبار... ناصر: انا احين بسير ... ام محمد: لا تعال..شحقه ماكمل...انته شو ناقصنك..ابا افهم انا شو مكرهنك في العرس جي... قلت بصوت واطي عشان ابويه مايحتشر.. ناصر: مابغيه يامايه ماريد اعرس احين... ام محمد: متى عيل..؟؟ يوم توصل الثلاثين..؟؟؟ ناصر: ليش لا... ؟! ام محمد: بتعرس وانته شويبه.؟؟ ناصر: بالعكس...ثلاثين عمر وايد مناسب للعرس..ويعتبر السن المطلوب عند اكثر البنات... محمد: وشووو عرفك انته بالسن المطلوب عند كل البنات..!!! انحرجت من سؤال محمد...شو اقوله؟؟..عندي خبره في البنات؟!!..واعرف شو يحبن وشو مايحبن؟ قلت له بسخرية.. ناصر: سويت احصائية.....اصلا هالشي معروف.. ام محمد: وشو بيتغير عليك لين ثلاثين عاد..؟؟ ناصر: بتتغير وايد اشياء..عنبوو يامايه الناس فيوم واحد يموتون وناس يحييووون.. وبعدين اذا فخاطرج انتي تسوين عرس عندج يوسف بيخلص جامعه هالكورس وبيتخرج...وعقبها بيشتغل..عندج ايااه اخطبيله... يوسف: هاي هاي...لا يابوويه لا تفرها على راسي... ام محمد: انا مابيوز الصغير قبل العود.... محمد: امايه شو هالافكار اللي بعدكم متمسكين فيها...!!.. يعني اذا الصغير فخاطره العرس تحرموونه عشان اخوه العود ماعرس..!!!. يوسف: هي بس الصغير مب فخاطره العرس بليز سكروا الموضوع.. ناصر: هههههههههههههههههههههههه احين تروعت هااااه..؟؟؟ حس شويه باللي انا احس فيه كل يوم من اربع سنين.. يوسف: حشى يابوك ماريد احس... امبوني مطمش يوم كله على راسك بس يوم عقيتها علي لا هذا موضوع ثاني... ام محمد: اسمعني انزين ابويه...فكر في بنت عمك...عمرها الحين 22 سنه... وين بتترياك لين ما انته تصك الثلاثين..بتكون هي 27 سنه... مب زين تصبرها هالكثر فديت روحك... ناصر: امايه...شحقه تغصبون البنت علي...وشحقه تغصبوني عليها...يمكن هي ماتباني ...سالتووها انتوا عن رايها.؟ قلت هالكلام لاني اعرف ان نوره كرامتها مابتسمح لها انها توافق علي الحين بعد اللي قلته لها اليوم...!! هذا اذا كانت هي نوره اللي انا اعرفها....المتفاخره والخقاقه....مابترضى ابدا.. ام محمد: وهي مسودة الويه وين بتحصل اخير عنك..؟!!.. ناصر: عاد اللي يسمعج يقول اني انا موووول ما اتفوت... يامايه انا حالي حال الناس فيني عيوووب وايد.. ام محمد: لاا..انته ريال وماعليك قصور..راعي اصل واخلاق ودين شو تبغي هي اكثر من جي؟ وفوق هذا ولد عمها... ناصر: انزين انا مابغيها....!! كم مره بقولج مابغيها... ام محمد: هذي بنت عمك... حلوه ومزيوونه ومتخرجة من الجامعه..وانااشوفها راعية بيت...شو ماتبغي فيها بالله.؟!!.. ناصر: شخصيتها ماتعيبني...احسها راعية مشاكل امي..مابغيها مالي خاطر عليها شقايل اخذها.. ام محمد: كل هذا يتغير بعد العرس.... حسيت بظيجه...المصيبه ماذكر منو فتح هالموضوع من الاسااس...لو اذكر جان عطيته بكس.. ناصر: يامااااااايه... قاطعتني وقالت بعصبية.. ام محمد: انته شووو..؟!...تبا تفضحنا بين الناس..؟!!.. بنت عمك يتيمه ومالها غيرك تبا تفرها عالغريب بسبب دلعك وبزاك..؟!!!.. اكووه اخوك محمد يوم يوزناه ميثا ماقال لا ووافق على طول...والحين ماشاء الله مستقر ومستانس وياها وعندهم عيال... ناصر: امايه الحال مب نفسه.. لو نوره كانت مثل ميثا انا بنفسي بقولج خطبيها...بس هي مب مثلها...مابينهن شبه ابدا...بعدين مب شرط تكررين نفس القصة...محمد خذ ميثا...يعني انا لازم اخذ نوره...ويوسف ياخذ كنه.؟!!.. فز يوسف من مكانه ومسك ايدي وقال.. يوسف: ياخي شو تقول انته لا تحط الافكار فبالها...!!! لكن امي قالت بسرعه جوابا على سؤالي.. ام محمد: هي عيل شو تتحسب...هذا اللي بيصير...!! يوسف: امااايه شووووووو هذا لا تجمعين.... الله يغربل بليسك انزين..!!.. ابتسمت غصبن عني ... ناصر: انزين امايه...ولو صار.... مافكرتي بالصغار...عويش ولطوف...منو بياخذهن؟ مب الغرب؟ نحن ماعندنا عيال غير حقهن ...شقايل نخلي بنات عمنا ياخذونهن الغرب..؟؟ يوسف: هي والله صدقه... يوسف كان مشتط لاني دخلته في الموضوع...عشان جي قاعد يحاول يشن حمله اقناع وياي... ام محمد: ذيلاك صغار...ولو عندي عيال مابيوزهم غير بنات عمهن..لكن ماعندي عيال غير..لكن انتوا اللي ماتستحون على ويوهكم موجودين وبنات عمكم موجودات ومناسبات وفيهن الجمال والحشمه وتقولون لا..صدق انكم تبون تفضحونا... قعدنا انا ويوسف نتبادل النظرات اليائسه....امي راسها يابس...واللي قاهرني ابويه ماقاعد يتدخل مندمج في الاخبار... لكن بيني وبينكم احسن...لانه ابويه لو اتدخل في السالفه بيحسمها وبيحلف عليه اخذ نوره وخلاص...مابروم اقول لا... الله يبارك في الجزيره خلك مشغول فيها يابويه احسن..!! التفت لامي...وقلت لها.. ناصر: كنه مناسبه ليوسف .....لكن نوره مب مناسبه لي بصراحه.... يوسف: اقول ناصر اطلع من بيتنا.....روح بوظبي الله يخليك روح بوظبي... ظحكت وقررت اني اعق السالفه كلها على يوسف...لاني صدعت بصراحه... ناصر: شوفي حتى يوسف رافض ليش عيل طايحتبي انا تقنعيني..؟!! ام محمد: يوسف عقب بيي دوووره عقب عرسك... ناصر: لا الحين.. ام محمد: وانته مسود الويه شو شايف على كنه ماتبغيها.؟!.. بطل يوسف عيونه مندهش... يوسف: امايه..مب اني مابغيها يعني بس مافكرت بصراحه فيها... ام محمد: مب لازم تفكر فيها....كنه ماتتعوض.. يوسف: ادري انزين بس انا بعدني صغير.. ام محمد: ناصر كان اصغر عنك يوم اني رمسته عن العرس اول مره... ناصر: يعني انته محظوظ... يوسف: انزين امي البنت بعدها تدرس... ام محمد: مافيها شي نحن مابنمنعها عن الدراسه بتكمل دراسه ويا اختك... يوسف: انزين انزين خلاص لا تعصبين... اللي تبينه سويه.. بطلت عيوني واطالعت يوسف مستغرب.... توقعت انه يقاوم اكثر من جذي...وهو من كلمتين وافق... ابتسمت...معناها ان يوسف متقبل كنه نوعا ما.... ياحيه.... ام محمد: هي توك...هذيلا هم العيال صدق مايعارضون اهلهم... مديت ايدي وحطيتها في ايد يوسف... ناصر: مبرووووك... اطالعني يوسف بطرف عينه ولا قال شي...وانا اضحك عليه... ام محمد: وانته وياه... ناصر: حشى علي امايه.... انا متاخر بسيرة بوظبي اليوم عشان اقولكم شي... ام محمد: شو مستوي ؟ خير..؟ اطالعوني كلهم بفضول ما عدا ابويه.. ناصر: ابووويه....يااابوووومحمد... التفت لي ابوي متفاجئ.. بومحمد: هاااه..؟ ناصر: ابغي اقولك شي عطنا ويه شويه... التفت لنا ابوي بالكامل ... ناصر: ابغي اقولكم اني بسافر ويا ربعي يوم الثلاثاء الياي.. عقدوا حياتهم كلهم... بومحمد: شوووه؟ بتسافر؟ وين؟ ناصر: بسافر الشام....اتحوط.. عقد ابويه حياته زياده... بومحمد: تتحوط والاااا.؟!!.. فهمت شو يقصد ابويه وانقهرت.... لو انا مازلت مثل قبل غير ملتزم ولعاب كنت صدق بسير عشان العب هناك... لكن الوضع تغير.. ناصر: لا والله يابويه ...سايرين الا نتحوط ونغير جو... والشباب اللي ساير انا وياهم كلهم معرسين وفوق هذا متدينين وملتزمين.. يعني ماعندهم هاللعب..ولا انا عندي هاللعب... ام محمد: يابويه جي فجاه بتسير عنا...ماقلت من قبل.. ناصر: قررت اليوم... امايه انا من زمان ماسافرت ...من سرت بوظبي وانا اكرف كراف في هالشغل .. مليت.. يوسف: وكم بتيلس هناك؟ ناصر: حوالي اسبوعين جي... ام محمد: الله يوفقك ياولدي..برايك روح استانس انا اشوفك بعد مب على طبيعتك من فتره.. والسفر بيريحك شوي... ناصر: ان شاء الله يامايه... وصلت الساعه 11 وانا مازلت اسولف وياهم..اخر شي ترخصت منهم...لاني لازم اروح بوظبي احين...ووعدتهم اني ايي اسلم عليهم يوم الاثنين... وبعدها ركبت سيارتي ورحت لبوظبي.. -------------------------------- -------------------------------- اليوم: السبت.. المكان: الجامعه.. الوقت: الواحده الا ربع ظهرا.. ------------------------------- (مهرة)... كنت يالسه اليوم مع شلة سلوى الخبله...بعد ماتغدينا يلسن كل بنات الشلة يلعبن لعبة اسمها "حكم".. وهي نفس اللعبه اللي كانن يلعبنها وقت ماطرشن لي الرساله.... قالن لي اشترك في اللعبه بس انا مارضيت واكتفيت بس بالتفرج... لكن بصراحه كل شوي انقع من الظحك عليهن... هالبنات مب صاحيات..وخبايل درجه اولى.. وبسبب هاللعبه ...كل وحده تسوي في الثانيه مقلب اخس عن الثاني...ولعوزن بنات الكافتيريا كلهن.... صحيح بعض الحركات كانت ماتعجبني....لكن الاغلبية اجبرني على الضحك... ومر الوقت وانا اضحك على هاي...واشوف هاي..وعلى هالحال...واللعب داير عالطاوله كلها... انتبهت ان سلوى كانت جريئه وايد وايد...اي حكم يحكمون عليها به ماتتردد...وتروح تنفذه على طول...واغلب بنات الطاوله كانن يسون لسلوى قدر وشخصية.. وقفن البنات اللعبه بسبب ان نص الشله ماكانن متغديات..فاضطرن يوقفن عشان يروحن يتغدن..التفتت لي سلوى وقالت.. سلوى: ياريتج لعبتي عشان اضحك عليج... مهرة: ههههههههههه انا ماقصرت بالضحك عليج بصراحه....سلوى كيف قدرتي تروحين تسالين البنت اي شامبو تستخدم والله فظيحه.. سلوى: هههههههههاي..عادي.. مهرة: والله انج خبله.. رفعت ايدي لا اراديا واطالعت الساعه كم...وانصعقت يوم شفتها وحده وثلث....شهقت.. سلوى: شفيج.؟؟ مهرة: بدت محاضره الكمبيوتر...شو اسوي الحين..؟؟؟.. قالت سلوى بدون اهتمام... سلوى: طنشيها... مهرة: كيف اطنشها انتي بعد.. سلوى: ببساطه لا تحظرين... مهرة: بس جذي بيفوتني وايد... سلوى: عادي مب هند وياج في الكمبيوتر.؟؟.. هي بتقولج شو فايتنج... عقدت حياتي وانا اتذكر ان هند اللي عرفتني على هالشله من الاساس معاي في الكمبيوتر.. مهرة: هي والله وهذي هند شحقه مانبهتني ان المحاضره بدت..روحت جذي وخلتني... سلوى: ههههههههه يمكن نست مثل ما انتي نسيتي.... مهرة: لاحول ولا قوة الا باللـــــــــــــــــــه.....!!.. سلوى: يابنتي هدّي...هذا اول غياب لج...لا تخافين.. مهرة: احين شو بنقعد نسوي لين 2... انتي عليج محاضرات؟ سلوى: انا لين 3 ماعندي ولا محاضره...بس بيني وبينج لازم اروح السكن عشان اييب كتابي لمحاضره الساعه 3.. قلت لها بترجي.. مهرة: روحي بعد الساعه 2...لين ماتبدا محاضرتي الانجليزي عالاقل.. سلوى: ماقدر ياعمري...الساعه 2 بتيني بنت تباني اشرح لها اللي طافها الاسبوع اللي فات...يعني لازم ارد هني.. انزين تعالي وياي السكن.. مهرة: لالالالالالالالالالالالالالالا... سلوى: شوو لالالا..ليش؟...شو بيصيرلج يعني؟ مهرة: لا انااخاف شو يسيرني مكان مالي حايه فيه.. سلوى: بتين معاي...براويج السكن وبراويج غرفتي..بنيب الكتب وبنرجع... مهرة: مايفتشوون؟ بيدرون اني مب من طالبات السكن... سلوى: محد يفتش...وبنات العين دايما ايوونا السكن.. مهرة: والله....عادي يعني؟ سلوى: هيييي عاااااااادي ... مهرة: بس السكن مايعتبر برا الجامعه...اخاف والله.. سلوى: اولا السكن مب برا الجامعه صحيح بينا وبين الجامعه جدار لكن هذا بس للفصل..لا غير...يالله قومي بلا دلع... قمت بتردد وخذت كتبي واغراضي معاي... سلوى: خلي كتبج هني لانه نحن بنرجع...شلي شنطتج بس... مهرة: بينسرقن... سلوى: منو يبا يسرق كتب بالله عليج...بعدين الطاوله متروسه بنات محد يتجرا يسرق شي من هني.. مهرة: على ضمانتج... خليت كتبي عالطاوله وشليت شنطتي ورحت مع سلوى.... رحنا لمركز الباصات اللي اول مره اروح له...وركبت الباص اللي مثل ماقالت سلوى...ان هالباص يلف عالجامعه كلها والسكنات... وبعد دقيقتين تحرك الباص ...ويوم وصلنا سكن سلوى..نزلنا... كنت خايفه ومتردده ادخل السكن... يعني شي اول مره اسويه لازم بخاف... بس شفت البنات يدخلن ويطلعن بكل سهوله وعادي وهن يسولفن ولا عالبال.... سحبتني سلوى من ايدي ودخلنا السكن وهي تسولف علي وتخربط اما انا فكنت اتلفت واطالع كل شي حوالي... دخلناالمبنى اللي فيه غرفة سلوى...ودخلنا المصعد... مهرة: اييه سلوى...شي بنات وايد هناك؟ سلوى: ههههه هالحزه كلهن بريكات ويالسات ... مهرة: خيبه عيل بيعرفني اني من بنات العين.. سلوى: هذيلا يحبن يشوفن بنات العين يايات السكن... بس انتي ماعليج ... طلعنا من المصعد ودخلنا القسم اللي فيه الغرفه... اول مادخلنا القسم وقفت مصدومه.... جابلتني وحده يالسه عالكرسي ولابسه قميص نوم...لكن كان قصير..يعني اطول من الركب بشوي....كيف هذيل البنات يلبسن جي..؟!!.. غضيت البصر ومشيت مع سلوى واسمعها وهي تكلم هاي وتسلم على هاي بصوت عالي..ومعظمهن علقن واصدرن اصوات مغايظ يوم شافني.. حسيت كل العيون متعلقه فيني اطالعني بفضول.. مشينا عادي في ممر كانت فيه الغرف من اليمين واليسار..طلعت وحده من غرفه وسلمت على سلوى ويوم شافتني قالت.. البنت: لااااااااااااااه سلوى..!!.. انا جذي اغار.. سلوى: فديت روحج والله شحقه تغارين انتي لج مكانه خاصه... البنت: والله مب مبين اشوف وياج مزاييين... سلوى: ههههههههههه مهرة هذي مها...سنه ثالثه وتخصص علوم حاسب آلي...مها هذي مهرة..ربيعتي وتوها في التاسيسي... باستني مها وهي تسالني عن حالي وترحب بي.. مهرة: بخير الله يعافيج شحالج انتي.؟ مها: بخير وسهاله.. سلوى: يالله انتي لا تعطلينا نحن مستعيلين... مها: ماتنلامين والله ههههههههه.. سحبتني سلوى وانا ابتسمت لمها معتذره ورحت مع سلوى للغرفه... الغرفه كانت صغيره نوعا ما..لكن مرتبه جدا..فيها سريرين... مهرة: واااااو والله مب مقصره معدله حجرتج.. سلوى: هذي بيتي الحين لازم بعدلها...شو رايج فيها؟ مهرة: حلللوه... سلوى: وشو رايج في السكن... مهرة: يخوف بصراحه.. سلوى: ههههههههههههههه استريحي حبيبتي... يلست عالشبريه بينما سلوى راحت وسكرت الباب..وقفلته.. وراحت عقب وفتحت الثلاجه الصغيره.. سلوى: شو تشربين مهااري..؟؟ عندي بيبسي وعصير وماي وفيتامين سي..وحلاوه.. مهرة: لا سلوى ماشتهي شي مشكوره.. سلوى: افاااااااا ...لازم تشربين شي.. مهرة: خلاص هاتي عصير.. خذت العصير من ايد سلوى وانا اتفحص محتويات الحجره حوالي.. مهرة: مشكوره..يالله سلوى هاتي كتبج وخلينا نـــ....(قطعت رمستي يوم شفتها تعق عباتها وشيلتها وتفتح الكبت الصغير)... شو تسوين؟؟؟ سلوى: ببدل ثيابي اول مظايقتني التنوره... مهرة: شو بتبدلين ثيابج جدامي؟ سلوى: ههههههههههه اذا تستحين بروح الحمام...!! بطلت عيوني وانا ماعرف هذي تمزح او تتكلم جد...بس كانت تبتسم...يمكن تمزح.. مهرة: لا يابوي روحي الحمام ... خذت سلوى ثيابها وضحكت.. سلوى: ههههههههههه اوكي دقايق... طلعت سلوى من الغرفه ... ويلست انا اشرب عصير واتمشى في الغرفه الصغيره واتفحص محتوياتها... كانت الصور والبراويز منتشره في الغرفه....وفي الجدار فوق وحده من الشباري مسوية سلوى مثل الالبوم الكبير المفتوح... ومتروس صور... كلها صور بنات...معقوله كل هذيلا ربع سلوى.؟؟ ماشاء الله.. انفتح الباب ودخلت سلوى... نقلت نظري من فوق لتحت عليها....كانت لابسه قميص بودي لونه سماوي ونص كم...ولابسه بنطلون جينز لونه كحلي غامق.... سلوى: تاخرت..؟؟ مهرة: سلوى..!!..تلبسين بناطلين؟ سلوى: انا ما ارتاح الا بالبناطلين.. مهرة: عاد بتلبسين فوقه عباة مسكره؟ سلوى: عيل شو الفرق لو بلبس عباة مسكره؟؟.. نفس الشي بتربط حركتي.. انا ماحب شي حوالي ريولي يمنعني من الحركة بحرية... سكت..وماحبيت اناقشها او اني افرض رايي عليها...هي حررره...لكن ماعجبني اللي عرفته... مهرة: يالله خلينا نروح ماشي وقت عن محاظرة الانجليزي.. سلوى: يالله كيف طفرانه من السكن ههههههه... اوكي دقيقه.. لبست سلوى عباتها وشيلتها ...وفتشت في الادراج عن نظاره شمسية وطلعتها..خذت كتبها وطلعنا.... نفس الشي النظراات كانت تلاحقنا ونحن نمشي...البنات هني شي غريب بصراحه...وحركاتهن بعد غريبه وعليها علامات تعجب...!!!!!!... لكني طنشت...نزلت راسي ومشيت عنهن...وبعد ماطلعنا من المبنى ارتحت شوي..طلعنا من السكن ..كانت سلوى تبا تقعد في الكراسي عشان نتريا الباص اللي بيمر علينا بعد دقايق لكني رفضت وقلت لها نمشي احسن... صحيح حر لكني مابغيت اقعد مع شلة البنات اللي يالسه في الكراسي جدام السكن... شكلهن مايطمن بصراحه... مهرة: سلوى... في غرفتج شي شبريتين..شبرية منو الثانيه.؟! حاست سلوى بوزها بطريقه تدل على انها متظايقه... سلوى: هذي شريكتي بالغرفه ما اطيقني مادري ليش...مخلية الغرفه بس مكان لتغيير الملابس والتعديل وتطلع... حتى الدراسه ماتدرس فيها..والرقاد ترقد عند ربعها في غرفه ثانيه بدون علم المشرفات... مهرة: يصير ترقد في غرفة غير غرفتها؟ سلوى: هييييييي عااااااااااااااادي....المهم ان نحن موجودين في المبنى في الوقت المحدد... مهرة: وليش ما ادانيج شو مسوتبها؟ سلوى: ماسويتبها شي بس احسها جي ماادانيني... مهرة: هممممممممم اي كلية هي؟ سلوى:......شريعه وقانون... وفلحظة...عرفت سبب كره البنت هذي لسلوى... يعني شي طبيعي بنت شريعه وقانون اكيد متدينه ومابتحب نوعية البنات اللي مثل سلوى...وبصراحه مالوومها ...حتى انا انصدمت فيها....لكن الحق يقال سلوى لها طبيعه طيبه نوعا ما.... ------------------------------- اليوم : الاحد... المكان: مطبخ بيت بو راشد.. الوقت: الثامنه مساءا.. ------------------------------ ( شيخه)... فتحت الثلاجه وطلعت الموز والفيمتو والحليب ورحت عند الخلاط... كنت مشتهية اليوم عصير موز بالفيمتوو..ولا طاع يخوز من بالي فقررت اني اسويلي كوب... بديت بالتجهيز والتقطيع ...كنت متظايقه من اللزقه الكبيره المحطوطه على عيني...وكانت شوي تعورني... الله يسامح هالمجرمين اللي اجبروني عالعملية هذي والا انا كنت مرتاحه... شغلت الخلاط بعد ماحطيت المكونات ...وارتفع صوت الازعاج وغطى على اي صوت ثاني... فجاه شفت بياضه واقفه عدالي جان افز واصرخ... يوم التفت حصلت سهيل يطالعني مع ابتسامه بايخه....هي ابتسامه عادية الصراحه بس انا اشوفها بايخه لاني معصبه وزعلانه عليه... شيخه: وياااااااااااااا هالويه...ماتعرف تقول السلام عليكم والا هود...؟؟ كنت اصارخ عشان اسمعه صوتي بسبب ازعاج الخلاط...مد سهيل ايده وبند الخلاط عشان يقدر يتكلم.. سهيل: اول شي...انا سلمت...انتي ماسمعتيني بسبب صوت الخلاط... ثانيا شحالج.؟ مابغيت ارد عليه...انا زعلانه... اطالعته من فوق لتحت وصديت عنه ورجعت اشغل الخلاط... ثواني ورجع بنده عني... سهيل: سالتج سؤال... التفت له وقررت اتجاهل سؤاله مره ثانيه... شيخه: وين راشد؟ سهيل: دخل الحمام... عقدت حياتي... شيخه: انتوا وين كنتوا طول اليوم؟؟...من بعد الغدا طالعين.. سهيل: زين يوم انتبهتي لنا متى طلعنا...الله يسلمج كنا في دبي... اخوج غياااااااار وقرر يشتري سياره غير عن هذي...وتونا واصلين.... شيخه: وليش مادخلت الميلس..؟؟ليش ياي المطبخ؟ سمعت صوت الخلاط وييت؟ سهيل: لا..دخلت اترس لي دبة ماي للسياره... وبعد ماعرفت اللي ابغي اعرفه..اظفت الثلج للعصير في الخلاط ورديت شغلت الخلاط وانا متجاهله وجود سهيل...رغم اني مستحيل اطنشه لكني حاولت... رجع سهيل بند الخلاط عني.. شيخه: اوهووووووو... سهيل: سالتج سؤال.... كان يطالعني بنظره بارده....وسهيل يوم يطالع بنظرة بارده معناته على وشك يعصب...!!!.. قلت له وانا افاتن عليه تقريبا... شيخه: مب بخير انزين..!!!. سهيل: شو يعورج؟ شيخه: عيني تعورني.. والا ماتذكر بعد.؟ سهيل:................. ماتستخدمين الدوا؟؟ شيخه: بلى...بس بعد هذا يوم احطه ييتم يحرقني وعيني ادمع...وفوق هذا عيني ينزل منها دم... سهيل: انزين شويخ هذا شي طبيعي لانهم يارحين عينج من داخل اكيد ما التحم بعده... اعرف انه كلامه صدق...بس انا معصبه ولازم اعق الغلط عليه..عشان يتلوم شوي.. بس اللي قاهرني انه لا هو ولا راشد اظهروا لووم ولو شوي....كانهم ماسووا شي ابدا... وامي وابويه مستانسين عالي سوووه فيني.... رحت ويبت كوب وصبيت محتويات الخلاط لكن العصير زاد وطلع يكفي كوبين مب كوب واحد.... دزيت الكوب صوب سهيل وانا ساكته ورحت يبت كوب ثاني.... وصبيت باقي العصير لي.. ابتسم سهيل وشرب شوي من العصير.. سهيل: مشكوووره... لذيذ... سكت ومارديت عليه... شليت عصيري وتوجهت لبرا المطبخ... سهيل: اييييييييييييه...!!! وقفت مكاني .. شيخه: نعم؟ سهيل: بتمين زعلانه جي يعني؟!.. التفت له وقلت... شيخه: ماظني يهمك ولا يهم راشد زعلي والا رضاي... سكت سهيل واطالعني بنظره تلمع وقال بحزن.. سهيل: بعد اللي عرفتيه وقلته لج ..تقولين مايهمني.؟!!. قلبي فقد دقه من دقاته.... ماتوقعت سهيل يرجع يذكرني باللي قاله لي في المستشفى...لاني حسب ماعرفه كرامته ماتسمح له وهو اهم شي عنده كرامته.... لكني قويت نفسي وقلت له بسخريية مقتبسه من كلامه... شيخه: تراك انته وراشد " خواني"..على قولتك والاخوان مايهتمون بزعل خواتهم .... عقد سهيل حياته وطالعني بنظرة مستغربه.. سهيل: شوو؟...مافهمت عيدي.. حركت ايدي بعصبية وانا اعطيه ظهري واطلع... شيخه: يابويه افهم اللي تبغي تفهمه ..من متى انته تفهم صح اصلا....!!!. طلعت من المطبخ وتوجهت صوب البيت واطرافي ترتجف....مادري اللي سويته صح او غلط...لكنه صار وانتهى الموضوع...وخله يفهم اللي يبغيه.. ------------------------------- اليوم: الاحد .. المكان: بيت سلطان... الوقت: الثامنه والنصف مساءا.. ------------------------------ (يوسف)... حطيت سماعة التيلفون عالكرسي وركبت فوق ازقر منى... هذيلا ربعها مايحصلن يدقن الا يوم يشوفني توني داخل البيت.... كل مادخل بيتنا يرن التيلفون.. ليش ؟!.. الله اعلم..!!. دخلت حجرة منى حصلتها اطقطق كالعاده عالكمبيوتر.. يوسف: لا تقوليلي اني من خليتج العصر وانتي يالسه...؟! منى: اوكي مابقول... يوسف: مــنّــــوووووووووه..!!!!.. منى: ههههه قمت صليت المغرب ورديت يلست بصراحه.. يوسف: عنبووج عيووووونج... انتي من ركبنالج الخط المنفصل عن تيلفون البيت وانتي اربع وعشرين ساعه عليه...!!!.. منى: انته تقعد اكثر عني... يوسف: ومن زيني انا تراني البس عدسات طبية..!!!.. المهم انزلي تيلفون... منى: يوووه منوووه؟؟.. يوسف: شو دراني..ربيعتج بعد منووه... منى: اووكي.. قامت منى من المكتب بدون ماتسكر الكمبيوتر او النت... وطلعت برا الغرفه ونزلت ركظ... رحت انا ويلست كعادتي مكانها عالمكتب اشوف منو تكلم.... كان كل شي مفتوح ...المسنجر بعد مفتوح بس محطوط على مشغول.. شفت المسجات وحصلت كنه وحده من البنات... ابتسمت وكتبت لها... " باااااااااااك"... كنه:" ولكم باك هلا... ماواحيتي توج تقولين بتشوفين منو عالتيلفون" تورطت..ماعرفت شو اقول... يوسف:" هي سرت تحت وحصلتها مسكره ورديت"... كنه:" غيرت رايها البنت ماتبا تكلمج لوووووووووول"... يوسف:" يالسباله".. كنه:" ماغيرج...المهم كملي السالفه ...شو صار ؟ ماقال شي الاستاذ يوم طلعتي معصبه من الكلاس؟" بطلت عيوني مستغرب...شو سالفه منى والطلعه من الكلاس هذي...انا ماعرف السالفه كيف اكملها...ورطه صدق... يوسف:" بكملها عقب بس بغيت اسالج سؤال... " كنه:" سالي عيوني.." يوسف:" بس اجاوبيني بصراحه..." كنه:" ولووو....معقوله بجذب عليج انتي".. يوسف:" انتي تحبين يوسف صدق والا بس تسلية وتمضية وقت"... طولت كنه لين ماردت علي...اما انا كنت على اعصابي....لاني بصراحه بديت اشك بشعور كنه تجاهي...تعاملني بكل برووود.. كنه:" منى شو هالسؤال انتي تعرفيني احسن من جذي.." يوسف:" هذا مب جواب سؤالي"... كنه:" ولا بجاوبج ادب لج علىهالسؤال البايخ".. ابتسمت...شو هالحظ..يعني ماعرفت اييب السؤال بطريح احسن من جذي بدون ما اعصببها..؟!!.. هالبنت عصبية وايد بسرعه تعصب... تشجعت وحاولت مره ثانيه.. يوسف:" انزين اذا يا يوسف يخطبج بتوافقين عليه؟" طولت مره ثانيه كنه ....وبعدها قالت.. كنه:" منى..".. يوسف:" نعم".. طولت مره ثانيه وعقب قالت... كنه:".. لو يا اخوج يخطب بجووووته .."... انصدمت...وحسيت كان حد صفعني كف... وحسيت بالاهانه فوق كل هذا.... انا...يجوتوني..؟؟...انا..؟!!... بدون حاسية كتبت لها.. يوسف:" ليش؟".. كنه:" هههههههه انتي تعرفين زين ان اخوج هذا ماينزل لي من زووور...".. انصدمت مره ثانيه..هذي شو تقول..؟؟؟ وانا اللي كنت واثق من حبها لي... عيل شو الي كانت كاتبتنه ومخزنتنه في كمبيوترها عني؟ لعب؟ والا تسلية والا شو بالضبط.؟؟؟ اسميك يايوسف استويت مقصّة من هالبنات... مره وضحه...والحين بنت عمي اللي من لحمي ودمي....وانا اللي من يومين موافق عليها انهم يخطبونها لي رغم اني ماريد اعرس احين ...!!! انتبهت على كنه وهي ترسل لي مسج.. او لمنى.. كنه:" الووه...وين رحتي؟" يوسف: اقولج... برب".. كنه:" خذي راحتج".. قمت انا سكرت النافذه اللي فيه كلامنا عشان منى يوم ترجع ماتقرا اللي انكتب...خليت مكتبها ورحت لغرفتي وانا متظايق حدي... ماتصورت ان هالرد اللي بحصله من كنه...توقعت كلام ثاني يشرح الصدر ويحسسني باني محبوب ومهم.... ياربي كيف كنت متاكد من مشاعرها كيف جي صار؟ شو هالمقلب اللي سوووه فيني..!!.. تووووووووووووووبه اهتم باي بنت مره ثانيه... قسم بالله كلهن مايستاهلن الاهتمام....!!! ------------------------------------- اليوم: الاحد... المكان: غرفة كنه... الوقت: التاسعه الا ربع مساءا.. -------------------------------------- (كنه).... سويت كوبي للمحادثه اللي دارت بيني وبين ولد عمي المخضرم وحطيتها في فايل بروحها وخزنتها مع المجموعه السابقه من الفايلات... كنت ميته من الظحك على ردة فعله المصدومه... بس يستاااااااااهل....يلعبها على غيري مب علي.. انا في البدايه استغربت سؤال منى لي..اذا كنت احبه او العب بس..لانه هي تعرف عدل شعوري تجاه يوسف...وتعرف اني اموووت فيه... عيل ليش سؤالها هذا...!!.. لكنه يوم سالني سؤال بايخ ثاني شكيت بالموضوع...وقررت استخدم كلمه السر اللي انا ومنى متفقين عليها للحذر.... كنا متفقين باني اذا زقرتها باسمها ترد علي هي وتقولي" عيون منى الحولا"... لكني يوم زقرت منى هالمره رد علي هو بكلمه نعم... ساعتها عرفت انه يوسف وقاعد يلعب علي ويحاول يسحب معلومات.... ورديت عليه برد يخليه فعلا يحس اني ماحبه.... وهذي اكبر ظربه ممكن اني اوجهها له عقابا له على قرايته ملفاتي الشخصية... لاني ماكنت اباه يعرف اني احبه....واللي صار اليوم بيخليه يشك...هذا اذا ما اقتنع فعلا باني ماحبه... لاني باختصار كنت اباه يهتم فيني لشخصي انا ومن نفسه وبدون دفع.... ماكنت اباه يهتم فيني ويلاحظني بس لاني احبه...!!.. يعني شفقه لاغير... قطعت حبل افكاري لطوف اختي الصغيره...يتني بملامح زايغه وقالت لي... لطيفه: كنووه ....كنوووووه.... لحقي نوره تصيح...!! عقدت حياتي واستغربت.. كنه: شوووه؟ لطيفه: نوووره اختي تصيح.... كنه: ليش تصيح؟ شفيها؟ لطيفه: مادري كانت ادرسني وفجاه قعدت تصيح وراحت حجرتها... كنه: خبرتي حد؟ لطيفه: لا ماخبرت حد بس انتي.. كنه: ولا تخبرين حد بعد...انا احين بسير اشوفها اوكي؟ لطيفه: اووكي.. طلعت لطيفه من حجرتي وهي بعدها مستغربه وخايفه...سكرت انا الماسنجر والنت والكمبيوتر مره وحده وطلعت اشوف نوره شفيها... دقيت باب غرفتها...وماوصلني رد...رجعت ادق مره ثانيه بشكل اقوى... نوره: منووووووووووه..؟!!. كانت تفاتن بصوت عالي... وكنا في البيت متعودين على اطباعها السيئه... كنه: انا كنووه بطلي نوره.. نوره: خليني بروحي ماريد اشوف حد... كنه: انزين لا تشوفيني غمضي عينيج وبطلي الباب انا اللي بشوفج... نوره: كنوووه قلت لج ذلفي عني مالي خلق... كنه: بطلي الباب لا اخبر مايد عليج... وتعرفينه انتي بيطلع الرمسه منج غصب.... وبعد تاخير بسيط..فتحت نوره الباب وويهها كله خرسان دموع...ورجعت تقعد عالشبرية وتحظن المخده وهي كاتمه عبراتها وتمسح دموعها... سكرت الباب وراي وقفلته.... مب عادتها نوره تصيح....شفيها ياترى..!!.. بصراحه رغم اني انا ونوره مانتفق..لكني احبها وااايد وماحب اشوفها متظايقه... يلست عدالها عالشبريه ... كنه: نوره حبيبتي شفيج.؟ ليش تصيحين منو زعلج... تنفست نوره بصعوبه وقالت بصوت واطي هزّه الصياح.. نورة: ماشي... كنه: كيف ماشي مستحيل تصيحين بلا سبب.... يدووه نازعتج؟ نورة: لا... كنه: امي.؟ ..مايد؟؟ هزت راسها مره ثانيه بالرفض...واحترت انا بشو افكر...نوره مابتصيح بسبب اي شخص غير هالثلاث اشخاص بس..اما البقية ماتسمح لهم اصلا انهم يظايقونها... كنه: عيل شفيج لا تخوفيني.... اطالعتني نوره بعيون مليانه دموع...وقالت لي بشكل مؤثر.. نورة: كنه....ليش الناس يحبونج ومايحبوني..؟!!.. تفاجات بسبب كلامها هذا.... كنه: فديتج كلهم يحبونج ليش جي تفكرين.؟؟ نورة: محد يحبني كثرج....الكل يحبج انتي اكثر مني.. كنه: حرام عليج انتي بس تحسين جي والا انا اشوف الكل يحبج.. نورة: انتي ماتحسين لانه وضعج غير..انتي محبوبه بين الكل...انا اللي احس بتجاهل الكل لي ونفورهم مني.. كنه: ماصدق...عطيني مثال... نورة: شفتي عمي يوم يا هو وعياله يوم الجمعه؟؟.. يلسج عداله وقعد يسولف وياج اما انا سلم علي عادي... منى تفضلج انتي علي وماتسولف وياي وايد.....حتى...حتى عياله مايطيقوني... كنه: حرام عليج انتي ليش جي تفكرين...عمي مب انه يحبني انا لشخصي هو يحب يسولف وياي لاني اذكره بيدته الله يرحمها....ومنى ربيعتي من الصغر بسبب تقارب السن يعني.. وبعدين عيال عمي يعاملوني مثل مايعاملونج ماشي فرق... قالت لي باندفاع وهي معصبه... نورة: ماظني يوسف سمعج رمسه تسم البدن مثل ماناصر سمعني.... كنه: شوووه؟؟؟... شو تقولين انتي؟؟ نوره: ماشي.. حسيت ان نوره بتتراجع وبتسكت مره ثانيه.. كنه: والله ياتقولين...شو قالج ناصر.. نورة: ماشي...كنه خليني بروحي.. كنه: خبريني اول وبروح.. نورة: اووووووف...شو اقولج يعني...ناصر قال لي انه مابيخطبني...جرحني وطعني في الصميم...قال لي لا ترفضين اللي ايونج بسببي لاني انا مابخطبج وطلعي هالفكره من بالج... وانا اللي اترياه من سنين يجازيني بهالطريقه..!!!.. ورجعت نوره غرقت في موجه صياح مؤلمة بصراحه.... شو اقولكم... ساعتها كرهت ناصر ولد عمي عاللي سواه في اختي...واضطريت اني امد ايدي واحضنها بقو عشان تهدا... فعلا هي صبرت سنين ورفضت وايدين عشان ناصر...اخر شي جي يسوي فيها.؟!!.. ليش مايعرس عشان يفهمها بطريقه ثانيه انه مايبغيها...مب يقولها جي فويهها وبطريقه مهينه ومؤلمه... كنه: ياعمري شو تبين فيه..هذا واحد سبال انتي تستاهلين اللي احسن منه... يعني ماتذكرين كل هالرياييل اللي تجدموا لخطبتج..؟ كلهم شارينج ولين الحين عندهم امل انج توافقين اذا رجعوا تقدموا لج... وفوقهم بيييج بدال الواحد عشره يبونج وبتشوفين... قالت لي بصوت باكي ومنهار.. نورة: انا ماريدهم... ماقدر اخذ واحد غير ناصر ماقدر... كنه: لانج حاطه هالفكره فبالج من انتي صغيره وصعب تغيرينها فجاه... لكن بتتعودين بسرعه على أي ريال ثاني خصوصا لانهم شارينج يانوره... ابتعدت عنها ومسكت ويهها واطالعت فعيونها المليانه دموع.. كنه: سمعتيني؟؟.. انتي الف من يتمناج مب شرط ناصر... نورة: كنووه...انا مب عشان هالسبب بس اصيح...انا احس ان الكل مايحبني... كنه: غلطانه... نورة: انا فيني شي غلط.؟ فيني عيب.؟؟ حلفت عليج ياكنه تقوليلي الصدق... احترت شو اقولها...اصارحها..؟!!..يمكن يساعدها هالشي بانها تصلح شخصيتها شوي.. كنه: حبيبتي انتي فنانه من كل شي ماعدا انج شوي...شوي بس فيج تكبر وغرور.. بطلت نوره عيونها ووقفت عن الصياح...وقالت بصدمه... نورة: انا..!!!.. كنه: شويه بس...يمكن هذا اللي يخليهم يتظايقون لانج تحسسينهم بانج انتي احسن منهم... نورة: مش قصدي.. كنه: ادري حبيبتي مب قصدج ...بس لازم شوي تنتبهين لعمرج وتتواضعين للناس... نوره: بس انا ماحس بنفسي اني مغرووره...ومااتقصد اني اغتر.. قلت بصوت مازح عشان اخفف شوي عن نوره.. كنه: يحقلج ياعمتي تغترين يوم انتي الله منعم عليج بكل هالجمال والحسن...والله اللي يشوفج يتعذب والا ماتعرفين يعني شحقه هالكثر ايوون يخطبونج..!!.. ابتسمت نوره غصبن عنها...مثل ماتوقعت...نوره تحب المدح وهذا يرجع لشخصيتها الفخوره... وقالت وهي تمسح دموعها... نورة: خليني اعرس وبتشوفين شكثر ايوون يخطبونج انتي.. كنه: انا اول واحد ايي يخطبني برضى فيه...ههههههههههههههه.. ظحكت نوره معاي ... وفرحت لدرجه اني بستها على خدها... كنه: فديت هالضحكه ياربي..قومي حبيبتي غسلي ويهج ونزلي تحت لطوف ميته من الزياغ عليج.. نوره: اوكي.. خليت نوره ترتاح شوي وطلعت من غرفتها وانا فرحانه لاني نوعا ما توصلت لتفاهم مع نوره..بالاضافه اني جبرت بخاطرها وراضيتها....لاني اول مره اشوفها منجرحه وزعلانه وتصيح بهالطريقه... !!!... اما ناصر هذا فصدق انه مايستحي يقول لبنت عمه جي... السبال..!!.. ----------------------------------- اليوم: الاثنين... المكان: بيت خلفان.. الوقت: السابعه صباحا.. --------------------------------- (سيف).... وقفت جدام المنظرة مستعيل وتسفرت بسرعه...خذت اغراضي وكتبي ونزلت تحت ركظ... شفت سهيل على وشك انه يروح... سيف: وين سااير.؟ سهيل: تاخرت سواف انته اليوم...وانا بتاخر عالدوام جي... سيف: عطني دقيقتين بس بشرب جاهي... سهيل: نص الكوب بس صب لك مب كله.. سيف: يالزطّي... لحظه... دخلت غرفة الطعام وسلمت على عمتي ومحمد.... سيف: وين ابويه؟ آمنه: ابوك عنده صداع اليوم يقول...يعوره راسه... سيف: لا يكون مريض..؟ آمنه: مادريبه مافيه لاحمى ولا شي بس يقول عنده صداع... دخل سهيل وراي ... سهيل: سرعه ياخي ... يلست وصبيت لي حليب وشربته فوقت قياسي...وبعدها طلعت مع سهيل اللي واقف على راسي ومستعيل.. في السياره...قلت لسهيل.. سيف: اوو ه تذكرت...تراني مابتغدى في البيت اليوم..جمال بيخطف عليه في المدرسه عقب الدوام وبنسير دبي.. التفت لي سهيل بفضول.. سهيل: سيراتك لدبي كثرانه هالايام... سيف: شوفيها يعني انته امس ساير دبي.. سهيل: انا ساير ويا راشد ندور له سياره... سيف: وانا ساير مع جمال مافيها شي.. سهيل: بس انته ثانويه عامه ولازم تنتبه لدراستك ياسيف... سيف: كل هذا مب محسوب ..مايحسبون الا نتايجي في اخر السنه...وبهتم على اخر السنه... سهيل: لاحول ولا قوة الا بالله....امحق درجات بتيبها عيل... سيف: خلني انا احاتي هالموضوع هذا...لا تهتم... سهيل: ماعرفنالكم... اذا اهتمينا قلتوا لنا لا تهتمون...واذا ما افتكرنا ولا سالنا قلتولنا والله انتوا ماتهتمون فينا... شو تبونا نسويبكم يعني.؟!.. سيف: انته شفيك متنكد اليوم..؟ طايح عن الشبريه؟!.. سهيل: مب منك من اللي يسال عن احوالك... ابتسمت وسكت عن سهيل ... افكر بالحفله اللي بيسووونها الليله في دبي مع الشباب.... هذي ثالث حفله بنسجلها... والمجموعه فيها كذا صوت يستحق اني اتحداه بصوتي... واضطريت اني اجهز الاغاني اللي تناسب صوتي اكثر شي واقدر اني ابدع فيها وابرز صوتي...وبسبب التجهيز هذا اضطريت اني اسهر..وهالشي اللي خلاني اتاخر بالنشّه اليوم... اما بالنسبه لدق العوود...خلاص صرت متمكن منه..وبصراحه ماقدر اتدرب فبيتنا عالعود لاني ماقدر ادخله البيت عن يعصبون علي... عشان جي اضطريت اني اخلي عودي فدبة السياره مالت جمال... وبتدرب في الدرب لدبي ان شاء الله.. بالمره اسمع جمال الاغاني اللي جهزتها... لانه جمال من اكبر المعجبين بصوتي وطبيعي يشجعني...ويحمسني شوي... نزلت من سيارة سهيل ودخلت المدرسه وانا ادندن واغني بصوت واطي.. وبالي ماكان بال دراسه ابدا.... ------------------- اليوم: الاثنين... المكان: شقة ناصر.. الوقت: الحادية عشره صباحا.. -------------------------- (ناصر)..... طلعت من المطبخ وانا اكل سندويشه الجبن والجام اللي سويتها لي...وفي ايدي الثانيه كوب عصير منغا...توجهت لغرفتي وحطيت اكلي على التوليت...ومسكت الاكياس اللي كانت مليانه ثياب وبدلات شريتهم امس... زين اني اليوم خذت اجازه عشان اتفرغ لتجهيز شنطتي...لاني مابحصل وقت ثاني... فرغت الاكياس على الشبريه عدال الشنطه وتفاجئت لعدد القمصان والبناطلين اللي خذتها...هذا غير البدلات اللي عندي اصلا في الكبت.... دايما كنت احب القمصان والبناطلين واحب البسها ..كنت كل ماشوف قميص يعجبني اشتريه...لكني مااقدر البسه هني في الدوله....بينقدون علي...عشان جي كنت اشتري واخزن.. لكن امس دام حصلت العذر باني اشتري قمصان وبدلات ماقصرت..شريت كل شي عجبني ... بديت بتجهيز الشنطه وحطيت كل الملابس والجواتي والاغراض الشخصية اللي بحتاجها.. وبعد ساعه ونص ..طلعت من المسيد وانا اتكلم مع عبد العزيز... عبدالعزيز: هااا جهزت اغراضك..؟؟ ناصر: هي والله توني مخلص...وانته؟ عبدالعزيز: بجهزهم باجر الصبح يوم برجع من خور فكان.... ناصر: بتودي اهلك؟ عبدالعزيز: هي بعد تدري... حرمتي من كم يوم بس مربي وماتروم تيلس اروحها..قلت بوديها عند الاهل يساعدونها احسن... ناصر: ههههه هي صح...اسميك سويت فينا مقلب ذاك اليوم... عبدالعزيز: ههههههههههه السموحه ... انا اروحي ارتبشت يوم اتصلوبي من البيت... ناصر: مسكين علي كان زايغ عليك...حتى انا زغت... اخر شي طلعت في المستشفى ويا حرمتك؟ انزين جان شليت التيلفون وياك... عبدالعزيز: نسيييته والله....ولا تذكرته اصلا الا يوم بغيت اتصل باهلها واهلي عشان ابشرهم بالولد... ناصر: عالعموم تستاهلون والله....وانا اليوم بسير العين بسلم على اهليه... متى قال علي الطياره؟ عبدالعزيز: يقول الساعه ثلاث بعد الغدا... ناصر: تمااام وقت مناسب.. رن تيلفوني في هالوقت وطلع مايد متصل بي... دخلنا البنايه انا وعبدالعزيز... ناصر: السلام عليكم... مايد: هلاااا وعليكم السلام ...شحالك ناصر.. ناصر: مرحبا الساع....بخير مايد شحالك انته؟ مايد: بخير وسهاله...وين دارك؟ ناصر: والله توني ياي من المسيد واحين بسير الشقه...وانته؟ مايد: انا احوص في بوظبي ... ناصر: لا والله ...ياحيك...وشو تسوي فبوظبي؟ مايد: ياي فشغل وخلصته قلت بمر على ناصر...واحين افتر راسي وانا ادور في الشوارع نسيت شكل البنايه اللي انته فيها...احيدها فشارع الـ ..... بس نسيت وين بالضبط... ناصر: هههههههههههههه انا بدليك اياها... دخل عبدالعزيز شقته بعد سلام صامت وجهه لي لاني اتكلم في التيلفون...ورديت عليه سلامه بايدي ودخلت الشقه وانا ادلي مايد مكان البنايه واي طابق ورقم كم....يوم حفظ سكر عني وقال انه باييني... حطيت تيلفوني عالطاوله ورتبت الصالة عالسريع... وبعد عشر دقايق وصل مايد... فتحت الباب عنه وانا مبتسم... مايد: السلام عليك.... ناصر: مرحبتين الساع.. وعليك السلام والرحمه.. توايهت مع مايد... ناصر: اقـــــــــرب... مايد: قريييب...(دخل مايد الشقه اللي اول مره يدخلها)... ماشاء الله ماشاء الله....شعليييييييييييك مفتك من صدعه الاهل وزابن هني.. ناصر: هههههههههههههه والله اني اتوله على صدعتهم لا اتحسبني مرتاح.... خذت مايد في جوله عالشقه...اللي كانت عباره عن صالة متوسطه ومطبخ...وغرفة رئيسية لها حمام خاص وهي غرفتي... وغرفتين ثانيات بينهن حمام...خليتهم فاظيات لاني ماعرفت شو اسوي فيهم ولا احتاجهم... وكان فيه حمام ثاني مطل على الصالة وكان بسيط وصغير بدون دش... مايد: حلوه والله ومريحه.... بس تعال شفت شنطه على شبريتك وين ناوي؟ رجعنا للصالة ويلسنا... ناصر: والله ناوي على الشام باجر ان شاء الله... مايد: شو تبابها؟ ناصر: اغير جو...وارفه عن نفسي شوي ..من زمان ماسافرت... مايد: اهااااا عشان جي ماخذ اجازه يعني... ناصر: هي... كان مايد متصل بي امس وعرف ان عندي اجازه .... مايد: بصراحه انا مافكر اسافر لين عشر سنين.... عفت السفر.. ناصر: هههههههههه شعليك اربع سنين اظن وانته مسافر لازم بتشبع.. مايد: المصيبه شو اللي بيقنع الحرمه اني ماسافر... بتنحبط مسكينه اذا ماطلعتها فشهر العسل على قولتها... ناصر: ههههههههه لا حرام عليك لازم تحوطها شوي... مايد: الله يعين...اخبرك تراني امس مب متعشي ولا اليوم تريقت..وميت من يوعي...قم نسير مكان نتغدا فيه.. ناصر: حاااضرين افا عليك ولد العم... قمت انا ومايد وطلعنا من الشقة ورحنا واحد من المطاعم وتغدينا....وبعد الغدا رجعنا الشقه وخذت سيارتي وركب هو سيارته وتوجهنا للعين .... ---------------------------------------- نهاية الجزء الخامس والعشرون ان شاء الله عجبوكم الجزئين ........ تحياتي |
اكيد عيبوناااااا
ننتظررررررررررررررررر لا تتاخرين اذا تاخرتي بزوالج هههههههه لا والله امزح ننتظر يا احلى غزاله في الكون :) |
ان شاء الله عزيزتي شجون بس انتي تابعينا وراح تشوفين اللي يسرج .......
تحياتي |
| الساعة الآن 01:16 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.