لما كنت في سنه ثالث إبتدائي كانت عندنا مدرسة ملتزمه بارك الله فيها
وجزاها الله الجنه كانت تعطينا أكثر من مادة ومرة في رمضان كنا فاضين
قالت بنات مين اللي تختم القران كل شهر محد رفع يدة وسألت سؤال ثاني
قالت مين يختم القران في رمضان ومحد رفع يدة قالت ليش طيب الأغلبيه قالوا
أنه ماعندهم وقت والقران ياخذ وقت المهم هي ربي يجزاها الجنه قالت لا
بالعكس مافيه أسهل منه المهم الطريقة اللي قالتها لنا أذكر قالت
بعد كل صلاه إقرأو صفحتين بتلقون أنفسكم في كل يوم ختمتم جزء وفي نهايه الشهر
القران كامل طريقة سهله وتنالون الأجر طبعا هالنصيحه ما نسيتها طول عمري
وبسببها بعد الله حفظت القران كامل في الصف السادس ربي يوفقها
هنا حبيت اقول لكم ذكرى من ذكرياتي علشان تختمون القران وممكن
تحفظون ليش لا محد يدري

سبحان الله هذا تأثير المعلمه على الطالبات....
وربمى أنها قالت تلك النصيحه لا تدل البنات على
حفظ القران بل لتساعدهم في قراءته وختمه في
رمضان....فهأنتي واحده من عشرين تقريبا
حفظتيه.ويمكن تكون فيه وحده غيرك حفظته
والأجر كله يرجع للمعلمه....
والله يجز هل المعلمه وأمثالها خير الجزاء........
وهذا فيه درس أنك تعلمين ألي أصغر منك
أشياء بسيطه وهم مع الزمن يصنعون أشياء عظيمه........

هنا اذكر لكم قصه حصلت في الجامعه يعني قريب لما كنت في السنه الأولى من الجامعه
كانت وحدة من البنات ما ذاكرت أوكية علشان الإمتحان الشهري بسبب ظروف كانت عندها. المهم
في الإختبار ماعرفت ولا جواب لأنه كان مرة صعب المهم
كانت قدامها ورقه زميلتها وزميلتها هذي ممتازة وبسهوله تقدر تنقل الإجابة
وبكن في نفس الوقت تراجعت خوف من الله وقالت أرسب أهون على من الغش
المهم بعد أسبوع من الإختبارات جت لنا الاستاذه وجابت الدرجات
والبنت أخذت الدرجه الكامله يؤ طيب كيف وهي ما جاوبت راحت البنت
للأستاذه قالت استاذه انا الصراحه ماجاوبت أبدا كيف كذا لا وكامله؟؟؟!!
قالت سبحان الله من ربك جت بنتي وأخذت وقتك من بين الأوراق اللي اصححها
وخفت لا تخرب الورقة لأنه امتحان ومشكله لو صار شي وبنتها كان عمرها سنتين
المهم تقول حلفت بالله لو رجعت الورقة بدون ما تخربها إني لأعطي صاحبت
الورقه الدرجه الكامله يعني شفتم سبحان الله ربي وفقها على إنها تقدر وبسهوله الغش
بس خوفها من ربي منعها وربي عوضها هنا ما اقول لكم إني
تعلمت إني ما اغش لا والحمدلله بحياتي ما غشيت ولكن هالمواقف تعلم الإنسان
يشوف قدرة ربي وتوفيقه للي يخافونه لأن الله ما يغفل عن الجميع هو بس
يمهل ولا يهمل وأتمنى ما تنسون هالشي طالما إننا داخلين على فترة إختبارات
ربي يوفقني ويوفق الجميع فيها