~!يعني بنفترق!~

[phloe fan]

السلامـ عليكمـ

هذي أول قصة أنزلها بهذا المنتدى و تكون من تأليفي

القصة قريبة من الواقع بس هذا ما يعني إنها صارت لي أو لأحد أعرفه .. أقصد في (قريبة من الواقع) إنها ممكن تدخل العقل و تتصدق

يهمني أسمع رايكمـ و نقدكمـ ع القصة .. و بعد ما أنزل الجزء الأخير راح أنزل جزء بعنوان "خلف الكواليس".. في هالجزء راح أقول لكمـ شلون خطرت في بالي هالقصة و راح أقول لكمـ عن مشاهد حذفتها و مشاهد ضفتها باللحظة الأخير و جذي ^_^

◦˚ஐ˚◦๑ ~!ملخص القصة !~ ๑◦˚ஐ˚◦

لما تكون نظرتك للحب سلبية و تكون حاط في بالك إنه الحب يقطع القلب فتاخذ عهد على نفسك إنك ما تحب عشان تحمي نفسك لكنك تلتقي بإنسان ما تقدر تحافظ على عهدك معاه.. إنسان ما تقدر تمنع نفسك من حبه و كل محاولاتك في نسيانه تنتهي بالفشل و تزيد صعوبة موقفك بتمسكه فيك و إصراره عليك.. ودك تسلمـ له قلبك لكنك خايف من الي راح يصير بعدين ..خايف من الفراق..

*

أول شي أعرفكمـ على بعض شخصيات القصة

فيصل أكبر اخوانه عمره 30 شاب خلوق و طيب وايد وكان يحب زوجته (نورة) وايد و تأثر في موتها و قرر ما يتزوج بعدها و يهتمـ وايد في بنته الوحيدة ريمـ و يدلعها حيل لدرجة إنه كل الي يعرفونه يقولون له إنه دلعه لها راح يخربها
و فيصل ساكن مع أمه و اخته من بعد وفاة أبوه

بنت فيصل ريمـ طفلة هادية ما تحب تعبر عن مشاعرها لأي أحد غير أبوها عمرها 6 سنوات فقدت أمها لما كان عمرها 3 سنين.. أمها ماتت بسبب مرض السرطان الخبيث
و ريمـ ساكنه مع أبوها فيصل في بيت أهله

أمـ فيصل حنون و طيبة بس إذا حطت شي في بالها لازمـ تسويه و اهي دايمـ تحاول إنها تزوج فيصل بعد وفاة نورة بس اهو مو راضي

عادل عمره 28 سنة عنيد و ما يرجع بكلامه دايمـ عند نفسه اهو الصح و الباجي الغلط .. مستقل في بيت يجمعه مع زوجته ليلى و عياله " ولده فهد عمره 8 سنين و بنته مريمـ عمرها 7 سنين و أصغر عياله لولوة و عمرها 6 سنين"

اخت فيصل و عادل فاطمة عمرها 19 تدرس بكلية الآداب و اهي عنيدة وايد بس طيبة و حساسة

آخر شخص من أفراد العايلة سالمـ عمره 25 و توه متزوج .. سالمـ عصبي و مزاجه صعب و جاف في التعامل مع الكل إلا ريمـ تكسر خاطره و ما يحب يزعلها فيعاملها غير عن أي أحد ثاني

باجي الشخصيات راح تتعرفون عليهمـ مع القصة

[phloe fan]

يا الله أخليكمـ مع الجزء الأول من القصة

:.:الـجـزء الأول:.:

طلعت ريمـ من غرفتها و نزلت لغرفة الطعامـ بهدوء و شافت يدتها (جدتها) تجهز الريوق(الفطور)

ريمـ : صباح الخير يدتي

أمـ فيصل: صباح النور حبيبتي .. يا الله تريقي عشان تلحقين ع المدرسة

ريمـ تشوف الأكل الي ع الطاولة ما لقت الي تبيه:
يدتي أبي كورن فلكـس

أمـ فيصل : لا اكلي شي مفيد

ريمـ نزلت راسها (ريمـ دايمـ تنزل راسها إذا زعلت بدون ما تتكلمـ)

و بهذي اللحظة يدخل فيصل مع اخته فاطمة كانوا يسولفون
فيصل: صباح الخير لأحلى أمـ بالدنيا (و يبوسها على راسها)

أمـ فيصل: صباح النور يا وليدي

فاطمة: صباح الخير يمه

أمـ فيصل : صباح النور و أخيرًا قررتي تتنازلين و تحضرين محاضراتج

فاطمة: يمه الدكتور ما يعرف يشرح ليش أحضر يعني! و أساسًا دراستي حفظ مو فهمـ يعني ما احتاج أحضر المحاضرة

أمـ فيصل: و في دكتور ما يعرف يشرح!

فاطمة: اييي في وااايد دكاترة ما يعرفون يشرحون.. أنا بحضر اليومـ لأنه الدكتور قال راح يبتدي ياخذ الحضور و الغياب بس

فيصل انتبه إنه ريمـ ما تاكل : ريومتي شفيج ما تاكلين حبيبتي؟

ريمـ : أبي كورن فلكـس

فيصل : زين قولي للخدامة تييبه(تجيبه) لج

أمـ فيصل: فصووول لا تدلعها خلها تاكل هذا أحسن لها

فيصل: بس اهي ما تحبه .. خليها على راحتها يمه لا تضغطين عليها

أمـ فيصل: الين متى تخليها على راحتها! اسمع الكلامـ يا فيصل و خلها تاكل هالريوق

فيصل: بس يمه جذي ما راح تاكل ما ابي بنتي تروح المدرسة يوعانة (جوعانة)

أمـ فيصل: انت ما منك فايدة.. و انتي(التفتت على ريمـ) روحي قولي حق ميري تييب (تجيب) لج كوفلوكـس

فاطمة: ههههههههههههههههه يمه اسمه كورن فلكـس

ريمـ راحت المطبخ بسرعة قبل ما تغير يدتها رايها

أمـ فيصل: الي اهو خلها تييب لها السمـ الي تاكله و تخلي الأكل المفيد عشان يرتاح أبوها

فيصل: يا الله صباح خير.. شفيج على ريومـ يمه.. بنتي فاقدة حنان الأمـ .. المفروض تعوضينها عن حنان نورة الله يرحمها مو تقسين عليها

أمـ فيصل(افتحت عينها ع الآخر): أنا قاسية على ريمـ يا فيصل!

فاطمة تحاول تتدارك الموقف: لا يمه فيصل ما يقصد

فيصل: أنا أقصد إنه ريمـ توها صغيرة و ما له داعي أضغط عليها و أجبرها على شي ما تبيه

أمـ فيصل: هذي بنتك و انت حر ..و انتي و خري عن طريجي (تدز فاطمة)

فاطمة: و أنا ش ذنبي يمه تطلعين حرتج من فيصل فيني

فيصل: يمه الله يهداج ش هالكلامـ ريومـ بنتج بعد مو بنتي بروحي

أمـ فيصل: توك تقول إني قاسية عليها!

فيصل: ما كان قصدي .. الله يهداج يا يمه كل هذا بس عشان ريومـ قالت تبي كورن فلكـس؟

أمـ فيصل : لا الموضوع أكبر من جذي و انت عارف هالشي

ريمـ دخلت غرفة الطعامـ مرة ثانية : بابا أنا خلصت

فاطمة تحاول تلطف الجو: ههههههههه شنو هذا ريوومـ طالع لج شارب أبيض ههههههه

ريمـ : كنت أشرب حليب

فيصل: عفية على بنتي الشاطرة .. يا الله حبيبتي روحي غسلي عشان نروح المدرسة

ريمـ : زين

*

نفس اليومـ العصر
أمـ فيصل تسولف مع صديقتها أمـ خالد ع التلفون و فاطمة تتابع مسلسل بيت من ورق و ريمـ قاعدة ع الأرض مندمجة تلون في دفتر تلوينها
و يدخل فجأة سالمـ مع زوجته نوال

سالمـ: السلامـ عليكمـ

فاطمة تقومـ تسلمـ على أخوها و نوال: هلا والله في المعاريس

نوال : هههههه أي معاريس فطومـ الله يهداج صار لنا 3 شهور

ريمـ تركت الألوان الي في يدها و ركضت عند خالها الي شالها و باسها على خدها
سالمـ: هلا بحبيبتي الغالية ريوومـ شلونج ؟

ريمـ:زينة

أمـ فيصل بعد ما سكرت التلفون : هلا سالمـ .. شلونج نوال؟

نوال راحت سلمت على خالتها و سالمـ نزل ريمـ ع الأرض بس مسك ايدها و راح عند أمه و سلمـ عليها
رجعت فاطمة قعدت في مكانها و سالمـ قعد يمـ نوال و ريمـ قعدت يمه

سالمـ: فاطمة قصري على صوت التلفزيون نبي نسولف مع أمي

فاطمة: بس أنا متابعة المسلسل

سالمـ : قومي شوفيه بغرفة ثانية

فاطمة: بسمع سوالفكمـ و أتابعه بنفس الوقت

أمـ فيصل: سجليه و سولفي معانا و بعدين شوفي التسجيل

فاطمة: لا ما لي خلق

أمـ فيصل: بتقومين و إلا شلون!

نوال: وااي فطوومـ إنتي على منو طالعة كـسلانة جذي!

فاطمة: زييييييييين خلاص..بسمـ الله كلكمـ قلبتوا علي! ريومـ قومي سجلي المسلسل و قصري ع الصوت

سالمـ: لا ريومتي ما تقومـ.. المسلسل انتي الي راح تتابعينه قومي سجليه حق نفسج

فاطمة: لا والله! شفيها يعني لما أطلب منها و بعدين ترى ريمـ مو ناقصها دلع يكفيها دلع أبوها

فيصل: شفيه أبوها بعد! لا إله إلا الله 24 ساعة باليومـ طايحين حش فيني

ريمـ متعودة أول ما يرجع أبوها من الشغل تروح له و تقعد معاه .. فأول ما دخل راحت عنده و باسته على خده
سالمـ: ريييييييييييييييمـ هذي جزاتي الي أدافع عنج! أول ما دخل أبوج هديتي ايدي و ركضتي على حضنه!

فيصل: احمـ احمـ .. و ما الحب إلا للحبيب الأولِ

سالمـ : زين نشوف من يدافع عنج يا ريمـ

فيصل : لا يا حبيبي طوول ما أنا عايش بنتي ما تحتاج غيري الله يخليني لها

أمـ فيصل: اي بس ما تقدر تسوي كل شي حق ريمـ .. ريمـ بحاجة لأمـ

فيصل بعصبية: يـــــــــــــــــمـــــــــــــــــــــه

أمـ فيصل: نعمـ؟ قلت شي غلط؟

نوال(تحاول تطلع ريمـ من الصالة): ريومتي عندج دفتر تلوين غير هذا ؟

ريمـ: اي عندي وايد بغرفتي

نوال: زين وريني اياهمـ

ريمـ راحت غرفتها و لحقتها نوال
بعد ما تأكد فيصل إنه ريمـ بعيدة و ما تقدر تسمع كلامهمـ
فيصل: شفيج يمه؟ شلون تكلميني بهالموضوع جدامـ ريمـ؟

أمـ فيصل: يعني تبي تتزوج بدون ما تعرف؟

فيصل : و منو قال إني أبي أتزوج أصلن!

سالمـ: يا جماعة ذكروا الله ما له داعي العصبية تكلموا بهدوء

فيصل(يحاول يهدي نفسه): لا إله إلا الله

فاطمة: ملينا من هالسالفة كل يومـ تعيدون و تزيدون فيها .. انتوا ما تتعبون؟

أمـ فيصل : مو عاجبج لا تقعدين معانا ذلفي غرفتج

فاطمة صعدت غرفتها بدون ما تعلق
سالمـ : يمه يا قلبي يا حبيبتي خلي فيصل على راحته متى ما حب يتزوج راح يقول لج .. انتي الحمد لله عندج عيال غيره إذا على سالفة الأحفاد شوفي عندج ريمـ و فهد و مريمـ و لولوة و إن شاء الله بتشوفين عيالي و عيال فطومـ

أمـ فيصل: السالفة مو سالفة أحفاد الحمد لله كلكمـ فيكمـ البركة.. الله يخليكمـ و يحفظكمـ لي و أشوف عيال عيالكمـ يا رب.. السالفة إني ما أبي أخوك يعيش وحيد

فيصل: عارف قصدج يا يمه بس عندي ريمـ .. ريمـ مالية علي الدنيا كلها و تكفيني

أمـ فيصل: باجر تكبر و تتزوج و تروح بنصيبها و تبقى انت بروحك

فيصل: بنتي مستحيل تستغنى عني راح تزورني دايمـ مع زوجها و عيالها إذا الله كتب لها

أمـ فيصل: و لو.. ما راح تكون زيارتها كل يومـ .. راح تمل من الوحدة

فيصل: أستغفر الله يا ربي.. أنا بروح داري
و صعد غرفته

سالمـ : حرامـ عليج يا يمه فيصل توه راجع من الدوامـ تعبان و تدرين إنه ما يحب يتكلمـ بهذا الموضوع .. ع الأقل جان اخترتي الوقت المناسب

أمـ فيصل: اي حرامـ علي لأني أحبكمـ و أفكر في مصلحتكمـ (راحت غرفتها و هي متضايقة)

سالمـ يكلمـ نفسه: يا ربي.. ش سالفتهمـ الواحد ما يعرف يتكلمـ معاهمـ إلا زعلوا!

الفصل الأول عبارة عن تعريف لكمـ بالشخصيات و أسلوب تعاملهمـ مع بعض
الأحداث تبدي من الجزء الثاني إن شاء الله

[Ms.KuwaiT]

و عليكم السلام و الرحمه (=

من زماااااااااان ما قريت قصص ..

حدي تشوقت قمت أتخيل المشهد جدامي جنه مسلسل (؛

حلووة فكرة الكوااليس عجيبة .. ناطره متى تخلصين و نشوف شنو حذفتي بالمونتاج ^^

كتابتج سهلة و مفهومه و ما شاء الله مافي أغلاط .. <=

عندي سؤال .. سالم خال ريم و لا عمها ..؟ >> بدت بالفضايح p;

بانتظار التكمــلــه ..

[أنهار العز]

أنا متأكدة إنها قصة جنااااان..

راح أنسخها عندي وأقرأها بتأني وأعووود..


ومشكووورة يا قمر..


×

أنهآآآآآر

[Miss smile]

بـانتظارك يا الغاليه ..

و بانتظار تكملتك للروايهـ

،’,

[LOVECITY]

ماشاء الله تبارك الله



رائعه ياغاليه



أولا اهلا بتواجدك بالفسم


وثانياه قصتك رائعه بصدق


شخصيات جميله وسهله


اسلوب سلسل


وشيق


والقاصة المبدعه


هي التي تجعل من قصتها طابع التشويق


وتجعل القراء تدور في اذهانهم


ماذا سيحدث مجددا



رائعه بصدق


في انتظار البقية


لاحرمنا الله تواجدك الإبداع بيننا


ودمتي بحب
مدينة الحب

[sweety girll]

هذه القصة شكلها بتكون حلوه وحماسيه ههههههههه
ريم لما بتكبر بتكون مغروره ومتكبره لانها واجد مدلعه
ننتظر التكمله
مشكوره:031:

[sweety girll]

هذه القصة شكلها بتكون حلوه وحماسيه ههههههههه
ريم لما بتكبر بتكون مغروره ومتكبره لانها واجد مدلعه
ننتظر التكمله.....
مشكوره:031:

[phloe fan]

و عليكم السلام و الرحمه (=

من زماااااااااان ما قريت قصص ..

حدي تشوقت قمت أتخيل المشهد جدامي جنه مسلسل (؛

حلووة فكرة الكوااليس عجيبة .. ناطره متى تخلصين و نشوف شنو حذفتي بالمونتاج ^^

كتابتج سهلة و مفهومه و ما شاء الله مافي أغلاط .. <=

عندي سؤال .. سالم خال ريم و لا عمها ..؟ >> بدت بالفضايح p;

بانتظار التكمــلــه ..

ههههههههههههه

اي صح معليش غلطة مطبعية سالمـ عمها

تدرين إني منزله القصة بأكثر من منتدى و محد لاحظ هالغلطة غيرج ما شاء الله عليج .22.

الحمد لله إنه الجزء الأول عجبج و إن شاء الله تعجبج لحد النهاية

[phloe fan]

أنا متأكدة إنها قصة جنااااان..

راح أنسخها عندي وأقرأها بتأني وأعووود..


ومشكووورة يا قمر..


×

أنهآآآآآر

العفو حبيبتي الشكر لج ع الرد الحلو

و بانتظار رايج فيها بعد ما تقرينها :)

[phloe fan]

بـانتظارك يا الغاليه ..

و بانتظار تكملتك للروايهـ

،’,

و هذي التكملة لعيونج يا الغالية :)

[phloe fan]

ماشاء الله تبارك الله



رائعه ياغاليه



أولا اهلا بتواجدك بالفسم


وثانياه قصتك رائعه بصدق


شخصيات جميله وسهله


اسلوب سلسل


وشيق


والقاصة المبدعه


هي التي تجعل من قصتها طابع التشويق


وتجعل القراء تدور في اذهانهم


ماذا سيحدث مجددا



رائعه بصدق


في انتظار البقية


لاحرمنا الله تواجدك الإبداع بيننا


ودمتي بحب
مدينة الحب

الرائع تشجيعج حبيبتي

شاكرة لج مرورج و ردج

[phloe fan]

هذه القصة شكلها بتكون حلوه وحماسيه ههههههههه
ريم لما بتكبر بتكون مغروره ومتكبره لانها واجد مدلعه
ننتظر التكمله
مشكوره:031:

ههههههههههه

بنشوف ش راح يصير =)

الشكر لج ع الطلة الحلوة حبيبتي

[phloe fan]

:.: الجزء الثاني:.:

كانوا عيال أمـ فيصل يجتمعون عندها في بيتها كل يومـ خميس
الكبار يقعدون بالصالة و يسولفون
و الصغار ينتقلون من غرفة لغرفة يلعبون

ريمـ و مريمـ و لولوة كانوا قاعدين بغرفة ريمـ
الثلاث بنات قاعدين ع الأرض و مندمجين بالتلوين في دفاتر التلوين الي معاهمـ و كانت الألوان يمهمـ على الأرض
دخل فهد و قال:
الطلبات وصلت

ركضوا مريمـ و لولوة عنده بس ريمـ قعدت تطالعهمـ من مكانها بدون ما تتحرك

مريمـ رجعت مع بطاط و بيبسي و قعدت يمـ ريمـ
و لولوة كان معاها بطاطين و بيبسي

فهد: لولوة البطاطين لج؟

لولوة:اي

فهد لف على ريمـ: ريمـ ليش ما طلبتي شي؟

ريمـ بصوت واطي: محد قال لي إنك بتروح الجمعية

فهد بعصبية : لووولوة أنا مو قايل لج شوفي طلبات مريمـ و ريمـ

لولوة (فتحت البطاط) : نسيت أسأل ريمـ

فهد: ريمـ اخذي بطاطي و البيبسي

ريمـ ابتسمت و خذتهمـ .. ريمـ تستانس على فهد لأنه دايمـ يدافع عنها و يدير باله عليها

*

بعد فترة من اللعب مريمـ عطشت و راحت المطبخ تشرب ماي و اهي راجعة شافت عمها سالمـ

سالمـ: مريومة الحلوة تعالي عطي عمي بوسة(شالها)

مريمـ لفت ويها الجهة الثانية و قامت تحاول تطلع نفسها من ايده و قالت: ماااا أبيييييي

سالمـ نزلها: مالت عليج يحصل لج أصلن تبوسيني مع الويه

مريمـ دخلت غرفة ريمـ و خلت الباب مفتوح وراها

فاطمة: هههههههههههههههههه حاط عقلك بعقل هالياهل

سالمـ: بسمـ الله الرحمن الرحيمـ .. انتي من وين طلعتي

فاطمة: من الصالة

سالمـ: اووه شوفي (يأشر على غرفة ريمـ)

شافوا ريمـ توكل فهد بطاط بيدها و اهو يبتسمـ لها

فاطمة: فديتهمـ يونسون شكلهمـ روعة مع بعض

سالمـ: فديت ريومتي طالعة علي كلها رومانسية

فاطمة: نعمـ نعمـ؟ ش قلت؟ ريومـ طالعة عليك بالرومانسية؟ انت وين و الرومانسية وين!

سالمـ: كح كح الرومانسية مع زوجتي

فاطمة:هههههههه أشك بصراحة

سالمـ: كيفج لا تصدقين

أمـ فيصل: فطوووومـ

فاطمة: نعمـ يمه

أمـ فيصل : تعالي أبيج شوي

فاطمة : إن شاء الله.. سلومـ وخر عن اليهال لا تخرعهمـ خلهمـ يلعبون براحتهمـ

سالمـ : أصغر عيالج سلومـ مع هالويه! و بعدين شنو شايفتني وحش عشان أخرعهمـ ! ذلفي شوفي أمي شتبي فيج بروح ألعب مع ريومتي

فاطمة: ههههههههه الله يعينهمـ عليك


*

فاطمة: ش السالفة يمه؟

أمـ فيصل: في ناس يبونج

فاطمة: بس يمه أنـ..

أمـ فيصل تقاطعها: أووص و لا كلمة لا تقاطعيني.. الي كبرج تزوجوا و صار عندهمـ عيال

فاطمة: ما علي من غيري

أمـ فيصل: مو كل يومـ يتقدمون للبنت و إذا صار عمرها 25 تقل فرصها

فاطمة: زين و أنا عمري 19

أمـ فيصل: ما تظمنين يتقدمـ لج واحد أحسن من عبد العزيز

نبضات قلب فاطمة زادت: عـ.. عبد العزيز؟

أمـ فيصل: اي ولد ييرانا (جيرانا).. كلمتني أمه أمس و أخوج عادل يعرف عبد العزيز عدل و يقول عنه خوش واحد

فاطمة ساكتة

أمـ فيصل: لا تتسرعين بالرفض فاطمة.. فكري عدل بالموضوع و عطيني رايج بعدين.. بقول لهمـ إنج تبين وقت عشان تفكرين بالموضوع

طلعت أمـ فيصل و سكرت الباب وراها

فاطمة بصوت حالمـ: عبد العزيز.. يعني يفكر فيني مثل ما أفكر فيه

*

(بعد أسبوعين)

فيصل كان سرحان و يفكر في موضوع زواج فاطمة
فاطمة كانت تهتمـ في ريمـ وايد بس ألحين اهي انخطبت و راح تتزوج و تترك البيت و ريمـ..
بدا يفكر بكلامـ أمه بسالفة زواجه عشان خاطر ريمـ
صحى فيصل من أفكاره على صوت فاطمة

فاطمة صرخت: فيصل سيااااااارة
ارتبك فيصل الي ما كان مركز و لف السيارة بقوة بس فقد السيطرة عليها و طاحت السيارة من الجسر الي كانوا يمشون عليه
حست فاطمة إنه راسها بينفجر و فتحت عينها بصعوبة شافت إنه سقف السيارة منخفس و القزاز مكسر جهة فيصل

فاطمة بخوف: فيصل؟ رد علي فيييصل(مدت ايدها و قامت تهزه)

تكلمـ فيصل بس كان صوته واطي و ما سمعته بس ارتاحت إنه تحرك
فتحت الباب الي في جهتها و راحت جهة باب فيصل و انصدمت من شكل فيصل
كان القزاز على ويهه الي مليان دمـ و ملامحه ما تبين
حاولت تفتح بابه بس ما قدرت

فاطمة و اهي تبجي: فيييصل

فيصل قال بصوت واطي بالغصب ينسمع: ريـ ..رييمـ

فاطمة: اشش لا تتكلمـ.. ألحين بتصل في سالمـ و أخليه ياخذنا

طلعت فاطمة موبايلها و اتصلت على سالمـ و اهي ناطرة رد سالمـ حست بفيصل يتكلمـ التفت عليه

فيصل يتكلمـ بصعوبة : فاط.. فاطمة.. ديري بالج على ريمـ

فاطمة: فيصل ارتاح ..ريمـ بعيوني لا تتعب نفسك ألحين نوديك المستشفى و نتطمن عليك

فيصل حرك شفاته و قال بصوت ما ينسمع: لا.إله إلا الله

أول ما حست فاطمة إنه سالمـ رد عليها: ساالمـ إلحق علي

سالمـ: بسمـ الله الرحمن الرحيمـ .. شفيج؟

فاطمة و اهي تبجي: فيصل.. (لاحظت إنه فيصل ما قامـ يتحرك) فيييييصل؟ (طاح الموبايل من ايدها) فيييصل الله يخليك رد علي .. فيصل قومـ يا أخوي (قامت تهزه بقوة)

تجمعوا على سيارة فيصل وايد ناس و الطريج وقف

نزل من سيارته واحد مع اخته انكسر خاطرهمـ على فاطمة

راحت البنت عند فاطمة تحاول تهديها و اهو أخذ الموبايل الي كان طايح ع الأرض

سمع سالمـ: فااااطمة؟ فاطمة وينج؟

...: ألو

سالمـ باستغراب: منو انت؟

...: لا تخاف أخوي الاسعاف بالطريج

سالمـ : أي اسعاف؟ ش السالفة؟

...: البنت الي كنت تكلمها مع الي معاها سووا حادث

سالمـ: وينهمـ ألحين؟

...: تعال مستشفى هادي و تطمن عليهمـ

سالمـ: خلاص صار

*

سالمـ وصل المستشفى بسرعة جنونية و دخل المستشفى و اهو يتلفت يمين و يسار
طلع موبايله و اتصل على فاطمة .. سمع رنة موبايلها و التفت يدور المصدر شاف موبايلها بايد واحد و قرب منه

سالمـ: انت الي كلمتني و قلت إنه اخواني مسوين حادث صح؟

...: اي انا

سالمـ: وينهمـ ألحين؟

..: البنت بهذي الغرفة(أشر على غرفة)

سالمـ بخوف: و الولد؟

...: ما أدري ش أقول لك(طالع الأرض)

*

فاطمة سمعت صوت سالمـ و طلعت من الغرفة
التفت عليها سالمـ و شاف الدموع مالية عينها و كان في يبهتها(جبهتها ) 3 غرز

سالمـ شهق: فاطمة

فاطمة: تأخرت.. خلاص فيصل راح(و قامت تبجي بقوة)

نهاية الجزء الثاني و التكملة في الجزء الي بعده

[رَنْــد]

[ماشآء الله القصه مرره حلوه .,
يلا عاد ننتظر التكمله .,
بس انا استغربت يعني لما فيصل و فاطمه سوو الحادث
ليش فاطمه ماطلبت مساعدة الناس الي حوليها يعني بيكون اسرع ولا تتصل بالاسعاف
بدل اخوها سالم الي بيتأخر عليها .,
.,
على كلٍ أنا استمتعت بالقصه الرائعه .,
.,
لا تتأخري علينا]

[الجوهرة الزرقاء]

عزيزتي اسلوب شيق .... ومواقف مضحكة واخرى حزينة
والله انا حزينة على ريم
والله تأثر قلبي
عزيزتي رنودة .... عندما يتعرض الانسان لموقف ما فان الادرينالين يتدفق بقوة من الدماغ
فلا يعرف الانسان ماذا يفعل .... فيفعل مايراه ولا يفكر بشئ

[phloe fan]

[ماشآء الله القصه مرره حلوه .,
يلا عاد ننتظر التكمله .,
بس انا استغربت يعني لما فيصل و فاطمه سوو الحادث
ليش فاطمه ماطلبت مساعدة الناس الي حوليها يعني بيكون اسرع ولا تتصل بالاسعاف
بدل اخوها سالم الي بيتأخر عليها .,
.,
على كلٍ أنا استمتعت بالقصه الرائعه .,
.,
لا تتأخري علينا]

الأحلى ردج حبيبتي

يسعدني إنه القصة عجبتج و إن شاء الله تعجبج إلى النهاية

بالنسبة لسؤالج على موقف فاطمة فـ اهي كانت في حالة صدمة و مثل ما قالت جوهرتنا مو قادرة تفكر صح و خايفة و لما الواحد يكون خايف يبي يكلمـ أحد يعرفه و يطلب مساعدته

و ألحين إن شاء الله بنزل الجزء الثالث و بنشوف تأثير الموقف على ريمـ

[phloe fan]

عزيزتي اسلوب شيق .... ومواقف مضحكة واخرى حزينة
والله انا حزينة على ريم
والله تأثر قلبي
عزيزتي رنودة .... عندما يتعرض الانسان لموقف ما فان الادرينالين يتدفق بقوة من الدماغ
فلا يعرف الانسان ماذا يفعل .... فيفعل مايراه ولا يفكر بشئ

هلا والله مميزتنا :)

يسعدني إنه أسلوبي في سرد الأحداث عجبج


مثل ما تفضلتي القصة فيها مواقف مضحكة و مواقف حزينة.. لأني حاولت أخليها قريبة من الواقع

و معليش الجزء هذا بعد راح يكون حزين استحملوني شوي ^_^!

[phloe fan]

الأحداث راح تمشي بسرعة في هالجزء الي يعتبر تمهيد للي راح يصير في الأجزاء الياية =)

الـــجــــزء الــثـــالـــث

طلعت ريمـ من غرفتها في بجامتها مع إنها متعودة تلبس لبس المدرسة قبل ما تنزل تاكل ريوقها بس لأنها ما شافت أبوها أمس قبل ما تنامـ ما قدرت
كانت تبي تروح تشوفه و تلمه (تحضنه) قبل ما تتجهز للمدرسة

و اهي ماشية في الممر سمعت أصوات في الصالة نزلت الدري (الدرج) بس ما نزلته كامل وصلت نص الدري (الدرج) و وقفت مكانها
وقفت تشوف المنظر الي جدامها

يدتها (جدتها) تبجي (تبكي) و نوال زوجة عمها سالمـ و ليلى زوجة عمها عادل قاعدين يمها يحاولون يهدونها

عمها عادل قال و الحزن بصوته:
ذكري الله يا يمه هذا يومه

سالمـ أول واحد لاحظ وجود ريمـ و نظرة الحزن الي في عيونه زادت

ريمـ سألت ببراءة:
وين بابا ؟

أمـ فيصل قامت تبجي بقوة و ريمـ خافت

سالمـ : ريمـ حبيبتي تعالي

بس ريمـ ما سمعت كلامه و رجعت صعدت خطوات الدري (الدرج) الي نزلتهمـ و راحت بسرعة غرفة أبوها
لما فتحت الباب شافت إنه سرير أبوها مرتب كأنه ما نامـ عليه أمس

قالت بصوت يرجف: بابا.. بابا وينك ؟

دخلت الغرفة أكثر و قامت تلتفت يمين و يسار على أمل إنها تشوفه
سمعت خطوات أحد يقرب منها من وراها
التفتت بلهفة تحسبه أبوها
بس تفاجأت لما شافت عمها سالمـ
ما كانت متعودة تشوف عمها في هالحال
نزل على ركبته و فتح لها ايده و شافت الدموع بعيونه
ركضت ريمـ عنده و لمته (حضنته) و اهي تبجي معاه بدون ما تعرف ش السالفة
كل الي تعرفه إنه كل الي في البيت زعلانين
و اهي تبي ابوها

*

أبوي راح عند أمي .. راح معاها و خلاني .. ليش ؟ اهو زعلان مني ؟ ليش ما يبيني ؟ أنا أبيه أحب أبوي أبييييييييييه ليش يخليني ويروح عني

*

(بعد 3 شهور)

أمـ فيصل: عبد العزيز شاريج و متمسك فيج لحد ألحين فاطمة

فاطمة: و أنا قلت لكمـ ما أبي أتزوج.. خل يشوف له وحدة غيري

أمـ فيصل: انتي حسبالج بس انتي الي زعلانة على فيصل! ترى الي مات ولدي

فاطمة دمعت عينها: الله يرحمه.. كانت آخر كلمة على لسانه ريمـ.. فيصل وصاني على ريمـ قبل ما يموت .. قال لي ديري بالج عليها

أمـ فيصل: و أنا وين رحت! بحط ريمـ بعيوني و بعدين تقدرين تديرين بالج عليها حتى و انتي متزوجة.. هذا سالمـ ما غير معاملته لريمـ حتى بعد زواجه

فاطمة: إي لأنه توه متزوج و بعده ما صار عنده عيال حتى لو إنه سالمـ يموت في ريمـ باجر إذا صار عنده عيال راح يهتمـ في عياله أكثر من ريمـ

أمـ فيصل: محد راح يقصر مع ريمـ .. ريمـ بنتنا كلنا.. حرامـ عليج تسوين في نفسج جذي فاطمة ترى العمر يركض و باجر تلقين نفسج بروحج

فاطمة: يمه الله يخليج لا تعيدين علي الكلامـ الي كنتي تقولينه لفيصل الله يرحمه

أمـ فيصل: عيل لا تسوين مثله.. اهو كان يرفض الزواج عشان ريمـ و ألحين انتي بعد رافضة الزواج عشانها.. ترى ريمـ بنتي أنا بعد و بحطها بعيوني

فاطمة: ما أبي أتزوج ألحين

أمـ فيصل: و تتوقعين إنه عبد العزيز راح ينطرج طول العمر؟

فاطمة: الله يوفقه مع أي وحدة يختارها

أمـ فيصل: إذا ما تبين تتزوجين ألحين متى راح تتزوجين؟ العمر الي انتي فيه أحلى عمر للزواج

فاطمة: يمه الله يخليج خليني على راحتي

أمـ فيصل: الين متى أخليج على راحتج! العمر يركض يا فاطمة.. وكلامـ الناس ما يرحمـ

فاطمة: و ليش ما قلتي جذي من البداية! انتي الي هامج كلامـ الناس.. ما تبين الناس يقولون عني عانس.. نظرة المجتمع للبنت متخلفة البنت إذا صار عمرها 25 و ما تزوجت قالوا عنها عانس و الريال إذا صار عمره 60 و ما تزوج ما يقولون عنه شي!

أمـ فيصل: هذي نظرة الناس و ما نقدر نغيرها

(و بعد محاولات أمـ فيصل و ضغطها على فاطمة تزوجت عبد العزيز و طلعت من البيت.. و أصر سالمـ إنه أمـ فيصل و ريمـ يسكنون عنده و بعد مرور فترة صار لسالمـ ولد و سماه يوسف.. بس ما أهمل ريمـ و حتى نوال تحب ريمـ و تهتمـ فيها)

*

و بعد مرور 6 سنين توفت أمـ فيصل
مثل ما قلت في بداية القصة ريمـ ما تحب تبين مشاعرها لأحد غير أبوها و بعد وفاته بجمـ سنة قامت تكتب مشاعرها و أي شي يخطر في بالها في دفتر(دفتر يومياتها أو أسرارها)
و هذا الي كتبتها بعد وفاة يدتها:

أول شي أمي الي كل الي بقى لي منها صور تجمعني فيها

و بعدين أبوي.. أبوي مشتاقة له واايد..فراق أمي كان أسهل من فراق أبوي ما عندي ذكريات وايدة معاها بس أبوي.. أتذكر طيبته و حنانه.. صعب أتعود على فراقه.. مرات أحس نفسي في كابوس و راح أقومـ منه بأي لحظة و ألقى نفسي بحضنه.. يا ريته كان كابوس

عمتي تقول إنه آخر شي كان على لسانه الله يرحمه اسمي.. حتى و اهو يموت كان يفكر فيني

بعد ما تعلقت بعمتي فاطمة خلتني و تزوجت

و ألحين يدتي بعد راحت

بما إنه كل علاقة تنتهي بالفراق ليش نحب ؟ ليش نتعلق بناس راح نخسرهمـ أو يخسرونا بالآخر؟

ليش نحب إذا كانت نهاية حبنا الفراق؟ ليش نحب إذا كان الحب يقطع قلوبنا؟

أبي أكمل حياتي لا أحب و لا أحاتي
دامـ هذي المحبة ما أبي أحب إلا ذاتي

http://www.9ll9.com/up/uploads/501b2576e6.jpg

تتوقعون راح تقدر ريمـ تنفذ قرارها مع كل الي راح يدخلون حياتها؟

و تتوقعون راح يقدر أحد يغير نظرتها للحياة بشكل عامـ و للحب بشكل خاص؟

[Ms.KuwaiT]

ما زلت متااابعه ..

عورتي قلبي ليش جذي من أولها ..

حدي ما هقيته بيموت .. =(

[وردة الرحمن]

a5eeeeeeeeeeeeh

el.8e9a 7adha 3awar galb

rayo0oma 7adha kserat 5a6re ;-/

maskeena fgdat waaaaaaaaaayd nas

maskeena alla y3enha w y9aberha

.......

mashko0ora 3ala hal 8e9a

niiiiiice 7adhaaaaaaaaaaaaaa

mashalla 3aleech eslobch 7ada 7lo

alla ywafgech bhal mawheeba

.....

b2ent'6ar el.takmela

la t6awlen 3leena ;p

[phloe fan]

ما زلت متااابعه ..

عورتي قلبي ليش جذي من أولها ..

حدي ما هقيته بيموت .. =(

ولكمووو صديقتي الغالية =)

سلامة قلبج =(

الجزء الرابع ما فيه عوار قلب =)

فديت هالطلة لا تحرميني من ردودج الحلوة

[phloe fan]

a5eeeeeeeeeeeeh

el.8e9a 7adha 3awar galb

rayo0oma 7adha kserat 5a6re ;-/

maskeena fgdat waaaaaaaaaayd nas

maskeena alla y3enha w y9aberha

.......

mashko0ora 3ala hal 8e9a

niiiiiice 7adhaaaaaaaaaaaaaa

mashalla 3aleech eslobch 7ada 7lo

alla ywafgech bhal mawheeba

.....

b2ent'6ar el.takmela

la t6awlen 3leena ;p

هلا وردة الرحمن

عيونج الحلوة يا قلبي

يسعدني إنه أسلوبي و قصتي عجبوج =)

و هذي التكملة وصلت :)

[phloe fan]

الرومانسية تبدي من هذا الجزء =)

بس بغيت أقول لكمـ لما تشوفون علامة النجمة هذي* في نهاية أي جملة معناتها الجملة هذي مو من تأليفي إما إنها كلمات من أغنية أو جملة ماخذتها من موضوع المهمـ إنها مو من تأليفي ^_^!

أغلب شي راح تشوفون هالنوع من الجمل في بداية الجزء

تقدرون تعتبرونها مقدمة للجزء يعني عشان تتوقعون شنو الأحداث الي بتصير بالجزء =)

سوري طولت عليكمـ ^_^!


الـــجـــزء الـــرابـــع

نظرة و صابك سهمها ..صاير يهمك أمرها.. لا تكون يا قلبي هويت*


(بعد مرور سنين)

شي فيها يجذبه يمكن جمالها الهادي و حيائها.. شي فيها يميزها عن باجي البنات
لما تمر من جدامه يضيع كل الكلامـ ينسى كل شي تلاحقها عيونه الين تدخل قاعة محاضرتها
و ينتظرها الين تخلص محاضرتها بس عشان يشوفها

في يومـ من الأيامـ كان مواعد وحدة من البنات الي يلعب عليهمـ و اسمها شيماء عشان يعطيها هدية (بين فترة و فترة كان يقدمـ لها هدايا)

خالد: وينج الحين حبي ؟

شيماء: أنا وصلت انت الي وينك؟

خالد: ثواني و أكون عندج

شيماء: المهمـ راح تشوف سيارة فيها ثلاث فاتنات أنا الي قاعدة جدامـ

خالد: بنظري ما في غير فاتنة وحدة بكل هالكون.. اوكي شفتج ..شيمااااااء شفتج خلاص دخلي ايدج

شيماء: ههههههههه اوكي (كانت مطلعة ايدها من دريشة السيارة تأشر له عشان يشوفها)

خالد نزل من سيارته و قرب من السيارة الي فيها البنات
وحدة بالمقعد الخلفي لفتت نظره نفس البنت الي معاه بالكلية و داخله مزاجه
خالد نسى نفسه و تمـ ساكت يطالعها
قطعت شيماء أفكاره : خااالد وين هديتي

خالد: هاه.. اي تفضلي

خالد: شلونكمـ بنات ؟

البنت الي قاعدة ورى ما ردت و عيونها على ايدها الي بحضنها ما رفعتها
بس الي قاعدة يمـ شيماء (هدى) ردت : الحمد لله بخير انت شلونك؟

خالد : الحمد لله تمامـ

شيماء لاحظت نظرات خالد لمريمـ و عصبت: خالد شنو قاعد تطالع ورى أنا هني !

خالد التفت عليها : شلون الدراسة (رجع التفت ورى) بنات؟

شيماء (باختصار) : زينة .. ما وراك محاضرات؟

خالد: عادي ما بحضرها

شيماء: زين هدى و مريمـ عندهمـ محاضرة و يبون يحضرونها

خالد بينه و بين نفسه "أكيد اسمها مريمـ لأني أعرف هدى من قبل شفتها مع شيماء"
شيماء تكلمت مرة ثانية لما شافت خالد سرح في مريمـ مرة ثانية: يا الله خالد احنا بنمشي باي

خالد: تو الناس بعدني ما شبعت منج

شيماء: قلت لك هدى و مريمـ عندهمـ محاضرة باي

خالد التفت على مريمـ الي الين الحين ما رفعت عينها : باي

رجع سيارته و هو يفكر في مريمـ "ع الأقل عرفت اسمها .. مريمـ .. اسمها حلو" و ابتسمـ
اتصل في شيماء: ألوو هلا شيماء

شيماء: مداك تشتاق لي!

خالد: اي اشتاق لج كل لحظة حبيبتي

شيماء: حلوو .. زين متى نطلع مع بعض؟

خالد: في الوقت الي تبينه و للمكان الي تبينه .. جمـ شيماء عندي!
أقول حبيبتي انتي دايمـ تسولفين لي عن صديقاتج بس البنت الي كانت قاعدة ورى عمرج ما كلمتيني عنها .. ليش؟

شيماء: اي اهي مو صديقتي حيل.. اهي صديقة هدى و بعدين اهي هادية وايد

خالد: أهاا.. بس يحليلها شكلها تستحي وايد طول الوقت منزلة راسها

شيماء متضايقة من الموضوع و تبي تسكره: اي اهي جذي .. المهمـ أنا مستعيلة الحين أكلمك بعدين باي
و سكرته بدون ما تعطيه مجال يقول لها باي

شيماء التفتت على مريمـ الي قاعدة ورى و قالت لها : خالد يسأل عنج يقول انج تستحين وايد
مريمـ استغربت من كلامـ شيماء و صار ويها احمر و ما علقت

هدى بضحك : يمكن حب مريمـ .. ما سمعتي بالحب من أول نظرة هههههههه

مريمـ لاحظت غيرة شيماء بس قالت بابتسامة: ما عليج من هدى تبي ترفع ضغطج..شكلكمـ تحبون بعض وايد الله يوفقكمـ مع بعضك

*

(في مختبر بكلية العلومـ)

معيد المختبر بعد ما خلص شرح التجربة: أوكي أبيكمـ تقسمون نفسكمـ على 5 قروبات كل قروب فيه 4 طلاب

محمد سحب رفيجه عبد الله الي كانت على راسه علامة استفهامـ و وقف عند بنتين: هاي بنات

لفت عليه فجر: هلا محمد

محمد: ممكن ندخل قروبكمـ؟

فجر: إي انا و ريمـ بروحنا

ريمـ وقفت و قالت: بروح أيب الأدوات

فجر: و أنا بروح أيب الديتول عشان ننظف الطاولة قبل ما نشتغل

محمد: على شنو شايفة نفسها هذي الي اسمها ريمـ !

عبد الله: يمكن لأنها حلوة؟

محمد: مو وايد حلوة

عبد الله عطا محمد نظرة و محمد قال: أوكي وايد حلوة بس في أحلى منها.. تقهر مغرورة

عبد الله : زين اسكت يت (جت) لا تسمعنا

ريمـ باردة في التعامل مع الكل و تحاول تكون علاقتها رسمية مع الكل و صديقتها الوحيدة اهي بنت عمها مريمـ
عشان جذي أي أحد يشوفها يقول عنها مغرورة

*

لولوة مع صديقتها منى دخلوا كفتريا الكلية و بعد ما لقوا طاولة فاضية و قعدوا

لولوة: إيييي صح ما قلت لج

منى: شنو؟

لولوة: تذكرين الي صار له أسبوع يلحقني من مكان لمكان بس كنا مستغربين منه لأنه ما حاول يكلمني؟

منى: إي أتذكره شفيه؟

لولوة: تصدقين إنه خطبني؟ أمس أمي قالت لي إنه كلمـ أبوي

منى: ياحليله طلع محترمـ و احنا ظلمناه

لولوة: بس رفضته

منى باستغراب: ليش؟

لولوة: ليش ما كلمني؟ ليش يكلمـ أبوي أول

منى: يكلمج شيقول لج؟ يقول لج أبي أخطبج؟ كل الشباب يقولون جذي هالأيامـ أكيد كان خايف إنج ما تصدقينه و عشان جذي كلمـ أبوج

لولوة: لا ما أبي جذي.. أبي أتزوج واحد أعرفه

منى: ما راح تتزوجينه باجر راح تعرفينه قبل ما تتزوجون!

لولوة: ما علينا هالكلامـ مو مهمـ ألحين لأني مثل ما قلت لج رفضته.. تدرين إنه أخو الدكتورة نداء توفى أمس؟ مسكينة شكلها يقطع القلب

منى: لا حول و لا قوة إلا بالله.. بصراحة توني أدري .. ش صار؟


*

(بعد المختبر)

عبد الله بعصبية: محمد مللتني من كثر ما تذمـ في ريمـ

محمد: ش أسوي قاهرتني مليقة و مغرورة

ناصر: يقول لك (برنيس) يا عبد الله :
"إذا شكا لك شاب من قسوة امرأة, فاعلمـ أن قلبه بين يديها"

طلعت عين محمد

عبد الله : هههههههههههههههه قــــــــــويــــــــــة ناصر ههههههههههههههه

ناصر: هذا الصج ما تشوفه ما عنده سالفة غير ريمـ ..من الكورس الي فات و اهو يتكلمـ عنها

محمد: جب و لا حرف هذا الي ناقص.. و بعدين يا حبيبي أنا إذا قررت أحب ما راح أحب بنت مغرورة

ناصر: بكيفك اهو؟ الحب مو بيت أو سيارة أو شي مادي تقدر تختار مواصفاته.. لو كل واحد يقدر يختار الشخص الي يحبه ما كان تعب أو تعذب أحد

محمد: تكلمـ حكيمـ زمانه ..خلاص سكروا الموضوع


*

سالمـ: ريومتي بغيتج في موضوع

ريمـ: تفضل عمي

سالمـ: مثل ما انتي عارفة من صغرج و احنا نقول إنج لفهد و فهد لج

ريمـ عرفت الموضوع و نزلت راسها بخجل

كمل سالمـ كلامه: بصراحة يا ريمـ فهد طلب ايدج مني.. بس أبيج تحطين في بالج إنج مو مجبورة توافقين عليه.. إذا ما تبينه عادي حبيبتي هذي حياتج و انتي الي المفروض تختارين الشخص الي يشاركج حياتج

ريمـ ما ردت

سالمـ: اخذي راحتج بالتفكير و لا تستعيلين(تستعجلين) متى ما قررتي شنو راح يكون ردج قولي لي أو إذا تستحين مني كلمي عمتج نوال و اهي توصل لي ردج

*

تتوقعون ريمـ راح توافق على فهد؟

و منو محمد؟ وتتوقعون ورى ضيقته من تصرفات ريمـ في اعجاب أو مثل ما قال ناصر "حب"؟

و من وجهة نظركمـ خالد يحب مريمـ أو يعتبرها بنت ثانية يبي يتسلى معاها؟ و شنو راح تكون ردة فعل مريمـ بعد ما تعرف إنها في باله من مدة؟

و لولوة هل تفكيرها راح يأثر على تصرفاتها

[$ تـرانيـم $]

شكلها حلوة ماشاء الله


تسلمين ننتظر ابداعاتك

[phloe fan]

الله يسلمج حبيبتي

الأحلى ردج

[phloe fan]

الـــجــزء الــخـــامـــس


قاصد يعاندني أو ما فهمـ قصدي.. و إلا يبي يتجاهل وصلني لحدي
عناده ما فاده غير الجفا و البعاد.. هويته يا ريته يخف هذا العناد*

محمد كان يمشي في ممر الجامعة لما شاف ريمـ طالعة من الكافتيريا و ماشية في مكان عادةً ما يمشون فيه الطلاب فاستغرب و مشى وراها بس بدون ما تحس فيه
فتحت ريمـ الكيس الي معاها و طلعت الأكل منه و حطته على الأرض زاد استغراب محمد

طلعت قطوة صغيرة و قربت من ريمـ الي مسحت على راس القطوة و قالت: سوري تأخرت عليج
القطوة قامت تاكل و ريمـ وقفت: يا الله أشوفج بعدين عندي محاضرة ألحين

و دخلت ريمـ مبنى المحاضرات
بعد ما تأكد إنه ريمـ راحت قرب محمد من القطوة الي انحاشات أول ما شافته
محمد: خلاص بروح تعالي.. شوفي رحت (و رجع يمشي جهة الكفتيريا بس تفكيره كان مع ريمـ)

*

لولوة تتصل على رفيجتها منى

لولوة:هاي

منى: هايات شلونج؟

لولوة: لاعية جبدي

منى: من شنو؟

لولوة: أمي ما عندها غير سالفة الزواج.. فلانة تبيج حق ولدها و علانة شافتج ما أدري وين و تبيج حق أخوها ..اووف مليت

منى: إي صح الزواج مسؤولية و احنا تونا صغار مالنا خلق نتحمل مسؤولية نفسنا شلون نتحمل مسؤولية عايلة كاملة

لولوة: لا السالفة مو جذي.. الله يسلمج أنا قررت

منى: يا كثر ما تقررين .. شنو قرارج هالمرة؟

لولوة: ما راح أتزوج زواج تقليدي

منى: ما فهمت

لولوة: أفهمج.. أبي أتزوج بعد ما أعيش قصة حب

منى: هههههههههههههههههههههههههههههههههههههههههههههههههه

لولوة بعصبية: ليش تضحكين قايلة نكتة أنا!

منى: لا بس عجبتني "قصة حب" خخخخخخخخ

لولوة: أوكي ضحكي باجر تتزوجين واحد ما تعرفينه و لا يعرفج و أنا أتزوج واحد أحبه و يموت فيني و انا الي أضحك عليج

منى: هيييه انتي تتكلمين جد؟

لولوة: إي جد

منى: أولاً بالنسبة لي ما راح أتزوج واحد ما أعرفه..أول شي أبي واحد يخاف الله عشان يخاف الله فيني و بعدين راح أقعد معاه و أشوف طريقة تفكيره و يهمني أعرف علاقته بأمه لأنه مثل ما انتي عارفة الي ما فيه خير لأهله ما فيه خير للناس و راح أدرس أخلاقه عدل قبل ما أوافق عليه هذا زواج مو لعبة

لولوة: انتي من صجج؟ هذي صفات فارس أحلامج؟

منى: يب

لولوة: صج إنج مو ويه حب

منى: أقول لولوة شكلج نسيتي انتي وين.. ترى احنا مجتمع خليجي.. ما تقولين لي شلون بتعيشين قصة حب؟ و وين بتلقين فارس أحلامج؟ يعني راح ترضين على نفسج إنج تاخذين أرقامـ شباب؟

لولوة: اممممممـ مو من أي واحد

منى: انتي أكييييييييييد ينيتي؟ ش سالفتج؟

لولوة: ما راح أسوي شي غلط بس أبي أعرف الي راح أشاركه حياتي قبل ما يصير أي شي رسمي

منى: يعني راح تكلمينه و تطلعين معاه!

لولوة: عيل شلون بعرفه إذا ما كلمته و لا طلعت معاه!

منى: زين في شي اسمه فترة الخطوبة

لولوة: لا ما أبي أحد يعرف عنا أبي نكون على طبيعتنا

منى: بس هذا حرامـ و حطي في بالج شي مهمـ لولوة.. ترى عمر السعادة ما كانت بالحرامـ

لولوة: سكتي ترى تخرعين

منى: هذا الصج لا تتوقعين إنه أي شي في معصية الله بتكون نهايته حلوة


*

(في كلية العلومـ)

ريمـ راحت تتطمن على القطوة الي صار لها مدة تدير بالها عليها لما شافت القطوة بحضن محمد و اهو مندمج يلعب معاها

ريمـ باستغراب: محمد؟

محمد نسى القطوة و الدنيا كلها لما التقت عيونه بعيون ريمـ همس لنفسه: ريمـ

ريمـ: شتسوي هني؟

محمد: ولا شي كنت مار من هني و شفت هالقطوة قاعدة بروحها و عندي بريك ساعة فقلت بلعب معاها شوي ..أنا أموت بالقطاوة

ريمـ: أوكي

محمد ما وده يسكر الحوار بسرعة: و انتي ش تسوين هني؟

ريمـ ردت عليه بدون ما تطالعه: يبت أكل للقطوة.. "ميمي" تعالي

لما شافت القطوة الأكل الي في ايد ريمـ ركضت لها

محمد: انتي الي مختارة هالاسمـ لها؟

ريمـ: لأ سألتها شنو اسمج و قالت لي "ميمي"

محمد: ماله داعي العصبية

ريمـ: مو معصبة بس سؤالك سخيف

محمد: الشرهه علي الي قاعد أسولف معاج

ريمـ: من حلاة سوالفك

محمد: في ناس يموتون على سوالفي

ريمـ: انت هييه مصدق نفسك ترى ماني ميته عليك

محمد بتطنز: لا تكفين موتي علي

ريمـ: مو كل الناس فاضين مثلك..عندي محاضرة باي

محمد بصوت عالي عشان تسمعه: ما أدري على شنو شايفة نفسج ريمـ

ريمـ سمعته بس ما ردت عليه و لا التفتت و كملت طريجها و محمد انقهر زيادة

*

(في كلية الهندسة)

مريمـ كانت طالعة من قاعة محاضرتها لما سمعت أحد يناديها
التفتت على مصدر الصوت و استغربت أكثر لأنها ما تعرف الي ناداها: نعمـ؟

خالد: شلونج مريمـ؟

مريمـ: الحمد لله.. منو انت؟

خالد: خالد

مريمـ: ما أعرف أحد بهالاسمـ

خالد قرب منها أكثر: و ألحين عرفتي واحد باسمـ خالد

مريمـ: أوكي ما أدري من وين عرفت اسمي بس واضح إنه كل الي تعرفه عني اسمي و بس

خالد: ودي أعرف عنج أكثر.. ودي أعرف عنج كل شي

مريمـ: خلني أعطيك نصيحة.. وفر وقتك و جهدك لأنك قاعد تضيع وقتك معاي و ما راح توصل لنتيجة

خالد تمـ ساكت يطالعها و مريمـ كملت كلامها

مريمـ: ماني رخيصة عند نفسي و أهلي ما ارتكبوا في حقي جريمة عشان أجازيهمـ عليها إني أكلمـ واحد غريب

خالد: بس بغيت أعرف إذا كنتي مرتبطة أو لأ

مريمـ: مو شغلك!

مشت عنه مريمـ بس خالد كان يشوفها و اهي تبعد عنه

خالد بداخله" غير عن كل البنات الي عرفتهمـ"

*

مريمـ: أدفع نص عمري و أعرف شلون عرف اسمي

هدى: ما أدري بس لا تشغلين بالج فيه

مريمـ: هدى بقول لج شي بس لا تفهميني غلط

هدى: شنو؟

مريمـ: حسيت إنه .. يعني مو مثل باجي الشباب.. ما أدري فيه شي غير

هدى: ما عليج منه ترى أغلب الشباب ينفعون يكونون ممثلين ..ما تتذكرين الي كان يلحق وفاء و حلف لها ع القرآن إنه مو قادر ينساها و يموت فيها؟

مريمـ: إي بصراحة انصدمت منه يعني عشان بنت يقومـ يحلف ع القرآن! ما يخاف يصير فيه شي؟ ايده الي حلف فيها يتوقع ما راح يصير فيها شي؟

هدى تطالع واحد ورى مريمـ : شباب مستعدين يسوون أي شي عشان البنات.. و شباب مهما يسوون البنات ما يلتفتون عليهمـ

الفتت مريمـ تشوف الي تطالعه هدى: و انت لحد ألحين تفكرين فيه؟

هدى : لباجر.. أموت في الريال(الرجال) الثقيل

*

(في المستشفى)

بنت خالة ريمـ كانت والدة و راحت ريمـ تسلمـ عليها

ريمـ ضغطت على زر الاسنسير(المصعد) و بعد ما ركبت دخل واحد وراها

... : انتي!

ريمـ التفتت باستغراب جهة الصوت و لما شافت المصدر قالت بعصبية: انت!

الي دخل معاها كان محمد

ريمـ: وصلت فيك إنك تلحقني !

محمد: و منو تكونين عشان ألحقج؟ أنا ياي (جاي) أزور ناصر لأنه تعبان.. شدراني إنج انتي الي مو لاحقتني؟

ريمـ: ويع أي شي .. ليش ما عندي ذوق!(لفت ويها عنه)

و فجأة وقف الأسنسير بقوة

ريمـ رجعت لفت على محمد: بلا حركات يهال

محمد: ما سويت شي (راح جهة الأزرار)

ريمـ: ما يضحك محمد

محمد بعصبية: قلت لج ما سويت شي تبيني أحلف عشان تصدقين!

سكتت ريمـ بس قالت بداخلها" هذي أول مرة يوقف علي الاسنسير و ما وقف إلا و أنا مع محمد"

أوقف هني و أكمل المرة الياية
<< تحس حقدوا عليها ^.^

هل الموقف هذا راح يقرب محمد و ريمـ أو يبعدهمـ عن بعض؟

و تتوقعون خالد راح يحاول مرة ثانية يقرب من مريمـ أو خلاص راح فقد الأمل منها و راح يشيلها من باله؟

فهد ما تكلمت عنه بهذا الجزء بس راح يكون موجود بالجزء السادس

[phloe fan]

ش السالفة؟ ما عجبتكمـ القصة =(

ع العمومـ بنزل بعد جزء و إذا ما شفت تفاعل خلاص بوقف القصة

الــــجـــــزء الســـــادس

أرحل.. ما أقترب منك
يسأل.. هل قلب عنك
أزعل.. يبتسمـ سنك
أثقل.. دمعي يكذبني*

محمد: الحمد لله إنه الي وقف علينا أسنير مستشفى مو أسنسير الجامعة

ريمـ باستغراب: ليش؟

محمد: لأنه أسنسير المستشفى كبير يعني نكون بعاد عن بعض

ريمـ كانت بتعلق بس هونت.. طلعت موبايلها و قالت بعصبية: وااي ما في سيرفس

محمد سأل فجأة: يوعانة "جوعانة"؟

على طاري الأكل طلع بطن ريمـ صوت ^.^

محمد ضحك و قال: أعتبر هذا "إي"

ريمـ بعصبية: ما كليت شي من الصبح

محمد: عندي وجبتين ماك تشيكين

ريمـ بتطنز: الي أعرفه إنه إذا بغيت تزور واحد مريض تييب"تجيب" له ورد مو وجبة

محمد: عبد الله قال لي إنه يوعان"جوعان" و طلب مني أيب "أجيب" له شي في طريجي

ريمـ: أهاا

محمد: تبين؟

ريمـ: شدراني إنك مو حاط فيها مخدر؟

محمد: لو بحط لج شي فيها جان حطيت سمـ و ريحت العالمـ منج ع العمومـ أحسن لا تاكلين يمكن تموتين من اليوع"الجوع" و تكون موتة طبيعية و ما أتعاقب عليها

ريمـ: انت شفيك! ما تعرف تتكلمـ مع بنات!

محمد قامـ ياكل من البطاط: لما تتصرفين مثل باجي البنات أعاملج على إنج وحدة منهمـ

ريمـ : شقصدك؟

محمد يشرب من البيبسي: الي سمعتيه

ريمـ بداخلها" صج إني هبلة.. المفروض آخذ الوجبة منه و أنا ساكتة.. شكل الأسنسير مطول و أنا يوعانة و محمد مو راضي يعطيني ويه"

انفتح الأسنسير فجأة
محمد و ريمـ رفعوا راسهمـ بنفس الوقت

شافوا عبد الله عند باب الأسنسير

عبد الله: ما أصدق عيوني.. محمد و ريمـ صاعدين بأسنسير واحد! و وصلتوا بسلامـ بدون ما تذبحون بعض!

ريمـ ما صدقت إنه الأسنسير فتح و طلعت على طول: عن إذنكمـ

*

محمد دخل غرفة ناصر و عبد الله ماشي وراه

محمد: سخيفة و تافهة و فوق هذا مغرورة

ناصر: أتوقع إنك تتكلمـ عن ريمـ

محمد التفت على عبد الله: شفت عرفها من صفاتها

ناصر: عرفتها لأنك ما عندك سالفة غيرها

محمد: كل الي أبي أعرفه على شنو شايفة نفسها

ناصر: "فهمـ كل شي يؤدي إلى العفو عن كل شي"

محمد: هاه؟

عبد الله: الترجمة إذا سمحت

ناصر: إذا دعمك واحد و كمل طريجه بدون ما يعتذر لك شنو راح يكون شعورك؟

محمد: راح أعصب و احتمال أتخانق معاه

ناصر: زين و إذا قال لك آسف كنت سرحان.. من سمعت إنه ولدي يعاني من مرض خطير و أنا أسرح وايد.. شنو راح تكون ردة فعلك؟

محمد: راح يكـسر خاطري و بعتذر له على عصبيتي

ناصر: شفت شلون تغيرت ردة فعلك بعد ما فهمت موقفه.. "فهمـ كل شي يؤدي إلى العفو عن كل شي"

محمد: يعني ريمـ مغرورة لسبب؟

ناصر: ريمـ مو مغرورة بس علاقتها مع الكل رسمية و تحب تكون بروحها

محمد: يعني مغرورة

ناصر: شدراك إنه السبب الي يخليها تحب تكون بروحها الغرور؟

عبد الله: أقول ناصر مو المفروض إنك تعبان؟ لك خلق تقول حكمـ

محمد: ناصر لازمـ يتفلسف حتى لو بيموت

ناصر: الشرهه علي الي معطيكمـ ويه"وجه" يا الله Out طلعوا بنامـ

*

(في بيت عادل)

مريمـ طلعت من غرفتها تنادي أمها
قالت بدلع: مامي.. مماي.. مماتي.. (لما أمها ما ردت عليها) يـــمـــه

أمـ فهد: و بعدين مع هالازعاج! كاني بالصالة

مريمـ دخلت الصالة و شافت أمها و فهد أخوها قاعدين

أمـ فهد: و بعدين معاج يا مريمـ؟ جمـ مرة أقول لج تكلمي بهدوء باجر إذا تزوجتي سلمان جذي بتكلمينه؟

مريمـ ويها صار أحمر لما سمعت إسمه

فهد: على طاري الزواج.. مو جنه ريمـ تأخرت بالرد علي؟

أمـ فهد: لا ما تأخرت

فهد: تتوقعون راح ترفضني؟

أمـ فهد: لأ ما أتوقع..وين تحصل واحد مثلك

فهد: عيل ليش كل هالتأخير.. يعني الناس يطلبون وقت عشان يسألون عن المعرس بس اهي تعرفني عدل

مريمـ: الي يسمعك يقول مر شهر بدون ما ترد عليك ما يقول 3 أيامـ

فهد: مروا علي جنهمـ (كأنهمـ) 3 سنين

أمـ فهد: إي عروس و لازمـ تتغلى يا فهد

فهد: الرخيص يتغلى عشان يصير غالي بس الغالي ليش يتغلى و اهو حييل غالي

مريمـ: يا عيني ع الحب .. تدري شنو أحلى شي بالسالفة؟

فهد: شنو؟

مريمـ: إنه إذا ريمـ وافقت عليك راح يكون زواجنا بنفس اليومـ.. تعال صج ليش ما نتفق بعد على شهر العسل؟ خل نروح نفس المكان انا و انت و ريمـ و سلمان

فهد: بس جذي؟ عندي فكرة أحلى شرايج نسكن بنفس الفندق؟

مريمـ: إي والله فكرة حلوووة

فهد: ذلفي زين هذا الي ناقص.. أبي أكون مع ريمـ بروحي باخذ راحتي معاها و بعدين مو كافي إني مبتلش فيج هني أبتلش فيج هناك بعد

مريمـ: أصلن أنا أبي أكون معاكمـ عشان ريمـ مو عشانك إنت.. و بعدين من قال لك إنه ريمـ راح توافق؟

فهد: إن شاء الله بتوافق

مريمـ: آمين بس مو عشانك عشان يكون عرسي أنا و ريمـ نفس اليومـ

فهد: المهمـ توافق.. يا الله يمه أنا ماشي تامرين على شي؟

أمـ فهد: سلامتك يمه.. شوي شوي ع الطريج

فهد: إن شاء الله.. مع السلامة

أمـ فهد: مع السلامة

*

لولوة منسدحة على السرير و تتكلمـ في الموبايل

لولوة: تصدق وليد هذي أول مرة أكلمـ واحد .. بس ما أدري ليش انت بالذات لفت نظري

وليد بداخله"إي صح صدقت": حتى أنا يا لولوة.. بصراحة حسيت الناس كلها تطالعني و أنا أعطيج الرقمـ

لولوة سمعت أحد يطق باب غرفتها

لولوة تهمس للموبايل: لازمـ أمشي ألحين أكلمك بعدين أوكي؟

وليد: أوكي بس لا تطولين علي.. راح أنطرج

لولوة: إن شاء الله ما راح أطول ..باي

لولوة سكرت الموبايل و راحت تفتح باب غرفتها

مريمـ: ليش قافلة الباب؟

لولوة: كيفي..شتبين؟

مريمـ: كلميني باحترامـ أنا اختج الكبيرة

لولوة: نعمـ آمري عمتي بغيتي شي؟

مريمـ: أبي اللاب التوب

لولوة: ليش؟ شفيه جهازج؟

مريمـ: ما أدري ش سالفته خرف يتسكر من نفسه

لولوة: زين بعطيج إياه بس يا ويلج إذا خربتيه

مريمـ:تهددين مع الويه! خلصي عطيني إياه

لولوة: دامـ هذا أسلوبج ما راح أعطيج.. وألحين يا الله طلعي بره

مريمـ: خليه عندج ما أبي منج شي

مريمـ طلعت و سكرت الباب وراها بقوة و لولوة رجعت قفلت الباب و راحت تتصل في وليد مرة ثانية

*

محمد كان يطالع ريمـ بدون ما تحس فيه و لاحظ إنه نظرة عيونها تغيرت شافها معصبة الفت يشوف شنو الي خلاها تعصب

شاف سيارة فيها واحد شاب و يمه واحد كبير بالسن.. من أول نظرة لهمـ تقدر تقول إنه أبوه

الشاب نزل من السيارة بسهولة بس الكبير بالسن كان صعب عليه يفتح الباب و بعد ما نزل "بدون مساعدة ولده"

الولد مشى و أبوه مشى وراه بصعوبة

رجع محمد التفت على ريمـ و شاف نظرة العصبية تبدلت بنظرة حزن و.. معقولة تكون الي في عيونها دموع؟

شافها تمشي جهة الشايب و مشى وراها على طول سمعها تكلمه
ريمـ: تبي أساعدك بشي عمي؟

صوت كان كله حنان.. كان هالشي غريب على محمد لأنه متعود يسمع العصبية بصوتها

الشايب: قاعد أدور على ولدي تدرين اهو شباب فما شاء الله عليه فسريع

ولد الشايب بعصبية: انت هني و أنا أدور عليك خلصني امش بسرعة

ريمـ بعصبية: لا تكلمه جذي

الولد التفت على ريمـ و جنه أول مرة يلاحظ وجودها: و منو تكونين عشان تسمحين لي أو ما تسمحين

ريمـ: انت ما تقرا القرآن؟ ما تدرين إنه رضا الله من رضا الوالدين؟ مو مقدر النعمة الي انت فيها!

الولد: أي نعمة! أبوي ريال(رجال) كبير و مخرف

ريمـ: انت بنعمة كبيرة بس مو حاس فيها.. (بصوت واطي) أبوك عايش.. (رجع صوتها طبيعي) إذا أرضيت أبوك الله راح يوفقك

الولد: اففففففففف انتي من وين طلعتي ناقصج أنا.. و انت (التفت على أبوه) تحرك وراي شغل

الشايب ابتسمـ لريمـ: يا حظ أبوج فيج( و مشى ورى ولده)

ريمـ وقفت مكانها مو قادرة تتحرك.. مو قادرة تمسح دموعها الي قاعدة تنزل بسرعة من عيونها و لا قادرة تحرك ريولها(رجولها) عشان تطلع من المستشفى

محمد خاف عليها و قرب منها ناداها بس ما سمعته حط ايده على جتفها (كتفها) عشان يلفت انتباها و فعلا التفت عليه كان مستغرب من دموعها ليش تبجي على واحد ما تعرفه ليش تتأثر وايد جذي

محمد: ريمـ شفيج؟

ريمـ بصوت حزين:ليش ما يقدر النعمة الي اهو فيها.. أنا مستعدة أسوي أي شي عشان أبوي أفديه بروحي .. (بعصبية) ليش ما يفهمـ!

محمد ما رد عليه و تمـ يطالعها باستغراب قال بداخه" هالبنت غريبة.. على طاري الأشياء الغريبة الغريب في الموضوع إنه منظر الدموع بعيونها معذبني.. أمسح دموعها؟ لا لا أخاف تصرخ علي جدامـ الناس.. ريمـ الله يخليج مسحي دموعج مو قادر أشوف الدموع بعيونج"


*

واضح من تصرفات محمد إنه مهتمـ في ريمـ مهما حاول ينكر هالشي

بس ريمـ تحبه؟

و مريمـ الي مخطوبة لسلمان.. هل راح تستمر خطوبتها؟

و تتوقعون راح تندمـ لولوة على الي تسويه؟

الاجابة بالبارت السابع =)

[رَنْــد]

الله اندمجت وااايد . .

رجيتكـ خلي النهآيه سعيييده .,

ولاتتأخري علينآآآ . .

خآطري اخلص القصه قبل مآ تبدآ المدآرس . .


ع العمومـ بنزل بعد جزء و إذا ما شفت تفاعل خلاص بوقف القصة

أنآ متآبعه معآكـ . . بس أهمـ شي مآتتأخري
:010:

[phloe fan]

هلا والله رند

يسعدني إنه القصة عجبتج

و أنا حاطة في بالي أخلص القصة قبل الكورس الدراسي يعني قبل 17-2 <<بداية الكورس بالكويت ^_^!

ع العمومـ باقي جزئين تقريبًا و تخلص القصة =)

و هذا البارت السابع لعيونج

[phloe fan]

الــــجـــزء الــســـابــــع

لو شفتك قدامي أحتار
ما أعرف وش فيا صار
أحس بقلبي صاير نار
يمكن أحبك*

المقرر الي يدرسون فيه محمد و ريمـ نظموا رحلة للبحر لجمع الطحالب << هذي رحلات كلية العلومـ ^.^

المعيد: أبي قروب يجمعون عينات من الشاطئ و قروب يجمعون عينات من ماي البحر و قروب يجمعون عينات من الأغراض الي ع الأرض و قروب يجمعون عينات من السفينة الي هناك

كان قروب محمد و عبد الله و ريمـ و فجر يجمعون عينات من السفينة

عبد الله: أوكي اثنين ياخذون عينات من هالجهة من السفينة و اثنين من الجهة الثانية.. أنا و فجر من هالجهة يا الله نشوفكمـ بعدين

محمد بداخله"هين يا السخيف"

محمد و ريمـ كانوا ماشي للجهة الي راح يجمعون منها العينات
و فجأة التفتت ريل(رجل) ريمـ و طاحت ع الأرض

ريمـ: آآآآآآآي

محمد قعد يمها و سألها و اهو خايف عليها: تعورتي؟

ريمـ: لأ قلت "آآي" اعتباطًا (و لفت عليه)

لما لفت عليه شافت إنه ويهه قريب منها حييل لدرجة إنها حست بنفسه الدافي على ويهها

ريمـ بداخلها"مفرش أسنانه بمعجون كلوس آب بنكهة النعناع.. امممممممـ أحب هالمعجون"

محمد بداخله"عطرها روعة .. ودي أقرب من رقبتها عشان أشمه عدل"

صراخ عبد الله خرب عليهمـ اللحظة

عبد الله: انتوا ليش قاعدين ع الأرض؟

محمد يبي يغير الموضوع: انت الي ش عندك تصرخ؟

عبد الله: ما أدري سمعتكمـ تصرخون صرخت وياكمـ

فجر: شفيكمـ؟ ش صاير؟

ريمـ وقفت: مو صاير شي يا الله خلنا نخلص من العينات شكلنا راح نكون آخر قروب يخلص

عبد الله: عادي إحنا طول عمرنا آخر قروب يخلص شغله

فجر: إي بس هالمرة باجي القروبات راح يحقدون علينا لأنهمـ ما راح يقدرون يرجعون الكلية بدونا.. لازمـ كلنا نخلص عشان نرجع

عبد الله: إي صح

محمد: بما إنه صح ورنا عرض أكتافك << محمد حاقد على عبد الله لأنه خرب عليه مع ريمـ ^.^

عبد الله: زين لا تزف

*
(في كلية الهندسة)

خالد كان ماشي مع رفيجه"سعود" لما شاف مريمـ و تنح
خالد: مريمـ هني

سعود: أي مريمـ؟

خالد:شفت البنات الي واقفين هناك؟ مريمـ الي واقفة بالطرف..أحلى وحدة فيهمـ

سعود: تدري خالد انت محظوظ

خالد: ليش؟

سعود: شيماء تدرس بالتربية و انت بالهندسة.. يعني تسوي الي تبيه بدون ما تطيح عليك مو مثلي حنان معاي بالكلية و مراقبة كل حركة أسويها

خالد: مو هامتني شيماء المشكلة في مريمـ مو راضية تعطيني ويه(وجه)

سعود:مليون بنت غيرها

خالد: عاجبتني و أبيها

مروا البنات من يمهمـ(جنبهمـ) و سعود لاحظ شي

سعود: أقول خالد

خالد: هلا(يطالع مريمـ و اهي تمشي من بعيد)

سعود: شيلها من بالك ترى شكلها راحت عليك

خالد لف على سعود مستغرب: ش قصدك؟

سعود: ما لاحظت الخاتمـ الي في ايدها؟ البنت مخطوبة

خالد: مخطوبة!

سعود: إي شوف لك غيرها

خالد:لاما لي شغل.. أبيها و انت عارفني يا سعود إذا بغيت شي آخذه يعني آخذه

*

(في بيت عادل.. و تحديدًا أكثر بغرفة لولوة)

لولوة: مستحيل يا وليد .. أهلي لو يشكون فيني راح يذبحوني .. طلبت صورتي و عطيتك

وليد: 100 صورة ما تغني عيوني عنج

لولوة: فديتك يا قلبي

وليد: عفية لولوة بس لفة وحدة بالسيارة ما راح نروح مكان

لولوة: لا وليد صعبة

وليد: يعني راح آكلج؟ انتي تدرين اني متربي عدل و إلا عندج شك؟

لولوة: لا يا قلبي ما أقصد

وليد: بلى تقصدين.. قولي إنج ما تثقين فيني

لولوة: حرامـ عليك يا وليد ثقتي فيك ما لها حدود.. بس صعبة

وليد: انتي الي مصعبتها.. قلت لج كلها نص ساعة و أرجعج.. انتي ليش ما ترحميني! أقول لج ما أقدر أنامـ الليل من شوقي لج دايمـ صورتج جدامي.. ليش ما تحسين بشوقي لج

لولوة: أخاف يشوفني أحد معاك

وليد: محد راح يدري عنا.. لولوة انتي مو حاسة بالشوق الي في قلبي..شايفتني حجر؟ باجر إذا تزوجنا بقول لعيالنا أمكمـ كانت خوافة

لولوة: أوكي خلاص.. بس عشان تعرف إني احبك

وليد بداخله"يا حليلها صدقت خخخخخخخخخ"

*


(في الصالة)

أمـ فهد: مريموووه البنت تضعف إذا قرب زواجها و انتي تمتنين!

مريمـ: واااي يمه لا تحطميني

أمـ فهد: شوفي نفسج بالمنظرة

مريمـ راحت للمنظرة: ياااي فديتني أهبل

أمـ فهد: الحمد لله و الشكر في أحد يمدح جمال نفسه!

مريمـ: بعد ش أسوي إذا انتي أمي و طايحة تحطيمـ فيني أدلع نفسي عشان لا تصير فيني عقدة نفسية

أمـ فهد: زين ما علينا وين اختج؟

مريمـ: ما أدري عنها ما أكلمها

أمـ فهد: ليش بعد؟

مريمـ: يمه أسلوبها مو حلو ما تحترمني

أمـ فهد: ما عليه توها صغيرة

مريمـ: إييي الدلع كله حق فهد و لولوة.. فهد الكبير و معاملته غير و لولوة آخر العنقود و أنا البطة السودة بينهمـ

أمـ فهد: لا فديتج انتي الغلا كله

مريمـ: و أخييييرا سمعت لي كلمة حلوة

*

(في بيت سالمـ)

سالمـ: ريـــــمـ

ريمـ: هلا عمي

سالمـ: ريومـ فهود دوخني يتصل علي باليومـ 70 مرة يبي يعرف ردج

ريمـ سكتت

سالمـ: أرجع أقول لج مرة ثانية انتي مو مجبورة عليه إذا ما تبينه قولي لأ و لا يهمج

ريمـ نزلت راسها

سالمـ: أنا ما أعرف بهالسوالف بس الي أعرفه من المسلسلات إنه إذا البنت سكتت يعني موافقة.. يعني السكوت علامة الرضا؟

ريمـ ابتسمت بخجل و طلعت من الصالة

سالمـ: فديتها تستحي خخخخخخخ

اتصل سالمـ على فهد عشان يبلغه بموافقة ريمـ

سالمـ: بسمـ الله الرحمن الرحيمـ.. ما مداه يرن عشان تشيله ش السالفة انت حاط الموبايل بحظنك؟

فهد: بشر.. إن شاء الله وافقت

سالمـ قرر يلعب بأعصاب فهد شوي: فهد الزواج قسمة و نصيب

فهد: تقصد..

سالمـ: انت عارف إني ما أقدر أجبر ريمـ على شي

فهد ساكت

سالمـ: عشان جذي ما قدرت أجبرها تبقى معانا بالبيت و ترفضك عشان جذي و للأسف الشديد ريمـ وافقت عليك

فهد طاح من الكرسي الي كان قاعد عليه

سالمـ: شفيك؟ اثقل شوي

فهد: ريمـ وافقت؟ احلف!

سالمـ: ماني حالف كيفي

فهد: عــــــــمـــــــــي

سالمـ: عمى بعين العدو لا تصرخ بطيت طبلة اذني

فهد: جد جد ريمـ وافقت؟

سالمـ: إي جد وافقت.. بس والله يا فهد إن زعلتها أو ضايقتها ما تلومـ إلا نفسك

فهد: لا توصي حريص عمي.. يعني وافقت؟

سالمـ: مطول؟

فهد: لا بس خلاص بروح أبشر امي و ابوي

سالمـ: اوكي يا الله مع السلامة

فهد: عمي

سالمـ: هااه؟

فهد: سلمـ لي على ريمـ

سالمـ ابتسمـ : الله يسلمك

فهد: باي

*

مريمـ كانت قاعدة على سريرها و فاتحة اللاب توب تتكلمـ مع صديقاتها ع المسن لما رن موبايلها و كانت النغمة:
ما في غيره سكن روحي حبيبي و أنا أحبه
لو قالوا تمنى بتمنى عمري قربه

مريمـ قعدت تدور الموبايل و آخر شي شافته يمها: وي شفيني من قرب العرس و أنا أخربط ههههههه

ردت عليه: هلا قلبي

(بلا لقافة ريال(رجال) و خطيبته يسولفون ما عليكمـ شنو قالوا ^.^)
بعد ما سكرته منه بنص ساعة رن التلفون مرة ثانية بس كان الرقمـ غريب

خالد:مساء الحب

مريمـ حست إنه الصوت مألوف بالنسبة لها: منو معاي؟

خالد: خالد

مريمـ"يا ربي .. هذا شيبي": من وين يبت(جبت) رقمي؟(بعصبية)

خالد: مو مهمـ

مريمـ: خالد إذا ما كنت تدري فأنا مخطوبة

خالد بهدوء: أدري

مريمـ: انت ما تفهمـ ! أقول لك مخطوبة.. يعني أنا لواحد غيرك أحبه و يحبني

خالد بعصبية: سمعيني عدل لأني ما أحب أعيد كلامي.. انتي راح تكونين لي فاهمة؟ و خطيبيج هذا تنسينه لأنج راح تقولين لأهلج باجر الصبح إنج ما تبينه سامعة؟

مريمـ: بكيفك!

خالد: إي بكيفي.. انتي ما تعرفيني يا مريمـ و لا تدرين ش أقدر أسوي

مريمـ بتحدي: ش تقدر تسوي؟

خالد: أشياء ما تخطر على بالج و صدقيني مو من مصلحتج أعصب.. فسمعي كلامي عشان أكون طيب معاج

مريمـ خافت بس ما تبي تبين له: الي ما توصله بيدك وصله بريلك

و سكرت الموبايل

خالد حاول يتصل عليها مرة ثانية بس يطلع له إنه جهازها مغلق

خالد: هين يا مريمـ.. بعلمج منو خالد الي قاعدة تتحدينه

*

نهاية البارت السابع

تتوقعون شنو السبب الي خلا ريمـ توافق على فهد؟ ريمـ تحب فهد؟

و شنو راح تكون ردة فعل محمد لما يعرف إنه ريمـ وافقت على فهد ؟

راح يقدر خالد يفرق بين مريمـ و سلمان؟

القصة قربت من النهاية =)

[رَنْــد]

حلو البآرت .,

=)

في انتظآر النهآيه .,
:005:

[phloe fan]

عيونج الحلوة يا قلبي

هذا البارت الثامن و النهاية قربت =)

[phloe fan]

الـــــــجـــــــزء الـــــثـــــامـــــــــن

دامـ تتمناها في هواك
حلمك تلاقيها معاك
كلمها يا الله عن هواك
و إلا ابتدي لمح لها*

~*~

(في بيت سالمـ و بغرفة ريمـ)

ريمـ تحرك ايدها جدامـ عيون مريمـ

ريمـ: وين وصلتي؟

مريمـ: هاه؟ ش قلتي؟

ريمـ: شفيج؟ أكيد سرحانة بسلمان

مريمـ: ريمـ بقول لج شي

ريمـ: شفيج تستأذنين قبل ما تقولين! قولي على طول

مريمـ: بصراحة في واحد معاي بالكلية اسمه خالد و صار له مدة يتحرش فيني و أنا حاقرته بس أمس اتصل علي و هددني

ريمـ: يهددج في شنو؟ انتي ما تعرفينه من قبل و لا ماسك عليج شي صح؟

مريمـ: و تسألين بعد مع الويه! أكيد ما أعرفه من قبل و لا ماسك علي شي.. بس كلامه خوفني

ريمـ: دامـ إنج ما سويتي شي غلط لا تخافين.. طنشيه و راح يمل و يخليج

مريمـ: انتي شايفة جذي؟ يعني ما أقول لأبوي أو فهد عنه؟

ريمـ:لا تكبرين السالفة.. انتي سكتي عنه و لا تعطينه ويه خليه يهدد من اليومـ لباجر ما يقدر يسوي لج شي

مريمـ: خلاص أوكي.. إييي صح ما قلت لج.. تذكرين سارون؟

ريمـ: و أنا ش يذكرني بصديقاتج

مريمـ: سارة الي كانت صديقتي الروح بالروح بالثانوي و بعدين افترقنا بالجامعة.. الي تزوجت قبل 4 شهور

ريمـ: إي تذكرتها.. شفيها؟

مريمـ: تدرين إنها ساكنة في البيت الي يمكمـ (جنبكمـ)

ريمـ: حلفي؟ ما شفتها من قبل

مريمـ: إي توهمـ ما صار لهمـ أسبوع.. خل نروح لها عشان تسلمين عليها

ريمـ: أوكي.. بس لحظة أنا اليومـ مسوية كيك.. أحط لها منه؟

مريمـ: إي أحسن مما نروح و إيدنا فاضية

~*~

(في بيت سارة)

البنات سلموا على بعض و قعدوا يسولفون و فجأة سمعت ريمـ صوت مألوف بالنسبة لها

محمد: ساروه خلصت من الكمبيوتر سـ..(ما كمل كلامه لما شاف ريمـ)

ريمـ غصت بالعصير الي كانت تشربه
مريمـ(تهمس لريمـ): ريوومـ شفيج فشلتينا أول مرة تشربين عصير!

محمد: يا ربي و انتي و راي وين ما أروح!

سارة باستغرب: تعرفون بعض؟

محمد: إي ريمـ معاي في بعض المقررات الي مسجل فيها

سارة: إي صح انتوا الاثنين علومـ

مريمـ: شلونك محمد؟ من زمااان عنك

محمد: هلا والله مريمـ.. أنا تمامـ إنتي شخبارج؟

مريمـ: الحمد لله.. وينك ما تنشاف؟ مع إنه العلومـ لاصقة بالهندسة

محمد: وين تشوفيني و أنا داخل مختبر و طالع من مختبر

مريمـ: ههههههه الله يعينك

محمد: أجمعين

ريمـ كانت ساكتة بس متضايقة و سبب ضيقتها اسمه "الغيرة"

سارة و مريمـ رجعوا يسولفون
محمد شاف الكيك الي ع الطاولة و حط له قطعة و قعد ياكل منه

سارة: ترى ريومـ الي مسوية الكيكة هذي

محمد: طعمها عادي

انقص ويه ريمـ و انقهرت
ريمـ: يا الله مريمـ خل نمشي

سارة: وين؟ تو الناس؟

مريمـ: لا أنا تأخرت وايد لأني كنت عند ريمـ قبل ما أييج(أجيك)

سارة: بس ما صار لكمـ ساعة

مريمـ: ما عليه إن شاء الله نقعد أكثر المرة الياية

(ريمـ كانت تطالع محمد بعصبية.. و محمد مسوي روحه مو شايفها و اهو من داخله مستانس إنها قاعدة تطالعه)

محمد بداخله"شكلها كيوت لما تعصب"

لما طلعوا ريمـ و مريمـ سارة لفت على محمد

سارة: انت متى ناوي تعقل؟

محمد: شايفتني مينون(مجنون)؟

سارة: حركاتك حركات يهااال.. عيب عليك الي سويته زعلت البنت

محمد: لا عادي ريمـ ما تزعل مني

سارة: شكلك واايد معاها

محمد: هاه؟ لا لا مو قصدي بس.. احنا دايمـ نتخانق

إبراهيمـ زوج سارة دخل: السلامـ عليكمـ

محمد & سارة: و عليكمـ السلامـ

إبراهيمـ: أووه محمد عندنا اليومـ

محمد: إي ما تشوف البيت منور بوجودي.. على فكرة ييبوا(جيبوا) كهربائي يصلح لكمـ الكهربا فوق لأني بطلع بعد شوي

إبراهيمـ: صدقت نفسك!(قعد يمـ سارة)

سارة: إبراهيمـ ترى تعبت من شغل البيت و أبي خدامة تساعدني

إبراهيمـ: بدينا و انتي كلما تشوفيني تقولين لي تعبانة ..تكلمنا بموضوع الخدامة من قبل و قلت لأ

سارة: إي تكلمنا فيه لما كنا ساكنين بشقة بس احنا ألحين ساكنين في بيت كبير و ما أقدر على كل شي

إبراهيمـ: زين انتي قاعدة في البيت و ما تشتغلين تسلي بوقتج في شغل البيت

سارة: انت الي مو راضي أشتغل

إبراهيمـ: نخلص من موضوع الخدامة ندخل بموضوع الشغل

سارة: انت الي فتحت موضوع الشغل

محمد: الحاسة السادسة الي عندي تقول إنه الحرب العالمية الثالثة قربت تبدي أنا أستأذن

سارة: لحظة وين؟ بدال ما توقف معاي و تقول له حرامـ عليك كل شي على راس اختي المسكينة تنحاش!

محمد لف على إبراهيمـ: ما يصير جذي إبراهيمـ كل شي على راسي اختي المسكينة.. الشباصات و الميش و الشيلة حرامـ عليك

إبراهيمـ: حلوووة ههههههههههه

سارة بعصبية: ما يضحك

إبراهيمـ: ما يضحك عندج يضحك عندي

محمد: يا الله أنا أستأذن(راح أخذ الكيك الي كان ع الطاولة معاه)

سارة: لحظة لحظة.. وين ماخذ الكيك؟ انت مو قلت إنه "عادي"؟ قبل شوي ما كان عاجبك

محمد: الكيك مو لي حق أمي.. تدرين فديتها تحب الكيك

سارة تطالعه و اهي مو مقتنعة بكلامه: أهاا.. حق أمي

محمد: إي يا الله مع السلامة.. كملوا نقاشكمـ

~*~

(في غرفة مريمـ الساعة 11 بالليل)

مريمـ دخلت غرفتها و حست إنه في أحد معاها بالغرفة و كانت بتصرخ بس حط ايده على حلجها(فمها)

...: هدي أنا خالد.. لا تصرخين لأنج راح تفضحين نفسج إذا دخل أحد من أهلج و شافني معاج جذي بيذبحج

مريمـ وخرت إيده عنها بعصبية: اطلع من هني بسرعة

خالد: أنا أعطي الأوامر ما أسمعها

مريمـ: خـــالـــد اطــلــع انت أكيد ينيت(جنيت)

خالد: انتي الي خليتيني أسوي جذي.. يومين أتصل عليج و ما تردين

مريمـ: أرد ش أقول لك؟ أقول لك مخطووووووووبة افهمـ

خالد: يعني لحد ألحين ما قلتي لأهلج إنج ما تبينه

مريمـ: حرامـ عليك خالد أنا ش سويت فيك؟ ليش تسوي فيني جذي؟

خالد: أنا الي المفروض أسألج ش سويتي فيني

مريمـ: الله يخليك اطلع من حياتي بس كافي الي سويته لحد ألحين

خالد: و أخليج تتهنين معاه؟ بأحلاااامج.. لأ .. حتى بأحلامج ما راح تتهنين معاه سامعة!

مريمـ و الدموع بعينها و الخوف بصوتها: خالد الله يخليك اطلع ألحين و نتفاهمـ بعدين

كـسرت خاطره و وافق: أوكي.. بس يا ويلج إذا اتصلت عليج و ما رديتي فاهمة!

مريمـ: إن شاء الله

خالد قرب منها و مسح دموعها و باسها على خدها قبل ما يطلع من الدريشة الي دخل منها

أول ما طلع اتصلت مريمـ على ريمـ

ريمـ و النومـ واضح بصوتها: مريمووه إذا طلع ما عندج سالفة بذبحج (سمعت مريمـ تبجي و طار النومـ من عينها) مريمـ شفيج؟ ش صاير وقفتي قلبي

مريمـ: خالد (رجعت تبجي)

ريمـ: شفيه؟ مريوومـ حبيبتي هدي عشان أفهمـ ش صاير؟

مريمـ: كان عندي بغرفتي قبل شوي و..

ريمـ عدلت قعدتها و سألت بسرعة: سوى لج شي؟

مريمـ: لا لا ما صار الي في بالج.. كان يهددني مثل كل مرة.. كان معصب لأني ما رديت عليه اليومين الي فاتوا.. ريمـ أنا خايفة

ريمـ: يا ربي هذا من وين طلع.. خلاص انتي هدي أعصابج و إن شاء الله ما يصير إلا الخير

مريمـ: أي خير! هذا شكله ناوي على شر(رجعت تبجي)

~*~

(في نفس الوقت بشقة وليد)

لولوة: لا وليد .. حرامـ عليك .. انت وعدتني ما يصير شي بينا اليومـ

وليد: مو احنا راح نتزوج؟ يعني عادي

لولوة: لا وليد.. الله يخليك خلها لما نتزوج

وليد: ما فرقت يا قلبي.. كلها أيامـ وأكون في بيتكمـ

لولوة: خلاص خلها لما يصير كل شي رسمي(تقرب من الباب بس وليد يسبقها للباب)

وليد: لأ أبي اليومـ ..تبين الصج.. أبي أظمن إنج تكونين لي على طول يا الله ثبتي حبج لي

لولوة: أنا لك طول العمر حبيبي.. بس اخطبني و أنا مستعدة أوقف جدامـ الكل و آخذك

وليد: قلت لج أبي اليومـ ..ليش تطولينها؟ كان خلصنا ألحين

لولوة: لا وليد الله يخليك استر علي الله يستر عليك خلها لما نكون حلال لبعض

وليد يضحك باستهزاء: حلوووووة.. نكون حلال لبعض هههههههههه.. و انتي ما عرفتي الحلال و الحرامـ إلا ألحين

لولوة بخوف: ش قصدك؟

وليد: قصدي انج قاعدة تضيعين وقتج .. أبيج اليومـ و مشيها بالطيب أحسن

لولوة و الدموع بعينها : لا وليد أبوس ايدك خلني أرجع

وليد: انتي شفيج! تدرين لو واحد غيري جان عزمـ ربعه"أصدقائه".. و أنا طول عمري ساتر عليج و ما فضحتج

لولوة تبجي بقوة: انت ش قاعد تقول!

وليد بعصبية: و بعدين معاج لولوة! بتسمعين الكلامـ و إلا أمد ايدي و أخليج ترجعين البيت و ملابسج مقطعة!

لولوة بصوت يرجف : مستحيل تكون انت وليد الي حبيته

وليد بنفاذ صبر: الظاهر إنج ما راح تيين"تجين" بالطيب

~*~

(الفير (الفجر) في غرفة ريمـ)

دخل يوسف (ولد سالمـ و نوال و عمره 6 سنين)

يوسف: ريمـ قومي أذن.. ريموووه

ريمـ: هممممـ ؟

يوسف: قومي صلاة

ريمـ: زين( غطت ويها )

يوسف صعد ع السرير و قامـ يناقز عشان تقومـ

ريمـ: يوووووسف يا السخيف قمت.. اطلع

يوسف: أكيد قمتي؟

ريمـ حذفته بالمخدة

يوسف : خلاص بطلع(حذف المخدة عليها مرة ثانية)

ريمـ قعدت ع السرير
و قالت بقهر: وااي محمد بالكلية و بره الكلية و حتى في أحلامي ألقاه

و قامت من السرير معصبة

*

(الساعة 8 الصبح في بيت محمد)

محمد نزل من الدري"الدرج" و شاف أمه مجهزة الريوق و قاعدة تنطره

محمد بعد ما باس راس أمه: صباح الحب لأمي الغالية

أمه: صباح النور يا وليدي

بعد ما صب محمد كوب حليب و قعد يمـ (جنب) أمه

أمه: محمد

محمد: عيونه

أمه سألت: منو ريمـ؟

محمد غص بالحليب الي كان يشربه

أمه تطقه على ظهره : اسمـ الله عليك شفيك؟

محمد: مـ.. ما فيني شي.. اووه صح تذكرت.. تقريري ناقص و لازمـ أسلمه اليومـ فبروح مبجر عشان أكمله (وقف) يا الله عن إذنج يا الغالية

أمه مسكت إيده: التقرير للمختبر و المختبر يبدي الساعة2 و ألحين الساعة 8 يعني عندك وقت طويل

محمد بداخله"صادتني"

أمه: يا الله رد على سؤالي.. منو ريمـ؟

محمد: أي ريمـ؟

أمه: الي كنت تناديها أمس في حلمك

محمد بداخله" أول مرة أدري إني أتكلمـ في نومي.. صج فشلة"

أمه: محمد أنا بفرح فيك قول لي منو اهي عشان أخطبها لك

محمد: صج؟ راح تخطبينها لي؟

أمه: إي أبي أشوف عيالك قبل ما أموت

محمد: فديتج عسى يومي قبل يومج بس..

أمه : بس شنو؟

محمد: خليني أكلمها بالموضوع أول و أشوف رايها قبل ما نكلمـ أهلها

أمه بابتسامة: خلاص حلو.. و قول لي ش يصير معاك

محمد: أوكي.. يا الله أنا ماشي توصيني بشي؟

أمه: سلامتك بس دير بالك ع الطريج

محمد: إن شاء الله يا الله مع السلامة

أمه: في حفظ الرحمن

~*~

(في بيت عادل و بغرفة مريمـ)

أمـ فهد: مريموووه انتي ينيتي(جنيتي)؟

مريمـ ساكتة و عيونها ع الأرض

أمـ فهد: يعني شنو ما تبينه!

مريمـ: خلاص يمه قلت ما أبيه لا تجبروني على شي ما أبيه

أمـ فهد: بس انتي كنتي مستانسة معاه.. ش السالفة؟ قولي لي شنو الي خلاج تغيرين رايج فجأة جذي

مريمـ: خلاص يمه ما أبي سلمان لا تجبروني عليه(قامت تبجي)

أمـ فهد: خلاص حبيبتي لا تبجين.. عمرنا ما راح نجبرج على شي ما تبينه بس أبي أفهمـ ش صار

مريمـ: مو صاير شي سلمان خوش واحد بس ما أبيه أنا ما أبيه.. يمه خليني بروحي الله يخليج

أمـ فهد: لا حول و لا قوة إلا بالله

أمـ فهد طلعت و سكرت الباب وراها

~*~

(في كلية العلومـ)

محمد كان مريض بهذا اليومـ و بعد ما شاف إنه التركيز في المحاضرة مستحيل استأذن من الدكتور يطلع و الدكتور سمح له
بعد ما طلع من القاعة سرحت ريمـ في كرسيه الفاضي

لاحظ هالشي عبد الله و أشر لناصر على ريمـ

ناصر ابتسمـ بس ما علق

"معلومة في كلية العلومـ غياب المحاضرات سهل بس غياب المختبرات صعب.. يعني محمد لازمـ يحضر المختبر=)"

(في المختبر)

معيد المختبر: أوكي بعد هالخطوة لازمـ ننطر نص ساعة و بعدين نكمل.. اخذوا بريك نص ساعة بعد النص ساعة الي ما راح يرجع راح أسجله غياب

طلعوا الطلبة و صار المختبر فاضي

محمد قعد ع الكراسي الي بره المختبر و غمض عيونه عشان يريح و بعد شوي سمع صوت:

عدل نفسك راح تعورك رقبتك

محمد بداخله"الصوت صوت ريمـ بس الكلامـ مستحيل يطلع من ريمـ.. ع الأقل مستحيل توجهه ريمـ لي أنا"

فتح عينه عشان يتأكد و شاف ريمـ

ريمـ: يبت"جبت" لك عصير برتقال

محمد خذا العصير منها: ثانكـس

ريمـ: ولكمـ

و قعدت يمه

محمد: انتي بعد مريضة؟

ريمـ: لأ.. ليش؟

محمد: لأنج مو قاعدة تتصرفين على طبيعتج

ريمـ: إي لأنك مريض اليومـ و كاسر خاطري

محمد: يعني بعد ما أتشافى راح نرجع نتخانق مثل أول؟

ريمـ: يب

محمد: ما أبي أتخانق معاج

ريمـ شكت إنها سمعته غلط و كانت تبي تتأكد: شنو؟

محمد عاد كلامه: ما أبي أتخانق معاج.. أبي نكون جذي على طول.. أبيج تخافين علي و تهتمين فيني مثل ألحين على طول

ريمـ وقفت: الظاهر الانفلونزا مأثرة عليك وايد

محمد: ريمـ أتكلمـ جد.. لو سمحتي سمعيني للآخر

ريمـ: ما لك حق تكلمني جذي

محمد: أبي هالحق

ريمـ: هذا حق غيرك

محمد وقف: ش قصدج؟

ريمـ: أنا مخطوبة

محمد نزل عيونه على ايدها

ريمـ قرت أفكارها و قالت: ما صار شي رسمي بس قريب راح يصير

محمد بصوت كله غيرة: تحبينه؟

ريمـ بداخلها" لأ و هذا المطلوب المفروض أتزوج واحد ما أحبه عشان ما ينكـسر قلبي و لا أزعل عليه إذا تفارقنا"

محمد تكلمـ مرة ثانية بس بنبرة كلها أمل: تحبيني ريمـ؟

ريمـ: ترى النص ساعة الي عطانا إياها المعيد خلصت و لازمـ نرجع المختبر

دخلت المختبر و ما التفت عليه لما سمعته يناديها

محمد طلع من الكلية و ركب سيارته بس ما قدر يمشي حس نفسه تعبان و متضايق نزل راسه على السكان قلبه منقبض راحت منه اللي شاغله باله ليل ونهار راحت لواحد ثاني

محمد بداخله"ليش يا ريمـ؟ ليش رضيتي تكونين لغيري ليش؟.. بتكون لغيري.. بتقعد مع واحد غيري.. قلبي ما يتحمل.. أنا ما أتحمل"

(في المختبر)

ريمـ قاعدة بالمختبر بس بالها مو معاها
قاعدة تطالع الباب.. تنطر محمد يدخل
بداخلها"هذا وين راح.. لا يكون تعب أو صار فيه شي"

بعد ما خلص المختبر طلعت بره بس ما شافته ع الكرسي الي كان قاعد عليه
سمعت عبد الله يقول لناصر: ما يرد علي

على طول عرفته إنه يتكلمـ عن محمد

ناصر: يمكن تعب و رجع البيت كان شكله تعبان وايد اليومـ

عبد الله: زين ليش ما يرد!

ناصر: يمكن نايمـ و موبايله سايلنت

عبد الله: يمكن.. مثل ما قلت كان شكله تعبان

محمد كان فعلاً تعبان.. بس مو بسبب الانفلونزا

~*~

نهاية الجزء الثامن

شرايكمـ بأحداث البارت هذا؟

باقي جزء أو 2 ما أدري خلوني أرتب أفكاري ^_^!

[رَنْــد]

يؤ شنو هالبآرت الي حآر×حآر.!
مرره رووعه .!
بس هالخآلد من وين دخل غرفة مريم المسكينه ؟؟
ومسكين محمد كآسر خآطره :\
ولولوه تستآهل كل الي صآر فيهآ.,
.,
في انتظآرج يآلغلآ .,
لا تتأخري علينآ
:21_2:

[phloe fan]

هلا ردنوودة

يسعدني إنه البارت عجبج و إن شاء الله تعجبج النهاية =)

و هذا البارت الأخير وصل

[phloe fan]

تحذير: إذا في أحد حساس خل يخلي علبة كلينكـس يمه =)

معليش ما راح ألون الأسماء بهذا البارت لأني حدي تعبانة و بالغصب فاتحة المنتدى بس ما حبيت أطول عليكمـ أكثر

الجـــــزء الأخــــيـــــر

قبل الافتراق
خلنا نعقد اتفاق
توعدني انت و أوعدك إنه أبد ما نفترق
أرجوك لا نفترق*

~*~

دخلت ريمـ القاعة مبجر على أمل إنها تشوف محمد و تطمن عليه
بس الي صار إنه محمد ما حضر هذي المحاضرة و لا غيرها
زاد خوف ريمـ و ما ركزت بأي محاضرة و في البيت كانت تسرح وايد و ما قدرت تنامـ.. قاعدة تتخيل أسوء الاحتمالات

و في اليومـ الي بعده دخلت القاعة مبجر و نفس الشي ما كان موجود
بس هالمرة ما قدرت تصبر أكثر و قررت تسأل ناصر و عبد الله عنه

(عبد الله و ناصر كانوا قاعدين على الدري(الدرج) و يسولفون)
وقفت عندهمـ ريمـ

ريمـ بتوتر: السلامـ عليكمـ

ناصر & عبد الله: و عليكمـ السلامـ

ريمـ: بس بغيت أسأل عن محمد.. صار له مدة غايب ما تدرون شفيه؟

ناصر: ما فيه شي بس ما له خلق يحضر المحاضرات

ريمـ بفرح: صج؟ ما فيه شي؟

ناصر و عبد الله طالعوا بعض باستغراب

ريمـ: ليش ما له خلق يحضر؟
ريمـ بداخلها" سؤال غبي"
ريمـ: أقصد يعني.. جذي راح يطوفه الشرح و.. ما يهمني إذا طافه شي أو ما قدمـ زين بالامتحان و طلع بدرجة مو حلوة بالمادة ما علي منه بس قولوا له لا يغيب المختبر.. ما يهمني إذا عطوه انذار غياب.. ما أبيه يغيب عشان لا يصير ضغط بالشغل علينا احنا بس .. جد ما يهمني

عبد الله: إي واضح (بالابتسامة)

ريمـ: لا تقولون له إني سألت عنه(نزلت الدري(الدرج))

عبد الله: خخخخخخخخخخخخخخخخخ

ناصر: شفيك؟

عبد الله: هالاثنين تحفة هههههههههههه

ناصر: ما أدري متى راح يتنازلون و يعترفون بحبهمـ

عبد الله: يحتاجون مساعدة بسيطة و راح أقدمـ لهمـ هذي المساعدة

ناصر: ش قصدك؟

عبد الله: ريمـ قالت لا تقولون لمحمد إني سألت عنه و مشت.. يعني احنا ما قلنا لها "أوكي" و لا وعدناها ما نقول لمحمد صح؟


~*~

ما كلمتكمـ عن خالد من قبل

خالد ولد عايلة معروفة و كبيرة و متعود يحصل أي شي يبيه
أمه و أبوه متوفين و ما عنده غير اخته الكبيرة و اهي متزوجة و عندها ولد عمره 4 سنين
أقرب الناس له اخته و رفيجه(صديقه) سعود

~*~

(في بيت خالد)

خالد بفرح: أبــــــشـــــــرك سعود خطوبة مريمـ من سلمانوه انتهت.. يعني خلاص مريمـ بتكون لي

سعود: و انت ش دراك إنها بتوافق عليك؟

خالد بعصبية: و انت لازمـ تخرب علي وناستي!

سعود: جد خالد بعد كل الي سويته بالبنت تتوقع بتوافق عليك؟

خالد: غصب عنها بتوافق

سعود قرر يغير الموضوع: زين ترى صار لي نص ساعة قاعد عندك و ما سألتني ش تشرب

خالد:ههههههههههههه ما عليه من الوناسة نسيت كل شي.. ش تشرب؟

سعود: أي شي المهمـ ييب(جيب) شي لأني عطشان

خالد: من عيوني

سعود نطر خالد يطلع من الغرفة و بعدين خذا موبايل خالد و طلع منه آخر رقمـ تكلمـ معاه خالد و حفظه عنده
و بعد ما طلع من بيت خالد اتصل ع الرقمـ

مريمـ : نعمـ؟

سعود: مريمـ؟

مريمـ بداخلها"ش السالفة كل شوي متصل علي واحد يعرف اسمي": منو معاي؟

سعود: أنا واحد ما تعرفينه

مريمـ: دامـ إني ما أعرفك ش تبي؟ ليش متصل؟

سعود: أنا صديق خالد

مريمـ بعصبية: وصلت فيه الحقارة إنه يوزع رقمي على ربعه

سعود: لحظة مريمـ انتي فاهمة الموضوع غلط أنا متصل عليج بدون ما يدري

مريمـ: يعني أنا أخلص من واحد يطلع لي الثاني.. انتوا ش سالفتكمـ؟ خلصوا البنات و ما بقى غيري! روحوا شوفوا لكمـ بنت رخيصة أنا مو لهذي السوالف

سعود: أدري والله أدري

مريمـ باستغراب: زين دامـ إنك تدري ليش متصل؟

سعود: أبي أكلمج عن خالد

مريمـ: ما أبي أتكلمـ عنه

سعود: إنتي لا تتكلمين سمعيني بس أنا الي بتكلمـ

مريمـ سكتت

سعود:ترى خالد طيب ما عليج من أسلوبه بالكلامـ.. خالد يحبج صج مريمـ مو قاعد يلعب معاج

مريمـ: تتوقع إني بصدق كلامـ واحد أول مرة أكلمه بحياتي؟ و حتى لو كان كلامك صج أنا أحب واحد ثاني

سعود: و خالد يحبج و.. ما أبي أخوفج مريمـ بس خالد ما راح يخليج

مريمـ: مو بـكــيــفــه.. أنا عارفة اهو ولد منو بس ما يقدر يشتري كل شي بفلوسه

سعود: مريمـ خالد ما كان جذي.. خالد عمره ما أذى أي بنت ما كان يقرب إلا من البنات الي يبونه يقرب منهمـ.. البنات الي يبتسمون له و الي يبينون له إنهمـ يبونه.. إذا حس إنه البنت الي جدامه محترمة يبعد عنها بدون ما يكلمها

مريمـ: زين ليش يسوي جذي معاي؟

سعود: لأنه يحبج.. صدقيني مريمـ أول مرة أشوفه جذي

مريمـ: زين أنا ما علي منه.. أحب واحد ثاني و ما أتخيل نفسي مع غيره.. الله يخليك أخوي حاول تقنعه قول له يخليني

سعود: والله إني حاولت معاه من غير ما تقولين.. بس اهو مصر عليج

مريمـ قامت تبجي: الحب مو بالغصب

سعود سكت و قال بداخله"أستاهل أنا الي بلشت(ورطت) نفسي ليش أتصل عليها من الأصل صج إني ملقوف.. ألحين شلون تسكت"

سعود: انتي عطي خالد فرصة وبـ..

مريمـ قاطعته بعصبية: أعطيه فرصة على شنو! في البداية ما كان هامني بس ألحين أنا كارهته.. قول له مريمـ تكرهك

و سكرت الموبايل


~*~

(في كلية العلومـ)

ريمـ كانت تلعب بالقلمـ الي في ايدها لما حست بنظرات أحد عليها رفعت عينها و شافت محمد واقف عند باب القاعة
نبضات قلبها زادت, ريمـ بداخلها"غاب يومين بس و أحس نفسي ولهانة عليه كأني ما شفته شهرين.. أمبيه أنا شفيني! أنا مخطوبة لفهد عيب أفكر جذي"
نزلت راسها

(و بعد المحاضرة)

قبل ما تقومـ ريمـ من كرسيها وقف محمد عندها و قال: أبي أكلمج ضروري
ريمـ سكتت بس هزت راسها"أوكي"

طلعوا من القاعة و وقفوا في الممر الي بين القاعات

محمد: انتي مغصوبة عليه؟

ريمـ افتحت عينها مصدومة: شنو؟

محمد: أهلج غاصبينج عليه؟

ريمـ: لأ طبعًا

محمد بعصبية: عيل ليش وافقتي عليه؟

ريمـ: لأني مقتنعة فيه و أبيه

محمد: و أنا؟

ريمـ: انت شنو؟ انت مجرد زميل لي في بعض المحاضرات ما تعني لي شي و لا تهمني

محمد: دامـ إني مجرد زميل لج ليش يهمج ش يصير فيني؟ دامـ إنج مو مهتمة ليش تسألين عني من وراي؟

ريمـ سكتت و نزلت راسها

محمد: دامـ إنج ما تحبيني ليش تحرقين نفسج علي؟

ريمـ: لازمـ أمشي ألحين

محمد مسك ايدها عشان ما تمشي
محمد: انتي تحبيني بس تكابرين.. تبيني بس ما تبين تعطينا فرصة نكون مع بعض.. ليش ما أدري.. بس الي متأكد منه إني أهمج

~*~

(في غرفة لولوة)


لولوة تتصل على وليد الي مطنشها للمرة المليون و هالمرة رد عليها

وليد: نعمـ؟ خير؟ ش تبين؟

لولوة: ليش ما ترد علي؟ صار لي مدة أتصل عليك

وليد: مشغول بس ش أسوي لج مو راضية تفهمين

لولوة: وليد ليش تغير أسلوبك معاي؟

وليد: أقول لج مشغول عندي ضغط و انتي تقولين لي ليش متغير أسلوبك! صج إنه ما عندج احساس

لولوة: الله يسامحك

وليد: خلصي شتبين؟ ليش متصلة؟

لولوة: أمي قاعدة تضغط علي عشان أتزوج

وليد: زين تزوجي

لولوة و الدموع بعينها: وليد الله يخليك لا تسوي فيني جذي

وليد: ش سويت؟ ما جبرتج على شي

لولوة: الله يخليك صلح غلطتك استر علي الله يستر عليك

وليد: تبيني أتزوج وحدة ما أقدر أثق فيها؟

لولوة: ليش ما تثق فيني؟

وليد: انتي خنتي ثقة أهلج فيج شدراني إنج ما راح تخونيني.. لا يا حبيبتي انسي

لولوة: ترضى الي تسويه فيني يصير في خواتك؟

وليد: جب و لا كلمة هذا الي ناقص ..خواتي أشرف منج بمليون مرة.. أنا الظاهر عطيتج ويه وايد و انتي مو كفو.. لا تتصلين على هالرقمـ مرة ثانية مفهوومـ؟


~*~

(في غرفة مريمـ)

ريمـ: نعمـ؟ نعمـ؟ نعمـ؟ قلتي لهمـ ما تبين سلمان! انتي خبلة و إلا شنو مشكلتج بالضبط؟ تخلين واحد تافه مثل خالد يتحكمـ في حياتج!

مريمـ: مو بيدي انتي نسيتي اهو ولد منو؟

ريمـ: ما عليج منه مريوومـ لا تخلين أحد يبعدج عن الي تحبينه

مريمـ: طالع من يتكلمـ

ريمـ بتوتر: ش قصدج؟

مريمـ: انتي تحبين محمد و محمد يحبج و مع هذا راح تتزوجين فهد و محد غاصبج عليه مثلي

ريمـ: من قال! ما راح أفكر بمحمد حتى لو كان آخر ريال(رجال) بالكويت

مريمـ: لا تفكرين في محمد فكري في فهد أخوي.. ترى انتي قاعدة تظلمينه معاج

ريمـ: شلون؟

مريمـ: راح تتزوجين فهد و انتي تفكرين في محمد! شلون راح تعيشين حياتج مع واحد و انتي تتمنينه واحد ثاني؟

ريمـ سكتت

(فهد دخل الغرفة)

فهد: مريمـ.. (لما شاف ريمـ) ريمـ عندنا اليومـ (ابتسمـ)

ريمـ حست بتأنيب الضمير بعد كلامها مع مريمـ: هلا فهد

فهد: هلا فيج.. مريمـ ترى سلمان تحت و يبي يشوفج

مريمـ بخوف: ليش؟

فهد: يبي يتفاهمـ معاج.. من حقه يعرف السبب الي خلاج ترفضينه.. نزلي بسرعة

~*~

(في الصالة)

أول ما دخلت مريمـ الصالة وقف سلمان و سألها على طول:
ليش مريمـ؟ أنا ش سويت؟

مريمـ ما كانت تبي تعلق سلمان فيها و قررت تخليه يكرها

مريمـ: انت ما سويت شي.. بس تدري إنه الكل يبي الأحسن..بصراحة في واحد ولد عايلة معروفة معاي بالكلية و قال إنه يبي يخطبني و وافقت عليه

سلمان منصدمـ: كنتي تخونيني طول هالمدة؟

مريمـ: لأ ما خنتك.. اهو قال إنه يبيني و عشان ما أخونك قلت لك ما أبيك.. عشان أكون معاه

سلمان: كنت متوقع إنه مهما سويتي مستحيل أكرهج.. كنت غلطان بحياتي ما كرهت أحد كثر ما أنا كارهج ألحين

مريمـ حست قلبها يعورها بس ما كانت تبي تبين لسلمان

سلمان طالع مريمـ باحتقار و طلع من البيت

~*~

(في غرفة مريمـ)

ريمـ قاعدة تفكر في كلامـ مريمـ
ريمـ بداخلها"ليش يهمني وايد.. ليش حبيته.. المفروض ما أحبه.. أنا شلون حبيته"

فهد: ريمـ؟ وين وصلتي

ريمـ بصوت حزين: فهد أنا آسفة الله يخليك سامحني

فهد باستغراب: آسفة على شنو؟

ريمـ: فهد انت تهمني و أعزك بس مو بالطريقة الي تبيها

فهد طالعها و اهو منصدمـ

ريمـ كرهت نفسها بهذي اللحظة: الله يخليك سامحني

فهد: خلاص ريمـ لا تكملين.. فهمت قصدج

و طلع من الغرفة
ريمـ قعدت تبجي"أنا ش سويت! ليش ما سكتت"

مريمـ رجعت غرفتها و شافت ريمـ تبجي

مريمـ بخوف: ريووومـ شفيج ؟

ريمـ: قلت حق فهد إني ما أبيه(غطت ويها).. جرحته

مريمـ: إنه ينجرح ألحين أحسن مما ينصدمـ بعدين.. ريمـ انتي بنت عمي و صديقتي و فهد أخوي أحبكمـ انتوا الاثنين و تهمني مصلحتكمـ و مبين إنه سعادتكمـ مو مع بعض

ريمـ: تتوقعين راح يسامحني؟

مريمـ: فهوود طيب و قلبه أبيض و انتي تعرفينه عدل.. محد يسامح بسرعة مثله

ريمـ: بس الحركة الي سويتها قوية.. أول شي وافقت عليه و بعدين رفضته.. يا ريت يسامحني

مريمـ: لا تشغلين بالج أكيد راح يسامحج

ريمـ: الله يسمع منج.. ش صار مع سلمان؟

مريمـ ما قدرت تمسك دموعها: سلمان خلاص صار ماضي

ريمـ: مو معقولة الي قاعد يصير انتي تحبينه و اهو يموت فيج

مريمـ: قلت له إني أبي خالد عشان عايلته و فلوسه

ريمـ: مريوووووووووومـ انتي مينونة(مجنونة)! شلون تقولين جذي! أكيد كلامج جرحه

مريمـ: المهمـ إني وصلت للي أبيه.. خليته يكرهني (قلبها كان يتقطع و اهي تقول هالجملة)

ريمـ: مريمـ شفيج؟ في شي يعورج؟

مريمـ: لأ.. خالد راح يتقدمـ لي باجر و أبيج تكونين موجودة

ريمـ تطالعها منصدمة: راح توافقين عليه؟

مريمـ: ما لي خلق المشاكل يعني غصب عني بوافق

~*~

( اليومـ الي بعده في كلية العلومـ)

محمد كان ماشي مع ربعه (أصدقائه) و لفت نظره شي بالقاعة الي مروا يمها
ريمـ حاطة راسها على الطاولة

محمد: أوووه صح ما خذيت أوراق مقرر 205 و باجر امتحاني بروح آخذهمـ

عبد الله: يا عيني ع الشطارة الي نزلت مرة وحدة

محمد: انت عارف إنه درجتي في الامتحان الأول مو حلوة و ما لي خلق أعيد المادة

ناصر: أوكي إذا خلصت من الأوراق تلقانا بالكفتيريا

عبد الله: و انت طول اليوم يوعان(جوعان)؟

ناصر: و انت طول اليومـ تتحلطمـ جنك (كأنك) عيوز ماكلين عشاها!

أول ما مشوا عبد الله و ناصر دخل محمد القاعة بسرعة و سكر الباب وراه

ريمـ رفعت راسها أول ما حست بحركة الباب و قالت بعصبية: محمد!

وقفت و قربت منه و اهي معصبة: شتبي؟ ليش دخلت حياتي؟ ما كان المفروض تدخل حياتي ما كان المفروض أعرفك خربت كل شي

محمد طالعها و اهو مستغرب من كلامها بس ما علق

ريمـ: كل شي كان ماشي تمامـ لحد ما دخلت انت حياتي.. كان المفروض أتزوج فهد

محمد قاطعها: كان؟ كان فعل ماضي؟ كان؟

ريمـ بعصبية: إي لأنه حضرتك خربت كل شي

محمد بفرح: يعني رفضتيه؟ قلتي له ما تبينه؟ يعني ما راح تتزوجينه؟

ريمـ تذكرت ردة فعل فهد لما قالت له ما تبيه و تضايقت: إي.. اهو يستاهل وحدة أحسن مني.. أنا ما أستاهله

محمد سأل مرة ثانية: يعني خلاص ما راح تتزوجينه؟ فديييييييييتج كنت أدري إنج تحبيني

محمد من وناسته بالخبر ما حس بنفسه و اهو يحضن ريمـ

ريمـ انصدمت من حركته و وخرت عنه بعصبية: من قال إني أحبك! أصلن أنا أكرهك

و طلعت من القاعة

محمد تنح و سأل بصوت عالي: منو الي داعي علي عشان أحب وحدة مينونة(مجنونة) مثل هذي!

~*~
(في غرفة مريمـ)

أمـ فهد: يا الله مريوومـ خالد يبي يشوفج

مريمـ: اهو شايفني من قبل في الكلية يعني يعرف شكلي

أمـ فهد: إي بس يبي يتكلمـ معاج يا الله نزلي

مريمـ: ماااني نازلة.. قولوا له أي شي

أمـ فهد: مريوومـ نزلي لا تفشلينا

ريمـ: خلاص خالتي 10 دقايق و تنزل

أمـ فهد طلعت من الغرفة

ريمـ: مريومـ انتي مو مجبورة عليه مو لازمـ توافقين عليه قولي لأبوج أو فهد السالفة و تنحل المشكلة

مريمـ: قصدج تبدي المشاكل؟ خالد ما راح يسكت و فهد بعد ما راح يسكت و نطلع من مشكلة و ندخل بمشكلة.. ريومـ أنا بعد ما خسرت سلمان خلاص مو هامتني نفسي

طلعت مريمـ من الغرفة و نزلت تحت عند خالد و اهي متضايقة

~*~

محمد تقدمـ لريمـ و سالمـ طلب وقت عشان يسأل عن محمد و ياخذ راي ريمـ بالموضوع
ريمـ كانت محتارة

مريمـ: أنا حاسة إنه محمد راح يسعدج و بعدين يكفي إنكمـ انتوا الاثنين تحبون بعض

ريمـ بداخلها" ش أسوي بالسعادة إذا افترقنا.. السعادة راح تتحول عذاب بعد ما نفترق عن بعض"

مريمـ: شفيج ساكتة؟

ريمـ: شدراج إنه حب؟ يمكن يهمني و أهمه لأنه تعودنا على بعض.. يعني لأنه نشوف بعض تقريبًا كل يومـ.. يمكن..

مريمـ: انتي تجذبين علي أو على نفسج؟

سكتت ريمـ

مريمـ: شوفي أنا عندي اقتراح.. انتي صلي استخارة و شوفي ش يصير معاج

ريمـ: صليت

مريمـ: أوكي؟

ريمـ: حلمت فيه يوكلني عسل.. و قبل ما تسألين كان الحلمـ مع أذان الفير(الفجر)

مريمـ: و محتارة بعد مع الويه! خلاص يعني لازمـ توافقين عليه

~*~

(في بيت عادل)

أمـ فهد: عين و ما صلت على النبي

بو فهد: و انتي كل شي عندج عين!

أمـ فهد: الحسد مذكور بالقرآن

بو فهد: ليش ما تقولين قضاء و قدر

أمـ فهد: كل عيالي مرة وحدة .. ريمـ رفضت فهد و مريمـ ما تبي سلمان.. و لولوة ما أدري شفيها

بو فهد: الله مو كاتب لفهد و ريمـ و لا لسلمان و مريمـ يتزوجون شدراج يمكن نصيبهمـ أحسن؟

أمـ فهد: بس أنا حاسة إنه مريومـ ما راح تكون مرتاحة مع خالد

بو فهد: اهي موافقة عليه خليها بكيفها

أمـ فهد: قلبي حاس إنه في شي مو زين راح يصير بين يومـ و ليلة ينقلب كل شي! كل شي كان ماشي تمامـ و فجأة انقلب الوضع أقول لك عييين

بو فهد: ذكري الله يا أمـ فهد

أمـ فهد: لا إله إلا الله

~*~

(في غرفة لولوة)

مريمـ: انتي ش تقولين؟ حراااامـ عليج لولوة.. انتي ما ضيعتي نفسج بس ضيعتينا كلنا معاج.. شنو ذنب أبوي الي يتعب عشانا ليل و نهار.. أمي هالمسكينة الي تبي تفرح فينا و تشوف عيالنا.. فهد.. فهد أخوي الغالي الي وثق فينا.. ليش سويتي جذي ليييييييش؟

لولوة: كاافي يا مريمـ الي فيني كافيني

مريمـ: انتي تستاهلين الي صار فيج بس امي و ابوي و فهد شنو ذنبهمـ.. حسبي الله و نعمـ الوكيل فيج و في كل بنت باعت شرف أبوها و عرض أخوها عشان كلمة"أحبك"

لولوة: والله العظيمـ إني ندمانة

مريمـ: ندمج ألحين ما ينفع.. ما يصير نسكت.. لازمـ نقول لأمي عشان تقول لأبوي و يتصرف مع هالحقير

لولوة: لاااا مريمـ لا الله يخليج سوي أي شي بس لا تقولين لأبوي

مريمـ: شلون! لازمـ يعرف في الي صار.. يا حبيبي يا يبه الله يكون بعونك والله إنك ما تستاهل(دمعت عيونها) حرااامـ عليج يا لولوة أبوي عمره ما قصر علينا بشي ش راح يصير فيه لما يعرف.. رفضتي كل عيال الحلال الي تقدموا لج عشان تنزلين راسه الأرض!.. حسبي الله و نعمـ الوكيل فيج.. حسبي الله و نعمـ الوكيل فيج

مريمـ مسكت قلبها: آآآآه

لولوة خافت: مريمـ شفيج؟

مريمـ فقدت توازنها و طاحت ع الأرض
لولوة: مــريــمـ! مريمـ شفيج؟ ردي علي!

أمـ فهد و أبو فهد دخلوا على صراخ لولوة

بو فهد : ش صاير؟ ليش تصرخين!

أمـ فهد شافت مريمـ ع الأرض: يمه بنتي.. مـــريـــمـ.. (راحت لها بسرعة و حطت راسها بحضنها)

فهد توه داخل البيت: شفيكمـ صوتكمـ واصل للشارع!(دخل غرفة لولوة و شافهمـ) ش صاير؟ شفيها مريمـ؟

أمـ فهد: ما أدري.. اتصلوا ع الاسعاف بسرعة شفيكمـ واقفين جذي!

~*~

(في بيت سالمـ)

سالمـ داخل البيت و ينادي ريمـ

سالمـ: ريــــــــــــــمـ

ريمـ نزلت من الدري(الدرج) بسرعة
ريمـ: نعمـ عمي؟

سالمـ: بدلي ملابسج بسرعة و تعالي

ريمـ: ش السالفة؟ وين بنروح؟

سالمـ: مريمـ بالمستشفى و بنروح نطمن عليها

ريمـ مسكت قلبها: شفيها؟

سالمـ: ما أدري بدلي بسرعة خل نشوف ش صاير

~*~

(في المستشفى)

الدكتور: عظمـ الله أجركمـ .. ادعوا لها بالرحمة

بو فهد: لا حول و لا قوة إلا بالله.. إنا لله و إنا إليه راجعون

سالمـ حضن أخوه عادل(بوفهد) الي كان يردد"لا حول و لا قوة إلا بالله" باستمرار

فهد مسك راسه و قعد على أقرب كرسي و نزلت دموعه

لولوة حست إنه ريولها"رجولها" مو شايلتها و نزلت ع الأرض و قعدت تبجي "أنا السبب.. أنا السبب.. يا ريتني أنا الي مت و لا إنتي يا مريمـ"

أمـ فهد ما قدرت تتحمل الخبر و أغمى عليها و ودوها غرفة ثانية عشان ترتاح

أما ريمـ فكانت واقفة مكانها.. ملامحها ثابتة و ما نزلت من عينها و لا دمعة
قرب منها سالمـ بعد ما راح بو فهد(عادل) مع زوجته يهديها

ريمـ سألته: مريمـ ماتت؟

سالمـ حرك راسه "إي"

ريمـ : يعني ما راح أسولف معاها مرة ثانية؟ ما راح أشوفها و لا أقعد معاها؟.. لحظة في شي غلط.. احنا اتفقنا يكون عرسنا بيومـ واحد و اتفقنا إنه نسكن يمـ"جنب" بعض و اتفقنا نزوج عيالنا لبعض.. شلون تموت؟

سالمـ: ذكري الله ريمـ.. هذا يومها

ريمـ مو قادرة تصدق: بس أمس كنا نسولف مع بعض .. أمس كانت موجودة.. ما أبيها تموت

سالمـ: هذا قضاء الله و لازمـ نرضى فيه.. قدر الله و ما شاء فعل

هني نزلت دموع ريمـ و سألت مرة ثالثة بصوت واطي: ماتت؟

(دخلت ريمـ الغرفة الي فيها جسمـ مريمـ بدون روحها)

ريمـ: مريمـ؟ مريمـ زواجي من محمد قرب شلون أحتفل بعرسي بدونج؟ يعني ما راح تحضرين حفلة تخرجي من العلومـ و لا راح أحضر حفلة تخرجج من الهندسة؟ لحظة صج إني هبلة شلون أحضر حفلة تخرجج و انتي ما راح تحضرينها أصلن هههههههه.. (دمعت عينيها) مريمـ ضاقت الدنيا بعيني بعد فراق أبوي و ألحين بعد فراقج صارت ظلمة.. كنتي صديقتي الوحيدة.. كنتي اختي.. منو الي راح أشاركه أسراري ألحين؟ منو يشاركني همومي؟ منو يفهمني و ينصحني؟.. أهون عليج تروحين و تخليني بروحي؟.. (سكتت شوي) يقولون الميت يحس و يتعذب إذا زعلوا عليه الي يحبهمـ.. مو قصدي أعذبج بس أنا متعذبة (غطت ويها)..

و بهذي اللحظة دخل خالد.. ريمـ وخرت عن مريمـ و وقفت بعيد تشوفه

خالد : مريمـ.. مريمـ لا تروحين عني .. مريمـ ( ويهزها ) لا تروحين وتخليني لااااااا ( يحضنها ويصرخ بطريقه هستيريه )
لا تروحين ما تسمعين ! ردي علي لا تخليني.. كلميني ردي علي.. لا تروووحين الله يخليج .. أنا آسف والله آسف سامحيني.. تبيني أطلع من حياتج؟ بطلع من حياتج ... تبين سلمان؟ خلاص حبيبتي رجعي له .. قومي نروح لسلمان و كملي حياتج معاه.. أوعدج أطلع من حياتج و ما تشوفيني مرة ثانية بس قومي.. الله يخليج قومي

ريمـ ما قدرت تتحمل أكثر و طلعت من الغرفة
شافت محمد ماشي و يدور شي و عرفت على طول إنه يدورها

ريمـ بصوت عالي: مـــــحـــــمـــــد

محمد شافها و قرب منها و قبل ما يستوعب ش صار حس فيها تحضنه بكل قوتها و تبجي

محمد مستغرب من الوضع لأنه هذي أول مرة يحس إنه ريمـ صج تبيه و محتاجته

ريمـ: مريمـ ماتت محمد.. خلاص مريمـ راااحت

محمد: لا حول و لا قوة إلا بالله.. إنا لله و إنا إليه راجعون

محمد حاول يوخر راسها من جتفه(كتفه) عشان يشوفها بس ريمـ مسكته أقوى من قبل

ريمـ: محمد الله يخليك لا تروح عني.. لا تخليني بروحي

محمد: ما راح أخليج راح أبقى معاج طول عمري

بدال ما تهدى زاد بجي(بكاء) ريمـ "يا ربي ارحمني ما أبي أشوف أحد ثاني من الي أحبهمـ يموت قبلي.. قلبي ما يتحمل أي فراق ثاني.."

بعد فترة ريمـ هدت شوي و وخرت عن محمد و قامت تمسح دموعها و كانت تبجي بس أخف من أول
محمد مسك ايدها و قربها منه و حس براسها على جتفه (كتفه) مرة ثانية

ريمـ سمعت أحد يناديها و التفتت جهة الصوت شافت سلمان

سلمان: ريمـ.. وين مريمـ؟ خالد اتصل علي و يقول.. (ما قدر ينطق كلمة"ماتت") وينها؟

ريمـ أشرت له على غرفة

سلمان ما تحرك من مكانه و سألها: صج كلامه؟ مريمـ..

ريمـ حطت راسها على صدر محمد و قالت بصوت حزين: اطلب لها الرحمة

سلمان: شلون؟ ش صار؟

ريمـ: مرت بضغوط نفسية وايد و صارت فيها جلطة بالقلب

سلمان: ضغوط نفسية؟

ريمـ: مريمـ كانت تعبانة لأنها تبيك سلمان.. خالد ما كان يعني لها شي

سلمان: بس اهي قالت..

ريمـ قاطعته: قالت الي قالته عشان تخليك تكرها و تكمل حياتك بدون ما تندمـ عليها كانت تبيك تنساها

سلمان مشى بخطوات ثقيلة للغرفة الي أشرت له عليها ريمـ
دخل و شافها على السرير ما تتحرك و ويها شاحب
مسك ايدها و حس بأطرافها باردة

سلمان: ليش سويتي فيني جذي مريمـ (بصوت حزين) .. ليش سويتي فينا جذي(بعصبية).. ليش جذبتي علي؟ ليش بعدتيني عنج؟ ليييييييش؟..مريمـ أنا كنت أتمنى يصير أي شي عشان يوقف زواجج من خالد بس والله العظيمـ ما تمنيت موتج.. إني أشوفج عروس تنزفين لغيري أهون علي مليون مرة من إني أشوفج جذي ألحين.. حسبالج في الي سويتيه بتخليني أنساج؟ عمري ما راح أنساج.. ما أقدر أنساج..


~*~

(محمد و ريمـ قاعدين على الكراسي الي في المستشفى)

ريمـ: شلون أنساها؟

محمد: مو لازمـ تنسينها.. ذكريها بالخير دايمـ و لا تنسينها من دعائج"دعائك"

ريمـ قالت و الدموع مالية عينها: محمد لا تخليني.. أوعدني إنه ما نفترق

محمد مسك إيدها: ريمـ أنا ما أعلمـ الغيب.. ما أقدر أوعدج بشي أنا مو متأكد منه

ريمـ: يعني احتمال نفترق؟(الخوف واضح بصوتها) يعني بنفترق؟

محمد بحنان: بقول لج شي متأكد إنج عارفته..كلنا فارقنا أشخاص نحبهمـ لأنه الفراق شي طبيعي بحياتنا.. المهمـ إنه نحاول كثر ما نقدر نكون لنا ذكريات حلوة للأشخاص الي نحبهمـ عشان نتذكرهمـ فيها لما ما يكونون معانا

ريمـ: يا ريتنا بدون احساس

محمد: وقتها ما راح يكون للحياة قيمة.. ما نقدر نعرف طعمـ السعادة إلا إذا ذقنا الحزن.. إنج تحبين و ينكـسر قلبج أحسن من إنج ما تحبين.. تخيلي نفسج ما تحبين أحد و لا أحد يحبج.. راح تكون حياتج ما لها طعمـ

(في نفس المستشفى بعد سنة)

ريمـ: أقول لك شيل ايدك عني انت ما تفهمـ !

محمد: أدري إنه مو قصدج حياتي

ريمـ: محمد وخر عني

محمد يتلفت على الناس الي قاعدين يطالعونهمـ: ريومـ حبيبتي حياتي عمري الله يخليج وطي صوتج الناس قاعدين يطالعونا

ريمـ: مالي شغل فيهمـ آآآآآآآآآآه

محمد: اششششش قصري صوتج

ريمـ: إي طبعًا تعطي أوامر بكل سهولة مو انت الي قاعد تولد آآآآآآآآآه

سالمـ و زوجته نوال و ولدهمـ يوسف دخلوا المستشفى و راحوا لهمـ
سالمـ: حسبي الله عليكمـ فشلتونا سكتوا

ريمـ: آآآآآآآآآآآآآآآه

يوسف: ريموه ما بقى أحد بالكويت ما عرف إنج راح تولدين

ريمـ: اسكت عني مو ناقصتك آآآه

محمد يكلمـ سالمـ: شفتها يا عمي ما حلا لها تولد إلا الساعة 3 الفير(الفجر)

ريمـ : هذا ولدك ما أدري بنتك الي قررت تطلع ألحين

محمد: لأ ولدي.. إن شاء الله ولد

ريمـ: يا رب تكون بنت

نوال: جان سويتي سونار

محمد: ما أدري عنها حاولت فيها و ما رضت.. تقول تبيها مفاجأة

ريمـ: آآآآآآه ترى في وحدة واقفة هني و راح تولد

سالمـ: ولد و إلا بنت المهمـ العافية

نوال: إي صح

ريمـ: مــــــــــــحــــــــــمـــــــــــــــد

محمد: عيووووونه

ريمـ: مالت عليك و على عيونك تحرك سو شي

محمد: إن شاء الله

~*~

(بره غرفة الولادة)

محمد رايح راجع ينطر يسمع خبر ولادة ريمـ

سالمـ: أقول محمد

محمد: هلا عمي

سالمـ: ألحين إذا ريمـ يابت(جابت) ولد شنو راح تسمونه؟

محمد: بصراحة أنا ودي أسميه عبد الرحمن على اسمـ أبوي الله يرحمه و اهي ودها تسميه فيصل على أبوها رحمة الله عليه و لحد ألحين ما اتفقنا

سالمـ: عندي لكمـ اسمـ أحلى.. شرايك باسمـ سالمـ؟

بهذي اللحظة طلعت الدكتورة

محمد: بشري دكتورة؟

دكتور:ألف مبروك يت(جت) لك بنت قمر و الحمد لله على سلامتها و سلامة الوالدة

نوال: من كثر ما تحنون ع الولد

محمد: بنت؟ بنتي؟ صار عندي بنت.. صرت ابو (حضن سالمـ بفرح)

(داخل غرفة ريمـ)

ريمـ: الحمد لله إنك علمي و تدري إنه الريال(الرجال) اهو المسؤول عن حمل زوجته بولد أو بنت

محمد لحد ألحين متنح: انتوا مستوعبين إنه صار عندي بنت؟ صرت أبو؟ فديييييييييتها بنيتي

سالمـ: ريمـ حامل 9 شهور و ما استوعبت إنه راح تصير أبو إلا ألحين؟

نوال: انت تنحت شهرين بعد ما يبت يوسف.. شهرين و انت كلما شفت أحد تقول له صرت أبو عندي ولد اسمه يوسف

سالمـ: يا حبج للفضايح

ريمـ طالعت الأرض: محمد

محمد حس إنه نبرة صوتها تغيرت و لف عليها: عيونه

ريمـ: ودي نسميها مريمـ (دمعت عيونها)

محمد قعد يمها و باسها على راسها: إن شاء الله..(لف على سالمـ و نوال و يوسف) ش رايكمـ في بنتي؟ مريومة طالعة على منو؟ علي أنا و إلا على أمها؟


الـــــنــــهــــايــــة

◦˚ஐ˚◦๑ ~!مضمون القصة !~ ๑◦˚ஐ˚◦

الحياة كالمطار.. قادمون و مغادرون

و الفراق درب صعب.. لكن لابد من المرور به
لذا اصنع ذكريات تجمعك بمن تحب لتستعرض هذه الذكريات حين تشتاق إليهمـ

ملاحظة:
الي تعجبه القصة و يبي ينقلها لمنتدى ثاني فهذا الشي يسعدني بشرط إنه يذكر إنه كاتبة القصة Broe Fan أو Phloe Fan الاثنين واحد ^.^

[phloe fan]

◦˚ஐ˚◦๑ ~!خلف الكواليس !~ ๑◦˚ஐ˚◦

- الفكرة خطرت في بالي لما كنت أقرا قصة "الخوف من الحب" لفتت إنتباهي شخصية ثانوية بالقصة اسمها مي كانت موجودة في بعض أجزاء القصة و ظهورها بسيط و كانت طول القصة بعمر 6 سنين.. مي فقدت أمها بس أبوها كان عايش في كل أجزاء القصة.. بس تقدرون تقولون اقتبست شخصية ريمـ من شخصية مي =)
طبعًا الي قاري قصة الخوف من الحب راح يشوف فرق كبيير بينها و بين قصتي المتواضعة

- بصراحة أول ما قررت أكتب القصة كنت حاطة في بالي إنه محمد يموت بالجزء الأخير بس بنت خالتي قالت لي إذا ذبحتي محمد راح أذبحج و مثل ما انتوا عارفين العمر مرة وحدة
^_^!

فخليت مريمـ تموت بالجزء الأخير << لازمـ يموت أحد ^.^

- كنت راح أخلي أبو محمد من شهداء الكويت لما دخل صدامـ الكويت 1990 .. يعني إنه استشهد لما كانت أمـ محمد حامل فيه ..بس مشيت بالأحداث بسرعة و ما كان في مجال أتكلمـ عن استشهاده
يعني الفكرة الي كنت بوصلها إنه محمد يقول لريمـ إنه فراق شخص عندك ذكريات معاه أهون من فراق شخص تتمنى تعرفه و تكون لك ذكريات معاه

◦˚ஐ˚◦๑ ~!دقيقة من وقتك !~ ๑◦˚ஐ˚◦

إذا ممكن تعطوني شوي من وقتكمـ و تجاوبون على هالأسئلة علشان أحسن من كتابتي

- أكثر موقف أثر فيك؟
- موقف عجبك؟
- موقف تحس إنه ما له داعي و المفروض ينحذف؟
- منو أكثر شخصية عجبتك بالقصة؟
- شخصية ما لها داعي و المفروض تنحذف؟
- تحس القصة مبالغ فيها؟ في موقف تحس إنه مبالغ فيه؟

في النهاية أتمنى إنه أسلوبي كان بسيط و مفهومـ
و أتمنى إني ما مللتكمـ لأنه أمي تقول إني ذكرت تفاصيل وايد ما لها داعي و أسلوبي كان ممل =(

أحب أشكر كل شخص وقف على قصتي و كتب رد
ما عندكمـ أي فكرة ش كثر شجعتني ردودكمـ بما إنه محد معطيني ويه بالبيت ^_^!

شرايكمـ فيني ما أنفع أنافس فجر السعيد في كتابة القصص؟ << الأحلامـ ببلاش لحد يقومني من حلمي ^.^

~*~

[رَنْــد]

وآآآآآو و يآآآآآآآي و مآآآآمـ <--- انهبلت البنت
من كثر مآمندمجه في القصه جآتني قشعريره..
وماخليت البآرت الا لما خلصته ^^؛

.,،

ليي بآآك.,

:032:

[phloe fan]

ههههههههههه

اسمـ الله عليج من الهبال رنوودة =)

بانتظارج عشان أعرف رايج في البارت الأخير =)

[رَنْــد]

بآآآكـ .,

:lex_14: < ---- هههه شكله مصعوق بكهربا



بصراحة أول ما قررت أكتب القصة كنت حاطة في بالي إنه محمد يموت بالجزء الأخير بس بنت خالتي قالت لي إذا ذبحتي محمد راح أذبحج


مآ بنت خآلتج بس الي بتذبحج .. أنآ بعد مع بنت خآلتج :character0040:



فخليت مريمـ تموت بالجزء الأخير << لازمـ يموت أحد ^.^


صراحه مآدري ليش في القصص لازمـ لازمـ أحد يموت .!!
انزين كان اختريتي لولوه الشيطانه <--- تفكيرها اجرامي :bluebiggrin:


- أكثر موقف أثر فيك؟


لمــا مريمـ مآتت وكيف كان موقف ريمـ وسليمان.,

- موقف عجبك؟

ممممم
كل الاشياء والضرابات الي صارت بين ريم ومحمد قبل عن محمد يغير اسلوبه معها ويعترف بحبه
:bluebiggrin:

- موقف تحس إنه ما له داعي و المفروض ينحذف؟


لما لفت عليه شافت إنه ويهه قريب منها حييل لدرجة إنها حست بنفسه الدافي على ويهها

ريمـ بداخلها"مفرش أسنانه بمعجون كلوس آب بنكهة النعناع.. امممممممـ أحب هالمعجون"

محمد بداخله"عطرها روعة .. ودي أقرب من رقبتها عشان أشمه عدل"

- منو أكثر شخصية عجبتك بالقصة؟

ناصر.,

لالا أمزح ., "ريمـ" طبعاً:pleasantry:

في النهاية أتمنى إنه أسلوبي كان بسيط و مفهومـ

اسلوبج كان واايد حلو عجبني حيييل..


و أتمنى إني ما مللتكمـ لأنه أمي تقول إني ذكرت تفاصيل وايد ما لها داعي و أسلوبي كان ممل =(


بالعكس هالتفاصيل هي الي تحلي القصه.,


بما إنه محد معطيني ويه بالبيت ^_^!


ههههههههههههه

بس عيل تعآآلي دوومـ هني.,
:thumb_yello:


شرايكمـ فيني ما أنفع أنافس فجر السعيد في كتابة القصص؟ << الأحلامـ ببلاش لحد يقومني من حلمي ^.^


ايييه تنفعين ليش لآ ؟! وتنفعين بعد تكوني مثل عواطف البدر

عندج خيآل وآقعي و وآسع ., أتمنى انج مآتتخلين عن موهبتج الحلوه
الي يتمنونها النآس<---- وانا اولهمـ ^^؛

ألف ألف شكر لج على هالقصه الفنتق .,
ومبروك على اتمامها.,

وان شاء الله ., اذا الله كتب لنا عمر
فأنا في انتظار قصصج القادمه يآسكر.,

:yes:

[Miu]

مرررره مرررره رووووعه القصه :)

يوم ماتت مريم كنت بصيييح p:

مررره اثرت فيني القصه :'(

لا ننحرم من ابداعاتك ونشوفك انشاالله بروايه جديده D:

[Ṃịṡṡ Ŀǿǿϋέ]

وآلله قِـقِـصَصــه مَررة مَررة حَـمـإآسِسِـيــه ..:al3assi.com-9fcafec

يِـسَسَسَسَـلموٍوٍوٍوٍ قَـلبوٍوٍ ..ق1ق1


مَـع خَــإآلِـصص حـبيْْ ..:get-6-2010-almlf_co

[همس الخواطر ..]

انتهت القصه والله عورت قلبي وعيني تغارقت
في تكلمله ولا لا ارجوك ردي؟