"{:مســــــرح الأســـــــرهـ:}" [الأرشيف]

("غنج نجد")

30-12-2007, 09:48 PM

http://www.tntup.com/photo/img5/a323aad322bc5eefd7e07b54340df5b0/3.gif

http://www.tntup.com/photo/img5/587bad3a9af81bb33c34b122b2eed658/2.gif

http://www.tntup.com/photo/img5/06b097f2e6f7ddabad686167f122b078/Untitled-1.gif

هنا احبتي على مسرح الاسره

حيث نلتقي دوماً بدون موعد مسبق

تجمعنا المحبه والألفه وصدق النوايا الحسنه

نلتقي حيث لاقيود تكبلنا...ولاحواجز تنمنعنا عن الحديث

نحنُ اماما بعض من اجل عونِ بعض

في امور الحياة..

http://www.tntup.com/photo/img5/a1edd8b5236092439dc77eabe56d9d7e/فاصل.gif

نحمل في جعبتنا وفي مسرح اسرتنا مشاهدنا و تجاربنا في الحياة البسيطه التي

مررنا بها.. لعلنا من خلالها نتقاسم..في حلول مشاكلنا ...

احبتي كل مايحمله قلبك من امور يصعب حلها لديك دعينا نشاركك

بها لأننا اسره واحده ...في هذا المنتدى

دعونا نقضي وقت ممتع ...معن

http://www.tntup.com/photo/img5/a1edd8b5236092439dc77eabe56d9d7e/فاصل.gif

نتحدث ..ونساعد..ونقوم بعمل جميل.. ونفيد بعضنا

ولن اضع أي قوانين تربطنا ..

هنا لكم المسرح بأكمله اعرضو ماشئتم من

قصص حياتكم ومواقفكم وكل مالديكم

ودي ومحبتي لكم

‘

LOVECITY

30-12-2007, 09:54 PM

حبيبتي وصديقتي

فكرة رائعه

اسلوبك رائع في عرض موضوعك

تنسيق وترتيب مبتكر

رائعه حبيبتي

والأروع هو أن يجمعنا هنا هذا المسرح

الذي من خلاله سنشاهد

ونوجد الحل من خلال الأحداذ الأسرية

على خشبة مسرح حياتنا الأسرية

رائعه ومميزة

بكل تأكيد ستكون لي عودات هنا

للمشاركة بالحلول

ودمتي بكل الحب
بقلب مدينة الحب

("غنج نجد")

01-01-2008, 03:14 AM

هلا فيك ياقلبي
الاروع هو تواجدك ..ويسعدني دوماً ذالك

‘
هاه مدونتي عندك اي شي تبين تسولفين عنه انا تحت امرك
بتكي شكلي هنا ...وبطقها سوالف بس بجيب دفايتي معي <<<لول

:023:

وانا اصلا هذا حالي مع هالقسم مالي الا لانتظار احس اني بمقطعه
وبعد كل فتره يمر احد علي :017:
الله يعين بس
‘

![الأماكـن]!

01-01-2008, 04:20 AM

ههههههههههه الله يلعن إبليســـك غنوووج
حلووووووووه بتكي لاوبعد بتجيبين دفايتك هع هع هع
ياحووبي لكـ بس بصراحه هالقسم مانيب أجيه واجد عشـآن كذا تلقينه مظلم تبون أجيب لكم كشـآـآف والا شمعه والا سراج~>>
خخخ خربتهــآ سراج مره وحدهـ لكن شوفي بجد انا اللي شكلي بتكي لاني احب الشي اللي مافيه قوانين لان بجد القوانين تذبحني وربي الا ان كانت بحدود معقوله
موب على الملح والملاح..~>>
تعرفين هالمثل ولا لا وقسم يبي لي تسطييير بقوه
بس بجد يصلمو على هيك موضوع وأتوقع بيلاقى تفاعل وصــدى كبير بس لاتتفاجئين ان صار العكس
لان كما تعلمين النـآس هجدهـ لاحس ولاخبر وكثير ان قالوا مشكوره ..

بظل متابعه للموضوع حتى لو ماشاركت فيه بس أحترووني لازم أبطح يوم من الايام شي هووني بـإذن المولى عز وجل وترى الحكي والمدح اللي قلته
عن نفسي فوق كله إستهبال عان لاتقولون البنت خذت بعمرها مقلب هوع
سلام

("غنج نجد")

01-01-2008, 04:47 AM

هههههههههههههههههههههههههههههههه

الامااااااااكن اعقلي يابت بس تكفين جيبي معك ماطور لان ماطوري

خربان بقوه :017:

بس الله الله لاتخلينا وخلينا نجيب سوالف نستفيد منها

ومشاكل <<اعوذ بلله ماسكه معها الا تحل مشاكل خخخخخخخ

اسعدني وجودك ياااامكونه

ودي لكِ

‘

LOVECITY

01-01-2008, 04:48 AM

هههههههههههههههههههه

والله حتى الدفاية بتبرد

ومحد بيمر <<<ماتعرف تحطم أبد

المهم حبيبتي هالأيام وبكل أسف شفنا كثير وكثير

بمجرد أنه الإنسان يكبر بالعمر يعني تلقينه امس
امه تأكله واليوم لما كبر شوي
قام هو يأكلها هم وكدر هو وابوهم
يعني بكل أسف الإحترام صار مو موجودين
في أغلبيه الأبناء وخاصه في فترة المراهقه
والمصيبة الأدهى أنهم مو راضين يسمعون النصيحه
من الغير كونهم كبروا من وجه نظرهم
على بالهم أنه الإنسان اذا كبر يعق بوالدية
مادروا أنه بالمفروض يزيد إحترامهم لهم

معاي بهذا الرأي ؟؟

("غنج نجد")

01-01-2008, 04:56 AM

هلا حبي تحطيمك انتي بذات ياهو يرفع معنوياتي بقوه:002:

‘

جيتي على الوتر الحساس ..مااحب ابدا اتعامل لا مع الوالدين

ولا مع كبار السن عموما هالامر يقطع قلبي

محد يدري ممكن الدنيا تدور واصير انا بموقفهم

بس هي مسئلة تربيه من الصغر فيتعود عليها

وينزرع هالشي بقلبه ومايقدر انه يرتكب خطئ معهم

بس للاسف حال المجتمع اليوم مايبشر بخير

اذا هم من الحين قاعدين يرفعون اصواتهم على اهاليهم

بحكم التحرر والغزو الي جاينا فاكيد بتلاقين جيل مايخاف ربه في

اهله والعياذ بلله

ان شاء الله اني ماني منهم<<احلفي:040:

‘

![الأماكـن]!

01-01-2008, 05:55 PM

مدونــه ..

إيه بجد يــآكثرهمـ هالأيــآآمـ اللي مايحترمون أهلهمـ ..

وقسمـ يوم أشوف كذا بالمسلسلات وهي مسلسلات أحس ني بصيــح!

شلـوـون لو كـآن صــدق كـآن ببطـح اللي قدامي ..وبقعد أهـآووش ..وأسوي منـآحه والعيـآذ باللهـ

لا أنـآ اللي بجد أحس أني أروووح فيهــآ وأتعب لمن أشوف مثلا واحد قاعده تكلمه أمه

يقوم يرد عليهـآ بصراخ ويدّفهـآ على وورى يعني مدري كيف اشرح المهم أني ودي أسطرهم وربي

والله يهدي الجميــع..
_ _ _ _ _ _ _ _

غنووج

يــآـآدوبـآ إسكتي فطست ضحكـ على ماسكه معك المشاكل وتبين تحلينهـآ هوـوع p;

![الأماكـن]!

01-01-2008, 10:36 PM

("غنج نجد")

01-01-2008, 11:45 PM

هههههههههههههههههههههههههههههه<<<ميته ضحك الله ياخذ ابليسك

عاد اليوم مخي مقفل امس ودي احل اليوم لا:p

‘

بنسبه للمشكله الي قلتي عليها ياغاليه...شي يضيق الصدر

اذا شفنا عيال ومسلمين ومن امة محمد ماهم حاسين في قيمة اسلامهم

ولايصلون وبلعافيه يصومون ويتأففون بعد

احسهم لاهين بدنياهم..مع انهم كثير مايشوفون امور تقطع القلب

الا انهم لايتعضون الهدايه بيد الله سبحانه

وهالمشكله ماهي من الاسره ...الاب والام يربون بس اذا الشخص

ماربى نفسه تربيه دينيه وخاف من الخالق ...مافيه اي احد

يقدر يهديه الا باذن الله

ماعندي حل سوى اننا نسئل الله لهم الهدايه

تدرين يامكون بجد هالشي يضيق الصدر اخوي الصغير يتأثر

بأصحابه تلاقينا نقوله صل وكذا يقول ان شاء الله ويسمع الاذان ومايقوم

ونخوفه بلعذاب واحسه مايهتم لاهي بقوه بطلعاته الله يهديه على طاعته

<<<ايش رايك بلجديه >>>تكفين عاد:010:

![الأماكـن]!

02-01-2008, 07:49 AM

^
^
هـ ع !

شكل ماراح يتكلم إلا أنـآ ويــآـآكـ . .غنووج بس عـآـآدي يكفي حنــآ وإلا؟؟

~>>ماتبيك تصيحين خخخخ

بعدين لالالا وش ماعندي حل أجل ليه تقولين أبي أحل مشـآـآكل هـآه ليييه p;
~>ألحين بتقوم علي مدونهـ يـآويلي!

كني حاسه وش بتقولين هههه بتقولين الله يلعن السـآـآعه اللي فتحت فيها الاماكن التووبك

والساعه اللي قلتي فيها انك تبين تحلين المشاكل هههههههههه

المهم والله إنك صـآـآدقه الهدايه من اللهـ ..

لي بـآك إن شـآء اللهـ ..مع مووشكله ثـآنيه~>الله يكفينا شر المشـآكل آآمين ^^
.
.

("غنج نجد")

02-01-2008, 11:55 PM

لــــــي باك

LOVECITY

03-01-2008, 01:09 AM

مكوووون

بـــآـآكــوـو . .
مم اليوم بقولكمـ مشكله يعاني منهـآ البعض و هالمشكله أبغى أعرف حلّهـآ
~>>تشققي ياغنوج هـآه جاتك مشكله الله الله بالرد الطوووـووووويييييل ..
مم بصراحهـ أحيانـآ وفي بعض العائلات تلقون العيـآل الله يهديهم مايصلوون!!
أو يصلون بس مره ومره لا على حسب المزاج يـ ع ــني ..
والمشكلهـ يكونون بالغين يعني مو صـغار ونقول بيكبروون وبيهديهم اللهـ ويعقلون..
..ألحين ياغنج أبيك تقولين لي الحل ..اللي للحين ماغيروا عادتهمـ
~>ناويه لك على نيه!!هع هع

يوووووووووووه بقوة يا كثرهم<<<<صح النوم توها تشوف الردود

اي مرة ياغاليه

بس هذولا استغفر الله مالهم الا حل واحد

انك تمدحين عيال الجيران عندهم

هذا يصلي ماشاء الله عليه وهذا ربي موفقه علشانه يصلي

خلي الليل كله يرجع على هالصله

هذا ياكل علشانه يصلي ماشاء الله عليه <<<<لا هذي نصبة بقوة

وبس هذا حل جاك جاهز من مدونه <<<الله والحل

خلف الكواليس

شكل ماراح يتكلم إلا أنـآ ويــآـآكـ . .غنووج بس عـآـآدي يكفي حنــآ وإلا؟؟ <<<تقول مدونه

مو كأنك تعديتي الخط الأحمر اما إنتِ وغنوج بس

~>ألحين بتقوم علي مدونهـ يـآويلي

قليله ياويلك بس اليوم صلي صلاة الليل ادعي ربك
لا يكون عقابي شين

فاصل

كني حاسه وش بتقولين هههه بتقولين الله يلعن السـآـآعه اللي فتحت فيها الاماكن التووبك

والساعه اللي قلتي فيها انك تبين تحلين المشاكل هههههههههه

انتهبي مكونتنا <<<<دلع جديد

لا تسبين الدهر لأن الدهر هو الله

وربي يهدي الجميع

ويخلون عيالهم يصلون <<<<احسك بتقولين وش تبي ذي على هالدعوه

ودمتي بحب

![الأماكـن]!

03-01-2008, 02:35 AM

بــآكـ . .مـرهـ ثــآنيــهــ . .
وقسمـ حبيت هالـموضوــووع بجد ماكنت متوقعهـ بس قلت أنـآ إني شكلي بتكي ..p;
غنــوج!!
من ألحين هـآه مره ماعندك حل ومرهـ لي بــآك أنـآ أووريـك !
مدونــ ..
وربي مايفيد معهمـ نمدح عيـآل الجيران وإلا مانمدح ماهْنــآ أحد
يعني الصرااحه ماحولك أحد مايهمهم شي يمكن لو كان عاطل عن العمل
ومدحتي عيال الجيران وقتها بينقهر وبيروح يدور له وظيفه
وإلا الصـلاه آآهـ الله يرحم حالنـآ ..بس!

هذا ياكل علشانه يصلي ماشاء الله عليه <<<<لا هذي نصبة بقوة

ههههههه أمـّا ذي تسدحت عندهـآ ربي يسعدك ياشيخه

<<<تقول مدونه

مو كأنك تعديتي الخط الأحمر اما إنتِ وغنوج بس

الا طال عمرتس تعدينـآه والسموحه p=
ّ~>يقطع أبو الادب اللي نزل علي فجأه هووع

قليله ياويلك بس اليوم صلي صلاة الليل ادعي ربك
لا يكون عقابي شين

هـآه وش تقولين يـاوويح قلبي!
طيب وش رايك نصير صديقات ماتطقيني ولاأطقك~>>بزرآآآآآآنــ بقوهـ خخخ
بس الخوف ومايسوي!
مدندن~>وأنتي بعد دلع جديد^^
الموهيم الدلع حقي روعه وخاصه انه منك انتي..
وقسم استانست معك انتي وغنجنج ~>لزوم ندلع العدل واجب خخخ
وأدري يالغلا أن سب الدهر ماهوب زين وتنبهت على هالشي أكثر من مره ومشكووره غلاي..بس تراني كنت اقصد ان غنوج هي اللي بتقول كذا عالعموم انااو غنج مفروض مايكون فيه سب للدهر..يسلمو مدوون عالتنبيه وبـإنتظارك غنووج
وياهلا

[ـ’MaraM’ـ]

03-01-2008, 08:52 AM

السلام عليكم ورحمة الله وبركــآآته
وه بص ياحووبي لكم
يووعطيكم الف عاافيه كولكم وبالاخص غنجنج<<على قولة مكون هع

بالنسبه للمشكله الي عرضتها مكون
والله كثيير من السباب كذا الله يهديهم ياربي
مرره شفت كاركاتير حاطين واحد شاب امه تقومه لصلاة الفجرر
وتقول يالله الوقت تأخرر والولد ماقام
وبعدين جابوها وهي تقومه للدوام ويطمر يقووم<<اقطع ابو التعبير بس

استغفر الله بس
يعني شئ يضيق الصـدرر

الدوام اللي هو عمل دنيا ويخااف يتأخرر عليه عشان مايخصم من الراتب
والصلاة اللي امرنا بها ربي عــآدي عنده
مافكركل واحد منهم اذا جا يوم القيامه كيف بيقابل ربي
واعماله كــذآآ..!!

اقلها قبل مانقول انه اغضب ربه وفوت فرضه
قبلها عق امه واتعبها
امه العجوز المسكينه من يوم وهو صغيررر وهي تعبانه عشانه ولأجله
وزيده على كــذا بدال مايردلها المعروف يجازيها بعصيانه
"هل جزاء الإحسان إلا الإحســآن"

وبص
هذا مابجعبتي حاليــآ(:

أعدكم اني ما اقطعكم
وتصلمين لنا غنووجه
لاعدمنــآآك ياربي

تقبليـ مروريـ
أختك مرموطه

("غنج نجد")

04-01-2008, 03:38 AM

!']^
^
هـ ع !

شكل ماراح يتكلم إلا أنـآ ويــآـآكـ . .غنووج بس عـآـآدي يكفي حنــآ وإلا؟؟

~>>ماتبيك تصيحين خخخخ

بعدين لالالا وش ماعندي حل أجل ليه تقولين أبي أحل مشـآـآكل هـآه ليييه p;
~>ألحين بتقوم علي مدونهـ يـآويلي!

كني حاسه وش بتقولين هههه بتقولين الله يلعن السـآـآعه اللي فتحت فيها الاماكن التووبك

والساعه اللي قلتي فيها انك تبين تحلين المشاكل هههههههههه

المهم والله إنك صـآـآدقه الهدايه من اللهـ ..

لي بـآك إن شـآء اللهـ ..مع مووشكله ثـآنيه~>الله يكفينا شر المشـآكل آآمين ^^
.
.

لا ياغاليه هذي الساعة المباركه

واذا محد جاي الشكوه لله العوض ولاالقطيعه

نتصبر فيك لين نلاقي احد :p

واذا على المشكله الجايه تابعي ردي هاذا وبقولك موقف صار معي قبل شوي <<<احلفي

("غنج نجد")

04-01-2008, 03:42 AM

خلف الكواليس

<<<تقول مدونه

مو كأنك تعديتي الخط الأحمر اما إنتِ وغنوج بس

قليله ياويلك بس اليوم صلي صلاة الليل ادعي ربك
لا يكون عقابي شين

فاصل

:011: <<<حجري له

("غنج نجد")

04-01-2008, 03:46 AM

!']بــآكـ . .مـرهـ ثــآنيــهــ . .
وقسمـ حبيت هالـموضوــووع بجد ماكنت متوقعهـ بس قلت أنـآ إني شكلي بتكي ..p;
غنــوج!!
من ألحين هـآه مره ماعندك حل ومرهـ لي بــآك أنـآ أووريـك !

هلا مكونه

خخخخخخخخخخخخخخ

لا بس كنت كني مصدعه وتعيجزت ارد

بس اليوم استلمت كل واحده على حده <<<شقلبت الدنيا

("غنج نجد")

04-01-2008, 03:50 AM

هلا فيك ياغاليه

سعدت بتواجدك

وكلامك سليم

تلاقينهم يهتمون للأمور الي فيها فلوس بس الي فيها

اجر لا اسئل الله لهم الهدايه

وهاه ياغاليه لاتقطعينا شئري علينا كل شوي

ودي لكِ

‘

![الأماكـن]!

04-01-2008, 04:10 AM

^
^
خلاص طـآح الحطب ألحين رضيتــ ^^
ولي بـآكـآتــ إن شـآء اللهـ
ويـاهلا..

("غنج نجد")

04-01-2008, 04:14 AM

تدرون بنات

اليوم رحنا لناس قرابتنا ..المهم طول الوقت حش بخلق الله

بقوه تمللت انا وختي يعني الا متى وحنا مازلنا بهالمستوى

هذا غير انه مايجوز

المهم رحنا للعشاء ...ومن ضمن الاصناف

فيه جاد تبوله <<على قول اللبنانيين

قالت امهم انا دوم اسويها واضبطها ومن هالكلام

واحنا نعرف انها تجيبها من المطعم ..بس نمشيها على جوها

هالمره لا باين انه شغل بيت

لما رجعنا سئلت الخدامه <<<ادري بلاغه ومو زين هالشي

بس حبيت اتأكد لانها معودتنا على نصبها الي ماله مطار

قالت خدامتنا لا انا الي في سوي وقامت تعدد لي وش حطت علشان تبيني اتاكد

&هنا نجي للجد &

الحين اذا الام بهالصوره قدام بناتها ايش تتوقعون من ابنائها واحفادها وسلسلتها؟؟؟

بكذا هي كانها تعطيهم الضوء الاخضر في انتهاج مسيرتها في الكذب وغيره

من الصفاة التي تحملها

"دائماً الام مرأة لأبنائها تعكس لهم الطباع السيئه والجميله التي تحملها"

هو موقف عادي وكثير نشوفه ...بس الا متى برائيكم ؟؟

‘

![الأماكـن]!

04-01-2008, 04:46 AM

لي بـــآكـ . .

LOVECITY

04-01-2008, 04:48 AM

هلا بحبي غنوجتي حبوبتي <<<<مطوله بالدلع شكلها

لما رجعنا سئلت الخدامه <<<ادري بلاغه ومو زين هالشي

بس حبيت اتأكد لانها معودتنا على نصبها الي ماله مطار

خخخخخخخخخخخخخخ

ذكلاتني بوحدة عالم من النصب اللي يستر عليها

"دائماً الام مرأة لأبنائها تعكس لهم الطباع السيئه والجميله التي تحملها"

هو موقف عادي وكثير نشوفه ...بس الا متى برائيكم ؟؟

والله هالأشكال المصيبة ما ينفع الأغلبيه منهم

الكلام

ففيه حل واحد أنه مرة بيطيح وجههم بقوة قدام احد

فالأأفضل لهم يتوقفون عن هالعادة السيئة

قبل لا يطيح الفاس بالراس

:013: <<<<يقال لها تحل وهي ماتدري وين باب الحل

("غنج نجد")

04-01-2008, 05:48 AM

لي بـــآكـ . .

هاه بدينا بل باكات :002:

بنتظارك يالغلا

("غنج نجد")

04-01-2008, 05:54 AM

هلا بحبي غنوجتي حبوبتي <<<<مطوله بالدلع شكلها

والله هالأشكال المصيبة ما ينفع الأغلبيه منهم
الكلام
ففيه حل واحد أنه مرة بيطيح وجههم بقوة قدام احد
فالأأفضل لهم يتوقفون عن هالعادة السيئة
قبل لا يطيح الفاس بالراس
:013: <<<<يقال لها تحل وهي ماتدري وين باب الحل

هلا فيك ياقلبي انتي:42:

يشيخه هذا الحل والا بلاش <<<بتطيرك

والله ياقلبي ماينفع معهم بس الله يهديهم

"بطبيع مايجوز عن طبعه"

![الأماكـن]!

04-01-2008, 08:29 AM

.
.
.
بــآكـوـو
ممـ بصراحهـ الكذب هذا بجد منتشر وبقوووهـ قليل تلقين اللي يقول الصــدق!
وإنــ صدقــوآ..لاتخلــو السـآلفه من تجديع كمـ كلمــه تسذب..
ممم وبجد كلام غنووج إذا هي الآم كيف البنـآت كيف عيـآلهـآ؟؟
"الآم مدرستووون إذا أعددتهـآ..أعددتــ ..شعبـآ طيب الأعراق"
فـ إذا الأم نفسهـآ صالحهـ ينعكس هالشي على أولادهـآ..
والعكس صحيح..
.
.
.

هاه بدينا بل باكات :002:

بنتظارك يالغلا

خخخخ دووبـــــــــآآآ

[ـ’MaraM’ـ]

04-01-2008, 03:10 PM

السلام عليكم..
ابشرري غنووجه راح اعلق على المشكله بعدين
لاني مشغوله عندي اختبارين بوكره:(<<طيب وش مدخلك النت من الاساس

("غنج نجد")

04-01-2008, 11:07 PM

هلا مكونه

سعدت بعودتك

هلا مرموطه استناك يغاليه

والله يوفقك ان شاء الله

وخلي بالك من دراستك

شموع لا تنطفئ

05-01-2008, 05:45 PM

بـــآـآكــوـو . .

مم اليومبقولكمـمشكله يعاني منهـآالبعضوهالمشكلهأبغىأعرف حلّهـآ

~>>
تشققيياغنوجهـآهجاتك مشكله الله الله بالرد الطوووـووووويييييل ..

ممبصراحهـ أحيانـآ وفي بعض العائلات تلقونالعيـآلالله يهديهم مايصلوون!!

أو يصلون بس مره ومره لا علىحسب المزاج يـ ع ــني ..

والمشكلهـ يكونون بالغين يعنيموصـغار ونقول بيكبروونوبيهديهماللهـ ويعقلون..

..
ألحين ياغنج أبيك تقولين لي الحل ..اللي للحين ماغيرواعادتهمـ

~>
ناويه لكعلىنيه!!هع هع

مثل ما قالت غنوج شي والله يضيق الصدر اننا نشوف اخواننا
وعيالنا ما يصلون ولا هم حاسيين بقيمة الاسلام

بالعادة تشوفين الام و الأب او الاخ الكبير ما عندهم الا
يا فلان قوم صلي مع نصيحة قوية في وجهه
وننزل عليه انت وانت وانت ..

طبعا اهو ما عنده خوف من ربه وان قام صلى يصلي من خوف الاهل

تجربتي مع اخوي اللي اصغر مني
كانت صلاته الله الله والجمعة يقومها بالغصب ..
كنت استغل الفترة اللي متواجد فيها معاي يعني لو اشوف تلفزيون افتح على صلاة الحرم
واقول يا حظهم واسوي فلم من خلف الكواليس:010:
وابدا ما ألمح له واصرح
افتح برامج اسلامية واخليه يسمع معاي..

ومرة كنت معاه في السيارة بنروح لاقاربنا جبت شريط محاضرة اسمه أحوال الغارقات
وكان الشيخ في المحاضرة يتطرق احيانا لمشكلة الصلاة

قلت له شغل هذا رفض
قلت احسن لك فيه قصص بنات !! >> ما صدق وقلت بنات

تحمس الاخ وجلس يسمع وفي طريق رجعتنا كانت الوالدة وقريبتي معانا وعطاني الشريط
وجلس يفتح اغاني
انقهرت منه قلت خلينا نسمع هالشيخ حتى يخلص وجلس يسب ويشتم وشغله بالعافيه
لما وصلنا للبيت قلت هات شريطي >> معصبة

والله خلال يومين جاني قال هاتي الشريط اسمعه وصار الحمد لله يصلي احسن من قبل
وبعدها بايام قال ودي أشرطه واخذ مجموعة منها وانا اتشرط عليه يرجعها
عشان اضمن انه سمعها

صحيح مو محافظ عليها دوم بس احسن من قبل الحمد لله
وشوي شوي يجاهد نفسه ويحافظ عليها

مشكلتنا اننا نقول يا فلان صلي ولا نوجهه الا من رحم الله

نحاول اننا نتقرب منهم نسمع لهم..
ننصحهم باللين وافضال الصلاة ...الخ

عندنا النت ناخذ مقاطع للبلوتوث مؤثرة عن الصلاة وعن طاعة الله ونرسلها لهم
ويا كثر اللي اهتدوا منهـا ولله الحمد

وفي شريط للشيخ خالد الراشد بعنوان الصلاة تشتكي اكثر من رائع ومؤثر

نحببهم لمجالس الصالحين ..

ومثل ما يقولون الصاحب ساحب
ومشكلة الاهالي لاهين عن عيالهم لا يدرون مع من جاي ولا طالع

اخيرا
دعوة مسلم لاخيه المسلم بظهر الغيب مستجابة
فالله الله بالدعاء لهم بالهداية والصلاح

اسهبت في طرح ما لدي
اسأل الله ان يصلح احوالنا في السر والعلانية
وان ينفع بما نكتبه

شموع لا تنطفئ

05-01-2008, 06:03 PM

الحين اذا الام بهالصوره قدام بناتها ايش تتوقعون من ابنائها واحفادها وسلسلتها؟؟؟

بكذا هي كانها تعطيهم الضوء الاخضر في انتهاج مسيرتها في الكذب وغيره

من الصفاة التي تحملها

"دائماً الام مرأة لأبنائها تعكس لهم الطباع السيئه والجميله التي تحملها"

والله يا غنوج ما نقدر نعمم على ان ابنائها يطلعون مثلها

او العكس

ممكن تلاقيهم متفشلين من امهم ولا قادرين عليها

ولو طاح وجهها مليون مرة قدام الناس ما تتوب
لان الكذب عند البعض يسري في عروقهم

الناس صايرة تكذب واهي ما تدري انها تكذب ولا ينقال لك كذبة بيضا !!
حتى الاطفال صرنا نعلمهم الكذب على سبيل المزاح معاهم
واذا كذب الطفل نجلس نعاقبه !

هو موقف عادي وكثير نشوفه ...بس الا متى برائيكم؟؟

صار عادي ومشهد متكرر
ان سكتنا حملنا اوزار النميمة والكذب واخذنا ذنوب نحن في غنى عنها

في هذه المجالس ننسحب منهـا افضل لنا ..

او ناخذ معانا هدية تكون عبارة عن كتيب او شريط عن اخلاق المسلم وغيرهـ >>ماسكة معاها الاشرطة اليوم

نغلفها بشكل جميل ونكتب كلمات رائعه ونهديها للاقارب

طبعا بنقول يوه نحن وين ما رح يتقبل ونستحي ومن هالكلام
بس كل من وساوس الشيطان
ليه ما ننصح ونحن نقدر
قال تعالى: (ولتكن منكم أمة يدعون إلى الخير ويأمرون بالمعروف وينهون عن المنكر وأولئك هم المفلحون)

بس ما ندري
لعل الهدية تكون سبب بعد الله في هداية الام او بناتها

("غنج نجد")
عليك من الله السلام
وجعلك سهمـا من سهام الحق

("غنج نجد")

06-01-2008, 03:49 AM

("غنج نجد")

06-01-2008, 03:54 AM

كلام جميل ياشموع

بس احس الكذب صاير وراثه في العائله

يعني بكذا راح نتعب وراح نواجه اجيال واجيال من هالعائله

يعني مااخلصنا ابد والكذب شي متأصل فيهم

وبشكل لايصدق يعني لدرجة الحلف بلله

بس ربك الهادي سبحانه

الله لايحرمك الاجر ياغاليه على كلامك

<<<ماتت ضحك على الاشرطه بقوه شكلك متعامله مع محل تسجيلات :p

‘

("غنج نجد")

06-01-2008, 03:56 AM

مدونتي

مكون

مرموطه

شموع

وينكم محد معي :007: بس انا لحالي

‘

LOVECITY

06-01-2008, 04:47 AM

مدونتي

مكون

مرموطه

شموع

وينكم محد معي بس انا لحالي

خخخخخخخخخخخخخخخ
اما لحالك كثري منها

المهم حبيبتي

انا حبيت اعلق على كلام شموع بكلميتن بس

حرم الله على وجهك النار شموع
رد و طرح في السرد ماشاء الله عليك
ماننحرم منك يارب

[ـ’MaraM’ـ]

06-01-2008, 10:07 PM

(السلامـ عليكمـ ورحمة اللهـ وبركــآآته)
اقتشت لكم كثيير(:

,’

ممـ، بالنسبه لموضوعك غنج عن الكذب
بصرااحه مرره منشرر
لدرجة اعررف وحده يوم تقولك كلام
تكلمينها مرره ثانيه يتغير الكــلامـ..!!
استغفر اللهـ بس
يعني ليه الكذب؟؟

حتى في بعد ظـآآهره منتشره عند البنــآآت في المدارس
أحنا عندنا كـذآآ ..وشرينا كــذآآ..
وسافرنا الصيف للدوله الفلانيه..

بيقول البعض هذا كــآآن قبل الحين الحمد اللهـ الكل عنده خيــر
أقولهــآ صح كلامك البنــآت ممكن تغيروا..^^
بس إلى الآن تجدين هذه الظـآآهره موجوده..

سبحــآآن دائما اللي يكذبون ويقولون عندنا &عندنا
ماعندهمـ قنــآآعه..!!
واللهـ لويشكرون ربي ويحمدونه على كــل نعمه..
بــإذن اللهـ راح يرزقهمـ من حيث لايحتسبون

وأحب أنبه بنـآآت
أكثروا من الاستغفــآآر
قال تعالى:"واستغفروا ربكم إنه كان غفارا*يرسل السماء عليكم مدرارا*ويمددكم بأموال وبنين...الايه"اعذروني ما تأكدت من أخرها

فالأخيـر
مانقول الا اللهـ يهدي الجميع ويصلحهمـ ياربـ...^^

,’

شموع مميز طرحك حبوبهـ
اللهـ لا يحرمك الاجرياربيــ
ويوفقك وين مارحتي يالغلا

شموع لا تنطفئ

06-01-2008, 11:36 PM

ياهلا فيك ياشموع يلله حيها

>>موكأنك ماعطيتيني رائيك بلموضوع:023:

اعجبني كثير ياغاليه طريقة تعاملك مع اخوك

"على قولتهم اكل العنب حبه حبه"<<<وش دخل الموضوع

بس المشكله انه اذا مشاك على جوك يومين وسحب عليك لانهم يتاثرون كثير

ولأن اقوى تاثير الصحبه من الاهل

اسئل الله لهم الهدايه

‘

الله يحييك ويبقيك

>>تفشلت وبقـــــــــوة

غنوج حطي الرد التالي في مقدمة ردودي اللي فوق بما انك مشرفة القسم -_*

احمـ
تعودنا على مواضيعك المميزة والمفيدة ..
ذكرني هالموضوع بموضوع قديم جدا ..
الله يجزاك خير ويرفع قدرك

من ناحية انه يمشيني يومين فهذا الحاصل
بس لا افقد الامل شوي شوي رح يأنبه ضميرهـ ويحس بتقصيره لربه

<<<ماتت ضحك على الاشرطه بقوه شكلك متعامله مع محل تسجيلات :p

>>تلون وجههـا بكم لون

لا وربي هم كم شريط فقط حتى كان يبي اكثر وما كان عندي

تسلمين على تعقيبكـ
ربي يحفظكـ

انا حبيت اعلق على كلام شموع بكلميتن بس

حرم الله على وجهك النار شموع
رد و طرح في السرد ماشاء الله عليك
ماننحرم منك يارب

اللهم آمين ولك بـ مثل ما دعوت
موفقة مدون وين ما كنتي

شموع لا تنطفئ

06-01-2008, 11:59 PM

مرموطة

وعليكم السلام ورحمة الله وبركاته

حتى في بعد ظـآآهره منتشره عند البنــآآت في المدارس

أحنا عندنا كـذآآ ..وشرينا كــذآآ..

وسافرنا الصيف للدوله الفلانيه..

الله المستعـــان وش نرتجي من ورا هالكذب

لفت الانتباهـ او احساس بالنقص ونلجأ للكذب

الناس صايرة تجري ورا الدنيا وارضاء البشر ونسوا الاخرة

واللهـ لويشكرون ربي ويحمدونه على كــل نعمه..
بــإذن اللهـ راح يرزقهمـ من حيث لايحتسبون

صدقتي والله

وان تعدوا نعمة الله لا تحصوهـا

اللهم لك الحمد

تسلمين مرموطة >> من اول تفكر وش معنى هالكلمة !!

الله يجزاك خير يالغلا

("غنج نجد")

07-01-2008, 05:08 AM

خخخخخخخخخخخخخخخ
اما لحالك كثري منها

ادري ياقلبي الله يخليك لي

‘

("غنج نجد")

07-01-2008, 05:10 AM

الله يحييك ويبقيك

>>تفشلت وبقـــــــــوة

غنوج حطي الرد التالي في مقدمة ردودي اللي فوق بما انك مشرفة القسم -_*

احمـ
تعودنا على مواضيعك المميزة والمفيدة ..
ذكرني هالموضوع بموضوع قديم جدا ..
الله يجزاك خير ويرفع قدرك

هههههههههههههههههههههههههههههههههه

معاد يمديك :p

وبعدين:030: وش الموضوع القديم الي ذكرك

‘

("غنج نجد")

07-01-2008, 05:14 AM

ياهلا فيك يامرموطه

كلامك سليم

ياكثرهم الي يكذبون من هالناحيه

والمشكله انهم ينسون كذبتهم

والادهى انك تعرفين وش عندهم وش ماعندهم

الله يعافيهم ولا يبلانا

ربي يسعدك ياغاليه على هالتواجد

‘

("غنج نجد")

07-01-2008, 05:19 AM

:023:

راجعه لكم

<<<تفكر

‘

("غنج نجد")

07-01-2008, 07:25 AM

:040: تدرون احس براحه اذا دخلت هالموضوع >>وربي صادقه موب علشانه موضوعي

مادري ليش ممكن لاننا نتكلم بعفويه وكاننا بجلسه

او علشان وجودكم معي مونسني <<قولي قـ:002:

بس المهم اني مرتاحه الحمد الله

لفيت بلمنتدى ولفيت لين دار راسي وجيت هنا

قلت اتكلم ممكن اطلع بشي ممكن نتناقش فيه

نتكلم بشي ينفعنا

<<<تسمع انشودة يكفي مافيني..

وماعندي شغله الا اشغل الدفايه واطفيها <<<اخاف اذا طولت تحترق بوجهي :007:

المهم ماعلينا ..

قبل شوي رديت على موضوع لعضوه

تقول ان عمرها 23 وفيه واحد بيتقدم لها

وهو اصغر منها ...

المهم بعدين قالت هالموضوع بينها وبينه ومحد درا جاء فوق راسي

عشرين استفهام ؟؟

كيف وشلون ومن هو ...بس برضو مو هذا كلامي ولا هذا يهمني بس تعجبت ماانكر لكم

احس صار بهالزمن

البنات هم الي يقررون من يبون قبل البنت ماتدري الا وهي في بيت زوجها

قبل الزواج بالاصول الي شاري البنت يطق الباب ويخطبها من اهلها

بس الحين حال البنات يشيب الراس

تشتغل على اهلها من تحت لتحت تتعرف على شاب باي طريقه

وممكن يوهمها بزواج وممكن لا بس برضو مو هذا اهتمامي

كيف البنات تجرؤ وخطو هالخطوه من دون اهلهم ومشورتهم

كيف هي الي تدور على الخطيب ...ليش وش الي ناقصها

وش الي محتاجه له ..والا هذا تغير مع تغير الوقت والناس والمجتمع والعادات والتقاليد

بجد شي غريب انا كلامي مااقيسه بس على هالعضوه

فيه كثير وكثير غيرها من جميع اصناف المجتمع

طيب وبعدين ..تتوقعون ياقفون عند هالحد لا طبعاً

مالقت نصيبها مع هذا تروح لواحد غيره ايش المشكله عندها

وشعارهم ايش "اسعى ياعبدي وانا بسعى معاك"

بجد شي محزن

اكيد لكم رائي غير وممكن توافقوني

بس بجد وش الحل

انا كثير اواجه ناس من هالاصناف بلواقع

بس ابي حل ممكن اساعدهم فيه

‘

النبضة

07-01-2008, 02:32 PM

{مشكورة أختي كلام جميل ترا الأسعاف جات شالتني بس علشان الكلام الجميل }[هههههههههههههههههههههههههههههههههههههههههههههههههه ههههههههههههههههههههه]

النبضة

07-01-2008, 04:14 PM

الله الموضوووووووووووووووع يجنن

الساحرة2008

07-01-2008, 05:18 PM

هاااااااااااااااااااااااااااااااااااااااى

الساحرة ترحب بكم
هههههههههههههههههههههههههههههههههههه

("غنج نجد")

07-01-2008, 07:52 PM

هلا فيكم غالياتي

اذا فيه شي وحابين تشاركونا

نسعد بمشاركتكم

‘

![الأماكـن]!

08-01-2008, 12:52 AM

بسم الله الرحمن الرحيمـ
قعدت يومين مادخلت النت بكبره عشـآن تسـذا ماجيت هوون بالمووضوع المووهيمـ ..
ولكمـ بـآك لـي p;
ألحين هالبنات اللي يدخلوون يكركروون ويطلعون وش قصتهم؟
مم غنوج وحتى انـآ ووربي احووووب هالموضووع مررره يمكن زي ماقلتي
عشان نتكلم بعفويه
وحريه بعد موب كل شوي طابتـ (ن)علينـآ وحدهـ تقول ممنوع الدردشه!!
يغلق!!!
آآآآآآه ياأنهـآ تووضل معاي..
ّّّلي بـآك إن شاء اللهـ

![الأماكـن]!

08-01-2008, 01:02 AM

^
^
معقووله!!!
غنووج بالله عليــك وش هالحكي معقول فيه بنـآت كذا!!
تتفق مع الشـآب من ورى أهلهـآ وتزبط كل شي وهم مايدروون كيف؟
مايصلـح وش هالكلام؟؟وش هالسووايه فيه بنت عاقله تسوي كذا!!!
ّّ~>>تحت تأثير الصددمه لاتلوومونهـآ
مم أصـلا حتى لو تزوجت وصـآر بينهم أدنى خلاف بيقعد يعايرهـآ بيقول
لو أنك بنت ناس أو شي من هالقبيل بيقوولها ماكنتي كلمتيني
واتفقتي معاي على كل شي من ورى أهلك صح وإلا لا؟؟
وربي دووم تصيرر كذا..
عالعموم أنـآ أتكلم عن الووضع المزري بشكل عام ماأتكلم عن البنت
اللي فووق تكلمتي عنها غنووج..لك مني تحيييه كبيييييييييييييييره
غنووج على هالموضوع اللي بجد حسيت اننا كبـآر وممكن نطرح مشاكل وحلووول لهـآ..
يعطيك العافيه ياارب..
وتراني متكيه يعني متكيه ههههه

("غنج نجد")

08-01-2008, 04:06 AM

!']بسم الله الرحمن الرحيمـ
قعدت يومين مادخلت النت بكبره عشـآن تسـذا ماجيت هوون بالمووضوع المووهيمـ ..
ولكمـ بـآك لـي p;
ألحين هالبنات اللي يدخلوون يكركروون ويطلعون وش قصتهم؟
مم غنوج وحتى انـآ ووربي احووووب هالموضووع مررره يمكن زي ماقلتي
عشان نتكلم بعفويه
وحريه بعد موب كل شوي طابتـ (ن)علينـآ وحدهـ تقول ممنوع الدردشه!!
يغلق!!!
آآآآآآه ياأنهـآ تووضل معاي..
ّّّلي بـآك إن شاء اللهـ

هلا مكون

وانا اقول وينها البنت وين غاطه

لك فقده يادبه

ايه شفتيهم مادري وش عندهم اخبر اني متحمسه بسالفه

تفاجئت يوم شفت ردودهم قلت شكلي كاتبه نكته وانا مادري

ههههههههههههههههههه

ربي يسعدك ياغاليه

‘

("غنج نجد")

08-01-2008, 04:13 AM

والله يامكون ياكثرهم

والاهل مايدرون ..وتحسين انهم جاهلين

اهم شي يتزوجون واحد عنده فلوس وبس

تحسين البنات صار تفكيرهم مادي بحت

ولو تعمقنا من هالناحيه جتنا عقد نفسيه لاني بجد احس بهم من هالموضوع

لان البنات يجهلون اشياء كثير

مايدرون انه مثل ماقلتي بيعايرهم بهالشي

بس الله يهديهم

والمفروض الاهل يراقبون بناتهم اكثر مو كذا مخلينهم على راحتهم

مكون لاتقطعين يابنت

‘

LOVECITY

08-01-2008, 04:39 AM

مكون

ألحين هالبنات اللي يدخلوون يكركروون ويطلعون وش قصتهم؟

خخخخخخخخخخ ياحبيلك بس وربي ضحكت
وهذا طال عمرك نموذج حي
ربي جابة كإفتتاحيه لتواجدك <<<وش تبي ذي

وحريه بعد موب كل شوي طابتـ (ن)علينـآ وحدهـ تقول ممنوع الدردشه!!
يغلق!!!
آآآآآآه ياأنهـآ تووضل معاي

انا معاك بس اذا صار فيه نماذج مشرفه مثل
اللي فوق بكذا يحطون هالشي

غنوج

ايه شفتيهم مادري وش عندهم اخبر اني متحمسه بسالفه

تفاجئت يوم شفت ردودهم قلت شكلي كاتبه نكته وانا مادري

هههههههههههههههههههههههههه
يالبى النكت ياناس <<<ماتدري شسالفه ابدا

غنوج
بالنسبة للمشكله

للأسف كثير كذا بس
لا نادرا يسمعون النصيحه
ان نصحتيهم قالوا معقدة
وان قلتي مايصير قالوا بلاك ماتعرفين الحب ومن هالكلام

فربي يصلحهم ومالهم غير الدعاء
مع التحبيب في انفسهم اشياء ممكن تشغلهم

واشوف الكثير من يتجهون لهذا الاتجاه بسبب مراهقتهم
او اسباب اخرى

يعطيك ربي العافيه غنوج وربي يحفظك ويحفظني و يحفظ الاماكن وكل اللي مروا بالموضوع <<<بس لا طبعا والمسلمين اجمعين <<<منسوية يقال فاصل

![الأماكـن]!

08-01-2008, 05:08 AM

. .بـآكـ . .
[غنوج]
آآهـ وقسم اللي يقهر أن الأهل مايدرون..
البنات يفصلون ويلبسون والأهل ماحولك أحد مـآيدرونــ ..!
.
.
.
[مدونــ ]
ههههه دووم إن شاء اللهـ ..
بعدين لاياختي وربي مبالغ بهالشي كل مادق عود بحصـآه قالوا ممنوع
الدردشه أجل كيف كل وحده بتوصل المعلوميه للثانيه كيف نـآخذ ونعطي
بالكلام إذا ممنوع نتكلم هاه قولي لي كيف
شوفي المونتدى على المشرفات كل ابووهم على عيني وراسي بس
كل شي وله حد يعني مفروض كل شي يكون بحدود المعقول صح وإلا لا!!
وحلووووه الله يحفظك وغنوج والاماكن وبس هههههه
ربي يسعدك مدونه ولي بـآك مو بـ رد لا إن شاء الله بيكون موووشكله
عشان تستانس غنوج هع هع..
سلامـ

LOVECITY

08-01-2008, 05:18 AM

مكون

شوفي المونتدى على المشرفات كل ابووهم على عيني وراسي بس
كل شي وله حد يعني مفروض كل شي يكون بحدود المعقول صح وإلا لا!!

اها اجل اعذريني اختي بحذف ردك
ولكل شي حد اختي

ودمتي بحب
مدينة الحب

:006:

خخخخخخخخخخخخخخ امزح
ودمتي بحب مدينة الحب <<<يقال حطت هذا للتموية
والله اي اكيد ياغاليه لكل شي حد بارك الله فيك
وبإنتظار مشكلتك <<<مو كأنها هلت الموضوع لها :040:

("غنج نجد")

08-01-2008, 11:05 PM

انتظر مشكلتك مكون

![الأماكـن]!

09-01-2008, 12:30 AM

بسم الله الرحمن الرحيمـ

بصراحهـ مدري من وين أبــدأ..وإلا وش أقـوـول؟

مثـل ماأنتم شـآيفين كل مالهـآ الدنيـآ تتغير والنـآس يتغيرون ..

والمشكله اللي راح أطرحهـآ لابد أنه سبق وإنطرحت ..

مع كذا برجع أطرحهـآ..ألا وهي بنــآتنــآ!!

يعني بعض البنـآت ومو بعض إلا الأغلبيـــه طريقه لباسهــآ للعبايــه مش ولابــد!!!

اللي تجيك مـآشاء الله تحلفين أنه فستـآن عروس مطرز من فوووق لين تحت

لا وياليت على كذا لونه أسود تجيك العبايه ثلاث أرباعها ملوونه وربع أسوود وفيه 120 لوون!!!

وحركات ومشيووله من ورى..وكل يوم سادحين لي إسم بالسوق!

وإلا تجيك العبايه تفصل جسم البنت تفصيييييييييييييل!!

يعني البنت نفسهـآ ماتطيح من عين نفسهـآ ماتستحي من أن الأغراب يشوفونها

يعني عادي تطلعين كذا قدام الرجال؟؟!!

الصدر باين والأرداف واضحين والخصر مايحتاااااج!

وأزيدكم من الشعر بيت لامن جاوا يطلعوون نصوا لهم كوافيره يبون مكياج سوووق!

قسم بالله أحتقرهمـ بجد أبفهم وين أهاليهم؟

كيف الأم والأبوو وأخوانهم كيف يرضون بناتهم يطلعون بهالصوووره!!

ماعندهم غيره!!

ماعندهم خووف من اللهـ سبحانه وتعالى..

وأتوووقع أن الأهالي مثل بنـآتهم لو ماكانوا مثلهم ماتجرأو البنات يسوون كذا..

إلا ماندر يعني قلييل ان الأهل يلبسوون زي النـآس..

ماقول إلا عسى الله يهديهمـ ..
ومنتظره ردووودكم ..

("غنج نجد")

09-01-2008, 12:51 AM

هلا مكون

وياااااااااامرحبا بلمشاكل <<<انهبلت :002:

استهبل ابي بس نسولف القعده بردة نبي نحمها

بنقشات والاخذ والعطاء

والي طرحتي ياغاليه

بجد شي مهم واشوفه بمجتمعنا كثير اقصد مجتمعي

بس زي الهبال الي في السوقه لا

احسهم مو عبايات الا فساتين حفله هههههههههههه

واخونا الخليجين الله يصلحهم فيه منهم يلبس عبايه للعرض

اسم انها لبست وحنا مجتمع يتأثر بلهوى

ونحب الجديد لو انه مضر اهم شي انه جديد

انا بصراحه البس عباية كتف بس سودا واسعه

وعندي عبايه للحفلات يادوب على الاكمام

بس ماالبسها كثير

بس مو زي الي نشوفها الحين

زي ماقلتي مرفوعه ومادري وش حاطين عليها

بس بجد شي يفشل مادري كيف يطلعون فيها وجسمهم مفصل فيها

الله يهديهم

المفروض تمنع من الاسواق لاننا مجتمع محافظ بس لاحياة لمن تنادي

ومافيه اي رقابه لامن الاهل ولامن اي احد

هذا رئيي

‘

![الأماكـن]!

09-01-2008, 02:31 AM

بــآكـ ..
ياهلا غنووج . .
ممم بجد مفرووض ماتنبــآع عبايـآت بهالشكل!
لا ألحين يقال لهم متسترين عارفه لييه لأن بعضهم صـآر يكشف الغطـآء. .
مره والله ماأتذكر وين كنت بس كنـآ بسووق وأشووف لي وحده طوول
وعرض ولاّفه الطرحه زي الحجاب والوجه كله طـآلع خير!!وين النـآس؟!
تحسب أنهـآ ببيتهمـ ..
والله لايويكم روحوا للمدارس الأهليــه تطلع البنت بـ الهاي سكول
والوجه كله طاالع وشعرها طالع حاطه الطرحه بس زينه..
الله يهديهم شي يدمي القلب بجد
الله يثتنـآ بس!!
سوري طولت عليكوم بالحكي..
p;

("غنج نجد")

10-01-2008, 12:17 AM

اما على كشف الوجه
اذكر قبل شهر كنا بلفيصليه
نتغدا المهم البنات الالغب كاشفين الوجه
غير بنات الي تحسينهم بلمتوسط وبهالحدود فاكين
شعورهم هذا غير انهم يستهبلون مع الشباب
وضحكة الوحده تسمعينها وين
وربي انهبلت معقوله وين الاهل عنهم
تاركينهم مهيتين مع صحباتهم
حنا بعد الغدا تسوقنا وتاخرنا
والبنات من الظهر قاعدين يلفون بسوق ومايدخلون
محلات يعني واضح انهم جايين تسكع
معقوله مامعهم احد كبير ينتبه لهم
انا وانا كبيره اخاف لحالي اروح
كيف هم
بجد شي يشيب الراس
<<ابد ماستلمتهم
‘